%@@1
% File name             : raghuvansha7.itx
%--------------------------------------------
% Text title            : raghuvansha7
% Author                : kalidasa
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : April 14, 2005
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :         
% http://sanskrit.gde.to/
% http://www.alkhemy.com/sanskrit/
% http://sanskrit.bhaarat.com See the document project
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's' agreement.
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. Raghuvansha by Kalidas Chapter 7 ..}##
\itxtitle{.. kaalidaasakR^itaM raghuva.nsham sarga 7 ..}##\endtitles ## 
athopayantraa sadR^isheNa yuktaa.n skandena saakShaadiva devasenaam |
svasaaramaadaaya vidarbhanaathaH purapraveshaabhimukho babhuuva || 7\-1||
senaaniveshaanpR^ithiviikShito.api jagmurvibhaatagrahamandabhaasaH |
bhojyaa.n prati vyarthamanorathatvaadruupeShu vesheShu ca saabhyasuuyaa || 7\-2||
saa.nnidhyayogaatkila tatra shacyaaH svaya.nvarakShobhakR^itaamabhaavaH |
kaakutsthamuddishya samatsaro.api shashaama tena kShitipaalalokaH || 7\-3||
taavatprakiirNaabhinavopacaaramindraayudhadyotitatoraNaa~Nkam |
varaH savadhvaa saha raajamaarga.n praapa dhvajacChaayanivaaritoShNam || 7\-4||
tatastadaalokanatatparaaNaa.n saudheShu caamiikarajaalavatsu |
babhuuvurittha.n purasundariiNaa.n tyaktaanyakaaryaaNi viceShTitaani || 7\-5||
aalokamaarga.n sahasaa vrajantyaa kayaacidudveShTanavaantamaalyaH |
baddhu.n na sa.nbhaavita eva taavatkareNa ruddho.api ca keshapaashaH || 7\-6||
prasaadhikaalambitamagrapaadamaakShipya kaaciddravaraagameva |
utsR^iShTaliilaagatiraagavaakShaadalaktakaa~Nkaa.n padavii.n tataana || 7\-7||
vilocana.n dakShiNama~njanena sa.nbhaavya tadva~ncitavaamanetraa|
tathaiva vaataayanasa.nnikarSha.n yayau shalaakaamaparaa vahantii || 7\-8||
jaalaantarapreShitadR^iShTiranyaa prasthaanabhinnaa.n na babandha niiviim |
naabhipraviShTaabharaNaprabhena hastena tasthaavavalambya vaasaH || 7\-9||
ardhaa~ncitaa satvaramutthitaayaaH pade pade durnimite galantii |
kasyaashcidaasiidrashanaa tadaaniima~NguShThamuulaarpitasuutrasheShaa || 7\-10||
taasaa.n mukhairaasavagandhagarbhairvyaaptaantaraaH saandrakutuuhalaanaam |
vilolanetrabhramarairgavaakShaaH sahasrapatraabharaNaa ivaasan || 7\-11||
taa raaghava.n dR^iShTibhiraapibantyo naaryo na jagmurviShayaantaraaNi |
tathaa hi sheShendriyavR^ittiraasaa.n sarvaatmanaa cakShuriva praviShTaa || 7\-12||
sthaane vR^itaa bhuupatibhiH parokShaiH svaya.nvara.n saadhumama.nsta bhojyaa |
padmeva naaraayaNamanyathaasau labheta kaanta.n kathamaatmatulyam || 7\-13||
paraspareNa spR^ihaNiiyashobha.n na cedida.n dvandvamayojayiShyat |
asmindvaye ruupavidhaanayatnaH patyuH prajaanaa.n vitatho.abhaviShyat || 7\-14||
ratismarau nuunamimaavabhuutaa.n raaj~naa.n sahasreShu tathaa hi baalaa |
gateyamaatmapratiruupameva mano hi janmaantarasa.ngatij~nam || 7\-15||
