नारदप्रोक्तं काशीमाहात्म्यम्
काशीपरतरं क्षेत्रं क्षेत्राणामधिदैवतम् ।
भुक्तिमुक्तिप्रदं पुण्यं पावनानां च पावनम् ॥ ४४७॥
तपोदानादिधर्माणामनन्तानां परं फलम् ।
यत्प्राप्त्याऽऽहुश्च सा काशी काश्यते सर्वदा यतः ॥ ४४८॥
परात्परतरं यत्तु तत्परात्परतः शिवः ।
स एव काशी काशीति कथ्यते किं ततोऽधिकम् ॥ ४४९॥
काशी स्मृतापि संसारमूलनिर्मूलनक्षमा ।
सा साक्षात्सेविता शैवैर्मोक्षदा भवति ध्रुवम् ॥ ४५०॥
हन्त्यघं स्मृतिमात्रेण दृष्ट्वा पुण्यं तनोति या ।
सा निर्वाणैकनिलया काशी विश्वेश्वरालया ॥ ४५१॥
यस्यां शिवोऽपि सततं श्रीमद्विश्वेश्वराभिधे ।
लिङ्गे जागर्ति सा काशी कलिकल्मषनाशिनी ॥ ४५२॥
चतुर्दशापि भुवनान्येकतस्तुलितान्यपि ।
काशीकोट्यम्शकोट्यम्शतुल्यानि न कदाचन ॥ ४५३॥
के वा वर्णयितुं शक्ता काशीं मुक्तिप्रदायिनीम् ।
काशीप्रभावो वेदैश्चाप्यभिष्टोतुं न शक्यते ॥ ४५४॥
तिरस्क्रियन्ते ब्रह्माद्याः काशीस्थैर्मशकैरपि ।
अत एतादृशीं काशीं को नु वर्णयितुं क्षमः ॥ ४५५॥
च्यवन्ते ब्रह्मसदनाद्वैकुण्ठादपि वस्तुतः ।
महाप्रलयकालेऽपि न काशीवासिनां च्युतिः ॥ ४५६॥
एकार्णवेऽपि सञ्जाते त्रिशूलाग्रेण काशिका ।
ऊर्ध्वं न याति विश्वेशः सा काशी केनमीयते ॥ ४५७॥
तृणाय मन्यते हीन्द्रं काशीस्थः पुल्कसोऽप्यतः ।
काशीपुरीसमं वस्तु कुत्र केनोपमीयते ॥ ४५८॥
यस्यां भवानी सततं भवभीमभयापहा ।
ददाति परमामृद्धिं सा काशी भुक्तिमुक्तिदा ॥ ४५९॥
यस्यां तनुव्यये जन्तोर्मुक्तिर्हस्तगता ध्रुवम् ।
सद्यो भवति शुद्धस्य सा काशी सेव्यते बुधैः ॥ ४६०॥
काशीनारप्रदानेन पितरः पूर्वमादरात् ।
नारदस्त्वं नारदोऽसीत्युक्त्वा मुक्तास्ततः परम् ॥ ४६१॥
किं वक्तव्यं मया तत्त्वं काश्या या कल्मषापहा ।
एतावदेव यत्काशीतत्त्वं ज्ञातं मयाधुना ॥ ४६२॥
इदं शिवप्रसादस्य लेशेनेत्यवगम्यताम् । ४६३।१।
॥ इति शिवरहस्यान्तर्गते नारदप्रोक्तं काशीमाहात्म्यं सम्पूर्णम् ॥
- ॥ श्रीशिवरहस्यम् उग्राख्यः सप्तमांशः । अध्यायः १३ । ४४७-४६३।१॥
- .. shrIshivarahasyam ugrAkhyaH saptamAMshaH . adhyAyaH 13 . 447-463.1 ..
Notes:
Devarṣi Nārada देवर्षि नारद details to Himvāna हिमवान about the glories of Kāśī काशी - viz. KāśīMāhātmyam काशीमाहात्म्यम्; and that one can attain Kāśī काशी only by Grace of Śiva शिव i.e. Śivānugraha शिवानुग्रह.
Encoded and proofread by Ruma Dewan