Samskriti-Gitika (The Song of Culture)

 संस्कृति-गीतिका 
विजयतेतराम्, ॐकार-भारती, संस्कार-भारती ।
      शुचि-वर्णम्, अन्तःकरणम्,
      भुवि भव्या प्रतिभा विभास्वती ।
विजयतेतराम्, ॐकार-भारती, संस्कार-भारती ॥ (ध्रुवम्)॥

गुण-समुज्ज्वला सौम्या सुजला भारत-जननी ;
वैभव-पूर्णा मधुराभरणा भुवन-पावनी ।
      सुनिर्मला, रम्योर्मि-चला,
      इह गङ्गा यमुना सरस्वती ।
विजयतेतराम्, ॐकार-भारती, संस्कार-भारती ॥ १॥

विश्व-विश्रुता श्रुतिरनवद्या विद्या सकला ;
चर्चित-विबुधा ललिता विविधा प्रिय-चारुकला ।
      विराजते, निखिल-भारते,
      परमार्या परम्परा महती ।
विजयतेतराम्, ॐकार-भारती, संस्कार-भारती ॥ २॥

सङ्गीत-सुधा सङ्गत-रङ्गा जन-मनोहरा ;
प्रसरति नित्यं नृत्य-माधुरी रस-रागभरा ।
      चित्र-कला, सुपवित्र-फला,
      प्रतिहृदयं प्रमुदं वितन्वती ।
विजयतेतराम्, ॐकार-भारती, संस्कार-भारती ॥ ३॥

शिव-सङ्कल्पा शिल्प-चातुरी वाङ्मयाङ्किता ;
स्थापत्य-दिशा मन्दिर-माला समभिनन्दिता ।
      सुरञ्जिनी, ताप-भञ्जिनी,
      चिर-सुभगा शुभ-कीर्त्ति-व्रतती ।
विजयतेतराम्, ॐकार-भारती, संस्कार-भारती ॥ ४॥

जीवन-धारा विगत-विकारा वहतु सौख्यदा ;
मानवताया ज्योति-र्दिव्यं लसतु सर्वदा ।
      जागरणे, कर्माचरणे,
      इह सुजनो महतां तपोव्रती ।
विजयतेतराम्, ॐकार-भारती, संस्कार-भारती ॥ ५॥

संहति-सूत्रा भारत-पुत्रा मैत्री-भरणे ;
शान्ति-भावना धार्या नियतं पर्यावरणे ।
      मातृ-पदे, मङ्गलास्पदे,
      प्रणति-र्नो नितरां भक्तिमती ।
विजयतेतराम्, ॐकार-भारती, संस्कार-भारती ॥ ६॥

    -- गीतरचना : डाॅ हरेकृष्ण-मेहेरः

Copyright Dr.Harekrishna Meher