%@@1
% File name             : raghuvansha3.itx
%--------------------------------------------
% Text title            : raghuvansha3
% Author                : kalidasa
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : Mrs and Mr H Desiraju Rao and Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : April 28, 2005
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :         
% http://sanskrit.gde.to/
% http://www.alkhemy.com/sanskrit/
% http://sanskrit.bhaarat.com See the document project
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's' agreement.
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=50pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Raghuvansha by Kalidas Chapter 3 ..}## 
\itxtitle{.. kaalidaasakR^itaM raghuva.nsham sarga 3 ..}##\endtitles ## 
athepsita.n bharturupasthitodaya.n sakhiijanodviikShaNakaumudiimukham | 
nidaanamikShvaakukulasya sa.ntateH sudakShiNaa dauhR^idalakShaNa.n dadhau || 3\-1|| 
shariirasaadaadasamagrabhuuShaNaa mukhena saalakShyata lodhrapaaNDunaa | 
tanuprakaashena viceyataarakaa prabhaatakalpaa shashineva sharvarii || 3\-2|| 
tadaanana.n mR^itsurabhi kShitiishvaro rahasyupaaghraaya na tR^iptimaayayau | 
kariiva sikta.n pR^iShataiH payomucaa.n shucivyapaaye vanaraajipalvalam || 3\-3|| 
diva.n marutvaaniva bhokShyate bhuva.n digantavishraantaratho hi tatsutaH | 
ato.abhilaaShe prathama.n tathaavidhe mano babandhaanyarasaanvila~Nghya saa || 3\-4|| 
na me hriyaa sha.nsati ki.ncidiipsita.n spR^ihaavatii vastuShu keShu maagadhii | 
iti sma pR^icChatyanuvelamaadR^itaH priyaasakhiiruttarakosaleshvaraH || 3\-5|| 
upetya saa dohadaduHkhashiilataa.n yadeva vavre tadapashyadaahR^itam | 
na hiiShTamasya tridive.api bhuupaterabhuudanaasaadyamadhijyadhanvanaH || 3\-6|| 
krameNa nistiirya ca dohadavyathaa.n praciiyamaanaavayavaa raraaja saa | 
puraaNapatraapagamaadanantara.n lateva sa.nnaddhamanoj~napallavaa || 3\-7|| 
dineShu gacChatsu nitaantapiivara.n tadiiyamaaniilamukha.n stanadvayam | 
tirashcakaara bhramaraabhiniilayoH sujaatayoH pa~NkajakoshayoH shriyam || 3\-8|| 
nidhaanagarbhaamiva saagaraambaraa.n shamiimivaabhyantaraliinapaavakaam | 
nadiimivaantaHsalilaa.n sarasvatii.n nR^ipaH sasattvaa.n mahiShiimamanyata || 3\-9|| 
priyaanuraagasya manaH samunnaterbhujaarjitaanaa.n ca digantasa.npadaam | 
yathaakrama.n pu.nsavanaadikaaH kriyaa dhR^iteshca dhiiraH sadR^ishiirvyadhatta saH || 3\-10|| 
surendramaatraashritagarbhagauravaatprayatnamuktaasanayaa gR^ihaagataH | 
tayopacaaraa~njalikhinnahastayaa nananda paariplavanetrayaa nR^ipaH || 3\-11|| 
kumaarabhR^ityaakushalairanuShThite bhiShagbhiraaptairatha garbhabharmaNi | 
patiH pratiitaH prasavonmukhii.n priyaa.n dadarsha kaale divamabhritaamiva || 3\-12|| 
grahaistataH pa~ncabhiruccasa.nsthitairasuuryagaiH suucitabhaagyasa.npadam | 
asuuta putra.n samaye shaciisamaa trisaadhanaa shaktirivaarthamakShayam || 3\-13|| 
dishaH prasedurmaruto vavuH sukhaaH pradakShiNaarcirhaviragniraadade | 
babhuuva sarva.n shubhasha.nsi tatkShaNa.n bhavo hi lokaabhyudayaaya taadR^ishaam || 3\-14|| 
