% Text title : uddaNDashAstrivirachitaH kokilasandeshaH % File name : kokilasandesha.itx % Category : major\_works % Location : doc\_z\_misc\_major\_works % Author : UddaNDashAstri % Transliterated by : www.rasalabooks.com Contact Venetia Ansell venetia at rasalabooks.com % Proofread by : www.rasalabooks.com Contact Venetia Ansell venetia at rasalabooks.com % Latest update : July 31, 2012 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Uddanda Shastri's Kokila Sandesha ..}## \itxtitle{.. kokilasandeshaH uddaNDashAstrivirachitaH ..}##\endtitles ## pUrvabhAgaH saudhe tu~Nge saha dayitayA ko.api sa~NkrIDamAnaH prApa svApaM paramapuruShaH sheShabhoge shriyeva | chitrA daivI gatiriyamasau shailajAmaNDitAyAM kA~nchyAM kampAtaTabhuvi tayAnanvito budhyate sma || 1|| tvAmAninyuH subhaga shayitaM lIlayA nIlakeshyo draShTuM devaM varuNapurataH sampatantyo vimAnaiH | atrAmu~nchannapi bhagavatIki~NkaroktyA sasha~NkAH shushrAvetthaM sa punaravapussa~NgrahAM vyomni vANIm || 2|| kShetre chAsmin sakalavipadAM bha~njane pa~ncha mAsA\- nAsIthAshchet priyajanaviyogArtirUrdhvaM na te syAt | AkarNyemAM punariti tathA saiSha chakre nivAsaM klesho bhUyAnapi bahumataH shlAghyate chedudarkaH || 3|| tatra dvitrAn priyasahacharIviprayogAtidIrghAn kAmArto.ayaM shivashiva samulla~Nghya mAsAn katha~nchit | chaitrArambhe samuditamadhushrIkaTAkShAbhirAmaM chUtA~NkUrAsvadanarasikaM kokilaM sandadarsha || 4|| taM kUjantaM kalamadhurayA pa~nchamasvAnabha~NgyA kAntAlApasmaraNavivashaH ki~nchidArAdupetya | datvA netrA~njalipuTabhR^itairarghyamashrupravAhai\- rjAtAshvAsaH sphuTamiti girA shrAvyayA sandidesha || 5|| atrAyAhi priyasakha nanu svAgataM pashya pArshve pratyagrodyanmadhurasakaNasvedinIM chUtavallIm | tvatsamparkaM subhaga niyataM kA~NkShate.asau vilolA lolambAkShI chalakisalayairAhvayantI sarAgA || 6|| antastoShaM mama vitanuShe hanta jAne bhavantaM skandhAvAraprathamasubhaTaM pa~nchabANasya rAj~naH | kUjAvyAjAddhitamupadishan kokilAvyAjabandho kAntaiH sAkaM nanu ghaTayase kAminIrmAnabhAjaH || 7|| vAchAlaM mA parabhR^ita kR^ithA mAM priyAviprayuktaM prAyaH prAptaM praNayavachanaM tvAdR^ishe mAdR^ishAnAm | ki~nchillInAM kisalayapuTe kokilAmAkulAtmA tvaM chApashyan bata virahiNAM yena jAnAsi tApam || 8|| yAvatkAlaM mahitapatagAdhIsha kArye niyoktuM sa~NkochaM me vrajati rasanA sandidikShormR^igAkShyAH | tAvatkAlaM tava cha hR^idayaM tAntimetIti sha~Nke dInApannapraNayaghaTane dIrghasUtretarasya || 9|| sandeshaM me naya khagapate sAdhaya bhrAtR^ikR^ityaM santApArtAM suvachana samAshvAsaya preyasIM me | kAntodantaH suhR^idupanato vipayogArditAnAM prAyaH strINAM bhavati kimapi prANasandhAraNAya || 10|| gantavyaste tridivavijayI ma~NgalAgreNa deshaH prAptaH khyAtiM vihitatapasaH prAgjayantasya nAmnA | pAre chUrNyAH parisarasamAsInagovindavakSho\- lakShmIvIkShAvivalanasudhAshItalaH keraleShu || 11|| tatra drakShyasyakhilamahilAmaulimAlAyamAnAM bAlAmenAM niyatamadhunA madviyogena dInAm | kalyANI sA kanakakadalIkandalIkomalA~NgI kandarpAgniM kathamiva kukUlAgnikalpaM saheta || 12|| adhvAnaM te hitamupadishAmyashrameNaiva gantuM snigdhachChAyaistarubhirabhitaH shAntagharmaprachAram | saMskartAsi dhruvamupagato yatra patrIndra teShA\- muddAmAnAmapi navanavodyAnalIlAyitAnAm || 13|| shrIkAmAkShyA vinatamamarairutsavaM phAlgunAkhyaM dR^iShTvA yAntyaH svabhavanamupArUDhanAnAvimAnAH | tvatsa.NllApashravaNataralAH pashchimAmbhodhivelA\- paryantaM te varuNanagarIma~njuvAchaH sahAyAH || 14|| AkarShantaH pratinavalatApuShpagandhopahArA\- nAsi~nchantaH saraNimabhitaH shItalaiH shIthuleshaiH | bhR^i~NgInAdairmadhuramadhuraM vyAharanto valante kampAkUlopavanapavanA bandhavaste.anukUlAH || 15|| vandasvArAt priyasakha punardarshanAyAtra shaureH kA~nchIbhartuH karigiritaTe puNyamenaM vimAnam | Adhatte yat kanakavalabhInIDalInaiH kapotai\- radyApyambhoruhabhavamakhAlagnadhUmAbhisha~NkAm || 16|| pITheShvaShTAdashasu mahitaM kAmapIThaM bhajethAH pArekampaM svayamiha parA devatA sannidhatte | sabhrUchApaM nayanajaladaM prApya yasyAH kR^ipApaM tuNDIrakShmA sulabhakavitAsasyavR^iddhiH samindhe || 17|| uDDIyAsmAd bakulasarasAt sa tvamudyAnadeshAt prAdakShiNyAd vraja parisare puNyamekAmravR^ikSham | mUle yasya prakR^itisubhage muktakailAsalobho devaH sAkShAdvasati valayA~NkAhvayashchandrachUDaH || 18|| dR^iShTvA shambhuM gaganasaraNAvujjihAne