% Text title            : Collected prayers by Raghunatha Dasa Goswami Stavavali
% File name             : stavAvalI.itx
% Category              : vishhnu, raghunAthadAsagosvAmin, krishna, stavAvalI, sangraha, vishnu, stava
% Location              : doc\_vishhnu
% Author                : RaghunathadAsagosvAmi
% Transliterated by     : Jan Brzezinski (Jagadananda Das) jankbrz at yahoo.com and Neal Delmonico (Nitai Das) ndelmonico at sbcglobal.net
% Acknowledge-Permission: http://granthamandira.net Gaudiya Grantha Mandira
% Latest update         : March 15, 2019
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Collected prayers by Raghunatha Dasa Goswami Stavavali ..}##
\itxtitle{.. stavAvalIsa~NgrahaH ..}##\endtitles ##
## Contents                  ##       anukramaNikA
##stavAvalIsangraha ## stavAvalIsa~NgrahaH
##Shachisunvashtakam ## shachIsUnvaShTakam
##Shri Gaurangastavakalpataruh ## shrIgaurA~NgastavakalpataruH
##Manahshiksha ## manaHshikShA
##Shri Raghunathadasagosvaminah Prarthana ## shrIraghunAthadAsagosvAminaH prArthanA
##Govardhanashrayadashakam ## govardhanAshrayadashakam
##Govardhanavasaprarthanadashakam ## govardhanavAsaprArthanAdashakam
##Radhakundashtakam ## rAdhAkuNDAShTakam
##Shri Vilapakusumanjalih ## shrIvilApakusumA~njaliH
##Vrajavilasastava ## vrajavilAsastava
##Shri Radhikayah Premapurabhidhastotram ## shrIrAdhikAyAH premapUrAbhidhastotram
##Shri Shrigranthakartuh Prarthana ## shrIshrIgranthakartuH prArthanA
##Svaniyamadashakam ## svaniyamadashakam
##Shriradhikashtottarashatanamastotram ## shrIrAdhikAShTottarashatanAmastotram
##Radhikashtakam ## rAdhikAShTakam raghunAthadAsagosvAmi
##Premambhojamarandastavarajah ## premAmbhojamarandastavarAjaH
##Svasankalpaprakashastotram ## svasa~NkalpaprakAshastotram
##Shri Shriradhakrishnojjvalakusumakelih ## shrIshrIrAdhAkR^iShNojjvalakusumakeliH
##Prarthanamritastotram ## prArthanAmR^itastotram
##Navashtakam ## navAShTakam
##Shri Gopalarajastotra ## shrIgopAlarAjastotram
##Shri Madanagopalastotram ## shrImadanagopAlastotram
##Shri Vishakhanandabhidhastotram ## shrIvishAkhAnandAbhidhastotram
##Shri Mukundashtakam ## shrImukundAShTakam
##Utkanthadashakam ## utkaNThAdashakam
##Shri Navayuvadvandvadidrikshashtakam ## shrInavayuvadvandvadidR^ikShAShTakam
##Abhishtaprarthanashtakam ## abhIShTaprArthanAShTakam
##Shri Dananirvartanakundashtakam ## shrIdAnanirvartanakuNDAShTakam
##Shri Prarthanashrayachaturdashakam ## shrIprArthanAshrayachaturdashakam
##Abhishtasuchanam ## abhIShTasUchanam
\chapter{##Shachisunvashtakam ## .. shachIsUnvaShTakam ..}
harirdR^iShTvA goShThe mukuragatamAtmAnamatulaM
     svamAdhuryaM rAdhapriyatarasakhIvAptumabhitaH |
aho gauDe jAtaH prabhuraparagauraikatanubhAk
     shachIsUnuH kiM me nayanasaraNIM yAsyati padam || 1||
purIdevayAntaHpraNayamadhunA snAnamadhuro
