% Text title            : Manamala by Achyutakrishnanandatirtha
% File name             : mAnamAlAAnandatIrtha.itx
% Category              : major\_works, vedAnta, yoga
% Location              : doc\_z\_misc\_major\_works
% Transliterated by     : Harihara advaitapurna at gmail.com
% Proofread by          : Harihara advaitapurna at gmail.com
% Latest update         : September 14, 2023
% Send corrections to   : sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Manamala by Achyuta Krishnananda Tirtha ..}##
\itxtitle{.. achyutakR^iShNAnandatIrthakR^itA mAnamAlA ..}##\endtitles ##
        otaprotamidaM sarvaM yasmin sachchitsukhAtmake |
        paryavasyanti vedAntA yatra chAhaM tadakSharam || 1||
        sha~NkaraM sha~NkarAchAryaM keshavaM bAdarAyaNam |
        sUtrabhAShyakR^itau vande bhagavantau punaH punaH || 2||
        shrImatsvayamprakAshendrAn praNipatya jagadgurUn |
        bAlAnAM sukhabodhAya mAnamAlA virachyate || 3||
        pramAtA cha prameyaM cha pramA chaiva pramANakam |
        padArthAstviha sarvaj~naishchatvAra iti kIrtitAH || 4||
        pramAtAhaM prameyaM cha pa~ncha shabdAdikaM kila |
        shabdasparsharUparasagandhAH shabdAdayaH smR^itAH || 5||
        tattadviShayakaj~nAnaM dvividhaM parikIrtitam |
        saMskAramAtrajanyaM yajj~nAnaM smaraNamuchyate || 6||
        anubhUtistu tadbhinnaj~nAnaM sA cha dvidhA sthitA |
        yathArthA chAyathArtheti tatrAdyA tu pramA kila || 7||
        abAdhitArthakaj~nAnaM yathArthAnubhavo mataH |
        pramAyAH karaNaM yattatpramANamiti gIyate || 8||
        pratyakShamanumAnaM chopamAnaM shabda ityapi |
        chatvAryeva pramANAnItyAhuH kechana tArkikAH || 9||
        arthApattiM tathA mAnaM vadantyanupalabdhikam |
        pratyekaM lakShaNAnyAhuH sa~NgraheNeha kathyate || 10||
        sAkShAtkaromyahaM shabdaM shrotreNeti vibhAvyate |
        pratyakShapramitiH sA tu shrotraM tatkaraNaM matam || 11||
        tathaivAnuminomIti j~nAnaM yadanubhUyate |
        vahnyAdikaM sAnumitistasyAH karaNamuchyate || 12||
        vyApyavAnayamityevaM parAmarsho hi jAyate |
        gR^ihItavyAptikasyAto.anumitiH kila jAyate || 13||
        tasmAlli~NgaparAmarsho hyanumAnamiti sthitam |
        avinAbhAvasambandho vyAptirityavadhAryate || 14||
        dhUme vahnyavinAbhAvasambandho hyavadhAryate |
        vyabhichArAbhAvadR^iShTeH sahachArasya darshanAt || 15||
        anvayavyatirekAbhyAM sahachAro dvidhA mataH |
        yatra dhUmastatra vahnirasti yadvanmahAnase || 16||
        vahnirna vidyate yatra dhUmastatra na vidyate |
        yathA hrade parvatAdau na tathA dhUmadarshanAt || 17||
        vyatirekamukhenApi sAdhyate hi shikhI budhaiH |
        anvayavyatirekAkhyamanumAnamudAhR^itam || 18||
        parvato vahnimAn dhUmAdyathA dR^iShTo mahAnasaH |
        tathAyaM parvatastasmAdvahnimAneva gamyate || 19||
        anvayavyAptimalli~NgaM vyatireki cha kevalam |
        yathAdR^iShTaM tathA tena li~NgenAnumitirbhavet || 20||
        hetostu lakShaNaM vyAptiryastadvAnavabhAsate |
        hetuH san vyAptirahito hetvAbhAsa udAhR^itaH || 21||
        anumAnamidaM proktamupamAnamathochyate |
        sAdR^ishyadarshanAjjAtaM j~nAnaM sopamitirbhavet || 22||
        upamAnaM tu sAdR^ishyaj~nAnaM tatkaraNaM matam |
        gosAdR^ishyadhiyA yadvadgavayAdivinishchayaH || 23||