ariShTashayyaa.n parito visaariNaa sujanmanastasya nijena tejasaa | 
nishiithadiipaaH sahasaa hatatviSho babhuuvuraalekhyasamarpitaa iva || 3\-15|| 
janaaya shuddhaantacaraaya sha.nsate kumaarajanmaamR^itasa.nmitaakSharam | 
aadeyamaasiittrayameva bhuupateH shashiprabha.n Chatramubhe ca caamare || 3\-16|| 
nivaatapadmastimitena cakShuShaa nR^ipasya kaanta.n pibataH sutaananam | 
mahodadheH puura ivendudarshanaadguruH praharShaH prababhuuva naatmani || 3\-17|| 
sa jaatakarmaNyakhile tapasvinaa tapovanaadetya purodhasaa kR^ite | 
diliipasuunurmaNiraakarodbhavaH prayuktasa.nskaara ivaadhika.n babhau || 3\-18|| 
sukhashravaa ma~NgalatuuryanisvanaaH pramodanR^ityaiH saha vaarayoShitaam| 
na kevala.n sadmani maagadhiipateH pathi vyajR^imbhanta divaukasaamapi ||3\-19|| 
na sa.nyatastasya babhuuva rakShiturvisarjayedya.n sutajanmaharShitaH | 
R^iNaabhidhaanaatsvayameva kevala.n tadaa pitR^INaa.n mumuce sa bandhanaat || 3\-20|| 
shrutasya yaayaadayamantamarbhakaH tathaa pareShaa.n yudhi ceti paarthivaH | 
avekShya dhaatorgamanaarthamarthaviccakaara naamnaa raghumaatmasambhavam || 3\-21|| 
pituH prayatnaatsa samagrasa.npadaH shubhaiH shariiraavayavairdine dine | 
pupoSha vR^iddhi.n haridashvadiidhiteranupraveshaadiva baalacandramaaH || 3\-22|| 
umaavR^iShaa~Nkau sharajanmanaa yathaa yathaa jayantena shaciipurandarau | 
tathaa nR^ipaH saa ca sutena maagadhii nanandatustatsadR^ishena tatsamau || 3\-23|| 
rathaa~Nkanaamnoriva bhaavabandhana.n babhuuva yatprema parasparaashrayam | 
vibhaktamapyekasutena tattayoH parasparasyopari paryaciiyata || 3\-24|| 
uvaaca dhaatryaa prathamodita.n vaco yayau tadiiyaamavalambya caa~Ngulim | 
abhuucca namraH praNipaatashikShayaa piturmuda.n tena tataana so.arbhakaH || 3\-25|| 
tama~Nkamaaropya shariirayogajaiH sukhairniShi~ncantamivaamR^ita.n tvaci | 
upaantasa.nmiilitalocano nR^ipashciraatsutasparsharasaj~nataa.n yayau || 3\-26|| 
ama.nsta caanena paraardhyajanmanaa sthiterabhettaa sthitimantamanvayam | 
svamuurtibhedena guNaagryavartinaa patiH prajaanaamiva sargamaatmanaH || 3\-27|| 
sa vR^ittacuulashcalakaakapakShakairamaatyaputraiH savayobhiranvitaH | 
liperyathaavadgrahaNena vaa~Nmaya.n nadiimukheneva samudramaavishat || 3\-28|| 
athopaniita.n vidhivadvipashcito vininyurena.n guravo gurupriyam | 
avandhyayatnaashca babhuuvuratra te kriyaa hi vastuupahitaa prasiidati || 3\-29|| 
dhiyaH samagraiH sa guNairudaaradhiiH kramaaccatasrashcaturarNavopamaaH | 
tataara vidyaaH pavanaatipaatibhirdisho haridbhirharitaamiveshvaraH || 3\-30|| 
tvaca.n ca medhyaa.n paridhaaya rauraviimashikShataastra.n pitureva mantravat | 
na kevala.n tadgururekapaarthivaH kShitaavabhuudekadhanurdharo.api saH || 3\-31|| 
mahokShataa.n vatsataraH spR^ishanniva dvipendrabhaava.n kalabhaH shrayanniva | 
raghuH kramaadyauvanabhinnashaishavaH pupoSha gaambhiiryamanohara.n vapuH || 3\-32|| 
athaasya godaanavidheranantara.n vivaahadiikShaa.n niravartayadguruH | 
narendrakanyaastamavaapya satpati.n tamonuda.n dakShasutaa ivaababhuH || 3\-33|| 
yuvaa yugavyaayatabaahura.nsalaH kavaaTavakShaaH pariNaddhaka.ndharaH | 
