%@@1
% File name             : raghuvansha8.itx
%--------------------------------------------
% Text title            : raghuvansha8
% Author                : kalidasa
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : April 28, 2005
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :         
% http://sanskrit.gde.to/
% http://www.alkhemy.com/sanskrit/
% http://sanskrit.bhaarat.com See the document project
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's' agreement.
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. Raghuvansha by Kalidas Chapter 8 ..}##
\itxtitle{.. kaalidaasakR^itaM raghuva.nsham sarga 8 ..}##\endtitles ## 
atha tasya vivaahakautuka.n lalita.n bibhrata eva paarthivaH |
vasudhaamapi hastagaaminiimakarodindumatiimivaaparaam || 8\-1||
duritairapi kartumaatmasaatprayatante nR^ipasuunavo hi yat |
tadupasthitamagrahiidajaH pituraadnyeti na bhogatR^iShNayaa || 8\-2||
anubhuuya vasiShThasa.nbhR^itaiH salilaistena sahaabhiShecanam |
vishadocChvasitena medinii  kathayaamaasa kR^itaarthataamiva || 8\-3||
sa babhuuva duraasadaH parairguruNaa.atharvavidaa kR^itakriyaH |
pavanaagnisamaagamo hyaya.n sahita.n brahma yadastratejasaa || 8\-4||
raghumeva nivR^ittayauvana.n tamamanyanta naveshvara.n prajaaH |
sa hi tasya na kevalaa.n shriya.n pratipede sakalaanguNaanapi || 8\-5||
adhika.n shushubhe shubha.nyunaa dvitayena dvayameva sa.ngatam |
padamR^iddhamajena paitR^ika.n vinayenaasya nava.n ca yauvanam || 8\-6||
sadaya.n bubhuje mahaabhujaH sahasodvegamiya.n vrajediti |
aciropanataa.n sa medinii.n navapaaNigrahaNaa.n vadhuumiva || 8\-7||
ahameva mato mahiipateriti sarvaH prakR^itiShvacintayat |
udadheriva nimnagaashateShvabhavannaasya vimaananaa kvacit || 8\-8||
na kharo na ca bhuuyasaa mR^iduH pavamaanaH pR^ithiviiruhaaniva |
sa puraskR^itamadhyamakramo namayaamaasa nR^ipaananuddharan || 8\-9||
atha viikShya raghuH pratiShThita.n prakR^itiShvaatmajamaatmavattayaa |
viShayeShu vinaashadharmasu tridivastheShvapi niHspR^iho.abhavat || 8\-10||
guNavatsutaropitashriyaH pariNaame hi diliipava.nshajaaH |
padavii.n taruvalkavaasasaa.n prayataaH sa.nyaminaa.n prapedire || 8\-11||
tamaraNyasamaashrayonmukha.n shirasaa veShTanashobhinaa sutaH |
pitara.n praNipatya paadayoraparityaagamayaacataatmanaH || 8\-12||
raghurashrumukhasya tasya tatkR^itavaaniipsitamaatmajapriyaH |
na tu sarpa iva tvaca.n punaH pratipede vyapavarjitaa.n shriyam || 8\-13||
sa kilaashramamantyamaashrito nivasannaavasathe puraadbahiH |
samupaasyata putrabhogyayaa snuShayevaavikR^itendriyaH shriyaa || 8\-14||
prashamasthitapuurvapaarthiva.n kulamabhyadyatanuutaneshvaram |
nabhasaa nibhR^itendunaa tulaamuditaarkeNa samaaruroha tat || 8\-15||
yatipaarthivali~NgadhaariNau dadR^ishaate raghuraaghavau janaiH |
apavargamahodayaarthayorbhuvama.nshaaviva dharmayorgatau || 8\-16||
