%@@1
% File name             : meghanew.itx
%--------------------------------------------
% Text title            : meghadUta (kAlidAsa)
% Author                :
% Language              : Sanskrit
% Subject               : philosophy/hinduism/religion
% Description/comments  : ????Source
% Transliterated by     : Avinash Sathaye sohum at ms.uky.edu
% Proofread by          : Avinash Sathaye sohum at ms.uky.edu
% Latest update         : November 1, 2010
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :
% http://sanskritdocuments.org
% http://sanskrit.gde.to/
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's'
% agreement.
% @@2
%
% Commands upto engtitle are
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. meghadUta (kAlidAsa)   ..}##
\itxtitle{.. meghadUta (kAlidAsa) ..}##\endtitles ##
##
          MeghadUta
           Kalidasa's Cloud Messenger
Encoded and proofread by Avinash Sathaye sohum at ms.uky.edu
OR Jost Gippert gippert at em.uni-frankfurt.de
 PUrvamegha
##
 kashchit.h kAntAvirahaguruNA svAdhikArAtpramattaH
 shApenAsta~NgamitamahimA varShabhogyeNa bhartuH .
 yakShashchakre janakatanayAsnAnapuNyodakeShu
 snigdhachChAyAtaruShu vasatiM rAmagiryAshrameShu .. 1..
 tasminnadrau katichidabalAviprayuktaH sa kAmI
 nItvA mAsAn.h kanakavalayabhra.nshariktaprakoShThaH .
 AShADhasya pra##(##sha##)##thamadivase meghamAshliShTasAnuM
 vaprakrIDApariNatagajaprekShaNIyaM dadarsha .. 2..
 tasya sthitvA kathamapi puraH kautukAdhAnahetoH
 antarbAShpashchiramanucharo rAjarAjasya dadhyau .
 meghAloke bhavati sukhino.apyanyathAvR^itti chetaH
 kaNThAshleShapraNayini jane kiM punardUrasa.nsthe .. 3..
 pratyAsanne nabhasi dayitAjIvitAlambanArthI
 jImUtena svakushalamayIM harayiShyan.h pravR^ittim.h .
 sa pratyagraiH kuTajakusumaiH kalpitArghAya tasmai
 prItaH prItipramukhavachanaM svAgataM vyAjahAra .. 4..
 dhUmajyotiH salilamarutAM saMnipAtaH kva meghaH
 saMdeshArthAH kva paTukaraNaiH prANibhiH prApaNIyAH .
 ityautsukyAdaparigaNayan.h guhyakastaM yayAche
 kAmArtA hi prakR^itikR^ipaNAshchetanAchetaneShu .. 5..
 jAtaM va.nshe bhuvanavidite puShkarAvartakAnAM
 jAnAmi tvAM prakR^itipuruShaM kAmarUpaM maghonaH .
 tenArthitvaM tvayi vidhivashAddUrabandhurgato.ahaM
 yAch~nA moghA varamadhiguNe nAdhame labdhakAmA .. 6..
 saMtaptAnAM tvamasi sharaNaM tat.h payoda priyAyAH
 saMdeshaM me hara dhanapatikrodhavishleShitasya .
 gantavyA te vasatiralakA nAma yakSheshvarANAM
 bAhyodyAnasthitaharashirashchandrikAdhautaharmyA 7..
 tvAmArUDhaM pavanapadavImudgR^ihItAlakAntAH
 prekShiShyante pathikavanitAH pratyayAdAshvasantyaH .
 kaH saMnaddhe virahavidhurAM tvayyupekSheta jAyAM
 na syAdanyo.apyahamiva jano yaH parAdhInavR^ittiH .. 8..
 mandaM mandaM nudati pavanashchAnukUlo yathA tvAM
 vAmashchAyaM nadati madhuraM chAtakaste sagandhaH .
 garbhAdhAnaxaNaparichayAnnUnamAbaddhamAlAH
 seviShyante nayanasubhagaM khe bhavantaM balAkAH .. 9..
 tAM chAvashyaM divasagaNanAtatparAmekapatnIM
 avyApannAmavihatagatirdrakShyasi bhrAtR^ijAyAm.h .
 AshAbandhaH kusumasadR^ishaM prAyasho hya~NganAnAM
 sadyaHpAti praNayi hR^idayaM viprayoge ruNaddhi .. 10..
 kartuM yachcha prabhavati mahImuchChilindhrAmavandhyAM
 tachChrutva a te shravaNasubhagaM garjitaM mAnasotkAH .
 A kailAsAdbisakisalayachChedapAtheyavantaH
 saMpatsyante nabhasi bhavato rAjaha.nsAH sahAyAH .. 11..
 ApR^ichChasva priyasakhamamuM tu~NgamAli~Ngya shailaM
 vandyaiH pu.nsAM raghupatipadaira~NkitaM mekhalAsu .
 kAle kAle bhavati bhavato yasya sa.nyogametya
 snehavyaktishchiravirahajaM mu~nchato vAShpamuShNam.h .. 12..
 mArgaM tAvachChR^iNu kathayatastvatprayANAnurUpaM
 saMdeshaM me tadanu jalada shroShyasi shrotrapeyam.h .
 khinnaH khinnaH shikhariShu padaM nyasya gantAsi yatra
 kShInaH kShINaH parilaghu payaH srotasaM chopabhujya .. 13..
 adreH shR^i~NgaM harati pavanaH kiM svidityunmukhIbhir
 drShTotsAhachchakitachakitaM mugdhasiddhA~NganAbhiH .
 sthAnAdasmAt.h sarasanichulAdutpatoda~NmukhaH khaM
 di~NnAgAnAM pathi pariharan.h sthUlahastAvalepAn.h .. 14..
 ratnachChAyAvyatikara iva prekShyametat.h purastAd.h
 valmIkAgrAt.h prabhavati dhanuShkhaNDamAkhaNDalasya .
 yena shyAmaM vapuratitarAM kAntimApatsyate te
 barheNeva sphuritaruchinA gopaveshasya viShNoH .. 15..
 tvayyAyattaM kR^iShiphalamiti bhrUvilAsAnabhij~naiH
 prItisnigdhairjanapadavadhUlochanaiH pIyamAnaH .
 sadyaHsIrotkaShaNasurabhi kShetramAruhya mAlaM
 kiMchitpashchAdvraja laghugatirbhUya evottareNa .. 16..
 tvAmAsAraprashamitavanopaplavaM sAdhu mUrdhnA
 vakShyatyadhvashramaparigataM sAnumAnAmrakUTaH .
 na kShudro.api prathamasukR^itApekShayA sa.nshrayAya
 prApte mitre bhavati vimukhaH kiM punaryastathochchaiH .. 17..
