॥ ऋग्वेदः वैदिकस्वरविरहितः मण्डलं ८॥
मा चिदन्यद्वि शंसत सखायो मा रिषण्यत।
इन्द्रमित्स्तोता वृषणं सचा सुते मुहुरुक्था च शंसत॥ ८.००१.०१
अवक्रक्षिणं वृषभं यथाजुरं गां न चर्षणीसहम्।
विद्वेषणं संवननोभयंकरं मंहिष्ठमुभयाविनम्॥ ८.००१.०२
यच्चिद्धि त्वा जना इमे नाना हवन्त ऊतये।
अस्माकं ब्रह्मेदमिन्द्र भूतु तेऽहा विश्वा च वर्धनम्॥ ८.००१.०३
वि तर्तूर्यन्ते मघवन्विपश्चितोऽर्यो विपो जनानाम्।
उप क्रमस्व पुरुरूपमा भर वाजं नेदिष्ठमूतये॥ ८.००१.०४
महे चन त्वामद्रिवः परा शुल्काय देयाम्।
न सहस्राय नायुताय वज्रिवो न शताय शतामघ॥ ८.००१.०५
वस्याँ इन्द्रासि मे पितुरुत भ्रातुरभुञ्जतः।
माता च मे छदयथः समा वसो वसुत्वनाय राधसे॥ ८.००१.०६
क्वेयथ क्वेदसि पुरुत्रा चिद्धि ते मनः।
अलर्षि युध्म खजकृत्पुरंदर प्र गायत्रा अगासिषुः॥ ८.००१.०७
प्रास्मै गायत्रमर्चत वावातुर्यः पुरंदरः।
याभिः काण्वस्योप बर्हिरासदं यासद्वज्री भिनत्पुरः॥ ८.००१.०८
ये ते सन्ति दशग्विनः शतिनो ये सहस्रिणः।
अश्वासो ये ते वृषणो रघुद्रुवस्तेभिर्नस्तूयमा गहि॥ ८.००१.०९
आ त्वद्य सबर्दुघां हुवे गायत्रवेपसम्।
इन्द्रं धेनुं सुदुघामन्यामिषमुरुधारामरंकृतम्॥ ८.००१.१०
यत्तुदत्सूर एतशं वङ्कू वातस्य पर्णिना।
वहत्कुत्समार्जुनेयं शतक्रतुः त्सरद्गन्धर्वमस्तृतम्॥ ८.००१.११
य ऋते चिदभिश्रिषः पुरा जत्रुभ्य आतृदः।
संधाता संधिं मघवा पुरूवसुरिष्कर्ता विह्रुतं पुनः॥ ८.००१.१२
मा भूम निष्ट्या इवेन्द्र त्वदरणा इव।
वनानि न प्रजहितान्यद्रिवो दुरोषासो अमन्महि॥ ८.००१.१३
अमन्महीदनाशवोऽनुग्रासश्च वृत्रहन्।
सकृत्सु ते महता शूर राधसा अनु स्तोमं मुदीमहि॥ ८.००१.१४
यदि स्तोमं मम श्रवदस्माकमिन्द्रमिन्दवः।
तिरः पवित्रं ससृवांस आशवो मन्दन्तु तुग्र्यावृधः॥ ८.००१.१५
आ त्वद्य सधस्तुतिं वावातुः सख्युरा गहि।
उपस्तुतिर्मघोनां प्र त्वावत्वधा ते वश्मि सुष्टुतिम्॥ ८.००१.१६
सोता हि सोममद्रिभिरेमेनमप्सु धावत।
गव्या वस्त्रेव वासयन्त इन्नरो निर्धुक्षन्वक्षणाभ्यः॥ ८.००१.१७
अध ज्मो अध वा दिवो बृहतो रोचनादधि।
अया वर्धस्व तन्वा गिरा ममा जाता सुक्रतो पृण॥ ८.००१.१८
इन्द्राय सु मदिन्तमं सोमं सोता वरेण्यम्।
शक्र एणं पीपयद्विश्वया धिया हिन्वानं न वाजयुम्॥ ८.००१.१९
मा त्वा सोमस्य गल्दया सदा याचन्नहं गिरा।
भूर्णिं मृगं न सवनेषु चुक्रुधं क ईशानं न याचिषत्॥ ८.००१.२०
मदेनेषितं मदमुग्रमुग्रेण शवसा।
विश्वेषां तरुतारं मदच्युतं मदे हि ष्मा ददाति नः॥ ८.००१.२१
शेवारे वार्या पुरु देवो मर्ताय दाशुषे।
स सुन्वते च स्तुवते च रासते विश्वगूर्तो अरिष्टुतः॥ ८.००१.२२
एन्द्र याहि मत्स्व चित्रेण देव राधसा।
सरो न प्रास्युदरं सपीतिभिरा सोमेभिरुरु स्फिरम्॥ ८.००१.२३
आ त्वा सहस्रमा शतं युक्ता रथे हिरण्यये।
ब्रह्मयुजो हरय इन्द्र केशिनो वहन्तु सोमपीतये॥ ८.००१.२४
आ त्वा रथे हिरण्यये हरी मयूरशेप्या।
शितिपृष्ठा वहतां मध्वो अन्धसो विवक्षणस्य पीतये॥ ८.००१.२५
पिबा त्वस्य गिर्वणः सुतस्य पूर्वपा इव।
परिष्कृतस्य रसिन इयमासुतिश्चारुर्मदाय पत्यते॥ ८.००१.२६
य एको अस्ति दंसना महाँ उग्रो अभि व्रतैः।
गमत्स शिप्री न स योषदा गमद्धवं न परि वर्जति॥ ८.००१.२७
त्वं पुरं चरिष्ण्वं वधैः शुष्णस्य सं पिणक्।
त्वं भा अनु चरो अध द्विता यदिन्द्र हव्यो भुवः॥ ८.००१.२८
मम त्वा सूर उदिते मम मध्यंदिने दिवः।
मम प्रपित्वे अपिशर्वरे वसवा स्तोमासो अवृत्सत॥ ८.००१.२९
स्तुहि स्तुहीदेते घा ते मंहिष्ठासो मघोनाम्।
निन्दिताश्वः प्रपथी परमज्या मघस्य मेध्यातिथे॥ ८.००१.३०
आ यदश्वान्वनन्वतः श्रद्धयाहं रथे रुहम्।
उत वामस्य वसुनश्चिकेतति यो अस्ति याद्वः पशुः॥ ८.००१.३१
य ऋज्रा मह्यं मामहे सह त्वचा हिरण्यया।
एष विश्वान्यभ्यस्तु सौभगासङ्गस्य स्वनद्रथः॥ ८.००१.३२
अध प्लायोगिरति दासदन्यानासङ्गो अग्ने दशभिः सहस्रैः।
अधोक्षणो दश मह्यं रुशन्तो नळा इव सरसो निरतिष्ठन्॥ ८.००१.३३
अन्वस्य स्थूरं ददृशे पुरस्तादनस्थ ऊरुरवरम्बमाणः।
शश्वती नार्यभिचक्ष्याह सुभद्रमर्य भोजनं बिभर्षि॥ ८.००१.३४
इदं वसो सुतमन्धः पिबा सुपूर्णमुदरम्।
अनाभयिन्ररिमा ते॥ ८.००२.०१
नृभिर्धूतः सुतो अश्नैरव्यो वारैः परिपूतः।
अश्वो न निक्तो नदीषु॥ ८.००२.०२
तं ते यवं यथा गोभिः स्वादुमकर्म श्रीणन्तः।
इन्द्र त्वास्मिन्सधमादे॥ ८.००२.०३
इन्द्र इत्सोमपा एक इन्द्रः सुतपा विश्वायुः।
अन्तर्देवान्मर्त्याँश्च॥ ८.००२.०४
न यं शुक्रो न दुराशीर्न तृप्रा उरुव्यचसम्।
अपस्पृण्वते सुहार्दम्॥ ८.००२.०५
गोभिर्यदीमन्ये अस्मन्मृगं न व्रा मृगयन्ते।
अभित्सरन्ति धेनुभिः॥ ८.००२.०६
त्रय इन्द्रस्य सोमाः सुतासः सन्तु देवस्य।
स्वे क्षये सुतपाव्नः॥ ८.००२.०७
त्रयः कोशास श्चोतन्ति तिस्रश्चम्वः सुपूर्णाः।
समाने अधि भार्मन्॥ ८.००२.०८
शुचिरसि पुरुनिष्ठाः क्षीरैर्मध्यत आशीर्तः।
दध्ना मन्दिष्ठः शूरस्य॥ ८.००२.०९
इमे त इन्द्र सोमास्तीव्रा अस्मे सुतासः।
शुक्रा आशिरं याचन्ते॥ ८.००२.१०
ताँ आशिरं पुरोळाशमिन्द्रेमं सोमं श्रीणीहि।
रेवन्तं हि त्वा शृणोमि॥ ८.००२.११
हृत्सु पीतासो युध्यन्ते दुर्मदासो न सुरायाम्।
ऊधर्न नग्ना जरन्ते॥ ८.००२.१२
रेवाँ इद्रेवत स्तोता स्यात्त्वावतो मघोनः।
प्रेदु हरिवः श्रुतस्य॥ ८.००२.१३
उक्थं चन शस्यमानमगोररिरा चिकेत।
न गायत्रं गीयमानम्॥ ८.००२.१४
मा न इन्द्र पीयत्नवे मा शर्धते परा दाः।
शिक्षा शचीवः शचीभिः॥ ८.००२.१५
वयमु त्वा तदिदर्था इन्द्र त्वायन्तः सखायः।
कण्वा उक्थेभिर्जरन्ते॥ ८.००२.१६
न घेमन्यदा पपन वज्रिन्नपसो नविष्टौ।
तवेदु स्तोमं चिकेत॥ ८.००२.१७
इच्छन्ति देवाः सुन्वन्तं न स्वप्नाय स्पृहयन्ति।
यन्ति प्रमादमतन्द्राः॥ ८.००२.१८
ओ षु प्र याहि वाजेभिर्मा हृणीथा अभ्यस्मान्।
महाँ इव युवजानिः॥ ८.००२.१९
मो ष्वद्य दुर्हणावान्सायं करदारे अस्मत्।
अश्रीर इव जामाता॥ ८.००२.२०
विद्मा ह्यस्य वीरस्य भूरिदावरीं सुमतिम्।
त्रिषु जातस्य मनांसि॥ ८.००२.२१
आ तू षिञ्च कण्वमन्तं न घा विद्म शवसानात्।
यशस्तरं शतमूतेः॥ ८.००२.२२
ज्येष्ठेन सोतरिन्द्राय सोमं वीराय शक्राय।
भरा पिबन्नर्याय॥ ८.००२.२३
यो वेदिष्ठो अव्यथिष्वश्वावन्तं जरितृभ्यः।
वाजं स्तोतृभ्यो गोमन्तम्॥ ८.००२.२४
पन्यम्पन्यमित्सोतार आ धावत मद्याय।
सोमं वीराय शूराय॥ ८.००२.२५
पाता वृत्रहा सुतमा घा गमन्नारे अस्मत्।
नि यमते शतमूतिः॥ ८.००२.२६
एह हरी ब्रह्मयुजा शग्मा वक्षतः सखायम्।
गीर्भिः श्रुतं गिर्वणसम्॥ ८.००२.२७
स्वादवः सोमा आ याहि श्रीताः सोमा आ याहि।
शिप्रिन्नृषीवः शचीवो नायमच्छा सधमादम्॥ ८.००२.२८
स्तुतश्च यास्त्वा वर्धन्ति महे राधसे नृम्णाय।
इन्द्र कारिणं वृधन्तः॥ ८.००२.२९
गिरश्च यास्ते गिर्वाह उक्था च तुभ्यं तानि।
सत्रा दधिरे शवांसि॥ ८.००२.३०
एवेदेष तुविकूर्मिर्वाजाँ एको वज्रहस्तः।
सनादमृक्तो दयते॥ ८.००२.३१
हन्ता वृत्रं दक्षिणेनेन्द्रः पुरू पुरुहूतः।
महान्महीभिः शचीभिः॥ ८.००२.३२
यस्मिन्विश्वाश्चर्षणय उत च्यौत्ना ज्रयांसि च।
अनु घेन्मन्दी मघोनः॥ ८.००२.३३
एष एतानि चकारेन्द्रो विश्वा योऽति शृण्वे।
वाजदावा मघोनाम्॥ ८.००२.३४
प्रभर्ता रथं गव्यन्तमपाकाच्चिद्यमवति।
इनो वसु स हि वोळ्हा॥ ८.००२.३५
सनिता विप्रो अर्वद्भिर्हन्ता वृत्रं नृभिः शूरः।
सत्योऽविता विधन्तम्॥ ८.००२.३६
यजध्वैनं प्रियमेधा इन्द्रं सत्राचा मनसा।
यो भूत्सोमैः सत्यमद्वा॥ ८.००२.३७
गाथश्रवसं सत्पतिं श्रवस्कामं पुरुत्मानम्।
कण्वासो गात वाजिनम्॥ ८.००२.३८
य ऋते चिद्गास्पदेभ्यो दात्सखा नृभ्यः शचीवान्।
ये अस्मिन्काममश्रियन्॥ ८.००२.३९
इत्था धीवन्तमद्रिवः काण्वं मेध्यातिथिम्।
मेषो भूतोऽभि यन्नयः॥ ८.००२.४०
शिक्षा विभिन्दो अस्मै चत्वार्ययुता ददत्।
अष्टा परः सहस्रा॥ ८.००२.४१
उत सु त्ये पयोवृधा माकी रणस्य नप्त्या।
जनित्वनाय मामहे॥ ८.००२.४२
पिबा सुतस्य रसिनो मत्स्वा न इन्द्र गोमतः।
आपिर्नो बोधि सधमाद्यो वृधेऽस्माँ अवन्तु ते धियः॥ ८.००३.०१
भूयाम ते सुमतौ वाजिनो वयं मा न स्तरभिमातये।
अस्माञ्चित्राभिरवतादभिष्टिभिरा नः सुम्नेषु यामय॥ ८.००३.०२
इमा उ त्वा पुरूवसो गिरो वर्धन्तु या मम।
पावकवर्णाः शुचयो विपश्चितोऽभि स्तोमैरनूषत॥ ८.००३.०३
अयं सहस्रमृषिभिः सहस्कृतः समुद्र इव पप्रथे।
सत्यः सो अस्य महिमा गृणे शवो यज्ञेषु विप्रराज्ये॥ ८.००३.०४
इन्द्रमिद्देवतातय इन्द्रं प्रयत्यध्वरे।
इन्द्रं समीके वनिनो हवामह इन्द्रं धनस्य सातये॥ ८.००३.०५
इन्द्रो मह्ना रोदसी पप्रथच्छव इन्द्रः सूर्यमरोचयत्।
इन्द्रे ह विश्वा भुवनानि येमिर इन्द्रे सुवानास इन्दवः॥ ८.००३.०६
अभि त्वा पूर्वपीतय इन्द्र स्तोमेभिरायवः।
समीचीनास ऋभवः समस्वरन्रुद्रा गृणन्त पूर्व्यम्॥ ८.००३.०७
अस्येदिन्द्रो वावृधे वृष्ण्यं शवो मदे सुतस्य विष्णवि।
अद्या तमस्य महिमानमायवोऽनु ष्टुवन्ति पूर्वथा॥ ८.००३.०८
तत्त्वा यामि सुवीर्यं तद्ब्रह्म पूर्वचित्तये।
येना यतिभ्यो भृगवे धने हिते येन प्रस्कण्वमाविथ॥ ८.००३.०९
येना समुद्रमसृजो महीरपस्तदिन्द्र वृष्णि ते शवः।
सद्यः सो अस्य महिमा न संनशे यं क्षोणीरनुचक्रदे॥ ८.००३.१०
शग्धी न इन्द्र यत्त्वा रयिं यामि सुवीर्यम्।
शग्धि वाजाय प्रथमं सिषासते शग्धि स्तोमाय पूर्व्य॥ ८.००३.११
शग्धी नो अस्य यद्ध पौरमाविथ धिय इन्द्र सिषासतः।
शग्धि यथा रुशमं श्यावकं कृपमिन्द्र प्रावः स्वर्णरम्॥ ८.००३.१२
कन्नव्यो अतसीनां तुरो गृणीत मर्त्यः।
नही न्वस्य महिमानमिन्द्रियं स्वर्गृणन्त आनशुः॥ ८.००३.१३
कदु स्तुवन्त ऋतयन्त देवत ऋषिः को विप्र ओहते।
कदा हवं मघवन्निन्द्र सुन्वतः कदु स्तुवत आ गमः॥ ८.००३.१४
उदु त्ये मधुमत्तमा गिर स्तोमास ईरते।
सत्राजितो धनसा अक्षितोतयो वाजयन्तो रथा इव॥ ८.००३.१५
कण्वा इव भृगवः सूर्या इव विश्वमिद्धीतमानशुः।
इन्द्रं स्तोमेभिर्महयन्त आयवः प्रियमेधासो अस्वरन्॥ ८.००३.१६
युक्ष्वा हि वृत्रहन्तम हरी इन्द्र परावतः।
अर्वाचीनो मघवन्सोमपीतय उग्र ऋष्वेभिरा गहि॥ ८.००३.१७
इमे हि ते कारवो वावशुर्धिया विप्रासो मेधसातये।
स त्वं नो मघवन्निन्द्र गिर्वणो वेनो न शृणुधी हवम्॥ ८.००३.१८
निरिन्द्र बृहतीभ्यो वृत्रं धनुभ्यो अस्फुरः।
निरर्बुदस्य मृगयस्य मायिनो निः पर्वतस्य गा आजः॥ ८.००३.१९
निरग्नयो रुरुचुर्निरु सूर्यो निः सोम इन्द्रियो रसः।
निरन्तरिक्षादधमो महामहिं कृषे तदिन्द्र पौंस्यम्॥ ८.००३.२०
यं मे दुरिन्द्रो मरुतः पाकस्थामा कौरयाणः।
विश्वेषां त्मना शोभिष्ठमुपेव दिवि धावमानम्॥ ८.००३.२१
रोहितं मे पाकस्थामा सुधुरं कक्ष्यप्राम्।
अदाद्रायो विबोधनम्॥ ८.००३.२२
यस्मा अन्ये दश प्रति धुरं वहन्ति वह्नयः।
अस्तं वयो न तुग्र्यम्॥ ८.००३.२३
आत्मा पितुस्तनूर्वास ओजोदा अभ्यञ्जनम्।
तुरीयमिद्रोहितस्य पाकस्थामानं भोजं दातारमब्रवम्॥ ८.००३.२४
यदिन्द्र प्रागपागुदङ्न्यग्वा हूयसे नृभिः।
सिमा पुरू नृषूतो अस्यानवेऽसि प्रशर्ध तुर्वशे॥ ८.००४.०१
यद्वा रुमे रुशमे श्यावके कृप इन्द्र मादयसे सचा।
कण्वासस्त्वा ब्रह्मभि स्तोमवाहस इन्द्रा यच्छन्त्या गहि॥ ८.००४.०२
यथा गौरो अपा कृतं तृष्यन्नेत्यवेरिणम्।
आपित्वे नः प्रपित्वे तूयमा गहि कण्वेषु सु सचा पिब॥ ८.००४.०३
मन्दन्तु त्वा मघवन्निन्द्रेन्दवो राधोदेयाय सुन्वते।
आमुष्या सोममपिबश्चमू सुतं ज्येष्ठं तद्दधिषे सहः॥ ८.००४.०४
प्र चक्रे सहसा सहो बभञ्ज मन्युमोजसा।
विश्वे त इन्द्र पृतनायवो यहो नि वृक्षा इव येमिरे॥ ८.००४.०५
सहस्रेणेव सचते यवीयुधा यस्त आनळुपस्तुतिम्।
पुत्रं प्रावर्गं कृणुते सुवीर्ये दाश्नोति नमउक्तिभिः॥ ८.००४.०६
मा भेम मा श्रमिष्मोग्रस्य सख्ये तव।
महत्ते वृष्णो अभिचक्ष्यं कृतं पश्येम तुर्वशं यदुम्॥ ८.००४.०७
सव्यामनु स्फिग्यं वावसे वृषा न दानो अस्य रोषति।
मध्वा सम्पृक्ताः सारघेण धेनवस्तूयमेहि द्रवा पिब॥ ८.००४.०८
