%@@1
% File name             : raghuvansha15.itx
%--------------------------------------------
% Text title            : raghuvansha15
% Author                : kalidasa
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : Octobber 11, 2005
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :         
% http://sanskrit.gde.to/
% http://www.alkhemy.com/sanskrit/
% http://sanskrit.bhaarat.com See the document project
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's' agreement.
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. Raghuvansha 15 by Kalidas ..}## 
\itxtitle{.. kaalidaasakR^itam raghuva.nsham sarga 15 ..}##\endtitles ## 

kR^itasiitaaparityaagaH sa ratnaakaramekhalaam | 
bubhuje pR^ithiviipaalaH pR^ithiviimeva kevalaam|| 15\-1|| 
lavaNena viluptejyaastaamisreNa tamabhyayuH | 
munayo yamunaabhaajaH sharaNya.n sharaNaarthinaH|| 15\-2|| 
avekShya raama.n te tasminna prajahruH svatejasaa | 
traaNaabhaave hi shaapaastraaH kurvanti tapaso vyayam|| 15\-3|| 
pratishushraava kaakutsthastebhyo vighnapratikriyaam | 
dharmasa.nrakShaNaartheva pravR^ittirbhuvi shaar~NgiNaH|| 15\-4|| 
te raamaaya vadhopaayamaacakhyurvibudhadviShaH | 
durjayo lavaNaH shuulii vishuulaH praarthyataamiti|| 15\-5|| 
aadideshaatha shatrughna.n teShaa.n kShemaaya raaghavaH | 
kariShyanniva naamaasya yathaarthamarinigrahaat|| 15\-6|| 
yaH kashcana raghuuNaa.n hi paramekaH para.ntapaH | 
apavaada ivotsarga.n vyaavartayitumiishvaraH|| 15\-7|| 
agrajena prayuktaashiistato daasharathii rathii | 
yayau vanasthaliiH pashyanpuShpitaaH surabhiirabhiiH|| 15\-8|| 
raamaadeshaadanugataa senaa tasyaarthasiddhaye | 
pashcaadadhyanaarthasya dhaatoradhirivaabhavat|| 15\-9|| 
aadiShTavartmaa munibhiH sa gacCha.nstapasaa.n varaH | 
viraraaja rathapraShThairvaalakhilyairivaa.nshumaan|| 15\-10|| 
tasya maargavashaadekaa babhuuva vasatiryataH | 
rathasvanotkaNThamR^ige vaalmiikiiye tapovane|| 15\-11|| 
tamR^iShiH puujayaamaasa kumaara.n klaantavaahanam | 
tapaHprabhaavasiddhaabhirvisheShapratipattibhiH || 15\-12|| 
tasyaamevaasya yaaminyaamantarvantii prajaavatii | 
sutaavasuuta sa.npannau koshadaNDaaviva kShitiH|| 15\-13|| 
sa.ntaanashravaNaadbhraatuH saumitriH saumanasyavaan | 
praa~njalirmunimaamantrya praataryuktaratho yayau|| 15\-14|| 
sa ca praapa madhuupaghna.n kumbhiinasyaashca kukShijaH | 
vanaatkaramivaadaaya sattvaraashimupasthitaH || 15\-15|| 
dhuumadhuumro vasaagandhii jvaalaababhrushiroruhaH | 
kravyaadgaNapariivaarashcitaagniriva ja.ngamaH || 15\-16|| 
apashuula.n tamaasaadya lavaNa.n lakShmaNaanujaH | 
rurodha sa.nmukhiino hi jayo randhraprahaariNaam|| 15\-17|| 
