.. श्री महात्रिपुरसुन्दरी सुप्रभातम् ..
        जय जय शङ्कर
ॐ श्री ललिता महात्रिपुरसुन्दरी पराभट्टारिका समेताय
श्री चन्द्रमौळीश्वर परब्रह्मणे नमः ..
ॐ उत्तिष्टोत्तिष्ठ देवेशी उत्तिष्ठ शिवसुन्दरी .
उत्तिष्ठश्री महाराज्ञी त्रैलोक्य~ं मङ्गल~ं कुरु ..
नीराजनेन जगदीश्वरि भक्तसङ्घैः
नीराज्यसे भुवनमङ्गल सिद्धिहेतोः .
भक्त्या प्रभातसमये सहवाद्यघोषैः
सम्स्तूयसे जहिहि कैतव योगनिद्राम् ..
निद्रा न ते त्रिजगदीश्वरि विष्णुमाये
सृष्टिस्थितिप्रलय केलिषु स~ंस्थितायाः .
मन्मोहपाश निगडस्य विमोक्षणाय
स~ंप्रार्थ्यसे जननि मङ्गलसूक्तिभिस्त्वम् ..
कल्याणशैलनिलये करुणार्णवे श्री
कामेश्वराङ्कनिहिते कलिदोषहन्त्री .
कालाम्बुधाभकचबन्धबरे मनोज्ञे
श्रीमन्महात्रिपुरसुन्दरि सुप्रभातम् ..
एणाङ्कखण्डयुतरत्नलसत्किरीटे
शोणाचलेश सहधर्मिणि बाणहस्ते .
वीणाधरेण मुनिना परिगीयमाने
श्रीमन्महात्रिपुरसुन्दरि सुप्रभातम् ..
ईशानमुख्यसुरमौळिलसत्पदाब्जे
श्रीमत्सदाशिव महाफलकाढ्यमञ्चे .
ईशत्स्मितेन विकसत्सुमनोहरास्ये
श्रीमन्महात्रिपुरसुन्दरि सुप्रभातम् ..
लज्जनतेन नयनेन विलोकमाने
त्रैलोक्यसुन्दरतनु~ं परशम्भुनाथम् .
मन्दस्मितोल्लसित चारु मुखारविन्दे
श्रीमन्महात्रिपुरसुन्दरि सुप्रभातम् ..
ह्रीङ्कारजापसुहिते हृदयाम्बुजस्थे
हार्दान्धकारविनिहन्त्रि हरित्पतीढ्ये .
हर्यक्षवाहिनि हलायुध सेविताङ्घ्रे
श्रीमन्महात्रिपुरसुन्दरि सुप्रभातम् ..
हस्तेन देवि फणिपाशमथेक्षुचापम्
पुष्पास्त्रमङ्कुशवर~ं सतत~ं दधाने .
हेमाद्रितुङ्गतरशृङ्ग कृताधिवासे
श्रीमन्महात्रिपुरसुन्दरि सुप्रभातम् ..
सर्वागमोपनिषदीढ्य महाप्रभावे
सामाभिगानविनुते सरसीरुहाक्षि .
सच्चित्सुखैकरसिके सकलेष्टदात्री
श्रीमन्महात्रिपुरसुन्दरि सुप्रभातम् ..
कल्याणदात्रि कमनीयगुणार्णवे श्री
कल्माषपादपरिपूजित पादपद्मे .
कैवल्यदे कलिमलापह चित्स्वरूपे
श्रीमन्महात्रिपुरसुन्दरि सुप्रभातम् ..
हत्वाऽसुरेन्द्रमतिबाहुबलावलिप्तम्
भण्ड~ं प्रचण्डसमरोद्यतमात्तशस्त्रम् .
सम्रक्षित त्रिजगति त्रिपुराधिवासे
श्रीमन्महात्रिपुरसुन्दरि सुप्रभातम् ..
लब्धु~ं तव त्रिपुरसुन्दरि सत्कटाक्षम्
कारुण्यपूर्णममरेशमुखादिगीशाः .
कक्ष्यान्तमेत्य निवसन्ति तव प्रबोधे
श्रीमन्महात्रिपुरसुन्दरि सुप्रभातम् ..
ह्रीमित्यजस्रमपि ते मनुमादरेण
हृत्पङ्कजेनुकलयन् प्रजपामि नित्यम् .
हर्षप्रदे हृदयसन्तमसापहन्त्री
श्रीमन्महात्रिपुरसुन्दरि सुप्रभातम् ..
सत्यात्मिके सकललोकहितप्रदेऽम्ब
सम्पत्करी किटमुखी परिसेविताङ्घ्रे .
सर्वानवद्यचरिते सुकुमारगात्रि
श्रीमन्महात्रिपुरसुन्दरि सुप्रभातम् ..
कामोहि तेऽम्ब करुणालवमेव लब्ध्वा
पुष्पायुधोपि भवति त्रिजगद्विजेता .
कामेश्वरेण परिकाङ्क्षित सत्कटाक्षे
श्रीमन्महात्रिपुरसुन्दरि सुप्रभातम् ..
लज्जापदाङ्कित मनुप्रतिपाद्यरूपे
लीलाविलोकन विसृष्टजगत्सहस्रे .
लावण्यपूर्णवदने ललिताभिधाने
श्रीमन्महात्रिपुरसुन्दरि सुप्रभातम् ..
ह्रीङ्कारमन्त्रनिलये हृदिभावनीये
ह्रीङ्कारगर्भमनुजापक सिद्धिदात्रि .
ह्रीङ्कारमन्त्रमहनीय निजस्वरूपे
श्रीमन्महात्रिपुरसुन्दरि सुप्रभातम् ..
श्रीशङ्करार्चितपदे शिवभागधेये
श्रीकामराजमहिषि श्रितकामधेनो .
श्रीशङ्करस्यकुलमङ्गलदेवतेऽम्ब
श्रीमन्महात्रिपुरसुन्दरि सुप्रभातम् ..
श्री सुप्रभातमहित स्तवमम्बिकायाः
भक्त्या प्रभातसमये भुवि ये पठन्ति .
श्री मात्रनुग्रहनिरस्तसमस्त खेदाः
सच्चित्सुखात्मक पद~ं प्रविशन्ति सत्यम् ..
मुनीन्द्रनारदागस्त्य मान्यायै जय मङ्गलम् .
प्रणतार्तिनिवारिण्यै पूर्णायै शुभमङ्गलम् ..
विविधोपनिषद्वेतृ वेद्यायै जय मङ्गलम् .
शुद्धबुद्धसदानन्द ब्रह्मणे शुभ मङ्गलम् ..
नतलोकेष्टदायिन्यै नित्यायै नित्य मङ्गलम् .
सर्वमङ्गलयुक्तायै सत्यायै सर्व मङ्गलम् ..
सर्वब्रह्माण्डसन्दोह जनन्यै जय मङ्गलम् .
शङ्करार्चितपादायै शिवाण्यै शुभमङ्गलम् ..
श्रीचक्रराजनिलयायै श्रीमात्रे जय मङ्गलम् .
महात्रिपुरसुन्दर्यै शिवायै शुभमङ्गलम् ..
.. इति श्री शङ्करानन्दनाथ विरचित~ं
श्री महात्रिपुरसुन्दरी सुप्रभातम् समाप्तम् .. ॐ..

Encoded by R. Harshananda harshanand\__16@rediffmail.com

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com