अश्वी रथी सुरूप इद्गोमाँ इदिन्द्र ते सखा।
श्वात्रभाजा वयसा सचते सदा चन्द्रो याति सभामुप॥ ८.००४.०९
ऋश्यो न तृष्यन्नवपानमा गहि पिबा सोमं वशाँ अनु।
निमेघमानो मघवन्दिवेदिव ओजिष्ठं दधिषे सहः॥ ८.००४.१०
अध्वर्यो द्रावया त्वं सोममिन्द्रः पिपासति।
उप नूनं युयुजे वृषणा हरी आ च जगाम वृत्रहा॥ ८.००४.११
स्वयं चित्स मन्यते दाशुरिर्जनो यत्रा सोमस्य तृम्पसि।
इदं ते अन्नं युज्यं समुक्षितं तस्येहि प्र द्रवा पिब॥ ८.००४.१२
रथेष्ठायाध्वर्यवः सोममिन्द्राय सोतन।
अधि ब्रध्नस्याद्रयो वि चक्षते सुन्वन्तो दाश्वध्वरम्॥ ८.००४.१३
उप ब्रध्नं वावाता वृषणा हरी इन्द्रमपसु वक्षतः।
अर्वाञ्चं त्वा सप्तयोऽध्वरश्रियो वहन्तु सवनेदुप॥ ८.००४.१४
प्र पूषणं वृणीमहे युज्याय पुरूवसुम्।
स शक्र शिक्ष पुरुहूत नो धिया तुजे राये विमोचन॥ ८.००४.१५
सं नः शिशीहि भुरिजोरिव क्षुरं रास्व रायो विमोचन।
त्वे तन्नः सुवेदमुस्रियं वसु यं त्वं हिनोषि मर्त्यम्॥ ८.००४.१६
वेमि त्वा पूषन्नृञ्जसे वेमि स्तोतव आघृणे।
न तस्य वेम्यरणं हि तद्वसो स्तुषे पज्राय साम्ने॥ ८.००४.१७
परा गावो यवसं कच्चिदाघृणे नित्यं रेक्णो अमर्त्य।
अस्माकं पूषन्नविता शिवो भव मंहिष्ठो वाजसातये॥ ८.००४.१८
स्थूरं राधः शताश्वं कुरुङ्गस्य दिविष्टिषु।
राज्ञस्त्वेषस्य सुभगस्य रातिषु तुर्वशेष्वमन्महि॥ ८.००४.१९
धीभिः सातानि काण्वस्य वाजिनः प्रियमेधैरभिद्युभिः।
षष्टिं सहस्रानु निर्मजामजे निर्यूथानि गवामृषिः॥ ८.००४.२०
वृक्षाश्चिन्मे अभिपित्वे अरारणुः।
गां भजन्त मेहनाश्वं भजन्त मेहना॥ ८.००४.२१
दूरादिहेव यत्सत्यरुणप्सुरशिश्वितत्।
वि भानुं विश्वधातनत्॥ ८.००५.०१
नृवद्दस्रा मनोयुजा रथेन पृथुपाजसा।
सचेथे अश्विनोषसम्॥ ८.००५.०२
युवाभ्यां वाजिनीवसू प्रति स्तोमा अदृक्षत।
वाचं दूतो यथोहिषे॥ ८.००५.०३
पुरुप्रिया ण ऊतये पुरुमन्द्रा पुरूवसू।
स्तुषे कण्वासो अश्विना॥ ८.००५.०४
मंहिष्ठा वाजसातमेषयन्ता शुभस्पती।
गन्तारा दाशुषो गृहम्॥ ८.००५.०५
ता सुदेवाय दाशुषे सुमेधामवितारिणीम्।
घृतैर्गव्यूतिमुक्षतम्॥ ८.००५.०६
आ न स्तोममुप द्रवत्तूयं श्येनेभिराशुभिः।
यातमश्वेभिरश्विना॥ ८.००५.०७
येभिस्तिस्रः परावतो दिवो विश्वानि रोचना।
त्रीँरक्तून्परिदीयथः॥ ८.००५.०८
उत नो गोमतीरिष उत सातीरहर्विदा।
वि पथः सातये सितम्॥ ८.००५.०९
आ नो गोमन्तमश्विना सुवीरं सुरथं रयिम्।
वोळ्हमश्वावतीरिषः॥ ८.००५.१०
वावृधाना शुभस्पती दस्रा हिरण्यवर्तनी।
पिबतं सोम्यं मधु॥ ८.००५.११
अस्मभ्यं वाजिनीवसू मघवद्भ्यश्च सप्रथः।
छर्दिर्यन्तमदाभ्यम्॥ ८.००५.१२
नि षु ब्रह्म जनानां याविष्टं तूयमा गतम्।
मो ष्वन्याँ उपारतम्॥ ८.००५.१३
अस्य पिबतमश्विना युवं मदस्य चारुणः।
मध्वो रातस्य धिष्ण्या॥ ८.००५.१४
अस्मे आ वहतं रयिं शतवन्तं सहस्रिणम्।
पुरुक्षुं विश्वधायसम्॥ ८.००५.१५
पुरुत्रा चिद्धि वां नरा विह्वयन्ते मनीषिणः।
वाघद्भिरश्विना गतम्॥ ८.००५.१६
जनासो वृक्तबर्हिषो हविष्मन्तो अरंकृतः।
युवां हवन्ते अश्विना॥ ८.००५.१७
अस्माकमद्य वामयं स्तोमो वाहिष्ठो अन्तमः।
युवाभ्यां भूत्वश्विना॥ ८.००५.१८
यो ह वां मधुनो दृतिराहितो रथचर्षणे।
ततः पिबतमश्विना॥ ८.००५.१९
तेन नो वाजिनीवसू पश्वे तोकाय शं गवे।
वहतं पीवरीरिषः॥ ८.००५.२०
उत नो दिव्या इष उत सिन्धूँरहर्विदा।
अप द्वारेव वर्षथः॥ ८.००५.२१
कदा वां तौग्र्यो विधत्समुद्रे जहितो नरा।
यद्वां रथो विभिष्पतात्॥ ८.००५.२२
युवं कण्वाय नासत्या ऋपिरिप्ताय हर्म्ये।
शश्वदूतीर्दशस्यथः॥ ८.००५.२३
ताभिरा यातमूतिभिर्नव्यसीभिः सुशस्तिभिः।
यद्वां वृषण्वसू हुवे॥ ८.००५.२४
यथा चित्कण्वमावतं प्रियमेधमुपस्तुतम्।
अत्रिं शिञ्जारमश्विना॥ ८.००५.२५
यथोत कृत्व्ये धनेऽंशुं गोष्वगस्त्यम्।
यथा वाजेषु सोभरिम्॥ ८.००५.२६
एतावद्वां वृषण्वसू अतो वा भूयो अश्विना।
गृणन्तः सुम्नमीमहे॥ ८.००५.२७
रथं हिरण्यवन्धुरं हिरण्याभीशुमश्विना।
आ हि स्थाथो दिविस्पृशम्॥ ८.००५.२८
हिरण्ययी वां रभिरीषा अक्षो हिरण्ययः।
उभा चक्रा हिरण्यया॥ ८.००५.२९
तेन नो वाजिनीवसू परावतश्चिदा गतम्।
उपेमां सुष्टुतिं मम॥ ८.००५.३०
आ वहेथे पराकात्पूर्वीरश्नन्तावश्विना।
इषो दासीरमर्त्या॥ ८.००५.३१
आ नो द्युम्नैरा श्रवोभिरा राया यातमश्विना।
पुरुश्चन्द्रा नासत्या॥ ८.००५.३२
एह वां प्रुषितप्सवो वयो वहन्तु पर्णिनः।
अच्छा स्वध्वरं जनम्॥ ८.००५.३३
रथं वामनुगायसं य इषा वर्तते सह।
न चक्रमभि बाधते॥ ८.००५.३४
हिरण्ययेन रथेन द्रवत्पाणिभिरश्वैः।
धीजवना नासत्या॥ ८.००५.३५
युवं मृगं जागृवांसं स्वदथो वा वृषण्वसू।
ता नः पृङ्क्तमिषा रयिम्॥ ८.००५.३६
ता मे अश्विना सनीनां विद्यातं नवानाम्।
यथा चिच्चैद्यः कशुः शतमुष्ट्रानां ददत्सहस्रा दश गोनाम्॥ ८.००५.३७
यो मे हिरण्यसंदृशो दश राज्ञो अमंहत।
अधस्पदा इच्चैद्यस्य कृष्टयश्चर्मम्ना अभितो जनाः॥ ८.००५.३८
माकिरेना पथा गाद्येनेमे यन्ति चेदयः।
अन्यो नेत्सूरिरोहते भूरिदावत्तरो जनः॥ ८.००५.३९
महाँ इन्द्रो य ओजसा पर्जन्यो वृष्टिमाँ इव।
स्तोमैर्वत्सस्य वावृधे॥ ८.००६.०१
प्रजामृतस्य पिप्रतः प्र यद्भरन्त वह्नयः।
विप्रा ऋतस्य वाहसा॥ ८.००६.०२
कण्वा इन्द्रं यदक्रत स्तोमैर्यज्ञस्य साधनम्।
जामि ब्रुवत आयुधम्॥ ८.००६.०३
समस्य मन्यवे विशो विश्वा नमन्त कृष्टयः।
समुद्रायेव सिन्धवः॥ ८.००६.०४
ओजस्तदस्य तित्विष उभे यत्समवर्तयत्।
इन्द्रश्चर्मेव रोदसी॥ ८.००६.०५
वि चिद्वृत्रस्य दोधतो वज्रेण शतपर्वणा।
शिरो बिभेद वृष्णिना॥ ८.००६.०६
इमा अभि प्र णोनुमो विपामग्रेषु धीतयः।
अग्नेः शोचिर्न दिद्युतः॥ ८.००६.०७
गुहा सतीरुप त्मना प्र यच्छोचन्त धीतयः।
कण्वा ऋतस्य धारया॥ ८.००६.०८
प्र तमिन्द्र नशीमहि रयिं गोमन्तमश्विनम्।
प्र ब्रह्म पूर्वचित्तये॥ ८.००६.०९
अहमिद्धि पितुष्परि मेधामृतस्य जग्रभ।
अहं सूर्य इवाजनि॥ ८.००६.१०
अहं प्रत्नेन मन्मना गिरः शुम्भामि कण्ववत्।
येनेन्द्रः शुष्ममिद्दधे॥ ८.००६.११
ये त्वामिन्द्र न तुष्टुवुरृषयो ये च तुष्टुवुः।
ममेद्वर्धस्व सुष्टुतः॥ ८.००६.१२
यदस्य मन्युरध्वनीद्वि वृत्रं पर्वशो रुजन्।
अपः समुद्रमैरयत्॥ ८.००६.१३
नि शुष्ण इन्द्र धर्णसिं वज्रं जघन्थ दस्यवि।
वृषा ह्युग्र शृण्विषे॥ ८.००६.१४
न द्याव इन्द्रमोजसा नान्तरिक्षाणि वज्रिणम्।
न विव्यचन्त भूमयः॥ ८.००६.१५
यस्त इन्द्र महीरप स्तभूयमान आशयत्।
नि तं पद्यासु शिश्नथः॥ ८.००६.१६
य इमे रोदसी मही समीची समजग्रभीत्।
तमोभिरिन्द्र तं गुहः॥ ८.००६.१७
य इन्द्र यतयस्त्वा भृगवो ये च तुष्टुवुः।
ममेदुग्र श्रुधी हवम्॥ ८.००६.१८
इमास्त इन्द्र पृश्नयो घृतं दुहत आशिरम्।
एनामृतस्य पिप्युषीः॥ ८.००६.१९
या इन्द्र प्रस्वस्त्वासा गर्भमचक्रिरन्।
परि धर्मेव सूर्यम्॥ ८.००६.२०
त्वामिच्छवसस्पते कण्वा उक्थेन वावृधुः।
त्वां सुतास इन्दवः॥ ८.००६.२१
तवेदिन्द्र प्रणीतिषूत प्रशस्तिरद्रिवः।
यज्ञो वितन्तसाय्यः॥ ८.००६.२२
आ न इन्द्र महीमिषं पुरं न दर्षि गोमतीम्।
उत प्रजां सुवीर्यम्॥ ८.००६.२३
उत त्यदाश्वश्व्यं यदिन्द्र नाहुषीष्वा।
अग्रे विक्षु प्रदीदयत्॥ ८.००६.२४
अभि व्रजं न तत्निषे सूर उपाकचक्षसम्।
यदिन्द्र मृळयासि नः॥ ८.००६.२५
यदङ्ग तविषीयस इन्द्र प्रराजसि क्षितीः।
महाँ अपार ओजसा॥ ८.००६.२६
तं त्वा हविष्मतीर्विश उप ब्रुवत ऊतये।
उरुज्रयसमिन्दुभिः॥ ८.००६.२७
उपह्वरे गिरीणां संगथे च नदीनाम्।
धिया विप्रो अजायत॥ ८.००६.२८
अतः समुद्रमुद्वतश्चिकित्वाँ अव पश्यति।
यतो विपान एजति॥ ८.००६.२९
आदित्प्रत्नस्य रेतसो ज्योतिष्पश्यन्ति वासरम्।
परो यदिध्यते दिवा॥ ८.००६.३०
कण्वास इन्द्र ते मतिं विश्वे वर्धन्ति पौंस्यम्।
उतो शविष्ठ वृष्ण्यम्॥ ८.००६.३१
इमां म इन्द्र सुष्टुतिं जुषस्व प्र सु मामव।
उत प्र वर्धया मतिम्॥ ८.००६.३२
उत ब्रह्मण्या वयं तुभ्यं प्रवृद्ध वज्रिवः।
विप्रा अतक्ष्म जीवसे॥ ८.००६.३३
अभि कण्वा अनूषतापो न प्रवता यतीः।
इन्द्रं वनन्वती मतिः॥ ८.००६.३४
इन्द्रमुक्थानि वावृधुः समुद्रमिव सिन्धवः।
अनुत्तमन्युमजरम्॥ ८.००६.३५
आ नो याहि परावतो हरिभ्यां हर्यताभ्याम्।
इममिन्द्र सुतं पिब॥ ८.००६.३६
त्वामिद्वृत्रहन्तम जनासो वृक्तबर्हिषः।
हवन्ते वाजसातये॥ ८.००६.३७
अनु त्वा रोदसी उभे चक्रं न वर्त्येतशम्।
अनु सुवानास इन्दवः॥ ८.००६.३८
मन्दस्वा सु स्वर्णर उतेन्द्र शर्यणावति।
मत्स्वा विवस्वतो मती॥ ८.००६.३९
वावृधान उप द्यवि वृषा वज्र्यरोरवीत्।
वृत्रहा सोमपातमः॥ ८.००६.४०
ऋषिर्हि पूर्वजा अस्येक ईशान ओजसा।
इन्द्र चोष्कूयसे वसु॥ ८.००६.४१
अस्माकं त्वा सुताँ उप वीतपृष्ठा अभि प्रयः।
शतं वहन्तु हरयः॥ ८.००६.४२
इमां सु पूर्व्यां धियं मधोर्घृतस्य पिप्युषीम्।
कण्वा उक्थेन वावृधुः॥ ८.००६.४३
इन्द्रमिद्विमहीनां मेधे वृणीत मर्त्यः।
इन्द्रं सनिष्युरूतये॥ ८.००६.४४
अर्वाञ्चं त्वा पुरुष्टुत प्रियमेधस्तुता हरी।
सोमपेयाय वक्षतः॥ ८.००६.४५
शतमहं तिरिन्दिरे सहस्रं पर्शावा ददे।
राधांसि याद्वानाम्॥ ८.००६.४६
त्रीणि शतान्यर्वतां सहस्रा दश गोनाम्।
ददुष्पज्राय साम्ने॥ ८.००६.४७
उदानट् ककुहो दिवमुष्ट्राञ्चतुर्युजो ददत्।
श्रवसा याद्वं जनम्॥ ८.००६.४८
प्र यद्वस्त्रिष्टुभमिषं मरुतो विप्रो अक्षरत्।
वि पर्वतेषु राजथ॥ ८.००७.०१
यदङ्ग तविषीयवो यामं शुभ्रा अचिध्वम्।
नि पर्वता अहासत॥ ८.००७.०२
उदीरयन्त वायुभिर्वाश्रासः पृश्निमातरः।
धुक्षन्त पिप्युषीमिषम्॥ ८.००७.०३
वपन्ति मरुतो मिहं प्र वेपयन्ति पर्वतान्।
यद्यामं यान्ति वायुभिः॥ ८.००७.०४
नि यद्यामाय वो गिरिर्नि सिन्धवो विधर्मणे।
महे शुष्माय येमिरे॥ ८.००७.०५
युष्माँ उ नक्तमूतये युष्मान्दिवा हवामहे।
युष्मान्प्रयत्यध्वरे॥ ८.००७.०६
उदु त्ये अरुणप्सवश्चित्रा यामेभिरीरते।
वाश्रा अधि ष्णुना दिवः॥ ८.००७.०७
सृजन्ति रश्मिमोजसा पन्थां सूर्याय यातवे।
ते भानुभिर्वि तस्थिरे॥ ८.००७.०८
इमां मे मरुतो गिरमिमं स्तोममृभुक्षणः।
इमं मे वनता हवम्॥ ८.००७.०९
त्रीणि सरांसि पृश्नयो दुदुह्रे वज्रिणे मधु।
उत्सं कवन्धमुद्रिणम्॥ ८.००७.१०
मरुतो यद्ध वो दिवः सुम्नायन्तो हवामहे।
आ तू न उप गन्तन॥ ८.००७.११
यूयं हि ष्ठा सुदानवो रुद्रा ऋभुक्षणो दमे।
उत प्रचेतसो मदे॥ ८.००७.१२
आ नो रयिं मदच्युतं पुरुक्षुं विश्वधायसम्।
इयर्ता मरुतो दिवः॥ ८.००७.१३
अधीव यद्गिरीणां यामं शुभ्रा अचिध्वम्।
सुवानैर्मन्दध्व इन्दुभिः॥ ८.००७.१४
एतावतश्चिदेषां सुम्नं भिक्षेत मर्त्यः।
अदाभ्यस्य मन्मभिः॥ ८.००७.१५
ये द्रप्सा इव रोदसी धमन्त्यनु वृष्टिभिः।
उत्सं दुहन्तो अक्षितम्॥ ८.००७.१६
उदु स्वानेभिरीरत उद्रथैरुदु वायुभिः।
उत्स्तोमैः पृश्निमातरः॥ ८.००७.१७
येनाव तुर्वशं यदुं येन कण्वं धनस्पृतम्।
राये सु तस्य धीमहि॥ ८.००७.१८
इमा उ वः सुदानवो घृतं न पिप्युषीरिषः।
वर्धान्काण्वस्य मन्मभिः॥ ८.००७.१९
क्व नूनं सुदानवो मदथा वृक्तबर्हिषः।
ब्रह्मा को वः सपर्यति॥ ८.००७.२०
नहि ष्म यद्ध वः पुरा स्तोमेभिर्वृक्तबर्हिषः।
शर्धाँ ऋतस्य जिन्वथ॥ ८.००७.२१
समु त्ये महतीरपः सं क्षोणी समु सूर्यम्।
सं वज्रं पर्वशो दधुः॥ ८.००७.२२
वि वृत्रं पर्वशो ययुर्वि पर्वताँ अराजिनः।
चक्राणा वृष्णि पौंस्यम्॥ ८.००७.२३
अनु त्रितस्य युध्यतः शुष्ममावन्नुत क्रतुम्।
अन्विन्द्रं वृत्रतूर्ये॥ ८.००७.२४
विद्युद्धस्ता अभिद्यवः शिप्राः शीर्षन्हिरण्ययीः।
शुभ्रा व्यञ्जत श्रिये॥ ८.००७.२५
उशना यत्परावत उक्ष्णो रन्ध्रमयातन।
द्यौर्न चक्रदद्भिया॥ ८.००७.२६
आ नो मखस्य दावनेऽश्वैर्हिरण्यपाणिभिः।
देवास उप गन्तन॥ ८.००७.२७
यदेषां पृषती रथे प्रष्टिर्वहति रोहितः।
यान्ति शुभ्रा रिणन्नपः॥ ८.००७.२८
सुषोमे शर्यणावत्यार्जीके पस्त्यावति।
ययुर्निचक्रया नरः॥ ८.००७.२९
कदा गच्छाथ मरुत इत्था विप्रं हवमानम्।
मार्डीकेभिर्नाधमानम्॥ ८.००७.३०
कद्ध नूनं कधप्रियो यदिन्द्रमजहातन।