tvayi drAk pakShadvandvavyajanapavanochchAlitAbhyo latAbhyaH | utthAsyanti bhramarataruNAH siktadehA marandai\- rudyAnashrIprahitasajalApA~Ngabha~NgAnukArAH || 19|| spaShTAlakShyastvayi pika samAlambamAne.ambarAntaM kA~nchIdeshaH kimapi vasudhAM bhUShayan gauraveNa | tatsaundaryApahR^itahR^idayo mA vilambasva gantuM bandhutrANAd bahumatipadaM nAparaM tvadvidhAnAm || 20|| AshAM pAshAyudhatilakitAmAshrayannAttavegaH kUlonmIlatkramukakuhalIchAmarAndolitormim | drakShyasyagre vikachakamalodgandhimAdhvIkapAnAt kShIbakShIbabhramarataruNIsevitAM kShIrasindhum || 21|| pakShodyautaiH pataga purajitkandharAkANDanIlai\- rvyAptAbhogA visR^imaratarairvyoma sImantayantI | suvyaktaM te gamanasaraNiH sUtrayedUrdhvamasyAH sindhusnehopagatayamunAveNivIthIvilAsam || 22|| chUte chUte kusumakalikAM tvAM cha dR^iShTvA sametaM bAlAshokAhananamaruNaira~NghribhistanvatInAm | tanva~NgInAM shravaNasubhagairnUpurANAM virAvai\- rvAchAlAH syurniyatamabhitaH kUlamArAmasImAH || 23|| snAtottIrNAH sajalakaNikAsundarorojakumbhAH shyAmApa~NkaiH shubhaparimalaiH spR^iShTamA~NgalyabhUShAH | tIre tasyA dramiDasudR^isho darshanIyA vilokya prAyo bhAvI kShaNamiva sakhe gachChataste vilambaH || 24|| dhUmastomaiH savanajanitairdhUsaropAntavR^ikShAH prauDhashlAghyairmukharitamaThAH pAvanairbrahmaghoShaiH | ruddhAbhogA dvijavaravidhisnAnapUtaistaTAkai\- rdraShTavyAste tadanu saritaM dakShiNenAgrahArAH || 25|| sA vaidagdhI shrutiShu sa punaH sarvashAstrAvagAha\- stachchAmlAnaprasarasarasaM niShkala~NkaM kavitvam | tatratyAnAM kimiha bahunA sarvametat paThantaH shR^i~Nge shR^i~Nge gR^ihaviTapinAM spaShTayiShyanti kIrAH || 26|| tAnulla~Nghya smitakuvalayasnigdhamutkandharANAM cholastrINAmayi saphalayan netramutpakShmamAlam | vilvakShetraM visha pashupaterveshma nIvAsamIrai\- rdhUtAlindadhvajapaTashikhairnUnamAhUyamAnaH || 27|| kAmaH svAmI kila shalabhatAmApa netrasphuli~Nge mA mA bhaiShIriti bhavabhido darshanAchchandramauleH | shyAmA varNe vachasi madhurA cha~nchalA dR^igvilAse vAmotsa~Nge lasati karuNA kApi kAmaM duhAnA || 28|| pakShisvAnaiH paTumadakalaiH svAgatAni bruvANA vyAkIrNArghyAH kusumamadhubhirvIjayantaH pravAlaiH | tatrArAmAH surabhisachivaM tvAM sakhe mAnayeyu\- stulyaprItirbhavati hi jano rAjavadrAjamitre || 29|| kAle tasmin karadhR^itagalannIvayo vArakAntAH sambhogAnte nibiDalatikAmandirebhyashchalantyaH | vItasvedAstava viharataH pakShapAlIsamIrai\- rAkhinnabhrUvalanamalasairarchayiShyantyapA~NgaiH || 30|| bhUyo gachChan janapadamimaM sa tvamulla~Nghya cholA\- nAlokethAstaralahariNInetratApi~nChitAni | kAntArANi prasavashayanaishChinnagu~njAkalApaiH ku~nje ku~nje kathitashabaradvandvalIlAyitAni || 31|| tatratyAstvAM kusumakalikAshIthudhArAM vamanto nIrandhreShu skhalitagatayo nirjharIshIkareShu | vallIDolAviharadaTavIdevatAlAlanIyAH seviShyante chapalachamarIbAlabhArAssamIrAH || 32|| chumban bimbAdharamiva navaM pallavaM shIthugarbhaM prAptAshleShaH stana iva nave korake kAmachArI | bhoktAsi tvaM kamapi samayaM tatra mAkandavallIH kAntArAge sati vikasite kaH pumAMstyaktumIShTe || 33|| daShTvA cha~nchvA kanakakapishA ma~njarIshchUtaShaNDAt pakShachChAyAshabalitanabhobhAgamudgatvaraM tvAm | vidyutvantaM navajaladharaM manyamAnAH salIlaM nartiShyanti priyasakha chalatpi~nChabhArA mayUrAH || 34|| dR^ishyA dUre tadanu laharIsampatadrAjahaMsA sA kAverI madajalajharI sahyadantAvalasya | meghashyAmo bhujagashayano medinIhArayaShTe\- rmadhye yasyA marataka iva prekShyate ra~NganAthaH || 35|| puNyAnasyAstaTabhuvi purIkharvaTagrAmaruddhA\- nudyAnadruprasavasurabhIn hosalAn gAhamAnaH | lakShmInArAyaNapuramiti khyAtamantarmurAreH prApyAvAsaM bhava pikapate pAvanAnAM purogaH || 36|| tatratyAnAM ruchirachikuranyastasaugandhikAnAM tAruNyoShmA~nchitakuchataTIvitruTatka~nchukAnAm | nAsAmuktAbharaNakiraNonmishramandasmitAnAM veshastrINAM bhavati vivasho vibhramairdarpako.api || 37|| tAshchenmAnagrathitahR^idayAH sannatAn nAdriyeran kAntAH kAntAn parabhR^ita kuhUkAramekaM vimu~ncha | santu trasyannijanijavadhUdorlatAli~NgitAnAM yUnAmArdrasmitasahacharAstvayyapA~NgAnuSha~NgAH || 38|| krIDantInAM mukharitalatAmandiraM khecharINAM bhUShAnAdairbhuvanaviditaM sahyashailaM shrayethAH | kShatradhvaMsAt svayamuparato viprasAtkR^itya kR^itsnaM pR^ithvIchakraM bhR^igukulapatiryattaTe sannidhatte || 39|| tva~nchaddhUmAn davahutabhujo