naatiparyaaptamaalakShya matkukSheradya bhojanam | 
diShTyaa tvamasi me dhaatraa bhiitenevopapaaditaH|| 15\-18|| 
iti sa.ntarjya shatrughna.n raakShasastajjighaa.nsayaa | 
praa.nshumutpaaTayaamaasa mustaastambamiva drumam|| 15\-19|| 
saumitrernishitairbaaNairantaraa shakaliikR^itaH | 
gaatra.n puShparajaH praapa na shaakhii nairR^iteritaH|| 15\-20|| 
vinaashaattasya vR^ikShasya rakShastasmai mahopalam | 
prajighaaya kR^itaantasya muShTi.n pR^ithagiva sthitam|| 15\-21|| 
aindramastramupaadaaya shatrughnena sa taaDitaH | 
sikataatvaadapi para.n prapede paramaaNutaam|| 15\-22|| 
tamupaadravadudyamya dakShiNa.n dornishaacaraH | 
ekataala ivotpaatapavanaprerito giriH|| 15\-23|| 
kaarShNena patriNaa shatruH sa bhinnahR^idayaH patan | 
aninaaya bhuvaH kampa.n jahaaraashramavaasinaam|| 15\-24|| 
vayasaa.n pa~NktayaH peturhatasyopari vidviShaH | 
tatpratidvandvino muurdhni divyaaH kusumavR^iShTayaH|| 15\-25|| 
sa hatvaa lavaNa.n viirastadaa mene mahaujasaH | 
bhraatuH sodaryamaatmaanamindrajidvadhashobhinaH|| 15\-26|| 
tasya sa.nstuuyamaanasya caritaarthaistapasvibhiH | 
shushubhe vikramodagra.n vriiDayaavanata.n shiraH|| 15\-27|| 
upakuula.n ca kaalindyaaH purii.n pauruShabhuuShaNaH | 
nirmame nirmamo.artheShu mathuraa.n madhuraakR^itiH|| 15\-28|| 
yaa sauraajyaprakaashaabhirbabhau pauravibhuutibhiH | 
svargaabhiShyandavamana.n kR^itvevopaniveshitaa|| 15\-29|| 
tatra saudhagataH pashyanyamunaa.n cakravaakiniim | 
hemabhaktimatii.n bhuumeH praveNiimiva pipriye|| 15\-30|| 
sakhaa dasharathasyaapi janakasya ca mantrakR^it | 
sa.ncaskaarobhayapriityaa maithileyau yathaavidhi|| 15\-31|| 
sa tau kushalavonmR^iShTagarbhakledau tadaakhyayaa | 
kaviH kushalavaaveva cakaara kila naamataH|| 15\-32|| 
saa~Nga.n ca vedamadhyaapya ki.ncidutkraantashaishavau | 
svakR^iti.n gaapayaamaasa kaviprathamapaddhatim|| 15\-33|| 
raamasya madhura.n vR^itta.n gaayanto maaturagrataH | 
tadviyogavyathaa.n ki.ncicChithiliicakratuH sutau|| 15\-34|| 
itare.api raghorva.nshyaastrayastretaagnitejasaH | 
tadyogaatpativatniiShu patniiShvaasandvisuunavaH || 15\-35|| 
shatrughaatini shatrughnaH subaahau ca bahushrute | 
mathuraavidishe suunvornidadhe puurvajotsukaH|| 15\-36|| 
bhuuyastapovyayo maa bhuudvaalmiikeriti so.atyagaat | 
maithiliitanayodgiitaniHspandamR^igamaashramam|| 15\-37|| 
vashii vivesha caayodhyaa.n rathyasa.nskaarashobhiniim | 
lavaNasya vadhaatpaurairiikShito.atyantagauravam|| 15\-38|| 
sa dadarsha sabhaamadhye sabhaasadbhirupasthitam | 
raama.n siitaaparityaagaadasaamaanyapati.n bhuvaH|| 15\-39|| 
tamabhyanandatpraNata.n lavaNaantakamagrajaH | 
