%@@1
% File name             : raghuvansha11.itx
%--------------------------------------------
% Text title            : raghuvansha11
% Author                : kalidasa
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : August 05, 2005
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :         
% http://sanskrit.gde.to/
% http://www.alkhemy.com/sanskrit/
% http://sanskrit.bhaarat.com See the document project
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's' agreement.
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. Raghuvansha 11 by Kalidas ..}## 
\itxtitle{.. kaalidaasakR^itaM raghuva.nsham sarga 11 ..}##\endtitles ## 
kaushikena sa kila kShitiishvaro raamamadhvaravighaatashaantaye | 
kaakapakShadharametya yaacitastejasaa.n hi na vayaH samiikShyate || 11\-1|| 
kR^icChralabdhamapi labdhavarNabhaakta.n didesha munaye salakShmaNam | 
apyasupraNayinaa.n raghoH kule na vyahanyata kadaacidarthitaa || 11\-2|| 
yaavadaadishati paarthivastayornirgamaaya puramaargasa.nskriyaam | 
taavadaashu vidadhe marutsakhaiH saa sapuShpajalavarShibhirghanaiH || 11\-3|| 
tau nideshakaraNodyatau piturdhanvinau caraNayornipetatuH | 
bhuupaterapi tayoH pravatsyatornamrayorupari baaShpabindavaH || 11\-4|| 
tau piturnayanajena vaariNaa ki.ncidukShitashikhaNDakaavubhau | 
dhanvinau tamR^iShimanvagacChataa.n pauradR^iShTikR^itamaargatoraNau || 11\-5|| 
lakShmaNaanucarameva raaghava.n netumaicChadR^iShirityasau nR^ipaH | 
aashiSha.n prayuyuje na vaahinii.n saa hi rakShaNavidhau tayoH kShamaa || 11\-6|| 
maatR^ivargacaraNaspR^ishau munestau prapadya padavii.n mahaujasaH | 
recaturgativashaatpravartinau bhaaskarasya madhumaadhavaaviva || 11\-7|| 
viicilolabhujayostayorgata.n shaishavaaccapalamapyashobhata | 
tooyadaagama ivoddhyabhidyayornaamadheyasadR^isha.n viceShTitam || 11\-8|| 
tau balaatibalayoH prabhaavato vidyayoH pathi munipradiShTayoH | 
mamlaturna maNikuTTimocitau maatR^ipaarshvaparivartinaaviva || 11\-9|| 
puurvavR^ittakathitaiH puraavidaH saanujaH pitR^isakhasya raaghavaH | 
uhyamaana iva vaahanocitaH paadacaaramapi na vyabhaavayat || 11\-10|| 
tau saraa.nsi rasavadbhirambubhiH kuujitaiH shrutisukhaiH patatriNaH | 
vaayavaH surabhipuShpareNubhishChaayayaa ca jaladaaH siShevire || 11\-11|| 
naambhasaa.n kamalashobhinaa.n tathaa shaakhinaa.n ca na parishramacChidaam | 
darshanena laghunaa yathaa tayoH priitimaapurubhayostapasvinaH || 11\-12|| 
sthaaNudagdhavapuShastapovana.n praapya daasharathiraattakaarmukaH | 
vigraheNa madanasya caaruNaa so.abhavatpratinidhirna karmaNaa || 11\-13|| 
tau suketusutayaa khiliikR^ite kaushikaadviditashaapayaa pathi | 
ninyatuH sthalaniveshitaaTanii liilayaiva dhanuShii adhijyataam || 11\-14|| 
jyaaninaadamatha gR^ihNatii tayoH praaduraasa bahulakShapaaChaviH | 
taaDakaa calakapaalakuNDalaa kaalikeva nibiDaa balaakinii || 11\-15|| 
tiivravegadhutamaargavR^ikShayaa pretaciivaravasaa svanograyaa | 