को वः सखित्व ओहते॥ ८.००७.३१
सहो षु णो वज्रहस्तैः कण्वासो अग्निं मरुद्भिः।
स्तुषे हिरण्यवाशीभिः॥ ८.००७.३२
ओ षु वृष्णः प्रयज्यूना नव्यसे सुविताय।
ववृत्यां चित्रवाजान्॥ ८.००७.३३
गिरयश्चिन्नि जिहते पर्शानासो मन्यमानाः।
पर्वताश्चिन्नि येमिरे॥ ८.००७.३४
आक्ष्णयावानो वहन्त्यन्तरिक्षेण पततः।
धातार स्तुवते वयः॥ ८.००७.३५
अग्निर्हि जानि पूर्व्यश्छन्दो न सूरो अर्चिषा।
ते भानुभिर्वि तस्थिरे॥ ८.००७.३६
आ नो विश्वाभिरूतिभिरश्विना गच्छतं युवम्।
दस्रा हिरण्यवर्तनी पिबतं सोम्यं मधु॥ ८.००८.०१
आ नूनं यातमश्विना रथेन सूर्यत्वचा।
भुजी हिरण्यपेशसा कवी गम्भीरचेतसा॥ ८.००८.०२
आ यातं नहुषस्पर्यान्तरिक्षात्सुवृक्तिभिः।
पिबाथो अश्विना मधु कण्वानां सवने सुतम्॥ ८.००८.०३
आ नो यातं दिवस्पर्यान्तरिक्षादधप्रिया।
पुत्रः कण्वस्य वामिह सुषाव सोम्यं मधु॥ ८.००८.०४
आ नो यातमुपश्रुत्यश्विना सोमपीतये।
स्वाहा स्तोमस्य वर्धना प्र कवी धीतिभिर्नरा॥ ८.००८.०५
यच्चिद्धि वां पुर ऋषयो जुहूरेऽवसे नरा।
आ यातमश्विना गतमुपेमां सुष्टुतिं मम॥ ८.००८.०६
दिवश्चिद्रोचनादध्या नो गन्तं स्वर्विदा।
धीभिर्वत्सप्रचेतसा स्तोमेभिर्हवनश्रुता॥ ८.००८.०७
किमन्ये पर्यासतेऽस्मत्स्तोमेभिरश्विना।
पुत्रः कण्वस्य वामृषिर्गीर्भिर्वत्सो अवीवृधत्॥ ८.००८.०८
आ वां विप्र इहावसेऽह्वत्स्तोमेभिरश्विना।
अरिप्रा वृत्रहन्तमा ता नो भूतं मयोभुवा॥ ८.००८.०९
आ यद्वां योषणा रथमतिष्ठद्वाजिनीवसू।
विश्वान्यश्विना युवं प्र धीतान्यगच्छतम्॥ ८.००८.१०
अतः सहस्रनिर्णिजा रथेना यातमश्विना।
वत्सो वां मधुमद्वचोऽशंसीत्काव्यः कविः॥ ८.००८.११
पुरुमन्द्रा पुरूवसू मनोतरा रयीणाम्।
स्तोमं मे अश्विनाविममभि वह्नी अनूषाताम्॥ ८.००८.१२
आ नो विश्वान्यश्विना धत्तं राधांस्यह्रया।
कृतं न ऋत्वियावतो मा नो रीरधतं निदे॥ ८.००८.१३
यन्नासत्या परावति यद्वा स्थो अध्यम्बरे।
अतः सहस्रनिर्णिजा रथेना यातमश्विना॥ ८.००८.१४
यो वां नासत्यावृषिर्गीर्भिर्वत्सो अवीवृधत्।
तस्मै सहस्रनिर्णिजमिषं धत्तं घृतश्चुतम्॥ ८.००८.१५
प्रास्मा ऊर्जं घृतश्चुतमश्विना यच्छतं युवम्।
यो वां सुम्नाय तुष्टवद्वसूयाद्दानुनस्पती॥ ८.००८.१६
आ नो गन्तं रिशादसेमं स्तोमं पुरुभुजा।
कृतं नः सुश्रियो नरेमा दातमभिष्टये॥ ८.००८.१७
आ वां विश्वाभिरूतिभिः प्रियमेधा अहूषत।
राजन्तावध्वराणामश्विना यामहूतिषु॥ ८.००८.१८
आ नो गन्तं मयोभुवाश्विना शम्भुवा युवम्।
यो वां विपन्यू धीतिभिर्गीर्भिर्वत्सो अवीवृधत्॥ ८.००८.१९
याभिः कण्वं मेधातिथिं याभिर्वशं दशव्रजम्।
याभिर्गोशर्यमावतं ताभिर्नोऽवतं नरा॥ ८.००८.२०
याभिर्नरा त्रसदस्युमावतं कृत्व्ये धने।
ताभिः ष्वस्माँ अश्विना प्रावतं वाजसातये॥ ८.००८.२१
प्र वां स्तोमाः सुवृक्तयो गिरो वर्धन्त्वश्विना।
पुरुत्रा वृत्रहन्तमा ता नो भूतं पुरुस्पृहा॥ ८.००८.२२
त्रीणि पदान्यश्विनोराविः सान्ति गुहा परः।
कवी ऋतस्य पत्मभिरर्वाग्जीवेभ्यस्परि॥ ८.००८.२३
आ नूनमश्विना युवं वत्सस्य गन्तमवसे।
प्रास्मै यच्छतमवृकं पृथु च्छर्दिर्युयुतं या अरातयः॥ ८.००९.०१
यदन्तरिक्षे यद्दिवि यत्पञ्च मानुषाँ अनु।
नृम्णं तद्धत्तमश्विना॥ ८.००९.०२
ये वां दंसांस्यश्विना विप्रासः परिमामृशुः।
एवेत्काण्वस्य बोधतम्॥ ८.००९.०३
अयं वां घर्मो अश्विना स्तोमेन परि षिच्यते।
अयं सोमो मधुमान्वाजिनीवसू येन वृत्रं चिकेतथः॥ ८.००९.०४
यदप्सु यद्वनस्पतौ यदोषधीषु पुरुदंससा कृतम्।
तेन माविष्टमश्विना॥ ८.००९.०५
यन्नासत्या भुरण्यथो यद्वा देव भिषज्यथः।
अयं वां वत्सो मतिभिर्न विन्धते हविष्मन्तं हि गच्छथः॥ ८.००९.०६
आ नूनमश्विनोरृषि स्तोमं चिकेत वामया।
आ सोमं मधुमत्तमं घर्मं सिञ्चादथर्वणि॥ ८.००९.०७
आ नूनं रघुवर्तनिं रथं तिष्ठाथो अश्विना।
आ वां स्तोमा इमे मम नभो न चुच्यवीरत॥ ८.००९.०८
यदद्य वां नासत्योक्थैराचुच्युवीमहि।
यद्वा वाणीभिरश्विनेवेत्काण्वस्य बोधतम्॥ ८.००९.०९
यद्वां कक्षीवाँ उत यद्व्यश्व ऋषिर्यद्वां दीर्घतमा जुहाव।
पृथी यद्वां वैन्यः सादनेष्वेवेदतो अश्विना चेतयेथाम्॥ ८.००९.१०
यातं छर्दिष्पा उत नः परस्पा भूतं जगत्पा उत नस्तनूपा।
वर्तिस्तोकाय तनयाय यातम्॥ ८.००९.११
यदिन्द्रेण सरथं याथो अश्विना यद्वा वायुना भवथः समोकसा।
यदादित्येभिरृभुभिः सजोषसा यद्वा विष्णोर्विक्रमणेषु तिष्ठथः॥ ८.००९.१२
यदद्याश्विनावहं हुवेय वाजसातये।
यत्पृत्सु तुर्वणे सहस्तच्छ्रेष्ठमश्विनोरवः॥ ८.००९.१३
आ नूनं यातमश्विनेमा हव्यानि वां हिता।
इमे सोमासो अधि तुर्वशे यदाविमे कण्वेषु वामथ॥ ८.००९.१४
यन्नासत्या पराके अर्वाके अस्ति भेषजम्।
तेन नूनं विमदाय प्रचेतसा छर्दिर्वत्साय यच्छतम्॥ ८.००९.१५
अभुत्स्यु प्र देव्या साकं वाचाहमश्विनोः।
व्यावर्देव्या मतिं वि रातिं मर्त्येभ्यः॥ ८.००९.१६
प्र बोधयोषो अश्विना प्र देवि सूनृते महि।
प्र यज्ञहोतरानुषक्प्र मदाय श्रवो बृहत्॥ ८.००९.१७
यदुषो यासि भानुना सं सूर्येण रोचसे।
आ हायमश्विनो रथो वर्तिर्याति नृपाय्यम्॥ ८.००९.१८
यदापीतासो अंशवो गावो न दुह्र ऊधभिः।
यद्वा वाणीरनूषत प्र देवयन्तो अश्विना॥ ८.००९.१९
प्र द्युम्नाय प्र शवसे प्र नृषाह्याय शर्मणे।
प्र दक्षाय प्रचेतसा॥ ८.००९.२०
यन्नूनं धीभिरश्विना पितुर्योना निषीदथः।
यद्वा सुम्नेभिरुक्थ्या॥ ८.००९.२१
यत्स्थो दीर्घप्रसद्मनि यद्वादो रोचने दिवः।
यद्वा समुद्रे अध्याकृते गृहेऽत आ यातमश्विना॥ ८.०१०.०१
यद्वा यज्ञं मनवे सम्मिमिक्षथुरेवेत्काण्वस्य बोधतम्।
बृहस्पतिं विश्वान्देवाँ अहं हुव इन्द्राविष्णू अश्विनावाशुहेषसा॥ ८.०१०.०२
त्या न्वश्विना हुवे सुदंससा गृभे कृता।
ययोरस्ति प्र णः सख्यं देवेष्वध्याप्यम्॥ ८.०१०.०३
ययोरधि प्र यज्ञा असूरे सन्ति सूरयः।
ता यज्ञस्याध्वरस्य प्रचेतसा स्वधाभिर्या पिबतः सोम्यं मधु॥ ८.०१०.०४
यदद्याश्विनावपाग्यत्प्राक्स्थो वाजिनीवसू।
यद्द्रुह्यव्यनवि तुर्वशे यदौ हुवे वामथ मा गतम्॥ ८.०१०.०५
यदन्तरिक्षे पतथः पुरुभुजा यद्वेमे रोदसी अनु।
यद्वा स्वधाभिरधितिष्ठथो रथमत आ यातमश्विना॥ ८.०१०.०६
त्वमग्ने व्रतपा असि देव आ मर्त्येष्वा।
त्वं यज्ञेष्वीड्यः॥ ८.०११.०१
त्वमसि प्रशस्यो विदथेषु सहन्त्य।
अग्ने रथीरध्वराणाम्॥ ८.०११.०२
स त्वमस्मदप द्विषो युयोधि जातवेदः।
अदेवीरग्ने अरातीः॥ ८.०११.०३
अन्ति चित्सन्तमह यज्ञं मर्तस्य रिपोः।
नोप वेषि जातवेदः॥ ८.०११.०४
मर्ता अमर्त्यस्य ते भूरि नाम मनामहे।
विप्रासो जातवेदसः॥ ८.०११.०५
विप्रं विप्रासोऽवसे देवं मर्तास ऊतये।
अग्निं गीर्भिर्हवामहे॥ ८.०११.०६
आ ते वत्सो मनो यमत्परमाच्चित्सधस्थात्।
अग्ने त्वांकामया गिरा॥ ८.०११.०७
पुरुत्रा हि सदृङ्ङसि विशो विश्वा अनु प्रभुः।
समत्सु त्वा हवामहे॥ ८.०११.०८
समत्स्वग्निमवसे वाजयन्तो हवामहे।
वाजेषु चित्रराधसम्॥ ८.०११.०९
प्रत्नो हि कमीड्यो अध्वरेषु सनाच्च होता नव्यश्च सत्सि।
स्वां चाग्ने तन्वं पिप्रयस्वास्मभ्यं च सौभगमा यजस्व॥ ८.०११.१०
य इन्द्र सोमपातमो मदः शविष्ठ चेतति।
येना हंसि न्यत्रिणं तमीमहे॥ ८.०१२.०१
येना दशग्वमध्रिगुं वेपयन्तं स्वर्णरम्।
येना समुद्रमाविथा तमीमहे॥ ८.०१२.०२
येन सिन्धुं महीरपो रथाँ इव प्रचोदयः।
पन्थामृतस्य यातवे तमीमहे॥ ८.०१२.०३
इमं स्तोममभिष्टये घृतं न पूतमद्रिवः।
येना नु सद्य ओजसा ववक्षिथ॥ ८.०१२.०४
इमं जुषस्व गिर्वणः समुद्र इव पिन्वते।
इन्द्र विश्वाभिरूतिभिर्ववक्षिथ॥ ८.०१२.०५
यो नो देवः परावतः सखित्वनाय मामहे।
दिवो न वृष्टिं प्रथयन्ववक्षिथ॥ ८.०१२.०६
ववक्षुरस्य केतवो उत वज्रो गभस्त्योः।
यत्सूर्यो न रोदसी अवर्धयत्॥ ८.०१२.०७
यदि प्रवृद्ध सत्पते सहस्रं महिषाँ अघः।
आदित्त इन्द्रियं महि प्र वावृधे॥ ८.०१२.०८
इन्द्रः सूर्यस्य रश्मिभिर्न्यर्शसानमोषति।
अग्निर्वनेव सासहिः प्र वावृधे॥ ८.०१२.०९
इयं त ऋत्वियावती धीतिरेति नवीयसी।
सपर्यन्ती पुरुप्रिया मिमीत इत्॥ ८.०१२.१०
गर्भो यज्ञस्य देवयुः क्रतुं पुनीत आनुषक्।
स्तोमैरिन्द्रस्य वावृधे मिमीत इत्॥ ८.०१२.११
सनिर्मित्रस्य पप्रथ इन्द्रः सोमस्य पीतये।
प्राची वाशीव सुन्वते मिमीत इत्॥ ८.०१२.१२
यं विप्रा उक्थवाहसोऽभिप्रमन्दुरायवः।
घृतं न पिप्य आसन्यृतस्य यत्॥ ८.०१२.१३
उत स्वराजे अदिति स्तोममिन्द्राय जीजनत्।
पुरुप्रशस्तमूतय ऋतस्य यत्॥ ८.०१२.१४
अभि वह्नय ऊतयेऽनूषत प्रशस्तये।
न देव विव्रता हरी ऋतस्य यत्॥ ८.०१२.१५
यत्सोममिन्द्र विष्णवि यद्वा घ त्रित आप्त्ये।
यद्वा मरुत्सु मन्दसे समिन्दुभिः॥ ८.०१२.१६
यद्वा शक्र परावति समुद्रे अधि मन्दसे।
अस्माकमित्सुते रणा समिन्दुभिः॥ ८.०१२.१७
यद्वासि सुन्वतो वृधो यजमानस्य सत्पते।
उक्थे वा यस्य रण्यसि समिन्दुभिः॥ ८.०१२.१८
देवंदेवं वोऽवस इन्द्रमिन्द्रं गृणीषणि।
अधा यज्ञाय तुर्वणे व्यानशुः॥ ८.०१२.१९
यज्ञेभिर्यज्ञवाहसं सोमेभिः सोमपातमम्।
होत्राभिरिन्द्रं वावृधुर्व्यानशुः॥ ८.०१२.२०
महीरस्य प्रणीतयः पूर्वीरुत प्रशस्तयः।
विश्वा वसूनि दाशुषे व्यानशुः॥ ८.०१२.२१
इन्द्रं वृत्राय हन्तवे देवासो दधिरे पुरः।
इन्द्रं वाणीरनूषता समोजसे॥ ८.०१२.२२
महान्तं महिना वयं स्तोमेभिर्हवनश्रुतम्।
अर्कैरभि प्र णोनुमः समोजसे॥ ८.०१२.२३
न यं विविक्तो रोदसी नान्तरिक्षाणि वज्रिणम्।
अमादिदस्य तित्विषे समोजसः॥ ८.०१२.२४
यदिन्द्र पृतनाज्ये देवास्त्वा दधिरे पुरः।
आदित्ते हर्यता हरी ववक्षतुः॥ ८.०१२.२५
यदा वृत्रं नदीवृतं शवसा वज्रिन्नवधीः।
आदित्ते हर्यता हरी ववक्षतुः॥ ८.०१२.२६
यदा ते विष्णुरोजसा त्रीणि पदा विचक्रमे।
आदित्ते हर्यता हरी ववक्षतुः॥ ८.०१२.२७
यदा ते हर्यता हरी वावृधाते दिवेदिवे।
आदित्ते विश्वा भुवनानि येमिरे॥ ८.०१२.२८
यदा ते मारुतीर्विशस्तुभ्यमिन्द्र नियेमिरे।
आदित्ते विश्वा भुवनानि येमिरे॥ ८.०१२.२९
यदा सूर्यममुं दिवि शुक्रं ज्योतिरधारयः।
आदित्ते विश्वा भुवनानि येमिरे॥ ८.०१२.३०
इमां त इन्द्र सुष्टुतिं विप्र इयर्ति धीतिभिः।
जामिं पदेव पिप्रतीं प्राध्वरे॥ ८.०१२.३१
यदस्य धामनि प्रिये समीचीनासो अस्वरन्।
नाभा यज्ञस्य दोहना प्राध्वरे॥ ८.०१२.३२
सुवीर्यं स्वश्व्यं सुगव्यमिन्द्र दद्धि नः।
होतेव पूर्वचित्तये प्राध्वरे॥ ८.०१२.३३
इन्द्रः सुतेषु सोमेषु क्रतुं पुनीत उक्थ्यम्।
विदे वृधस्य दक्षसो महान्हि षः॥ ८.०१३.०१
स प्रथमे व्योमनि देवानां सदने वृधः।
सुपारः सुश्रवस्तमः समप्सुजित्॥ ८.०१३.०२
तमह्वे वाजसातय इन्द्रं भराय शुष्मिणम्।
भवा नः सुम्ने अन्तमः सखा वृधे॥ ८.०१३.०३
इयं त इन्द्र गिर्वणो रातिः क्षरति सुन्वतः।
मन्दानो अस्य बर्हिषो वि राजसि॥ ८.०१३.०४
नूनं तदिन्द्र दद्धि नो यत्त्वा सुन्वन्त ईमहे।
रयिं नश्चित्रमा भरा स्वर्विदम्॥ ८.०१३.०५
स्तोता यत्ते विचर्षणिरतिप्रशर्धयद्गिरः।
वया इवानु रोहते जुषन्त यत्॥ ८.०१३.०६
प्रत्नवज्जनया गिरः शृणुधी जरितुर्हवम्।
मदेमदे ववक्षिथा सुकृत्वने॥ ८.०१३.०७
क्रीळन्त्यस्य सूनृता आपो न प्रवता यतीः।
अया धिया य उच्यते पतिर्दिवः॥ ८.०१३.०८
उतो पतिर्य उच्यते कृष्टीनामेक इद्वशी।
नमोवृधैरवस्युभिः सुते रण॥ ८.०१३.०९
स्तुहि श्रुतं विपश्चितं हरी यस्य प्रसक्षिणा।
गन्तारा दाशुषो गृहं नमस्विनः॥ ८.०१३.१०
तूतुजानो महेमतेऽश्वेभिः प्रुषितप्सुभिः।
आ याहि यज्ञमाशुभिः शमिद्धि ते॥ ८.०१३.११
इन्द्र शविष्ठ सत्पते रयिं गृणत्सु धारय।
श्रवः सूरिभ्यो अमृतं वसुत्वनम्॥ ८.०१३.१२
हवे त्वा सूर उदिते हवे मध्यंदिने दिवः।
जुषाण इन्द्र सप्तिभिर्न आ गहि॥ ८.०१३.१३
आ तू गहि प्र तु द्रव मत्स्वा सुतस्य गोमतः।
तन्तुं तनुष्व पूर्व्यं यथा विदे॥ ८.०१३.१४
यच्छक्रासि परावति यदर्वावति वृत्रहन्।
यद्वा समुद्रे अन्धसोऽवितेदसि॥ ८.०१३.१५
इन्द्रं वर्धन्तु नो गिर इन्द्रं सुतास इन्दवः।
इन्द्रे हविष्मतीर्विशो अराणिषुः॥ ८.०१३.१६
तमिद्विप्रा अवस्यवः प्रवत्वतीभिरूतिभिः।