ityudgataaH pauravadhuumukhebhyaH shR^iNvankathaaH shrotrasukhaaH kumaaraH |
udbhaasita.n ma~Ngalasa.nvidhaabhiH sa.nbandhinaH sadma samaasasaada || 7\-16||
tato.avatiiryaashu kareNukaayaaH sa kaamaruupeshvaradattahastaH |
vaidarbhanirdiShTamatho vivesha naariimanaa.nsiiva catuShkamantaH || 7\-17||
mahaarhasi.nhaasanasa.nsthito.asau saratnamarghya.n madhuparkamishram |
bhojopaniita.n ca dukuulayugma.n jagraaha saardha.n vanitaakaTaakShaiH || 7\-18||
dukuulavaasaaH sa vadhuusamiipa.n ninye viniitairavarodharakShaiH |
velaasakaasha.n sphuTaphenaraashirnavairudanvaaniva candrapaadaiH || 7\-19||
tatraarcito bhojapateH purodhaa hutvaagnimaajyaadibhiragnikalpaH |
tameva caadhaaya vivaahasaakShye vadhuuvarau sa.ngamayaa.ncakaara || 7\-20||
hastena hasta.n parigR^ihya vadhvaaH sa raajasuunuH sutaraa.n cakaase |
anantaraashokalataapravaala.n praapyeva cuutaH pratipallavena || 7\-21||
aasiidvaraH kaNTakitaprakoShThaH svinnaa~NguliH sa.nvavR^ite kumaarii |
tasmindvaye tatkShaNamaatmavR^ittiH sama.n vibhakteva manobhavena || 7\-22||
tayorapaa~Ngapratisaaritaani kriyaasamaapattinivartitaani |
hriiyantraNaamaanashire manoj~naamanyonyalolaani vilocanaani || 7\-23||
pradakShiNaprakramaNaatkR^ishaanorudarciShastanmithuna.n cakaase |
merorupaanteShviva vartamaanamanyonyasa.nsaktamahastriyaamam || 7\-24||
nitambagurvii guruNaa prayuktaa vadhuurvidhaatR^ipratimena tena |
cakaara saa mattacakoranetraa lajjaavatii laajavisargamagnau || 7\-25||
haviHshamiipallavalaajagandhii puNyaH kR^ishaanorudiyaaya dhuumaH |
kapolasa.nsarpishikhaH sa tasyaa muhuurtakarNotpalataa.n prapede || 7\-26||
tada~njanakledasamaakulaakSha.n pramlaanabiijaa~NkurakarNapuuram |
vadhuumukha.n paaTalagandhalekhamaacaaradhuumagrahaNaadbabhuuva || 7\-27||
tau snaatakairbandhumataa ca raaj~naa pura.ndhribhishca kramashaH prayuktam |
kanyaakumaarau kanakaasanasthaavaardraakShataaropaNamanvabhuutaam || 7\-28||
iti svasurbhojakulapradiipaH sa.npaadya paaNigrahaNa.n sa raajaa |
mahiipatiinaa.n pR^ithagarhaNaartha.n samaadideshaadhikR^itaanadhishriiH || 7\-29||
li~NgairmudaH sa.nvR^itavikriyaaste hradaaH prasannaa iva guuDhanakraaH |
vaidarbhamaamantrya yayustadiiyaa.n pratyarpya puujaamupadaaChalena || 7\-30||
sa raajalokaH kR^itapuurvasa.nvidaarambhasiddhau samayopalabhyam |
aadaasyamaanaH pramadaamiSha.n tadaavR^itya panthaanamajasya tasthau || 7\-31||
bhartaapi taavatkrathakaishikaanaamanuShThitaanantarajaavivaahaH |
sattvaanuruupaaharaNiikR^itashriiH praasthaapayadraaghavamanvagaacca || 7\-32||
tisrastrilokaprathitena saardhamajena maarge vasatiiruShitvaa |
tasmaadapaavartata kuNDineshaH parvaatyaye soma ivoShNarashmeH || 7\-33||
pramanyavaH praagapi kosalendre pratyekamaattasvatayaa babhuuvuH | 
ato nR^ipashcakShamire sametaaH striiratnalaabha.n na tadaajatmasya || 7\-34||
tamudvahanta.n pathi bhojakanyaa.n rurodha raajanyagaNa sa dR^iptaH |
balipradiShTaa.n shriyamaadadaana.n traivikrama.n paadamivendrashatruH || 7\-35||