 ChannopAntaH pariNataphaladyotibhiH kAnanAmraiH
 tvayyArUDhe shikharamachalaH snigdhaveNIsavarNe .
 nUnaM yAsyatyamaramithunaprekShaNIyamavasthAM
 madhye shyAmaH stana iva bhuvaH sheShavistArapANDuH .. 18..
 sthitvA tasmin.h vanacharavadhUbhuktaku~nje muhUrtaM
 toyotsargadrutataragatistatparaM vartma tIrNaH .
 revAM drakShyasyupalaviShame vindhyapAde vishIrNAM
 bhaktichChedairiva virachitAM bhUtima~Nge gajasya .. 19..
 tasyAstiktairvanagajamadairvAsitaM vAntavR^iShTiH
 jambUku~njapratihatarayaM toyamAdAya gachCheH .
 antaHsAraM ghana tulayituM nAnilaH shakShyati tvAM
 riktaH sarvo bhavati hi laghuH pUrNatA gauravAya .. 20..
 nIpaM dR^iShTvA haritakapishaM keSharairardharUDhaiH
 AvirbhUtaprathamamukulAH kandalIshchAnukachCham.h .
 jagdhvAraNyeShvadhikasurabhiM gandhamAghrAya chorvyAH
 sAra~NgAste jalalavamuchaH sUchayiShyanti mArgam.h .. 21..
 utpashyAmi drutamapi sakhe matpriyArthaM yiyAsoH
 kAlakShepaM kakubhasurabhau parvate parvate te .
 shuklApA~NgaiH sajalanayanaiH svAgatIkR^itya kekAH
 pratyudyAtaH kathamapi bhavAn.h gantumAshu vyavasyet.h .. 22..
 pANDuchChAyopavanavR^itayaH ketakaiH sUchibhinnaiH
 nIDArambhairgR^ihabalibhujAmAkulagrAmachaityAH .
 tvayyAsanne pariNataphalashyAmajambUvanAntAH
 saMpatsyante katipayadinasthAyihaMsA dashArNAH .. 23..
 teShaM dikShu prathitavidishAlakShaNAM rAjadhAnIM
 gatvA sadyaH phalamavikalaM kAmukatvasya labdhA .
 tIropAntastanitasubhagaM pAsyasi svAdu yasmAt.h
 sabhrUbha~NgaM mukhamiva payo vetravatyAshchalormi .. 24..
 nIchairAkhyaM girimadhivasestatra vishrAmahetoH
 tvatsaMparkAt.h pulakitamiva prauDhapuShpaiH kadambaiH .
 yaH paNyastrIratiparimalodgAribhirnAgarANAM
 uddAmAni prathayati shilAveshmabhiryauvanAni .. 25..
 vishrAntaH san.h vraja vananadItIrajAtAni si~nchanna
 udyAnAnAM navajalakaNairyUthikAjAlakAni .
 gaNDasvedApanayanarujAklAntakarNotpalAnAM
 ChAyAdAnAt.h kShaNaparichitaH puShpalAvImukhAnAm.h .. 26..
 vakraH panthA yadapi bhavataH prasthitasyottarAshAM
 saudhotsa~NgapraNayavimukho mA sma bhUrujjayinyAH .
 vidyuddAmasphuritachakitaistatra paurA~NganAnAM
 lolApA~Ngairyadi na ramase lochanairva~nchito.asi .. 27..
 vIchikShobhastanitavihagashreNikA~nchIguNAyAH
 sa.nsarpantyAH skhalitasubhagaM darshitAvartanAbheH .
 nirvindhyAyAH pathi bhava rasAbhyantaraH sannipatya
 strINAmAdyaM praNayavachanaM vibhramo hi priyeShu .. 28..
 veNIbhUtapratanusalilAsAvatItasya sindhuH
 pANDuchChAyA taTaruhatarubhra.nshibhirjIrNaparNaiH .
 saubhAgyaM te subhaga virahAvasthayA vya~njayantI
 kArshyaM yena tyajati vidhinA sa tvayaivopapAdyaH .. 29..
 prApyAvantInudayanakathAkovidagrAmavR^iddhAn.h
 pUrvoddiShTAmanusara purIM shrIvishAlAM vishAlAm.h .
 svalpIbhUte sucharitaphale svargiNAM gAM gatAnAM
 sheShaiH puNyairhR^itamiva divaH kAntimat.h khaNDamekam.h .. 30..
 dIrghIkurvan.h paTu madakalaM kUjitaM sArasAnAM
 pratyUSheShu sphuTitakamalAmodamaitrIkaShAyaH .
 yatra strINAM harati surataglAnima~NgAnukUlaH
 shiprAvAtaH priyatama iva prArthanAchATukAraH .. 31..
 jAlodgIrNairupachitavapuH keshasa.nskAradhUpaiH
 bandhuprItyA bhavanashikhibhirdattanR^ittyopahAraH .
 harmyeShvasyAH kusumasurabhiShvadhvakhedaM nayethA
 laxmIM pashyaMllalitavanitApAdarAgA~NkiteShu .. 32..
