श्री विष्णु द्वादशाक्षरस्तोत्रम्
श्रीगणेशाय नमः ।
अथ ध्यानम् -
वन्दे चिन्मात्रमेकाक्षरमजममरं पूर्णमानन्दमात्रं
वन्दे सद्ब्रह्मरूपं हरविधिविबुधैर्ध्यायमानं सुपूज्यम् ।
वन्दे सद्मन्त्रबीजं ऋषिगणनिकरैः स्तूयमानञ्च दिव्यं
वन्दे संसारसारं सकलगुणनिधिं वासुदेवं वरेण्यम् ॥ १॥
अथ स्तोत्रम् ।
द्वादशाक्षरमन्त्रस्य ऋषिः प्रजापतिः स्मृतः ।
देवता वासुदेवश्च गायत्रीछन्द उच्यते ॥ १॥
ध्रुवो बीजं च हृच्छक्तिर्भुक्तिमुक्त्योश्च प्राप्तये ।
कृत्वैवं विनियोगञ्च प्राणायामं चरेत् ततः ॥ २॥
पूरके षोडशावृत्या कुम्भके द्वादशस्मृतः ।
रेचके तु दशावृत्या प्राणायामविधिं चरेत् ॥ ३॥
नासाग्रे लोचनकृत्वा मध्ये हृद्कमलेस्थितं !
ध्यायेन्नारायणं देवं व्यापकं ब्रह्मरूपिणम् ॥ ४॥
शङ्खचक्रगदापद्मधरं नीलं चतुर्भुजम् ।
पीताम्बरधरं देवं विष्णुं कमललोचनम् ॥ ५॥
तुलसीदलसंयुक्तवनमालासुशोभितम् ।
सुवर्णमुकुटं रम्यं दिव्यकुण्डलभूषितम् ॥ ६॥
असङ्ख्यचन्द्रसङ्काश साक्षाद्ब्रह्मसनातनम् ।
कैवल्यमोक्षदं सत्यरूपं विश्वात्मकं विभुम् ॥ ७॥
अथवा राधिकानाथं द्विभुजं मुरलीधरम् ।
आजानुबाहुकं दिव्यवदनं श्यामसुन्दरम् ॥ ८॥
मणिमन्मुकुटं तद्वत् कुण्डलं पीतवाससम् ।
कस्तूरीतिलकं यस्य ललाटे सर्वमोहनम् ॥ ९॥
तुलसीमालया पद्ममालया मणिमालया ।
शोभितं शान्तिदं कृष्णमन्तर्हृत्कमलेस्थितम् ॥ १०॥
ध्यात्वैवं पुरूषं पूर्णं वासुदेवं सनातनम् ।
राजमन्त्रजपं कुर्यात् द्वादशाक्षरनामकम् ॥ ११॥
जपान्ते श्रद्धयायुक्तः पाठं कुर्यात् प्रयत्नतः ।
तं दृष्ट्वा भक्तिसंसक्तोवासुदेवः प्रसीदति ॥ १२॥
ॐ नमो भगवते वासुदेवाय ।
(ॐ) ओङ्कार मन्त्रमय पूज्य सदक्षराय
पादत्रयाक्षरमयाय त्रयीश्वराय ।
वेदत्रयाय त्रिगुणात्मत्रिदैवताय
तस्मै नमो भगवते परमामृताय ॥ १३॥
(न) नम्याय सर्वजनहृत्कमलस्थिताय
चाङ्गुष्ठमात्रपुरूषाय विभुत्वगाय ।
ज्योतिर्मयाय तिमिरान्तकनिर्मलाय
तस्मै नमो भगवते परमामृताय ॥ १४॥
(मो) मोक्षप्रदाय सुखदाय धनप्रदाय
ज्ञानप्रदाय सततं परमोज्ज्वलाय ।
ब्रह्मादिदेव निकरैश्च सुपूजिताय
तस्मै नमो भगवते परमामृताय ॥ १५॥
(भ) भक्तस्य दुःखदलनाय च रक्षकाय
धर्मस्य सन्ततमधर्मविनाशकाय ।
नानावतारपृथिवीतलधारणाय
तस्मै नमो भगवते परमामृताय ॥ १६॥
(ग) गव्यप्रियाय सकलेप्सितसम्प्रदाय
सत्यप्रवृद्धिकरणाय सुमङ्गलाय ।
कृष्णावतारकरुणालयसद्व्रताय
तस्मै नमो भगवते परमामृताय ॥ १७॥
(व) वन्द्याय सर्वजगतां सुरसत्तमाय
वंशीविभूषितकराय मनोहराय ।
नाना प्रपञ्च विलयोदय कारणाय
तस्मै नमो भगवते परमामृताय ॥ १८॥
(ते) तेषांहि दुष्टशिशुपालककंशकेशि
कालीयकालयवनादि खलेश्वराणाम् ।
मानंविमर्द्य जगतीतल रक्षणाय
तस्मै नमो भगवते परमामृताय ॥ १९॥
(वा) वासांसि यस्य सकलानि तडिन्निभानि
रूपं नवीन घनसन्निभमाद्यवर्णम् ।
नारायणाय नररूप-विभूषिताय
तस्मै नमो भगवते परमामृताय ॥ २०॥
(सु) सुन्दोपसुन्ददलनाय सुदर्शनाय
हृत्पद्मनिष्ठ शुभविग्रह शोभिताय ।
सद्ब्रह्मचिद्घनपरात्परकेवलाय
तस्मै नमो भगवते परमामृताय ॥ २१॥
(दे) देवाय भक्तभवसागरतारणाय
दुर्दन्तवक्रशिशुपालक कर्दनाय ।
लीलार्थमेव जगतीतलमागताय
तस्मै नमो भगवते परमामृताय ॥ २२॥
(वा) वायुस्तथैव वरुणोऽग्नि शशाङ्करुद्रा
इन्द्राश्विनीसुतकुबेरयमा अजश्व ।
स्तुन्वन्ति यं सततमेव समस्त वेदाः
तस्मै नमो भगवते परमामृताय ॥ २३॥
(य) यस्याक्षरस्य निरवद्यनिरञ्जनस्य
संसारदुःखरहितस्य सुदुर्लभस्य ।
जानन्ति नैव महिमानमशेष जीवा
तस्मै नमो भगवते परमामृताय ॥ २४॥
द्वादशाक्षरनामाख्यं स्तोत्रं यद्रचितं मया ।
समर्पयामि देवाय कृष्णाय परमात्मने ॥ २५॥
द्वादशाक्षरसंयुक्तं स्तोत्रं सर्वोत्तमं शिवम् ।
यः पठेत् प्रातरुत्थाय ज्ञानं सद्यः स विन्दति ॥ २६॥
सदा सद्भक्तिभावेन घ्यात्वा हरिपदामृतम् ।
पाठमात्रेण सद्भक्तो गच्छेद्धि हरिमन्दिरम् ॥ २७॥
इति श्री गायत्रीस्वरूप ब्रह्मचारिणा विरचितं श्री विष्णु
द्वादशाक्षरस्तोत्रं सम्पूर्णम् ॥
Proofread by Vani V