% Text title : tIrthamAhAtmyaM Kurmapurana 34-42 Importance of Places of Pilgrimage % File name : tIrthamAhAtmyamkUrmapurANe.itx % Category : misc % Location : doc\_z\_misc\_general % Transliterated by : sa.wikisource.org % Proofread by : PSA Easwaran % Description-comments : kUrmapurANa uttarabhAga adhyAya 34-42 % Latest update : August 6, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. tIrthamAhAtmyaM Kurmapurana 34-42 Importance of Places of Pilgrimage ..}## \itxtitle{.. tIrthamAhAtmyaM kUrmapurANe adhyAyAH 34\-42 ..}##\endtitles ## \section{34} kUrmapurANe uttarabhAge chatustriMshattamo.adhyAyaH vyAsa uvAcha | manuShyANAM tu haraNaM kR^itvA strINAM gR^ihasya cha | vApIkUpajalAnAM cha shudhyechchAndrAyaNena tu || 34\.1|| dravyANAmalpasArANAM steyaM kR^itvA.anyaveshmanaH | charet sAntapanaM kR^ichChraM tanniryAtyAtmashuddhaye || 34\.2|| dhAnyAnnadhanachauryaM tu kR^itvA kAmAddvijottamaH | svajAtIyagR^ihAdeva kR^ichChrArddhena vishud.hdhyati || 34\.3|| bhakShyabhojyopaharaNe yAnashayyAsanasya cha | puShpamUlaphalAnAM cha pa~nchagavyaM vishodhanam || 34\.4|| tR^iNakAShThadrumANAM cha shuShkAnnasya guDasya cha | chailacharmAmiShANAM cha trirAtraM syAdabhojanam || 34\.5|| maNimuktApravAlAnAM tAmrasya rajatasya cha | ayaHkAntopalAnAM cha dvAdashAhaM kANAshanam || 34\.6|| kArpAsakITajIrNAnAM dvishaphaikashaphasya cha | puShpagandhauShadhInAM cha pibechchaiva tryahaM payaH || 34\.7|| naramAMsAshanaM kR^itvA chAndrAyaNamathAcharet | kAkaM chaiva tathA shvAnaM jagdhvA hastinameva cha || 34\.8|| varAhaM kukkuTaM chAtha taptakR^ichChreNa shudhyati | kravyAdAnAM cha mAMsAni purIShaM mUtrameva cha || 34\.9|| gogomAyukapInAM cha tadeva vratamAcharet | shishumAraM tathAchAShaM matsyamAMsaM tathaiva cha || 34\.10|| upoShya dvAdashAhaM tu kUShmANDairjuhuyAdghR^itam | nakulolUkamArjAraM jagdhvA sAntapanaM charet || 34\.11|| shvApadoShTrakharA~njagdhvA taptakR^ichChreNa shud.hdhyati | vratavachchaiva saMskAraM pUrveNa vidhinaiva tu || 34\.12|| bakaM chaiva balAkA~ncha haMsaM kAraNDavaM tathA | chakravAkapalaM jagghvA dvAdashAhamabhojanam || 34\.13|| kapotaM TiTTibhA~nchaiva shukaM sArasameva cha | ulUkaM jAlapAdaM cha jagdhvA.apyetadvrataM charet || 34\.14|| shishumAraM tathA chAShaM matsyamAMsaM tathaiva cha | jagdhvA chaiva kaTAhArametadeva charedvratam || 34\.15|| kokilaM chaiva matsyAMshcha maNDUkaM bhujagaM tathA | gomUtrayAvakAhAro mAsenaikena shud.hdhyati || 34\.16|| jalecharAMshcha jalajAn praNudAnathaviShkirAn | raktapAdAMstathA jagdhvA saptAhaM chaitadAcharet || 34\.17|| shuno mAMsaM shuShkamAMsamAtmArthaM cha tathA kR^itam | bhuktvA mAsaM charedetat tatpApasyApanuttaye || 34\.18|| vR^intAkaM bhustR^iNaM shigruM kubhANDaM karakaM tathA | prAjApatyaM charejjagdhvA khaDgaM kumbhIkameva cha || 34\.19|| palANDuM lashunaM chaiva bhuktvA chAndrAyaNaM charet | nAlikAM taNDulIyaM cha prAjApatyena shud.hdhyati || 34\.20|| ashmAntakaM tathA potaM taptakR^ichChreNa shud.hdhyati | prAjApatyena shuddhiH syAt kusumbhasya cha bhakShaNe || 34\.21|| alAbu kiMshukaM chaiva bhuktvA chaitadvrataM charet | udumbaraM cha kAmena taptakR^ichChreNa shud.hdhyati || vR^ithA kR^isarasaMyAvaM pAyasApUpasa~Nkulam | bhuktvA chaivaM vidhaM tvannaM trirAtreNa vishud.hdhyati || pItvA kShIrANyapeyAni brahmachArI samAhitaH | gomUtrayAvakAhAro mAsenaikena shud.hdhyati || anirdashAhaM gokShIraM mAhiShaM chAjameva cha | sandhinyAshcha vivatsAyAH piban kShIramidaM charet | eteShAM cha vikArANi pItvA mohena vA punaH || 34\.22|| gomUtrayAvakAhAraH saptarAtreNa shud.hdhyati | bhuktvA chaiva navashrAddhe mR^itake sUtake tathA || 34\.23|| chAndrAyaNena shud.hdhyeta brAhmaNastu samAhitaH | yasyAgnau hUyate nityamannasyAgraM na dIyate || 34\.24|| chAndrAyaNaM charet samyak tasyAnnaprAshane dvijaH | abhojyAnAM tu sarveShAM bhuktvA chAnnamupaskR^itam || 34\.25|| antAvasAyinAM chaiva taptakR^ichChreNa shud.hdhyati || chANDAlAnnaM dvijo bhuktvA samyak chAndrAyaNaM charet || 34\.26|| buddhipUrvaM tu kR^ichChrAbdaM punaH saMskArameva cha | asurAmadyapAnena kuryAchchAndrAyaNavratam || 34\.27|| abhojyAnnaM tu bhuktvA cha prAjApatyena shud.hdhyati | viNmUtraprAshanaM kR^itvA retasashchaitadAcharet || 34\.28|| anAdiShTeShu chaikAhaM sarvatra tu yathArthataH | viDvarAhakharoShTrANAM gomAyoH kapikAkayoH || 34\.29|| prAshya mUtrapurIShANi dvijashchAndrAyaNaM charet | aj~nAnAt prAshya viNmUtraM surAsaMspR^iShTameva cha || 34\.30|| punaH saMskAramarhanti trayo varNA dvijAtayaH | kravyAdAM pakShiNAM chaiva prAshya mUtrapurIShakam || 34\.31|| mahAsAntapanaM mohAt tathA kuryAddvijottamaH | bhAsamaNDUkakurare viShkire kR^ichChramAcharet || 34\.32|| prAjApatyena shud.hdhyeta brAhmaNochChiShTabhojane | kShatriye taptakR^ichChraM syAdvaishye chaivAtikR^ichChrakam || 34\.33|| shUdrochChiShTaM dvijo bhuktvA kuryAchchAndrAyaNavratam | surAbhANDodare vAri pItvA chAndrAyaNaM charet || 34\.34|| samuchChiShTaM dvijo bhuktvA trirAtreNa vishud.hdhyati | gomUtrayAvakAhAraH pItasheShaM cha vA gavAm || 34\.35|| apo mUtrapurIShAdyairdUShitAH prAshayedyadA | tadA sAntapanaM proktaM vrataM pApavishodhanam || 34\.36|| chANDAlakUpabhANDeShu yadi j~nAnAt pibejjalam | charet sAntapanaM kR^ichChraM brAhmaNaH pApashodhanam || 34\.37|| chANDAlena tu saMspR^iShTaM pItvA vAri dvijottamaH | trirAtreNa vishud.hdhyeta pa~nchagavyena chaiva hi || 34\.38|| mahApAtakisaMsparshe bhuktvA snAtvA dvijo yadi | buddhipUrvaM tu mUDhAtmA taptakR^ichChraM samAcharet || 34\.39|| spR^iShTvA mahApAtakinaM chANDAlaM vA rajasvalAm | pramAdAdbhojanaM kR^itvA trirAtreNa vishud.hdhyati || 34\.40|| snAnArho yadi bhu~njIta ahorAtreNa shud.hdhyati | buddhipUrvaM tu kR^ichChreNa bhagavAnAha padmajaH || 34\.41|| shuShkaparyuShitAdIni gavAdipratidUShitAH | bhuktvopavAsaM kurvIta kR^ichChrapAdamathApi vA || 34\.42|| saMvatsarAnte kR^ichChraM tu charedvipraH punaH punaH | aj~nAtabhuktashud.hdhyarthaM j~nAtasya tu visheShataH || 34\.43|| vrAtyAnAM yajanaM kR^itvA pareShAmantyakarma cha | abhichAramahInaM cha tribhiH kR^ichChrairvishud.hdhyati || 34\.44|| brAhmaNAdihatAnAM tu kR^itvA dAhAdikAH kriyAH | gomUtrayAvakAhAraH prAjApatyena shud.hdhyati || 34\.45|| tailAbhyakto.athavA kuryAdyadi mUtrapurIShake | ahorAtreNa shud.hdhyeta shmashrukarmANi maithune || 34\.46|| ekAhena vihAyAgniM parihArya dvijottamaH | trirAtreNa vishad.hdhyeta trirAtrAt ShaDahaM punaH || 34\.47|| dashAhaM dvAdashAhaM vA parihArya pramAdataH | kR^ichChraM chAndrAyaNaM kuryAt tatpApasyApanuttaye || 34\.48|| patitAddravyamAdAya tadutsargeNa shud.hdhyati | charet sAntapanaM kR^ichChramityAha bhagavAn manuH || 34\.49|| anAshakAnnivR^ittAstu pravrajyAvasitAstathA | chareyustrINi kR^ichChrANi trINi chAndrAyaNAni cha || 34\.50|| punashcha jAtakarmAdisaMskAraiH saMskR^itA dvijAH | shud.hdhyeyustadvrataM samyak chareyurdharmavarddhanAH || 34\.51|| anupAsitasandhyastu tadaharyAvake vaset | anashnan saMyatamanA rAtrau chedrAtrimeva hi || 34\.52|| akR^itvA samidAdhAnaM shuchiH snAtvA samAhitaH | gAyatryaShTasahasrasya japyaM kuryAdvishuddhaye || 34\.53|| upavAsI charet sandhyAM gR^ihastho.api pramAdataH | snAtvA vishud.hdhyate sadyaH parishrAntastu saMyamAt || 34\.54|| vedoditAni nityAni karmANi cha vilopya tu | snAtakavratalopaM tu kR^itvA chopavaseddinam || 34\.55|| saMvatsaraM charet kR^ichChramanyotsAdI dvijottamaH | chAndrAyaNaM charedvrAtyo gopradAnena shud.hdhyati || 34\.56|| nAstikyaM yadi kurvIta prAjApatyaM chareddvijaH | devadrohaM gurudrohaM taptakR^ichChreNa shud.hdhyati || 34\.57|| uShTrayAnaM samAruhya kharayAnaM cha kAmataH | trirAtreNa vishud.hdhyet tu nagno vA pravishejjalam || 34\.58|| ShaShThAnnakAlatA mAsaM saMhitAjapa eva cha | homAshcha shAkalA nityamapA~NktAnAM vishodhanam || 34\.59|| nIlaM raktaM vasitvA cha brAhmaNo vastrameva hi | ahorAtroShitaH snAtaH pa~nchagavyena shud.hdhyati || 34\.60|| vedadharmapurANAnAM chaNDAlasya tu bhAShaNe | chAndrAyaNena shuddhiH syAnna hyanyA tasya niShkR^itiH || 34\.61|| udbandhanAdinihataM saMspR^ishya brAhmaNaH kvachit | chAndrAyaNena shuddhiH syAt prAjApatyena vA punaH || 34\.62|| uchChiShTo yadyanAchAntashchANDAlAdIn spR^isheddvijaH | pramAdAdvai japet snAtvA gAyatryaShTasahasrakam || 34\.63|| drupadAnAM shataM vApi brahmachArI samAhitaH | trirAtropoShitaH samyak pa~nchagavyena shud.hdhyati || 34\.64|| chaNDAlapatitAdIMstu kAmAdyaH saMspR^isheddvijaH | uchChiShTastatra kurvIta prAjApatyaM vishuddhaye || 34\.65|| chANDAlasUtakishavAMstathA nArIM rajasvalAm | spR^iShTvA snAyAdvishud.hdhyarthaM tatspR^iShTapatitAstathA || 34\.66|| chANDAlasUtikashavaiH saMspR^iShTaM saMspR^ishedyadi | pramAdAt tata Achamya japaM kuryAt samAhitaH || 34\.67|| tat spR^iShTasparshinaM spR^iShTvA buddhipUrvaM dvijottamaH | Achamet tadvishud.hdhyarthaM prAha devaH pitAmahaH || 34\.68|| bhu~njAnasya tu viprasya kadAchit saMspR^ishet yadi | kR^itvA shauchaM tataH snAyAdupoShya juhuyAdvratam || 34\.69|| chANDAlAntyashavaM spR^iShTvA kR^ichChraM kuryAdvishuddhaye | spR^iShTvA.abhyaktastvasaMspR^ishyamahorAtreNa shud.hdhyati || 34\.70|| surAM spR^iShTvA dvijaH kuryAt prANAyAmatrayaM shuchiH | palANDuM lashunaM chaiva ghR^itaM prAshya tataH shuchiH || 34\.71|| brAhmaNastu shunA daShTastryahaM sAyaM payaH pibet | nAbherUrdhvaM tu daShTasya tadeva dviguNaM bhavet || 34\.72|| syAdetat triguNaM bAhvormUrdhni cha syAchchaturguNam | snAtvA japedvA sAvitrIM shvabhirdaShTo dvijottamaH || 34\.73|| anirvartya mahAyaj~nAn yo bhu~Nkte tu dvijottamaH | anAturaH sati dhane kR^ichChrArddhena sa shud.hdhyati || 34\.74|| AhitAgnirupasthAnaM na kuryAdyastu parvaNi | R^itau na gachChedbhAryAM vA so.api kR^ichChrArddhamAcharet || 34\.75|| vinA.adbhirapsu nApyArttaH sharIraM sanniveshya cha | sachailo jalamAplutya gAmAlabhya vishud.hdhyati || 34\.76|| buddhipUrvaM tvabhyudito japedantarjale dvijaH | gAyatryaShTasahasraM tu tryahaM chopavasedvratI || 34\.77|| anugamyechChayA