vapuHprakarShaadajayadguru.n raghustathaapi niicairvinayaadadR^ishyata || 3\-34|| 
tataH prajaanaa.n ciramaatmanaa dhR^itaa.n nitaantagurvii.n laghayiShyataa dhuram | 
nisargasa.nskaaraviniita ityasau nR^ipeNa cakre yuvaraajashabdabhaak || 3\-35|| 
narendramuulaayatanaadanantara.n tadaaspada.n shriiryuvaraajasa.nj~nitam | 
agacChada.nshena guNaabhilaaShiNii navaavataara.n kamalaadivotpalam || 3\-36|| 
vibhaavasuH saarathineva vaayunaa ghanavyapaayena gabhasthimaaniva | 
babhuuva tenaatitaraa.n suduHsahaH kaTaprabhedena kariiva paarthivaH || 3\-37|| 
niyujya ta.n homatura.ngarakShaNe dhanurdhara.n raajasutairanudrutam | 
apuurNamekena shatakratuupamaH shata.n kratuunaamapavighnamaapa saH || 3\-38|| 
tataH para.n tena makhaaya yajvanaa tura.ngamutsR^iShTamanargala.n punaH | 
dhanurbhR^itaamagrata eva rakShiNaa.n jahaara shakraH kila guuDhavigrahaH || 3\-39|| 
viShaadaluptapratipatti vismita.n kumaarasainya.n sapadi sthita.n ca tat | 
vasiShThadhenushca yadR^iicChayaagataa shrutaprabhaavaa dadR^ishe.atha nandinii || 3\-40|| 
tada~Nkanisyandanajalena locane pramR^ijya puNyena puraskR^itaH sataam | 
atiindriyeShvapyupapannadarshano babhuuva bhaaveShu diliipanandanaH || 3\-41|| 
sa puurvataH parvatapakShashaatana.n dadarsha deva.n naradevasa.nbhavaH | 
punaH punaH suutaniShiddhacaapala.n harantamashva.n ratharashmisa.nyutam || 3\-42|| 
shataistamakShNaamanimeShavR^ittibhirhari.n viditvaa haribhishca vaajibhiH | 
avocadena.n gaganaspR^ishaa raghuH svareNa dhiireNa nivartayanniva || 3\-43|| 
makhaa.nshabhaajaa.n prathamo maniiShibhistvameva devendra sadaa nigadyase | 
ajasradiikShaaprayatasya madguroH kriyaavighaataaya katha.n pravartase || 3\-44|| 
trilokanaathena sadaa makhadviShastvayaa niyamyaa nanu divyacakShuShaa | 
sa cetsvaya.n karmasu dharmacaariNaa.n tvamantaraayo bhavasi cyuto vidhiH || 3\-45|| 
tada~Nkamagrya.n maghavanmahaakratoramu.n tura.nga.n pratimoktumarhasi | 
pathaH shruterdarshayitaara iishvaraa maliimasaamadadate na paddhatim || 3\-46|| 
iti pragalbha.n raghuNaa samiirita.n vaco nishamyaadhipatirdivaukasaam | 
nivartayaamaasa ratha.n savismayaH pracakrame ca prativaktumuttaram || 3\-47|| 
yadaattha raajanyakumaara tattathaa yashastu rakShya.n parato yashodhanaiH | 
jagatprakaasha.n tadasheShamijyayaa bhavadgururla~Nghayitu.n mamodyataH || 3\-48|| 
hariryathaikaH puruShottamaH smR^ito maheshvarastryambaka eva naaparaH | 
tathaa vidurmaa.n munayaH shatakratu.n dvitiiyagaamii na hi shabda eSha naH || 3\-49|| 
ato.ayamashvaH kapilaanukaariNaa pitustvadiiyasya mayaapahaaritaH | 
ala.n prayatnena tavaatra maa nidhaaH pada.n padavyaa.n sagarasya sa.ntateH || 3\-50|| 
tataH prahaasyaapabhayaH purandara.n punarbabhaaShe turagasya rakShitaa | 
gR^ihaaNa shastra.n yadi sarga eSha te na khalvanirjitya raghu.n kR^itii bhavaan || 3\-51|| 
sa evamuktvaa maghavantamunmukhaH kariShyamaaNaH sashara.n sharaasanam | 
atiShThadaaliiDhavisheShashobhinaa vapuHprakarSheNa viDambiteshvaraH || 3\-52|| 
raghoravaShTambhamayena patriNaa hR^idi kShato gotrabhidapyamarShaNaH | 
navaambudaaniikamuhuurtalaa~nChane dhanuShyamogha.n samadhatta saayakam || 3\-53|| 
