Bhaja Vedamatam

 भज वेदमतम् 
अयि मानव सभ्य श‍ृणु प्रिय हे
भव जागरितं कुरु मानविकम् ।
निजमानसिकं त्यज दुष्टतरं
चिरशान्तिपथं भज वेदमतम् ॥ १॥

         श्रुतिसम्मतशाश्वतसारतरं
         स्मृतिगौरववर्द्धनगौरवरम् ।
         भुवि धर्मसहायकभक्तियुतं
         चिरशान्तिपथं भज वेदमतम् ॥ २ ॥

मखनिर्जितसौख्यमपूर्वकरं
मधुहोमविशेषणसारधरम् ।
घृतपायसपिष्टकहव्यधृतं
चिरशान्तिपथं भज वेदमतम् ॥ ३॥

         त्रिदशालयसाधककर्मगुणं
         गुणवैदिकभूसुरसारलितम् ।
         चरमं परमं वरदानयुतं
         चिरशान्तिपथं भज वेदमतम् ॥ ४॥

स्तवमन्त्रमहार्णवसूक्तरतं
बहुतन्त्रविशोधितसाक्ष्यधृतम् ।
करुणामयशाश्वतनित्यनुतं
चिरशान्तिपथं भज वेदमतम् ॥ ५॥

         मुनिचोदितदिव्यदृशा चरमं
         परमं विनिवेदितधर्मधनम् ।
         खिलमानवसम्बलकारुणिकं
         चिरशान्तिपथं भज वेदमतम् ॥ ६॥

परमेश्वरवैभवभूमितलं
शुभशङ्खनिनादितपापहरम् ।
गुरुपावकमुज्ज्वलमास्यगतं
चिरशान्तिपथं भज वेदमतम् ॥ ७॥

         कृतकर्मफलं फलति प्रतिमं
         प्रतिवत्सरयज्ञसमाचरितम् ।
         शुभवैदिकमन्त्रमहाध्वनितं
         चिरशान्तिपथं भज वेदमतम् ॥ ८॥

इति भज वेदमतं (अष्टकं) सम्पूर्णम् ।

Composed, encoded, and proofread by
Dr. Pradipta Kumar Nanda, Kendrapara, Orisa pknanda65 at gmail.com