इन्द्रं क्षोणीरवर्धयन्वया इव॥ ८.०१३.१७
त्रिकद्रुकेषु चेतनं देवासो यज्ञमत्नत।
तमिद्वर्धन्तु नो गिरः सदावृधम्॥ ८.०१३.१८
स्तोता यत्ते अनुव्रत उक्थान्यृतुथा दधे।
शुचिः पावक उच्यते सो अद्भुतः॥ ८.०१३.१९
तदिद्रुद्रस्य चेतति यह्वं प्रत्नेषु धामसु।
मनो यत्रा वि तद्दधुर्विचेतसः॥ ८.०१३.२०
यदि मे सख्यमावर इमस्य पाह्यन्धसः।
येन विश्वा अति द्विषो अतारिम॥ ८.०१३.२१
कदा त इन्द्र गिर्वण स्तोता भवाति शंतमः।
कदा नो गव्ये अश्व्ये वसौ दधः॥ ८.०१३.२२
उत ते सुष्टुता हरी वृषणा वहतो रथम्।
अजुर्यस्य मदिन्तमं यमीमहे॥ ८.०१३.२३
तमीमहे पुरुष्टुतं यह्वं प्रत्नाभिरूतिभिः।
नि बर्हिषि प्रिये सददध द्विता॥ ८.०१३.२४
वर्धस्वा सु पुरुष्टुत ऋषिष्टुताभिरूतिभिः।
धुक्षस्व पिप्युषीमिषमवा च नः॥ ८.०१३.२५
इन्द्र त्वमवितेदसीत्था स्तुवतो अद्रिवः।
ऋतादियर्मि ते धियं मनोयुजम्॥ ८.०१३.२६
इह त्या सधमाद्या युजानः सोमपीतये।
हरी इन्द्र प्रतद्वसू अभि स्वर॥ ८.०१३.२७
अभि स्वरन्तु ये तव रुद्रासः सक्षत श्रियम्।
उतो मरुत्वतीर्विशो अभि प्रयः॥ ८.०१३.२८
इमा अस्य प्रतूर्तयः पदं जुषन्त यद्दिवि।
नाभा यज्ञस्य सं दधुर्यथा विदे॥ ८.०१३.२९
अयं दीर्घाय चक्षसे प्राचि प्रयत्यध्वरे।
मिमीते यज्ञमानुषग्विचक्ष्य॥ ८.०१३.३०
वृषायमिन्द्र ते रथ उतो ते वृषणा हरी।
वृषा त्वं शतक्रतो वृषा हवः॥ ८.०१३.३१
वृषा ग्रावा वृषा मदो वृषा सोमो अयं सुतः।
वृषा यज्ञो यमिन्वसि वृषा हवः॥ ८.०१३.३२
वृषा त्वा वृषणं हुवे वज्रिञ्चित्राभिरूतिभिः।
वावन्थ हि प्रतिष्टुतिं वृषा हवः॥ ८.०१३.३३
यदिन्द्राहं यथा त्वमीशीय वस्व एक इत्।
स्तोता मे गोषखा स्यात्॥ ८.०१४.०१
शिक्षेयमस्मै दित्सेयं शचीपते मनीषिणे।
यदहं गोपतिः स्याम्॥ ८.०१४.०२
धेनुष्ट इन्द्र सूनृता यजमानाय सुन्वते।
गामश्वं पिप्युषी दुहे॥ ८.०१४.०३
न ते वर्तास्ति राधस इन्द्र देवो न मर्त्यः।
यद्दित्ससि स्तुतो मघम्॥ ८.०१४.०४
यज्ञ इन्द्रमवर्धयद्यद्भूमिं व्यवर्तयत्।
चक्राण ओपशं दिवि॥ ८.०१४.०५
वावृधानस्य ते वयं विश्वा धनानि जिग्युषः।
ऊतिमिन्द्रा वृणीमहे॥ ८.०१४.०६
व्यन्तरिक्षमतिरन्मदे सोमस्य रोचना।
इन्द्रो यदभिनद्वलम्॥ ८.०१४.०७
उद्गा आजदङ्गिरोभ्य आविष्कृण्वन्गुहा सतीः।
अर्वाञ्चं नुनुदे वलम्॥ ८.०१४.०८
इन्द्रेण रोचना दिवो दृळ्हानि दृंहितानि च।
स्थिराणि न पराणुदे॥ ८.०१४.०९
अपामूर्मिर्मदन्निव स्तोम इन्द्राजिरायते।
वि ते मदा अराजिषुः॥ ८.०१४.१०
त्वं हि स्तोमवर्धन इन्द्रास्युक्थवर्धनः।
स्तोतॄणामुत भद्रकृत्॥ ८.०१४.११
इन्द्रमित्केशिना हरी सोमपेयाय वक्षतः।
उप यज्ञं सुराधसम्॥ ८.०१४.१२
अपां फेनेन नमुचेः शिर इन्द्रोदवर्तयः।
विश्वा यदजय स्पृधः॥ ८.०१४.१३
मायाभिरुत्सिसृप्सत इन्द्र द्यामारुरुक्षतः।
अव दस्यूँरधूनुथाः॥ ८.०१४.१४
असुन्वामिन्द्र संसदं विषूचीं व्यनाशयः।
सोमपा उत्तरो भवन्॥ ८.०१४.१५
तम्वभि प्र गायत पुरुहूतं पुरुष्टुतम्।
इन्द्रं गीर्भिस्तविषमा विवासत॥ ८.०१५.०१
यस्य द्विबर्हसो बृहत्सहो दाधार रोदसी।
गिरीँरज्राँ अपः स्वर्वृषत्वना॥ ८.०१५.०२
स राजसि पुरुष्टुतँ एको वृत्राणि जिघ्नसे।
इन्द्र जैत्रा श्रवस्या च यन्तवे॥ ८.०१५.०३
तं ते मदं गृणीमसि वृषणं पृत्सु सासहिम्।
उ लोककृत्नुमद्रिवो हरिश्रियम्॥ ८.०१५.०४
येन ज्योतींष्यायवे मनवे च विवेदिथ।
मन्दानो अस्य बर्हिषो वि राजसि॥ ८.०१५.०५
तदद्या चित्त उक्थिनोऽनु ष्टुवन्ति पूर्वथा।
वृषपत्नीरपो जया दिवेदिवे॥ ८.०१५.०६
तव त्यदिन्द्रियं बृहत्तव शुष्ममुत क्रतुम्।
वज्रं शिशाति धिषणा वरेण्यम्॥ ८.०१५.०७
तव द्यौरिन्द्र पौंस्यं पृथिवी वर्धति श्रवः।
त्वामापः पर्वतासश्च हिन्विरे॥ ८.०१५.०८
त्वां विष्णुर्बृहन्क्षयो मित्रो गृणाति वरुणः।
त्वां शर्धो मदत्यनु मारुतम्॥ ८.०१५.०९
त्वं वृषा जनानां मंहिष्ठ इन्द्र जज्ञिषे।
सत्रा विश्वा स्वपत्यानि दधिषे॥ ८.०१५.१०
सत्रा त्वं पुरुष्टुतँ एको वृत्राणि तोशसे।
नान्य इन्द्रात्करणं भूय इन्वति॥ ८.०१५.११
यदिन्द्र मन्मशस्त्वा नाना हवन्त ऊतये।
अस्माकेभिर्नृभिरत्रा स्वर्जय॥ ८.०१५.१२
अरं क्षयाय नो महे विश्वा रूपाण्याविशन्।
इन्द्रं जैत्राय हर्षया शचीपतिम्॥ ८.०१५.१३
प्र सम्राजं चर्षणीनामिन्द्रं स्तोता नव्यं गीर्भिः।
नरं नृषाहं मंहिष्ठम्॥ ८.०१६.०१
यस्मिन्नुक्थानि रण्यन्ति विश्वानि च श्रवस्या।
अपामवो न समुद्रे॥ ८.०१६.०२
तं सुष्टुत्या विवासे ज्येष्ठराजं भरे कृत्नुम्।
महो वाजिनं सनिभ्यः॥ ८.०१६.०३
यस्यानूना गभीरा मदा उरवस्तरुत्राः।
हर्षुमन्तः शूरसातौ॥ ८.०१६.०४
तमिद्धनेषु हितेष्वधिवाकाय हवन्ते।
येषामिन्द्रस्ते जयन्ति॥ ८.०१६.०५
तमिच्च्यौत्नैरार्यन्ति तं कृतेभिश्चर्षणयः।
एष इन्द्रो वरिवस्कृत्॥ ८.०१६.०६
इन्द्रो ब्रह्मेन्द्र ऋषिरिन्द्रः पुरू पुरुहूतः।
महान्महीभिः शचीभिः॥ ८.०१६.०७
स स्तोम्यः स हव्यः सत्यः सत्वा तुविकूर्मिः।
एकश्चित्सन्नभिभूतिः॥ ८.०१६.०८
तमर्केभिस्तं सामभिस्तं गायत्रैश्चर्षणयः।
इन्द्रं वर्धन्ति क्षितयः॥ ८.०१६.०९
प्रणेतारं वस्यो अच्छा कर्तारं ज्योतिः समत्सु।
सासह्वांसं युधामित्रान्॥ ८.०१६.१०
स नः पप्रिः पारयाति स्वस्ति नावा पुरुहूतः।
इन्द्रो विश्वा अति द्विषः॥ ८.०१६.११
स त्वं न इन्द्र वाजेभिर्दशस्या च गातुया च।
अच्छा च नः सुम्नं नेषि॥ ८.०१६.१२
आ याहि सुषुमा हि त इन्द्र सोमं पिबा इमम्।
एदं बर्हिः सदो मम॥ ८.०१७.०१
आ त्वा ब्रह्मयुजा हरी वहतामिन्द्र केशिना।
उप ब्रह्माणि नः शृणु॥ ८.०१७.०२
ब्रह्माणस्त्वा वयं युजा सोमपामिन्द्र सोमिनः।
सुतावन्तो हवामहे॥ ८.०१७.०३
आ नो याहि सुतावतोऽस्माकं सुष्टुतीरुप।
पिबा सु शिप्रिन्नन्धसः॥ ८.०१७.०४
आ ते सिञ्चामि कुक्ष्योरनु गात्रा वि धावतु।
गृभाय जिह्वया मधु॥ ८.०१७.०५
स्वादुष्टे अस्तु संसुदे मधुमान्तन्वे तव।
सोमः शमस्तु ते हृदे॥ ८.०१७.०६
अयमु त्वा विचर्षणे जनीरिवाभि संवृतः।
प्र सोम इन्द्र सर्पतु॥ ८.०१७.०७
तुविग्रीवो वपोदरः सुबाहुरन्धसो मदे।
इन्द्रो वृत्राणि जिघ्नते॥ ८.०१७.०८
इन्द्र प्रेहि पुरस्त्वं विश्वस्येशान ओजसा।
वृत्राणि वृत्रहञ्जहि॥ ८.०१७.०९
दीर्घस्ते अस्त्वङ्कुशो येना वसु प्रयच्छसि।
यजमानाय सुन्वते॥ ८.०१७.१०
अयं त इन्द्र सोमो निपूतो अधि बर्हिषि।
एहीमस्य द्रवा पिब॥ ८.०१७.११
शाचिगो शाचिपूजनायं रणाय ते सुतः।
आखण्डल प्र हूयसे॥ ८.०१७.१२
यस्ते शृङ्गवृषो नपात्प्रणपात्कुण्डपाय्यः।
न्यस्मिन्दध्र आ मनः॥ ८.०१७.१३
वास्तोष्पते ध्रुवा स्थूणांसत्रं सोम्यानाम्।
द्रप्सो भेत्ता पुरां शश्वतीनामिन्द्रो मुनीनां सखा॥ ८.०१७.१४
पृदाकुसानुर्यजतो गवेषण एकः सन्नभि भूयसः।
भूर्णिमश्वं नयत्तुजा पुरो गृभेन्द्रं सोमस्य पीतये॥ ८.०१७.१५
इदं ह नूनमेषां सुम्नं भिक्षेत मर्त्यः।
आदित्यानामपूर्व्यं सवीमनि॥ ८.०१८.०१
अनर्वाणो ह्येषां पन्था आदित्यानाम्।
अदब्धाः सन्ति पायवः सुगेवृधः॥ ८.०१८.०२
तत्सु नः सविता भगो वरुणो मित्रो अर्यमा।
शर्म यच्छन्तु सप्रथो यदीमहे॥ ८.०१८.०३
देवेभिर्देव्यदितेऽरिष्टभर्मन्ना गहि।
स्मत्सूरिभिः पुरुप्रिये सुशर्मभिः॥ ८.०१८.०४
ते हि पुत्रासो अदितेर्विदुर्द्वेषांसि योतवे।
अंहोश्चिदुरुचक्रयोऽनेहसः॥ ८.०१८.०५
अदितिर्नो दिवा पशुमदितिर्नक्तमद्वयाः।
अदितिः पात्वंहसः सदावृधा॥ ८.०१८.०६
उत स्या नो दिवा मतिरदितिरूत्या गमत्।
सा शंताति मयस्करदप स्रिधः॥ ८.०१८.०७
उत त्या दैव्या भिषजा शं नः करतो अश्विना।
युयुयातामितो रपो अप स्रिधः॥ ८.०१८.०८
शमग्निरग्निभिः करच्छं नस्तपतु सूर्यः।
शं वातो वात्वरपा अप स्रिधः॥ ८.०१८.०९
अपामीवामप स्रिधमप सेधत दुर्मतिम्।
आदित्यासो युयोतना नो अंहसः॥ ८.०१८.१०
युयोता शरुमस्मदाँ आदित्यास उतामतिम्।
ऋधग्द्वेषः कृणुत विश्ववेदसः॥ ८.०१८.११
तत्सु नः शर्म यच्छतादित्या यन्मुमोचति।
एनस्वन्तं चिदेनसः सुदानवः॥ ८.०१८.१२
यो नः कश्चिद्रिरिक्षति रक्षस्त्वेन मर्त्यः।
स्वैः ष एवै रिरिषीष्ट युर्जनः॥ ८.०१८.१३
समित्तमघमश्नवद्दुःशंसं मर्त्यं रिपुम्।
यो अस्मत्रा दुर्हणावाँ उप द्वयुः॥ ८.०१८.१४
पाकत्रा स्थन देवा हृत्सु जानीथ मर्त्यम्।
उप द्वयुं चाद्वयुं च वसवः॥ ८.०१८.१५
आ शर्म पर्वतानामोतापां वृणीमहे।
द्यावाक्षामारे अस्मद्रपस्कृतम्॥ ८.०१८.१६
ते नो भद्रेण शर्मणा युष्माकं नावा वसवः।
अति विश्वानि दुरिता पिपर्तन॥ ८.०१८.१७
तुचे तनाय तत्सु नो द्राघीय आयुर्जीवसे।
आदित्यासः सुमहसः कृणोतन॥ ८.०१८.१८
यज्ञो हीळो वो अन्तर आदित्या अस्ति मृळत।
युष्मे इद्वो अपि ष्मसि सजात्ये॥ ८.०१८.१९
बृहद्वरूथं मरुतां देवं त्रातारमश्विना।
मित्रमीमहे वरुणं स्वस्तये॥ ८.०१८.२०
अनेहो मित्रार्यमन्नृवद्वरुण शंस्यम्।
त्रिवरूथं मरुतो यन्त नश्छर्दिः॥ ८.०१८.२१
ये चिद्धि मृत्युबन्धव आदित्या मनवः स्मसि।
प्र सू न आयुर्जीवसे तिरेतन॥ ८.०१८.२२
तं गूर्धया स्वर्णरं देवासो देवमरतिं दधन्विरे।
देवत्रा हव्यमोहिरे॥ ८.०१९.०१
विभूतरातिं विप्र चित्रशोचिषमग्निमीळिष्व यन्तुरम्।
अस्य मेधस्य सोम्यस्य सोभरे प्रेमध्वराय पूर्व्यम्॥ ८.०१९.०२
यजिष्ठं त्वा ववृमहे देवं देवत्रा होतारममर्त्यम्।
अस्य यज्ञस्य सुक्रतुम्॥ ८.०१९.०३
ऊर्जो नपातं सुभगं सुदीदितिमग्निं श्रेष्ठशोचिषम्।
स नो मित्रस्य वरुणस्य सो अपामा सुम्नं यक्षते दिवि॥ ८.०१९.०४
यः समिधा य आहुती यो वेदेन ददाश मर्तो अग्नये।
यो नमसा स्वध्वरः॥ ८.०१९.०५
तस्येदर्वन्तो रंहयन्त आशवस्तस्य द्युम्नितमं यशः।
न तमंहो देवकृतं कुतश्चन न मर्त्यकृतं नशत्॥ ८.०१९.०६
स्वग्नयो वो अग्निभिः स्याम सूनो सहस ऊर्जां पते।
सुवीरस्त्वमस्मयुः॥ ८.०१९.०७
प्रशंसमानो अतिथिर्न मित्रियोऽग्नी रथो न वेद्यः।
त्वे क्षेमासो अपि सन्ति साधवस्त्वं राजा रयीणाम्॥ ८.०१९.०८
सो अद्धा दाश्वध्वरोऽग्ने मर्तः सुभग स प्रशंस्यः।
स धीभिरस्तु सनिता॥ ८.०१९.०९
यस्य त्वमूर्ध्वो अध्वराय तिष्ठसि क्षयद्वीरः स साधते।
सो अर्वद्भिः सनिता स विपन्युभिः स शूरैः सनिता कृतम्॥ ८.०१९.१०
यस्याग्निर्वपुर्गृहे स्तोमं चनो दधीत विश्ववार्यः।
हव्या वा वेविषद्विषः॥ ८.०१९.११
विप्रस्य वा स्तुवतः सहसो यहो मक्षूतमस्य रातिषु।
अवोदेवमुपरिमर्त्यं कृधि वसो विविदुषो वचः॥ ८.०१९.१२
यो अग्निं हव्यदातिभिर्नमोभिर्वा सुदक्षमाविवासति।
गिरा वाजिरशोचिषम्॥ ८.०१९.१३
समिधा यो निशिती दाशददितिं धामभिरस्य मर्त्यः।
विश्वेत्स धीभिः सुभगो जनाँ अति द्युम्नैरुद्न इव तारिषत्॥ ८.०१९.१४
तदग्ने द्युम्नमा भर यत्सासहत्सदने कं चिदत्रिणम्।
मन्युं जनस्य दूढ्यः॥ ८.०१९.१५
येन चष्टे वरुणो मित्रो अर्यमा येन नासत्या भगः।
वयं तत्ते शवसा गातुवित्तमा इन्द्रत्वोता विधेमहि॥ ८.०१९.१६
ते घेदग्ने स्वाध्यो ये त्वा विप्र निदधिरे नृचक्षसम्।
विप्रासो देव सुक्रतुम्॥ ८.०१९.१७
त इद्वेदिं सुभग त आहुतिं ते सोतुं चक्रिरे दिवि।
त इद्वाजेभिर्जिग्युर्महद्धनं ये त्वे कामं न्येरिरे॥ ८.०१९.१८
भद्रो नो अग्निराहुतो भद्रा रातिः सुभग भद्रो अध्वरः।
भद्रा उत प्रशस्तयः॥ ८.०१९.१९
भद्रं मनः कृणुष्व वृत्रतूर्ये येना समत्सु सासहः।
अव स्थिरा तनुहि भूरि शर्धतां वनेमा ते अभिष्टिभिः॥ ८.०१९.२०
ईळे गिरा मनुर्हितं यं देवा दूतमरतिं न्येरिरे।
यजिष्ठं हव्यवाहनम्॥ ८.०१९.२१
तिग्मजम्भाय तरुणाय राजते प्रयो गायस्यग्नये।
यः पिंशते सूनृताभिः सुवीर्यमग्निर्घृतेभिराहुतः॥ ८.०१९.२२
यदी घृतेभिराहुतो वाशीमग्निर्भरत उच्चाव च।
असुर इव निर्णिजम्॥ ८.०१९.२३
यो हव्यान्यैरयता मनुर्हितो देव आसा सुगन्धिना।
विवासते वार्याणि स्वध्वरो होता देवो अमर्त्यः॥ ८.०१९.२४
यदग्ने मर्त्यस्त्वं स्यामहं मित्रमहो अमर्त्यः।
सहसः सूनवाहुत॥ ८.०१९.२५
न त्वा रासीयाभिशस्तये वसो न पापत्वाय सन्त्य।
न मे स्तोतामतीवा न दुर्हितः स्यादग्ने न पापया॥ ८.०१९.२६
पितुर्न पुत्रः सुभृतो दुरोण आ देवाँ एतु प्र णो हविः॥ ८.०१९.२७