 ##(##nItvA rAtriM lalitavanitApAdarAgA~NkiteShu .. 32..##)##
 bhartuH kaNThachChaviriti gaNaiH sAdaraM vIkShyamANaH
 puNyaM yAyAstribhuvanagurordhAma chaNDIshvarasya .
 dhUtodyAnaM kuvalayarajogandhibhirgandhavatyAH
 toyakrIDAniratayuvatisnAnatiktairmarudbhiH .. 33..
 apyanyasmi~n.h jaladhara mahAkAlamAsAdya kAle
 sthAtavyaM te nayanaviShayaM yAvadatyeti bhAnuH .
 kurvan.h saMdhyAbalipaTahatAM shUlinaH shlAghanIyAM
 AmandrANAM phalamavikalaM lapsyase garjitAnAm.h .. 34..
 pAdanyAsaiH kvaNitarashanAstatra lIlAvadhUtai
 ratnachChAyAkhachitavalibhishchAmaraiH klAntahastAH .
 veshyAstvatto nakhapadasukhAn.h prApya varShAgrabindUn.h
 AmokShyante tvayi madhukarashreNidIrghAn.h kaTAkShAn.h .. 35..
 pashchAduchchairbhujataruvanaM maNDalenAbhilInaH
 sAMdhyaM tejaH pratinavajapApuShparaktaM dadhAnaH .
 nR^ityArambhe hara pashupaterArdranAgAjinechChAM
 shAntodvegastimitanayanaM dR^iShTabhaktirbhavAnyA .. 36..
 gachChantInAM ramaNavasatiM yoShitAM tatra naktaM
 ruddhAloke narapatipathe sUchibhedyaistamobhiH .
 saudAminyA kanakanikaShasnigdhayA darshayorvIM
 toyotsargastanitamukharo mA sma bhUrviklavAstAH .. 37..
 tAM kasyAM chid.h bhavanavalabhau suptapArAvatAyAM
 nItvA rAtriM chiravilasanAt.h khinnavidyutkalatraH .
 dR^iShTe sUrye punarapi bhavAn.h vAhayedadhvasheShaM
 mandAyante na khalu suHR^idAmabhyupetArthakR^ityAH .. 38..
 tasmin.h kAle nayanasalilaM yoShitAM khaNDitAnAM
 shAntiM neyaM praNayibhirato vartma bhAnostyajAshu .
 prAleyAsraM kamalavadanAt.h so.api hartuM nalinyAH
 pratyAvR^ittastvayi kararudhi syAdanalpAbhyasUyaH .. 39..
 gambhIrAyAH payasi saritashchetasIva prasanne
 ChAyAtmApi prakR^itisubhago lapsyate te pravesham.h .
 tasmAt.h tasyAH kumudavishadAnyarhasi tvaM na dhairyAn.h
 moghIkartuM chaTulashapharodvartanaprekShitAni .. 40..
 tasyAH kiM chit.h karadhR^itamiva prAptavAnIrashAkhaM
 nItvA nIlaM salilavasanaM muktarodhonitambam.h .
 prasthAnaM te kathamapi sakhe lambamAnasya bhAvi
 j~nAtAsvAdo vivR^itajaghanAM ko vihAtuM samarthaH .. 41..
 tvanniShyandochChvasitavasudhAgandhasaMparkaramyaH
 srotorandhradhvanitasubhagaM dantibhiH pIyamAnaH .
 nIchairvAsyatyupajigamiShordevapUrvaM giriM te
 shIto vAyuH pariNamayitA kAnanodumbarANAm.h .. 42..
 tatra skandaM niyatavasatiM puShpameghIkR^itAtmA
 puShpAsAraiH snapayatu bhavAn.h vyomaga~NgAjalArdraiH .
 rakShAhetornavashashibhR^itA vAsavInAM chamUnAM
 atyAdityaM hutavahamukhe saMbhrtaM tad.h dhi tejaH .. 43..
 jyotirlekhAvalayi galitaM yasya barhaM bhavAnI
 putrapremNA kuvalayapadaprApi karNe karoti .
 dhautApA~NgaM harashashiruchA pAvakestaM mayUraM
 pashchAdadrigrahaNagurubhirgarjitairnartayethAH .. 44..
 ArAdhyainaM sharavaNabhavaM devamulla~NghitAdhvA
 siddhadvandvairjalakaNabhayAdvINibhirmuktamArgaH .
 vyAlambethAH surabhitanayAlambhajAM mAnayiShyan.h
 srotomUrtyA bhuvi pariNatAM rantidevasya kIrtim.h .. 45..
 tvayyAdAtuM jalamavanate shAr~NgiNo varNachaure
 tasyAH sindhoH pR^ithumapi tanuM dUrabhAvAt.h pravAham.h .
 prekShiShyante gaganagatayo nUnamAvarjya dR^iShTIH
 ekaM muktAguNamiva bhuvaH sthUlamadhyendranIlam.h .. 46..
 tAmuttIrya vraja parichitabhrUlatAvibhramANAM
 pakShmotkShepAduparivilasatkR^iShNasharaprabhANAm.h .
 kundakShepAnugamadhukarashrImuShAmAtmabimbaM
 pAtrIkurvan.h dashapuravadhUnetrakautUhalAnAm.h .. 47..
 brahmAvartaM janapadamadhashChAyayA gAhamAnaH
 kShetraM kShatrapradhanapishunaM kauravaM tad.h bhajethAH .
 rAjanyAnAM shitasharashatairyatra gANDIvadhanvA
 dhArApAtaistvamiva kamalAnyabhyavarShanmukhAni .. 48..
 hitvA hAlAmabhimatarasAM revatIlochanA~NkAM
 bandhuprItyA samaravimukho lA~NgalI yAH siSheve .
 kR^itvA tAsAmabhigamamapAM saumya sArasvatInAM
 antaHshuddhastvamapi bhavitA varNamAtreNa kR^iShNaH .. 49..
 tasmAd.h gachCheranukanakhalaM shailarAjAvatIrNAM
 jahnoH kanyAM sagaratanayasvargasopAnapa~Nktim.h .
 gaurIvaktrabhrukuTirachanAM yA vihasyeva phenaiH
 shaMbhoH keshagrahaNamakarodindulagnormihastA .. 50..
 tasyAH pAtuM suragaja iva vyomni pUrvArdhalambI
 tvaM chedachChasphaTikavishadaM tarkayestiryagambhaH .
 sa.nsarpantyA sapadi bhavataH srotasi ChAyayAsau
 syAdasthAnopagatayamunAsa~NgamevAbhirAmA .. 51..
