%@@1
% File name             : raghuvansha5.itx
%--------------------------------------------
% Text title            : raghuvansha5
% Author                : kalidasa
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : February 22, 2005
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :         
% http://sanskrit.gde.to/
% http://www.alkhemy.com/sanskrit/
% http://sanskrit.bhaarat.com See the document project
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's' agreement.
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. Raghuvansha by Kalidas Chapter 5 ..}##
\itxtitle{.. kaalidaasakR^itaM raghuva.nsham sarga 5 ..}##\endtitles ##
tamadhvare vishvajiti kShitiisha.n niHsheShavishraaNitakoshajaatam |
utpaatavidyo gurudakShiNaarthii kautsaH prapede varatantushiShyaH || 5\-1||
sa mR^iNmaye viitahiraNmayatvaatpaatre nidhaayaarghyamanarghashiilaH |
shrutaprakaasha.n yashasaa prakaashaH pratyujjagaamaatithimaatitheyaH || 5\-2||
tamarcayitvaa vidhivadvidhij~nastapodhana.n maanadhanaagrayaayii |
vishaa.npatirviShTarabhaajamaaraatkR^itaa~njaliH kR^ityavidityuvaaca || 5\-3||
apyagraNiirmantrakR^itaamR^iShiiNaa.n kushaagrabuddhe kushalii guruste |
yatastvayaa j~naanamasheShamaapta.n lokena caitanyamivoShNarashmeH || 5\-4||
kaayena vaacaa manasaaoi shashvadyatsa.nbhR^ita.n vaasavadhairyalopi |
aapaadyate na vyayamantaraayaiH kaccinmaharShestrividha.n tapastat || 5\-5||
aadhaarabandhapramukhaiH prayatnaiH sa.nvardhitaanaa.n sutanirvisheSham |
kaccinna vaayvaadirupaplavo vaH shramacChidaamaashramapaadapaanaam || 5\-6||
kriyaanimitteshvapi vatsalatvaadabhagnakaamaa munibhiH kusheShu |
tada~Nkashayyaachyutanaabhinaalaa kaccinmR^igiiNaamanaghaa prasuutiH || 5\-7||
nirvatyate yairniyamaabhiSheko yebhyo nivaapaa~njalayaH pitR^INaam |
taanyu~nChaShaShThaa~Nkitasaikataani shivaani vastiirthajalaani kaccit || 5\-8||
niivaarapaakaadi kaDa.ngariiyairaamR^ishyate jaanapadairna kaccit |
kaalopapannaatithikalpyabhaaga.n vanya.n shariirasthitisaadhana.n vaH || 5\-9||
api prasannena maharShiNaa tva.n samyagviniiyaanumato gR^ihaaya |
kaalo hyaya.n sa.nkramitu.n dvitiiya.n sarvopakaarakShamamaashrama.n te || 5\-10||
tavaarhato naabhigamena tR^ipta.n mano niyogakriyayotsuka.n me |
apyaaj~nayaa shaasituraatmanaa vaa praapto.asi sa.nbhaavayitu.n vanaanmaam || 5\-11||
ityarghyapaatraanumitavyayasya raghorudaaraamapi gaa.n nishamya |
svaarthopapatti.n prati durbalaashastamityavocadvaratantushiShyaH || 5\-12||
sarvatra no vaartamavehi raajannaathe kutastvayyashubha.n prajaanaam |
suurye tapatyaavaraNaaya dR^iShTeH kalpeta lokasya katha.n tamisraa || 5\-13||
bhaktiH pratiikShyeShu kulocitaa te puurvaanmahaabhaaga tayaatisheShe |
vyatiitakaalastvahamabhyupetastvaamarthibhaavaaditi me viShaadaH || 5\-14||
shariiramaatreNa narendra tiShThannaabhaasi tiirthapratipaaditarddhiH |
aaraNyakopaattaphalaprasuutiH stambena niivaara ivaavashiShTaH || 5\-15||
sthaane bhavaanekanaraadhipaH sannaki.ncanatva.n makhaja.n vyanakti |
paryaayapiitasya surairhimaa.nshoH kalaakShayaH shlaaghyataro hi vR^iddheH || 5\-16||
tadanyatastaavadananyakaaryo gurvarthamaahartumaha.n yatiShye |
