% Text title            : Jambudvipa Varnanam from Brahmanda Mahapurana
% File name             : jambUdvIpavarNanam.itx
% Category              : misc
% Location              : doc\_z\_misc\_general
% Transliterated by     : Ruma Dewan
% Proofread by          : Ruma Dewan
% Description/comments  : Brahmanda Mahapurana vAyuproktaM pUrvabhAgaH . anuShangapAdaH \- 2.  adhyAyaH 18
% Latest update         : November 12, 2023
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Jambudvipavarnanam in Brahmandamahapurana ..}##
\itxtitle{.. brahmANDamahApurANAntargate jambUdvIpavarNanam ..}##\endtitles ##
sUta uvAcha \-
madhye himavataH pR^iShThe kailAso nAma parvataH |
tasminnivasati shrImAnkuberaH saha rAkShasaiH || 1||
apsaronucharo rAjA modate hyalakAdhipaH |
kailAsapAdAtsambhUtaM puNyaM shItajalaM shubham || 2||
madaM nAmnA kumudvattatsarastUdadhisannibham |
tasmAddivyAtprabhavati nadI mandAkinI shubhA || 3||
divyaM cha nandanavanaM tasyAstIre mahadvanam |
prAguttareNa kailAsAddivyaM sarvauShadhiM girim || 4||
ratnadhAtumayaM chitraM sabalaM parvataM prati |
chandraprabho nAma giriH sushubhro ratnasannibhaH || 5||
tasya pAde mahaddivyaM svachChodaM nAma tatsaraH |
tasmAddivyAtprabhavati svachChodA nAma nimnagA || 6||
tasyAstIre mahaddivyaM vanaM chaitrarathaM shubham |
tasmin girau nivasati maNibhadraH sahAnugaH || 7||
yakShasenApatiH krUro guhyakaiH parivAritaH
puNyA mandAkinI chaiva nadI svachChodakA cha yA || 8||
mahImaNDalamadhyena praviShTe te mahodadhim |
kailAsAddakShiNe prAchyAM shivasattvauShadhiM girim || 9||
manaH shilAmayaM divyaM chitrA~NgaM parvataM prati |
lohito hemashR^i~Ngashcha giriH sUryaprabho mahAn || 10||
tasya pAde mahaddivyaM lohitaM nAma tatsaraH |
tasmAtpuNyaH prabhavati lauhityaH sa nado mahAn || 11||
devAraNyaM vishokaM cha tasya tIre mahadvanam |
tasmingirau nivasati yakSho maNidharo vashI || 12||
saumyaiH sudhArmikaishchaiva guhyake parivAritaH |
kailAsAddakShiNe pArshve krUrasattvauShadhirgiriH || 13||
vR^itrakAyAtkilotpannama~njanaM trikakuM prati |
sarvadhAtumayastatra sumahAnvaidyuto giriH || 14||
tasya pAde saraH puNyaM mAnasaM siddhasevitam |
tasmAtprabhavate puNyA sarayUrlokavishrutA || 15||
tasyAstIre vanaM divyaM vaibhrAjaM nAma vishrutam |
kuberAnucharastatra prahetitanayo vashI || 16||
brahmapito nivasati rAkShaso.anantavikramaH |
antarikShacharairghorairyAtudhAnashatairvR^itaH || 17||
apareNa tu kailAsAtpuNyasattvauShadhirgiriH |
aruNaH parvatashreShTho rukmadhAtumayaH shubhaH || 18||
bhavasya dayitaH shrImAnparvato meghasannibhaH |
shatakaumbhamayaiH shubhraiH shilAjAlaiH samAvR^itaH || 19||
shAtasa~NkhyaistApanIyaiH shR^i~Ngairdivamivollikhan |
mu~njavAMstu mahAdivyo durgaH shailo himA~nchitaH || 20||
tasmingirau nivasati girIsho dhUmralochanaH |
tasya pAdAtprabhavati shailodaM nAma tatsaraH || 21||
tasmAtprabhavate puNyA shilodA nAma nimnagA |
sA chakShuH sItayormadhye praviShTA lavaNodadhim || 22||
tasyAstIre vanaM divyaM vishrutaM surabhIti vai |
savyottareNa kailAsAchChivaH sattvauShadhirgiriH || 23||
gauraM nAma girishreShThaM haritAlamayaM prati |
hiraNyashR^i~NgaH sumahAn divyo maNimayo giriH || 24||
tasya pAde mahaddivyaM shubhaM kA~nchanavAlukaM
ramyaM bindusaro nAma yatra rAjA bhagIrathaH || 25||
ga~NgAnimittaM rAjarShiruvAsa bahulAH samAH |
divaM yAsyanti te purve ga~NgAtoyapariplutAH || 26||
madIyA iti nishchitya samAhitamanAH shive |
tatra tripathagA devI prathamaM tu pratiShThitA |