jvAlamAlAjaTAlAn valgadbhR^i~NgAn vanaviTapino bhAsurAn pallavaughaiH | dR^iShTvA dUrAdanuminutamAmuShNashItaiH samIraiH sandigdhAyAM vipadi sahasAvR^ittirArtiM hi sUte || 40|| dR^iShTvA tatrAmalakadharaNImandiraM shAr~NgapANiM tasmAchChailAttaTamavataran ki~nchidAku~nchya pakShau | kUle.ambhodheH kramukakalilAM keralakShoNimagre pashya sphItAM bhR^igusutabhujAvikramopakramaM yA || 41|| prAptavyaste yadi kR^itamaho vA~NmayItIravAsI devo dakShAdhvaravimathanoDDAmarashchandrachUDaH | Aste shAtatrishikhashikhayA dArukaM jaghnuShI sA yasyAdUre mR^igapatishirastasthuShI bhadrakAlI || 42|| siktaH svachChairjharajalakaNaistaM bhaja vyomni tiShThan muktAchChannAsitanavapaTIkAyamAnAyamAnaH | dhvA~NkShabhrAntyA yadi parijanAstvAM samutsArayeran kUjAM ki~nchit kuru nanu girA vyajyate sannasaMshcha || 43|| itthaM bhaktyA puramathanamArAdhya labdhaprasAdaH kR^iShTaH kR^iShTaH pathi pathi sakhe keralInAM kaTAkShaiH | uchchaiH saudhairuDugaNagatIrUrdhvamutsArayantIM phullArAmAM pravisha puralIkShmAbhR^itAM rAjadhAnIm || 44|| yeShAM vaMshe samajani harishchandranAmA narendraH pratyApattiH pataga yadupaj~naM cha kaumArilAnAm | yuddhe yeShAmahitahataye chaNDikA sannidhatte teShAmeShAM stutiShu na bhavet kasya vaktraM pavitram || 45|| putrasyAsau priyasakha iti prItigarbhaiH kaTAkShai\- rdR^iShTastasyAM puri viharatA rukmiNIvallabhena | tasyaivAgre sadayamabalAlUnasUnapravAle bAlodyAne kvachana viharan mArgakhedaM vijahyAH || 46|| kelIyAnakvaNitarashanA komalAbhyAM padAbhyA\- mAlIhastArpitakaratalA tatra chedAgatA syAt | svAtI nAma kShitipatisutA sevituM devamasyAH svairAlApaistava pika girAM kApi shikShA bhavitrI || 47|| tAmAyAntIM stanabharaparitrastabhugnAvalagnAM svedachChedachChuritavadanAM shroNibhAreNa khinnAm | ki~nchichcha~nchUkalitakalikAshIthubhAreNa si~nche\- shcha~nchachchillIchalanasubhagAn lapsyase.asyAH kaTAkShAn || 48|| ka~nchitkAlaM dhutakisalayAchChAdanaM saprakampaM pratyAkhyAtabhramarataruNA ma~njarI bhujyamAnA | yAtrodyukte subhaga bhavati vya~njayedAtmasAdaM muktAshchyotanmadhurasamiShAnmu~nchatI bAShpalesham || 49|| digyAtavyA yadapi bhavato dakShiNA rakShaNArthaM matprANAnAM punarapi sakhe pashchimAmeva yAyAH | dhUtArAmaM mukuTataTinImArutaistatra shambhoH sampadgrAmaM yadi na bhajase janmanA kiM bhR^itena || 50|| saudhaistu~Ngairhasadiva sudhAkShAlitai rAjatAdriM tejorAsheH pravisha bhavanaM dhUrjaTerUrjitaM tat | pArshve pArshve parichitanamaskArajAtashramANAM kShmAdevAnAM kShaNamanubhavaMstAlavR^intasya lIlAm || 51|| utkIrNAnAM kanakavalabhIShUdgato viShkirANAM tyaktAsha~NkaM praNama girishaM dhyAnaniShkampagAtraH | kaNThachChAyA pratiphalati kiM bharturityadriputryA nidhyAtaH san kutukanibhR^itairnetrapAtaiH pavitraiH || 52|| shrInandibhrUniyamitamithorodhamAbaddhasevAn brahmendrAdyAn kvachana vibudhAn sAdaraM vIkShamANaH | gAyantInAM kvachidapi sakhe komalAn kinnarINAM vINArAvAnupashR^iNu bhavatkUjitenAvishiShTAn || 53|| divyaishvaryaM dishasi bhajatAM vartase bhikShamANo gaurIma~Nke vahasi bhasitaM pa~nchabANaM chakartha | kR^itsnaM vyApya sphurasi bhuvanaM mR^igyase chAgamAntaiH kaste tattvaM prabhavati parichChettumAshcharyasindho || 54|| itthaM stutvA bahirupavanopAntamAkandashR^i~Nge yAvadbhAnurvrajati charamaM bhUdharaM tAvadAssva | drakShyasyanvaksaphalanayanaM tANDavAnIndumaule\- rlAsyakrIDAlalitagirijApA~NgasambhAvitAni || 55|| tasmin kAle balimahajuShAM vAravAmAlakAnAM sthAlIchakre stanataTadhR^ite sAnurAge hR^idIva | bimbavyAjAdvishati bhavati syAdamuShyeti sha~Nke spaShTA~Nkasya kShaNamudayagasyendubimbasya lakShmIH || 56|| viShvakkIrNairiva pashupateH kandharAkAntipu~njai\- rvItAloke jagati timirairvyomanIlAbjabhR^i~NgaiH | vishrAntaH san kvachana vipule vR^ikShashAkhAkuTumbe tAM tatraiva kShapaya rajanIM shrAntavisrastapakShaH || 57|| velAvAtAshcharamajaladhervIchimAndolayantaH stokonnidraiH kumudamukulaiH pItamuktAH sarassu | svedA~NkUrAn suratajanitAn subhruvAM chorayantaH seviShyante nishi parabhR^ita tvAM sukhena prasuptam || 58|| prAptonmeShe prathamashikhariprasthadAvAgnikalpe bAlAshokastabakaruchire bhAnavIye mayUkhe | prasthAtuM tvaM punarapi sakhe prakramethAH prabhAte svAtmakleshaH suhR^idupakR^itau tvAdR^ishAnAM sukhAya || 59|| padmopAntAduShasi ramaNe prApnuvatyeva pArshvaM madhye mArajvaraparavashAM vIkShamANo rathA~NgIm | dUraM prApte mayi