abhyabhaavi bharataagrajastayaa vaatyayeva pitR^ikaananotthayaa || 11\-16|| 
udyataikabhujayaShTimaayatii.n shroNilambipuruShaantramekhalaam | 
taa.n vilokya vanitaavadhe ghR^iNaa.n patriNaa saha mumoca raaghavaH || 11\-17|| 
yaccakaara vivara.n shilaaghane taaDakorasi sa raamasaayakaH | 
apraviShTaviShayasya rakShasaa.n dvaarataamagamadantakasya tat || 11\-18|| 
baaNabhinnahR^idayaa nipetuShii saa svakaananabhuva.n na kevalaam | 
viShTapatrayaparaajayasthiraa.n raavaNashriyamapi vyakampayat || 11\-19|| 
raamamanmathashareNa taaDitaa duHsahena hR^idaye nishaacarii | 
gandhavadrudhiracandanokShitaa jiiviteshavasati.n jagaama saa || 11\-20|| 
nairR^itaghnamatha mantravanmuneH praapadastramavadaanatoShitaat | 
jyotirindhananipaati bhaaskaraatsuuryakaanta iva taaDakaantakaH || 11\-21|| 
vaamanaashramapada.n tataH para.n paavana.n shrutamR^iSherupeyivaan | 
unmanaaH prathamajanmaceShTitaanyasmarannapi babhuuva raaghavaH || 11\-22|| 
aasasaada muniraatmanastataH shiShyavargaparikalpitaarhaNam | 
baddhapallavapuTaa~njalidruma.n darshanonmukhamR^iga.n tapovanam || 11\-23|| 
tatra diikShitamR^iShi.n rarakShaturvighnato dasharathaatmajau sharaiH | 
lokamandhatamasaatkramoditau rashmibhiH shashidivaakaraaviva || 11\-24|| 
viikShya vedimatha raktabindubhirbandhujiivapR^ithubhiH praduuShitaam | 
sa.nbhramo.abhavadapoDhakarmaNaamR^itvijaa.n cyutavika~Nkatasrucaam || 11\-25|| 
unmukhaH sapadi lakShamaNaagrajo baaNamaashrayamukhaatsamuddharan | 
rakShasaa.n balamapashyadambare gR^idhrapakShapavaneritadhvajam || 11\-26|| 
tatra yaavadhipatii makhadviShaa.n tau sharavyamakarotsa netaraan | 
ki.n mahoragavisarpivikramo raajileShu garuDaH pravartate || 11\-27|| 
so.astramugrajavamastrakovidaH sa.ndadhe dhanuShi vaayudaivatam | 
tena shailagurumapyapaatayatpaaNDupatramiva taaDakaasutam || 11\-28|| 
yaH subaahuriti raakShaso.aparastatra tatra visasarpa maayayaa | 
ta.n kShuraprashakaliikR^ita.n kR^itii patriNaa.n vyabhajadaashramaadbahiH || 11\-29|| 
ityapaastamakhavighnayostayoH saa.nyugiinamabhinandya vikramam | 
R^itvijaH kulapateryathaakrama.n vaagyatasya niravartayankriyaaH || 11\-30|| 
tau praNaamacalakaakapakShakau bhraataraavavabhR^ithaapluto muniH | 
aashiShaamanupada.n samaspR^ishaddarbhapaaTalatalena paaNinaa || 11\-31|| 
ta.n nyamantrayata sa.nbhR^itakraturmaithilaH sa mithilaa.n vrajanvashii | 
raaghavaavapi ninaaya bibhratau taddhanuHshravaNaja.n kutuuhalam || 11\-32|| 
taiH shiveShu vasatirgataadhvabhiH saayamaashramatanuShvagR^ihyata | 
yeShu diirghatapasaH parigraho vaasavakShaNakalatrataa.n yayau || 11\-33|| 
pratyapadyata ciraaya yatpunashcaaru gautamavadhuuH shilaamayii | 
sva.n vapuH sa kila kilbiShacChidaa.n raamapaadarajasaamanugrahaH || 11\-34|| 
raaghavaanvitamupasthita.n muni.n ta.n nishamya janako janeshvaraH | 
arthakaamasahita.n saparyayaa dehabaddhamiva dharmamabhyagaat || 11\-35|| 
tau videhanagariinivaasinaa.n gaa.n gataaviva divaH punarvasuu | 