kaalanemivadhaatpriitasturaaShaaDiva shaar~NgiNam|| 15\-40|| 
sa pR^iShTaH sarvato vaartamaakhyadraadnye na sa.ntatim | 
pratyarpayiShyataH kaale kaveraadyasya shaasanaat|| 15\-41|| 
atha jaanapado vipraH shishumapraaptayauvanam | 
avataaryaa~Nkashayyaastha.n dvaari cakranda bhuupateH|| 15\-42|| 
shocaniiyaasi vasudhe yaa tva.n dasharathaaccyutaa | 
raamahastamanupraapya kaShTaatkaShTatara.n gataa|| 15\-43|| 
shrutvaa tasya shuco hetu.n goptaa jihraaya raaghavaH | 
na hyakaalabhavo mR^ityurikShvaakupadamaspR^ishat|| 15\-44|| 
sa muhuurta.n kShamasveti dvijamaashvaasya duHkhitam | 
yaana.n sasmaara kaubera.n vaivasvatajigiiShayaa|| 15\-45|| 
aattashastrastadadhyaasya prasthitaH sa raghuudvahaH | 
uccacaara purastasya guuDharuupaa sarasvatii|| 15\-46|| 
raajan prajaasu te kashcidapacaaraH pravartate | 
tamanviShya prashamayerbhaviShyasi tataH kR^itii|| 15\-47|| 
ityaaptavacanaadraamo vineShyanvarNavikriyaam | 
dishaH papaata patreNa veganiShkampahetunaa|| 15\-48|| 
atha dhuumaabhitaamraakSha.n vR^ikShashaakhaavalambinam | 
dadarsha ka.ncidaikShvaakastapasyantamadhomukham|| 15\-49|| 
pR^iShTanaamaanvayo raadnyaa sa kilaacaShTa dhuumapaH | 
aatmaana.n shambuka.n naama shuudra.n surapadaarthinam|| 15\-50|| 
tapasyanadhikaaritvaatprajaanaa.n tamaghaavaham | 
shiirShacChedya.n paricChidya niyantaa shastramaadade|| 15\-51|| 
sa tadvaktra.n himakliShTaki~njalkamiva pa~Nkajam | 
jyotiShkaNaahatashmashru kaNThanaalaadapaatayat|| 15\-52|| 
kR^itadaNDaH svaya.n raadnyaa lebhe shuudraH sataa.n gatim | 
tapasaa dushcareNaapi na svamaargavila~Nghinaa|| 15\-53|| 
raghunaatho.apyagastyena maargasa.ndarshitaatmanaa | 
mahaujasaa sa.nyuyuje sharatkaala ivendunaa|| 15\-54|| 
kumbhayonirala.nkaara.n tasmai divyaparigraham | 
dadau datta.n samudreNa piitenevaatmaniShkrayam|| 15\-55|| 
sa dadhanmaithiliikaNThanirvyaapaareNa baahunaa | 
pashcaannivavR^ite raamaH praakparaasurdvijaatmajaH || 15\-56|| 
tasya puurvoditaa.n nindaa.n dvijaH putrasamaagataH | 
stutvaa nivartayaamaasa traaturvaivasvataadapi|| 15\-57|| 
tamadhvaraaya muktaashva.n rakShaHkapinareshvaraaH | 
meghaaH sasyamivaambhobhirabhyavarShannupaayanaiH|| 15\-58|| 
digbhyo nimantritaashcainamabhijagmurmaharShayaH | 
na bhaumaanyeva dhiShNyaani hitvaa jyotirmayaanyapi|| 15\-59|| 
upashalyaniviShTaistaishcaturdvaaramukhii babhau | 
ayodhyaa sR^iShTalokeva sadyaH paitaamahii tanuH|| 15\-60|| 
shlaaghyastyaago.api vaidehyaaH patyuH praagva.nshavaasinaH | 
ananyajaaneH saivaasiidyasmaajjaayaa hiraNmayii|| 15\-61|| 
vidheradhikasa.nbhaarastataH pravavR^ite makhaH | 