vidhivashAddUyamAnAM sakhIM te smAraM smAraM dviguNagamanotsAha eva dhruvaM syAH || 60|| dR^iShTvA devaM parisarajuShaM shambare bAlakR^iShNaM lopAmudrAsakhatilakitaM di~NmukhaM bhUShayiShyan | kolAnelAvanasurabhilAn yAhi yatra prathante velAtItaprathitavachasaH sha~NkarAdyAH kavIndrAH || 61|| unmajjadbhiH punariva javAt pakShavadbhirgirIndrai\- rvR^indairnAvAM bhujapaTalikoDDAmarairgAhyamAnam | lakShmIjAneH shayanasadanaM puShpavATaM purAreH pAkasthAnaM nikhilamarutAM pashya vArAnnidhAnam || 62|| muktAjAlairdhavalapulinaM vIchimAlAvikIrNaiH kUlAdhvAnaM kusumitatarusnigdhamAlambamAnaH | deshAddeshaM vrajasi kutukottAnamugdhAnanAnAM vAmAkShINAM nayanachulakaiH sAdaraM pIyamAnaH || 63|| kuryAt prItiM tava nayanayoH kukkuTakroDanAma prAsAdAgrollikhitagaganaM pattanaM tat pratItam | yaddorvIryadraDhimakaradIbhUtarAjanyavIrAH shUrAgraNyaH shikharijaladhisvAminaH pAlayanti || 64|| gehe gehe navanavasudhAkShAlitaM yatra saudhaM saudhe saudhe surabhikusumaiH kalpitaM kelitalpam | talpe talpe rasaparavashaM kAminIkAntayugmaM yugme yugme sa khalu viharan vishvavIro manobhUH || 65|| vyarthaM karNe navakuvalayaM vidyamAne kaTAkShe bhAro hAraH stanakalashayorbhAsure mandahAse | yatra snigdheShvapi kachabhareShveNashAbekShaNAnAM mAdyadbhR^i~Nge sati parimale ma~NgalAya prasUnam || 66|| yatra j~nAtvA kR^itanilayanAmindirAmAtmakanyAM manye snehAkulitahR^idayo vAhinInAM vivoDhA | tattaddvIpAntarashatasamAnItaratnaughapUrNaM naukAjAlaM muhurupaharan vIchibhiH shliShyatIva || 67|| tatsaudhAgreShvaruNadR^iShadAM sAndrasindUrakalpaM tejaHpu~njaM kisalayadhiyA charvituM mArabhethAH | dR^iShTvA vAtAyanavinihitairlochanAbjaistaruNyo valgadvakShoruhamupachitairhastatAlairhaseyuH || 68|| kR^iShTvA dR^iShTiM kathamapi tataH kautukAnAM nidAnA\- duDDIyethAH pathi viTapinAM puShpamAdhvIM lihAnaH | hAraM hAraM madanapR^itanAkAhalaiH kaNThanAdai\- rutkaNThAnAM janapadamR^igIlochanAnAM manAMsi || 69|| brahmAbhyAsaprashamitakalIn prApya dIprAn prakAshAn shvetAraNyaM vraja bahumataM dhAma mR^ityu~njayasya | dR^iShTvA dUre sakR^idapi janA yanna pashyantyavashyaM mR^ityorvaktraM niTilaghaTitabhrUkuTIkaM kadAchit || 70|| sevyaM shambhoraruNamurasastADanAddaNDapANeH pAdAmbhojaM shikharitanayApANisaMvAhayogyam | yenAkrAnte sati giripatau loShTamAnAsyachakra\- shchakrandAdhaHkR^itabhujavano rakShasAM chakravartI || 71|| pArshve yasya pravahati nilA nAma kallolinI sA sandhyAnR^ittabhramiShu patitA mastakAjjAhnavIva | nAvAkShetrapraNayi ramayAkrAntadormadhyamAste kUle yasyAH kuvalayadalashyAmalaM dhAma ki~nchit || 72|| sAkaM kAntairmilati lalitaM keralInAM kadambe matpreyasyAH priyasakha mahAmAghasevAgatAyAH | pAyaM pAyaM mukhaparimalaM mohanaM yatra mattAH prAyo.adyApi bhramarakalabhA naiva jighranti padmAn || 73|| shaivAlaughachChuritakamalA saikatasraMsihaMsA nItA kArshyaM tapanakiraNairvAsareShveShu sindhuH | AkIrNAsyAmalakanikaraiH shroNivibhraMshikA~nchIM manye dInAM virahadashayA preyasIM me.anuyAyAt || 74|| shAstA tasyA yadi taTapathaiH shambarakroDavAsI tiShThannashve javini mR^igayAkautukI sa~nchareta | lumpestasya shramajalakaNAn komalaiH pakShavAtai\- rbhUyAt prItyai laghu cha samaye sevanaM hi prabhUNAm || 75|| sarvotkR^iShTA jagati viditAH keraleShu dvijendrA vallIkauNyostadapi mahimA kApi madhyashritAnAm | tatrApyasyAH salilapavanA yatra yatra prathante teShAM teShAmatishayajuShaH shIlavidyAnubhAvAH || 76|| IShTe teShAM stutiShu na guruH kA kathAlpIyasAM no bhrAtarbhUyaH shR^iNu parimitaM prastutAdyAvasheSham | tAmuttIrNaH saritamamR^itasyandimAkandavR^indAn deshAn pUtAn pata guNagaNairnetranArAyaNIyaiH || 77|| yaH prAkpANigrahaNasamaye shambhunA sAnukampaM haste kR^itvA kathamapi shanairashmapR^iShThe nyadhAyi | draShTavyo.asau kisalayamR^idurmuktipuryAlayAyAH kAtyAyanyA mahiShamathanoDDAmaraH pAdapadmaH || 78|| ki~nchitpUrvaM raNakhalabhuvi shrImadadhyakShayethA\- stanmImAMsAdvayakulaguroH sadma puNyaM maharSheH | vidvadvR^inde vivaditumanasyAgate yatra shashva\- dvyAkhyAshAlAvalabhinilayastiShThate kIrasa~NghaH || 79|| shAstravyAkhyA hariharakathA satkriyAbhyAgatAnA\- mAlApo vA yadi saha budhairAkShipedasya chetaH | tadvisrabdhadvijaparivR^ite niShkuTAdrau niShaNNaH kokUyethAH sa khalu madhurAM sUktimAkarNya tuShyet || 80|| shlAghyachChandasthitimayi mayA shobhane.arthe niyuktaM shrAvyaM shabdaiH