शिवप्रोक्तं कालहस्तीश्वरमहिमवर्णनम्
- शिवपार्तवतीसंवादे -
पश्चिमाभिमुखं लिङ्गं कालहस्तीश्वरं मुदा ।
स्मृत्वापि सर्वपापेभ्यो मुक्तो भवति सर्वथा ॥ ८५॥
पश्चिमाभिमुखं लिङ्गं शेषाकारमनुत्तमम् ।
बिल्वपत्रैः समभ्यर्च्य प्रयाति मम सन्निधिम् ॥ ८६॥
न दृष्टं येन तल्लिङ्गं तस्य जन्म निरर्थकम् ।
नार्चितं येन तल्लिङ्गं जीवन्नपि मृतो हि सः ॥ ८७॥
द्रष्टव्योऽतिप्रयत्नेन कालहस्तीश्वरो मुदा ।
यष्टव्यो बिल्वपत्राद्यैः संसारभयनाशकः ॥ ८८॥
श्रीमद्दक्षिणकैलासे सर्वे ब्रह्मादयः सुराः ।
तिष्ठन्ति देवदेवेशं मामभ्यर्यान्वहं मुदा ॥ ८९॥
नित्यं श्रीकालहस्तीशं योऽनुसेवितुमिच्छति ।
स मदीयो गणो ज्ञेयो मम प्रियकरश्च सः ॥ ९०॥
प्राणविश्लेषसमये कालहस्तीश्वरेति माम् ।
यः स्मरिष्यति भाग्येन तस्मै मोक्षं ददाम्यहम् ॥ ९१॥
यं यं कामयते कामं प्राणविश्लेषणक्षणे ।
तस्मिन् क्षेत्रवरे देवि तं तं कामं स विन्दति ॥ ९२॥
तन्मोक्षदं कामदं च तत्तु क्षेत्रमनुत्तमम् ।
अत एव हि तत्क्षेत्रं सेवनीयं प्रयत्नतः ॥ ९३॥
पश्चिमाभिमुखं लिङ्गमिदमत्यन्तदुर्लभम् ।
एतस्य दर्शनं नैव विना बहुतपस्यया ॥ १२२॥
कालहस्तीश्वरं लिङ्गं पश्चिमाभिमुखं परम् ।
स्वयं यत्नेन महताभ्यर्चनीयं नरैः सदा ॥ १२३॥
सर्वेषां मुक्तिदानार्थमाविर्भूतोऽत्र शङ्करः ।
कालहस्तीश्वरं लिङ्गं बिल्वपत्रैर्जलाप्लुतैः ॥ १२४॥
यः पूजयति सद्भक्त्या नं तस्य नरकाद्भयम् ।
शाङ्करेभ्योऽत्र दुग्धान्नं शर्कराघृतसंयुतम् ॥ १२५॥
देयमत्यन्तयत्नेन शिवप्रीत्यर्थमादरात् ।
यत्र कुत्रापि यत्नेन भोजितेऽपि शिवार्चके ॥ १२६॥
तत्रापि शङ्करः प्रीतो भवत्येव न संशयः ।
यद्यत्र शाङ्करो भक्त्या (पू)भोज्यते शङ्करार्चकः ॥ १२७॥
तदात्वत्यन्तसन्तुष्टो भवेत्साम्बः सदाशिवः ।
अत्राल्पमपि चेज्जप्तं तदानन्त्याय कल्पते ॥ १२८॥
भूरिपुण्यप्रभावेण प्राप्यते क्षेत्रमीदृशम् ।
अस्माभिरतियत्नेन स्थातव्यमिह शाङ्करैः ॥ १२९॥
॥ इति शिवरहस्यान्तर्गते शिवप्रोक्तं कालहस्तीश्वरमहिमवर्णनं सम्पूर्णम् ॥
- ॥ श्रीशिवरहस्यम् उग्राख्यः सप्तमांशः । अध्यायः १९ । ८५-९३, १२२-१२९॥
- .. shrIshivarahasyam ugrAkhyaH saptamAMshaH . adhyAyaH 19 . 85-93, 122-129 ..
Notes:
Śiva शिव, having narrated to Pārvatī पार्वती, the story of the past lives of The Elephant (Hasti हस्ति) and The Serpent (Kāla काल), who worshipped Him at the West-facing Śivaliṅgaपश्चिमाभिमुखं शिवलिङ्गम्, describes the merits of remembering, visiting and worshiping at the Kālahastīśvara kṣetra कालहस्तीश्वर क्षेत्र.
Encoded and proofread by Ruma Dewan