 AsInAnAM surabhitashilaM nAbhigandhairmR^igANAM
 tasyA eva prabhavamachalaM prApya gauraM tuShAraiH .
 vakShyasyadhvashramavinayane tasya shR^i~Nge niShaNNaH
 shobhAM shubhratrinayanavR^iShotkhAtapa~NkopameyAm.h .. 52..
 taM ched.h vAyau sarati saralaskandhasa~NghaTTajanmA
 bAdhetolkAkShapitachamarIbAlabhAro davAgniH .
 arhasyenaM shamayitumalaM vAridhArAsahasraiH
 ApannArtiprashamanaphalAH saMpado hyuttamAnAm.h .. 53..
 ##(##ye tvAM muktadhvanimasahanAH kAyabha~NgAya tasmin.h
 darpotsekAdupari sharabhA la~NghayiShyantyala~Nghyam.h .##)##
 ye saMrambhotpatanarabhasAH svA~Ngabha~NgAya tasmin.h
 muktAdhvAna sapadi sharabhA la~Nghayeyurbhavantam.h .
 tAn.h kurvIthAstumulakarakAvR^iShTihAsAvakIrNAn.h
 ke vA na syuH paribhavapadaM niShphalArambhayatnAH .. 54..
 tatra vyaktaM dR^iShadi charaNanyAsamardhendumauleH
 shashvat.h siddhairupahR^itabaliM bhaktinamraH parIyAH .
 yasmin.h dR^iShTe karaNavigamAdUrdhvamuddhUtapApAH
 saMkalpante sthiragaNapadaprAptaye shraddadhAnAH .. 55..
 shabdAyante madhuramanilaiH kIchakAH pUryamANAH
 saMsaktAbhistripuravijayo gIyate kiMnarIbhiH .
 nirhrAdI te muraja iva chet.h kandareShu dhvaniH syAt.h
 sa~NgItArtho nanu pashupatestatra bhAvI samagraH .. 56..
 prAleyAdrerupataTamatikramya tA.nstAn.h visheShAn.h
 ha.nsadvAraM bhR^igupatiyashovartma yat.h krau~ncharandhram.h .
 tenodIchIM dishamanusarestiryagAyAmashobhI
 shyAmaH pAdo baliniyamanAbhyudyatasyeva viShNoH .. 57..
 gatvA chordhvaM dashamukhabhujochChvAsitaprasthasaMdheH
 kailAsasya tridashavanitAdarpaNasyAtithiH syAH .
 shR^i~NgochChrAyaiH kumudavishadairyo vitatya sthitaH khaM
 rAshIbhUtaH pratidinamiva tryambakasyATTahAsaH .. 58..
 utpashyAmi tvayi taTagate snigdhabhinnA~njanAbhe
 sadyaHkR^ittadviradadashanachChedagaurasya tasya .
 shobhAmadreH stimitanayanaprekShaNIyAM bhavitrIM
 a.nsanyaste sati halabhR^ito mechake vAsasIva .. 59..
 hitvA tasminbhujagavalayaM shaMbhunA dattahastA
 krIDAshaile yadi cha vicharet.h pAdachAreNa gaurI .
 bha~NgIbhaktyA virachitavapuH stambhitAntarjalaughaH
 sopAnatvaM kuru maNitaTArohaNAyAgrayAyI .. 60..
 tatrAvashyaM valayakulishoddhaTTanogdIrNatoyaM
 neShyanti tvAM surayuvatayo yantradhArAgR^ihatvam.h .
 tAbhyo mokShastava yadi sakhe gharmalabdhasya na syAt.h
 krIDAlolAH shravaNaparuShairgarjitairbhAyayestAH .. 61..
 hemAmbhojaprasavi salilaM mAnasasyAdadAnaH
 kurvan.h kAmAt.h kShaNamukhapaTaprItimairAvatasya .
 dhunvankalpadrumakisalayAnyaMshukAnIva vAtaiH
 nAnAcheShTairjalada lalitairnirvishestaM nagendram.h .. 62..
 ##(##dhunvan.h vAtaiH sajalapR^iShataiH kalpavR^ikShA.nshukAni
 chChAyAbhinnaH sphaTikavishadaM nirvisheH parvataM tam.h .. 62..##)##
 taShyotsa~Nge praNayina iva srastaga~NgAdukUlAM
 na tvaM dR^iShTvA na punaralakAM j~nAsyase kAmachArin.h .
 yA vaH kAle vahati salilodgAramuchchairvimAnA
 muktAjAlagrathitamalakaM kAminIvAbhravR^indam.h .. 63..
##
 Uttaramegha
##
 vidyutvantaM lalitavanitAH sendrachApaM sachitrAH
 sa~NgItAya prahatamurajAH snigdhagambhIraghoSham.h .
 antastoyaM maNimayabhuvastu~Ngamabhra.nlihAgrAH
 prAsAdAstvAM tulayitumalaM yatra taistairvisheShaiH .. 64..
 haste lIlAkamalamalake bAlakundAnuviddhaM
 nItA lodhraprasavarajasA pANDutAmAnane shrIH .
 chUDApAshe navakurabakaM chAru karNe shirIShaM
 sImante cha tvadupagamajaM yatra nIpaM vadhUnAm.h .. 65..
