प्रातर्निवेदनकारिकाः
श्रीमते रामानुजाय नमः ॥ श्रीगणेशाय नमः ॥
उत्थाय शयने तस्मिन्नासीनो नियतेन्द्रियः ।
त्रस्तनिर्विण्णहृदयो व्यर्थं वीक्ष्य गतं वयः ॥ १॥
तापत्रयेण चाक्रान्तस्तीव्रेणाध्यात्मिकादिना ।
दावजेनाग्निना लीढो भ्राम्यन्निव वने मृगः ॥ २॥
संसारवागुरान्तस्थो लूनपक्ष इवाण्डजः ।
अपश्यन्निर्गमोपायमागामिष्वपि जन्मसु ॥ ३॥
अकर्यैरतिबीभत्सैः क्रियमाणैः कृतैरपि ।
लज्जितश्च विषण्णश्च स्मर्यमाणैः स्वकर्मभिः ॥ ४॥
अविनीतमशिक्षार्हमसद्गुणगणाकरम् ।
अवधार्य स्वमात्मानमचिकित्स्याशुभाश्रयम् ॥ ५॥
दह्यमानेन्धनान्तस्थो विस्फुरन्निव कीटकः ।
अलब्धनिर्गमस्तिष्ठन्मध्ये मरणजन्मनोः ॥ ६॥
विह्वलश्च विषण्णश्च विमृगन्स्वामिमां दशाम् ।
चिन्तयेत्प्रथमं चैवमाचारप्रियमात्मनः ॥ ७॥
संसारचक्रमारोप्य बलिभिः कर्मरज्जुभिः ।
कालेनाकृष्यमाणस्य जङ्गमस्थावरात्मनः ॥ ८॥
अहो मे महती याता निष्फला जन्मसन्ततिः ।
अनाराधितगोविन्दचरणाम्भोरुहद्वया ॥ ९॥
अनास्वादितसत्कर्मज्ञानभक्तिसुधारसा ।
अदृष्टनन्तसंसारसागरोत्तारणप्लवा ॥ १०॥
श्रुतिस्मृत्युदिताशेषसदाचारपराङ्मुखी ।
त्यक्तवर्णसमाचारा भ्रष्टा वैदिकवर्त्मनः ॥ ११॥
अनुपासितसद्वृद्धास्वीकृतासत्समागमा ।
असम्पादितशुश्रूषा गुर्वाचार्यपितृष्वपि ॥ १२॥
निजकर्मजदेवादिदेहाध्यस्तात्मभावना ।
तद्भावनानुगोद्भूतसुखदुःखव्यवस्थितिः ॥ १३॥
असम्भूतस्वयाथात्म्यज्ञानजोत्तमनिर्वृतिः ।
पशुवत्प्राकृतैरेव गुणैरधिकनिर्वृता ॥ १४॥
न कर्मनिष्ठा नात्मज्ञा नापि भक्तियुता हरौ ।
नोद्युक्ता भक्तिहीनत्वात्तत्क्रियास्वर्चनादिषु ॥ १५॥
कर्मभिः पुण्यपापाख्यैरविद्यापरनामभिः ।
धूमैरिवार्चिरग्नेयं ज्ञानमावृत्य देहिनः ॥ १६॥
भूषयित्वा स्वकं देहं शब्दाद्यैः स्वार्जितैर्गुणैः ।
दर्शयित्वा स्वसौन्दर्यमात्मने तिष्ठमानया ॥ १७॥
निरस्तातिशयाह्लादसुखभावैकलक्षणम् ।
सञ्च्छाद्य स्वगुणैरेवं स्वरूपं परमात्मनः ॥ १८॥
गुणमय्या प्रकृत्याख्यभगवन्माययानया ।
स्वसँल्लीनानन्तजीवकृतकर्मानुरूपया ॥ १९॥
गुणत्रयाश्रयानन्तविचित्रपरिणामया ।
अतिदुस्तरयादेवप्रपत्तिरहितात्मभिः ॥ २०॥
प्रलोभ्यमाना सततं तयैवात्यन्तनिर्वृता ।
अजानतीव स्वहितं मूकस्वप्नानुकारिणी ॥ २१॥
निष्पानीये निरालम्बे निच्छाये निरुपाश्रये ।
द्राघीयस्यशुभे मार्गे यमस्य सदनं प्रति ॥ २२॥
गच्छतो मेऽसहायस्य वर्द्धयन्ती भयं महत् ।
अतीतापि सदैवैषा तिष्ठतीव पुरो मम ॥ २३॥
गतायास्त्वीदृशं रूपं वर्तमानेऽपि जन्मनि ।
तथैव सुमहान्कालोगतक्षण इवाल्पकः ॥ २४॥
अलब्धसुखसंस्पर्शमकृताघौघनिष्कृतिः ।
विनैव हरिपादार्चामहोपश्यत एव मे ॥ २५॥
किं करिष्यामि पदयोर्निपतिष्यामि कस्य वा ॥ २६॥
इत उर्ध्वमहं तावद्यावज्जीवं श्रियः श्रियः ।
पदयोरर्चनं कर्तुं यतमानः समाहितः ॥ २७॥
अभिगच्छन्हरिं प्राप्तः पश्चाद् द्रव्याणि चार्जयन् ।
अर्चयंश्च ततो देवं ततो मन्त्राञ्जपन्नपि ॥ २८॥
ध्यायन्नपि परं देवं कालेषूक्तेषु पञ्चसु ।
वर्तमानः सदा चैव पाञ्चकालिकवर्त्मना ॥ २९॥
स्वार्जितैर्गन्धपुष्पाद्यैः शुभैः शक्त्यनुरूपतः ।
आराधयन्हरिं भक्त्या गमयिष्यामि वासरान् ॥ ३०॥
इति वेदान्तचार्यविरचिताः प्रातर्निवेदनकारिकाः समाप्ताः ।
Encoded and proofread by Mohan Chettoor