तवाहमग्न ऊतिभिर्नेदिष्ठाभिः सचेय जोषमा वसो।
सदा देवस्य मर्त्यः॥ ८.०१९.२८
तव क्रत्वा सनेयं तव रातिभिरग्ने तव प्रशस्तिभिः।
त्वामिदाहुः प्रमतिं वसो ममाग्ने हर्षस्व दातवे॥ ८.०१९.२९
प्र सो अग्ने तवोतिभिः सुवीराभिस्तिरते वाजभर्मभिः।
यस्य त्वं सख्यमावरः॥ ८.०१९.३०
तव द्रप्सो नीलवान्वाश ऋत्विय इन्धानः सिष्णवा ददे।
त्वं महीनामुषसामसि प्रियः क्षपो वस्तुषु राजसि॥ ८.०१९.३१
तमागन्म सोभरयः सहस्रमुष्कं स्वभिष्टिमवसे।
सम्राजं त्रासदस्यवम्॥ ८.०१९.३२
यस्य ते अग्ने अन्ये अग्नय उपक्षितो वया इव।
विपो न द्युम्ना नि युवे जनानां तव क्षत्राणि वर्धयन्॥ ८.०१९.३३
यमादित्यासो अद्रुहः पारं नयथ मर्त्यम्।
मघोनां विश्वेषां सुदानवः॥ ८.०१९.३४
यूयं राजानः कं चिच्चर्षणीसहः क्षयन्तं मानुषाँ अनु।
वयं ते वो वरुण मित्रार्यमन्स्यामेदृतस्य रथ्यः॥ ८.०१९.३५
अदान्मे पौरुकुत्स्यः पञ्चाशतं त्रसदस्युर्वधूनाम्।
मंहिष्ठो अर्यः सत्पतिः॥ ८.०१९.३६
उत मे प्रयियोर्वयियोः सुवास्त्वा अधि तुग्वनि।
तिसॄणां सप्ततीनां श्यावः प्रणेता भुवद्वसुर्दियानां पतिः॥ ८.०१९.३७
आ गन्ता मा रिषण्यत प्रस्थावानो माप स्थाता समन्यवः।
स्थिरा चिन्नमयिष्णवः॥ ८.०२०.०१
वीळुपविभिर्मरुत ऋभुक्षण आ रुद्रासः सुदीतिभिः।
इषा नो अद्या गता पुरुस्पृहो यज्ञमा सोभरीयवः॥ ८.०२०.०२
विद्मा हि रुद्रियाणां शुष्ममुग्रं मरुतां शिमीवताम्।
विष्णोरेषस्य मीळ्हुषाम्॥ ८.०२०.०३
वि द्वीपानि पापतन्तिष्ठद्दुच्छुनोभे युजन्त रोदसी।
प्र धन्वान्यैरत शुभ्रखादयो यदेजथ स्वभानवः॥ ८.०२०.०४
अच्युता चिद्वो अज्मन्ना नानदति पर्वतासो वनस्पतिः।
भूमिर्यामेषु रेजते॥ ८.०२०.०५
अमाय वो मरुतो यातवे द्यौर्जिहीत उत्तरा बृहत्।
यत्रा नरो देदिशते तनूष्वा त्वक्षांसि बाह्वोजसः॥ ८.०२०.०६
स्वधामनु श्रियं नरो महि त्वेषा अमवन्तो वृषप्सवः।
वहन्ते अह्रुतप्सवः॥ ८.०२०.०७
गोभिर्वाणो अज्यते सोभरीणां रथे कोशे हिरण्यये।
गोबन्धवः सुजातास इषे भुजे महान्तो न स्परसे नु॥ ८.०२०.०८
प्रति वो वृषदञ्जयो वृष्णे शर्धाय मारुताय भरध्वम्।
हव्या वृषप्रयाव्णे॥ ८.०२०.०९
वृषणश्वेन मरुतो वृषप्सुना रथेन वृषनाभिना।
आ श्येनासो न पक्षिणो वृथा नरो हव्या नो वीतये गत॥ ८.०२०.१०
समानमञ्ज्येषां वि भ्राजन्ते रुक्मासो अधि बाहुषु।
दविद्युतत्यृष्टयः॥ ८.०२०.११
त उग्रासो वृषण उग्रबाहवो नकिष्टनूषु येतिरे।
स्थिरा धन्वान्यायुधा रथेषु वोऽनीकेष्वधि श्रियः॥ ८.०२०.१२
येषामर्णो न सप्रथो नाम त्वेषं शश्वतामेकमिद्भुजे।
वयो न पित्र्यं सहः॥ ८.०२०.१३
तान्वन्दस्व मरुतस्ताँ उप स्तुहि तेषां हि धुनीनाम्।
अराणां न चरमस्तदेषां दाना मह्ना तदेषाम्॥ ८.०२०.१४
सुभगः स व ऊतिष्वास पूर्वासु मरुतो व्युष्टिषु।
यो वा नूनमुतासति॥ ८.०२०.१५
यस्य वा यूयं प्रति वाजिनो नर आ हव्या वीतये गथ।
अभि ष द्युम्नैरुत वाजसातिभिः सुम्ना वो धूतयो नशत्॥ ८.०२०.१६
यथा रुद्रस्य सूनवो दिवो वशन्त्यसुरस्य वेधसः।
युवानस्तथेदसत्॥ ८.०२०.१७
ये चार्हन्ति मरुतः सुदानवः स्मन्मीळ्हुषश्चरन्ति ये।
अतश्चिदा न उप वस्यसा हृदा युवान आ ववृध्वम्॥ ८.०२०.१८
यून ऊ षु नविष्ठया वृष्णः पावकाँ अभि सोभरे गिरा।
गाय गा इव चर्कृषत्॥ ८.०२०.१९
साहा ये सन्ति मुष्टिहेव हव्यो विश्वासु पृत्सु होतृषु।
वृष्णश्चन्द्रान्न सुश्रवस्तमान्गिरा वन्दस्व मरुतो अह॥ ८.०२०.२०
गावश्चिद्घा समन्यवः सजात्येन मरुतः सबन्धवः।
रिहते ककुभो मिथः॥ ८.०२०.२१
मर्तश्चिद्वो नृतवो रुक्मवक्षस उप भ्रातृत्वमायति।
अधि नो गात मरुतः सदा हि व आपित्वमस्ति निध्रुवि॥ ८.०२०.२२
मरुतो मारुतस्य न आ भेषजस्य वहता सुदानवः।
यूयं सखायः सप्तयः॥ ८.०२०.२३
याभिः सिन्धुमवथ याभिस्तूर्वथ याभिर्दशस्यथा क्रिविम्।
मयो नो भूतोतिभिर्मयोभुवः शिवाभिरसचद्विषः॥ ८.०२०.२४
यत्सिन्धौ यदसिक्न्यां यत्समुद्रेषु मरुतः सुबर्हिषः।
यत्पर्वतेषु भेषजम्॥ ८.०२०.२५
विश्वं पश्यन्तो बिभृथा तनूष्वा तेना नो अधि वोचत।
क्षमा रपो मरुत आतुरस्य न इष्कर्ता विह्रुतं पुनः॥ ८.०२०.२६
वयमु त्वामपूर्व्य स्थूरं न कच्चिद्भरन्तोऽवस्यवः।
वाजे चित्रं हवामहे॥ ८.०२१.०१
उप त्वा कर्मन्नूतये स नो युवोग्रश्चक्राम यो धृषत्।
त्वामिद्ध्यवितारं ववृमहे सखाय इन्द्र सानसिम्॥ ८.०२१.०२
आ याहीम इन्दवोऽश्वपते गोपत उर्वरापते।
सोमं सोमपते पिब॥ ८.०२१.०३
वयं हि त्वा बन्धुमन्तमबन्धवो विप्रास इन्द्र येमिम।
या ते धामानि वृषभ तेभिरा गहि विश्वेभिः सोमपीतये॥ ८.०२१.०४
सीदन्तस्ते वयो यथा गोश्रीते मधौ मदिरे विवक्षणे।
अभि त्वामिन्द्र नोनुमः॥ ८.०२१.०५
अच्छा च त्वैना नमसा वदामसि किं मुहुश्चिद्वि दीधयः।
सन्ति कामासो हरिवो ददिष्ट्वं स्मो वयं सन्ति नो धियः॥ ८.०२१.०६
नूत्ना इदिन्द्र ते वयमूती अभूम नहि नू ते अद्रिवः।
विद्मा पुरा परीणसः॥ ८.०२१.०७
विद्मा सखित्वमुत शूर भोज्यमा ते ता वज्रिन्नीमहे।
उतो समस्मिन्ना शिशीहि नो वसो वाजे सुशिप्र गोमति॥ ८.०२१.०८
यो न इदमिदं पुरा प्र वस्य आनिनाय तमु व स्तुषे।
सखाय इन्द्रमूतये॥ ८.०२१.०९
हर्यश्वं सत्पतिं चर्षणीसहं स हि ष्मा यो अमन्दत।
आ तु नः स वयति गव्यमश्व्यं स्तोतृभ्यो मघवा शतम्॥ ८.०२१.१०
त्वया ह स्विद्युजा वयं प्रति श्वसन्तं वृषभ ब्रुवीमहि।
संस्थे जनस्य गोमतः॥ ८.०२१.११
जयेम कारे पुरुहूत कारिणोऽभि तिष्ठेम दूढ्यः।
नृभिर्वृत्रं हन्याम शूशुयाम चावेरिन्द्र प्र णो धियः॥ ८.०२१.१२
अभ्रातृव्यो अना त्वमनापिरिन्द्र जनुषा सनादसि।
युधेदापित्वमिच्छसे॥ ८.०२१.१३
नकी रेवन्तं सख्याय विन्दसे पीयन्ति ते सुराश्वः।
यदा कृणोषि नदनुं समूहस्यादित्पितेव हूयसे॥ ८.०२१.१४
मा ते अमाजुरो यथा मूरास इन्द्र सख्ये त्वावतः।
नि षदाम सचा सुते॥ ८.०२१.१५
मा ते गोदत्र निरराम राधस इन्द्र मा ते गृहामहि।
दृळ्हा चिदर्यः प्र मृशाभ्या भर न ते दामान आदभे॥ ८.०२१.१६
इन्द्रो वा घेदियन्मघं सरस्वती वा सुभगा ददिर्वसु।
त्वं वा चित्र दाशुषे॥ ८.०२१.१७
चित्र इद्राजा राजका इदन्यके यके सरस्वतीमनु।
पर्जन्य इव ततनद्धि वृष्ट्या सहस्रमयुता ददत्॥ ८.०२१.१८
ओ त्यमह्व आ रथमद्या दंसिष्ठमूतये।
यमश्विना सुहवा रुद्रवर्तनी आ सूर्यायै तस्थथुः॥ ८.०२२.०१
पूर्वायुषं सुहवं पुरुस्पृहं भुज्युं वाजेषु पूर्व्यम्।
सचनावन्तं सुमतिभिः सोभरे विद्वेषसमनेहसम्॥ ८.०२२.०२
इह त्या पुरुभूतमा देवा नमोभिरश्विना।
अर्वाचीना स्ववसे करामहे गन्तारा दाशुषो गृहम्॥ ८.०२२.०३
युवो रथस्य परि चक्रमीयत ईर्मान्यद्वामिषण्यति।
अस्माँ अच्छा सुमतिर्वां शुभस्पती आ धेनुरिव धावतु॥ ८.०२२.०४
रथो यो वां त्रिवन्धुरो हिरण्याभीशुरश्विना।
परि द्यावापृथिवी भूषति श्रुतस्तेन नासत्या गतम्॥ ८.०२२.०५
दशस्यन्ता मनवे पूर्व्यं दिवि यवं वृकेण कर्षथः।
ता वामद्य सुमतिभिः शुभस्पती अश्विना प्र स्तुवीमहि॥ ८.०२२.०६
उप नो वाजिनीवसू यातमृतस्य पथिभिः।
येभिस्तृक्षिं वृषणा त्रासदस्यवं महे क्षत्राय जिन्वथः॥ ८.०२२.०७
अयं वामद्रिभिः सुतः सोमो नरा वृषण्वसू।
आ यातं सोमपीतये पिबतं दाशुषो गृहे॥ ८.०२२.०८
आ हि रुहतमश्विना रथे कोशे हिरण्यये वृषण्वसू।
युञ्जाथां पीवरीरिषः॥ ८.०२२.०९
याभिः पक्थमवथो याभिरध्रिगुं याभिर्बभ्रुं विजोषसम्।
ताभिर्नो मक्षू तूयमश्विना गतं भिषज्यतं यदातुरम्॥ ८.०२२.१०
यदध्रिगावो अध्रिगू इदा चिदह्नो अश्विना हवामहे।
वयं गीर्भिर्विपन्यवः॥ ८.०२२.११
ताभिरा यातं वृषणोप मे हवं विश्वप्सुं विश्ववार्यम्।
इषा मंहिष्ठा पुरुभूतमा नरा याभिः क्रिविं वावृधुस्ताभिरा गतम्॥ ८.०२२.१२
ताविदा चिदहानां तावश्विना वन्दमान उप ब्रुवे।
ता उ नमोभिरीमहे॥ ८.०२२.१३
ताविद्दोषा ता उषसि शुभस्पती ता यामन्रुद्रवर्तनी।
मा नो मर्ताय रिपवे वाजिनीवसू परो रुद्रावति ख्यतम्॥ ८.०२२.१४
आ सुग्म्याय सुग्म्यं प्राता रथेनाश्विना वा सक्षणी।
हुवे पितेव सोभरी॥ ८.०२२.१५
मनोजवसा वृषणा मदच्युता मक्षुंगमाभिरूतिभिः।
आरात्ताच्चिद्भूतमस्मे अवसे पूर्वीभिः पुरुभोजसा॥ ८.०२२.१६
आ नो अश्वावदश्विना वर्तिर्यासिष्टं मधुपातमा नरा।
गोमद्दस्रा हिरण्यवत्॥ ८.०२२.१७
सुप्रावर्गं सुवीर्यं सुष्ठु वार्यमनाधृष्टं रक्षस्विना।
अस्मिन्ना वामायाने वाजिनीवसू विश्वा वामानि धीमहि॥ ८.०२२.१८
ईळिष्वा हि प्रतीव्यं यजस्व जातवेदसम्।
चरिष्णुधूममगृभीतशोचिषम्॥ ८.०२३.०१
दामानं विश्वचर्षणेऽग्निं विश्वमनो गिरा।
उत स्तुषे विष्पर्धसो रथानाम्॥ ८.०२३.०२
येषामाबाध ऋग्मिय इषः पृक्षश्च निग्रभे।
उपविदा वह्निर्विन्दते वसु॥ ८.०२३.०३
उदस्य शोचिरस्थाद्दीदियुषो व्यजरम्।
तपुर्जम्भस्य सुद्युतो गणश्रियः॥ ८.०२३.०४
उदु तिष्ठ स्वध्वर स्तवानो देव्या कृपा।
अभिख्या भासा बृहता शुशुक्वनिः॥ ८.०२३.०५
अग्ने याहि सुशस्तिभिर्हव्या जुह्वान आनुषक्।
यथा दूतो बभूथ हव्यवाहनः॥ ८.०२३.०६
अग्निं वः पूर्व्यं हुवे होतारं चर्षणीनाम्।
तमया वाचा गृणे तमु व स्तुषे॥ ८.०२३.०७
यज्ञेभिरद्भुतक्रतुं यं कृपा सूदयन्त इत्।
मित्रं न जने सुधितमृतावनि॥ ८.०२३.०८
ऋतावानमृतायवो यज्ञस्य साधनं गिरा।
उपो एनं जुजुषुर्नमसस्पदे॥ ८.०२३.०९
अच्छा नो अङ्गिरस्तमं यज्ञासो यन्तु संयतः।
होता यो अस्ति विक्ष्वा यशस्तमः॥ ८.०२३.१०
अग्ने तव त्ये अजरेन्धानासो बृहद्भाः।
अश्वा इव वृषणस्तविषीयवः॥ ८.०२३.११
स त्वं न ऊर्जां पते रयिं रास्व सुवीर्यम्।
प्राव नस्तोके तनये समत्स्वा॥ ८.०२३.१२
यद्वा उ विश्पतिः शितः सुप्रीतो मनुषो विशि।
विश्वेदग्निः प्रति रक्षांसि सेधति॥ ८.०२३.१३
श्रुष्ट्यग्ने नवस्य मे स्तोमस्य वीर विश्पते।
नि मायिनस्तपुषा रक्षसो दह॥ ८.०२३.१४
न तस्य मायया चन रिपुरीशीत मर्त्यः।
यो अग्नये ददाश हव्यदातिभिः॥ ८.०२३.१५
व्यश्वस्त्वा वसुविदमुक्षण्युरप्रीणादृषिः।
महो राये तमु त्वा समिधीमहि॥ ८.०२३.१६
उशना काव्यस्त्वा नि होतारमसादयत्।
आयजिं त्वा मनवे जातवेदसम्॥ ८.०२३.१७
विश्वे हि त्वा सजोषसो देवासो दूतमक्रत।
श्रुष्टी देव प्रथमो यज्ञियो भुवः॥ ८.०२३.१८
इमं घा वीरो अमृतं दूतं कृण्वीत मर्त्यः।
पावकं कृष्णवर्तनिं विहायसम्॥ ८.०२३.१९
तं हुवेम यतस्रुचः सुभासं शुक्रशोचिषम्।
विशामग्निमजरं प्रत्नमीड्यम्॥ ८.०२३.२०
यो अस्मै हव्यदातिभिराहुतिं मर्तोऽविधत्।
भूरि पोषं स धत्ते वीरवद्यशः॥ ८.०२३.२१
प्रथमं जातवेदसमग्निं यज्ञेषु पूर्व्यम्।
प्रति स्रुगेति नमसा हविष्मती॥ ८.०२३.२२
आभिर्विधेमाग्नये ज्येष्ठाभिर्व्यश्ववत्।
मंहिष्ठाभिर्मतिभिः शुक्रशोचिषे॥ ८.०२३.२३
नूनमर्च विहायसे स्तोमेभि स्थूरयूपवत्।
ऋषे वैयश्व दम्यायाग्नये॥ ८.०२३.२४
अतिथिं मानुषाणां सूनुं वनस्पतीनाम्।
विप्रा अग्निमवसे प्रत्नमीळते॥ ८.०२३.२५
महो विश्वाँ अभि षतोऽभि हव्यानि मानुषा।
अग्ने नि षत्सि नमसाधि बर्हिषि॥ ८.०२३.२६
वंस्वा नो वार्या पुरु वंस्व रायः पुरुस्पृहः।
सुवीर्यस्य प्रजावतो यशस्वतः॥ ८.०२३.२७
त्वं वरो सुषाम्णेऽग्ने जनाय चोदय।
सदा वसो रातिं यविष्ठ शश्वते॥ ८.०२३.२८
त्वं हि सुप्रतूरसि त्वं नो गोमतीरिषः।
महो रायः सातिमग्ने अपा वृधि॥ ८.०२३.२९
अग्ने त्वं यशा अस्या मित्रावरुणा वह।
ऋतावाना सम्राजा पूतदक्षसा॥ ८.०२३.३०
सखाय आ शिषामहि ब्रह्मेन्द्राय वज्रिणे।
स्तुष ऊ षु वो नृतमाय धृष्णवे॥ ८.०२४.०१
शवसा ह्यसि श्रुतो वृत्रहत्येन वृत्रहा।
मघैर्मघोनो अति शूर दाशसि॥ ८.०२४.०२
स न स्तवान आ भर रयिं चित्रश्रवस्तमम्।
निरेके चिद्यो हरिवो वसुर्ददिः॥ ८.०२४.०३
आ निरेकमुत प्रियमिन्द्र दर्षि जनानाम्।
धृषता धृष्णो स्तवमान आ भर॥ ८.०२४.०४
न ते सव्यं न दक्षिणं हस्तं वरन्त आमुरः।
न परिबाधो हरिवो गविष्टिषु॥ ८.०२४.०५
आ त्वा गोभिरिव व्रजं गीर्भिरृणोम्यद्रिवः।
आ स्मा कामं जरितुरा मनः पृण॥ ८.०२४.०६
विश्वानि विश्वमनसो धिया नो वृत्रहन्तम।
उग्र प्रणेतरधि षू वसो गहि॥ ८.०२४.०७
वयं ते अस्य वृत्रहन्विद्याम शूर नव्यसः।
वसो स्पार्हस्य पुरुहूत राधसः॥ ८.०२४.०८
