श्रीस्थाणुस्तवः
अथवा त्रिमूर्तिस्तुतिः २
(शुचीन्द्रे)
अम्भोरुहस्थाय चतुर्मुखाय हंसाधिरूढाय हकारधाम्ने ।
हंसादिदेवाय हरीश्वराय अकाररूपाय नमो विधात्रे ॥ १॥
जाग्रत्स्वरूपाय जगज्जनित्रे जटाधरोद्भूतिललाटधाम्ने ।
जानाति कस्त्वन्महिमानमुक्तं जाकाररूपाय नमो विधात्रे ॥ २॥
यवान्न नैवेद्यमहाप्रियाय यज्ञप्रभोक्त्रे यजमानधाम्ने ।
यानादिरूपामलवागधीश यकाररूपाय नामे विधात्रे ॥ ३॥
ज्ञानात्परज्ञेयपरात्पराय नाथाय नाभीजलजोद्भवाय ।
ज्ञानामृतायाम्बुजधामधात्रे नकाररूपाय नमो विधात्रे ॥ ४॥
मायाजगत्सृष्टिकुतूहलाय मान्याय मार्तण्डकलाधराय ।
मनोमयाय प्रथमाय कर्त्रे मकाररूपाय नमो विधात्रे ॥ ५॥
(अजाय नम इति ब्रह्ममन्त्रगर्भाः पञ्चश्लोकाः ।)
दिव्याय पद्मासनमाधवेशरूपाय देवैरनिशं स्तुताय ।
दयार्द्रचित्ताय दिगन्तगाय नमो विरिञ्चाय जगज्जनित्रे ॥ ६॥
सूत्रात्मने सोमकलाभिपूर्णदेवाय सर्वाध्वरसत्फलाय ।
प्रकुर्वते पालनमेव नित्यं ओङ्काररूपाय नमः परस्मै ॥ ७॥
नन्दात्मजायावनतत्पराय नाकादिलोके नमतां जनानाम् ।
नागारिवाहाय फलप्रदाय नकाररूपाय नमः परस्मै ॥ ८॥
मुरान्तकायामरुमोहनाय मोक्षप्रदायात्मविदां जनानाम् ।
मोहप्रदायाखिलगोपिकानां मोकारूपाय नमः परस्मै ॥ ९॥
नारायणायाखिलनायकाय नगन्धरायाम्बुजलोचनाय ।
नागाङ्कतल्पाय नवाम्बुदाय नाकाररूपाय नमः परस्मै ॥ १०॥
रामाय राजीवविलोचनाय राधाभुजङ्गाय रतीशपित्रे ।
रात्रिञ्चराधीश्वरमर्दनाय राकाररूपाय नमः परस्मै ॥ ११॥
यमादियोगाङ्गजनप्रियाय यज्ञस्वरूपाय यतीश्वराय ।
यदूत्तमानामधिनायकाय यकाररूपाय नमः परस्मै ॥ १२॥
नन्दाय नन्दव्रजनायकाय नाभीपुटोद्भूतविधीडिताय ।
नादान्तरूपाय नृसिंहधाम्ने णाकाररूपाय नमः परस्मै ॥ १३॥
यज्ञाय यज्ञावनतत्पराय यज्ञैः समाराधितपादुकाय ।
यथार्थधाम्ने यजुषाम्प्रियाय यकार रूपाय नमः परस्मै ॥ १४॥
(ओं नमो नारायणायेति विष्णुमन्त्रगर्भाः ७-१४ श्लोकाः)
त्रिमूर्तये राजमहीरुहाय त्रिधामरूपाय सुधामयाय ।
तृणाद्यजान्तं परिपूर्णधाम्ने तीर्थस्वरूपाय नमः परस्मै ॥ १५॥
नादान्तरूपाय नभःस्थिताय ज्ञानामृतायागमवल्लभाय ।
नागेन्द्रभूषाय नगेन्द्रनित्यनकाररूपाय नमः परस्मै ॥ १६॥
माया तमोध्वंसनभास्कराय मारान्तकायामरवन्दिताय ।
मत्तेभचर्माम्बरवेष्टिताय नमो मकाराय नमः शिवाय ॥ १७॥
शिलादसूनोर्हृदि भाविताय श्रीशार्ङ्गिबाणाय पुरान्तकाय ।
शीतांशुकोटीरविराजिताय नमः शिकाराय नमः शिवाय ॥ १८॥
वामाय सद्धामकलेवराय वरप्रदायात्मविदां विशेषात् ।
वटुस्वरूपाय वटालयाय नमो वकाराय नमः शिवाय ॥ १९॥
यज्ञाय यज्ञेशसखाय यज्ञैरिज्याय पूर्णाय यमान्तकाय ।
यज्ञप्रहर्त्रेऽखिलयज्ञभोक्त्रे नमो यकाराय नमः शिवाय ॥ २०॥
(नमः शिवायेति पञ्चाक्षरशिवमन्त्रगर्भाः १६-२० श्लोकाः ।)
नमोऽस्तु वागीशहरीश्वराय नगेन्द्रचापाय नदीधराय ।
नाम्ना शुचीन्द्रेश इति स्तुताय ज्ञानाटवीशाय नमः शिवाय ॥ २१॥
एवमात्मविदां श्रेष्ठः स्तुत्वाऽऽनन्दपरोऽभवत् ।
सर्वज्ञः शङ्कराचार्यः स्थाणुक्षेत्रे महास्थले ॥ २२॥
इति श्रीस्थाणुस्तवः त्रिमूर्तिस्तुतिश्च सम्पूर्णः ।
Proofread by PSA Easwaran