ajitaadhigamaaya mantribhiryuyuje niitivishaaradairajaH |
anupaayipadopapraaptaye raghuraaptaiH samiyaaya yogibhiH || 8\-17||
nR^ipatiH prakR^itiiravekShitu.n vyavahaaraasanamaadade yuvaa |
paricetumupaa.nshu dhaaraNaa.n kushapuuta.n pravayaastu viShTaram || 8\-18||
anayatprabhushaktisa.npadaa vashameko nR^ipatiinanantaraan |
aparaH praNidhaanayogyayaa marutaH pa~nca shariiragocaraan || 8\-19||
akarodacireshvaraH kShitau dviShadaarambhaphalaani bhasmasaat |
itaro dahane svakarmaNaa.n vavR^ite dnyaanamayena vahninaa || 8\-20||
paNabandhamukhaanguNaanajaH ShaDupaayu~Nkta samiikShya tatphalam |
raghurapyajayatguNatraya.n prakR^itistha.n samaloShTakaa~ncanaH || 8\-21||
na navaH prabhuraa phalodayaatsthirakarmaa viraraama karmaNaH |
na ca yogavidhernavetaraH sthiradhiiraa paramaatmadarshanaat || 8\-22||
iti shatruShu cendriyeShu ca pratiShiddhaprasareShu jaagratau |
prasitaavudayaapavargayorubhayii.n siddhimubhaavavaapatuH || 8\-23||
atha kaashcidajavyapekShayaa gamayitvaa samadarshanaH samaaH |
tamasaH paramaapadavyaya.n puruSha.n yogasamaadhinaa raghuH || 8\-24||
shrutadehavisarjanaH pitushciramashruuNi vimucya raaghavaH |
vidadhe vidhimasya naiShThika.n yatibhiH saardhamanagniragnicit || 8\-25||
akarotsa tadaurdhvadaihika.n pitR^ibhaktyaa pitR^ikaaryakalpavit |
na hi tena pathaa tanutyajastanayaavarjitapiNDakaa~NkShiNaH || 8\-26||
sa paraardhyagaterashocyataa.n pituruddishya sadarthavedibhiH |
shamitaadhiradhijyakaarmukaH kR^itavaanapratishaasana.n jagat || 8\-27||
kShitirindumatii ca bhaaminii patimaasaadya tamagryapauruSham |
prathamaa bahuratnasuurabhuudaparaa viiramajiijanatsutam || 8\-28||
dasharashmishatopamadyuti.n yashasaa dikShu dashasvapi shrutam |
dashapuurvaratha.n yamaakhyayaa dashakaNThaariguru.n vidurbudhaaH || 8\-29||
R^iShidevagaNasvadhaabhujaa.n shrutayaagaprasavaiH sa paarthivaH |
anR^iNatvamupeyivaanbabhau paridhermukta ivoShNadiidhitiH || 8\-30||
balamaartabhayopashaantaye viduShaa.n satkR^itaye bahu shrutam |
vasu tasya vibhorna kevala.n guNavattaapi paraprayojanaa || 8\-31||
sa kadaacidavekShitaprajaH saha devyaa vijahaara suprajaaH |
nagaropavane shaciisakho marutaa.n paalayiteva nandane || 8\-32||
atha rodhasi dakShiNaadadheH shritagokarNaniketamiishvaram |
upaviiNayitu.n yayau raverudayaavR^ittipathena naaradaH || 8\-33||
kusumairgrathitaamapaarthivaiH srajamaatodyashironiveshitaam |
aharatkila tasya vegavaanadhivaasaspR^ihayeva maarutaH || 8\-34||
bhramaraiH kusumaanusaaribhiH parikiirNaa parivaadinii muneH |
dadR^ishe pavanaapalepaja.n sR^ijatii baaShpamivaa~njanaavilam || 8\-35||
abhibhuuya vibhuutimaartavii.n madhugandhaatishayena viirudhaam |
nR^ipateramarasragaapa saa dayitorustanakoTisusthitiim || 8\-36||
kShaNamaatrasakhii.n sujaatayoH stanayostaamavalokya vihvalaa |
nimimiila narottamapriyaa hR^itacandraa tamaseva kaumudii || 8\-37||