sarasasumanobhAjamabhrAntavR^ittim | dUraprAptyA prashithilamiva tvAM sakhe kAvyakalpaM dhImAn pashyet sa yadi nanu te shuddha eva prachAraH || 81|| pArshvAdasya prachalitavataH pAvanAnAharantaH kundasvachChAn vR^iShapatimukhAsaktaromanthaphenAn | ChindyustApaM tava vR^iShapurIsa~NginaH sha~NkarA~Nka\- krIDadgaurIkachataralanodgandhayo gandhavAhAH || 82|| pUrvo bhAgaH stanabharanataH prekShyate chechchalAkShaH pashchAdbhAgo lalitachikuro dR^ishyate no nitambI | itthaM gauryA yugapadubhayaM draShTukAmo.aShTamUrti\- rmUrtidvandvaM vahati bhagavAn yaH sa muktyai niShevyaH || 83|| bhUShAbhogishvasitapavanaiH bhAlanetre pradIpte svinnasyendoramR^itapR^iShatairUrjitaM nirgaladbhiH | maulau yasya druhiNashirasAM maNDalaM maNDapAntaH\- kShmAdevAnAM shrutipadajuShAM saMshayAnuchChinatti || 84|| dvAropAntasthitikR^idaNimApA~NgadattehitArthai\- rAshApAlairnibiDitabahiHprA~NgaNaM sevamAnaiH | tasyAdUre kanakabhavanaM pakShapAtAt praviShTaH sampanmUrtiM praNama girijAM sA hi vishvasya mAtA || 85|| saMsarpadbhistanuruchibharaiH sa~NgamagrAmashaure\- stApi~nChAbhaiH stabakitatalaM gAhamAno vihAyaH | tulyachChAyasmR^itanavatamAlAvalIvAsasaukhyo manye lokaiH kShaNamiva pR^itha~Nno vibhAviShyase tvam || 86|| kAlIvAsaM bhaja pathi mahat kAnanaM yatra shashvat sevAyAte tridashanikare shrAddhadevaupavAhyam | bhUtairbhedyo balimahiSha ityudbhaTaiH kR^iShTashR^i~Nge rajjugrAhaM rudati vijayA rUDhahAsaM ruNaddhi || 87|| ramyAM harmyadhvajapaTamarudvIjitabradhnayugyA\- magre pashyA~njanakhalapurImAshritAM sha~NkareNa | yatrAshliShTo varayuvatibhishchumbati svinnagaNDaM chUrNIvAtaH priya iva ratishrAntamAsyAravindam || 88|| sA cha prekShyA saridanupadaM yatra kalmAShitAyAM majjanmAhodayapuravadhUkaNThakastUrikAbhiH | raktAH padmAH kuvalayavanIsAmyamApadyamAnA vij~nAyante sphuTamahimadhAmodaye jR^imbhamANe || 89|| chArusvachChA shapharanayanA chakravAkastanashrIH kallolabhrUH kamalavadanA kamrashauvAlakeshA | saMsevyA syAt sarasamadhurA sAnukUlAvatIrNai\- rdurgAhAnyairiti hi saraNiH kApi gAmbhIryabhAjAm || 90|| tvayyAkAshe subhaga taTinIM lambamAne salIlaM bimbaM dR^iShTvA payasi maNibha~NgAmale kampamAnam | vIchIvegaprachaladasitAmbhojinIguchChabuddhyA kUjaM kUjaM madhuramalayaH kokila vyAlaperan || 91|| tIraM tasyAH prati gatavato dakShiNaM tatkShaNaM te deshaH sarvAtishayivibhavo dR^ikpathetaH pratheta | tAM jAnIyA dishi dishi jayantAkhyayA khyAyamAnAM pratyAdiShTatridivanagaraprAbhavAM prApyabhUmim || 92|| bAlodyAnaiH samadamahilAbhuktavallIniku~njaiH kelIhaMsakShubhitanagarabhrAntabhR^i~NgaiH sarobhiH | ratnashreNIghaTitashikharaigopuraiH sA purI te prAyaH praj~nAbharaNa sugamA syAdanAveditApi || 93|| \medskip\hrule\medskip uttarabhAgaH lakShmIjanmasthitimanupamaiH pUritAM ratnajAlai\- rbhUbhR^idgarbhAM prakaTitakaleshodayashlAghyavR^iddhim | pAthorAshestanumiva parAM manyamAno vishAlAM yAmadhyAste sa khalu nigamAmbhojabhR^i~Ngo rathA~NgI || 1|| vaktraupamyaM vahati vimalaM pashya pArshve sudhAMshoH pashchAdbhAgaM sumukhi ramaNairitthamAvedyamAnAH | harmye yasyAM hariNanayanAH kurvate.asmin kala~NkaM dR^iShTvA serShyA iva kuvalayAdhyeyashobhairapA~NgaiH || 2|| vIthyAM vIthyAM valaripushilAbha~NgabaddhasthalAyAM sammUrChadbhiH kiraNapaTalaistvadgarujjAlanIlaiH | yatrArabdhe dinakarakarairapyahArye.andhakAre lolAkShINAM bhavati divase nirvisha~Nko.abhisAraH || 3|| yasyAM rAtrau yuvativadanAmbhojasaundaryachauryAt satyaM saudhadhvajapaTashikhAghR^iShTabimbe himAMshau | dR^iShTvA kR^iShNaM kiNamaNikaNaM hanta gADhaM prarUDhaM mUDho loko vadati shashako rohito.anyattatheti || 4|| vIchIkShiptA iva suradhunIbAlashaivAlamAlA yatrodIrNA maratakaruchashchandrashAlAtalebhyaH | ghAsabhrAntyA gaganapadavIdIrghapAnthAyamAnA\- shcha~nchatprothaM taraNituragAshcharvituM prArabhante || 5|| yatrodyAne malinitadishAku~njapu~nje tarUNAM shR^i~Nge lagnA bhramarapaTalInirvisheShAH payodAH | vApIShvambUnyadhikasurabhINyutsR^ijanti svakAle sopAnAgrasphaTikakiraNojjR^imbhaNAmreDitAni || 6|| anyAmagre mama maNigR^ihe bhuktavAnityavAdI\- rmugdhe kAnto dhR^itanakhapadA bhittilInA kimeShA | itthaM yasyAM smitalavajuSho hrepayante navoDhAM sakhyastasyAstanumanupamAM bimbitAM darshayantyaH || 7|| chillIvalyA dhanuShi ghaTite kShipta evekShukANDo netropAnte vahati sharatAM nyastamevAravindam | romAvalyAmapi guNadashAM yatra bimbAdharANAM