इन्द्र यथा ह्यस्ति तेऽपरीतं नृतो शवः।
अमृक्ता रातिः पुरुहूत दाशुषे॥ ८.०२४.०९
आ वृषस्व महामह महे नृतम राधसे।
दृळ्हश्चिद्दृह्य मघवन्मघत्तये॥ ८.०२४.१०
नू अन्यत्रा चिदद्रिवस्त्वन्नो जग्मुराशसः।
मघवञ्छग्धि तव तन्न ऊतिभिः॥ ८.०२४.११
नह्यङ्ग नृतो त्वदन्यं विन्दामि राधसे।
राये द्युम्नाय शवसे च गिर्वणः॥ ८.०२४.१२
एन्दुमिन्द्राय सिञ्चत पिबाति सोम्यं मधु।
प्र राधसा चोदयाते महित्वना॥ ८.०२४.१३
उपो हरीणां पतिं दक्षं पृञ्चन्तमब्रवम्।
नूनं श्रुधि स्तुवतो अश्व्यस्य॥ ८.०२४.१४
नह्यङ्ग पुरा चन जज्ञे वीरतरस्त्वत्।
नकी राया नैवथा न भन्दना॥ ८.०२४.१५
एदु मध्वो मदिन्तरं सिञ्च वाध्वर्यो अन्धसः।
एवा हि वीर स्तवते सदावृधः॥ ८.०२४.१६
इन्द्र स्थातर्हरीणां नकिष्टे पूर्व्यस्तुतिम्।
उदानंश शवसा न भन्दना॥ ८.०२४.१७
तं वो वाजानां पतिमहूमहि श्रवस्यवः।
अप्रायुभिर्यज्ञेभिर्वावृधेन्यम्॥ ८.०२४.१८
एतो न्विन्द्रं स्तवाम सखाय स्तोम्यं नरम्।
कृष्टीर्यो विश्वा अभ्यस्त्येक इत्॥ ८.०२४.१९
अगोरुधाय गविषे द्युक्षाय दस्म्यं वचः।
घृतात्स्वादीयो मधुनश्च वोचत॥ ८.०२४.२०
यस्यामितानि वीर्या न राधः पर्येतवे।
ज्योतिर्न विश्वमभ्यस्ति दक्षिणा॥ ८.०२४.२१
स्तुहीन्द्रं व्यश्ववदनूर्मिं वाजिनं यमम्।
अर्यो गयं मंहमानं वि दाशुषे॥ ८.०२४.२२
एवा नूनमुप स्तुहि वैयश्व दशमं नवम्।
सुविद्वांसं चर्कृत्यं चरणीनाम्॥ ८.०२४.२३
वेत्था हि निरृतीनां वज्रहस्त परिवृजम्।
अहरहः शुन्ध्युः परिपदामिव॥ ८.०२४.२४
तदिन्द्राव आ भर येना दंसिष्ठ कृत्वने।
द्विता कुत्साय शिश्नथो नि चोदय॥ ८.०२४.२५
तमु त्वा नूनमीमहे नव्यं दंसिष्ठ सन्यसे।
स त्वं नो विश्वा अभिमातीः सक्षणिः॥ ८.०२४.२६
य ऋक्षादंहसो मुचद्यो वार्यात्सप्त सिन्धुषु।
वधर्दासस्य तुविनृम्ण नीनमः॥ ८.०२४.२७
यथा वरो सुषाम्णे सनिभ्य आवहो रयिम्।
व्यश्वेभ्यः सुभगे वाजिनीवति॥ ८.०२४.२८
आ नार्यस्य दक्षिणा व्यश्वाँ एतु सोमिनः।
स्थूरं च राधः शतवत्सहस्रवत्॥ ८.०२४.२९
यत्त्वा पृच्छादीजानः कुहया कुहयाकृते।
एषो अपश्रितो वलो गोमतीमव तिष्ठति॥ ८.०२४.३०
ता वां विश्वस्य गोपा देवा देवेषु यज्ञिया।
ऋतावाना यजसे पूतदक्षसा॥ ८.०२५.०१
मित्रा तना न रथ्या वरुणो यश्च सुक्रतुः।
सनात्सुजाता तनया धृतव्रता॥ ८.०२५.०२
ता माता विश्ववेदसासुर्याय प्रमहसा।
मही जजानादितिरृतावरी॥ ८.०२५.०३
महान्ता मित्रावरुणा सम्राजा देवावसुरा।
ऋतावानावृतमा घोषतो बृहत्॥ ८.०२५.०४
नपाता शवसो महः सूनू दक्षस्य सुक्रतू।
सृप्रदानू इषो वास्त्वधि क्षितः॥ ८.०२५.०५
सं या दानूनि येमथुर्दिव्याः पार्थिवीरिषः।
नभस्वतीरा वां चरन्तु वृष्टयः॥ ८.०२५.०६
अधि या बृहतो दिवोऽभि यूथेव पश्यतः।
ऋतावाना सम्राजा नमसे हिता॥ ८.०२५.०७
ऋतावाना नि षेदतुः साम्राज्याय सुक्रतू।
धृतव्रता क्षत्रिया क्षत्रमाशतुः॥ ८.०२५.०८
अक्ष्णश्चिद्गातुवित्तरानुल्बणेन चक्षसा।
नि चिन्मिषन्ता निचिरा नि चिक्यतुः॥ ८.०२५.०९
उत नो देव्यदितिरुरुष्यतां नासत्या।
उरुष्यन्तु मरुतो वृद्धशवसः॥ ८.०२५.१०
ते नो नावमुरुष्यत दिवा नक्तं सुदानवः।
अरिष्यन्तो नि पायुभिः सचेमहि॥ ८.०२५.११
अघ्नते विष्णवे वयमरिष्यन्तः सुदानवे।
श्रुधि स्वयावन्सिन्धो पूर्वचित्तये॥ ८.०२५.१२
तद्वार्यं वृणीमहे वरिष्ठं गोपयत्यम्।
मित्रो यत्पान्ति वरुणो यदर्यमा॥ ८.०२५.१३
उत नः सिन्धुरपां तन्मरुतस्तदश्विना।
इन्द्रो विष्णुर्मीढ्वांसः सजोषसः॥ ८.०२५.१४
ते हि ष्मा वनुषो नरोऽभिमातिं कयस्य चित्।
तिग्मं न क्षोदः प्रतिघ्नन्ति भूर्णयः॥ ८.०२५.१५
अयमेक इत्था पुरूरु चष्टे वि विश्पतिः।
तस्य व्रतान्यनु वश्चरामसि॥ ८.०२५.१६
अनु पूर्वाण्योक्या साम्राज्यस्य सश्चिम।
मित्रस्य व्रता वरुणस्य दीर्घश्रुत्॥ ८.०२५.१७
परि यो रश्मिना दिवोऽन्तान्ममे पृथिव्याः।
उभे आ पप्रौ रोदसी महित्वा॥ ८.०२५.१८
उदु ष्य शरणे दिवो ज्योतिरयंस्त सूर्यः।
अग्निर्न शुक्रः समिधान आहुतः॥ ८.०२५.१९
वचो दीर्घप्रसद्मनीशे वाजस्य गोमतः।
ईशे हि पित्वोऽविषस्य दावने॥ ८.०२५.२०
तत्सूर्यं रोदसी उभे दोषा वस्तोरुप ब्रुवे।
भोजेष्वस्माँ अभ्युच्चरा सदा॥ ८.०२५.२१
ऋज्रमुक्षण्यायने रजतं हरयाणे।
रथं युक्तमसनाम सुषामणि॥ ८.०२५.२२
ता मे अश्व्यानां हरीणां नितोशना।
उतो नु कृत्व्यानां नृवाहसा॥ ८.०२५.२३
स्मदभीशू कशावन्ता विप्रा नविष्ठया मती।
महो वाजिनावर्वन्ता सचासनम्॥ ८.०२५.२४
युवोरु षू रथं हुवे सधस्तुत्याय सूरिषु।
अतूर्तदक्षा वृषणा वृषण्वसू॥ ८.०२६.०१
युवं वरो सुषाम्णे महे तने नासत्या।
अवोभिर्याथो वृषणा वृषण्वसू॥ ८.०२६.०२
ता वामद्य हवामहे हव्येभिर्वाजिनीवसू।
पूर्वीरिष इषयन्तावति क्षपः॥ ८.०२६.०३
आ वां वाहिष्ठो अश्विना रथो यातु श्रुतो नरा।
उप स्तोमान्तुरस्य दर्शथः श्रिये॥ ८.०२६.०४
जुहुराणा चिदश्विना मन्येथां वृषण्वसू।
युवं हि रुद्रा पर्षथो अति द्विषः॥ ८.०२६.०५
दस्रा हि विश्वमानुषङ्मक्षूभिः परिदीयथः।
धियंजिन्वा मधुवर्णा शुभस्पती॥ ८.०२६.०६
उप नो यातमश्विना राया विश्वपुषा सह।
मघवाना सुवीरावनपच्युता॥ ८.०२६.०७
आ मे अस्य प्रतीव्यमिन्द्रनासत्या गतम्।
देवा देवेभिरद्य सचनस्तमा॥ ८.०२६.०८
वयं हि वां हवामह उक्षण्यन्तो व्यश्ववत्।
सुमतिभिरुप विप्राविहा गतम्॥ ८.०२६.०९
अश्विना स्वृषे स्तुहि कुवित्ते श्रवतो हवम्।
नेदीयसः कूळयातः पणीँरुत॥ ८.०२६.१०
वैयश्वस्य श्रुतं नरोतो मे अस्य वेदथः।
सजोषसा वरुणो मित्रो अर्यमा॥ ८.०२६.११
युवादत्तस्य धिष्ण्या युवानीतस्य सूरिभिः।
अहरहर्वृषण मह्यं शिक्षतम्॥ ८.०२६.१२
यो वां यज्ञेभिरावृतोऽधिवस्त्रा वधूरिव।
सपर्यन्ता शुभे चक्राते अश्विना॥ ८.०२६.१३
यो वामुरुव्यचस्तमं चिकेतति नृपाय्यम्।
वर्तिरश्विना परि यातमस्मयू॥ ८.०२६.१४
अस्मभ्यं सु वृषण्वसू यातं वर्तिर्नृपाय्यम्।
विषुद्रुहेव यज्ञमूहथुर्गिरा॥ ८.०२६.१५
वाहिष्ठो वां हवानां स्तोमो दूतो हुवन्नरा।
युवाभ्यां भूत्वश्विना॥ ८.०२६.१६
यददो दिवो अर्णव इषो वा मदथो गृहे।
श्रुतमिन्मे अमर्त्या॥ ८.०२६.१७
उत स्या श्वेतयावरी वाहिष्ठा वां नदीनाम्।
सिन्धुर्हिरण्यवर्तनिः॥ ८.०२६.१८
स्मदेतया सुकीर्त्याश्विना श्वेतया धिया।
वहेथे शुभ्रयावाना॥ ८.०२६.१९
युक्ष्वा हि त्वं रथासहा युवस्व पोष्या वसो।
आन्नो वायो मधु पिबास्माकं सवना गहि॥ ८.०२६.२०
तव वायवृतस्पते त्वष्टुर्जामातरद्भुत।
अवांस्या वृणीमहे॥ ८.०२६.२१
त्वष्टुर्जामातरं वयमीशानं राय ईमहे।
सुतावन्तो वायुं द्युम्ना जनासः॥ ८.०२६.२२
वायो याहि शिवा दिवो वहस्वा सु स्वश्व्यम्।
वहस्व महः पृथुपक्षसा रथे॥ ८.०२६.२३
त्वां हि सुप्सरस्तमं नृषदनेषु हूमहे।
ग्रावाणं नाश्वपृष्ठं मंहना॥ ८.०२६.२४
स त्वं नो देव मनसा वायो मन्दानो अग्रियः।
कृधि वाजाँ अपो धियः॥ ८.०२६.२५
अग्निरुक्थे पुरोहितो ग्रावाणो बर्हिरध्वरे।
ऋचा यामि मरुतो ब्रह्मणस्पतिं देवाँ अवो वरेण्यम्॥ ८.०२७.०१
आ पशुं गासि पृथिवीं वनस्पतीनुषासा नक्तमोषधीः।
विश्वे च नो वसवो विश्ववेदसो धीनां भूत प्रावितारः॥ ८.०२७.०२
प्र सू न एत्वध्वरोऽग्ना देवेषु पूर्व्यः।
आदित्येषु प्र वरुणे धृतव्रते मरुत्सु विश्वभानुषु॥ ८.०२७.०३
विश्वे हि ष्मा मनवे विश्ववेदसो भुवन्वृधे रिशादसः।
अरिष्टेभिः पायुभिर्विश्ववेदसो यन्ता नोऽवृकं छर्दिः॥ ८.०२७.०४
आ नो अद्य समनसो गन्ता विश्वे सजोषसः।
ऋचा गिरा मरुतो देव्यदिते सदने पस्त्ये महि॥ ८.०२७.०५
अभि प्रिया मरुतो या वो अश्व्या हव्या मित्र प्रयाथन।
आ बर्हिरिन्द्रो वरुणस्तुरा नर आदित्यासः सदन्तु नः॥ ८.०२७.०६
वयं वो वृक्तबर्हिषो हितप्रयस आनुषक्।
सुतसोमासो वरुण हवामहे मनुष्वदिद्धाग्नयः॥ ८.०२७.०७
आ प्र यात मरुतो विष्णो अश्विना पूषन्माकीनया धिया।
इन्द्र आ यातु प्रथमः सनिष्युभिर्वृषा यो वृत्रहा गृणे॥ ८.०२७.०८
वि नो देवासो अद्रुहोऽच्छिद्रं शर्म यच्छत।
न यद्दूराद्वसवो नू चिदन्तितो वरूथमादधर्षति॥ ८.०२७.०९
अस्ति हि वः सजात्यं रिशादसो देवासो अस्त्याप्यम्।
प्र णः पूर्वस्मै सुविताय वोचत मक्षू सुम्नाय नव्यसे॥ ८.०२७.१०
इदा हि व उपस्तुतिमिदा वामस्य भक्तये।
उप वो विश्ववेदसो नमस्युराँ असृक्ष्यन्यामिव॥ ८.०२७.११
उदु ष्य वः सविता सुप्रणीतयोऽस्थादूर्ध्वो वरेण्यः।
नि द्विपादश्चतुष्पादो अर्थिनोऽविश्रन्पतयिष्णवः॥ ८.०२७.१२
देवंदेवं वोऽवसे देवंदेवमभिष्टये।
देवंदेवं हुवेम वाजसातये गृणन्तो देव्या धिया॥ ८.०२७.१३
देवासो हि ष्मा मनवे समन्यवो विश्वे साकं सरातयः।
ते नो अद्य ते अपरं तुचे तु नो भवन्तु वरिवोविदः॥ ८.०२७.१४
प्र वः शंसाम्यद्रुहः संस्थ उपस्तुतीनाम्।
न तं धूर्तिर्वरुण मित्र मर्त्यं यो वो धामभ्योऽविधत्॥ ८.०२७.१५
प्र स क्षयं तिरते वि महीरिषो यो वो वराय दाशति।
प्र प्रजाभिर्जायते धर्मणस्पर्यरिष्टः सर्व एधते॥ ८.०२७.१६
ऋते स विन्दते युधः सुगेभिर्यात्यध्वनः।
अर्यमा मित्रो वरुणः सरातयो यं त्रायन्ते सजोषसः॥ ८.०२७.१७
अज्रे चिदस्मै कृणुथा न्यञ्चनं दुर्गे चिदा सुसरणम्।
एषा चिदस्मादशनिः परो नु सास्रेधन्ती वि नश्यतु॥ ८.०२७.१८
यदद्य सूर्य उद्यति प्रियक्षत्रा ऋतं दध।
यन्निम्रुचि प्रबुधि विश्ववेदसो यद्वा मध्यंदिने दिवः॥ ८.०२७.१९
यद्वाभिपित्वे असुरा ऋतं यते छर्दिर्येम वि दाशुषे।
वयं तद्वो वसवो विश्ववेदस उप स्थेयाम मध्य आ॥ ८.०२७.२०
यदद्य सूर उदिते यन्मध्यंदिन आतुचि।
वामं धत्थ मनवे विश्ववेदसो जुह्वानाय प्रचेतसे॥ ८.०२७.२१
वयं तद्वः सम्राज आ वृणीमहे पुत्रो न बहुपाय्यम्।
अश्याम तदादित्या जुह्वतो हविर्येन वस्योऽनशामहै॥ ८.०२७.२२
ये त्रिंशति त्रयस्परो देवासो बर्हिरासदन्।
विदन्नह द्वितासनन्॥ ८.०२८.०१
वरुणो मित्रो अर्यमा स्मद्रातिषाचो अग्नयः।
पत्नीवन्तो वषट्कृताः॥ ८.०२८.०२
ते नो गोपा अपाच्यास्त उदक्त इत्था न्यक्।
पुरस्तात्सर्वया विशा॥ ८.०२८.०३
यथा वशन्ति देवास्तथेदसत्तदेषां नकिरा मिनत्।
अरावा चन मर्त्यः॥ ८.०२८.०४
सप्तानां सप्त ऋष्टयः सप्त द्युम्नान्येषाम्।
सप्तो अधि श्रियो धिरे॥ ८.०२८.०५
बभ्रुरेको विषुणः सूनरो युवाञ्ज्यङ्क्ते हिरण्ययम्॥ ८.०२९.०१
योनिमेक आ ससाद द्योतनोऽन्तर्देवेषु मेधिरः॥ ८.०२९.०२
वाशीमेको बिभर्ति हस्त आयसीमन्तर्देवेषु निध्रुविः॥ ८.०२९.०३
वज्रमेको बिभर्ति हस्त आहितं तेन वृत्राणि जिघ्नते॥ ८.०२९.०४
तिग्ममेको बिभर्ति हस्त आयुधं शुचिरुग्रो जलाषभेषजः॥ ८.०२९.०५
पथ एकः पीपाय तस्करो यथाँ एष वेद निधीनाम्॥ ८.०२९.०६
त्रीण्येक उरुगायो वि चक्रमे यत्र देवासो मदन्ति॥ ८.०२९.०७
विभिर्द्वा चरत एकया सह प्र प्रवासेव वसतः॥ ८.०२९.०८
सदो द्वा चक्राते उपमा दिवि सम्राजा सर्पिरासुती॥ ८.०२९.०९
अर्चन्त एके महि साम मन्वत तेन सूर्यमरोचयन्॥ ८.०२९.१०
नहि वो अस्त्यर्भको देवासो न कुमारकः।
विश्वे सतोमहान्त इत्॥ ८.०३०.०१
इति स्तुतासो असथा रिशादसो ये स्थ त्रयश्च त्रिंशच्च।
मनोर्देवा यज्ञियासः॥ ८.०३०.०२
ते नस्त्राध्वं तेऽवत त उ नो अधि वोचत।
मा नः पथः पित्र्यान्मानवादधि दूरं नैष्ट परावतः॥ ८.०३०.०३
ये देवास इह स्थन विश्वे वैश्वानरा उत।
अस्मभ्यं शर्म सप्रथो गवेऽश्वाय यच्छत॥ ८.०३०.०४
यो यजाति यजात इत्सुनवच्च पचाति च।
ब्रह्मेदिन्द्रस्य चाकनत्॥ ८.०३१.०१
पुरोळाशं यो अस्मै सोमं ररत आशिरम्।
पादित्तं शक्रो अंहसः॥ ८.०३१.०२
तस्य द्युमाँ असद्रथो देवजूतः स शूशुवत्।
विश्वा वन्वन्नमित्रिया॥ ८.०३१.०३
अस्य प्रजावती गृहेऽसश्चन्ती दिवेदिवे।
इळा धेनुमती दुहे॥ ८.०३१.०४
या दम्पती समनसा सुनुत आ च धावतः।
देवासो नित्ययाशिरा॥ ८.०३१.०५
प्रति प्राशव्याँ इतः सम्यञ्चा बर्हिराशाते।
न ता वाजेषु वायतः॥ ८.०३१.०६
न देवानामपि ह्नुतः सुमतिं न जुगुक्षतः।
श्रवो बृहद्विवासतः॥ ८.०३१.०७
पुत्रिणा ता कुमारिणा विश्वमायुर्व्यश्नुतः।
उभा हिरण्यपेशसा॥ ८.०३१.०८
वीतिहोत्रा कृतद्वसू दशस्यन्तामृताय कम्।
समूधो रोमशं हतो देवेषु कृणुतो दुवः॥ ८.०३१.०९