vapuShaa karaNojjhitena saa nipatantii patimapyapaatayat |
nanu tailaniShekabindunaa saha diipaarcirupaiti mediniim || 8\-38||
ubhayorapi paarshvavartinaa.n tumulenaartaraveNa vejitaaH |
vihagaaH kamalaakaraalayaaH samaduHkhaa iva tatra cukrushuH || 8\-39||
nR^ipatervyajanaadibhistamo nunude saa tu tathaiva sa.nsthitaa |
pratikaaravidhaanamaayuShaH sati sheShe hi phalaaya kalpate || 8\-40||
pratiyojayitavyavallakiisamavasthaamatha sattvaviplavaat |
sa ninaaya nitaantavatsalaH parigR^ihyocitama~Nkama~Nganaam || 8\-41||
patira~NkaniShaNNayaa tayaa karaNaapaayavibhinnavarNayaa |
samalakShyata bibhradaavilaa.n mR^igalekhaamuShasiiva candramaaH || 8\-42||
vilalaapa sa baaShpagadgada.n sahajaamapyapahaaya dhiirataam |
abhitaptamayo.api maardava.n bhajate kaiva kathaa shariiriShu || 8\-43||
kusumaanyapi gaatrasa.ngamaatprabhavantyaayurapohitu.n yadi |
na bhaviShyati hanta saadhana.n kimivaanyatprahariShyato vidheH || 8\-44||
athavaa mR^idu vastu hi.nsitu.n mR^idunaivaarabhate prajaantakaH |
himasekavipattiratra me nalinii puurvanidarshana.n mataa || 8\-45||
sragiya.n yadi jiivitaapahaa hR^idaye ki.n nihitaa na hanti maam |
viShamapyamR^ita.n kvacidbhavedamR^ita.n vaa viShamiishvarecChayaa || 8\-46||
athavaa mama bhaagyaviplavaadashaniH kalpita eva vedhasaa |
yadanena tarurna paatitaH kShapitaa tadviTapaashritaa lataa || 8\-47||
kR^itavatyasi naavadhiiraNaamaparaaddhe.api yadaa cira.n mayi |
kathamekapade niraagasa.n janamaabhaaShyamima.n na manyase || 8\-48||
dhruvamasmi shaThaH shucismite viditaH kaitavavatsalastava |
paralokamasa.nnivR^ittaye yadanaapR^icChya gataasi maamitaH || 8\-49||
dayitaa.n yadi taavadanvagaadvinivR^itta.n kimida.n tayaa vinaa |
sahataa.n hatajiivita.n mama prabalaamaatmakR^itena vedanaam || 8\-50||
suratashramasa.nbhR^ito mukhe dhriyate svedalavodgamo.api te |
atha caastamitaa tvamaatmanaa dhigimaa.n dehabhR^itaamasaarataam || 8\-51||
manasaapi na vipriya.n mayaa kR^itapuurva.n tava ki.n jahaasi maam |
nanu shabdapatiH kShiteraha.n tvayi me bhaavanibandhanaa ratiH || 8\-52||
kusumotkhacitaanvaliibhR^itashcalayanbhR^i~Ngarucastavaalakaan |
karabhoru karoti maarutastvadupaavartanasha~Nki me manaH || 8\-53||
tadapohitumarhasi priye pratibodhena viShaadamaashu me |
jvalitena guhaagata.n tamastuhinaadreriva naktamoShadhiH || 8\-54||
idamucChvasitaalaka.n mukha.n tava  vishraantakatha.n dunoti maam |
nishi suptamivaikapa~Nkaja.n virataabhyantaraShaTpadasvanam || 8\-55||
shashina.n punareti sharvarii dayitaa dvandvacara.n patatriNam |
iti tau virahaantarakShamau kathamatyantagataa na maa.n daheH || 8\-56||
navapallavasa.nstare.api te mR^idu duuyeta yada~Ngamarpitam |
tadida.n viShahiShyate katha.n vada vaamoru citaadhirohaNam || 8\-57||
iyamapratibodhashaayinii.n rashanaa tvaa.n prathamaa rahaHsakhii |