shUdraM pretIbhUtaM dvijottamaH | gAyatryaShTasahasraM cha japyaM kuryAnnadIShu cha || 34\.78|| kR^itvA tu shapathaM vipro viprasya vadhasaMyutam | sachaiva yAvakAnnena kuryAchchAndrAyaNaM vratam || 34\.79|| pa~NktyAM viShamadAnaM tu kR^itvA kR^ichChreNa shud.hdhyati | ChAyAM shvapAkasyAruhya snAtvA samprAshayedghR^itam || 34\.80|| IkShedAdityamashuchirdR^iShTvAgniM chandrameva vA | mAnuShaM chAsthi saMspR^ishya snAnaM kR^itvA vishud.hdhyati || 34\.81|| kR^itvA tu mithyAdhyayanaM charedbhaikShaM tu vatsaram | kR^itaghno brAhmaNagR^ihe pa~nchasaMvatsaraM vratI || 34\.82|| hu~NkAraM brAhmaNasyoktvA tva~NkAraM cha garIyasaH | snAtvA.anashnannahaH sheShaM praNipatya prasAdayet || 34\.83|| tADayitvA tR^iNenApi kaNThaM baddhvApi vAsasA | vivAde vApi nirjitya praNipatya prasAdayet || 34\.84|| avagUrya charet kR^ichChramatikR^ichChraM nipAtane | kR^ichChrAtikR^ichChrau kurvIta viprasyotpAdya shoNitam || 34\.85|| gurorAkroshamanR^itaM kR^itvA kuryAdvishodhanam | ekarAtraM trirAtraM vA tatpApasyApanuttaye || 34\.86|| devarShINAmabhimukhaM ShThIvanAkroshane kR^ite | ulmukena dahejjihvAM dAtavyaM cha hiraNyakam || 34\.87|| devodyAne tu yaH kuryAnmUtrochchAraM sakR^iddvijaH | ChindyAchChishnaM tu shud.hdhyarthaM charechchAndrAyaNaM tu vA || 34\.88|| devatAyatane mUtraM kR^itvA mohAddvijottamaH | shishnasyotkarttanaM kR^itvA chAndrAyaNamathAcharet || 34\.89|| devatAnAmR^iShINAM cha devAnAM chaiva kutsanam | kR^itvA samyak prakurvIta prAjApatyaM dvijottamaH || 34\.90|| taistu sambhAShaNaM kR^itvA snAtvA devAn samarchayet | dR^iShTvA vIkSheta bhAsvantaM smR^itvA visheshvaraM smaret || 34\.91|| yaH sarvabhUtAdhipatiM vishveshAnaM vinindati | na tasya niShkR^itiH shakyA karttuM varShashatairapi || 34\.92|| chAndrAyaNaM charet pUrvaM kR^ichChraM chaivAtikR^ichChrakam | prapannaH sharaNaM devaM tasmAt pApAdvimuchyate || 34\.93|| sarvasvadAnaM vidhivat sarvapApavishodhanam | chAndrAyaNaM cha vidhinA kR^ichChraM chaivAtikR^ichChrakam || 34\.94|| puNyakShetrAbhigamanaM sarvapApavinAshanam | amAvasyAM tithiM prApya yaH samArAdhayechChivam || 34\.95|| brAhmaNAn pUjayitvA tu sarvapApaiH pramuchyate || 34\.96|| kR^iShNAShTamyAM mahAdevaM tathA kR^iShNachaturdashIm | sampUjya brAhmaNamukhe sarvapApaiH pramuchyate || 34\.97|| trayodashyAM tathA rAtrau sopahAraM trilochanam | dR^iShTveshaM prathame yAme muchyate sarvapAtakaiH || 34\.98|| upoShitashchaturdashyAM kR^iShNapakShe samAhitaH | yamAya dharmarAjAya mR^ityave chAntakAya cha || 34\.99|| vaivasvatAya kAlAya sarvapraharaNAya cha | pratyekaM tilasaMyuktAn dadyAt saptodakA~njalIn || 34\.100|| snAtvA dadyAchcha pUrvAhNe muchyate sarvapAtakaiH | brahmacharyamadhaHshayyAmupavAsaM dvijArchanam || 34\.101|| vrateShveteShu kurvIta shAntaH saMyatamAnasaH | amAvasyAyAM brahmANaM samuddishya pitAmaham || 34\.102|| brAhmaNAMstrIn samabhyarchya muchyate sarvapAtakaiH | ShaShThyAmupoShito devaM shuklapakShe samAhitaH || 34\.103|| saptamyAmarchayedbhAnuM muchyate sarvapAtakaiH | bharaNyAM cha chaturthyAM cha shanaishcharadine yamam || 34\.104|| pUjayet saptajanmotthairmuchyate pAtakairnaraH || ekAdashyAM nirAhAraH samabhyarchya janArdanam || 34\.105|| dvAdashyAM shuklapakShasya mahApApaiH pramuchyate | tapo japastIrthasevA devabrAhmaNapUjanam || 34\.106|| grahaNAdiShu kAleShu mahApAtakashodhanam | yaH sarvapApayukto.api puNyatIrtheShu mAnavaH || 34\.107|| niyamena tyajet prANAn sa muchyet sarvapAtakaiH | brahmaghnaM vA kR^itaghnaM vA mahApAtakadUShitam || 34\.108|| bharttAramuddharennArI praviShTA saha pAvakam | etadeva paraM strINAM prAyashchittaM vidurbudhAH || 34\.109|| sarvapApasamudbhUtau nAtra kAryA vichAraNA | pativratA tu yA nArI bhartR^ishushrUShaNotsukA | na tasyA vidyate pApamiha loke paratra cha || 34\.110|| pativratA dharmaratA bhadrANyeva sabhet sadA | nAsyAH parAbhavaM karttuM shaknotIha janaH kvachit || 34\.111|| yathA rAmasya subhagA sItA trailokyavishrutA | patnI dAsharatherdevI vijigye rAkShaseshvaram || 34\.112|| rAmasya bhAryAM vimalAM rAvaNo rAkShaseshvaraH | sItAM vishAlanayanAM chakame kAlachoditaH || 34\.113|| gR^ihItvA mAyayA veShaM charantIM vijane vane | samAharttuM matiM chakre tApasaH kila kAminIm || 34\.114|| vij~nAya sA cha tadbhAvaM smR^itvA dAsharathiM patim | jagAma sharaNaM vahnimAvasathyaM shuchismitA || 34\.115|| upatasthe mahAyogaM sarvadoShavinAshanam | kR^itA~njalI rAmapatnI sAkShAt patimivAchyutam || 34\.116|| namasyAmi mahAyogaM kR^itAntaM gahanaM param | dAhakaM sarvabhUtAnAmIshAnaM kAlarUpiNam || 34\.117|| namasye pAvakaM devaM shAshvataM vishvatomukham | yoganaM kR^ittivasanaM bhUteshaM paramampadam || 34\.118|| AtmAnaM dIptavapuShaM sarvabhUtahR^idi sthitam | taM prapadye jaganmUrttiM prabhavaM sarvatejasAm | mahAyogeshvaraM vahnimAdityaM parameShThinam || 34\.119|| prapadye sharaNaM rudraM mahAgrAsaM trishUlinam | kAlAgniM yoginAmIshaM bhogamokShaphalapradam || 34\.120|| prapadye tvAM virUpAkShaM bhUrbhuvaH svaH svarUpiNam | hiraNmaye gR^ihe guptaM mahAntamamitaujasam || 34\.121|| vaishvAnaraM prapadye.ahaM sarvabhUteShvavasthitam | havyakavyavahaM devaM prapadye vahnimIshvaram || 34\.122|| prapadye tatparaM tattvaM vareNyaM savituH shivam | bhArgavAgniH paraM jyotiH rakSha mAM havyavAhana || 34\.123|| iti vahnyaShTakaM japtvA rAmapatnI yashasvinI | dhyAyantI manasA tasthau rAmamunmIlitekShaNA || 34\.124|| athAvasathyAdbhagavAn havyavAho maheshvaraH | AvirAsIt sudIptAtmA tejasA nirdahanniva || 34\.125|| sR^iShTvA mAyAmayIM sItAM sa rAvaNavadhepsayA | sItAmAdAya dharmiShThAM pAvako.antaradhIyata || 34\.126|| tAM dR^iShTvA tAdR^ishIM sItAM rAvaNo rAkShaseshvaraH | samAdAya yayau la~NkAM sAgarAntarasaMsthitAm || 34\.127|| kR^itvA.atha rAvaNavadhaM rAmo lakShmaNasaMyutaH | samAdAyAbhavat sItAM sha~NkAkulitamAnasaH || 34\.128|| sA pratyayAya bhUtAnAM sItA mAyAmayI punaH | vivesha pAvakaM dIptaM dadAha jvalano.api tAm || 34\.129|| dagdhvA mAyAmayIM sItAM bhagavAnugradIdhitiH | rAmAyAdarshayat sItAM pAvako.abhUt surapriyaH || 34\.130|| pragR^ihya bharttushcharaNau karAbhyAM sA sumadhyamA | chakAra praNatiM bhUmau rAmAya janakAtmajA || 34\.131|| dR^iShTvA hR^iShTamanA rAmo vismayAkulalochanaH | nanAma vahniM sirasA toShayAmAsa rAghavaH || 34\.132|| uvAcha vahnirbhagavAn kimeShA varavarNinI | dagdhA bhagavatA pUrvaM dR^iShTA matpArshvamAgatA || 34\.133|| tamAha devo lokAnAM dAhako havyavAhanaH | yathAvR^ittaM dAsharathiM bhUtAnAmeva sannidhau || 34\.134|| iyaM sA mithileshena pArvatIM rudravallabhAm | ArAdhya labdhvA tapasA devyAshchAtyantavallabhA || 34\.135|| bharttuH shushrUShaNopetA sushIleyaM pativratA | bhavAnIpArshvamAnItA mayA rAvaNakAmitA || 34\.136|| yA nItA rAkShaseshena sItA sA bhasmatAM gatA | mayA mAyAmayI sR^iShTA rAvaNasya vadhAya sA || 34\.137|| tadarthaM bhavatA duShTo rAvaNo rAkShaseshvaraH | mayopasaMhR^itA chaiva hato lokavinAshanaH || 34\.138|| gR^ihANa vimalAmenAM jAnakIM vachanAnmama | pashya nArAyaNaM devaM svAtmAnaM prabhavAvyayam || 34\.139|| ityuktvA bhagavAMshchaNDo vishvArchirvishvatomukhaH | mAnito rAghaveNAgnirbhUtaishchAntaradhIyata || 34\.140|| etat pativratAnAM vai mAhAtmyaM kathitaM mayA | strINAM sarvAghashamanaM prAyashchittamidaM smR^itam || 34\.141|| asheShapApayuktastu puruSho.api susaMyataH | svadehaM puNyatIrtheShu tyaktvA muchyeta kilbiShAt || 34\.142|| pR^ithivyAM sarvatIrtheShu snAtvA puNyeShu vA dvijaH | muchyate pAtakaiH sarvaiH samastairapi pUruShaH || 34\.143|| vyAsa uvAcha | ityeSha mAnavo dharmo yuShmAkaM kathito mayA | maheshArAdhanArthAya j~nAnayogaM cha shAshvatam || 34\.144|| yo.anena vidhinA yukto j~nAnayogaM samAcharet | sa pashyati mahAdevaM nAnyaH kalpashatairapi || 34\.145|| sthApayedyaH paraM dharmaM j~nAnaM tatpArameshvaram | na tasmAdadhiko loke sa yogI paramo mataH || 34\.146|| yaH saMsthApayituM shakto na kuryAnmohito janaH | sa yogayukto.api munirnAtyarthaM bhagavatpriyaH || 34\.147|| tasmAt sadaiva dAtavyaM brAhmaNeShu visheShataH | dharmayukteShu shAnteShu shraddhayA chAnviteShu vai || 34\.148|| yaH paThedbhavatAM nityaM saMvAdaM mama chaiva hi | sarvapApavinirmukto gachCheta paramAM gatim || 34\.149|| shrAddhe vA daivike kArye brAhmaNAnAM cha sannidhau | paTheta nityaM sumanAH shrotavyaM cha dvijAtibhiH || 34\.150|| yo.arthaM vichArya yuktAtmA shrAvayedbrAhmaNAn shuchIn | sa doShaka~nchukaM tyaktvA yAti devaM maheshvaram || 34\.151|| etAvaduktvA bhagavAn vyAsaH satyavatIsutaH | samAshvAsya munIn sUtaM jagAma cha yathAgatam || 34\.152|| itI shrIkUrmapurANe ShaTsAhasryAM saMhitAyAmuparivibhAge trayastrisho.adhyAyaH || 34|| \section{35} kUrmapurANe uttarabhAge pa~nchatriMshattamo.adhyAyaH R^iShaya UchuH | tIrthAni yAni loke.asmin vishrutAni mAhanti cha | tAni tvaM kathayAsmAkaM romaharShaNa sAmpratam || 35\.1|| romaharShaNa uvAcha | shR^iNudhvaM kathayiShye.ahaM tIrthAni vividhAni cha | kathitAni purANeShu munibhirbrahmavAdibhiH || 35\.2|| yatra snAnaM japo homaH shrAddhadAnAdikaM kR^itam | ekaikasho munishreShThAH punAtyAsaptamaM kulam || 35\.3|| pa~nchayojanavistIrNaM brahmaNaH parameShThinaH | prayAgaM prathitaM tIrthaM tasya mAhAtmyamIritam || 35\.4|| anyachcha tIrthapravaraM kurUNAM devavanditam | R^iShINAmAshramairjuShTaM sarvapApavishodhanam || 35\.5|| tatra snAtvA vishuddhAtmA dambhamAtsaryavarjitaH | dadAti yatki~nchidapi punAtyubhayataH kulam || 35\.6|| gayAtIrthaM paraM guhyaM pitR^INAM chAti durllabham | kR^itvA piNDapradAnaM tu na bhUyo jAyate naraH || 35\.7|| sakR^idgayAbhigamanaM kR^itvA piNDaM dadAti yaH | tAritAH pitarastena yAsyanti paramAM gatim || 35\.8|| tatra lokahitArthAya rudreNa paramAtmanA | shilAtale padaM nyastaM tatra pitR^In prasAdayet || 35\.9|| gayA.abhigamanaM karttuM yaH shakto nAbhigachChati | shochanti pitarastaM vai vR^ithA tasya parishramaH || 35\.10|| gAyanti pitaro gAthAH kIrttayanti maharShayaH | gayAM yAsyati yaH kashchit so.asmAn santArayiShyati || 35\.11|| yadi syAt pAtakopetaH svadharmaparivarjitaH | gayAM yAsyati vaMshyo yaH so.asmAn santArayiShyati || 35\.12|| eShTavyA bahavaH putrAH shIlavanto guNAnvitAH | teShAM tu samavetAnAM yadyeko.api gayAM vrajet || 35\.13|| tasmAt sarvaprayatnena brAhmaNastu visheShataH | pradadyAdvidhivat piNDAn gayAM gatvA samAhitaH || 35\.14|| dhanyAstu khalu te martyA gayAyAM piNDadAyinaH | kulAnyubhayataH sapta samuddhR^ityApnuyuH param || 35\.15|| anyachcha tIrthapravaraM siddhAvAsamudAhR^itam | prabhAsamiti vikhyAtaM yatrAste bhagavAn bhavaH || 35\.16|| tatra snAnaM tapaH shrAddhaM brAhmaNAnAM cha pUjanam | kR^itvA lokamavApnoti brahmaNo.akShayyamuttamam || 35\.17|| tIrthaM traiyambakaM nAma sarvadevanamaskR^itam | pUjayitvA tatra rudraM jyotiShTomaphalaM labhet || 35\.18|| suvarNAkShaM mahAdevaM samabhyarchya kapardinam | brAhmaNAn pUjayitvA tu gANapatyaM labheddhruvam || 35\.19|| someshvaraM tIrthavaraM rudrasya parameShThinaH | sarvavyAdhiharaM puNyaM rudrasAlokyakAraNam || 35\.20|| tIrthAnAM paramaM tIrthaM vijayaM nAma shobhanam | tatra li~NgaM maheshasya vijayaM nAma vishrutam || 35\.21|| ShaNmAsaniyatAhAro brahmachArI samAhitaH | uShitvA tatra viprendrA yAsyanti paramaM padam || 35\.22|| anyachcha tIrthapravaraM pUrvadesheShu shobhanam | ekAntaM devadevasya gANapatyaphalapradam || 35\.23|| dattvAtra shivabhaktAnAM ki~nchichChashvanmahIM shubhAm | sArvabhaumo bhavedrAjA mumukShurmokShamApnuyAt || 35\.24|| mahAnadIjalaM puNyaM sarvapApavinAshanam | grahaNe samupaspR^ishya muchyate sarvapAtakaiH || 35\.25|| anyA cha virajA nAma nadI trailokyavishrutA | tasyAM snAtvA naro viprA brahmaloke mahIyate || 35\.26|| tIrthaM nArAyaNasyAnyannAmnA tu puruShottamam | tatra nArAyaNaH shrImAnAste paramapUruShaH || 35\.27|| pUjayitvA paraM viShNuM snAtvA tatra dvijottamaH | brAhmaNAn pUjayitvA tu viShNulokamavApnuyAt || 35\.28|| tIrthAnAM paramaM tIrthaM gokarNaM nAma vishrutam | sarvapApaharaM shambhornivAsaH parameShThinaH || 35\.29|| dR^iShTvA li~NgaM tu devasya gokarNeshvaramuttamam | IpsitA.Nllabhate kAmAn rudrasya dayito bhavet || 35\.30|| uttaraM chApi gokarNaM li~NgaM devasya shUlinaH | mahAdevaM archayitvA shivasAyujyamApnuyAt || 35\.31|| tatra devo mahAdevaH sthANurityabhivishrutaH | taM dR^iShTvA sarvapApebhyo muchyate tatkShaNAnnaraH || 35\.32|| anyat kubjAmramatulaM sthAnaM viShNormahAtmanaH | sampUjya puruShaM viShNuM shvetadvIpe mahIyate || 35\.33|| yatra nArAyaNo devo rudreNa tripurAriNA | kR^itvA yaj~nasya mathanaM dakShasya tu visarjitaH || 35\.34|| samantAdyojanaM kShetraM siddharShigaNavanditam | puNyamAyatanaM viShNostatrAste puruShottamaH || 35\.35|| anyat kokAmukhe viShNostIrthamadbhutakarmaNaH | mR^ito.atra pAtakairmukto viShNusArUpyamApnuyAt || 35\.36|| shAlagrAmaM mahAtIrthaM viShNoH prItivivardhanam | prANAMstatra narastyaktvA hR^iShIkeShaM prapashyati || 35\.37|| ashvatIrthamiti khyAtaM siddhAvAsaM supAvanam | Aste hayashirA nityaM tatra nArAyaNaH svayam || 35\.38|| tIrthaM trailokyavikhyAtaM siddhavAsaM sushobhanam | tatrAsti puNyadaM tIrthaM brahmaNaH parameShTinaH || 35\.39|| puShkaraM sarvapApaghnaM mR^itAnAM brahmalokadam | manasA saMsmaredyastu puShkaraM vai dvijottamaH || 35\.40|| pUyate pAtakaiH sarvaiH shakreNa saha modate | tatra devAH sagandharvAH sayakShoragarAkShasAH || 35\.41|| upAsate siddhasa~NghA brahmANaM padmasambhavam | tatra snAtvA bhavechChuddho brahmANaM parameShThinam || 35\.42|| pUjayitvA dvijavaraM brahmANaM samprapashyati | tatrAbhigamya deveshaM puruhUtamaninditam || 35\.43|| surUpo jAyate martyaH sarvAn kAmAnavApnuyAt | saptasArasvataM tIrthaM brahmAdyaiH sevitaM param || 35\.44|| pUjayitvA tatra rudramashvamedhaphalaM labhet | yatra ma~NkaNako rudraM prapannaH parameshvaram || 35\.45|| ArAdhayAmAsa shivaM tapasA govR^iShadhvajam | prajajvAlAtha tapasA munirma~NkaNakastadA || 35\.46|| nanartta harShavegena j~nAtvA rudraM samAgatam | taM prAha bhagavAn rudraH kimarthaM nartitaM tvayA || 35\.47|| dR^iShTvA.api devamIshAnaM nR^ityati sma punaH punaH | so.anvIkShya bhagavAnIshaH sagarvaM garvashAntaye || 35\.48|| svakaM dehaM vidAryAsmai bhasmarAshimadarshayat | pashyemaM machCharIrotthaM bhasmarAshiM dvijottama || 35\.49|| mAhAtmyametat tapasastvAdR^isho.anyo.api vidyate | yat sagarvaM hi bhavatA nartitaM munipu~Ngava || 35\.50|| na yuktaM tApasasyaitat tvatto.apyatrAdhiko hyaham | ityAbhAShya munishreShThaM sa rudraH kila vishvadR^ik || 35\.51|| AsthAya paramaM bhAvaM nanartta jagato haraH | sahasrashIrShA bhUtvA sa sahasrAkShaH sahasrapAt || 35\.52|| daMShTrAkarAlavadano jvAlAmAlI bhaya~NkaraH | so.anvapashyadatheshasya pArshve tasya trishUlinaH || 35\.53|| vishAlalochanAmekAM devIM chAruvilAsinIm | sUryAyutasamaprakhyAM prasannavadanAM shivAm || 35\.54|| sasmitaM prekShya vishveshaM tiShThantamamitadyutim | dR^iShTvA santrastahR^idayo vepamAno munIshvaraH || 35\.55|| nanAma shirasA rudraM rudrAdhyAyaM japan vashI | prasanno bhagavAnIshastryambako bhaktavatsalaH || 35\.56|| pUrvaveShaM sa jagrAha devI chAntarhitA.abhavat | Ali~Ngya bhaktaM praNataM devadevaH svayaM shivaH || 35\.57|| na bhetavyaM tvayA vatsa prAha kiM te dadAmyaham | praNamya mUrdhnA girishaM haraM tripurasUdanam || 35\.58|| vij~nApayAmAsa tadA hR^iShTaH praShTumanA muniH | namo.astu te mahAdeva maheshvara namo.astu te || 35\.59|| kimetadbhagavadrUpaM sughoraM vishvatomukham | kA cha sA bhagavatpArshve rAjamAnA vyavasthitA || 35\.60|| antarhiteva cha sahasA sarvamichChAmi veditum | ityukte vyAjahAreshastadA ma~NkaNakaM haraH || 35\.61|| maheshaH svAtmano yogaM devIM cha tripurAnalaH | ahaM sahasranayanaH sarvAtmA sarvatomukhaH || 35\.62|| dAhakaH sarvapApAnAM kAlaH kAlakaro haraH | mayaiva preryate kR^itsnaM chetanAchetanAtmakam || 35\.63|| so.antaryAmI sa puruSho hyahaM vai puruShottamaH | tasya sA paramA mAyA prakR^itistriguNAtmikA || 35\.64|| prochyate munirbhishaktirjagadyoniH sanAtanI | sa eSha mAyayA vishvaM vyAmohayati vishvavit || 35\.65|| nArAyaNaH paro.avyakto mAyArUpa iti shrutiH | evametajjagat sarvaM sarvadA sthApayAmyaham || 35\.66|| yojayAmi prakR^ityA.ahaM puruShaM pa~nchaviMshakam | tathA vai sa~Ngato devaH kUTasthaH sarvago.amalaH || 35\.67|| sR^ijatyasheShamevedaM svamUrtteH prakR^iterajaH || sa devo bhagavAn brahmA vishvarUpaH pitAmahaH || 35\.68|| tavaitat kathitaM samyak sraShTR^itvaM paramAtmanaH | eko.ahaM bhagavAn kalo hyanAdishchAntakR^idvibhuH || 35\.69|| samAsthAya paraM bhAvaM prokto rudro manIShibhiH | mama vai sA.aparA shaktirdevI vidyeti vishrutA || 35\.70|| dR^iShTA hi bhavatA nUnaM vidyAdehastvahaM tataH | evametAni tattvAni pradhAnapuruSheshvarAH || 35\.71|| viShNurbrahmA cha bhagavAn rudraH kAla iti shrutiH | trayametadanAdyantaM brahmaNyeva vyavasthitam || 35\.72|| tadAtmakaM tadavyaktaM tadakSharamiti shrutiH | AtmAnandaparaM tattvaM chinmAtraM paramaM padam || 35\.73|| AkAshaM niShkalaM brahma tasmAdanyanna vidyate | evaM vij~nAya bhavatA bhaktiyogAshrayeNa tu || 35\.74|| sampUjyo vandanIyo.ahaM tatastaM pashyasIshvaram | etAvaduktvA bhagavA~njagAmAdarshanaM haraH || 35\.75|| tatraiva bhaktiyogena rudrAmArAdhayanmuniH | etat pavitramatulaM tIrthaM brahmarShisevitam | saMsevya brAhmaNo vidvAn muchyate sarvapAtakaiH || 35\.76|| iti shrIkUrmapurANe ShaTsAhasryAM saMhitAyAmuparivibhAge pa~nchatriMsho.adhyAyaH || 35|| \section{36} kUrmapurANe uttarabhAge ShaDtriMshattamo.adhyAyaH sUta uvAcha | anyat pavitraM vipulaM tIrthaM trailokyavishrutam | rudrakoTiriti khyAtaM rudrasya parameShThinaH || 36\.1|| purA puNyatame kAle devadarshanatatparAH | koTibrahmarShayo dAntAstaM deshamagaman param || 36\.2|| ahaM drakShyAmi girishaM pUrvameva pinAkinam | anyo.anyaM bhaktiyuktAnAM vyAghAto jAyate kila || 36\.3|| teShAM bhaktiM tadA dR^iShTvA girisho yoginAM guruH | koTirUpo.abhavadrudro rudrakoTistataH smR^itaH || 36\.4|| te sma sarve mahAdevaM haraM giriguhAshayam | pashyantaH pArvatInAthaM hR^iShTapuShTadhiyo.abhavan || 36\.5|| anAdyantaM mahAdevaM pUrvamevAhamIshvaram | dR^iShTavAniti bhaktyA te rudranyastadhiyo.abhavan || 36\.6|| athAntarikShe vimalaM pashyanti sma mahattaram | jyotistatraiva te sarve.abhilaShantaH paraM padam || 36\.7|| etat svadeshAdhyuShitaM tIrthaM puNyatamaM shubham | dR^iShTvA rudraM samabhyarchya rudrasAmIpyamApnuyAt || 36\.8|| anyachcha tIrthapravaraM nAmnA madhuvanaM smR^itam | tatra gatvA niyamavAnindrasyArddhAsanaM labhet || 36\.9|| athAnyA puShpanagarI deshaH puNyatamaH shubhaH | tatra gatvA pitR^In pUjya kulAnAM tArayechChatam || 36\.10|| kAla~njaraM mahAtIrthaM rudraloke maheshvaraH | kAlaM jaritavAndevo yatra bhaktapriyo haraH || 36\.11|| shveto nAma shive bhakto rAjarShipravaraH purA | tadAshIstannamaskAraiH pUjayAmAsa shUlinam || 36\.12|| saMsthApya vidhinA li~NgaM bhaktiyogapuraHsaraH | jajApa rudramanishaM tatra sa.nnyastamAnasaH || 36\.13|| sitaM kAlo.atha dIptAtmA shUlamAdAya bhIShaNam | netumabhyAgato deshaM sa rAjA yatra tiShThati || 36\.14|| vIkShya rAjA bhayAviShTaH shUlahastaM samAgatam | kAlaM kAlakaraM ghoraM bhIShaNaM chaNDadIpitam || 36\.15|| ubhAbhyAmatha hastAbhyAM spR^iTvA.asau li~Ngamaishvaram | nanAma shirasA rudraM jajApa shatarudriyam || 36\.16|| japantamAha rAjAnaM namantaM manasA bhavam | ehyehIti puraH sthitvA kR^itAntaH prahasanniva || 36\.17|| tamuvAcha bhayAviShTo rAjA rudraparAyaNaH | ekamIshArchanarataM vihAyAnyAnniShUdaya || 36\.18|| ityuktavantaM bhagavAnabravIdbhItamAnasam | rudrArchanarato vA.anyo madvashe ko na tiShThati || 36\.19|| evamuktvA sa rAjAnaM kAlo lokaprakAlanaH | babandha pAshai rAjA.api jajApa shatarudriyam || 36\.20|| athAntarikShe vimalaM dIpyamAnaM tejorAshiM bhUtabharttuH purANam | jvAlAmAlAsaMvR^itaM vyApya vishvaM prAdurbhUtaM saMsthitaM sandadarsha || 36\.21|| tanmadhye.asau puruShaM rukmavarNaM devyA devaM chandralekhojjvalA~Ngam | tejorUpaM pashyati smAtihR^iShTo mene chAsmannAtha AgachChatIti || 36\.22|| AgachChantaM nAtidUre.atha dR^iShTvA kAlo rudraM devadevyA mahesham | vyapetabhIrakhileshaikanAthaM rAjarShistaM netumabhyAjagAma || 36\.23|| AlokyAsau bhagavAnugrakarmA devo rudro bhUtabharttA purANaH | evaM bhaktaM satvaraM mAM smarantaM dehItImaM kAlarUpaM mameti || 36\.24|| shrutvA vAkhyaM gopaterugrabhAvaH kAlAtmA.asau manyamAnaH svabhAvam | baddhvA bhaktaM punarevA.atha pAshaiH rudro raudramabhidudrAva vegAt || 36\.25|| prekShyAyAntaM shailaputrImatheshaH so.anvIkShyAnte vishvamAyAvidhij~naH | sAvaj~naM vai vAmapAdena kAlaM rAj~nashchainaM pashyato vyAjaghAna || 36\.26|| mamAra so.atibhIShaNo maheshapAdaghAtitaH | rarAja devatApatiH sahomayA pinAkadhR^ik || 36\.27|| nirIkShya devamIshvaraM prahR^iShTamAnaso haram | nanAma sAmbamavyayaM sa rAjapu~NgavastadA || 36\.28|| namo bhavAya hetave harAya vishvasambhave | namaH shivAya dhImate namo.apavargadAyine || 36\.29|| namo namo namo namo mahAvibhUtaye namaH | vibhAgahInarUpiNe namo narAdhipAya te || 36\.30|| namo.astu te gaNeshvara prapannaduHkhanAshana | anAdinityabhUtaye varAhashR^i~NgadhAriNe || 36\.31|| namo vR^iShadhvajAya te kapAlamAline namaH | namo mahAnaTAya te shivAya sha~NkarAya te || 36\.32|| athAnugR^ihya sha~NkaraH praNAmatatparaM nR^ipam | svagANapatyamavyayaM sarUpatAmatho dadau || 36\.33|| sahomayA sapArShadaH sarAjapu~Ngavo haraH | munIshasiddhavanditaH kShaNAdadR^ishyatAmagAt || 36\.34|| kAle maheshAbhihate lokanAthaH pitAmahaH | ayAchata varaM rudraM sajIvo.ayaM bhavatviti || 36\.35|| nAsti kashchidapIshAna doShalesho vR^iShadhvaja | kR^itAntasyaiva bhavatA tatkArye viniyojitaH || 36\.36|| sa devadevavachanAddevadeveshvaro haraH | tathAstvityAha vishvAtmA so.api tAdR^igvidho.abhavat || 36\.37|| ityetat paramaM tIrthaM kAla~njaramiti shrutam | gatvA.abhyarchya mahAdevaM gANapatyaM sa vindati || 36\.38|| iti shrIkUrmapurANe ShaTsAhasryAM saMhitAyAmuparivibhAge ShaTtriMsho.adhyAyaH || 36|| \section{37} kUrmapurANe uttarabhAge saptatriMshattamo.adhyAyaH sUta uvAcha | idamanyat paraM sthAnaM guhyAdguhyatamaM mahat | mahAdevasya devasya mahAlayamiti shrutam || 37\.1|| tatra devAdidevena rudreNa tripurAriNA | shilAtale padaM nyastaM nAstikAnAM nidarshanam || 37\.2|| tatra pAshupatAH shAntA bhasmoddhUlitavigrahAH | upAsate mahAdevaM vedAdhyayanatatparAH || 37\.3|| snAtvA tatra padaM shArvaM dR^iShTvA bhaktipuraHsaram | namaskR^itvA.atha shirasA rudrasAmIpyamApnuyAt || 37\.4|| anyachcha devadevasya sthAnaM shambhormahAtmanaH | kedAramiti vikhyAtaM siddhAnAmAlayaM shubham || 37\.5|| tatra snAtvA mahAdevamabhyarchya vR^iShaketanam | pItvA chaivodakaM shuddhaM gANapatyamavApnuyAt || 37\.6|| shrAddhadAnAdikaM kR^itvA hyakShayaM labhate phalam | dvijAtipravarairjuShTaM yogibhirjjitamAnasaiH || 37\.7|| tIrthaM plakShAvataraNaM sarvapApavinAshanam | tatrAbhyarchya shrInivAsaM viShNuloke mahIyate || 37\.8|| anyachcha magadhAraNyaM sarvalokagatipradam | akShayaM vindate svargaM tatra gatvA dvijottamaH || 37\.9|| tIrthaM kanakhalaM puNyaM mahApAtakanAshanam | yatra devena rudreNa yaj~no dakShasya nAshitaH || 37\.10|| tatra ga~NgAmupaspR^ishya shuchirbhAvasamanvitaH | muchyate sarvapApaistu brahmalokaM labhenmR^itaH || 37\.11|| mahAtIrthamiti khyAtaM puNyaM nArAyaNapriyam | tatrAbhyarchya hR^iShIkeshaM shvetadvIpaM sa gachChati || 37\.12|| anyachcha tIrthapravaraM nAmnA shrIparvataM shubham | tatra prANAn parityajya rudrasya dayito bhavet || 37\.13|| tatra sannihito rudro devyA saha maheshvaraH | snAnapiNDAdikaM tatra kR^itamakShayyamuttamam || 37\.14|| godAvarI nadI puNyA sarvapApavinAshanI | tatra snAtvA pitR^In devAMstarpayitvA yathAvidhi || 37\.15|| sarvapApavishuddhAtmA gosahasraphalaM labhet | pavitrasalilA puNyA kAverI vipulA nadI || 37\.16|| tasyAM snAtvodakaM kR^itvA muchyate sarvapAtakaiH | trirAtropoShitenAtha ekarAtroShitena vA || 37\.17|| dvijAtInAM tu kathitaM tIrthAnAmiha sevanam | yasya vA~NmanasI shuddhe hastapAdau cha saMsthitau || 37\.18|| alolupo brahmachArI tIrthAnAM phalamApnuyAt | svAmitIrthaM mahAtIrthaM triShu lokeShu vishrutam || 37\.19|| tatra sannihito nityaM skando.amaranamaskR^itaH | snAtvA kumAradhArAyAM kR^itvA devAditarpaNam || 37\.20|| ArAdhya ShaNmukhaM devaM skandena saha modate | nadI trailokyavikhyAtA tAmraparNoti nAmataH || 37\.21|| tatra snAtvA pitR^In bhaktyA tarpayitvA yathAvidhi | pApakartR^Inapi pitR^IMstArayennAtra saMshayaH || 37\.22|| chandratIrthamiti khyAtaM kAveryAH prabhave.akShayam | tIrthe tatrabhaveddattaM mR^itAnAM svargatirdhruvA || 37\.23|| vindhyapAde prapashyanti devadevaM sadAshivam | bhaktyA ye te na pashyanti yamasya sadanaM dvijAH || 37\.24|| devikAyAM vR^iSho nAma tIrthaM siddhaniShevitam | tatra snAtvodakaM datvA yogasiddhiM cha vindati || 37\.25|| dashAshvamedhikaM tIrthaM sarvapApavinAshakam | dashAnAmashvamedhAnAM tatrApnoti phalaM naraH || 37\.26|| puNDarIkaM mahAtIrthaM brAhmaNairupasevitam | tatrAbhigamya yuktAtmA puNDarIkaphalaM labhet || 37\.27|| tIrthebhyaH paramaM tIrthaM brahmatIrthamiti shrutam | brahmANamarchayitvA tu brahmaloke mahIyate || 33\.28|| sarasvatyA vinashanaM plakShaprasravaNaM shubham | vyAsatIrthaM paraM tIrthaM mainAkaM cha nagottamam || 37\.29|| yamunAprabhavaM chaiva sarvapApavinAshanam | pitR^INAM duhitA devI gandhakAlIti vishrutA || 37\.30|| tasyAM snAtvA divaM yAti mR^ito jAtismaro bhavet | kuberatu~NgaM pApaghnaM siddhachAraNasevitam || 37\.31|| prANAMstatra parityajya kuberAnucharo bhavet | umAtu~Ngamiti khyAtaM yatra sA rudravallabhA || 37\.32|| tatrAbhyarchya mahAdevIM gosahasraphalaM labhet | bhR^igutu~Nge tapastaptaM shrAddhaM dAnaM tathA kR^itam || 37\.33|| kulAnyubhayataH sapta punAtIti matirmama | kAshyapasya mahAtIrthaM kAlasarpiriti shrutam || 37\.34|| tatra shrAddhAni deyAni nityaM pApakShayechChayA | dashArNAyAM tathA dAnaM shrAddhaM homastapo japaH || 37\.35|| akShayaM chAvyayaM chaiva kR^itaM bhavati sarvadA | tIrthaM dvijAtibhirjuShTaM nAmnA vai kurujA~Ngalam || 37\.36|| dattvA tu dAnaM vidhivadbrahmaloke mahIyate | vaitaraNyAM mahAtIrthe svarNavedyAM tathaiva cha || 37\.37|| dharmapR^iShThe cha sarasi brahmaNaH parame shubhe | bharatasyAshrame puNye puNye shrAddhavaTe shubhe || 37\.38|| mahAhrade cha kaushikyAM dattaM bhavati chAkShayam | muNDapR^iShThe padaM nyastaM mahAdevena dhImatA || 37\.39|| hitAya sarvabhUtAnAM nAstikAnAM nidarshanam | alpenApi tu kAlena naro dharmaparAyaNaH || 37\.40|| pApmAnamutsR^ijatyAshu jIrNAM tvachamivoragaH | nAmnA kanakanandeti tIrthaM trailokyavishrutam || 37\.41|| udIchyAM mu~njapR^iShThasya brahmarShigaNasevitam | tatra snAtvA divaM yAnti sasharIrA dvijAtayaH || 37\.42|| dattaM chApi sadA shrAddhamakShayaM samudAhR^itam | R^iNaistribhirnaraH snAtvA muchyate kShINakalmaShaH || 37\.43|| mAnase sarasi snAtvA shakrasyArddhAsanaM labhet | uttaraM mAnasaM gatvA siddhiM prApnotyanuttamAm || 37\.44|| tasmAnnirvarttayechChrAddhaM yathAshakti yathAbalam | kAmAn sa labhate divyAn mokShopAyaM cha vindati || 37\.45|| parvato himavAnnAma nAnAdhAtuvibhUShitaH | yojanAnAM sahasrANi sAshItistvAyato giriH || 37\.46|| siddhachAraNasa~NkIrNo devarShigaNasevitaH | tatra puShkariNI ramyA suShumnA nAma nAmataH || 37\.47|| tatra gatvA dvijo vidvAn brahmahatyAM vimu~nchati | shrAddhaM bhavati chAkShayyaM tatra dattaM mahodayam || 37\.48|| tArayechcha pitR^In samyag dasha pUrvAn dashAparAn | sarvatra himavAn puNyo ga~NgA puNyA samantataH || 37\.49|| nadyaH samudragAH puNyAH samudrashcha visheShataH | badaryAshramamAsAdya muchyate kalikilbiShAt || 37\.50|| tatra nArAyaNo devo nareNAste sanAtanaH | akShayaM tatra dAnaM syAt japyaM vA.api tathAvidham || 37\.51|| mahAdevapriyaM tIrthaM pAvanaM tadvisheShataH | tArayechcha pitR^In sarvAn dattvA shrAddhaM samAhitaH || 37\.52|| devadAruvanaM puNyaM siddhagandharvasevitam | mahAdevena devena tatra dattaM mahadvaram || 37\.53|| mohayitvA munIn sarvAn samastaiH samprapUjitaH | prasanno bhagavAnIsho munIndrAn prAha bhAvitAn || 37\.54|| ihAshramavare ramye nivasiShyatha sarvadA | madbhAvanAsamAyuktAstataH siddhimavApsyatha || 37\.55|| ye.atra mAmarchayantIha loke dharmaparA janAH | teShAM dadAmi paramaM gANapatyaM hi shAshvatam || 37\.56|| atra nityaM vasiShyAmi saha nArAyaNena cha | prANAniha narastyaktvA na bhUyo janma vindati || 37\.57|| saMsmaranti cha ye tIrthaM deshAntaragatA janAH | teShAM cha sarvapApAni nAshayAmi dvijottamAH || 37\.58|| shrAddhaM dAnaM tapo homaH piNDanirvapaNaM tathA | dhyAnaM japashcha niyamaH sarvamatrAkShayaM kR^itam || 37\.59|| tasmAt sarvaprayatnena draShTavyaM hi dvijAtibhiH || devadAruvanaM puNyaM mahAdevaniShevitam || 37\.60|| yatreshvaro mahAdevo viShNurvA puruShottamaH | tatra sannihitA ga~NgA tIrthAnyAyatanAni cha || 37\.61|| itI shrIkUrmapurANe ShaTsAhasryAM saMhitAyAmuparivibhAge saptatriMsho.adhyAyaH || 37|| \section{38} kUrmapurANe uttarabhAge aShTAtriMshattamo.adhyAyaH R^iShaya UchuH | kathaM dAruvanaM prApto bhagavAn govR^iShadhvajaH | mohayAmAsa viprendrAn sUta tadvaktumihArhasi || 38\.1|| sUta uvAcha | purA dAruvane ramye devasiddhaniShevite | saputradAratanayAstapashcheruH sahasrashaH || 38\.2|| pravR^ittaM vividhaM karma prakurvANA yathAvidhi | yajanti vividhairyaj~naistapanti cha maharShayaH || 38\.3|| teShAM pravR^ittivinyastachetasAmatha shUladhR^ik | vyAkhyApayan sa mahAdoShaM yayau dAruvanaM haraH || 38\.4|| kR^itvA vishvaguruM viShNuM pArshve devo maheshvaraH | yayau nivR^ittavij~nAnasthApanArthaM cha sha~NkaraH || 38\.5|| AsthAya vipula~nchaiSha janaM viMshativatsaram | lIlAlaso mahAbAhuH pInA~NgashchArulochanaH || 38\.6|| chAmIkaravapuH shrImAn pUrNachandranibhAnanaH | mattamAta~NgagAmano digvAsA jagadIshvaraH || 38\.7|| kusheshayamayIM mAlAM sarvaratnairala~NkR^itAm | dadhAno bhagavAnIshaH samAgachChati sasmitaH || 38\.8|| yo.anantaH puruSho yonirlokAnAmavyayo hariH | strIveShaM viShNurAsthAya so.anugachChati shUlinam || 