सभापूजा
ब्राह्मणेभ्यो महद्भ्यश्च वेदविद्भ्यो विशेषतः ।
पुराणशास्त्र विद्भ्यश्च सर्वेभ्यो वै नमोनमः ॥ १॥
पुत्रोत्सवे मौञ्जिबन्धे कन्यायाः प्रथमार्तवे ।
विवाहे यज्ञसमये बिन्नहं पञ्चसु स्मृतम् ॥ २॥
पूर्वं सभां नमस्कृत्य पश्चादासनपूर्वकम् ।
कृत्वोपचारं कालीनं सभां स्तोतुं समारभेत् ॥ ३॥
वराय वरवेषाय गुरूणां सुहृदामपि ।
उपचारस्तु कर्तव्यो मङ्गल्यो मङ्गलायनैः ॥ ४॥
अर्चयेदृत्विगाचार्यनृपविद्वत्सुहृद्वरान् ।
आगतान् स्वगृहं गेही यथा विभवमादरात् ॥ ५॥
गाम्भीर्यं जलधौ स्थिरत्वमचले तेजोधिकं भास्करे
शौर्यं शान्तनवे नयस्सुरगुरौ त्यागस्तु सूर्यात्मजे ।
एकैको गुण एव तेषु निहितो युष्मासु सर्वेगुणाः
तिष्ठन्त्येव धरामरान् हरिपरान् कस्स्तोतुमीशः क्षितौ ॥ ६॥
भवन्तस्सर्वज्ञाः सकलभुवने रूढयशसो
वयं तावद्बालाः सरसवचने नैव निपुणाः ।
तथापीयं वाणी विशतु भवतां कर्णकुहरे
किशोरस्यालापः खलु भवति पित्रोरतिमुदे ॥ ७॥
महत्या गदया युक्तां सत्यभामासमन्विताम् ।
सुदर्शनधरां वन्दे सभां विष्णोरिवाकृतिम् ॥ ८॥
विद्वन्नदीव्रातसहस्रपूर्णं तथा सहस्रप्रभुरत्नपूर्णम् ।
वेदान्तवाक्यार्थतरङ्गलोलं सभा समुद्रं प्रणमामि मूर्ध्ना ॥ ९॥
सभामण्डलमित्येके सभारत्नं तु केचन ।
सभासमुद्रमितरे सदसो लक्षणत्रयम् ॥ १०॥
आशीः पूर्वकमित्येके नमः पूर्वं तु केचन ।
भिन्नहं वेदपूर्वं स्यादिति सर्वैर्विनिश्चितम् ॥ ११॥
स्वस्तीति प्रतिभाषितो मुनिवरैः संस्तूयमानस्सुरैः
पार्श्वे पद्मजपद्मनाभपुरुहूताद्यैर्जयेत्यर्चितः ।
अग्रे चाप्सरसां गणैरहरहर्नृत्यद्भिराह्लादितः
सन्तुष्टो गिरिजाविवाहसमये स्यात्सम्पदेनो मृडः ॥ १२॥
सर्वाशा परिपूरणक्षमकरं सर्वोपकारोदयं
सन्मार्गाभिरतं समस्ततमसः प्रध्वंसि सत्यास्पदम् ।
ब्रह्मावासमशेषवेदनिलयं विद्याधराराधितं
प्रख्यातं भुवि भानवीयमिव वो वन्दे सभामण्डलम् ॥ १३॥
विदितचतुरभाषा भारती भालभूषा
व्यपगतबहुदोषा चन्द्रिकोद्यन्मनीषा ।
हृदयतिमिरपूषा ज्ञानविद्याविशेषा
मम भवतु सुतोषा भूसुराणां सभैषा ॥ १४॥
वेदपूर्वं तु ,
ओं नमः॒ सद॑से । नमः॒ सद॑स॒स्पत॑ये ।
नमः॒ सखी॑नां पुरो॒गाणां॒ चक्षु॑षे ।
नमो॑ दि॒वे । नमः॑ पृथि॒व्यै । सप्रथस॒भां मे॑ गोपाय ।
ये च॒ सभ्याः॑ सभा॒सदः॑ । तानिं॑द्रि॒याव॑तः कुरु ।
सर्व॒मायु॒रुपा॑सताम् ॥ १५॥
अहे॑बुध्निय॒ मन्त्रं॑ मे गोपाय । यमृष॑यस्त्र॒यी वि॒दा वि॒दुः ।
ऋचः॒ सामा॑नि॒ यजू॑ꣳषि । सा हि श्रीर॒मृता॑ स॒ताम् ॥ १६॥
अभ्युत्थानं चासनं स्वागतोक्तिः, पाद्यं चार्घ्यं मधुपर्काचमौ च ।
स्नानं वासो भूषणं गन्धमाल्ये धूपो दीपस्सोपहारः प्रणामः ॥ १७॥
अभ्युत्थानमथासिका वितरणं भूयो वचस्स्वागतम् ।
पाद्यं व्याजनमक्षतं क्रमवशादर्घ्यं निरर्घक्रियम् ॥
केचित्प्राहुरिमान् षडुत्तमतमानत्रोपचारान् परे ।
ब्रूयाद्वन्दनमेकमर्हणविधिं यन्मादृशा तत्क्षमम् ॥ १८॥
नास्ति सत्यात्परो धर्मस्सन्तुष्टिर्नात्मजात्परा ।
नान्नदानात्परं दानं वन्दनान्नोपचारकम् ॥ १९॥
सत्यादधिको धर्मो नास्ति । पुत्रोत्सवादपरः सन्तोषो नास्ति ।
अन्नदानादधिकदानं न विद्यते । वन्दनादधिक उपचारो नास्ति ।
तस्माद्वन्दनोपचारेणैव सर्वेप्युपचाराः कृतास्सन्त्विति मदीया
विज्ञापना ॥ सर्वेभ्यो नमस्काराः ॥
॥ इति सभा पूजा ॥
सङ्ग्राहकः
विद्वान् परमेश्वर भट्टः
पुट्टनमने
Encoded and proofread by Parameshwar Puttanmane poornapathi at gmail.com