svastyastu te nirgalitaambugarbha.n sharadghana.n naardati caatako.api || 5\-17||
etaavaduktvaa pratiyaatukaama.n shiShya.n maharShernR^ipatirniShidhya |
ki.n vastu vidvangurave pradeya.n tvayaa kiyadveti tamanvayu~Nkta || 5\-18||
tato yathaavadvihitaadhvaraaya tasmai smayaaveshavivarjitaaya |
varNaashramaaNaa.n gurave sa varNii vicakShaNaH prastutamaacacakShe || 5\-19||
samaaptavidyena mayaa maharShirvij~naapito.abhuudgurudakShiNaayai |
sa me ciraayaaskhalitopacaaraa.n taa.n bhaktimevaagaNayatpurastaat || 5\-20||
nirbandhasa.njaataruShaarthakaarshyamacintayitvaa guruNaahamuktaH |
vittasya vidyaaparisa.nkhyayaa me koTiishcatasro dasha caahareti || 5\-21||
so.aha.n saparyaavidhibhaajanena matvaa bhavanta.n prabhushabdasheSham |
abhyutsahe sa.nprati noparoddhumalpetaratvaacChrutaniShkrayasya || 5\-22||
ittha.n dvijena dvijaraajakaantiraavedito vedavidaa.n vareNa |
enonivR^ittendriyavR^ittirena.n jagaada bhuuyo jagadekanaathaH || 5\-23||
gurvarthamarthii shrutapaaradR^ishvaa raghoH sakaashaadanavaapya kaamam |
gato vadaanyaantaramityaya.n me maa bhuutpariivaadanavaavataaraH || 5\-24||
sa tva.n prashaste mahite madiiye vasa.nshcaturtho.agnirivaagnigaare |
dvitraaNyahaanyarhasi soDhumarhan yaavadyate saadhayitu.n tvadartham || 5\-25||
tatheti tasyaavitatha.n pratiitaH pratyagrahiitsa.ngaramagrajanmaa |
gaamaattasaaraa.n raghurapyavekShya niShkraShTumartha.n cakame kuberaat || 5\-26||
vasiShThamantrokShaNajaatprabhaavaadudanvadaakaashamahiidhareShu |
marutsakhasyeva balaahakasya gatirvijaghne na hi tadrathasya || 5\-27||
athaadhishishye prayataH pradoShe ratha.n raghuH kalpitashastragarbham |
saamantasa.nbhaavanayaiva dhiiraH kailaasanaatha.n tarasaa jigiiShuH || 5\-28||
praataH prayaaNaabhimukhaaya tasmai savismayaaH koShagR^ihe niyuktaaH |
hiraNmayii.n koShagR^ihasya madhye vR^iShTi.n shasha.nsuH patitaa.n nabhastaH || 5\-29||
sa bhuupatirbhaasurahemaraashi.n labdha.n kuberaadabhiyaasyamaanaat |
didesha kautsaaya samastameva paada.n sumeroriva vajrabhinnam || 5\-30||
janasya saaketanivaasinastau dvaavapyabhuutaanabhinandyasattvau |
gurupradeyaadhikaniHspR^iho.arthii nR^ipo.arthikaamaadadhikapradashca || 5\-31||
athoShTravaamiishatavaahitaartha.n prajeshvara.n priitamanaa maharShiH |
spR^ishankareNaanatapuurvakaaya.n sa.nprasthito vaacamuvaaca kautsaH || 5\-32||
kimatra citra.n yadi kaamasuurbhuurvR^itte sthitasyaadhipateH prajaanaam |
acintaniiyastu tava prabhaavo maniiShita.n dyaurapi yena dugdhaa || 5\-33||
aashaasyamanyatpunaruktabhuuta.n shreyaa.nsi sarvaaNyadhijagmuShaste |
putra.n labhasvaatmaguNaanuruupa.n bhavantamiiDya.n bhavataH piteva || 5\-34||
ittha.n prayujyaashiShamagrajanmaa raaj~ne pratiiyaaya guroH sakaasham |
raajaapi lebhe sutamaashu tasmaadaalokamarkaadiva jiivalokaH || 5\-35||
braahme muhuurte kila tasya devii kumaarakalpa.n suShuve kumaaram |
ataH pitaa brahmaNa eva naamnaa tamaatmajanmaanamaja.n cakaara || 5\-36||
ruupa.n tadojasvi tadeva viirya.n tadeva naisargikamunnatatvam |
na kaaraNaatsvaadbibhide kumaaraH pravartito diipa iva pradiipaat || 5\-37||
utpaatavidya.n vidhivadgurubhyasta.n yauvanodbhedavisheShakaantam |
shriiH saabhilaaShaapi guroranuj~naa.n dhiireva kanyaa pituraacakaa~NkSha || 5\-38||