gativibhramasaadaniiravaa na shucaa naanu mR^iteva lakShyate || 8\-58||
kalamanyabhR^itaasu bhaasita.n kalaha.nsiiShu madaalasa.n gatam |
pR^iShatiiShu vilolamiikShita.n pavanaadhuutalataasu vibhramaaH || 8\-59||
tridivotsukayaapyavekShya maa.n nihitaaH satyamamii guNaastvayaa |
virahe tava me guruvyatha.n hR^idaya.n na tvavalambitu.n kShamaaH || 8\-60||
mithuna.n parikalpita.n tvayaa sahakaaraH phalinii ca nanvimau |
avidhaaya vivaahasatkriyaamanayorgamyata ityasaa.npratam || 8\-61||
kusuma.n kR^itadohadastvayaa yadashoko.ayamudiirayiShyati |
alakaabharaNa.n katha.n nu tattava neShyaami nivaapamaalyataam || 8\-62||
smarateva sashabdanuupura.n caraNaanugrahamanyadurlabham |
amunaa kusumaashruvarShiNaa tvamashokena sugaatri shocyase || 8\-63||
tava niHshvasitaanukaaribhirbakulairardhacitaa.n sama.n mayaa |
asamaapya vilaasamekhalaa.n kimida.n kinnarakaNThi supyate || 8\-64||
samaduHkhasukhaH sakhiijanaH pratipaccandranibho.ayamaatmajaH |
ahamekarasastathaapi te vyavasaayaH pratipattiniShThuraH || 8\-65||
dhR^itirastamitaa ratishcyutaa virata.n geyamR^iturnirutsavaH |
gatamaabharaNaprayojana.n parishuunya.n shayaniiyamadya me || 8\-66||
gR^ihiNii sacivaH sakhii mithaH priyashiShyaa lalite kalaavidhau |
karuNaavimukhena mR^ityunaa harataa tvaa.n vada ki.n na me hR^itam || 8\-67||
madiraakShi madaananaarpita.n madhu piitvaa rasavatkatha.n nu me |
anupaasyasi baaShpaduuShita.n paralokopanata.n jalaa~njalim || 8\-68||
vibhave.api sati tvayaa vinaa sukhametaavadajasya gaNyataam |
ahR^itasya vilobhanaantarairmama sarve viShayaastvadaashrayaaH || 8\-69||
vilapanniti kosalaadhipaH karuNaarthagrathita.n priyaa.n prati |
akarotpR^ithiviiruhaanapi srutashaakhaarasabaaShpaduuShitaan || 8\-70||
atha tasya katha.ncida~NkataH svajanastaamapaniiya sundariim |
visasarja tadantyamaNDanaamanalaayaaguruchandanaidhase || 8\-71||
pramadaamanu sa.nsthitaH shucaa nR^ipatiH sanniti vaacyadarshanaat |
na cakaara shariiramagnisaatsaha devyaa na tu jiivitaashayaa || 8\-72||
atha tena dashaahataH pare guNasheShaamapadishya bhaaminiim |
viduShaa vidhayo maharddhayaH pura evopavane samaapitaaH || 8\-73||
sa vivesha purii.n tayaa vinaa kShaNadaapaayashashaa~NkadarshanaH |
parivaahamivaavalokayansvashucaH pauravadhuumukhaashruShu || 8\-74||
atha ta.n savanaaya diikShitaH praNidhaanaadgururaashramasthitaH |
abhiSha~NgajaDa.n vijadnyivaaniti shiShyeNa kilaanvabodhayat || 8\-75||
asamaaptavidhiryato munistava vidvaanapi taapakaaraNam |
na bhavantamupasthitaH svaya.n prakR^itau sthaapayitu.n pathashcyutam || 8\-76||
mayi tasya suvR^itta vartate laghusa.ndeshapadaa sarasvatii |
shruNu vishrutasattvasaara taa.n hR^idi cainaamapadhaatumarhasi || 8\-77||
puruShasya padeShvajanmanaH samatiita.n ca bhavacca bhaavi ca |
sa hi niShpratighena cakShuShaa tritaya.n dnyaanamayena pashyati || 8\-78||