38\.9|| sampUrNachandravadanaM pInonnatapayodharam | shuchismitaM suprasannaM raNannupurakadvayam || 38\.10|| supItavasanaM divyaM shyAmalaM chArulochanam | udArahaMsachalanaM vilAsi sumanoharam || 38\.11|| evaM sa bhagavAnIsho devadAruvane haraH | chachAra hariNA sArddhaM mAyayA mohayan jagat || 38\.12|| dR^iShTvA charantaM vishveshaM tatra tatra pinAkinam | mAyayA mohitA nAryo devadevaM samanvayuH || 38\.13|| visrastavastrAbharaNAstyaktvA lajjAM pativratAH | sahaiva tena kAmArttA vilAsinyashcharantihi || 38\.14|| R^iShINAM putrakA ye syuryuvAno jitamAnasAH | anvagachChan hR^iShIkeshaM sarve kAmaprapIDitAH || 38\.15|| gAyanti nR^ityanti vilAsayuktA nArIgaNA nAyakamekamIsham | dR^iShTvA sapatnIkamatIvakAnta\- michChantyathAli~NganamAcharanti || 38\.16|| pArshve nipetuH smitamAcharanti gAyanti gItAni munIshaputrAH | Alokya padmApatimAdidevaM bhrUbha~Ngamanye vicharanti tena || 38\.17|| AsAmathaiShAmapi vAsudevo mAyI murArirmanasi praviShTaH | karoti bhogAn manasi pravR^ittiM mAyAnubhUtAnsa itIva samyak || 38\.18|| vibhAti vishvAmarabhUtabharttA sa mAdhavaH strIgaNamadhyaviShTaH | asheShashaktyAsanasanniviShTo yathaikashaktyA saha devadevaH || 38\.19|| karoti nR^ityaM paramaM pradhAnaM tadA virUDhaH punareva bhUyaH | yayau samAruhya hariH svabhAvaM tadIshavR^ittAmR^itamAdidevaH || 38\.20|| dR^iShTvA nArIkulaM rudraM putrAnapi cha keshavam | mohayantaM munishreShThAH kopaM sandadhire bhR^isham || 38\.21|| atIva paruShaM vAkyaM prochurdevaM kapardinam | shepushcha rvividhairvAkyairmAyayA tasya mohitAH || 38\.22|| tapAMsi teShAM sarveShAM pratyAhanyanta sha~Nkare | yathAdityaprakAshena tArakA nabhasi sthitAH || 38\.23|| te bhagnatapaso viprAH sametya vR^iShabhadhvajam | ko bhavAniti deveshaM pR^ichChanti sma vimohitAH || 38\.24|| so.abravIdbhagavAnIshastapashchartumihAgataH | idAnIM bhAryayA deshe bhavadbhiriha suvratAH || 38\.25|| tasya te vAkyamAkarNya bhR^igvAdyA munipu~NgavAH | UchurgR^ihItvA vasanaM tyaktvA bhAryAM tapashchara || 38\.26|| athovAcha vihasyeshaH pinAkI nIlalohitaH | samprekShya jagatAM yoniM pArshvasthaM cha janArdanam || 38\.27|| kathaM bhavadbhiruditaM svabhAryApoShaNotsukaiH | tyaktavyA mama bhAryeti dharmaj~naiH shAntamAnasaiH || 38\.28|| R^iShaya UchuH | vyabhichAraratA bhAryAH santyAjyAH patineritAH | asmAbhireShA subhagA tAdR^ishI tyAgamarhati || 38\.29|| mahAdeva uvAcha | na kadAchidiyaM viprA manasApyanyamichChati | nAhamenAmapi tathA vimu~nchAmi kadAchana || 38\.30|| R^iShaya UchuH | dR^iShTvA vyabhicharantIha hyasmAbhiH puruShAdhama | uktaM hyasatyaM bhavatA gamyatAM kShiprameva hi || 38\.31|| evamukte mahAdevaH satyameva mayeritam | bhavatAM pratibhAtyeShetyuktvAsau vichachAra ha || 38\.32|| so.agachChaddhariNA sArddhaM munIndrasya mahAtmanaH | vasiShThasyAshramaM puNyaM bhikShArthI parameshvaraH || 38\.33|| dR^iShTvA samAgataM devaM bhikShamANamarundhatI | vasiShThasya priyA bhAryA pratyudgamya nanAma nam || 38\.34|| prakShAlya pAdau vimalaM dattvA chAsanamuttamam | samprekShya shithilaM gAtramabhighAtahataM dvijaiH | sandhayAmAsa bhaiShajyairviShaNNavadanA satI || 38\.35|| chakAra mahatIM pUjAM prArthayAmAsa bhAryayA | ko bhavAn kuta AyAtaH kimAchAro bhavAniti | uvAcha tAM mahAdevaH siddhAnAM pravaro.asmyaham || 38\.36|| yadetanmaNDalaM shuddhaM bhAti brahmamayaM sadA | eShaiva devatA mahyaM dhArayAmi sadaiva tat || 38\.37|| hatyuktvA prayayau shrImAnanugR^ihya pativratAm | tADayA~nchakrire daNDairloShTibhirmuShTibhidvijAH || 38\.38|| dR^iShTvA charantaM girishaM nagnaM vikR^italakShaNam | prochuretadbhavA.Nlli~NgamutpATayatu durmate || 38\.39|| tAnabravInmahAyogI kariShyAmIti sha~NkaraH | yuShmAkaM mAmake li~Nge yadi dveSho.abhijAyate || 38\.40|| ityuktvotpATayAmAsa bhagavAn bhaganetrahA | nApashyaMstatkShaNeneshaM keshavaM li~Ngameva cha || 38\.41|| tadotpAtA babhUvurhi lokAnAM bhayashaMsinaH | na rAjate sahasrAMshushchachAla pR^ithivI punaH | niShprabhAshcha grahAH sarve chukShubhe cha mahodadhiH || 38\.42|| apashyachchAnusUyAtreH svapnaM bhAryA pativratA | kathayAmAsa viprANAM bhayAdAkulitekShaNA || 38\.43|| tejasA bhAsayan kR^itsnaM nArAyaNasahAyavAn | bhikShamANaH shivo nUnaM dR^iShTo.asmAkaM gR^iheShviti || 38\.44|| tasyA vachanamAkarNya sha~NkamAnA maharShayaH | sarve jagmurmahAyogaM brahmANaM vishvasambhavam || 38\.45|| upAsyamAnamamalairyogibhirbrahmavittamaiH | chaturvedairmUrtimadbhiH sAvitryA sahitaM prabhum || 38\.46|| AsInamAsane ramye nAnAshcharyasamanvite | prabhAsahasrakalile j~nAnaishvaryAdisaMyute || 38\.47|| vibhrAjamAnaM vapuShA sasmitaM shubhralochanam | chaturmukhaM mahAbAhuM ChandomayamajaM param || 38\.48|| vilokya devapuruShaM prasannavadanaM shubham | shirobhirdharaNIM gatvA toShayAmAsurIshvaram || 38\.49|| tAn prasannamanA devashchaturmUrttishchaturmukhaH | vyAjahAra munishreShThAH kimAgamanakAraNam || 38\.50|| tasya te vR^ittamakhilaM brahmaNaH paramAtmanaH | j~nApayA~nchakrire sarve kR^itvA shirasi chA~njalim || 38\.51|| R^iShaya UchuH | kashchiddAruvanaM puNyaM puruSho.atIvashobhanaH | bhAryayA chArusarvA~NgyA praviShTo nagna eva hi || 38\.52|| mohayAmAsa vapuShA nArINAM kulamIshvaraH | kanyakAnAM priyA chAsya dUShayAmAsa putrakAn || 38\.53|| asmAbhirvividhAH shApAH pradattAshcha parAhatAH | tADito.asmAbhiratyarthaM li~NgaM tu vinipAtitam || 38\.54|| antarhitashcha bhagavAn sabhAryo li~Ngameva cha | utpAtAshchAbhavan ghorAH sarvabhUtabhaya~NkarAH || 38\.55|| ka eSha puruSho deva bhItAH sma puruShottama | bhavantameva sharaNaM prapannA vayamachyuta || 38\.56|| tvaM hi vetsi jagatyasmin yatki~nchidapi cheShTitam | anugraheNa vishvesha tadasmAnanupAlaya || 38\.57|| vij~nApito munigaNairvishvAtmA kamalodbhavaH | dhyAtvA devaM trishUlA~NkaM kR^itA~njalirabhAShata || 38\.58|| brahmovAcha | hA kaShTaM bhavatAmadya jAtaM sarvArthanAshanam | dhigbalaM dhik tapashcharyA mithyaiva bhavatAmiha || 38\.59|| samprApya puNyasaMskArAnnidhInAM paramaM nidhim | upekShitaM vR^ithA.a.achArairbhavadbhiriha mohitaiH || 38\.60|| kA~NkShante yogino nityaM yatanto yatayo nidhim | yameva taM samAsAdya hA bhavadbhirupekShitam || 38\.61|| yajanti yaj~nairvividhairyatprAptyai vedavAdinaH | mahAnidhiM samAsAdya hA bhavadbhirupekShitam || 38\.62|| yaM samAsAdya devAnAmaishvaryamakhilaM jagat | tamAsAdyAkShayanidhiM hA bhavadbhirupekShitam | yatsamApattijanitaM vishveshatvamidaM mama | tadevopekShitaM dR^iShTvA nidhAnaM bhAgyavarjitaiH || 38\.63|| yasmin samAhitaM divyamaishvaryaM yat tadavyayam | tamAsAdya nidhiM brAhma hA bhavadbhirvR^ithAkR^itam || 38\.64|| eSha devo mahAdevo vij~neyastu maheshvaraH | na tasya paramaM ki~nchit padaM samadhigamyate || 38\.65|| devatAnAmR^iShINAM cha pitR^INAM chApi shAshvataH | sahasrayugaparyante pralaye sarvadehinAm || 38\.66|| saMharatyeSha bhagavAn kAlo bhUtvA maheshvaraH | eSha chaiva prajAH sarvAH sR^ijatyeShaH svatejasA || 38\.67|| eSha chakrI chakravartI shrIvatsakR^italakShaNaH | yogI kR^itayuge devastretAyAM yaj~na uchyate | dvApare bhagavAn kAlo dharmaketuH kalau yuge || 38\.68|| rudrasya mUrttayastistro yAbhirvishvamidaM tatam | tamo hyagnI rajo brahmA sattvaM viShNuriti prabhuH || 38\.69|| mUrttiranyA smR^itA chAsya digvAsA vai shivA dhruvA | yatra tiShThati tadbrahma yogena tu samanvitam || 38\.70|| yA chAsya pArshvagA bhAryA bhavadbhirabhivIkShitA | sA hi nArAyaNo devaH paramAtmA sanAtanaH || 38\.71|| tasmAt sarvamidaM jAtaM tatraiva cha layaM vrajet | sa eSha mochayet kR^itsnaM sa eSha paramA gatiH || 38\.72|| sahasrashIrShA puruShaH sahasrAkShaH sahasrapAt | ekashR^i~Ngo mahAnAtmA purANo.aShTAkSharo hariH || 38\.73|| chaturvedashchaturmUrttistrimUrttistriguNaH paraH | ekamUrttirameyAtmA nArAyaNa iti shrutiH | reto.asya garbho bhagavAnApo mAyAtanuH prabhuH | stUyate vividhairmantrairbrAhmaNairmokShakA~NkShibhiH || 38\.74|| saMhR^itya sakalaM vishvaM kalpAnte puruShottamaH | shete yogAmR^itaM pItvA yat tadviShNoH paraM padam || 38\.75|| na jAyate na mriyate varddhate na cha vishvasR^ik | mUlaprakR^itiravyaktA gIyate vaidikairajaH || 38\.76|| tato nishAyAM vR^ittAyAM sisR^ikShurakhila~njagat | ajasya nAbhau tadbIjaM kShipatyeSha maheshvaraH || 38\.77|| taM mAM vitta mahAtmAnaM brahmANaM vishvato mukham | mahAntaM puruShaM vishvamapAM garbhamanuttamam || 38\.78|| na taM jAnItha janakaM mohitAstasya mAyayA | devadevaM mahAdevaM bhUtAnAmIshvaraM haram || 38\.79|| eSha devo mahAdevo hyanAdirbhagavAn haraH | viShNunA saha saMyuktaH karoti vikaroti cha || 38\.80|| na tasya vidyate kAryaM na tasmAdvidyate param | sa vedAn pradadau pUrvaM yogamAyAtanurmama || 38\.81|| sa mAyI mAyayA sarvaM karoti vikaroti cha | tameva muktaye j~nAtvA vrajeta sharaNaM bhavam || 38\.82|| itIritA bhagavatA marIchipramukhA vibhum | praNamya devaM brahmANaM pR^ichChanti sma suduHkhitAH || 38\.83|| iti shrIkUrmapurANe ShaTsAhasryAM saMhitAyAmuparivibhAge aShTAchatvAriMsho.adhyAyaH || 38|| \section{39} kUrmapurANe uttarabhAge navatriMshattamo.adhyAyaH munaya UchuH | kathaM pashyema taM devaM punareva pinAkinam | brUhi vishvAmareshAna trAtA tvaM sharaNaiShiNAm || 39\.1|| pitAmaha uvAcha | yaddR^iShTaM bhavatA tasya li~NgaM bhuvi nipAtitam | talli~NgAnukR^itIshasya kR^itvA li~Ngamanuttamam || 39\.2|| pUjayadhvaM sapatnIkAH sAdaraM putrasaMyutAH | vaidikaireva niyamairvividhairbrahmachAriNaH || 39\.3|| saMsthApya shA~NkarairmantrairR^igyajuH sAmasambhavaiH | tapaH paraM samAsthAya gR^iNantaH shatarudriyam || 39\.4|| samAhitAH pUjayadhvaM saputrAH saha bandhubhiH | sarve prA~njalayo bhUtvA shUlapANiM prapadyatha || 39\.5|| tato drakShyatha deveshaM durdarshamakR^itAtmabhiH | yaM dR^iShTvA sarvamaj~nAnamadharmashcha praNashyati || 39\.6|| tataH praNamya varadaM brahmANamamitaujasam | jagmuH saMhR^iShTamanaso devadAruvanaM punaH || 39\.7|| ArAdhayitumArabdhA brahmaNA kathitaM yathA | ajAnantaH paraM devaM vItarAgA vimatsarAH || 39\.8|| sthaNDileShu vichitreShu parvatAnAM guhAsu