atheshvareNa krathakaishikaanaa.n svaya.nvaraartha.n svasurindumatyaaH |
aaptaH kumaaraanayanotsukena bhojena duuto raghave visR^iShTaH || 5\-39||
ta.n shlaaghyasa.nbandhamasau vicintya daarakriyaayogyadashashca putram |
prasthaapayaamaasa sasainyamenamR^iddhaa.n vidarbhaadhiparaajadhaaniim || 5\-40||
tasyopakaaryaaracitopacaaraa vanyetaraa jaanapadopadaabhiH |
maarge nivaasaa manujendrasuunorbabhuuvurudyaanavihaarakalpaaH || 5\-41||
sa narmadaarodhasi siikaraardrairmarudbhiraanartitanaktamaale |
niveshayaamaasa vila~Nghitaadhvaa klaanta.n rajodhuusaraketu sainyam || 5\-42||
athopariShTaadbhramarairbhramadbhiH praaksuucitaantaHsalilapraveshaH |
nirdhautadaanaamalagaNDabhittirvanyaH saritto gaja unmamajja || 5\-43||
niHsheShavikShaalitadhaatunaapi vaprakriyaamR^ikShavatastaTeShu |
niilordhvarekhaashabalena sha.nsandantadvayenaashmavikuNThitena || 5\-44||
sa.nhaaravikShepalaghukriyeNa hastena tiiraabhimukhaH sashabdam |
babhau sa bhindanbR^ihatastara.ngaanvaaryargalaabha~Nga iva pravR^ittaH || 5\-45||
shailopamaH shaivalama~njariiNaa.n jaalaani karShannurasaa sa pashcaat |
puurva.n tadutpiiDitavaariraashiH saritpravaahastaTamutsasarpa || 5\-46||
tasyaikanaagasya kapolabhittyorjalaavagaahakShaNamekashaantaa | 
vanyetaraanekapadarshanena punardidiipe madadurdinashriiH || 5\-47||
saptacChadakShiirakaTupravaahamasahyamaaghraaya mada.n tadiiyam | 
vila~NghitaadhoraNatiivrayatnaaH senaagajendraa vimukhaa babhuuvuH  || 5\-48||
sa cChinnabandhadrutayugyashuunya.n bhagnakShaparyastaratha.n kShaNena |
raamaaparitraaNavihastayodha.n senanivesha.n tumula.n cakaara || 5\-49||
tamaapatanta.n nR^ipateravadhyo vanyaH kariiti shrutavaankumaaraH |
nirvartayiShyanvishikhena kumbhe jaghaana naatyaayatakR^iShTashaar~NgaH || 5\-50||
sa viddhamaatraH kila naagaruupamutsR^ijya tadvismitasainyadR^iShTaH |
sphuratprabhaamaNDalamadhyavarti kaanta.n vapurvyomacaraH prapede || 5\-51||
atha prabhaavopanataiH kumaara.n kalpadrumotthairavakiirya puShpaiH |
uvaaca vaagmii dashanaprabhaabhiH sa.nvardhitoraHsthalataarahaaraH || 5\-52||
mata~Ngashaapaadavalepamuulaadavaaptavaanasmi mata~Ngajatvam |
avehi gandharvapatestanuuja.n priya.nvada.n maa.n priyadarshanasya || 5\-53||
sa caanuniitaH praNatena pashcaanmayaa maharShirmR^idutaamagacChat |
uShNatvamagnyaatapasa.nprayogaacChaitya.n hi yatsaa prakR^itirjalasya || 5\-54||
ikShvaakuva.nshaprabhavo yadaa te bhetsyatyajaH kumbhamayomukhena |
sa.nyokShyase svena vapurmahimnaa tadetyavocatsa taponidhirmaam || 5\-55||
sa.nmocitaH sattvavataa tvayaaha.n shaapaaccirapraarthitadarshanena |
pratipriya.n cedbhavato na kuryaa.n vR^ithaa hi me syaatsvapadopalabdhiH || 5\-56||
sa.nmohana.n naama sakhe mamaastra.n prayogasa.nhaaravibhaktamantram |
gaandharvamaadatsva yataH prayokturna caarihi.nsaa vijayashca haste || 5\-57||
ala.n hriyaa maa.n prati yanmuhuurta.n dayaaparo.abhuuH praharannapi tvam |
tasmaadupacChandayati prayojya.n mayi tvayaa na pratiShedharaukShyam || 5\-58||
tathetyupaspR^ishya payaH pavitra.n somodbhavaayaaH sarito nR^isomaH |
uda~NmukhaH so.astravidastramantra.n jagraaha tasmaannigR^ihiitashaapaat || 5\-59||
eva.n tayoradhvani daivayogaadaaseduShoH sakhyamacintyahetu |
