Vraja Gitih

 व्रजगीतिः 
कलि-कल्मष-पुञ्ज विनाशकरं
बहु जन्म पवित्र प्रकाशकरम् ।
व्रज, सद्व्रज मञ्जु निकुञ्ज गृहं
यदि चेच्छसि जन्म निजं सफलम् ॥ १॥

          रस-रास-विलास परं रमणं
          सुखदं जन-तापहरं विमलम् ।
          व्रज शेष-महेश-मुनीन्द्रनुतं
          यदि चेच्छसि जन्म निजं सफलम् ॥ २॥

तुलसीदल-गन्ध-धृतं निखिलं
व्रजराज कुलार्चित-धेनुभरम् ।
व्रज कंस निषूदन-पुण्यवनं
यदि चेच्छसि जन्म निजं सफलम् ॥ ३॥

          यमराज पितुस्तनया यमुना
          सुविराजति यत्र मनः कमना ।
          व्रज, नित्यकिशोर-कथा-कलितं
          यदि चेच्छसि जन्म निजं सफलम् ॥ ४॥

मुरली निनदैर्गृहमध्यलसत्
तरुणीजन-विस्मृत-देहदशम् ।
व्रज, रास रसेश्वर-रासगृहं
यदि चेच्छसि जन्म निजं सफलम् ॥ ५॥

          ``हरिनाम'' वचोऽमृतपानपरैः
          शुक-हंस-मयूर-खगैश्च युतम् ।
          व्रज, कृष्ण परायण भूमितलं
          यदि चेच्छसि जन्म निजं सफलम् ॥ ६॥

व्रजवल्लभ-कीर्तन-धन्य-धरं
सफलं भवति व्रजपुण्यचयम् ।
व्रज, केशव-केलि-कलाप-कलं
यदि चेच्छसि जन्म निजं सफलम् ॥ ७॥

          बदरीवनमत्र कुशस्थलकं
          जगदीशपुरी शिवधामपरम् ।
          व्रज, धाम चतुष्टय पूर्तिकरं
          यदि चेच्छसि जन्म निजं सफलम् ॥ ८॥

इति वासुदेवकृष्णचतुर्वेदी विरचिता व्रजगीतिः समाप्ता ।


Encoded and proofread by Deepakshi Kumar