manyate sma pibataa.n vilocanaiH pakShmapaatamapi va~ncanaa.n manaH || 11\-36|| 
yuupavatyavasite kriyaavidhau kaalavitkushikava.nshavardhanaH | 
raamamiShvasanadarshanotsuka.n maithilaaya kathayaa.nbabhuuva saH || 11\-37|| 
tasya viikShya lalita.n vapuH shishoH paarthivaH prathitava.nshajanmanaH | 
sva.n vicintya ca dhanurduraanama.n piiDito duhitR^ishulkasa.nsthayaa || 11\-38|| 
abraviicca bhagavanmata~NgajairyadbR^ihadbhirapi karma duShkaram | 
tatra naahamanumantumutsahe mokShavR^itti kalabhasya ceShTitam || 11\-39|| 
hrepitaa hi bahavo nareshvaraastena taata dhanuShaa dhanurbhR^itaH | 
jyaanighaatakaThinatvaco bhujaansvaanvidhuuya dhigiti pratasthire || 11\-40|| 
pratyuvaaca tamR^iShirnishamyataa.n saarato.ayamathavaa giraa kR^itam | 
caapa eva bhavato bhaviShyati vyaktashaktirashanirgiraaviva || 11\-41|| 
evamaaptavacanaatsa pauruSha.n kaakapakShakadhare.api raaghave | 
shraddadhe tridashagopamaatrake daahashaktimiva kR^iShNavartmani || 11\-42|| 
vyaadidesha gaNasho.atha paarshvagaankaarmukaabhiharaNaaya maithilaH | 
taijasasya dhanuShaH pravR^ittaye toyadaaniva sahasralocanaH || 11\-43|| 
tatprasuptabhujagendrabhiiShaNa.n viikShya daasharathiraadade dhanuH | 
vidrutakratumR^igaanusaariNa.n yena baaNamasR^ijatvR^iShadhvajaH || 11\-44|| 
aatatajyamakarotsa sa.nsadaa vismayastimitanetramiikShitaH | 
shailasaaramapi naatiyatnataH puShpacaapamiva peshala.n smaraH  || 11\-45|| 
bhajyamaanamatimaatrakarShaNaattena vajraparuShasvana.n dhanuH | 
bhaargavaaya dR^iDhamanyave punaH kShatramudyatamiva nyavedayat || 11\-46|| 
dR^iShTasaaramatha rudrakaarmuke viiryashulkamabhinandya maithilaH | 
raaghavaaya tanayaamayonijaa.n ruupiNii.n shriyamiva nyavedayat || 11\-47|| 
maithilaH sapadi satyasa.ngaro raaghavaaya tanayaamayonijaam | 
sa.nnidhau dyutimatastaponidheragnisaakShika ivaatisR^iShTavaan || 11\-48|| 
praahiNocca mahita.n mahaadyutiH kosalaadhipataye purodhasam | 
bhR^ityabhaavi duhituH parigrahaaddishyataa.n kulamida.n nimeriti || 11\-49|| 
anviyeSha sadR^ishii.n sa ca snuShaa.n praapa cainamanukuulavaagdvijaH | 
sadya eva sukR^itaa.n hi pacyate kalpavR^ikShaphaladharmi kaa~NkShitam || 11\-50|| 
tasya kalpitapuraskriyaavidheH shushruvaanvacanamagrajanmanaH | 
uccacaala balabhitsakho vashii sainyareNumuShitaarkadiidhitiH || 11\-51|| 
aasasaada mithilaa.n sa veShTayanpiiDitopavanapaadapaa.n balaiH | 
priitirodhamasahiShTa saa purii striiva kaantaparibhogamaayatam || 11\-52|| 
tau sametya samaye sthitaavubhau bhuupatii varuNavaasavopamau | 
kanyakaatanayakautukakriyaa.n svaprabhaavasadR^ishii.n vitenatuH || 11\-53|| 
paarthiviimudavahadraghuudvaho lakShmaNastadanujaamathormilaam | 
yau tayoravarajau varaujasau tau kushadhvajasute sumadhyame || 11\-54|| 
te caturthasahitaastrayo babhuH suunavo navavadhuuparigrahaaH | 
saamadaanavidhibhedanigrahaaH siddhimanta iva tasya bhuupateH || 11\-55|| 
taa naraadhipasutaa nR^ipaatmajaiste ca taabhiragamankR^itaarthataam | 