cha | nadInAM cha vivikteShu pulineShu shubheShu cha || 39\.9|| shaivAlabhojanAH kechit kechidantarjaleshayAH | kechidabhrAvakAshAstu pAdA~NguShThe hyadhiShThitAH || 39\.10|| danto.alUkhalinastvanye hyashmakuTTAstathA pare | shAkaparNAshanAH kechit samprakShAlA marIchipAH || 39\.11|| vR^ikShamUlaniketAshcha shilAshayyAstathApare | kAlaM nayanti tapasA pUjayanto maheshvaram || 39\.12|| tatasteShAM prasAdArthaM prapannArttiharo haraH | chakAra bhagavAn buddhiM prabodhAya vR^iShadhvajaH || 39\.13|| devaH kR^itayuge hyasmin shR^i~Nge himavataH shubhe | devadAruvanaM prAptaH prasannaH parameshvaraH || 39\.14|| bhasmapANDuradigdhA~Ngo nagno vikR^italakShaNaH | ulmukavyagrahastashcha raktapi~NgalalochanaH || 39\.15|| kvachichcha hasate raudraM kvachidgAyati vismitaH | kvachinnR^ityati shR^i~NgArI kvachidrauti muhurmuhuH || 39\.16|| Ashrame hyaTate bhikShuH yAchate cha punaH punaH | mAyAM kR^itvA.a.atmano rUpaM devastadvanamAgataH || 39\.17|| kR^itvA girisutAM gaurIM pArshve devaH pinAkadhR^ik | sA cha pUrvavaddeveshI devadAruvanaM gatA || 39\.18|| dR^iShTvA samAgataM devaM devyA saha kapardinam | praNemuH shirasA bhUmau toShayAmAsurIshvaram || 39\.19|| vaidikairvividhairmantraiH sUktairmAheshvaraiH shubhaiH | atharvashirasA chAnye rudrAdyairarchchayanbhavam || 39\.20|| namo devAdidevAya mahAdevAya te namaH | tryambakAya namastubhyaM trishUlavaradhAriNe || 39\.21|| namo digvAsase tubhyaM vikR^itAya pinAkine | sarvapraNatadevAya svayamapraNatAtmane || 39\.22|| antakAntakR^ite tubhyaM sarvasaMharaNAya cha | namo.astu nR^ityashIlAya namo bhairavarUpiNe || 39\.23|| naranArIsharIrAya yoginAM gurave namaH | namo dAntAya shAntAya tApasAya harAya cha || 39\.24|| vibhIShaNAya rudrAya namaste kR^ittivAsase | namaste lelihAnAya shitikaNThAya te namaH || 39\.25|| aghoraghorarUpAya vAmadevAya vai namaH | namaH kanakamAlAya devyAH priyakarAya cha || 39\.26|| ga~NgAsaliladhArAya shambhave parameShThine | namo yogAdhipataye brahmAdhipataye namaH || 39\.27|| prANAya cha namastubhyaM namo bhasmA~NgadhAriNe | namaste havyavAhAya daMShTriNe havyaretase || 39\.28|| brahmaNashcha shiro hartre namaste kAlarUpiNe | AgatiM te na janImo gatiM naiva cha naiva cha || 39\.29|| vishveshvara mahAdeva yo.asi so.asi namo.astu te | namaH pramathanAthAya dAtre cha shubhasampadAm || 39\.30|| kapAlapANaye tubhyaM namo mIDhuShTamAya te | namaH kanakali~NgAya vArili~NgAya te namaH || 39\.31|| namo vahnyarkali~NgAya j~nAnali~NgAya te namaH | namo bhuja~NgahArAya karNikArapriyAya cha | kirITine kuNDaline kAlakAlAya te namaH || 39\.32|| vAmadeva maheshAna devadeva trilochana | kShamyatAM yatkR^itaM mohAt tvameva sharaNaM hi naH || 39\.33|| charitAni vichitrANi guhyAni gahanAni cha | brahmAdInAM cha sarveShAM durvij~neyo.asi sha~Nkara || 39\.34|| aj~nAnAdyadi vA j~nAnAdyatki~nchitkurute naraH | tatsarvaM bhagavAnena kurute yogamAyayA || 39\.35|| evaM stutvA mahAdevaM prahR^iShTenAntarAtmanA | UchuH praNamya girishaM pashyAmastvAM yathA purA || 39\.36|| teShAM saMstavamAkarNya somaH somavibhUShaNaH | svameva paramaM rUpaM darshayAmAsa sha~NkaraH || 39\.37|| taM te dR^iShTvA.atha girishaM devyA saha pinAkinam | yathA pUrvaM sthitA viprAH praNemurhR^iShTamAnasAH || 39\.38|| tataste munayaH sarve saMstUya cha maheshvaram | bhR^igva~NgirovasiShThAstu vishvAmitrastathaiva cha || 39\.39|| gautamo.atriH sukeshashcha pulastyaH pulahaH kratuH | marIchiH kashyapashchApi saMvarttakamahAtapAH | praNamya devadeveshamidaM vachanamabruvan || 39\.40|| kathaM tvAM devadevesha karmayogena vA prabho | j~nAnena vA.atha yogena pUjayAmaH sadaiva hi || 39\.41|| kena vA devamArgeNa sampUjyo bhagavAniha | kiM tat sevyamasevyaM vA sarvametadbravIhi naH || 39\.42|| devadeva uvAcha | etadvaH sampravakShyAmi gUDhaM gahanamuttamam | brahmaNe kathitaM pUrvamAdAveva maharShayaH || 39\.43|| sA~Nkhyayogo dvidhA j~neyaH puruShANAM hi sAdhanam | yogena sahitaM sA~NkhyaM puruShANAM vimuktidam || 39\.44|| na kevalena yogena dR^ishyate puruShaH paraH | j~nAnaM tu kevalaM samyagapavargaphalapradam || 39\.45|| bhavantaH kevalaM yogaM samAshritya vimuktaye | vihAya sA~NkhyaM vimalamakurvata parishramam || 39\.46|| etasmAt kAraNAdviprA nR^iNAM kevaladharmiNAm | Agato.ahamimaM deshaM j~nApayan mohasambhavam || 39\.47|| tasmAdbhavadbhirvimalaM j~nAnaM kaivalyasAdhanam | j~nAtavyaM hi prayatnena shrotavyaM dR^ishyameva cha || 39\.48|| ekaH sarvatrago hyAtmA kevalashchitimAtrakaH | Anando nirmalo nityaM syAdetat sA~Nkhyadarshanam || 39\.49|| etadeva paraM j~nAnameSha mokSho.atra gIyate | etat kaivalyamamalaM brahmabhAvashcha varNitaH || 39\.50|| Ashritya chaitat paramaM tanniShThAstatparAyaNAH | pashyanti mAM mahAtmAno yatayo vishvamIshvaram || 39\.51|| etat tat paramaM j~nAnaM kevalaM sannira~njanam | ahaM hi vedyo bhagavAn mama mUrttiriyaM shivA || 39\.52|| bahUni sAdhanAnIha siddhaye kathitAni tu | teShAmabhyadhikaM j~nAnaM mAmakaM dvijapu~NgavAH || 39\.53|| j~nAnayogaratAH shAntA mAmeva sharaNaM gatAH | ye hi mAM bhasmaniratA dhyAyanti satataM hR^idi || 39\.54|| madbhaktiparamA nityaM yatayaH kShINakalmaShAH | nAshayAmyachirAt teShAM ghoraM saMsArasAgaram || 39\.55|| prashAntaH saMyatamanA bhasmoddhUlitavigrahaH | brahmacharyarato nagno vrataM pAshupataM charet || 39\.56|| nirmitaM hi mayA pUrvaM vrataM pAshupataM param | guhyAdguhyatamaM sUkShmaM vedasAraM vimuktaye || 39\.57|| yadvA kaupInavasanaH syAdvA digvasano muniH | vedAbhyAsarato vidvAn dhyAyet pashupatiM shivam || 39\.58|| eSha pAshupato yogaH sevanIyo mumukShubhiH | bhasmachChannairhi satataM niShkAmairiti hi shrutam || 39\.59|| vItarAgabhayakrodhA manmayA mAmupAshritAH | bahavo.anena yogena pUtA madbhAvamAgatAH || 39\.60|| anyAni chaiva shAstrANi loke.asmin mohanAni tu | vedavAdaviruddhAni mayaiva kathitAni tu || 39\.61|| vAmaM pAshupataM somaM lAkulaM chaiva bhairavam | asevyametat kathitaM vedabAhyaM tathetaram || 39\.62|| vedamurttirahaM viprA nAnyashAstrArthavedibhiH | j~nAyate matsvarUpaM tu muktvA vedaM sanAtanam || 39\.63|| sthApayadhvamidaM mArgaM pUjayadhvaM maheshvaram | achirAdaishvaraM j~nAnamutpatsyati na saMshayaH || 39\.64|| mayi bhaktishcha vipulA bhavatAmastu sattamAH | dhyAtamAtro hi sAnnidhyaM dAsyAmi munisattamAH || 39\.65|| ityuktvA bhagavAn somastatraivAntaradhIyata | te.api dAruvane tasmin pUjayanti sma sha~Nkaram || 39\.66|| brahmacharyaratAH shAntA j~nAnayogaparAyaNAH | sametya te mahAtmAno munayo brahmavAdinaH || 39\.67|| vichakrire bahUn vAdAnsvAtmaj~nAnasamAshrayAn | kimasya jagato mUlamAtmA chAsmAkameva hi || 39\.68|| ko.api syAt sarvabhAvAnAM heturIshvara eva cha | ityevaM manyamAnAnAM dhyAnamArgAvalambinAm | AvirAsInmahAdevI devI girivarAtmajA || 39\.69|| koTisUryapratIkAshA jvAlAmAlAsamAvR^itA | svabhAbhirvimalAbhistu pUrayantI nabhastalam || 39\.70|| tAmanvapashyan girijAmameyAM jvAlAsahasrAntarasanniviShTAm | praNemuretAmakhileshapatnIM jAnanti chaitat paramasya bIjam || 39\.71|| asmAkameShA parameshapatnI gatistathA.a.atmA gaganAbhidhAnA | pashyantyathAtmAnamidaM cha kR^itsnaM tasyAmathaite munayashcha viprAH || 39\.72|| nirIkShitAste nirIkShitAste parameshapatnyA tadantare devamasheShahetum | pashyanti shambhuM kavimIshitAraM rudraM bR^ihantaM puruShaM purANam || 39\.73|| Alokya devImatha devamIshaM praNemurAnandamavApuragryam | j~nAnaM tadIshaM bhagavatprasAdAdAvirbabhau janmavinAshahetuH || 39\.74|| iyaM hi sA jagato yonirekA sarvAtmikA sarvaniyAmikA cha | mAheshvarI shaktiranAdisiddhA vyomAbhidhAnA divi rAjatIva || 39\.75|| asyAM mahatparameShThI parastAnmaheshvaraH shiva ekaH sa rudraH | chakAra vishvaM parashaktiniShThaM mAyAmathAruhya cha devadevaH || 39\.76|| eko devaH sarvabhUteShu gUDho mAyI rudraH sakalo niShkalashcha | sa eva devI na cha tadvibhinnametajj~nAtvA hyamR^itatvaM vrajanti || 39\.77|| antarhito.abhUdbhagavAnmahesho devyA tayA saha devAdidevaH | ArAdhayanti sma tamAdidevaM vanaukasaste punareva rudram || 39\.78|| etadvaH kathitaM sarvaM devadevasya cheShTitam | devadAruvane pUrvaM purANe yanmayA shrutam || 39\.79|| yaH paThechChR^iNuyAnnityaM muchyate sarvapAtakaiH | shrAvayedvA dvijAn shAntAn sa yAti paramAM gatim || 39\.80|| iti shrIkUrmapurANe ShaTsAhasryAM saMhitAyAmuparivibhAge navatriMsho.adhyAyaH || 39|| \section{40} kUrmapurANe uttarabhAge chatvAriMshattamo.adhyAyaH | sUta uvAcha | eShA puNyatamA devI devagandharvasevitA | narmadA lokavikhyAtA tIrthAnAmuttamA nadI || 40\.1|| tasyAH shR^iNudhvaM mAhAtmyaM mArkaNDeyena bhAShitam | yudhiShThirAya tu shubhaM sarvapApapraNAshanam || 40\.2|| yudhiShThira uvAcha | shrutAste vividhA dharmAstvatprasAdAnmahAmune | mAhAtmyaM cha prayAgasya tIrthAni vividhAni cha || 40\.3|| narmadA sarvatIrthAnAM mukhyA hi bhavateritA | tasyAstvidAnIM mAhAtmyaM vaktumarhasi sattama || 40\.4|| mArkaNDeya uvAcha narmadA saritAM shreShThA rudradehAdviniHsR^itA | tArayet sarvabhUtAni sthAvarANi charANi cha || 40\.5|| narmadAyAstu mAhAtmyaM purANe yanmayA shrutam | idAnIM tatpravakShyAmi shR^iNuShvaikamanAH shubham || 40\.6|| puNyA kanakhale ga~NgA kurukShetre sarasvatI | grAme vA yadi vA.araNye puNyA sarvatra narmadA || 40\.7|| tribhiH sArasvataM toyaM saptAhena tu yAmunam | sadyaH punAti gA~NgeyaM darshanAdeva nArmadam || 40\.8|| kali~NgadeshapashchArddhe parvate.amarakaNTake | puNyA cha triShu lokeShu ramaNIyA manoramA || 40\.9|| sadevAsuragandharvA R^iShayashcha tapodhanAH | tapastaptvA tu rAjendra siddhiM tu paramAM gatAH || 40\.10|| tatra snAtvA naro rAjan niyamastho jitendriyaH | upoShya rajanImekAM kulAnAM tArayechChatam || 440\.11|| yojanAnAM shataM sAgraM shrUyate sariduttamA | vistAreNa tu rAjendra yojanadvayamAyatA || 40\.12|| ShaShTitIrthasahasrANi ShaShTikoTyastathaiva cha | parvatasya samantAt tu tiShThantyamarakaNTake || 40\.13|| brahmachArI shuchirbhUtvA jitakrodho jitendriyaH | sarvahiMsAnivR^ittastu sarvabhUtahite rataH || 40\.14|| evaM