        AkA~NkShAyogyatAsattimatpadAnAM kadambakam |
        vAkyaM shabdapramANaM syAchChaktaM padamitIryate || 24||
        shaktiH sa~Nketa ityeke padArthAntaramityapi |
        gR^ihItashaktestAtparyagrahAdvAkyArthadhIrbhavet || 25||
        saMsargo vA vishiShTo vA vAkyArthaH samudAhR^itaH |
        gAmAnayetyAdi vAkyaM sambandhArthasya bodhakam || 26||
        nIlamutpalamityAdi vishiShTArthasya bodhakam |
        ityAdi laukikaM vAkyamAptoktaM mAnamiShyate || 27||
        jyotiShTomena yAgena svargakAmo yajeta hi |
        ityAdi vaidikaM vAkyaM viduShAM svArthabodhakam || 28||
        yAgastu karaNaM tatra phalaM svargaH pratIyate |
        sAdhyasAdhanasambandho vAkyArthastu pratIyate || 29||
        pravartakatvaM vAkyasya prAhurmImAMsakAH kila |
        bodhakatvaM pramANatvAtkevalaM vAdinaH pare || 30||
        IShTasAdhanatAj~nAnAtkR^itisAdhyatayA pumAn |
        pravartate svayaM tasmAdvAkyaM naiva pravartakam || 31||
        saptadvIpavatI pR^ithvI putraste jAta ityapi |
        vAkyAdvAkyArthabodhastu jAyate hi vinA kR^itim || 32||
        pravartakatvaM vAkyasya neti tasmAdvinishchitam |
        shaktyA lakShaNayA vApi vAkyaM svArthaM prabodhayet || 33||
        anvayAnupapattau tu mukhyArthasya parigrahe |
        mukhyArthasambandhinyarthe pratItirlakShaNA matA || 34||
        tAtparyAnupapattirvA lakShaNAbIjamuchyate |
        viShaM bhu~NkShvetyAdi vAkyaM tannivR^ittiM hi bodhayet || 35||
        lakShaNA cha tridhA proktA jahatyajahatI tathA |
        vAchyaikabhAgatyAgena bhAgAntaraparigrahaH || 36||
        parIkShakAH prAhuritthaM bhAgatyAgAkhyalakShaNAm |
        ga~NgAyAM ghoSha ityatra yA jahallakShaNA tu sA || 37||
        shveto dhAvati yAntyete ChatriNo.achChatriNastathA |
        ajahallakShaNA tatra vAchyArthasyApi sa~NgrahAt || 38||
        viruddhAMshaparityAgAdaviruddhAMshasa~NgrahAt |
        so.ahamityAdivAkyeShu sA bhAgatyAgalakShaNA || 39||
        vya~njanA lakShaNetyAhurlakShaNA gauNyapi kvachit |
        agnirmANavako.adhIte siMho.ayaM kShatriyastviti || 40||
        gachCha kAnta gamiShyAmi yatra janma bhaviShyati |
        loke tavAhamityatra nivR^ittirvyajyate gateH || 41||
        dR^iShTaM shrutaM vA pInatvaM na sambhavati bhojanAt |
        R^ite rAtrau visheSheNa bhojanaM parikalpyate || 42||
        rAtribhojanavij~nAnamarthApattiphalaM bhavet |
        anyathAnupapattestu j~nAnaM tatkaraNaM matam || 43||
        upalabdherabhAvo.api pramANAntaramiShyate |
        abhAvagrahaNAyeti sAdhayantIha kechana || 44||
        evaM sarvapramANAnAM viShayAstu pR^ithakpR^ithak |
        vyavahArabalAtkalpyAstasmAtte vyAvahArikAH || 45||
        
   || iti shrImatsvayamprakAshasarasvatIcharaNAravinda\-
   saMlagnarajobhUtAchyutakR^iShNAnandatIrthakR^itA mAnamAlA samAptA ||

##
Manamala is a text on the topic of epistemology /pramANa composed by Achyuta Krishnananda Tirtha.  The ##pramANa## (Proof) or means of knowledge are six in number: ##pratyakSha## (Perception), ##anumAna## (Inference), ##shabda## (Verbal Testimony), ##upamAna## (Comparison or Analogy), ##arthapatti## (Presumption or Postulation), and ##anupalabdhi## (Non-Perception).


Encoded and proofread by Harihara advaitapurna at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}