 AnandotthaM nayanasalilaM yatra nAnyairnimittaiH
 nAnyastApaH kusumasharajAdiShTasaMyogasAdhyAt.h .
 nApyanyasmAtpraNayakalahAdviprayogapapattiH
 vitteshAnAM na cha khalu vayo yauvanAdanyadasti .. 66..
 yasyAM yakShAH sitamaNimayAnyetya harmyasthalAni
 jyotishChAyAkusumarachitAnyuttamastrIsahAyAH .
 Asevante madhu ratiphalaM kalpavR^ikShaprasUtaM
 tvadgambhIradhvaniShu shanakaiH puShkareShvAhateShu .. 67..
 mandAkinyAH salilashishiraiH sevyamAnA marudbhiH
 mandArANAmanutaTaruhAM ChAyayA vAritoShNAH .
 anveShTavyaiH kanakasikatamuShTinikShepagUDhaiH
 saMkrIDante maNibhiramaraprArthitA yatra kanyAH .. 68..
 nIvIbandhochChvasitashithilaM yatra bimbAdharANAM
 kShaumaM rAgAdanibhR^itakareShvAkShipatsu priyeShu .
 archiShTu~NgAnabhimukhamapi prApya ratnapradIpAn.h
 hrImUDhAnAM bhavati viphalapreraNachchUrNamuShTiH .. 69..
 netrA nItAH satatagatinA yadvimAnAgrabhUmIH
 AlekhyAnAM navajalakaNairdoShamutpAdya sadyaH .
 sha~NkAspR^iShTA iva jalamuchastvAdR^ishA jAlamArgaiH
 dhUmodgArAnukR^itinipuNA jarjarA niShpatanti .. 70..
 yatra strINAM priyatamabhujAli~NganochChvAsitAnAM
 a~NgaglAniM suratajanitAM tantujAlAvalambAH .
 tvatsaMrodhApagamavishadaishchandrapAdairnishIthe
 vyAlumpanti sphuTajalalavasyandinashchandrakAntAH .. 71..
 akShayyAntarbhavananidhayaH pratyahaM raktakaNThaiH
 udgAyadbhirdhanapatiyashaH kiMnarairyatra sArdham.h .
 vaibhrAjAkhyaM vibudhavanitAvAramukhyAsahAyA
 baddhAlApA bahirupavanaM kAmino nirvishanti .. 72..
 gatyutkampAdalakapatitairyatra mandArapuShpaiH
 patrachChedaiH kanakakamalaiH karNavibhra.nshibhishcha .
 muktAjAlaiH stanaparisarashChinnasUtraishcha hAraiH
 naisho mArgaH saviturudaye sUchyate kAminInAm.h .. 73..
 matvA devaM dhanapatisakhaM yatra sAkShAd.h vasantaM
 prAyashchApaM na vahati bhayAn.h manmathaH ShaTpadajyam.h .
 sabhrUbha~NgaprahitanayanaiH kAmilakShyeShvamoghaiH
 tasyArambhashchaturavanitAvibhramaireva siddhaH .. 74..
 vAsashchitraM madhu nayanayorvibhramAdeshadakShaM
 puShpobhdedaM saha kisalayairbhUShaNAnAM vikalpAn.h .
 lAkShArAgaM charaNakamalanyAsayogyaM cha yasyAm.h
 ekaH sUte sakalamabalAmaNDanaM kalpavR^ikShaH .. 75..
 tatrAgAraM dhanapatigR^ihAnuttareNAsmadIyaM
 dUrAllakShyaM surapatidhanushchAruNA toraNena .
 yasyopAnte kR^itakatanayaH kAntaya vardhito me
 hastaprApyastabakanamito bAlamandAravR^ikShaH .. 76..
 vApI chAsmin.h marakatashilAbaddhasopAnamArgA
 haimaishChannA vikachakamalaiH snigdhavaidUryanAlaiH .
 yasyAstoye kR^itavasatayo mAnasaM saMnikR^iShTaM
 na dhyAsyanti vyapagatashuchastvAmapi prekShya haMsAH .. 77..
 tasyAstIre rachitashikharaH peshalairindranIlaiH
 krIDAshailaH kanakakadalIveShTanaprekShaNIyaH .
 madgehinyAH priya iti sakhe chetasA kAtareNa
 prekShyopAntasphuritataDitaM tvAM tameva smarAmi .. 78..
 raktAshokashH chalakisalayaH kesarashchAtra kAntaH
 pratyAsannau kurabakavR^itermAdhavImaNDapasya .
 ekaH sakhyAstava saha mayA vAmapAdAbhilAShI
 kA~NkShatyanyo vadanamadirAM dohadachChadmanAsyAH .. 79..
 tanmadhye cha sphaTikaphalakA kA~nchanI vAsayaShTiH
 mUle baddhA maNibhiranatiprauDhava.nshaprakAshaiH .
 tAlaiH shi~njAvalayasubhagairnartitaH kAntayA me
 yAmadhyAste divasavigame nIlakaNThaH suhR^id.h vaH .. 80..
 ebhiH sAdho hR^idayanihitairlakShaNairlakShayethA
 dvAropAnte likhitavapuShau sha~Nkhapadmau cha dR^iShTvA .
 kShAmachChAyaM bhavanamadhunA madviyogena nUnaM
 sUryApAye na khalu kamalaM puShyati svAmabhikhyAm.h .. 81..
 gatvA sadyaH kalabhatanutAM shIghrasaMpAtahetoH
 krIDAshaile prathamakathite ramyasANau niShaNNaH .
 arhasyantarbhavanapatitAM kartumalpAlpabhAsaM
 khadyotAlIvilasitanibhAM vidyudunmeShadR^iShTim.h .. 82..
