Gita-Gitika

 गीता-गीतिका 
श्रीमद्-भगवद्-गीता,
प्रहर्षिणीयं
महर्षि-कृष्ण-
द्वैपायन-प्रणीता ।
श्रीमद्-भगवद्-गीता ।
गीता, गीता, गीता ॥ (ध्रुवम्)॥

     पुण्या श्रीहरि-पार्थ-सनाथा,
     निर्भर-गर्भित- गौरव-गाथा ।
          महाभारते
          विश्व-हित-रते
     यस्या वाणी सदा यथार्था ।
     सुमेधसा समधीता,
     श्रीमद्-भगवद्-गीता ।
     गीता, गीता, गीता ॥ १॥

सकलोपनिषद् गाभी सुभगा,
प्रभु-गोविन्दे दोग्धरि शुभगा ।
 निवसति वत्सः
 पार्थोऽनलसः
भोक्तृ-सुधीभि-र्धृतापवर्गा ।
सुदुग्ध-रूपा पीता,
श्रीमद्-भगवद्-गीता ।
गीता, गीता, गीता ॥ २॥

     कर्म कुरु त्वं स्वधर्म-सक्तः,
     देहि गुरुत्वं कर्मणि शक्तः ।
          विवेक-बुद्ध्या
          मानस-शुद्ध्या
     भुवि भव सुतरां विभु-पद-भक्तः ।
     सम-दर्शितोष्ण-शीता,
     श्रीमद्-भगवद्-गीता ।
     गीता, गीता, गीता ॥ ३॥

समुपदिशति या मर-संसारे,
मानव-मानं सुव्यवहारे ।
 तत्त्वं सत्त्वं
 याति महत्त्वं
ज्ञाने भक्तौ कर्माचारे ।
आत्म-विचार-पुनीता,
श्रीमद्-भगवद्-गीता ।
गीता, गीता, गीता ॥ ४॥

     कलयति सकलं कलि-मल-नाशम्,
     तिरयति मर्त्त्ये संसृति-पाशम् ।
          सुविहित-योगा
          निरस्त-भोगा
     वितरति दिव्यं हृदि प्रकाशम् ।
     ब्रह्ममयी सम्प्रीता,
     श्रीमद्-भगवद्-गीता ।
     गीता, गीता, गीता ॥ ५॥

    -- गीत-रचना : डाॅ हरेकृष्ण-मेहेरः

Copyright Dr.Harekrishna Meher