carataH kila dushcara.n tapastR^iNabindoH parisha~NkitaH puraa |
prajighaaya samaadhibhedinii.n harirasmai hariNii.n suraa~Nganaam || 8\-79||
sa tapaHpratibandhamanyunaa pramukhaaviShkR^itacaaruvibhramam |
ashapadbhava maanuShiiti taa.n shamavelaapralayormiNaa bhuvi || 8\-80||
bhagavanparavaanaya.n janaH pratikuulaacarita.n kShamasva me |
iti copanataa.n kShitispR^isha.n kR^itavaanaa surapuShpadarshanaat || 8\-81||
krathakaishikava.nshasa.nbhavaa tava bhuutvaa mahiShii ciraaya saa |
upalabdhavatii divashcyuta.n vivashaa shaapanivR^ittikaaraNam || 8\-82||
tadala.n tadapaayacintayaa vipadutpattimataamupasthitaa |
vasudheyamavekShyataa.n tvayaa vasumatyaa hi nR^ipaaH kalatriNaH || 8\-83||
udaye madavaacyamujjhataa shrutamaaviShkR^itamaatmavattvayaa |
manasastadupasthite jvare punarakliibatayaa prakaashyataam || 8\-84||
rudataa kuta eva saa punarbhavataa naanumR^itaapi labhyate |
paralokajuShaaa.n svakarmabhirgatayo bhinnapathaa hi dehinaam || 8\-85||
apashokamanaaH kuTumbiniimanugR^ihNiiShva nivaapadattibhiH |
svajanaashru kilaatisa.ntata.n dahati pretamiti pracakShate || 8\-86||
maraNa.n prakR^itiH shariiriNaa.n vikR^itirjiivitamuchyate budhaiH |
kShaNamapyavatiShThate shvasanyadi janturnanu laabhavaanasau || 8\-87||
avagacChati muuDhacetanaH priyanaasha.n hR^idi shalyamarpitam |
sthiradhiistu tadeva manyate kushaladvaaratayaa samuddhR^itam || 8\-88||
svashariirashariiriNaavapi shrutasa.nyogaviparyayau yadaa |
virahaH kimivaanutaapayedvada baahyairviShayairvipashcitam || 8\-89||
na pR^ithagjanavacChucho vasha.n vashinaamuttama gantumarhasi |
drumasaanumataa.n kimantara.n yadi vaayau dvitaye.api te calaaH || 8\-90||
sa tatheti vineturudaaramateH pratigR^iihya vaco visasarja munim |
tadalabdhapada.n hR^idi shokaghane pratiyaatamivaantikamasya guroH || 8\-91||
tenaaShTau parigamitaaH samaaH katha.ncidbaalatvaadavitathasuunR^itena suunoH |
saadR^ishyapratikR^itidarshanaiH priyaayaaH svapneShu kShaNikasamaagamotsavaishca || 8\-92||
tasya prasahya hR^idaya.n kila shokasha~NkuH
plakShapraroha iva saudhatala.n bibheda |
praaNaantahetumapi ta.n bhiShajaamasaadhya.n
laabha.n priyaanugamane tvarayaa sa mene || 8\-93||
samyagviniitamatha varmahara.n kumaara\-
maadishya rakShaNavidhau vidhivatprajaanaam |
rogopasR^iShTatanudurvasati.n mumukShuH
praayopaveshanamatirnR^ipatirbabhuuva || 8\-94||
tiirthe toyavyatikarabhave jahnukanyaasarayvo\-
rdehatyaagaadamaragaNanaalekhyamaasaadya sadyaH |
puurvaakaaraadhikatararucaa sa.ngataH kaantayaasau
liilaagaareShvaramata punarnandanaabhyantareShu || 8\-95||

iti shriiraghuva.nshe mahaakaavye kavishriikaalidaasa\-
kR^itaavajavilaapo naamaaShTamaH sargaH ||
##
\medskip\hrule\medskip
Encoded and Proofread by Arvind Kolhatkar akolhatkar at rogers.com
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
\end{document}