aasanyatra kriyaavighnaa raakShasaa eva rakShiNaH|| 15\-62|| 
atha praacetasopadnya.n raamaayaNamitastataH | 
maithileyau kushalavau jagaturgurucoditau|| 15\-63|| 
vR^itta.n raamasya vaalmiikeH kR^itistau ki.nnarasvanau | 
ki.n tadyena mano hartumala.n syaataa.n na shR^iNvataam|| 15\-64|| 
ruupe giite ca maadhurya.ntayostajdnyairniveditam | 
dadarsha saanujo raamaH shushraava ca kutuuhalii|| 15\-65|| 
tadgiitashravaNaikaagraa sa.nsadashrumukhii babhau | 
himaniShyandinii praatarnirvaateva vanasthalii|| 15\-66|| 
vayoveShavisa.nvaadi raamasya ca tayostadaa | 
janataa prekShya saadR^ishya.n naakShikampa.n vyatiShThata|| 15\-67|| 
ubhayorna tathaa lokaH praaviiNyena visiShmiye | 
nR^ipateH priitidaaneShu viitaspR^ihatayaa yathaa|| 15\-68|| 
geye ko nu vinetaa vaa.n kasya ceya.n kR^itiH kaveH | 
iti raadnyaa svaya.n pR^iShTau tau vaalmiikimasha.nsataam|| 15\-69|| 
atha saavarajo raamaH praacetasamupeyivaan | 
uuriikR^ityaatmano deha.n raajyamasmai nyavedayat|| 15\-70|| 
sa taavaakhyaaya raamaaya maithiliiyau tadaatmajau | 
kaviH kaaruNiko vavre siitaayaaH sa.nparigraham|| 15\-71|| 
taata shuddhaa samakSha.n naH snuShaa te jaatavedasi | 
dauraatmyaadrakShasastaa.n tu naatratyaaH shraddadhuH prajaaH|| 15\-72|| 
taaH svacaaritryamuddishya pratyaayayatu maithilii | 
tataH putravatiimenaa.n pratipatsye tvadaadnyayaa|| 15\-73|| 
iti pratishrute raadnyaa jaanakiimaashramaanmuniH | 
shiShyairaanaayayaamaasa svasiddhi.n niyamairiva|| 15\-74|| 
anyedyuratha kaakutsthaH sa.nnipaatya puraukasaH | 
kavimaahvaayayaamaasa prastutapratipattaye|| 15\-75|| 
svarasa.nskaaravatyaasau putraabhyaamatha siitayaa | 
R^icevodarciSha.n suurya.n raama.n munirupasthitaH|| 15\-76|| 
kaaShaayapariviitena svapadaarpitacakShuShaa | 
anvamiiyata shuddheti shaantena vapuShaiva saa|| 15\-77|| 
janaastadaalokapathaatpratisa.nhR^itacakShuShaH | 
tasthuste.avaa~NmukhaaH sarve phalitaa iva shaalayaH|| 15\-78|| 
taa.n dR^iShTiviShaye bharturmuniraasthitaviShTaraH | 
kuru niHsa.nshaya.n vatse svavR^itte lokamityashaat|| 15\-79|| 
atha vaalmiikishiShyeNa puNyamaavarjita.n payaH | 
aacamyodiirayaamaasa siitaa satyaa.n sarasvatiim|| 15\-80|| 
vaa~NmanaHkarmabhiH patyau vyabhicaaro yathaa na me | 
tathaa vishva.nbhare devi maamantardhaatumarhasi|| 15\-81|| 
evamukte tayaa saadhvyaa randhraatsadyobhavaadbhuvaH | 
shaatahradamiva jyotiH prabhaamaNDalamudyayau|| 15\-82|| 
tatra naagaphaNotkShiptasi.nhaasananiSheduShii | 
samudrarashanaa saakShaatpraaduraasiidvasu.ndharaa|| 15\-83|| 
saa siitaama~Nkamaaropya bhartR^ipraNihitekShaNaam | 
maameti vyaaharatyeva tasminpaataalamabhyagaat|| 15\-84|| 