so.abhavadvaravadhuusamaagamaH pratyayaprakR^itiyogasa.nnibhaH || 11\-56|| 
evamaattaratiraatmasa.nbhavaa.nstaanniveshya caturo.api tatra saH | 
adhvasu triShu visR^iShTamaithilaH svaa.n purii.n dasharatho nyavartata || 11\-57|| 
tasya jaatu marutaH pratiipagaa vartmasu dhvajatarupramaathinaH | 
ciklishurbhR^ishatayaa varuuthiniimuttaTaa iva nadiirayaaH sthaliim || 11\-58|| 
lakShyate sma tadanantara.n ravirbaddhabhiimapariveShamaNDalaH | 
vainateyashamitasya bhogino bhogaveShTita iva cyuto maNiH || 11\-59|| 
shyenapakShaparidhuusaraalakaaH saa.ndhyamegharudhiraardravaasasaH | 
a~Nganaa iva rajasvalaa disho no babhuuvuravalokanakShamaaH || 11\-60|| 
bhaaskarashca dishamadhyuvaasa yaa.n taa.n shritaaH pratibhaya.n vavaasire | 
kShatrashoNitapitR^ikriyocita.n codayantya iva bhaargava.n shivaaH || 11\-61|| 
tatpratiipapavanaadivaikR^ita.n prekShya shaantimadhikR^itya kR^ityavid | 
anvayu~Nkta gurumiishvaraH kShiteH svantamityalaghayatsa tadvyathaam || 11\-62|| 
tejasaH sapadi raashirutthitaH praaduraasa kila vaahiniimukhe | 
yaH pramR^ijya nayanaani sainikairlakShaNiiyapuruShaakR^itishciraat || 11\-63|| 
pitryava.nshamupaviitalakShaNa.n maatR^ika.n ca dhanuruurjita.n dadhat | 
yaH sasoma iva gharmadiidhitiH sadvijihva iva candanadrumaH || 11\-64|| 
yena roShaparuShaatmanaH pituH shaasane sthitibhido.api tasthuShaa | 
vepamaanajananiishirashChidaa praagajiiyata ghR^iNaa tato mahii || 11\-65|| 
akShabiijavalayena nirbabhau dakShiNashravaNasa.nsthitena yaH | 
kShatriyaantakaraNaikavi.nshatervyaajapuurvagaNanaamivodvahan || 11\-66|| 
ta.n piturvadhabhavena manyunaa raajava.nshanidhanaaya diikShitam | 
baalasuunuravalokya bhaargava.n svaa.n dashaa.n ca viShasaada paarthivaH || 11\-67|| 
naama raama iti tulyamaatmaje vartamaanamahite ca daaruNe | 
hR^idyamasya bhayadaayi caabhavadratnajaatamiva haarasarpayoH || 11\-68|| 
arghyamarghyamiti vaadina.n nR^ipa.n so.anavekShya bharataagrajo yataH | 
kShatrakopadahanaarciSha.n tataH sa.ndadhe dR^ishamudagrataarakaam || 11\-69|| 
tena kaarmukaniShaktamuShTinaa raaghavo vigatabhiiH purogataH | 
a~NguliivivaracaariNa.n shara.n kurvataa nijagade yuyutsunaa || 11\-70|| 
kShatrajaatamapakaaravairi me tannihatya bahushaH shama.n gataH | 
suptasarpa iva daNDaghaTTanaadroShito.asmi tava vikramashravaat || 11\-71|| 
maithilasya dhanuranyapaarthivaistva.n kilaanamitapuurvamakShaNoH | 
tannishamya bhavataa samarthaye viiryashR^i~Ngamiva bhagnamaatmanaH || 11\-72|| 
anyadaa jagati raama ityaya.n shabda uccarita eva maamagaat | 
vriiDamaavahati me sa sa.nprati vyastavR^ittirudayonmukhe tvayi || 11\-73|| 
bibhrato.astramacale.apyakuNThita.n dvau rupuu mama matau samaagasau | 
dhenuvatsaharaNaacca haihayastva.n ca kiirtimapahartumudyataH || 11\-74|| 
kShatriyaantakaraNo.api vikramastena maamavati naajite tvayi | 
paavakasya mahimaa sa gaNyate kakShavajjalati saagare.api yaH || 11\-75|| 
viddhi caattabalamojasaa hareraishvara.n dhanurabhaaji yattvayaa | 