tasyaaH sa rakShaarthamanalpayodhamaadishya pitrya.n saciva.n kumaaraH |
pratyagrahiitpaarthivavaahinii.n taa.n bhaagiirathii.n shoNa ivottara~NgaH || 7\-36||
pattiH padaati.n rathina.n ratheshastura.ngasaadii turagaadhiruuDham |
yantaa gajasyaabhyapatadgajastha.n tulyapratidvandvi babhuuva yuddham || 7\-37||
nadatsu tuuryeShvavibhaavyavaaco nodiirayanti sma kulopadeshaan |
baaNaakSharaireva parasparasya naamorjita.n caapabhR^itaH shasha.nsuH || 7\-38||
utthaapitaH sa.nyati reNurashvaiH saandriikR^itaH syandanava.nshacakraiH |
vistaaritaH ku~njarakarNataalairnetrakrameNoparurodha suuryam || 7\-39||
matsyadhvajaa vaayuvashaadvidiirNairmukhaiH pravR^iddhadhvajiniirajaa.nsi |
babhuH pibantaH paramaarthamatsyaaH paryaavilaaniiva navodakaani || 7\-40||
ratho rathaa~Ngadhvaninaa vijaj~ne vilolaghaNTaakvaNitena naagaH |
svabhartunaamagrahaNaadbabhuuva saandre rajasyaatmaparaavabodhaH || 7\-41||
aavR^iNvato locanamaargamaajau rajondhakaarasya vijR^imbhitasya |
shastrakShataashvadviipaviirajanmaa baalaaruNo.abhuudrudhirapravaahaH || 7\-42||
sa cChinnamuulaH kShatajena reNustasyopariShTaatpavanaapadhuutaH |
a~NgaarasheShasya hutaashanasya puurvotthito dhuuma ivaababhaase || 7\-43||
prahaaramuurcChaapagame rathasthaa yantR^Inupaalabhya nivartitaashvaan |
yaiH saaditaa lakShitapuurvaketuu.nstaaneva saamarShatayaa nijaghnuH || 7\-44||
apyardhamaarge parabaaNaluunaa dhanurbhR^itaa.n hastavataa.n pR^iShatkaaH |
sa.npraapurevaatmajavaanuvR^ittyaa puurvaardhabhaagaiH phalibhiH sharavyam || 7\-45||
aadhoraNaanaa.n gajasa.nnipaate shiraa.nsi chakrairnishitaiH kShuraagraiH |
hataanyapi shyenanakhaagrakoTivyaasaktakeshaani chireNa petuH || 7\-46||
puurva.n prahartaa na jaghaana bhuuyaH pratiprahaaraakShamamashvasaadii |
tura.ngamaskandhaniShaNNadeha.n pratyaashvasanta.n ripumaacakaa~NkSha || 7\-47||
tanutyajaa.n varmabhR^itaa.n vikoshaibR^ihatsu danteShvasibhiH patadbhiH |
udyantamagni.n shamayaa.nbabhuuvurgajaa vivignaaH karashiikareNa || 7\-48||
shiliimukhotkR^ittashiraHphalaaDhyaa chyutaiH shirastraishcaShakottareva |
raNakShitiH shoNitamadyakulyaa raraaja mR^ityoriva paanabhuumiH || 7\-49||
upaantayorniShkuShita.n viha.ngairaakShipya tebhyaH pishitapriyaapi |
keyuurakoTikShatataaludeshaa shivaa bhujacChedamapaacakaara || 7\-50||
kashcidviShatkhaDgahR^itottamaa~NgaH sadyo vimaanaprabhutaamupetya |
vaamaa~Ngasa.nsaktasuraa~NganaH sva.n nR^ityatkabandha.n samare dadarsha || 7\-51||
anyonyasuutonmathanaadabhuutaa.n taaveva suutau rathinau ca kaucit |
vyashvau gadaavyaayatasa.nprahaarau bhagnaayudhau baahuvimardaniShThau || 7\-52||
paraspareNa kShatayoH prahartrorutkraantavaayvoH samakaalameva |
amartyabhaave.api kayoshcidaasiidekaapsaraHpraarthitayorvivaadaH || 7\-53||
vyuuhaavubhau taavitaretarasmaadbha~Nga.n jaya.n caapaturavyavastham |
pashcaatpuromaarutayoH pravR^iddhau paryaayavR^ityeva mahaarNavormii || 7\-54||
pareNa bhagne.api bale mahaujaa yayaavajaH pratyarisainyameva |