somapAdAtprasUtA sA saptadhA pratipadyate || 27||
yUpA maNimayAstatra vitatAshcha hiraNmayAH |
tatreShTvA tu gataH siddhiM shakraH sarvaiH suraiH saha || 28||
divi chChAyApatho yastu anunakShatramaNDalaH |
dR^ishyate bhAsvaro rAtrau devI tripathagA tu sA || 29||
antarikShaM divaM chaiva bhAvayantI surApagA |
bhavottamA~Nge patitA saMruddhA yogamAyayA || 30||
tasyA ye bindavaH kechit kruddhAyAH patitA bhuvi |
kR^itaM tu tairbindusarastato bindusaraH smR^itam || 31||
tato niruddhA sA devI bhavena smayatA kila |
chintayAmAsa manasA sha~NkarakShepaNaM prati || 32||
bhittvA vishAmi pAtAlaM srotasAgR^ihya sha~Nkaram |
j~nAtvA tasyA abhiprAyaM krUraM devyAshchikIrShitam || 33||
tirobhAvayituM buddhirAsIda~NgeShu tAM nadIm |
tasyAvalepaM j~nAtvA tu nadyAHkruddhastu sha~NkaraH || 34||
nyaruNAchcha shirasyenAM vegena patatIM bhuvi |
etasminneva kAle tu dR^iShTvA rAjAnamagrataH || 35||
dhamanIsantataM kShINaM kShudhayA vyAkulendriyam |
anena toShitashchAhaM nadyarthaM pUrvameva tu || 36||
buddhA.asya varadAnaM cha kopaM niyatavAMstu saH |
brahmaNo vachanaM shrutvA dhAraya svarNadImiti || 37||
tato visarjayAmAsa saMruddhAM svena tejasA |
nadIM bhagIrathasyArthe tapasogreNa toShitaH || 38||
tato visR^ijyamAnAyAH srotastatsaptadhA gatam |
tisraH prAchIbhimukhaM pratIchIM tisra eva tu || 39||
nadyAH srotastu ga~NgAyAH pratyapadyata saptadhA |
nalinI hlAdinI chaiva pAvanI chaiva prAchyagAH || 40||
sItA chakShushcha sindhushcha pratIchIM dishamAsthitAH |
saptamI tvanvagAttAsAM dakShiNena bhagIratham || 41||
tasmAdbhAgIrathI yA sA praviShTA lavaNodadhim |
saptaitA bhAvayantIdaM himAhvaM varShameva tu || 42||
prasUtAH sapta nadyastAH shubhA bindusarodbhavAH |
nAnAdeshAnplAvayantyo mlechChaprAyAMstu sarvashaH || 43||
upagachChanti tAH sarvA yato varShati vAsavaH |
shilIndhrAnkuntalAMshchInAnbarbarAnyavanAndhrakAn || 44||
puShkarAMshcha kulindAMshcha a~ncholadvicharAshcha ye |
kR^itvA tridhA siMhavantaM sItA.agAtpashchimodadhim || 45||
atha chInamarUMshchaiva tAlAMshcha masamUlikAn |
bhadrA stuMShArA.NllAmyAkAnbAhlavAnpAraTAnkhashAn || 46||
etA~njanapadAMshchakShuH plAvayantI gatodadhim |
daradAMshcha sakAshmIrAn gAndharAn raurasAn kuhAn || 47||
shivashailAnindrapadAnvasatIshcha visarjamAn |
saindhavAvrandhrakarakA~nChamaThAbhIrarohakAn || 48||
shunAmukhAMshchorddhvamarUnsindhuretAnniShevate |
gandharvakinnarAnyakShAnrakShovidyAdharoragAn || 49||
kalApagrAmakAMshchaiva pAradAMstadgaNAn khashAn |
kirAtAMshcha pulindAMshcha kurUn sabharatAnapi || 50||
pa~nchAlAnkAshimatsyAMshcha magadhA~NgAMstathaiva cha |
suhmottarAMshcha va~NgAMshcha tAmraliptAMstathaiva cha || 51||
etA~njanapadAnmAnyAnga~NgA bhAvayate shubhAn |
tataH pratihatA vindhyAtpraviShTA lavaNodadhim || 52||
tatashcha hlAdinI puNyA prAchImabhimukhA yayau |
plAvayantyupabhAgAMshcha naiShadhAMshcha trigartakAn || 53||
dhIvarAnR^iShikAMshchaiva tathA nIlamukhAnapi |
kekarAnauShTakarNAMshcha kirAtAnapi chaiva hi || 54||
kAlodarAnvivarNAMshcha kumArAnsvarNabhUmikAn |
AmaNDalaM samudrasya tirobhUtAMshcha pUrvataH || 55||
tatastu pAvanI chApi prAchImeva dishaM yayau |
supathAnplAvayantIha tvindradyumnasaropi cha || 56||
tathA kharapathAMshchaiva vetrasha~NkupathAnapi |
madhyatojAnakimatho kuthaprAvaraNAnyayau || 57||
indradvIpasamudraM  tu praviShTAM lavaNodadhim |
tatastu nalinI prAyAt prAchImAshAM javena tu || 58||
tomarAnbhAvayantIha haMsamArgAnsahaihayAn |
pUrvAndeshAMshcha sevantI bhittvA sA bahudhAgirIn || 59||