 tanvI shyAmA shikharadashanA pakvabimbAdharoShThI
 madhye kShAmA chakitahariNIprekShaNA nimnanAbhiH .
 shroNIbhArAdalasagamanA stokanamrA stanAbhyAM
 yA tatra syAd.h yuvativiShaye sR^iShTirAdyeva dhAtuH .. 83..
 tAM jAnIthAH parimitakathAM jIvitaM me dvitIyaM
 dUrIbhUte mayi sahachare chakravAkImivaikAm.h .
 gADhotkaNThA guruShu divaseShveShu gachChatsu bAlAM
 jAtAM manye shishiramathitAM padminIM vAnyarUpAm.h .. 84..
 nUnaM tasyAH prabalaruditochChUnanetraM priyAyA
 niHShvAsAnAmashishiratayA bhinnavarNAdharoShTham.h .
 hastanyastaM mukhamasakalavyakti lambAlakatvAd.h
 indordainyaM tvadanusaraNakliShTakAnterbibharti .. 85..
 Aloke te nipatati purA sA balivyAkulA vA
 matsAdR^ishyaM virahatanu vA bhAvagamyaM likhantI .
 pR^ichChantI vA madhuravachanAM shArikAM pa~njarasthAM
 kachchit.h bhartuH smarasi rasike tvaM hi tasya priyeti .. 86..
 utsa~Nge vA malinavasane somya nikShipya vINAM
 madgotrA~NkaM virachitapadaM geyamudgAtukAmA .
 tantrImArdrAM nayanasalilaiH sArayitvA kathaM chid.h
 bhUyo bhUyaH svayamapi kR^itAM mUrChanAM vismarantI .. 87..
 sheShAn.h mAsAn.h virahadivasaprasthApitasyAvadhervA
 vinyasyantI bhuvi gaNanayA dehalIdattapuShpaiH .
 ##(##sa.nyogaM##)## matsa~NgaM vA hR^idayanihitArambhamAsvAdayantI
 prAyeNaite ramaNaviraheShva~NganAnAM vinodAH .. 88..
 savyApArAmahani na tathA pIDayenmadviyogaH
 sha~Nke rAtrau gurutarashuchaM nirvinodAM sakhIM te .
 matsaMdeshaiH sukhayitumalaM pashya sAdhvIM nishIthe
 tAmunnidrAmavanishayanAM saudhavAtAyanasthaH .. 89..
 AdhikShAmAM virahashayane saMniShaNNaikapArshvAM
 prAchImUle tanumiva kalAmAtrasheShAM himA.nshoH .
 nItA rAtriH kShaNa iva mayA sArdhamichChAratairyA
 tAmevoShNairvirahamahatImashrubhiryApayantIm.h .. 90..
 pAdAnindoramR^itashishirAn.h jAlamArgapraviShTAn.h
 pUrvaprItyA gatamabhimukhaM saMnivR^ittaM tathaiva .
 chakShuH khedAt.h salilagurubhiH pakShmabhishChAdayantIM
 sAbhre.ahnIva sthalakamalinIM na prabuddhAM na suptAm.h .. 91..
 niHshvAsenAdharakisalayakleshinA vikShipantIM
 shuddhasnAnAt.h paruShamalakaM nUnamAgaNDalambam.h .
 matsa.nbhogaH kathamupanayet.h svapnajo.apIti nidrAm.h
 AkA~NkShantIM nayanasalilotpIDaruddhAvakAshAm.h .. 92..
 Adye baddhA virahadivase yA shikhA dAma hitvA
 shApasyAnte vigalitashuchA tAM mayodveShTanIyAm.h .
 sparshadviShTAmayamitanakhenAsakR^it.h sArayantIM
 gaNDAbhogAt.h kaThinaviShamAmekaveNIM kareNa .. 93..
 sA saMnyastAbharaNamabalA peshalaM dhArayantI
 shayyotsa~Nge nihitamasakR^id.h duHkhaduHkhena gAtram.h .
 tvAmapyasraM navajalamayaM mochayiShyatyavashyaM
 prAyaH sarvo bhavati karuNAvR^ittirArdrAntarAtmA .. 94..
 jAne sakhyAstava mayi manaH saMbhrtasnehamasmAd.h
 itthaMbhUtAM prathamavirahe tAmahaM tarkayAmi .
 vAchAlaM mAM na khalu subhagaMmanyabhAvaH karoti
 pratyakShaM te nikhilamachirAd.h bhrAtaruktaM mayA yat.h .. 95..
 ruddhApA~Ngaprasaramalakaira~njanasnehashUnyaM
 pratyAdeshAdapi cha madhuno viShmR^itabhrUvilAsam.h .
 tvayyAsanne nayanamuparispandi sha~Nke mR^igAkShyA
 mInakShobhAchchalakuvalayashrItulAmeShyatIti .. 96..
 vAmashchAsyAH kararuhapadairmuchyamAno madIyaiH
 muktAjAlaM chiraparichitaM tyAjito daivagatyA .
 saMbhogAnte mama samuchito hastasa.nvAhanAnAM
 yAsyatyUruH sarasakadalIstambhagaurashchalatvam.h .. 97..
 tasmin.h kAle jalada yadi sA labdhanidrAsukhA syAd.h
 anvAsyainAM stanitavimukho yAmamAtraM sahasva .
 mA bhUdasyAH praNayini mayi svapnalabdhe kathaM chit.h
 sadyaH kaNThachyutabhujalatAgranthi gADhopagUDham.h .. 98..
 tAmutthApya svajalakaNikAshItalenAnilena
 pratyAshvastAM samamabhinavairjAlakairmAlatInAm.h .
 vidyudgarbhaH stimitanayanAM tvatsanAthe gavAkShe
 vaktuM dhIrastanitavachanairmAninIM prakramethAH .. 99..
