भारतराष्ट्रवन्दनम्
(गीतिका)
नमामि राष्ट्र-भारतं गुणाकरं प्रभा-रतम् ।
विभाकरं सुधाकरं समस्त-लोक-भास्करम् ॥ नमामि०॥
गिरीन्द्र-वृन्द-वन्दितं सदा सुधाऽऽपगावृतम् ।
प्रफुल्ल-शाखि-शोभितं सगारवैर्निनादितम् ॥ नमामि०॥
प्ररूढ-शस्य-श्यामलं तप-प्रभा-समुज्ज्वलम् ।
श्रुतेर्निनाद-निर्मलं श्रये सदा-समुज्ज्वलम् ॥ नमामि०॥
जय-ध्वज-प्रशोभितं त्रिवर्ण-केतु-राजितम् ।
अमित्र-मान-मर्दनं सुदृप्त-दर्प-भञ्जनम् ॥ नमामि०॥
स्वज्ञान-दीप्ति-भास्वरं गुण-प्रभा-विकस्वरम् ।
स्व-पौरुषाप्त-रोचिष स्वयोजनाप्त-ज्योतिषम् ॥ नमामि०
प्रबुद्ध-शुद्ध-मानसं तपोविघृत-कल्मषम् ।
सदाऽर्यवृन्द-वन्दितं सुधी-प्रवीर-चर्चितम् ॥ नमामि०॥
हुतात्म-दीप्ति-भास्वरं प्रवीर-शौर्य द्योतितम् ।
सुधा दया-गुणाकर श्रये सुखौघ-शान्ति-दम् ॥ नमामि०॥
समस्त-विश्व-वन्दितं गुणोच्चयार्जनोच्छ्रितम् ।
अहिंसया सुखावह समस्त-विश्व-दोष-हम् ॥ नमामि०॥
गुणाञ्चितं प्रभाञ्चितं समस्त-गौरवाञ्चितम् ।
दरिद्र-दीन-तारकं सदाऽऽर्य-वर्त्म-धारकम् ॥ नमामि०॥
त्वदङ्घ्रि-पद्म-सेवनं समस्त-दोष-नाशनम् ।
अशेष-शोक-शोषणं सुखौघ सिन्धु-पोषणम् ॥ नमामि०॥
Proofread by Mandar Mali