आ शर्म पर्वतानां वृणीमहे नदीनाम्।
आ विष्णोः सचाभुवः॥ ८.०३१.१०
ऐतु पूषा रयिर्भगः स्वस्ति सर्वधातमः।
उरुरध्वा स्वस्तये॥ ८.०३१.११
अरमतिरनर्वणो विश्वो देवस्य मनसा।
आदित्यानामनेह इत्॥ ८.०३१.१२
यथा नो मित्रो अर्यमा वरुणः सन्ति गोपाः।
सुगा ऋतस्य पन्थाः॥ ८.०३१.१३
अग्निं वः पूर्व्यं गिरा देवमीळे वसूनाम्।
सपर्यन्तः पुरुप्रियं मित्रं न क्षेत्रसाधसम्॥ ८.०३१.१४
मक्षू देववतो रथः शूरो वा पृत्सु कासु चित्।
देवानां य इन्मनो यजमान इयक्षत्यभीदयज्वनो भुवत्॥ ८.०३१.१५
न यजमान रिष्यसि न सुन्वान न देवयो।
देवानां य इन्मनो यजमान इयक्षत्यभीदयज्वनो भुवत्॥ ८.०३१.१६
नकिष्टं कर्मणा नशन्न प्र योषन्न योषति।
देवानां य इन्मनो यजमान इयक्षत्यभीदयज्वनो भुवत्॥ ८.०३१.१७
असदत्र सुवीर्यमुत त्यदाश्वश्व्यम्।
देवानां य इन्मनो यजमान इयक्षत्यभीदयज्वनो भुवत्॥ ८.०३१.१८
प्र कृतान्यृजीषिणः कण्वा इन्द्रस्य गाथया।
मदे सोमस्य वोचत॥ ८.०३२.०१
यः सृबिन्दमनर्शनिं पिप्रुं दासमहीशुवम्।
वधीदुग्रो रिणन्नपः॥ ८.०३२.०२
न्यर्बुदस्य विष्टपं वर्ष्माणं बृहतस्तिर।
कृषे तदिन्द्र पौंस्यम्॥ ८.०३२.०३
प्रति श्रुताय वो धृषत्तूर्णाशं न गिरेरधि।
हुवे सुशिप्रमूतये॥ ८.०३२.०४
स गोरश्वस्य वि व्रजं मन्दानः सोम्येभ्यः।
पुरं न शूर दर्षसि॥ ८.०३२.०५
यदि मे रारणः सुत उक्थे वा दधसे चनः।
आरादुप स्वधा गहि॥ ८.०३२.०६
वयं घा ते अपि ष्मसि स्तोतार इन्द्र गिर्वणः।
त्वं नो जिन्व सोमपाः॥ ८.०३२.०७
उत नः पितुमा भर संरराणो अविक्षितम्।
मघवन्भूरि ते वसु॥ ८.०३२.०८
उत नो गोमतस्कृधि हिरण्यवतो अश्विनः।
इळाभिः सं रभेमहि॥ ८.०३२.०९
बृबदुक्थं हवामहे सृप्रकरस्नमूतये।
साधु कृण्वन्तमवसे॥ ८.०३२.१०
यः संस्थे चिच्छतक्रतुरादीं कृणोति वृत्रहा।
जरितृभ्यः पुरूवसुः॥ ८.०३२.११
स नः शक्रश्चिदा शकद्दानवाँ अन्तराभरः।
इन्द्रो विश्वाभिरूतिभिः॥ ८.०३२.१२
यो रायोऽवनिर्महान्सुपारः सुन्वतः सखा।
तमिन्द्रमभि गायत॥ ८.०३२.१३
आयन्तारं महि स्थिरं पृतनासु श्रवोजितम्।
भूरेरीशानमोजसा॥ ८.०३२.१४
नकिरस्य शचीनां नियन्ता सूनृतानाम्।
नकिर्वक्ता न दादिति॥ ८.०३२.१५
न नूनं ब्रह्मणामृणं प्राशूनामस्ति सुन्वताम्।
न सोमो अप्रता पपे॥ ८.०३२.१६
पन्य इदुप गायत पन्य उक्थानि शंसत।
ब्रह्मा कृणोत पन्य इत्॥ ८.०३२.१७
पन्य आ दर्दिरच्छता सहस्रा वाज्यवृतः।
इन्द्रो यो यज्वनो वृधः॥ ८.०३२.१८
वि षू चर स्वधा अनु कृष्टीनामन्वाहुवः।
इन्द्र पिब सुतानाम्॥ ८.०३२.१९
पिब स्वधैनवानामुत यस्तुग्र्ये सचा।
उतायमिन्द्र यस्तव॥ ८.०३२.२०
अतीहि मन्युषाविणं सुषुवांसमुपारणे।
इमं रातं सुतं पिब॥ ८.०३२.२१
इहि तिस्रः परावत इहि पञ्च जनाँ अति।
धेना इन्द्रावचाकशत्॥ ८.०३२.२२
सूर्यो रश्मिं यथा सृजा त्वा यच्छन्तु मे गिरः।
निम्नमापो न सध्र्यक्॥ ८.०३२.२३
अध्वर्यवा तु हि षिञ्च सोमं वीराय शिप्रिणे।
भरा सुतस्य पीतये॥ ८.०३२.२४
य उद्नः फलिगं भिनन्न्यक्सिन्धूँरवासृजत्।
यो गोषु पक्वं धारयत्॥ ८.०३२.२५
अहन्वृत्रमृचीषम और्णवाभमहीशुवम्।
हिमेनाविध्यदर्बुदम्॥ ८.०३२.२६
प्र व उग्राय निष्टुरेऽषाळ्हाय प्रसक्षिणे।
देवत्तं ब्रह्म गायत॥ ८.०३२.२७
यो विश्वान्यभि व्रता सोमस्य मदे अन्धसः।
इन्द्रो देवेषु चेतति॥ ८.०३२.२८
इह त्या सधमाद्या हरी हिरण्यकेश्या।
वोळ्हामभि प्रयो हितम्॥ ८.०३२.२९
अर्वाञ्चं त्वा पुरुष्टुत प्रियमेधस्तुता हरी।
सोमपेयाय वक्षतः॥ ८.०३२.३०
वयं घ त्वा सुतावन्त आपो न वृक्तबर्हिषः।
पवित्रस्य प्रस्रवणेषु वृत्रहन्परि स्तोतार आसते॥ ८.०३३.०१
स्वरन्ति त्वा सुते नरो वसो निरेक उक्थिनः।
कदा सुतं तृषाण ओक आ गम इन्द्र स्वब्दीव वंसगः॥ ८.०३३.०२
कण्वेभिर्धृष्णवा धृषद्वाजं दर्षि सहस्रिणम्।
पिशङ्गरूपं मघवन्विचर्षणे मक्षू गोमन्तमीमहे॥ ८.०३३.०३
पाहि गायान्धसो मद इन्द्राय मेध्यातिथे।
यः सम्मिश्लो हर्योर्यः सुते सचा वज्री रथो हिरण्ययः॥ ८.०३३.०४
यः सुषव्यः सुदक्षिण इनो यः सुक्रतुर्गृणे।
य आकरः सहस्रा यः शतामघ इन्द्रो यः पूर्भिदारितः॥ ८.०३३.०५
यो धृषितो योऽवृतो यो अस्ति श्मश्रुषु श्रितः।
विभूतद्युम्नश्च्यवनः पुरुष्टुतः क्रत्वा गौरिव शाकिनः॥ ८.०३३.०६
क ईं वेद सुते सचा पिबन्तं कद्वयो दधे।
अयं यः पुरो विभिनत्त्योजसा मन्दानः शिप्र्यन्धसः॥ ८.०३३.०७
दाना मृगो न वारणः पुरुत्रा चरथं दधे।
नकिष्ट्वा नि यमदा सुते गमो महाँश्चरस्योजसा॥ ८.०३३.०८
य उग्रः सन्ननिष्टृत स्थिरो रणाय संस्कृतः।
यदि स्तोतुर्मघवा शृणवद्धवं नेन्द्रो योषत्या गमत्॥ ८.०३३.०९
सत्यमित्था वृषेदसि वृषजूतिर्नोऽवृतः।
वृषा ह्युग्र शृण्विषे परावति वृषो अर्वावति श्रुतः॥ ८.०३३.१०
वृषणस्ते अभीशवो वृषा कशा हिरण्ययी।
वृषा रथो मघवन्वृषणा हरी वृषा त्वं शतक्रतो॥ ८.०३३.११
वृषा सोता सुनोतु ते वृषन्नृजीपिन्ना भर।
वृषा दधन्वे वृषणं नदीष्वा तुभ्यं स्थातर्हरीणाम्॥ ८.०३३.१२
एन्द्र याहि पीतये मधु शविष्ठ सोम्यम्।
नायमच्छा मघवा शृणवद्गिरो ब्रह्मोक्था च सुक्रतुः॥ ८.०३३.१३
वहन्तु त्वा रथेष्ठामा हरयो रथयुजः।
तिरश्चिदर्यं सवनानि वृत्रहन्नन्येषां या शतक्रतो॥ ८.०३३.१४
अस्माकमद्यान्तमं स्तोमं धिष्व महामह।
अस्माकं ते सवना सन्तु शंतमा मदाय द्युक्ष सोमपाः॥ ८.०३३.१५
नहि षस्तव नो मम शास्त्रे अन्यस्य रण्यति।
यो अस्मान्वीर आनयत्॥ ८.०३३.१६
इन्द्रश्चिद्घा तदब्रवीत्स्त्रिया अशास्यं मनः।
उतो अह क्रतुं रघुम्॥ ८.०३३.१७
सप्ती चिद्घा मदच्युता मिथुना वहतो रथम्।
एवेद्धूर्वृष्ण उत्तरा॥ ८.०३३.१८
अधः पश्यस्व मोपरि संतरां पादकौ हर।
मा ते कशप्लकौ दृशन्स्त्री हि ब्रह्मा बभूविथ॥ ८.०३३.१९
एन्द्र याहि हरिभिरुप कण्वस्य सुष्टुतिम्।
दिवो अमुष्य शासतो दिवं यय दिवावसो॥ ८.०३४.०१
आ त्वा ग्रावा वदन्निह सोमी घोषेण यच्छतु।
दिवो अमुष्य शासतो दिवं यय दिवावसो॥ ८.०३४.०२
अत्रा वि नेमिरेषामुरां न धूनुते वृकः।
दिवो अमुष्य शासतो दिवं यय दिवावसो॥ ८.०३४.०३
आ त्वा कण्वा इहावसे हवन्ते वाजसातये।
दिवो अमुष्य शासतो दिवं यय दिवावसो॥ ८.०३४.०४
दधामि ते सुतानां वृष्णे न पूर्वपाय्यम्।
दिवो अमुष्य शासतो दिवं यय दिवावसो॥ ८.०३४.०५
स्मत्पुरंधिर्न आ गहि विश्वतोधीर्न ऊतये।
दिवो अमुष्य शासतो दिवं यय दिवावसो॥ ८.०३४.०६
आ नो याहि महेमते सहस्रोते शतामघ।
दिवो अमुष्य शासतो दिवं यय दिवावसो॥ ८.०३४.०७
आ त्वा होता मनुर्हितो देवत्रा वक्षदीड्यः।
दिवो अमुष्य शासतो दिवं यय दिवावसो॥ ८.०३४.०८
आ त्वा मदच्युता हरी श्येनं पक्षेव वक्षतः।
दिवो अमुष्य शासतो दिवं यय दिवावसो॥ ८.०३४.०९
आ याह्यर्य आ परि स्वाहा सोमस्य पीतये।
दिवो अमुष्य शासतो दिवं यय दिवावसो॥ ८.०३४.१०
आ नो याह्युपश्रुत्युक्थेषु रणया इह।
दिवो अमुष्य शासतो दिवं यय दिवावसो॥ ८.०३४.११
सरूपैरा सु नो गहि सम्भृतैः सम्भृताश्वः।
दिवो अमुष्य शासतो दिवं यय दिवावसो॥ ८.०३४.१२
आ याहि पर्वतेभ्यः समुद्रस्याधि विष्टपः।
दिवो अमुष्य शासतो दिवं यय दिवावसो॥ ८.०३४.१३
आ नो गव्यान्यश्व्या सहस्रा शूर दर्दृहि।
दिवो अमुष्य शासतो दिवं यय दिवावसो॥ ८.०३४.१४
आ नः सहस्रशो भरायुतानि शतानि च।
दिवो अमुष्य शासतो दिवं यय दिवावसो॥ ८.०३४.१५
आ यदिन्द्रश्च दद्वहे सहस्रं वसुरोचिषः।
ओजिष्ठमश्व्यं पशुम्॥ ८.०३४.१६
य ऋज्रा वातरंहसोऽरुषासो रघुष्यदः।
भ्राजन्ते सूर्या इव॥ ८.०३४.१७
पारावतस्य रातिषु द्रवच्चक्रेष्वाशुषु।
तिष्ठं वनस्य मध्य आ॥ ८.०३४.१८
अग्निनेन्द्रेण वरुणेन विष्णुनादित्यै रुद्रैर्वसुभिः सचाभुवा।
सजोषसा उषसा सूर्येण च सोमं पिबतमश्विना॥ ८.०३५.०१
विश्वाभिर्धीभिर्भुवनेन वाजिना दिवा पृथिव्याद्रिभिः सचाभुवा।
सजोषसा उषसा सूर्येण च सोमं पिबतमश्विना॥ ८.०३५.०२
विश्वैर्देवैस्त्रिभिरेकादशैरिहाद्भिर्मरुद्भिर्भृगुभिः सचाभुवा।
सजोषसा उषसा सूर्येण च सोमं पिबतमश्विना॥ ८.०३५.०३
जुषेथां यज्ञं बोधतं हवस्य मे विश्वेह देवौ सवनाव गच्छतम्।
सजोषसा उषसा सूर्येण चेषं नो वोळ्हमश्विना॥ ८.०३५.०४
स्तोमं जुषेथां युवशेव कन्यनां विश्वेह देवौ सवनाव गच्छतम्।
सजोषसा उषसा सूर्येण चेषं नो वोळ्हमश्विना॥ ८.०३५.०५
गिरो जुषेथामध्वरं जुषेथां विश्वेह देवौ सवनाव गच्छतम्।
सजोषसा उषसा सूर्येण चेषं नो वोळ्हमश्विना॥ ८.०३५.०६
हारिद्रवेव पतथो वनेदुप सोमं सुतं महिषेवाव गच्छथः।
सजोषसा उषसा सूर्येण च त्रिर्वर्तिर्यातमश्विना॥ ८.०३५.०७
हंसाविव पतथो अध्वगाविव सोमं सुतं महिषेवाव गच्छथः।
सजोषसा उषसा सूर्येण च त्रिर्वर्तिर्यातमश्विना॥ ८.०३५.०८
श्येनाविव पतथो हव्यदातये सोमं सुतं महिषेवाव गच्छथः।
सजोषसा उषसा सूर्येण च त्रिर्वर्तिर्यातमश्विना॥ ८.०३५.०९
पिबतं च तृप्णुतं चा च गच्छतं प्रजां च धत्तं द्रविणं च धत्तम्।
सजोषसा उषसा सूर्येण चोर्जं नो धत्तमश्विना॥ ८.०३५.१०
जयतं च प्र स्तुतं च प्र चावतं प्रजां च धत्तं द्रविणं च धत्तम्।
सजोषसा उषसा सूर्येण चोर्जं नो धत्तमश्विना॥ ८.०३५.११
हतं च शत्रून्यततं च मित्रिणः प्रजां च धत्तं द्रविणं च धत्तम्।
सजोषसा उषसा सूर्येण चोर्जं नो धत्तमश्विना॥ ८.०३५.१२
मित्रावरुणवन्ता उत धर्मवन्ता मरुत्वन्ता जरितुर्गच्छथो हवम्।
सजोषसा उषसा सूर्येण चादित्यैर्यातमश्विना॥ ८.०३५.१३
अङ्गिरस्वन्ता उत विष्णुवन्ता मरुत्वन्ता जरितुर्गच्छथो हवम्।
सजोषसा उषसा सूर्येण चादित्यैर्यातमश्विना॥ ८.०३५.१४
ऋभुमन्ता वृषणा वाजवन्ता मरुत्वन्ता जरितुर्गच्छथो हवम्।
सजोषसा उषसा सूर्येण चादित्यैर्यातमश्विना॥ ८.०३५.१५
ब्रह्म जिन्वतमुत जिन्वतं धियो हतं रक्षांसि सेधतममीवाः।
सजोषसा उषसा सूर्येण च सोमं सुन्वतो अश्विना॥ ८.०३५.१६
क्षत्रं जिन्वतमुत जिन्वतं नॄन्हतं रक्षांसि सेधतममीवाः।
सजोषसा उषसा सूर्येण च सोमं सुन्वतो अश्विना॥ ८.०३५.१७
धेनूर्जिन्वतमुत जिन्वतं विशो हतं रक्षांसि सेधतममीवाः।
सजोषसा उषसा सूर्येण च सोमं सुन्वतो अश्विना॥ ८.०३५.१८
अत्रेरिव शृणुतं पूर्व्यस्तुतिं श्यावाश्वस्य सुन्वतो मदच्युता।
सजोषसा उषसा सूर्येण चाश्विना तिरोअह्न्यम्॥ ८.०३५.१९
सर्गाँ इव सृजतं सुष्टुतीरुप श्यावाश्वस्य सुन्वतो मदच्युता।
सजोषसा उषसा सूर्येण चाश्विना तिरोअह्न्यम्॥ ८.०३५.२०
रश्मीँरिव यच्छतमध्वराँ उप श्यावाश्वस्य सुन्वतो मदच्युता।
सजोषसा उषसा सूर्येण चाश्विना तिरोअह्न्यम्॥ ८.०३५.२१
अर्वाग्रथं नि यच्छतं पिबतं सोम्यं मधु।
आ यातमश्विना गतमवस्युर्वामहं हुवे धत्तं रत्नानि दाशुषे॥ ८.०३५.२२
नमोवाके प्रस्थिते अध्वरे नरा विवक्षणस्य पीतये।
आ यातमश्विना गतमवस्युर्वामहं हुवे धत्तं रत्नानि दाशुषे॥ ८.०३५.२३
स्वाहाकृतस्य तृम्पतं सुतस्य देवावन्धसः।
आ यातमश्विना गतमवस्युर्वामहं हुवे धत्तं रत्नानि दाशुषे॥ ८.०३५.२४
अवितासि सुन्वतो वृक्तबर्हिषः पिबा सोमं मदाय कं शतक्रतो।
यं ते भागमधारयन्विश्वाः सेहानः पृतना उरु ज्रयः समप्सुजिन्मरुत्वाँ इन्द्र सत्पते॥ ८.०३६.०१
प्राव स्तोतारं मघवन्नव त्वां पिबा सोमं मदाय कं शतक्रतो।
यं ते भागमधारयन्विश्वाः सेहानः पृतना उरु ज्रयः समप्सुजिन्मरुत्वाँ इन्द्र सत्पते॥ ८.०३६.०२
ऊर्जा देवाँ अवस्योजसा त्वां पिबा सोमं मदाय कं शतक्रतो।
यं ते भागमधारयन्विश्वाः सेहानः पृतना उरु ज्रयः समप्सुजिन्मरुत्वाँ इन्द्र सत्पते॥ ८.०३६.०३
जनिता दिवो जनिता पृथिव्याः पिबा सोमं मदाय कं शतक्रतो।
यं ते भागमधारयन्विश्वाः सेहानः पृतना उरु ज्रयः समप्सुजिन्मरुत्वाँ इन्द्र सत्पते॥ ८.०३६.०४
जनिताश्वानां जनिता गवामसि पिबा सोमं मदाय कं शतक्रतो।
यं ते भागमधारयन्विश्वाः सेहानः पृतना उरु ज्रयः समप्सुजिन्मरुत्वाँ इन्द्र सत्पते॥ ८.०३६.०५
अत्रीणां स्तोममद्रिवो महस्कृधि पिबा सोमं मदाय कं शतक्रतो।
यं ते भागमधारयन्विश्वाः सेहानः पृतना उरु ज्रयः समप्सुजिन्मरुत्वाँ इन्द्र सत्पते॥ ८.०३६.०६
श्यावाश्वस्य सुन्वतस्तथा शृणु यथाशृणोरत्रेः कर्माणि कृण्वतः।