dharaayaa.n tasya sa.nrambha.n siitaapratyarpaNaiShiNaH | 
gururvidhibalaapekShii shamayaamaasa dhanvinaH|| 15\-85|| 
R^iShiinvisR^ijya yadnyaante suhR^idashca puraskR^itaan | 
raamaH siitaagata.n sneha.n nidadhe tadapatyayoH|| 15\-86|| 
yudhaajitasya sa.ndeshaatsa desha.n sindhunaamakam | 
dadau dattaprabhaavaaya bharataaya bhR^itaprajaH|| 15\-87|| 
bharatastatra gandharvaanyudhi nirjitya kevalam | 
aatodya.n graahayaamaasa samatyaajayadaayudham|| 15\-88|| 
sa takShapuShkalau putrau raajadhaanyostadaakhyayoH | 
abhiShicyaabhiShekaarhau raamaantikamagaatpunaH|| 15\-89|| 
a~Ngada.n candraketu.n ca lakShmaNo.apyaatmasa.nbhavau | 
shaasanaadraghunaathasya cakre kaaraapatheshvarau|| 15\-90|| 
ityaaropitaputraaste jananiinaa.n janeshvaraaH | 
bhartR^ilokaprapannaanaa.n nivaapaanvidadhuH kramaat|| 15\-91|| 
upetya muniveSho.atha kaalaH provaaca raaghavam | 
rahaHsa.nvaadinau pashyedaavaa.n yasta.n tyajeriti|| 15\-92|| 
tatheti pratipannaaya vivR^itaatmaa nR^ipaaya saH | 
aacakhyau divamadhyaasva shaasanaatparameShThinaH|| 15\-93|| 
vidvaanapi tayordvaaHsthaH samaya.n lakShmaNo.abhinat | 
bhiito durvaasasaH shaapaadraamasa.ndarshanaarthinaa|| 15\-94|| 
sa gatvaa sarayuutiira.n dehatyaagena yogavit | 
cakaaraavitathaa.n bhraatuH pratidnyaa.n puurvajanmanaH|| 15\-95|| 
tasminnaatmacaturbhaage praa~NnaakamadhitasthuShi | 
raaghavaH shithila.n tasthau bhuvi dharmastripaadiva|| 15\-96|| 
sa niveshya kushaavatyaa.n ripunaagaa~Nkusha.n kusham | 
sharaavatyaa.n sataa.n suuktairjanitaashrulava.n lavam|| 15\-97|| 
udakpratasthe sthiradhiiH saanujo.agnipuraHsaraH | 
anvitaH pativaatsalyaadgR^ihavarjamayodhyayaa|| 15\-98|| 
jagR^ihustasya cittadnyaaH padavii.n hariraakShasaaH | 
kadambamukulasthuulairabhivR^iShTaa.n prajaashrubhiH|| 15\-99|| 
upasthitavimaanena tena bhaktaanukampinaa | 
cakre tridivaniHshreNiH sarayuuranuyaayinaam|| 15\-100|| 
yadgopratarakalpo.abhuutsa.nmardastatra majjataam | 
atastadaakhyayaa tiirtha.n paavana.n bhuvi paprathe|| 15\-101|| 
sa vibhurvibudhaa.nsheShu pratipannaatmamuurtiShu | 
tridashiibhuutapauraaNaa.n svargaantaramakalpayat|| 15\-102|| 
nirvartyaiva.n dashamukhashirashChedakaarya.n suraaNaa.n 
viShvaksenaH svatanumavishatsarvalokapratiShThaam | 
la~Nkaanaatha.n pavanatanaya.n cobhaya.n sthaapayitvaa 
kiirtistambhadvayamiva girau dakShiNe cottare ca|| 15\-103|| 

iti shriiraghuva.nshe mahaakaavye kavishriikaalidaasakR^itau 
shriiraamasvargaarohaNo naama pa~ncadashaH sargaH || 
## 
Encoded and Proofread by Arvind Kolhatkar akolhatkar at rogers.com \medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
\end{document}