khaatamuulamanilo nadiirayaiH paatayatyapi mR^idustaTadrumam || 11\-76|| 
tanmadiiyamidamaayudha.n jyayaa sa.ngamayya sashara.n vikR^iShyataam | 
tiShThatu pradhavamevamapyaha.n tulyabaahutarasaa jitastvayaa || 11\-77|| 
kaataro.asi yadi vodgataarciShaa tarjitaH parashudhaarayaa mama | 
jyaanighaatakaThinaa~NgulirvR^ithaa badhyataamabhayayaacanaa~njaliH || 11\-78|| 
evamuktavati bhiimadarshane bhaargave smitavikampitaadharaH | 
taddhanurgrahaNameva raaghavaH pratyapadyata samarthamuttaram || 11\-79|| 
puurvajanmadhanuShaa samaagataH so.atimaatralaghudarshano.abhavat | 
kevalo.api subhago navaambudaH ki.n punastridashacaapalaa~nChitaH || 11\-80|| 
tena bhuuminihitaikakoTi tatkaarmuka.n ca balinaadhiropitam | 
niShprabhashca ripuraasa bhuubhR^itaa.n dhuumasheSha iva dhuumaketanaH || 11\-81|| 
taavubhaavapi parasparasthitau vardhamaanaparihiinatejasau | 
pashyati sma janataa dinaatyaye paarvaNau shashidivaakaraaviva || 11\-82|| 
ta.n kR^ipaamuduravekShya bhaargava.n raaghavaH skhalitaviiryamaatmani | 
sva.n ca sa.nhitamamoghamaashuga.n vyaajahaara harasuunusa.nnibhaH || 11\-83|| 
na prahartumalamasmi nirdaya.n vipra ityabhibhatyapi tvayi | 
sha.nsa ki.n gatimanena patriNaa hanmi lokamuta te makhaarjitam || 11\-84|| 
pratyuvaaca tamR^iShirna tattvatastvaa.n na vedmi puruSha.n puraatanam | 
gaa.n gatasya tava dhaama vaiShNava.n kopito hyasi mayaa didR^ikShuNaa || 11\-85|| 
bhasmasaatkR^itavataH pitR^idviShaH paatrasaacca vasudhaa.n sasaagaraam | 
aahito jayaviparyayo.api me shlaaghya eva parameShThinaa tvayaa || 11\-86|| 
tadgati.n matimataa.n varepsitaa.n puNyatiirthagamanaaya rakSha me | 
piiDayiShyati na maa.n khiliikR^itaa svargapaddhatiramoghalolupam || 11\-87|| 
pratyapadyata tatheti raaghavaH praa~Nmukhashca visasarja saayakam | 
bhaargavasya sukR^ito.api so.abhavatsvargamaargaparigho duratyayaH || 11\-88|| 
raaghavo.api caraNau taponidheH kShamyataamiti vadansamaspR^ishat | 
nirjiteShu tarasaa tarasvinaa.n shatruShu praNatireva kiirtaye || 11\-89|| 
raajasatvamavadhuuya maatR^ika.n pitryamasmi gamitaH shama.n yadaa | 
nanvaninditaphalo mama tvayaa nigraho.apyayamanugR^ihiikR^itaH || 11\-90|| 
saadhayaamyahamavighnamastu te devakaaryamupapaadayiShyataH | 
uucivaaniti vacaH salakShmaNa.n lakShmaNaagrajamR^iShitirodadhe || 11\-91|| 
tasmingate vijayina.n parirabhya raama.n 
snehaadamanyata pitaa punareva jaatam | 
tasyaabhavatkShaNashucaH paritoShalaabhaH 
kakShaagnila~Nghitataroriva vR^iShTipaataH || 11\-92|| 
atha pathi gamayitvaa kL^iptaramyopakaarye 
katicidavanipaalaH sharvariiH sharvakalpaH | 
puramavishadayodhyaa.n maithiliidarshaniinaa.n 
kuvalayitagavaakShaa.n locanaira~Nganaanaam || 11\-93|| 

iti shriiraghuva.nshe mahaakaavye kavishriikaalidaasakR^itau 
siitavivaahavarNano naamaikaadashaH sargaH || 
## 
Encoded and Proofread by Arvind Kolhatkar akolhatkar at rogers.com 
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
\end{document}