bibhrANAyAM madanavibhunA bhraMshitaivAlimAlA || 8|| shR^i~NgArAbdhiplava iva galadveNi kamprastanaM tat bhrashyannIvi sthitamiti viTA vIkShya saMshliShya yatra | mugdhAkShINAM mukulitadR^ishAM mohanADambarAnte bhUyaH shrAntaM punarapi ratodyogamudvelayanti || 9|| yasyAM meghA harimaNishilAharmyaparyantabhAjo na j~nAyeran shravaNasubhagaM garjitaM chenna dadyuH | vidyudvallI punarapi navArabdhasaMbhogalIlA\- vellatkAntAvipulajaghanasrastakA~nchIsamaiva || 10|| tasyAM lakShmIramaNanilayaM dakShiNenekShaNIyaM matkAntAyAH sadanamabhito veShTitaM ratnasAlaiH | madhye saudhaM kanakaghaTitaM bibhradUDhachChadaughe yasminnambhoruha iva kanatkarNike khelati shrIH || 11|| mAhAbhAgyaM ratipatibhujADambaraH paunaruktyAt kalyANaughaH sphurati rasikAnantatApyatra hIti | eShAmAdyakSharagaNamupAdAya baddhena nAmnA mAnyaM mArakkaranilayanaM yatkavIndrA gR^iNanti || 12|| lIlAvApI lasati lalitA tatra sopAnamArge mANikyAMshusphuraNasatatasmeranAlIkaShaNDA | yatrAyAntyAH payasi vimale snAtumasmatpriyAyA manye yAnAbhyasanavidhaye mallikAkShA vasanti || 13|| tasyAstIre punarupavanaM tatra chUto.asti pota\- stvajjatIyaiH pika parivR^itaH pallavAsvAdalubdhaiH | pArshve chAsya stabakanamitA mAdhavImugdhavallI preyasyA me pariNayamahaM prApitau sAdaraM yau || 14|| tasyAdUre maratakatale hemabaddhAlavAlaH sikto mUle himajalabharaishchampakaH kashchidAste | labdhvA sakhyAstava sa sukR^itI smeravaktrAbjarAgaM sUte tasyAstanulatikayA tulyavarNaM prasUnam || 15|| krIDAnR^itte bhavanashikhinAM dUramuktAhisa~NgA sAndrachChAyAhR^itaravikarA tatra pATIravATI | madhye tasyAM sa khalu latikAmaNDapo ratnabhUmiH shashvadyasmin kimapi valati smAvayoH premavallI || 16|| snigdhaskandhasrutamadhurasaH ki~ncha tasyopakaNThe kUjadbhR^i~NgaH kuravakataruryaH kura~NgekShaNAyAH | kAle kAle karikarashirovibhramAbhyAM bhujAbhyA\- mAshliShTA~Ngo vahati mukulachChadmanA romabhedAn || 17|| sthAneShveShu kvachana kathiteShUtsukA puShpashayyA\- madhyAsInA parijanakR^itAM sA na chedIkShitA syAt | prAsAdo.asyAH paramabhimataH ko.api mAhendranIla\- stasmin dR^ishyA taTidiva ghane chArurUpA priyA me || 18|| sA netrANAmamR^itagulikA sR^iShTisAro vidhAtuH saundaryendoH prathamakalikA dIpikA bhUtadhAtryAH | kandarpasya tribhuvanavibhoH kA~nchanI ketuyaShTiH shR^i~NgArAbdheH shashadharakalA jIvitaM me dvitIyam || 19|| pashyannenAM bahalasuShamAmaNDalAntarnimagnAM madhye.anyAsAmapi chaladR^ishAM j~nAsyase no kathaM tvam | jtotsnAjAlasnapitabhuvanA tArakANAM samIpe chAndrI mUrtiH kathaya jagato j~nApyate kena rAtrau || 20|| sAndrAmodastimiranikarashchandramA niShkala~NkaH shailau haimau bhramarapaTalIkIlito vyomabhAgaH | kamraM chakraM mR^idukarikaradvandvamabje salIle sarvaM chaitanmadanaghaTitaM saumya sambhUya sAbhUt || 21|| nIchIkurvantyalasavalitA netrapAtAH kura~NgAn vIchIgarvaM harati nikhilaM vibhramAndolitA bhrUH | pANI kalpadrumakisalayaprAbhavaM na kShamete vANI tasyA vahati bhavatAM pa~nchamairbAlamaitrIm || 22|| sA kAntishcheddravati kanakaM tanmukhaM chet ka induH sA ched bimbAdharamadhuratA tiktatAmeti mAdhvI | sA vA tasyA yadi tanulatA mAlatI lohatulyA tau chedUrU kanakakadalIstambhayoH kvApi DambhaH || 23|| ukteShveva prasajati punarnavyalAvaNyasAre\- Shva~NgeShvasyA mama kathayato hanta vAchAM pravR^ittiH | tAdR^igbhUte manasi vivashe kinnu kurvIta seyaM yadyachcheto vimR^ishati girAM tattadevAbhidheyam || 24|| adya prAyaH praNayini mayi proShite bhAgyadoShAt kalpaprAyairahaha divasairebhirutkaNThamAnA | sa~njAyeta prabalavirahodvejitA peshalA~NgI mUrChadgharmajvaraparavashA nIlakaNThIva khinnA || 25|| yatrApA~Ngadyutikavachite ki~nchidutsArya keshAn dattaH premNA dinamanu mayA dIrghikAraktapadmaH | tasminnasyA bhavati niyataM hanta chintAkulAyA gaNDanyastaH karakisalayaH karNajAhe.avataMsaH || 26|| pakShmaspandaH samajani sakhe pashyatormAM yayoH prA~N\- niShpatrAkR^inmayi tu vidhinA tAdR^ishe dUranIte | antarbAShpachChuraNanibhR^ite sAmprataM te mR^igAkShyA netre dhattastuhinakaNikAdanturAmbhojadainyam || 27|| sAndrAmodaM sapaTu sadayaM sasmaraM sAnutarShaM sambhogAnte muhurapi mayA sAdaraM chumbito yaH | narmAlApasmitalavasudhAsechanairmuchyamAna\- stAmyatyuShNashvasitapavanaiH so.ati bimbAdharo.asyAH || 28|| krIDAshailau madananR^ipateH kAntipUrasya kokau syAtAM tasyA dhruvamurasijau ki~nchidApANDumUlau | madvishleShaH