shuddhasamAchAro yastu prANAn samutsR^ijet | tasya puNyaphalaM rAjan shR^iNuShvAvahito nR^ipa || 40\.15|| shatavarShasahasrANi svarge modati pANDava | apsarogaNasa~NkIrNo divyastrIparivAritaH || 40\.16|| divyagandhAnuliptashcha divyapuShpopashobhitaH | krIDate devaloke tu daivataiH saha modate || 40\.17|| tataH svargAt paribhraShTo rAjA bhavati dhArmikaH | gR^ihaM tu labhate.asau vai nAnAratnasamanvitam || 40\.18|| stambhairmaNimayairdivyairvajravaidUryabhUShitam | AlekhyavAhanaiH shubhrairdAsIdAsasamanvitam || 40\.19|| rAjarAjeshvaraH shrImAn sarvastrIjanavallabhaH | jIvedvarShashataM sAgraM tatra bhogasamanvitaH || 40\.20|| agnipraveshe.atha jale athavA.anashane kR^ite | anivarttikA gatistasya pavanasyAmbare yathA || 40\.21|| pashchime parvatataTe sarvapApavinAshanaH | hrado jaleshvaro nAma triShu lokeShu vishrutaH || 40\.22|| tatra piNDapradAnena sandhyopAsanakarmaNA | dashavarShasahasrANi tarpitAH syurna saMshayaH || 40\.23|| dakShiNe narmadAkUle kapilAkhyA mahAnadI | saralArjunasa~nchChannA nAtidUre vyavasthitA || 40\.24|| sA tu puNyA mahAbhAgA triShu lokeShu vishrutA | tatra koTishataM sAgraM tIrthAnAM tu yudhiShThira || 40\.25|| tasmiMstIrthe tu ye vR^ikShAH patitAH kAlaparyayAt | narmadAtoyasaMspR^iShTAste yAnti paramAM gatim || 40\.26|| dvitIyA tu mahAbhAgA vishalyakaraNI shubhA | tatra tIrthe naraH snAtvA vishalyo bhavati kShaNAt || 40\.27|| kapilA cha vishalyA cha shrUyate rAjasattama | IshvareNa purA proktA lokAnAM hitakAmyayA || 40\.28|| anAshakaM tu yaH kuryAt tasmiMstIrthe narAdhipa | sarvapApavishuddhAtmA rudralokaM sa gachChati || 40\.29|| tatra snAtvA naro rAjannashvamedhaphalaM labhet | ye vasantyuttare kUle rudraloke vasanti te || 40\.30|| sarasvatyAM cha ga~NgAyAM narmadAyAM yudhiShThira | samaM snAnaM cha dAnaM cha yathA me sha~Nkaro.abravIt || 40\.31|| parityajati yaH praNAn parvate.amarakaNTake | varShakoTishataM sAgraM rudraloke mahIyate || 40\.32|| narmadAyAM jalaM puNyaM phenormisamala~NkR^itam | pavitraM shirasA dhR^itvA sarvapApaiH pramuchyate || 40\.33|| narmadA sarvataH puNyA brahmahatyApahAriNI | ahorAtropavAsena muchyate brahmahatyayA || 40\.34|| jAleshvaraM tIrthavaraM sarvapApavinAshanam | tatra gatvA niyamavAn sarvakAmAMllabhennaraH || 40\.35|| chandrasUryoparAge tu gatvA hyamarakaNTakam | ashvamedhAddashaguNaM puNyamApnoti mAnavaH || 40\.36|| eSha puNyo girivaro devagandharvasevitaH | nAnAdrumalatAkIrNo nAnApuShpopashobhitaH || 40\.37|| tatra sannihito rAjan devyA saha maheshvaraH | brahmA viShNustathA chendro vidyAdharagaNaiH saha || 40\.38|| pradakShiNaM tu yaH kuryAt parvataM hyamarakaNTakam | pauNDarIkasya yaj~nasya phalaM prApnoti mAnavaH || 40\.39|| kAverI nAma vipulA nadI kalmaShanAshinI | tatra snAtvA mahAdevamarchayedvR^iShabhadhvajam | sa~Ngame narmadAyAstu rudraloke mahIyate || 40\.40|| iti shrIkUrmapurANe ShaTsAhasryAM saMhitAyAmuparivibhAge chatvAriMsho.adhyAyaH || 40|| \section{41} kUrmapurANe uttarabhAge ekachatvAriMshattamo.adhyAyaH | mArkaNDeya uvAcha narmadA saritAM shreShThA sarvapApavinAshinI | munibhiH kathitA pUrvamIshvareNa svayambhuvA || 41\.1|| munibhiH saMstutA hyeShA narmadA pravarA nadI | rudragAtrAdviniShkrAntA lokAnAM hitakAmyayA || 41\.2|| sarvapApaharA nityaM sarvadevanamaskR^itA | saMstutA devagandharvairapyarobhistathaiva cha || 41\.3|| uttare chaiva tatkUle tIrthaM trailokyavishrute | nAmnA bhadreshvaraM puNyaM sarvapApaharaM shubham || 41\.4|| tatra snAtvA naro rAjan daivataiH saha modate | tato gachCheta rAjendra tIrthamAmrAtakeshvaram || 41\.5|| tatra snAtvA naro rAjan gosahasraphalaM labhet | tato.a~NgArakeshvaraM gachChenniyato niyatAyanaH || 41\.6|| sarvapApavishuddhAtmA rudraloke mahIyate | tato gachCheta rAjendra kedAraM nAma puNyadam || 41\.7|| tatra snAtvodakaM kR^itvA sarvAn kAmAnavApnuyAt | niShphaleshaM tato gachChet sarvapApavinAshanam || 41\.8|| tatra snAtvA mahArAja rudraloke mahIyate | tato gachCheta rAjendra bANatIrthamanuttamam || 41\.9|| tatra prANAn parityajya rudralokamavApnuyAt | tataH puShkariNIM gachChet snAnaM tatra samAcharet || 41\.10|| tatra snAtvA naro rAjan siMhAsanapatirbhavet | shakratIrthaM tato gachChetkUle chaiva tu dakShiNe || 41\.11|| snAtamAtro narastatra indrasyArddhAsanaM labhet | tato gachCheta rAjendra shUlabhedamiti shrutam || 41\.12|| tatra snAtvArchayeddevaM gosahasraphalaM labhet | upoShya rajanImekAM snAnaM kR^itvA yathAvidhi || 41\.13|| ArAdhayenmahAyogaM devaM nArAyaNaM harim | gosahasraphalaM prApya viShNulokaM sa gachChati || 41\.14|| R^iShitIrthaM tato gatvA sarvapApaharaM nR^iNAm | snAtamAtro narastatra shivaloke mahIyate || 41\.15|| nAradasya tu tatraiva tIrthaM paramashobhanam | snAtamAtro narastatra gosahasraphalaM labhet || 41\.16|| yatra taptaM tapaH pUrvaM nAradena surarShiNA | pratIstasya dadau yogaM devadevo maheshvaraH || 41\.17|| brahmaNA nirmitaM li~NgaM brahmeshvaramiti shrutam | yatra snAtvA naro rAjan brahmaloke mahIyate || 41\.18|| R^iNatIrthaM tato gachChet sa R^iNAnmuchyate dhruvam | vaTeshvaraM tato gachChet paryAptaM janmanaH phalam || 41\.19|| bhImeshvaraM tato gachChet sarvavyAdhivinAshanam | snAtamAtro narastatra sarvaduHkhaiH pramuchyate || 41\.20|| tato gachCheta rAjendra pi~Ngaleshvaramuttamam | ahorAtropavAsena trirAtraphalamApnuyAt || 41\.21|| tasmiMstIrthe tu rAjendra kapilAM yaH prayachChati | yAvanti tasyA romANi tatprasUtikuleShu cha || 41\.22|| tAvadvarShasahasrANi rudraloke mahIyate || yastu prANaparityAgaM kuryAt tatra narAdhipa || 41\.23|| akShayaM modate kAlaM yAvachchandradivAkarau | narmadAtaTamAshritya ye cha tiShThanti mAnavAH || 41\.24|| te mR^itAH svargamAyAnti santaH sukR^itino yathA | tato dIpteshvaraM gachChedvyAsatIrthaM tapovanam || 41\.25|| nivarttitA purA tatra vyAsabhItA mahAnadI | hu~NkAritA tu vyAsena dakShiNena tato gatA || 41\.26|| pradakShiNaM tu yaH kuryAt tasmiMstIrthe yudhiShThira | prItastasya bhavedvyAso vA~nChitaM labhate phalam || 41\.27|| tato gachCheta rAjendra ikShunadyAstu sa~Ngamam | trailokyavishrutaM puNyaM tatra sannihitaH shivaH || 41\.28|| tatra snAtvA naro rAjan gANapatyamavApnuyAt | skandatIrthaM tato gachChet sarvapApapraNAshanam || 41\.29|| AjanmanaH kR^itaM pApaM snAtastatra vyapohati | tatra devAH sagandharvA bhargAtmajamanuttamam || 41\.30|| upAsate mahAtmAnaM skandaM shaktidhiraM prabhum | tato gachChedA~NgirasaM snAnaM tatra samAcharet || 41\.31|| gosahasraphalaM prApya rudralokaM sa gachChati | a~NgirA yatra deveshaM brahmaputro vR^iShadhvajam || 41\.32|| tapasA.a.arAdhya vishveshaM labdhavAn yogamuttamam | kushatIrthaM tato gachChet sarvapApapraNAshanam || 41\.33|| snAnaM tatra prakurvIta ashvamedhaphalaM labhet | koTitIrthaM tato gachChet sarvapApapraNAshanam || 41\.34|| AjanmanaH kR^itaM pApaM snAtastatra vyapohati | chandrabhAgAM tato gachChet snAnaM tatra samAcharet || 41\.35|| snAtamAtro narastatra somaloke mahIyate | narmadAdakShiNe kUle sa~Ngameshvaramuttamam || 41\.36|| tatra snAtvA naro rAjan sarvayaj~naphalaM labhet | narmadAyottare kUle tIrthaM paramashobhanam || 41\.37|| AdityAyatanaM ramyamIshvareNa tu bhAShitam | tatra snAtvA tu rAjendra dattvA dAnaM tu shaktitaH || 41\.38|| tasya tIrthaprabhAveNa labhate chAkShayaM phalam | daridrA vyAdhitA ye tu ye cha duShkR^itakarmiNaH || 41\.39|| muchyante sarvapApebhyaH sUryalokaM prayAnti cha | mAtR^itIrthaM tato gachChet snAnaM tatra samAcharet || 41\.40|| snAtamAtro narastatra svargalokamavApnuyAt | tataH pashchimato gachChenmarudAlayamuttamam || 41\.41|| tatra snAtvA tu rAjendra shuchirbhUtvA samAhitaH | kA~nchanaM tu dvijo dadyAdyathAvibhavavistaram || 41\.42|| puShpakeNa vimAnena vAyulokaM sa gachChati | tato gachCheta rAjendra ahalyAtIrthamuttamam | snAnamAtrAdapsarobhirmodate kAlamakShayam || 41\.43|| chaitramAse tu samprApte shuklapakShe trayodashI | kAmadevadine tasminnahalyAM yastu pUjayet || 41\.44|| yatra tatra samutpanno varastatra priyo bhavet | strIvallabho bhavechChrImAn kAmadeva ivAparaH || 41\.45|| ayodhyAM tu samAsAdya tIrthaM shakrasya vishrutam | snAtamAtro narastatra gosahasraphalaM labhet || 41\.46|| somatIrthaM tato gachChet snAnaM tatra samAcharet | snAtamAtro narastatra sarvapApaiH pramuchyate || 41\.47|| somagrahe tu rAjendra pApakShayakaraM bhavet | trailokyavishrutaM rAjan somatIrthaM mahAphalam || 41\.48|| yastu chAndrAyaNaM kuryAt tatra tIrthe samAhitaH | sarvapApavishuddhAtmA somalokaM sa gachChati || 41\.49|| agnipraveshaM yaH kuryAt somatIrthe narAdhipa | jale chAnashanaM vApi nAsau martyo.abhijAyate || 41\.50|| stambhatIrthaM tato gachChet snAnaM tatra samAcharet | snAtamAtro narastatra somaloke mahIyate || 41\.51|| tato gachCheta rAjendra viShNutIrthamanuttamam | yodhanIpuramAkhyAtaM viShNoH sthAnamanuttamam || 41\.52|| asurA yodhitAstatra vAsudevena koTishaH | tatra tIrthaM samutpannaM viShNushrIko bhavediha || 41\.53|| ahorAtropavAsena brahmahatyAM vyapohati | narmadAdakShiNe kUle tIrthaM paramashobhanam || 41\.54|| kAmatIrthamiti khyAtaM yatra kAmo.archayaddharim | tasmiMstIrthe naraH snAtvA upavAsaparAyaNaH || 41\.55|| kusumAyudharUpeNa rudroloke mahIyate | tato gachCheta rAjendra brahmatIrthamanuttamam || 41\.56|| umAhakamiti khyAtaM tatra santarpayet pitR^In | paurNamAsyAmamAvAsyAM shrAddhaM kuryAdyathAvidhi || 41\.57|| gajarUpA shilA tatra toyamadhye vyavasthitA | tasmiMstu dApayet piNDAn vaishAkhyAntu visheShataH || 41\.58|| snAtvA samAhitamanA dambhamAtsaryavarjitaH | tR^ipyanti pitarastasya yAvat tiShThati medinI || 41\.59|| vishveshvaraM tato gachChet snAnaM tatra samAcharet | snAtamAtro narastatra gANapatyapadaM labhet || 41\.60|| tato gachCheta rAjendra li~Ngo yatra janArdanaH | tatra snAtvA tu rAjendra viShNuloke mahIyate || 41\.61|| yatra nArAyaNo devo munInAM bhAvitAtmanAm | svAtmAnaM darshayAmAsa li~NgaM tat paramaM padam || 41\.62|| akollantu tato gachChet sarvapApavinAshanam | snAnaM dAnaM cha tatraiva