Agre Chala Agre Chala

अग्रे चल अग्रे चल

अग्रे चल, अग्रे चल ! निश्चिन्तो रिपुकुपितः सज्जश्चल पौरुषभानो । अग्रे चल, अग्रे चल, अग्रे चल, सैनिकबन्धो ॥ ध्रु०॥ बलं त्वदीयं हस्तिदुर्लभं युद्धकौशलं व्याघ्रजयकरं शौर्यं नितरां लज्जितसिंहं चित्रं तव चिन्तितमपि नामयते धैर्यसुमेरो ॥ १॥ स्वेषां चिन्तां मा कार्षीस्त्वं चितां परेषां रचय केवलं रक्षिष्यामो मुदा त्वज्जनं विस्मरेम स्वप्नेऽपि न वचनं स्वं सुकीर्तिसिन्धो ॥ २॥ तव पत्नी नः अग्रजपत्नी जननी नान्या, निजैव जननी सुतः सुता ते नो भाग्यखनी रिपुनाशादपरं ते मनसि मास्तु आप्तजनमृदो ॥ ३॥ राष्ट्रस्यायं ममापकर्ता इमं मूलतः अस्मि निहन्ता अहं जीविता अयमेको वा रणे रणे घोषस्तव उद्गच्छतु मानिजनेन्दो ॥ ४॥ शत्रुं दग्धुं वाञ्छच्चित्तं दष्टे ओष्ठे तप्तं रक्तं स्फुरिते बाहौ वलयं सक्तं जयो जयो नियतस्तव जयो जयो भारतसूनो ॥ ५॥ रचयिता प्रा. अशोक अकलूजकर, कॅनडा