प्र त्रसदस्युमाविथ त्वमेक इन्नृषाह्य इन्द्र ब्रह्माणि वर्धयन्॥ ८.०३६.०७
प्रेदं ब्रह्म वृत्रतूर्येष्वाविथ प्र सुन्वतः शचीपत इन्द्र विश्वाभिरूतिभिः।
माध्यंदिनस्य सवनस्य वृत्रहन्ननेद्य पिबा सोमस्य वज्रिवः॥ ८.०३७.०१
सेहान उग्र पृतना अभि द्रुहः शचीपत इन्द्र विश्वाभिरूतिभिः।
माध्यंदिनस्य सवनस्य वृत्रहन्ननेद्य पिबा सोमस्य वज्रिवः॥ ८.०३७.०२
एकराळस्य भुवनस्य राजसि शचीपत इन्द्र विश्वाभिरूतिभिः।
माध्यंदिनस्य सवनस्य वृत्रहन्ननेद्य पिबा सोमस्य वज्रिवः॥ ८.०३७.०३
सस्थावाना यवयसि त्वमेक इच्छचीपत इन्द्र विश्वाभिरूतिभिः।
माध्यंदिनस्य सवनस्य वृत्रहन्ननेद्य पिबा सोमस्य वज्रिवः॥ ८.०३७.०४
क्षेमस्य च प्रयुजश्च त्वमीशिषे शचीपत इन्द्र विश्वाभिरूतिभिः।
माध्यंदिनस्य सवनस्य वृत्रहन्ननेद्य पिबा सोमस्य वज्रिवः॥ ८.०३७.०५
क्षत्राय त्वमवसि न त्वमाविथ शचीपत इन्द्र विश्वाभिरूतिभिः।
माध्यंदिनस्य सवनस्य वृत्रहन्ननेद्य पिबा सोमस्य वज्रिवः॥ ८.०३७.०६
श्यावाश्वस्य रेभतस्तथा शृणु यथाशृणोरत्रेः कर्माणि कृण्वतः।
प्र त्रसदस्युमाविथ त्वमेक इन्नृषाह्य इन्द्र क्षत्राणि वर्धयन्॥ ८.०३७.०७
यज्ञस्य हि स्थ ऋत्विजा सस्नी वाजेषु कर्मसु।
इन्द्राग्नी तस्य बोधतम्॥ ८.०३८.०१
तोशासा रथयावाना वृत्रहणापराजिता।
इन्द्राग्नी तस्य बोधतम्॥ ८.०३८.०२
इदं वां मदिरं मध्वधुक्षन्नद्रिभिर्नरः।
इन्द्राग्नी तस्य बोधतम्॥ ८.०३८.०३
जुषेथां यज्ञमिष्टये सुतं सोमं सधस्तुती।
इन्द्राग्नी आ गतं नरा॥ ८.०३८.०४
इमा जुषेथां सवना येभिर्हव्यान्यूहथुः।
इन्द्राग्नी आ गतं नरा॥ ८.०३८.०५
इमां गायत्रवर्तनिं जुषेथां सुष्टुतिं मम।
इन्द्राग्नी आ गतं नरा॥ ८.०३८.०६
प्रातर्यावभिरा गतं देवेभिर्जेन्यावसू।
इन्द्राग्नी सोमपीतये॥ ८.०३८.०७
श्यावाश्वस्य सुन्वतोऽत्रीणां शृणुतं हवम्।
इन्द्राग्नी सोमपीतये॥ ८.०३८.०८
एवा वामह्व ऊतये यथाहुवन्त मेधिराः।
इन्द्राग्नी सोमपीतये॥ ८.०३८.०९
आहं सरस्वतीवतोरिन्द्राग्न्योरवो वृणे।
याभ्यां गायत्रमृच्यते॥ ८.०३८.१०
अग्निमस्तोष्यृग्मियमग्निमीळा यजध्यै।
अग्निर्देवाँ अनक्तु न उभे हि विदथे कविरन्तश्चरति दूत्यं नभन्तामन्यके समे॥ ८.०३९.०१
न्यग्ने नव्यसा वचस्तनूषु शंसमेषाम्।
न्यराती रराव्णां विश्वा अर्यो अरातीरितो युच्छन्त्वामुरो नभन्तामन्यके समे॥ ८.०३९.०२
अग्ने मन्मानि तुभ्यं कं घृतं न जुह्व आसनि।
स देवेषु प्र चिकिद्धि त्वं ह्यसि पूर्व्यः शिवो दूतो विवस्वतो नभन्तामन्यके समे॥ ८.०३९.०३
तत्तदग्निर्वयो दधे यथायथा कृपण्यति।
ऊर्जाहुतिर्वसूनां शं च योश्च मयो दधे विश्वस्यै देवहूत्यै नभन्तामन्यके समे॥ ८.०३९.०४
स चिकेत सहीयसाग्निश्चित्रेण कर्मणा।
स होता शश्वतीनां दक्षिणाभिरभीवृत इनोति च प्रतीव्यं नभन्तामन्यके समे॥ ८.०३९.०५
अग्निर्जाता देवानामग्निर्वेद मर्तानामपीच्यम्।
अग्निः स द्रविणोदा अग्निर्द्वारा व्यूर्णुते स्वाहुतो नवीयसा नभन्तामन्यके समे॥ ८.०३९.०६
अग्निर्देवेषु संवसुः स विक्षु यज्ञियास्वा।
स मुदा काव्या पुरु विश्वं भूमेव पुष्यति देवो देवेषु यज्ञियो नभन्तामन्यके समे॥ ८.०३९.०७
यो अग्निः सप्तमानुषः श्रितो विश्वेषु सिन्धुषु।
तमागन्म त्रिपस्त्यं मन्धातुर्दस्युहन्तममग्निं यज्ञेषु पूर्व्यं नभन्तामन्यके समे॥ ८.०३९.०८
अग्निस्त्रीणि त्रिधातून्या क्षेति विदथा कविः।
स त्रीँरेकादशाँ इह यक्षच्च पिप्रयच्च नो विप्रो दूतः परिष्कृतो नभन्तामन्यके समे॥ ८.०३९.०९
त्वं नो अग्न आयुषु त्वं देवेषु पूर्व्य वस्व एक इरज्यसि।
त्वामापः परिस्रुतः परि यन्ति स्वसेतवो नभन्तामन्यके समे॥ ८.०३९.१०
इन्द्राग्नी युवं सु नः सहन्ता दासथो रयिम्।
येन दृळ्हा समत्स्वा वीळु चित्साहिषीमह्यग्निर्वनेव वात इन्नभन्तामन्यके समे॥ ८.०४०.०१
नहि वां वव्रयामहेऽथेन्द्रमिद्यजामहे शविष्ठं नृणां नरम्।
स नः कदा चिदर्वता गमदा वाजसातये गमदा मेधसातये नभन्तामन्यके समे॥ ८.०४०.०२
ता हि मध्यं भराणामिन्द्राग्नी अधिक्षितः।
ता उ कवित्वना कवी पृच्छ्यमाना सखीयते सं धीतमश्नुतं नरा नभन्तामन्यके समे॥ ८.०४०.०३
अभ्यर्च नभाकवदिन्द्राग्नी यजसा गिरा।
ययोर्विश्वमिदं जगदियं द्यौः पृथिवी मह्युपस्थे बिभृतो वसु नभन्तामन्यके समे॥ ८.०४०.०४
प्र ब्रह्माणि नभाकवदिन्द्राग्निभ्यामिरज्यत।
या सप्तबुध्नमर्णवं जिह्मबारमपोर्णुत इन्द्र ईशान ओजसा नभन्तामन्यके समे॥ ८.०४०.०५
अपि वृश्च पुराणवद्व्रततेरिव गुष्पितमोजो दासस्य दम्भय।
वयं तदस्य सम्भृतं वस्विन्द्रेण वि भजेमहि नभन्तामन्यके समे॥ ८.०४०.०६
यदिन्द्राग्नी जना इमे विह्वयन्ते तना गिरा।
अस्माकेभिर्नृभिर्वयं सासह्याम पृतन्यतो वनुयाम वनुष्यतो नभन्तामन्यके समे॥ ८.०४०.०७
या नु श्वेताववो दिव उच्चरात उप द्युभिः।
इन्द्राग्न्योरनु व्रतमुहाना यन्ति सिन्धवो यान्सीं बन्धादमुञ्चतां नभन्तामन्यके समे॥ ८.०४०.०८
पूर्वीष्ट इन्द्रोपमातयः पूर्वीरुत प्रशस्तयः सूनो हिन्वस्य हरिवः।
वस्वो वीरस्यापृचो या नु साधन्त नो धियो नभन्तामन्यके समे॥ ८.०४०.०९
तं शिशीता सुवृक्तिभिस्त्वेषं सत्वानमृग्मियम्।
उतो नु चिद्य ओजसा शुष्णस्याण्डानि भेदति जेषत्स्वर्वतीरपो नभन्तामन्यके समे॥ ८.०४०.१०
तं शिशीता स्वध्वरं सत्यं सत्वानमृत्वियम्।
उतो नु चिद्य ओहत आण्डा शुष्णस्य भेदत्यजैः स्वर्वतीरपो नभन्तामन्यके समे॥ ८.०४०.११
एवेन्द्राग्निभ्यां पितृवन्नवीयो मन्धातृवदङ्गिरस्वदवाचि।
त्रिधातुना शर्मणा पातमस्मान्वयं स्याम पतयो रयीणाम्॥ ८.०४०.१२
अस्मा ऊ षु प्रभूतये वरुणाय मरुद्भ्योऽर्चा विदुष्टरेभ्यः।
यो धीता मानुषाणां पश्वो गा इव रक्षति नभन्तामन्यके समे॥ ८.०४१.०१
तमू षु समना गिरा पितॄणां च मन्मभिः।
नाभाकस्य प्रशस्तिभिर्यः सिन्धूनामुपोदये सप्तस्वसा स मध्यमो नभन्तामन्यके समे॥ ८.०४१.०२
स क्षपः परि षस्वजे न्युस्रो मायया दधे स विश्वं परि दर्शतः।
तस्य वेनीरनु व्रतमुषस्तिस्रो अवर्धयन्नभन्तामन्यके समे॥ ८.०४१.०३
यः ककुभो निधारयः पृथिव्यामधि दर्शतः।
स माता पूर्व्यं पदं तद्वरुणस्य सप्त्यं स हि गोपा इवेर्यो नभन्तामन्यके समे॥ ८.०४१.०४
यो धर्ता भुवनानां य उस्राणामपीच्या वेद नामानि गुह्या।
स कविः काव्या पुरु रूपं द्यौरिव पुष्यति नभन्तामन्यके समे॥ ८.०४१.०५
यस्मिन्विश्वानि काव्या चक्रे नाभिरिव श्रिता।
त्रितं जूती सपर्यत व्रजे गावो न संयुजे युजे अश्वाँ अयुक्षत नभन्तामन्यके समे॥ ८.०४१.०६
य आस्वत्क आशये विश्वा जातान्येषाम्।
परि धामानि मर्मृशद्वरुणस्य पुरो गये विश्वे देवा अनु व्रतं नभन्तामन्यके समे॥ ८.०४१.०७
स समुद्रो अपीच्यस्तुरो द्यामिव रोहति नि यदासु यजुर्दधे।
स माया अर्चिना पदास्तृणान्नाकमारुहन्नभन्तामन्यके समे॥ ८.०४१.०८
यस्य श्वेता विचक्षणा तिस्रो भूमीरधिक्षितः।
त्रिरुत्तराणि पप्रतुर्वरुणस्य ध्रुवं सदः स सप्तानामिरज्यति नभन्तामन्यके समे॥ ८.०४१.०९
यः श्वेताँ अधिनिर्णिजश्चक्रे कृष्णाँ अनु व्रता।
स धाम पूर्व्यं ममे य स्कम्भेन वि रोदसी अजो न द्यामधारयन्नभन्तामन्यके समे॥ ८.०४१.१०
अस्तभ्नाद्द्यामसुरो विश्ववेदा अमिमीत वरिमाणं पृथिव्याः।
आसीदद्विश्वा भुवनानि सम्राड्विश्वेत्तानि वरुणस्य व्रतानि॥ ८.०४२.०१
एवा वन्दस्व वरुणं बृहन्तं नमस्या धीरममृतस्य गोपाम्।
स नः शर्म त्रिवरूथं वि यंसत्पातं नो द्यावापृथिवी उपस्थे॥ ८.०४२.०२
इमां धियं शिक्षमाणस्य देव क्रतुं दक्षं वरुण सं शिशाधि।
ययाति विश्वा दुरिता तरेम सुतर्माणमधि नावं रुहेम॥ ८.०४२.०३
आ वां ग्रावाणो अश्विना धीभिर्विप्रा अचुच्यवुः।
नासत्या सोमपीतये नभन्तामन्यके समे॥ ८.०४२.०४
यथा वामत्रिरश्विना गीर्भिर्विप्रो अजोहवीत्।
नासत्या सोमपीतये नभन्तामन्यके समे॥ ८.०४२.०५
एवा वामह्व ऊतये यथाहुवन्त मेधिराः।
नासत्या सोमपीतये नभन्तामन्यके समे॥ ८.०४२.०६
इमे विप्रस्य वेधसोऽग्नेरस्तृतयज्वनः।
गिर स्तोमास ईरते॥ ८.०४३.०१
अस्मै ते प्रतिहर्यते जातवेदो विचर्षणे।
अग्ने जनामि सुष्टुतिम्॥ ८.०४३.०२
आरोका इव घेदह तिग्मा अग्ने तव त्विषः।
दद्भिर्वनानि बप्सति॥ ८.०४३.०३
हरयो धूमकेतवो वातजूता उप द्यवि।
यतन्ते वृथगग्नयः॥ ८.०४३.०४
एते त्ये वृथगग्नय इद्धासः समदृक्षत।
उषसामिव केतवः॥ ८.०४३.०५
कृष्णा रजांसि पत्सुतः प्रयाणे जातवेदसः।
अग्निर्यद्रोधति क्षमि॥ ८.०४३.०६
धासिं कृण्वान ओषधीर्बप्सदग्निर्न वायति।
पुनर्यन्तरुणीरपि॥ ८.०४३.०७
जिह्वाभिरह नन्नमदर्चिषा जञ्जणाभवन्।
अग्निर्वनेषु रोचते॥ ८.०४३.०८
अप्स्वग्ने सधिष्टव सौषधीरनु रुध्यसे।
गर्भे सञ्जायसे पुनः॥ ८.०४३.०९
उदग्ने तव तद्घृतादर्ची रोचत आहुतम्।
निंसानं जुह्वो मुखे॥ ८.०४३.१०
उक्षान्नाय वशान्नाय सोमपृष्ठाय वेधसे।
स्तोमैर्विधेमाग्नये॥ ८.०४३.११
उत त्वा नमसा वयं होतर्वरेण्यक्रतो।
अग्ने समिद्भिरीमहे॥ ८.०४३.१२
उत त्वा भृगुवच्छुचे मनुष्वदग्न आहुत।
अङ्गिरस्वद्धवामहे॥ ८.०४३.१३
त्वं ह्यग्ने अग्निना विप्रो विप्रेण सन्सता।
सखा सख्या समिध्यसे॥ ८.०४३.१४
स त्वं विप्राय दाशुषे रयिं देहि सहस्रिणम्।
अग्ने वीरवतीमिषम्॥ ८.०४३.१५
अग्ने भ्रातः सहस्कृत रोहिदश्व शुचिव्रत।
इमं स्तोमं जुषस्व मे॥ ८.०४३.१६
उत त्वाग्ने मम स्तुतो वाश्राय प्रतिहर्यते।
गोष्ठं गाव इवाशत॥ ८.०४३.१७
तुभ्यं ता अङ्गिरस्तम विश्वाः सुक्षितयः पृथक्।
अग्ने कामाय येमिरे॥ ८.०४३.१८
अग्निं धीभिर्मनीषिणो मेधिरासो विपश्चितः।
अद्मसद्याय हिन्विरे॥ ८.०४३.१९
तं त्वामज्मेषु वाजिनं तन्वाना अग्ने अध्वरम्।
वह्निं होतारमीळते॥ ८.०४३.२०
पुरुत्रा हि सदृङ्ङसि विशो विश्वा अनु प्रभुः।
समत्सु त्वा हवामहे॥ ८.०४३.२१
तमीळिष्व य आहुतोऽग्निर्विभ्राजते घृतैः।
इमं नः शृणवद्धवम्॥ ८.०४३.२२
तं त्वा वयं हवामहे शृण्वन्तं जातवेदसम्।
अग्ने घ्नन्तमप द्विषः॥ ८.०४३.२३
विशां राजानमद्भुतमध्यक्षं धर्मणामिमम्।
अग्निमीळे स उ श्रवत्॥ ८.०४३.२४
अग्निं विश्वायुवेपसं मर्यं न वाजिनं हितम्।
सप्तिं न वाजयामसि॥ ८.०४३.२५
घ्नन्मृध्राण्यप द्विषो दहन्रक्षांसि विश्वहा।
अग्ने तिग्मेन दीदिहि॥ ८.०४३.२६
यं त्वा जनास इन्धते मनुष्वदङ्गिरस्तम।
अग्ने स बोधि मे वचः॥ ८.०४३.२७
यदग्ने दिविजा अस्यप्सुजा वा सहस्कृत।
तं त्वा गीर्भिर्हवामहे॥ ८.०४३.२८
तुभ्यं घेत्ते जना इमे विश्वाः सुक्षितयः पृथक्।
धासिं हिन्वन्त्यत्तवे॥ ८.०४३.२९
ते घेदग्ने स्वाध्योऽहा विश्वा नृचक्षसः।
तरन्तः स्याम दुर्गहा॥ ८.०४३.३०
अग्निं मन्द्रं पुरुप्रियं शीरं पावकशोचिषम्।
हृद्भिर्मन्द्रेभिरीमहे॥ ८.०४३.३१
स त्वमग्ने विभावसुः सृजन्सूर्यो न रश्मिभिः।
शर्धन्तमांसि जिघ्नसे॥ ८.०४३.३२
तत्ते सहस्व ईमहे दात्रं यन्नोपदस्यति।
त्वदग्ने वार्यं वसु॥ ८.०४३.३३
समिधाग्निं दुवस्यत घृतैर्बोधयतातिथिम्।
आस्मिन्हव्या जुहोतन॥ ८.०४४.०१
अग्ने स्तोमं जुषस्व मे वर्धस्वानेन मन्मना।
प्रति सूक्तानि हर्य नः॥ ८.०४४.०२
अग्निं दूतं पुरो दधे हव्यवाहमुप ब्रुवे।
देवाँ आ सादयादिह॥ ८.०४४.०३
उत्ते बृहन्तो अर्चयः समिधानस्य दीदिवः।
अग्ने शुक्रास ईरते॥ ८.०४४.०४
उप त्वा जुह्वो मम घृताचीर्यन्तु हर्यत।
अग्ने हव्या जुषस्व नः॥ ८.०४४.०५
मन्द्रं होतारमृत्विजं चित्रभानुं विभावसुम्।
अग्निमीळे स उ श्रवत्॥ ८.०४४.०६
प्रत्नं होतारमीड्यं जुष्टमग्निं कविक्रतुम्।
अध्वराणामभिश्रियम्॥ ८.०४४.०७
जुषाणो अङ्गिरस्तमेमा हव्यान्यानुषक्।
अग्ने यज्ञं नय ऋतुथा॥ ८.०४४.०८
समिधान उ सन्त्य शुक्रशोच इहा वह।
चिकित्वान्दैव्यं जनम्॥ ८.०४४.०९
विप्रं होतारमद्रुहं धूमकेतुं विभावसुम्।
यज्ञानां केतुमीमहे॥ ८.०४४.१०
अग्ने नि पाहि नस्त्वं प्रति ष्म देव रीषतः।
भिन्धि द्वेषः सहस्कृत॥ ८.०४४.११
अग्निः प्रत्नेन मन्मना शुम्भानस्तन्वं स्वाम्।
कविर्विप्रेण वावृधे॥ ८.०४४.१२
ऊर्जो नपातमा हुवेऽग्निं पावकशोचिषम्।
अस्मिन्यज्ञे स्वध्वरे॥ ८.०४४.१३
स नो मित्रमहस्त्वमग्ने शुक्रेण शोचिषा।
देवैरा सत्सि बर्हिषि॥ ८