eko yayau caitrarathapradeshaansauraajyaramyaanaparo vidarbhaan || 5\-60||
ta.n tasthivaa.nsa.n nagaropakaNThe tadaagamaaruuDhagurupraharShaH |
pratyujjagaama krathakaishikendrashcandra.n pravR^iddhormirivormimaalii || 5\-61||
praveshya caina.n punaragrayaayii niicaistathopaacaradarpitashriiH |
mene yathaa tatra janaH sameto vaidarbhamaagantumaja.n gR^ihesham || 5\-62||
tasyaadhikaarapuruShaiH praNataiH pradiShTaa.n
praagdvaaravediviniveshitapuurNakumbhaam|
ramyaa.n raghupratinidhiH sa navopakaaryaa.n
baalyaatparaamiva dashaa.n madano.adhyuvaasa || 5\-63||
tatra svaya.nvarasamaahR^itaraajaloka.n
kanyaalalaama kamaniiyamajasya lipsoH|
bhaavaavabodhakaluShaa dayiteva raatrau
nidraa cireNa nayanaabhimukhii babhuuva || 5\-64||
ta.n karNabhuuShaNanipiiDitapiivaraa.nsa.n
shayyottaracChadavimardakR^ishaa~Ngaraagam |
suutaatmajaaH savayasaH prathitaprabodha.n
praabodhayannuShasi vaagbhirudaaravaacaH || 5\-65||
raatrirgataa matimataa.n vara mu~nca shayyaa.n 
dhaatraa dvidhaiva nanu dhuurjagato vibhaktaa |
taamekatastava bibharti gururvinidra-
stasyaa bhavaanaparadhuryapadaavalambii || 5\-66||
nidraavashena bhavataapyanavekShamaaNaa
paryutsukatvamabalaa nishi khaNDiteva |
lakShmiirvinodayati yena digantalambii
so.api tvadaananaruci.n vijahaati candraH || 5\-67||
tadvalgunaa yugapadunmiShitena taavat-
sadyaH parasparatulaamadhirohataa.n dve |
praspandamaanaparuShetarataaramanta-
shcakShustava pracalitabhramara.n ca padmam || 5\-68||
vR^intaacChlatha.n harati puShpamanokahaanaa.n
sa.nsR^ijyate sarasijairaruNaa.nshubhinnaiH |
svaabhaavika.n paraguNena vibhaatavaayuH
saurabhyamiipsuriva te mukhamaarutasya || 5\-69||
taamrodareShu patita.n tarupallaveShu
nirdhautahaaragulikaavishada.n himaambhaH
aabhaati labdhaparabhaagatayaadharoShThe
liilaasmita.n sadashanaarciriva tvadiiyam || 5\-70||
yaavatprataapanidhiraakramate na bhaanu-
rahnaaya taavadaruNena tamo nirastam |
aayodhanaagrasarataa.n tvayi viira yaate
ki.n vaa ripuu.nstava guruH svayamucChinatti || 5\-71||
shayyaa.n jahatyubhayapakShaviniitanidraaH
stamberamaa mukharashR^i~NkhalakarShiNaste |
yeShaa.n vibhaati taruNaaruNaraagayogaa-
dbhinnaadrigairikataTaa iva dantakoshaaH || 5\-72||
diirgheShvamii niyamitaaH paTamaNDapeShu
nidraa.n vihaaya vanajaakSha vanaayudeshyaaH |
vaktroShmaNaa malinayanti purogataani
lehyaani saindhavashilaashakalaani vaahaaH || 5\-73||
bhavati viralabhaktirmlaanapuShpopahaaraH
svakiraNapariveShodbhedashuunyaaH pradiipaaH |
ayamapi ca gira.n nastvatprabodhaprayuktaa-
manuvadati shukaste ma~njuvaakpa~njarasthaH || 5\-74||
iti viracitavaagbhirbandiputraiH kumaaraH
sapadi vigatanidrastalpamujjhaa.ncakaara |
madapaTuninadadbhirbodhito raajaha.nsaiH
suragaja iva gaa~Nga.n saikata.n supratiikaH || 5\-75||
atha vidhimavasaayya shaastradR^iShTa.n
divasamukhocitama~ncitaakShipakShmaa |
kushalaviracitaanukuulaveshaH
kShitipasamaajamagaatsvaya.nvarastham || 5\-76||

iti shriikaalidaasakR^ite raghuva.nshe mahaakaavye pa~ncamaH sargaH ||
##
\medskip\hrule\medskip
Encoded and Proofread by Arvind Kolhatkar akolhatkar at rogers.com
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
\end{document}