 bharturmitraM priyamavidhave viddhi mAmambuvAhaM
 tatsaMdeshaihR^idayanihitairAgataM tvatsamIpam.h .
 yo vR^indAni tvarayati pathi shrAmyatAM proShitAnAM
 mandrasnigdhairdhvanibhirabalAveNimokShotsukAni .. 100..
 ityAkhyAte pavanatanayaM maithilIvonmukhI sA
 tvAmutkaNThochChvasitahR^idayA vIkShya saMbhavya chaiva .
 shroShyatyasmAt.h paramavahitA saumya sImantinInAM
 kAntodantaH suhR^idupanataH sa~NgamAtkiMchidUnaH .. 101..
 tAmAyuShman.h mama cha vachanAdAtmanaH chopakartuM
 brUyAdevaM tava sahacharo rAmagiryAshramasthaH .
 avyApannaH kushalamabale pR^ichChati tvAM viyuktaH
 pUrvAbhAShyaM sulabhavipadAM prANinAmetadeva .. 102..
 a~NgenA~NgaM pratanu tanunA gADhataptena taptaM
 sAsreNAshrudrutamaviratotkaNThamutkaNThitena .
 uShNochChvAsaM samadhikatarochChvAsinA dUravartI
 sa~Nkalpaistairvishati vidhinA vairiNA ruddhamArgaH .. 103..
 shabdAkhyeyaM yadapi kila te yaH sakhInAM purastAt.h
 karNe lolaH kathayitumabhUdAnanasparshalobhAt.h .
 so.atikrAntaH shravaNaviShayaM lochanAbhyAmadR^iShTaH
 tvAmutkaNThAvirachitapadaM manmukhenedamAha .. 104..
 shyAmAsva~NgaM chakitahariNIprekShaNe dR^iShTipAtaM
 vaktrachChAyAM shashini shikhinAM barhabhAreShu keshAn.h .
 utpashyAmi pratanuShu nadIvIchiShu bhrUvilAsAn.h
 hantaikasminkvachidapi na te chaNdi sAdrshyamasti .. 105..
 tvAmAlikhya praNayakupitA dhAturAgaiH shilAyAM
 AtmAnaM te charaNapatitaM yAvadichChAmi kartum.h .
 asraistAvan.h muhurupachitairdR^iShTirAlupyate me
 krUrastasminnapi na sahate sa~NgamaM nau kR^itAntaH .. 106..
 mAmAkAshapraNihitabhujaM nirdayAshleShahetoH
 labdhAyAste kathamapi mayA svapnasaMdarshaneShu .
 pashyantInAM na khalu bahusho na sthalIdevatAnAM
 muktAsthUlAstarukisalayeShvashruleshAH patanti .. 107..
 dhArAsiktasthalasurabhiNastvanmukhasyAsya bAle
 dUrIbhUtaM pratanumapi mAM pa~nchabANaH kShiNoti .
 dharmAnte.asminvigaNaya kathaM vAsarANi vrajeyuH
 diksaMsaktapravitataghanavyastasUryAtapAni .. 108..
 bhittvA sadyaH kisalayapuTAn.h devadArudrumANAM
 ye tatkShIrasrutisurabhayo dakShiNena pravR^ittAH .
 Ali~Ngyante guNavati mayA te tuShArAdrivAtAH
 pUrvaspR^iShTaM yadi kila bhaveda~Ngamebhistaveti .. 109..
 saMkShipyeta kShaNa iva kathaM dIrghayAmA triyAmA
 sarvAvasthAsvaharapi kathaM mandamandAtapaM syAt.h .
 itthaM chetashchaTulanayane durlabhaprArthanaM me
 gADhoShmAbhiH kR^itamasharaNaM tvadviyogavyathAbhiH .. 110..
 nanvAtmAnaM bahu vigaNayannAtmanaivAvalambe
 tat.h kalyANi tvamapi nitarAM mA gamaH kAtaratvam.h .
 kasyAtyantaM sukhamupanataM duHkhamekAntato vA
 nIchairgachChatyupari cha dashA chakranemikrameNa .. 111..
 shApAnto me bhujagashayanAdutthite shAr~NgapANau
 sheShAnmAsAn.h gamaya chaturo lochane mIlayitvA .
 pashchAdAvAM virahaguNitaM taM tamAtmAbhilAShaM
 nirvekShyAvaH pariNatasharachchandrikAsu kShapAsu .. 112..
 bhUyashchAha tvamapi shayane kaNThalagnA purA me
 nidrAM gatvA kimapi rudatI sasvanaM viprabuddhA .
 sAntarhAsaM kathitamasakR^it.h pR^ichChatashcha tvayA me
 drShTaH svapne kitava ramayan.h kAmapi tvaM mayeti .. 113..
 etasmAn.h mAM kushalinamabhij~nAnadAnAd.h viditvA
 mA kaulInAchchakitanayane mayyavishvAsinI bhUH .
 snehAnAhuH kimapi virahe dhvaMsinaste tvabhogAd.h
 iShTe vastunyupachitarasAH premarAshIbhavanti .. 114..
 AshvAsyaivaM prathamavirahodagrashokAM sakhIM te
 shailAdAshu trinayanvR^iShotkhAtakUTAnnivR^ittaH .
 sAbhij~nAnaprahitakushalaistadvachobhirmamApi
 prAtaH kundaprasavashithilaM jIvitaM dhArayethAH .. 115..
 kachchit.h somya vyavasitamidaM bandhukR^ityaM tvayA me
 pratyAdeshAnna  khalu bhavato dhIratAM kalpayAmi .
 niHshabdo.api pradishasi jalaM yAchitashchAtakebhyaH
 pratyuktaM hi praNayiShu satAmIpsitArthakriyaiva .. 116..
 etat.h kR^itvA priyamanuchitaprArthanAvartmano me
 sauhardAd.h vA vidhura iti vA mayyanukroshabuddhyA .
 iShTAn.h deshAn.h vichara prAvR^iShA saMbhR^itashrIH
 mA bhUdevaM kShaNamapi cha te vidyutA viprayogaH .. 117..
 adhvaklAntaM pratimukhagataM sAnumAnAmrakUTaH
 tu~Ngena tvAM jalada shirasA vakShyati shlAghamAnaH .