diliipasuunoH sa bR^ihadbhujaantara.n pravishya bhiimaasurashoNitocitaH | 
papaavanaasvaaditapuurvamaashugaH kutuuhaleneva manuShyashoNitam || 3\-54|| 
hareH kumaaro.api kumaaravikramaH suradvipaasphaalanakarkashaa~Ngulau | 
bhuje shaciipatravisheShakaa~Nkite svanaamacihna.n nicakhaana saayakam || 3\-55|| 
jahaara caanyena mayuurapatriNaa shareNa shakrasya mahaashanidhvajam | 
cukopa tasmai sa bhR^isha.n surashriyaH prasahya keshavyaparopaNaadiva || 3\-56|| 
tayorupaantasthitasiddhasainika.n garutmadaashiiviShabhiimadarshanaiH | 
babhuuva yuddha.n tumula.n jayaiShiNoradhomukhairuurdhvamukhaishca patribhiH || 3\-57|| 
atiprabandhaprahitaastravR^iShTibhistamaashraya.n duShprasahasya tejasaH | 
shashaaka nirvaapayitu.n na vaasavaH svatashcyuta.n vahnimivaadbhirambudaH || 3\-58|| 
tataH prakoShThe haricandanaa~Nkite pramathyamaanaarNavadhiiranaadiniim | 
raghuH shashaa~Nkaardhamukhena patriNaa sharaasanajyaamalunaadbiDaujasaH || 3\-59|| 
sa caapamutsR^ijya vivR^iddhamatsaraH praNaashanaaya prabalasya vidviShaH | 
mahiidhrapakShavyaparopaNocita.n sphuratprabhaamaNDalamastramaadade || 3\-60|| 
raghurbhR^isha.n vakShasi tena taaDitaH papaata bhuumau saha sainikaashrubhiH | 
nimeShamaatraadavadhuuya ca vyathaa.n sahotthitaH sainikaharShanisvanaiH || 3\-61|| 
tathaapi shastravyavahaaraniShThure vipakShabhaave ciramasya tasthuShaH | 
tutoSha viiryaatishayena vR^itrahaa pada.n hi sarvatra guNairnidhiiyate || 3\-62|| 
asa~NgamadriShvapi saaravattayaa na me tvadanyena visoDhamaayudham | 
avehi maa.n priitamR^ite tura~NgamaatkimicChasiiti sphuTamaaha vaasavaH || 3\-63|| 
tato niSha~NgaadasamagramudhR^ita.n suvarNapu~Nkhadyutira~njitaa~Ngulim | 
narendrasuunuH pratisa.nharanniShu.n priya.nvadaH pratyavadatsureshvaram || 3\-64|| 
amocyamashva.n yadi manyase prabho tataH samaapte vidhinaiva karmaNi | 
ajasradiikShaaprayataH sa madguruH kratorasheSheNa phalena yujyataam || 3\-65|| 
yathaa sa vR^ittaantamima.n sadogatastrilocanaikaa.nshatayaa duraasadaH | 
tavaiva sa.ndeshaharaadvishaa.npatiH shR^iNoti lokesha tathaa vidhiiyataam || 3\-66|| 
tatheti kaama.n pratishushruvaanraghoryathaagata.n maatalisaarathiryayau | 
nR^ipasya naatipramanaaH sadogR^iha.n sudakShiNaasuunurapi nyavartata || 3\-67|| 
tamabhyanandatprathama.n prabodhitaH prajeshvaraH shaasanahaariNaa hareH | 
paraamR^ishanharShajaDena paaNinaa tadiiyama~Nga.n kulishavraNaa~Nkitam || 3\-68|| 
iti kShitiisho navati.n navaadhikaa.n mahaakratuunaa.n mahaniiyashaasanaH | 
samaarurukShurdivamaayuShaH kShaye tataana sopaanaparamparaamiva || 3\-69|| 
atha sa viShayavyaavR^ittaatmaa yathaavidhi suunave 
nR^ipatikakuda.n dattvaa yuune sitaatapavaaraNam | 
munivanatarucChaayaa.n devyaa tayaa saha shishriye 
galitavayasaamikShvaakuuNaamida.n hi kulavratam || 3\-70|| 

|| iti shriikaalidaasakR^ite raghuva.nshe mahaakaavye raajyaabhiSheko naama tR^itiiyaH sargaH ||
##
Encoding by
Arvind Kolhatkar and Mrs. and Mr. Desriraju H. Rao.
Proofread and corrected by
Arvind Kolhatkar akolhatkar at rogers.com
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
\end{document}