Shri Vamana Stotram

श्रीवामनस्तोत्रम्

(अनुष्टुप्छन्दः) पयोव्रतस्य माहात्म्यं दर्शितुं योह्यवातरत् । वन्दे तं सच्चिदानन्दं वामनं विष्णुरूपिणम् ॥ १॥ अहं भक्तवशोस्म्येतद्दर्शितुं योदितेस्सुतः । वन्दे तं सच्चिदानन्दं वामनं विष्णुरूपिणम् ॥ २॥ पद्भ्यां व्याप्तं हि त्रैलोक्यं माहात्म्यँ स्वं व्यदर्शयत् । वन्दे तं सच्चिदानन्दं वामनं विष्णुरूपिणम् ॥ ३॥ महत्वेऽपि महान्यद्वदणीयान् यो ह्यणीयसः । वन्दे तं सच्चिदानन्दं वामनं विष्णुरूपिणम् ॥ ४॥ बलिर्यस्य कृपापात्रः कृत्वैवात्मनिवेदनम् । वन्दे तं सच्चिदानन्दं वामनं विष्णुरूपिणम् ॥ ५॥ दर्शितं येन सुप्रीत्या श्रेष्ठमात्मनिवेदनम् । वन्दे तं सच्चिदानन्दं वामनं विष्णुरूपिणम् ॥ ६॥ अद्यापि द्वारपालो यो बलेर्भक्तिवशः प्रभुः । वन्दे तं सच्चिदानन्दं वामनं विष्णुरूपिणम् ॥ ७॥ निर्गुणे निष्क्रियो यो हि सगुणस्य क्रियोऽपि सन् । वन्दे तं सच्चिदानन्दं वामनं विष्णुरूपिणम् ॥ ८॥ ॥ इति श्रीमत् परमहंसपरिव्राजकाचार्य सद्गुरू भगवान श्रीधरस्वामीमहाराजविरचितं श्रीवामनस्तोत्रं सम्पूर्णम् ॥