sharaduDunibhAM tyAjayan hAramAlAM manye bhIto vitarati tayorashrudhArAbhiranyAm || 29|| bhUShAsvAsthAM yadapi jahatI tAM vahatyeva kA~nchIM grAhaM grAhaM pR^ithu pR^ithu mayA mauktikaM gumbhitA yA | shroNIbimbe sumahati tayA bhUShite komalA~NgyAH sAlAvItAM sa kila madano manyate rAjadhAnIm || 30|| machchitAkhyadvipaniyamanAlAnayordvandvamUrvoH shroNIbhArAdalasamadhunA jAyate khinnakhinnam | ArabdhAnAM hara hara mayA yatra saMvAhanAnAM nityaM jAtA niravadhirasAH ke.api ke.apyantarAyAH || 31|| AdvArAntaM madabhigamanAsha~NkayA cha~nchalAkShyA yAtAyAtaiH kisalayanibhau klishyataH pAdapadmau | mithyAgotraskhalanamasakR^it prastutaM hanta yAbhyAM labdhuM pAdapraNatiShu mayA hanta santADanAni || 32|| yadyapyasyAH krashayati vapurvallarIM dIpyamAno vishleShAgnirdviguNayati tAM kintu lAvaNyalakShmIm | taptAM taptAM nayati nitarAM tAnavaM jAtavedA haimIM lekhAmapi tu janayatyeva varNaprakarSham || 33|| pR^ithvIreNUnalakanikare netrayorbAShpapUraM haste gaNDaM sitabisalatAhArajAlaM stanAgre | shroNyAM kShaumaM malinamasR^iNaM sA vahatyeva hante\- tyAstAmetadbahuvilapitairmAstu kAlAtipAtaH || 34|| sthitvA chUte prathamakathite mugdhakAntAdharAbhaM daShTvA svairaM kisalayamatha prekShaNIyA tvayA sA | pR^ichChantI vA malayavapanaM prashrayAnmatpravR^ittiM madvR^ittAntaM kathaya kaThinasyeti vA prArthayantI || 35|| Chinte tApaM himajalamayI chAndanI kinnu charchA mandaspandAH kimu sukhakarA mArutAshchAmarANAm | pR^ichChantInAmiti savayasAM sAtireke.api tApe smitvA ramyaM sakalamiti vA chittamAshvAsayantI || 36|| praspandante malayapavanA rundhi jAlaM kavATaiH shambhornAmnA sharagaNamuchaM bhIShayeH pa~nchabANam | jIva~njIvaM visR^ija charituM chandrike chandrikAyA\- mitthaM cheTIM sajalanayanAmAdishantI muhurvA || 37|| prAptAlambA parijanakaraiH prApya vA chitrashAlAM mugdhA svasyAshcharaNapatitaM veti taM mAM nirIkShya | ehyuttiShTha priya na kupitAsmIti bAShpAkulAkShI gADhAshleShaprachalitakarA rudhyamAnA sakhIbhiH || 38|| kopaM chaNDi tyaja parijane daivamatrAparAddhaM yenAkANDe samaghaTi mahAnAvayorviprayogaH | itthaM baddhA~njali kR^itaruShaM bhAvitAmagratastAM sAhaMbhUtA priyachaTushatairudyatA vAnunetum || 39|| gaNDAlambairlulitamalakairdhUsarairvaktrabimbaM dR^iShTvA shuddhasphaTikaghaTite bimbitaM bhittibhAge | antargehaM jaladashakalairAvR^ito rohitA~NkaH kenAnItaH pura iti bhiyA vyAharantI sakhIrvA || 40|| nidrAM prAptA kathamapi chirAttatra chAlokinI mAM shUnyAshleShaM virachitavatI hanta ghAtAt kuchAdryoH | nirbhindAnA nijakaradhR^itaM ka~NkaNaM srastasheShaM pashyantInAM nayanakamale badhnatI vA sakhInAm || 41|| vakti dhvA~NkShaH suhR^idupagamaM dakShiNe kShIravR^ikShe vAmaM netraM sphurati suchirAduchChvasityadya chetaH | ki~ncha svAnaH shravaNamadhuro jAyate kokilAnAM prANeShvAshAmiti kathamapi bhrAtarAbadhnatI vA || 42|| muktvA jIvAmyasusamamiti vrIlitA vismitA vA tatsa~NgAshA punariha paraM heturityAsitA vA | shochantI mAM dayitamathavA viprayogAsahiShNuM strINAM cheShTAsviti hi virahotthAsu di~NmAtrametat || 43|| gADhAshleShavyatikararasagranthanAdUyamAnaH sambhogAnte svapanavidhaye yaH purA dhUyate sma | kaNThotsa~NgAnmama sa vidhinA vairiNA dUrakR^iShTo vAmo bAhustvayi savidhage yAsyati spandamasyAH || 44|| vakturvaktraM tamasi bhavato naiva dR^ishyeta rAtrA\- vAmadhyAhnaM bhavati niyamavyAkulA vAsare sA | sahyasparshe sati ravikare tAmasahyasmarArtiM matsandeshaM maNivalabhikAmAshritaH shrAvayethAH || 45|| tyaktvA chUtAnapi kusumitAnAgato matsamIpaM kinnveSha syAt kamapi kushalodantamAkhyAtukAmaH | ityAlIbhirbhR^itajalakaNaM pANinAmR^iShTanetraM dR^iShTaH spaShTAkSharamiti shanaiH shaMsituM prakramethAH || 46|| amlAnA te jayati kamanIyA~Ngi ma~NgalyabhUShA patyuH pArshvAt suhR^idahamupeto.asmi sandeshahAraH | jAtaM viddhi shrutisukhagirAM kokilAnAM kule mAM ye pa~ncheShoH kimapi pathikAkarShaNaM ShaShThamastram || 47|| choleShvAste sumukhi kushalI tvatpriyaH pR^ichChati tvAM kachchit kShemaM bhajati bhavatItyAttavAchaM bhavantam | bhUyobhUyaH kathaya kathayetyAlapantyashrumishraiH prItismerairmadiranayanA mAnayiShyatyapA~NgaiH || 48|| evaM brUyAH punarajani yaH premakope mitho vAM jAte maune chapalachapalastatkShaNaM pUrvamuktyAm | tAdR^ikpremNashchiravirahiNaH prANanAthasya vANI seyaM mattaH shravaNasarasA shrUyatAM shrAvyabandhA || 49|| kalyANA~Ngi priyasahacharIM