brAhmaNAnAM cha bhojanam || 41\.63|| piNDapradAnaM cha kR^itaM pretyAnantaphalapradam | triyambakena toyena yashcharuM shrapayet tataH || 41\.64|| akollamUle dadyAchcha piNDAMshchaiva yathAvidhi | tAritAH pitarastena tR^ipyantyAchandratArakam || 41\.65|| tato gachCheta rAjendra tApaseshvaramuttamam | tatra snAtvA tu rAjendra prApnuyAt tapasaH phalam || 41\.66|| shuklatIrthaM tato gachChet sarvapApavinAshanam | nAsti tena samantIrthaM narmadAyAM yudhiShThira || 41\.67|| darshanAt sparshanAt tasya snAnadAnatapojapAt | homAchchaivopavAsAchcha shuklatIrthe mahatphalam || 41\.68|| yojanaM tat smR^itaM kShetraM devagandharvasevitam | shuklatIrthamiti khyAtaM sarvapApavinAshanam || 41\.69|| pAdapAgreNa dR^iShTena brahmahatyAM vyapohati | devyA saha sadA bhargastatra tiShThati sha~NkaraH || 41\.70|| kR^iShNapakShe chaturdashyAM vaishAkhe mAsi suvrata | kailAsAchchAbhiniShkramya tatra sannihito haraH || 41\.71|| devadAnavagandharvAH siddhavidyAdharAstathA | gaNAshchApsaraso nAgAstatra tiShThanti pu~NgavAH || 41\.72|| ra~njitaM hi yathA vastraM shuklaM bhavati vAriNA | Ajanmani kR^itaM pApaM shuklatIrthe vyapohati || 41\.73|| snAnaM dAnaM tapaH shrAddhamanantaM tatra dR^ishyate || shuklatIrthAt paraM tIrthaM na bhaviShyati pAvanam || 41\.74|| pUrve vayasi karmANi kR^itvA pApAni mAnavaH | ahorAtropavAsena shuklatIrthe vyapohati || 41\.75|| kArttikasya tu mAsasya kR^iShNapakShe chaturdashI | ghR^itena snApayeddevamupoShya parameshvaram || 41\.76|| ekaviMshatkulopeto na chyavedIshvarAlayAt | tapasA brahmacharyeNa yaj~nadAnena vA punaH || 41\.77|| na tAM gatimavApnoti shuklatIrthe tu yAM labhet | shuklatIrthaM mahAtIrthamR^iShisiddhaniShevitam || 41\.78|| tatra snAtvA naro rAjan punarjanma na vindati | ayane vA chaturdashyAM sa~NkrAntau viShuve tathA || 41\.79|| snAtvA tu sopavAsaH san vijitAtmA samAhitaH | dAnaM dadyAdyathAshakti prIyetAM harisha~Nkarau || 41\.80|| etat tIrthaprabhAveNa sarvaM bhavati chAkShayam | anAthaM durgataM vipraM nAthavantamathApi vA || 41\.81|| udvAdayati yastIrthe tasya puNyaphalaM shR^iNu | yAvat tadromasa~NkhyA tu tatprasUtikuleShu cha || 41\.82|| tAvadvarShasahasrANi rudraloke mahIyate | tato gachCheta rAjendra yamatIrthamanuttamam || 41\.83|| kR^iShNapakShe chaturdashyAM mAghamAse yudhiShThira | snAnaM kR^itvA naktabhojI na pashyedyonisa~NkaTam || 41\.84|| tato gachCheta rAjendra eraNDItIrthamuttamam | sa~Ngame tu naraH snAyAdupavAsaparAyaNaH || 41\.85|| brAhmaNaM bhojayedekaM koTirbhavati bhojitAH | eraNDIsa~Ngame snAtvA bhaktibhAvAttu ra~njitaH || 41\.86|| mR^ittikAM shirasi sthApya avagAhya cha tajjalam | narmadodakasammishraM muchyate sarvakilbiShaiH || 41\.87|| tato gachCheta rAjendra tIrthaM kallolakeshvaram | ga~NgAvatarate tatra dine puNye na saMshayaH || 41\.88|| tatra snAtvA cha pItvA cha dattvA chaiva yathAvidhi | sarvapApavinirmukto brahmaloke mahIyate || 41\.89|| nanditIrthaM tato gachChet snAnaM tatra samAcharet | prIyate tasya nandIshaH somaloke mahIyate || 41\.90|| tato gachCheta rAjendra tIrthaM tvanarakaM shubham | tatra snAtvA naro rAjan narakaM naiva pashyati || 41\.91|| tasmiMstIrthe tu rAjendra svAnyasthIni vinikShipet | rUpavAn jAyate loke dhanabhogasamanvitaH || 41\.92|| tato gachCheta rAjendra kapilAtIrthamuttamam | tatra snAtvA naro rAjan gosahasraphalaM labhet || 41\.93|| jyeShThamAse tu samprApte chaturdashyAM visheShataH | tatropoShya naro bhaktyA dadyAddIpaM ghR^itena tu || 41\.94|| ghR^itena snApayedrudraM saghR^itaM shrIphalaM dahet | ghaNTAbharaNasaMyuktAM kapilAM vai pradApayet || 41\.95|| sarvAbharaNasaMyuktaH sarvadevanamaskR^itaH | shivatulyabalo bhUtvA shivavat krIDate chiram || 41\.96|| a~NgArakadine prApte chaturthyAM tu visheShataH | snApayitvA shivaM dadyAdbrAhmaNebhyastu bhojanam || 41\.97|| sarvabhogasamAyukto vimAne sarvakAmike | gatvA shakrasya bhavanaM shakreNa saha modate || 41\.98|| tataH svargAt paribhraShTo dhanavAn bhogavAn bhavet | a~NgArakanavamyAM tu amAvAsyAM tathaiva cha || 41\.99|| snApayet tatra yatnena rUpavAn subhago bhavet | tato gachCheta rAjendra gaNeshvaramanuttamam || 41\.100|| shrAvaNe mAsI samprApte kR^iShNapakShe chaturdashI | snAtamAtro narastatra rudraloke mahIyate || 41\.101|| pitR^INAM tarpaNaM kR^itvA muchyate sa R^iNatrayAt | ga~NgeshvarasamIpe tu ga~NgAvadanamuttamam || 41\.102|| akAmo vA sakAmo vA tatra snAtvA tu mAnavaH | AjanmajanitaiH pApairmuchyate nAtra saMshayaH || 41\.103|| tasya vai pashchime deshe samIpe nAtidUrataH | dashAshvamedhikaM tIrthaM triShu lokeShu vishrutam || 41\.104|| upoShya rajanImekAM mAsi bhAdrapade shubhe | amAvasyAM naraH snAtvA pUjayedvR^iShabhadhvajam || 41\.105|| kA~nchanena vimAnena ki~NkiNIjAlamAlinA | gatvA rudrapuraM ramyaM rudreNa saha modate || 41\.106|| sarvatra sarvadivase snAnaM tatra samAcharet | pitR^INAM tarpaNaM kuryAdashvamedhaphalaM labhet || 41\.107|| iti shrIkUrmapurANe ShaTsAhasryAM saMhitAyAmuparivibhAge ekachatvArisho.adhyAyaH || 41|| \section{42} kUrmapurANe uttarabhAge dvichatvAriMshattamo.adhyAyaH | mArkaNDeya uvAcha tato gachCheta rAjendra bhR^igutIrthamanuttamam | tatra devo bhR^iguH purvaM rudramArAdhayat purA || 42\.1|| darshanAt tasya devasya sadyaH pApAt pramuchyate | etat kShetraM suvipulaM sarvapApapraNAshanam || 42\.2|| tatra snAtvA divaM yAnti ye mR^itAste.apunarbhavAH | upAnahostathA yugmaM deyamannaM sakA~nchanam || 42\.3|| bhojanaM cha yathAshakti tadasyAkShayamuchyate | kSharanti sarvadAnAni yaj~nadAnaM tapaH kriyA || 42\.4|| akShayaM tat tapastaptaM bhR^igutIrthe yudhiShThira | tasyaiva tapasogreNa tuShTena tripurAriNA || 42\.5|| sAnnidhyaM tatra kathitaM bhR^igutIrthe yudhiShThira | tato gachCheta rAjendra gautameshvaramuttamam || 42\.6|| yatrArAdhya trishUlA~NkaM gautamaH siddhimAptavAn | tatra snAtvA naro rAjan upavAsaparAyaNaH || 42\.7|| kA~nchanena vimAnena brahmaloke mahIyate | vR^iShotsargaM tato gachChechChAshvataM padamApnuyAt || 42\.8|| na jAnanti narA mUDhA viShNormAyAvimohitAH | dhautapApaM tato gachCheddhautaM yatra vR^iSheNa tu || 42\.9|| narmadAyAM sthitaM rAjan sarvapAtakanAshanam | tatra tIrthe naraH snAtvA brahmahatyAM vyapohati || 42\.10|| tatra tIrthe tu rAjendra prANatyAgaM karoti yaH | chaturbhujastrinetrashcha haratulyabalo bhavet || 42\.11|| vaset kalpAyutaM sAgraM shivatulyaparAkramaH | kAlena mahatA jAtaH pR^ithivyAmekarAD bhavet || 42\.12|| tato gachCheta rAjendra haMsatIrthamanuttamam | tatra snAtvA naro rAjan brahmaloke mahIyate || 42\.13|| tato gachCheta rAjendra siddho yatra janArdanaH | varAhatIrthamAkhyAtaM viShNulokagatipradam || 42\.14|| tato gachCheta rAjendra chandratIrthamanuttamam | paurNamAsyAM visheSheNa snAnaM tatra samAcharet || 42\.15|| snAtamAtro narastatra pR^ithivyAmekarAD bhavet | devatIrtha tato gachChet sarvadevanamaskR^itam || 42\.16|| tatra snAtvA cha rAjendra daivataiH saha modate | tato gachCheta rAjendra sha~NkitIrthamanuttamam || 42\.17|| yat tatra dIyate dAnaM sarvaM koTiguNaM bhavet | tato gachCheta rAjendra tIrthaM paitAmahaM shubham || 42\.18|| yattatra kriyate shrAddhaM sarvaM tadakShayaM bhavet | sAvitrItIrthamAsAdya yastu prANAn parityajet || 42\.19|| vidhUya sarvapApAni brahmaloke mahIyate | manoharaM tu tatraiva tIrthaM paramashobhanam || 42\.20|| snAtvA tatra naro rAjan rudraloke mahIyate | tato gachCheta rAjendra kanyAtIrthamanuttamam || 42\.21|| snAtvA tatra naro rAjansarvapApaiH pramuchyate | shuklapakShe tR^itIyAyAM snAnamAtraM samAcharet || 42\.22|| snAtamAtro narastatra pR^ithivyAmekarAD bhavet | svargabinduM tato gachChettIrthaM devanamaskR^itam || 42\.23|| tatra snAtvA naro rAjan durgatiM naiva gachChati | apsareshaM tato gachChet snAnaM tatra samAcharet || 42\.24|| krIDate nAkalokastho hyapsarobhiH sa modate | tato gachCheta rAjendra bhArabhUtimanuttamam || 42\.25|| upoShito.archayedIshaM rudraloke mahIyate | asmiMstIrthe mR^ito rAjan gANapatyamavApnuyAt || 42\.26|| kArttike mAsi deveshamarchayet pArvatIpatim | ashvamedhAddashaguNaM pravadanti manIShiNaH || 42\.27|| vR^iShabhaM yaH prayachCheta tatra kundendusaprabham | vR^iShayuktena yAnena rudralokaM sa gachChati || 42\.28|| etat tIrthaM samAsAdya yastu prANAn parityajet | sarvapApavishuddhAtmA rudralokaM sa gachChati || 42\.29|| jalapraveshaM yaH kuryAt tasmiMstIrthe narAdhipa | haMsayuktena yAnena svargalokaM sa gachChati || 42\.30|| eraNDyA narmadAyAstu sa~NgamaM lokavishrutam | tachcha tIrthaM mahApuNyaM sarvapApapraNAshanam || 42\.31|| upavAsakR^ito bhUtvA nityaM vrataparAyaNaH | tatra snAtvA tu rAjendra muchyate brahmahatyayA || 42\.32|| tato gachCheta rAjendra narmadodadhisa~Ngamam | jamadagniriti khyAtaH siddho yatra janArdanaH || 42\.33|| tatra snAtvA naro rAjan narmadodadhisa~Ngame | triguNaM chAshvamedhasya phalaM prApnoti mAnavaH || 42\.34|| tato gachCheta rAjendra pi~Ngaleshvaramuttamam | tatra snAtvA naro rAjan rudraloke mahIyate || 42\.35|| tatropavAsaM yaH kR^itvA pashyeta vimaleshvaram | saptajanmakR^itaM pApaM hitvA yAti shivAlayam || 42\.36|| tato gachCheta rAjendra alikAtIrthamuttamam | upoShya rajanImekAM niyato niyatAshanaH || 42\.37|| asya tIrthasya mAhAtmyAnmuchyate brahmahatyayA | etAni tava sa~NkShepAt prAdhAnyAt kathitAni tu || 42\.38|| na shakyA vistarAdvaktuM sa~NkhyA tIrtheShu pANDava | eShA pavitrA vimalA nadI trailokyavishrutA || 42\.39|| narmadA saritAM shreShThA mahAdevasya vallabhA | manasA saMsmaredyastu narmadAM vai yudhiShThira || 42\.40|| chAndrAyaNashataM sAgraM labhate nAtra saMshayaH | ashraddadhAnAH puruShA nAstikyaM ghoramAshritAH || 42\.41|| patanti narake ghore ityAha parameshvaraH | narmadAM sevate nityaM svayaM devo maheshvaraH | tena puNyA nadI j~neyA brahmahatyApahAriNI || 42\.42|| iti shrIkUrmapurANe ShaTsAhasryAM saMhitAyAmuparivibhAge dvichatvAriMsho.adhyAyaH || 42|| iti tIrthamAhAtmyaM samAptam | ## Proofread by PSA Easwaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}