हिमवान्कृता शम्भुस्तुतिरेवम् प्रार्थना
भव हर भगवन्पुरान्तकारे प्रमथाधीश हरीन्द्ररुद्रपूज्य ।
विबुधाधिप सर्वमङ्गलाधिनाथ हर गरकन्धर सोमचन्द्रचूड ॥ २४॥
अहिवरवरहारशोभिताङ्ग ह्यगपतिवास महोरुलिङ्गवास ।
खगपतिवहनेत्रपूज्यपाद शम्भो विधिमस्ताभरण प्रसीद देवदेव ॥ २५॥
बलिबलमथनप्रमाथ शम्भो गिरिजानाथ सनाथ याशु (पाहि) माम् ।
मथनोद्भूतसमुद्रतोद्यद्गरहारिन्पमथैकनाथ पाहि ॥ २६॥
धृतगङ्गामलचन्द्रसत्कपर्द निगमोत्तंसविशेषवाक्यतुष्ट ।
भव भावहृदन्तरायनाश गिरिकैलासनिवास पाहि शम्भो ॥ २७॥
गजमुखषण्मुखसन्मुख शङ्कर चित्सुख कमलजमुखमौले ।
शशिमुख(खि)लोकन पञ्चमुखोद्यतलोचन लेखवरोत्तम पाहि ॥ २८॥
अव शिव सदयं भव भवहृदयं कुरुकुरु करुणां शशिमौले ।
वितर विमुक्तिं परिहर बन्धं स्मरहर यमहर भगहर शम्भो ॥ २९॥
भव (अव) पदकमले विदिश सुभक्तिं तव लिङ्गार्चनतः प्रकृष्टभावम् ।
तव पदकमलादरश्च (पदकमलासनं) शम्भो मम सन्मानसमेतदद्य चास्तु ॥ ३०॥
तव लिङ्गामललोकनेऽस्तु नेत्रे तव पादप्रणतौ शिरोऽपि मेऽद्य ।
तब लिङ्गोत्तमपूजनाय हस्तौ तव लिङ्गालयप्रक्रमाय पादौ ॥ ३१॥
शशधरधर हर रथधरधरहर पुरहर शङ्कर गरधर शम्भो ।
जलधरवहनगधर शूलधराव्यय हरिभस्मारुणधर पाहि ॥ ३२॥
॥ इति शिवरहस्यान्तर्गते भवाख्ये हिमवान्कृता शम्भुस्तुतिरेवं प्रार्थना ॥
- ॥ श्रीशिवरहस्यम् । भवाख्यः द्वितीयांशः । अध्यायः २५ । २४-३२॥
- .. shrIshivarahasyam . bhavAkhyaH dvitIyAMshaH . adhyAyaH 25 . 24-32..
Proofread by Ruma Dewan