 AsAreNa tvamapi shamayestasya naidAghamagniM
 sadbhAvArdraH phalati na chireNopakAro mahatsu .. ##?## ..
 ambhobindugrahaNachaturA.nshchAtakAn.h vIkShamANAH
 shreNIbhUtAH parigaNanayA nirdishanto balAkAH .
 tvAmAsAdya stanitasamaye mAnayiShyanti siddhAH
 sotkampAni priyasahacharIsaMbhramAli~NgitAni .. ##?## ..
 hArA.nstArA.nstaralaguTikAn.h koTishaH sha~NkhashuktIH
 shaShpashyAmAn.h marakatamaNInunmayUkhaprarohAn.h .
 dR^iShTvA yasyAM vipaNirachitAn.h vidrumANAM cha bha~NgAn.h
 sa.nlakShyante salilanidhayastoyamAtrAvasheShAH .. ##?## ..
 pradyotasya priyaduhitaraM vatsarAjo.atra jahre
 haimaM tAladrumavanamabhUdatra tasyaiva rAj~naH .
 atrodbhrAntaH kila nalagiriH stambhamutpATya darpAd.h
 ityAgantUn.h ramayati jano yatra bandhUnabhij~nAH .. ##?## ..
 pattrashyAmA dinakarahayaspardhino yatra vAhAH
 shailodagrAstvamiva kariNo vR^iShTimantaH prabhedAt.h .
 yodhAgraNyaH pratidashamukhaM sa.nyuge tasthivA.nsaH
 pratyAdiShTAbharaNaruchayashchandrahAsavraNA~NkaiH .. ##?## ..
 yatronmattabhramaramukharAH pAdapA nityapuShpA
 ha.nsashreNIrachitarashanA nityapadmA nalinyaH .
 kekotkaNThA bhavanashikhino nityabhAsvatkalApA
 nityajyotsnAH pratihatatamovR^ittiramyAH pradoShAH .. ##?## ..
 akShayyAntarbhavananidhayaH pratyahaM raktakaNThaiH
 udgAyadbhirdhanapatiyashaH kiMnarairyatra sArdham.h .
 vaibhrAjAkhyaM vibudhavanitAvAramukhyAsahAyA
 baddhAlApA bahirupavanaM kAmino nirvishanti .. ##?## ..
 vAsashchitraM madhu nayanayorvibhramAdeshadakShaM
 puShpodbhedaM saha kisalayairbhUShaNAnaM vikalpam.h .
 lAkShArAgaM charaNakamalanyAsayogyaM cha yasyAM
 ekaH sUte sakalamabalAmaNDanaM kalpavR^ikShaH .. ##?## ..
 snigdhAH sakhyaH kShaNamapi divA tAM na mokShyanti tanvIM
 ekaprakhyA bhavati hi jagatya~NganAnAM pravR^ittiH .
 sa tvaM rAtrau jalada shayanAsannavAtAyAnasthaH
 kAntAM supte sati parijane vItanidrAmupeyAH .. ##?## ..
 anveShTavyAmavanishayane sannikIrNaikapArshvAM
 tatparyantapragalitalavaishChinnaHArairivAsraiH .
 bhUyo bhUyaH kaThinaviShamAM sArayantIM kapolAd.h
 AmoktavyAmayamitanakhenaikaveNIM kareNa .. ##?## ..
 dhArAsiktasthalasurabhiNastvanmukhasyAsya bAle
 dUrIbhUtaM pratanumapi mAM pa~nchabANaH kShiNoti .
 gharmAnte.asmin.h vigaNaya kathaM vAsarANi vrajeyuH
 diksa.nsaktapravitataghanavyastasUryAtapAni .. ##?## ..
 ityAkhyAte surapatisakhaH shailakulyApurIShu
 sthitvA sthitvA dhanapatipurIM vAsaraiH kaishchidApa .
 matvAgAraM kanakaruchiraM lakShaNaiH pUrvamuktaiH
 tasyotsa~Nge kShititalagatAM tAM cha dInAM dadarsha .. ##?## ..
 tasmAdadrernigaditumatho shIghrametyAlakAyAM
 yakShAgAraM vigalitanibhaM diShTachihnairviditvA .
 yat.h saMdiShTaM praNayamadhuraM guhyakena prayatnAt.h
 tadgehinyAH sakalamavadat.h kAmarUpI payodaH .. ##?## ..
 tatsaMdeshaM jaladharavaro divyavAchA.a.achachakShe
 prANA.nstasyA janahitarato rakShituM yakShavadhvAH .
 prApyodantaM pramuditamanAH sApi tasthau svabhartuH
 keShAM na syAdavitathaphalA prArthanA hyuttameShu .. ##?## ..
 shrutvA vArttAM jaladakathitAM tAM dhanesho.api sadyaH
 shApasyAntaM sadayahR^idayaH sa.nvidhAyAstakopaH .
 sa.nyojyaitau vigalitashuchau daMpatI hR^iShTachittau
 bhogAniShTAnaviratasukhaM bhojayAmAsa shashvat.h .. ##?## ..
 itthaMbhUtaM surachitapadaM meghadUtAbhidhAnaM
 kAmakrIDAvirahitajane viprayoge vinodaH .
 meghasyAsminnatinipuNatA buddhibhAvaH kavInAM
 natvAryAyAshcharaNakamalaM kAlidAsashchakAra .. ##?## ..
##
##
##
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
{\rm http://sanskritdocuments.org}
\end{document}