tvAmanAsAdayadbhi\- rbAhyairakShaiH saha paramahaM yAmi kAmapyavasthAm | dhanyaM chetaH punaridamahorAtramanyAnapekShaM tvayyAmagnaM bata nanu pR^ithagbhAgyamapyekajAnAm || 50|| mAdyadbhR^i~NgaiH kumudapavanaistarjyamAnasya ghorai\- rAta~NkAkhye sarasi luThato hA nishIthe nishIthe | nidrAmUke jagati rudati shvAsachintAjuSho me sa~NkrandantashchaTulanayane chakravAkAH sahAyAH || 51|| mohAdvaitaM viharati dhR^itirlIyate jADyamIne bhAtyunmAdo bhramati matirityAdi so.ahaM na vedmi | bANaM mu~nchan parisaracharo na svapan nApi khAdan kR^itsnaM jAnAtyalasagamane kevalaM pa~nchabANaH || 52|| kAle chAsmin kanadalibhR^itaH kampitAgrapravAlAH kamrA vallyaH kimapi marutA chumbitA dakShiNena | ki~nchiddaShTAdharakisalayAM prA~NmayA bhogakAle sItkurvANAM dhutakaratalAM tvAM priye smArayanti || 53|| aMsAlambishlathakachabharaM hastaruddhAmbarAntaM prAkkrIDAnte tava maNigavAkShopakaNTheShu chAram | smAraM smAraM kathamapi mayA muhyatA sahyate.asau mando vAyuH sutanu bakulodbhedasaurabhyabandhuH || 54|| tIrtvA rAtriM virahamahatIM tIvratApAM katha~nchi\- ddR^iShTvA bhAnoH kiraNamaruNaM jambhashatrordigante | pratyudyAntIM tvaritamabalAM shliShyate bhAgyasImne sAra~NgAkShi spR^ihayati mano hanta chakrAkhyayUne || 55|| utkaNTho.asmi tvaduditadhiyA mugdhahaMsIninAde tvadbhUShAyAM hariti satataM lochane pAtayAmi | tvatsaMspR^iShTe mama cha vapuShi prema badhnAmi kAnte satyaM prANAnapi paramahaM tvatpriyAn dhArayAmi || 56|| tvaM chAhaM cha kShitimupagatAvityavishleShachintA nindAvantau smara iti mitho vAkyasambhedasaukhyam | spR^ishyete nau nishi shashikaraira~Ngake yaugapadyAt tenApyasti dviradagamane satyamAshleShabuddhiH || 57|| hAhantAsminnasulabhamithodarshane viprayoge saivAlambo mama bhagavatI bhAvanAkalpavallI | tvAmAsInAmasakR^idanayA gADhamAli~Ngya rAgA\- da~NkArUDhAmalaghujaghane nochitaM vaktumanyat || 58|| jAtaM cheto madanasubhaTasyAdya yogyaM sharavyaM naikachChidraM niyatamamutaH subhru vibhraMshi dhairyam | kAlAt kShINe punaravayave vardhate kevalaM no tApastIvrasmarahutabhujA tasya varNodgamo.api || 59|| evaMprAyA na hi na virahe jIvituM santyupAyAH satyaM taistaiH kR^itadhR^itirahaM prANimi prANanAthe | nishchityaivaM nirupamaguNe sAhasebhyo nivR^ittA tvaM cha snAnAdiShu savayasAM prArthanAM mA niShedhIH || 60|| tIrNaprAyo virahajaladhiH shailakanyAprasAdA\- chCheShaM mAsadvitayamabale sahyatAM mA viShIda | dhUpodgAraiH surabhiShu tato bhIru saudhAntareShu krIDiShyAvo navajaladharadhvAnamandrANyahAni || 61|| kachchichchitte sphurati chapalApA~Ngi chUrNyAM kadAchit srastottaMsaM dhavalanayanaM dhautabimbAdharoShTham | snAnAnte te mukhamupasakhi prekShamANe mayi drA\- gvakShodaghne payasi punarapyAvayormajjanaM tat || 62|| AshliShyantaM viTapabhujayA tatra vallIranekAH krIDArAme kamapi taruNaM vIkShya mAkandavR^ikSham | sAchIkR^itya sphuradadharayA chaNDi vaktraM bhavatyA subhrUbha~NgaH sajalakaNikaH preShito mayyapA~NgaH || 63|| pratyAkhyAtaH praNayini ruShA bimbito.ahaM stane te sairandhryaj~nA sthagayitumabhUchchandanena pravR^ittA | mA pATIraM pulakini punashchAtra limpeti shaMsa\- tyAlIvR^inde smitajuShi kR^itA dR^iktvayA vrIlagarbhA || 64|| uchchinvatyAH kisalayaruchA pANinodyAnapuShpaM sAkaM bhR^i~Ngaistava mayi mukhAmbhojasaurabhyalubdhe | reNutrastA iva sumanasAM dakShiNAH kelisakhyaH ka~nchitkAlaM karakisalayairapyadhurlochanAni || 65|| ityetasmAnmama kushalitAM viddhyabhij~nAnadAnA\- dbhUyashchaikaM shR^iNu sahacharIM dhUtanaikAnunItim | kelIhaMse smarajuShi haThAchchumbatIShatstanantIM tvaM tu smR^itvA kimapi bahalavrIlamAlokathA mAm || 66|| rAgo nAma truTati viraheNeti lokapravAda\- stvatsambaddho mama shataguNaH sa~NgamAdviprayoge | so.ayaM bhedo viShayabhidayA sa~Ngame tvaM kilaikA vishleShe tu tribhuvanamidaM jAyate tvanmayaM hi || 67|| etatkR^ityaM priyasakha mama bhrAturArtasya kR^itvA nAsIraH syA jagati karuNAshAlinAM saMvibhAge | shaMsanti tvAM nanu parabhR^itaM shaishave yadbhR^ito.anyaiH patrivrAtAbharaNa bharaNenAdya sa tvaM pareShAm || 68|| evaM tasyA virahavidhuraM jIvitaM sthApayitvA gachCha svechChAviharaNa yathAprArthitaM digvibhAgam | mAnyashrIH syAnmadananR^ipateH kokilA te.anukUlA bhUyAnmaivaM sakR^idapi tayA viprayogaprasa~NgaH || 69|| ## Contact Venetia Ansell www.rasalabooks.com venetia at rasalabooks.com \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}