karNaprAvaraNAnprApya sa~NgatyA shvamukhAnapi |
sikatAparvatamaruM gatvA vidyAdharAnyayau || 60||
nagamaNDalamadhyena praviShTA lavaNodadhim |
tAsAM nadyupanadyashcha shatasho.atha sahasrashaH || 61||
upagachChanti tAH sarvA yato varShati vAsavaH |
vasvaukasAyAstIre tu vanaM surabhi vishrutam || 62||
hiraNyashR^i~Nge vasati vidvAnkauberako vashI |
yaj~nopetashcha sumahAnamitaujAH suvikramaH || 63||
tatratyaistaiH parivR^ito vidvadbhirbrahmarAkShasaiH |
kuberAnucharA hyete chatvArastu samAH smR^itAH || 64||
evameva tu vij~neyA R^iddhiH parvatavAsinAm |
paraspareNa dviguNA dharmataH kAmato.arthataH || 65||
hemakUTasya pR^iShThe tu varchovannAmataH saraH |
manasvinI prabhavati tasmAjjyotiShmatI cha yA || 66||
avagADhe hyubhayataH samudrau  pUrvapashchimau |
saro viShNupadaM nAma niShadhe parvatottame || 67||
tasmAddvayaM prabhavati gAndharvI nAkulI cha taiH |
meroH pArshvAtprabhavati hradashchandra prabho mahAn || 68||
tatra jambUnadI puNyA yasyA jAmbUnadaM smR^itam |
payodaM tu saro nIle sushubhraM puNDarIkavat || 69||
puNDarIkA payodA ya tasmAnnadyau vinirgate |
shvetAtpravarttate puNyaM sarayUrmAnasAddhruvam || 70||
jyotsnA cha mR^igakAmA cha tasmAddve sambabhUvatuH |
saraH kuruShu vikhyAtaM padmamInadvijAkulam || 71||
rudra kAntamiti khyAtaM nirmitaM tadbhavena tu |
anye chApyatra vikhyAtAH padmamInadvijAkulAH || 72||
nAmnA hradA jayA nAma dvAdashodadhisannibhAH |
tebhyaH shAntA cha mAdhvI cha dve nadyau sambabhUvatuH || 73||
yAni kimpuruShAdyAni teShu devo na varShati |
udbhidAnyudakAnyatra pravahanti saridvarAH || 74||
R^iShabho dundubhishchaiva dhUmrashcha sumahAgiriH |
pUrvAyatA mahAparvA nimagnA lavaNAmbhasi || 75||
chandraH kAkastathA droNaH sumahAntaH shilochchayAH |
udagyAtA udIchyAntA avagADhA mahodadhim || 76||
somakashcha varAhashcha nAradashcha mahIdharaH |
pratIchyAmAyatAste vai praviShTA lavaNodadhim || 77||
chakro balAhakashchaiva mainAko yashcha parvataH |
AyatAste mahAshailAH samudraM  dakShiNaM prati || 78||
chakramainAkayormadhye vidishaM dakShiNAM prati |
tatra saMvarttako nAma so.agniH pibati tajjalam || 79||
nAmnA samudravAsastu aurvaHsa vaDavAmukhaH |
dvAdashaite praviShTA hi parvatA lavaNodadhim || 80||
mahendra bhayavitrastAH pakShachChedabhayAtpurA |
yadetaddR^ishyate chandre  shvete kR^iShNashashAkR^iti || 81||
bhAratasya tu varShasya bhedAste nava kIrttitAH |
ihoditasya dR^ishyante yathAnye.anyatra chodite || 82||
uttarottarameteShAM varShamuddishyate guNaiH |
ArogyAyuH pramANAnAM dharmataH kAmato.arthataH || 83||
samanvitAni bhUtAni puNyairetaistu bhAgashaH |
vasanti nAnAjAtIni teShu varSheShu tAni vai |
ityeShA dhArayantIdaM pR^ithvI vishvaM jagatsthitam || 84||

|| iti brahmANDamahApurANe jambUdvIpavarNanam ||

|| brahmANDamahApurANam | vAyuproktaM pUrvabhAgaH | anuSha~NgapAdaH \- 2|
adhyAyaH 18 \- jambUdvIpavarNanam ||

##
.. brahmANDamahApurANam . vAyuproktaM pUrvabhAgaH . anuSha~NgapAdaH - 2.
adhyAyaH 18 - jambUdvIpavarNanam ..


Notes:
Brahmāṇḍa Mahā-Purāṇa ##brahmANDa mahApurANa ##; in this chapter has the description about the continent Jambūdvīpa ##jambUdvIpa ## that has Bhāratavarṣa ##bhAratavarSha ## as one of it’s subcontinent. Mount Kailāsa ##kailAsa shaila ## is described along with the story that involves śiva ##shiva##, Bhagīratha ##bhagIratha ## and manifestation of River Gaṅgā ##ga~NgA##.

Encoded and proofread by Ruma Dewan

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}