dhuumo nivartyeta samiiraNena yatastu kakShastata eva vahniH || 7\-55||
rathii niSha~Ngii kavacii dhanuShmaandR^iptaH sa raajanyakamekaviiraH |
nivaarayaamaasa mahaavaraahaH kalpakShayodvR^ittamivaarNavaambhaH || 7\-56||
sa dakShiNa.n tuuNamukhena vaama.n vyaapaarayanhastamalakShyataajau |
aakarNakR^iShTaa sakR^idasya yoddhurmaurviiva baaNaansuShuve ripughnaan || 7\-57||
sa roShadaShTaadhikalohitoShThairvyaktordhvarekhaa bhR^ikuTiirvahadbhiH |
tastaara gaa.n bhallanikR^ittakaNThairhuu.nkaaragarbhairdviShataa.n shirobhiH || 7\-58||
sarvairbalaa~NgairdviradapradhaanaiH sarvaayudhaiH ka~NkaTabhedibhishca |
sarvaprayatnena ca bhuumipaalaastasminprajahruryudhi sarva eva || 7\-59||
so.astravrajaishChannarathaH pareShaa.n dhvajaagramaatreNa babhuuva lakShyaH |
niihaaramagno dinapuurvabhaagaH ki.ncitprakaashena vivasvateva || 7\-60||
priya.nvadaatpraaptamasau kumaaraH praayu~Nkta raajasvadhiraajasuunuH |
gaandharvamastra.n kusumaastrakaantaH prasvaapana.n svapnanivR^ittalaulyaH || 7\-61||
tato dhanuShkarShaNamuuDhahastamekaa.nsaparyastashirastrajaalam |
tasthau dhvajastambhaniShaNNadeha.n nidraavidheya.n naradevasainyam || 7\-62||
tataH priyopaattarase.adharoShThe niveshya dadhmau jalaja.n kumaaraH |
tena svahastaarjitamekaviiraH pibanyasho muurtamivaababhaase || 7\-63||
sha~Nkhasvanaabhidnyatayaa nivR^ittaasta.n sannashatru.n dadR^ishuH svayodhaaH |
nimiilitaanaamiva pa~Nkajaanaa.n madhye sphuranta.m pratimaashashaa~Nkam || 7\-64||
sashoNitaistena shiliimukhaagrairnikShepitaaH ketuShu paarthivaanaam |
yasho hR^ita.n sa.nprati raaghaveNa na jiivita.n vaH kR^ipayeti varNaaH || 7\-65||
sa caapakoTiinihitaikabaahuH shirastraniShkarShaNabhinnamauliH |
lalaaTabaddhashramavaaribindurbhiitaa.n priyaametya vaco babhaaShe || 7\-66||
itaH paraanarbhakahaaryashastraanvaidarbhi pashyaanumataa mayaasi |
eva.nvidhenaahavaceShTitena tva.n praarthyase hastagataa mamaibhiH || 7\-67||
tasyaaH pratidvandvibhavaadviShaadaatsadyo vimukta.n mukhamaababhaase |
niHshvaasabaaShpaapagamaatprapannaH prasaadamaatmiiyamivaatmadarshaH || 7\-68||
hR^iShTaapi saa hriivijitaa na saakShaadvaagbhiH sakhiinaa.n priyamabhyanandat |
sthalii navaambhaHpR^iShataabhivR^iShTaa mayuurakekaabhirivaabhravR^indam || 7\-69||
iti shirasi sa vaama.n paadamaadhaaya raadnyaa\-
mudavahadanavadyaa.n taamavadyaadapetaH |
rathaturagarajobhistasya ruukShaalakaagraa
samaravijayalakShmiiH saiva muurtaa babhuuva || 7\-70||
prathamaparigataarthasta.n raghuH sa.nnivR^itta.n
vijayinamabhinandya shlaaghyajaayaasametam |
tadupahitakuTumbaH shaantimaargotsuko.abhuu\-
nna hi sati kuladhurye suuryava.nshyaa gR^ihaaya || 7\-71||

iti shriiraghuva.nshe mahaakaavye kavishriikaalidaasa\-
kR^itaavajasvaya.nvaraabhigamano naama saptamaH sargaH ||
##
\medskip\hrule\medskip
Encoded and proofread by Arvind Kolhatkar akolhatkar at rogers.com
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
\end{document}