     muhurgovindodyadvishadaparicharyArchitapadaH |
svarUpasya prANArbudaparicharyArchitapadaH
     shachIsUnuH kiM me nayanasaraNIM yAsyati padam || 2||
dadhAnaH kaupInaM tadupari bahirvastramaruNaM
     prakANDo hemAdridyutibhirabhitaH sevitatanuH |
mudA gAyannuchchairnijamadhuranAmAvalimasau
     shachIsUnuH kiM me nayanasaraNIM yAsyati padam || 3||
anAvedyAM pUrvairapi munigaNairbhaktinipuNaiH
     shrutergUDhAM premojjvalarasaphalAM bhaktilatikAm |
kR^ipAlustAM gauDe prabhu atikR^ipAbhiH prakaTaya\-
     nshachIsUnuH kiM me nayanasaraNIM yAsyati padam || 4||
nijatve gauDIyAnjagati parigR^ihya prabhurimA\-
     nhare kR^iShNetyevaM gaNanavidhinA kIrtayata bhoH |
 iti prAyAM shikShAM charaNamadhupebhyaH paridisha\-
     nshachIsUnuH kiM me nayanasaraNIM yAsyati padam || 5||
puraH pashyannIlAchalapatimurupremanivahaiH
     kSharannetrAmbhobhiH snapitanijadIrghojjvalatanuH |
sadA tiShThandeshe praNayigaruDastambhacharame
     shachIsUnuH kiM me nayanasaraNIM yAsyati padam || 6||
mudA dantari dR^iShTvA dyutivijitabandhUkamadharaM
     karaM kR^itvA vAmaM kaTinihitamanyaM parilasan|
samutthApya premNAgaNitapulako nR^ityakutukI
     shachIsUnuH kiM me nayanasaraNIM yAsyati padam || 7||
sarottIrArAme virahavidhuro gokulavidho\-
     rnadImanyAM kurvannayanajaladhArAvitatibhiH |
muhurmUrchChAM gachChanmR^itakamiva vishvaM virachaya\-
     nshachIsUnuH kiM me nayanasaraNIM yAsyati padam || 8||
shachIsUnorasyAShTakamidamabhIShTaM virachaya\-
     nsadA dainyodrekAdativishadabuddhiH paThati yaH |
prakAmaM chaitanyaH prabhuratikR^ipAveshavivashaH
     pR^ithupremAmbhodhau prathitarasade majjayati tam || 9||

iti shrIraghunAthadAsagosvAmivirachitastavAvalyAM
          shrIshachIsUnvaShTakaM sampUrNam |

\chapter{##Shri Gaurangastavakalpataruh ## .. shrIgaurA~NgastavakalpataruH ..}
gatiM dR^iShTvA yasya pramadagajavarye.akhilajanA
     mukhaM cha shrIchandropari dadhati thUtkAranivaham |
svakAntyA yaH svarNAchalamadharayachChIdhu cha vacha\-
     stara~NgairgaurA~Ngo hR^idaya udayanmAM madayati || 1||
ala~NkR^ityAtmAnaM navavividharatnairiva vala
     dvivarNatvastambhAsphuTavachanakampAshrupulakaiH |
hasansvidyannR^ityanshitigiripaternirbharamude
     puraH shrIgaurA~Ngo hR^idaya udayanmAM madayati || 2||
rasollAsaistiryaggatibhirabhito vAribhiralaM
     dR^ishoH si~nchanlokAnaruNajalayantratvamitayoH |
mudA dantairdR^iShTvA madhuramadharaM kampachalitai\-
     rnaTanshrIgaurA~Ngo hR^idaya udayanmAM madayati || 3||
kvachinmishrAvAse vrajapatisutasyoruvirahA\-
     tshlathachChrIsandhitvAddadhadadhikadairghyaM bhujapadoH |
luThanbhUmau kAkvA vikalavikalaM gadgadavachA
     rudanshrIgaurA~Ngo hR^idaya udayanmAM madayati || 4||
anudghATya dvAratrayamuru cha bhittitrayamaho
     vila~NghyochchaiH kAli~Ngikasurabhimadhye nipatitaH |
tanUdyatsa~NkochAtkamaTha iva kR^iShNoruvirahA\-
     dvirAjangaurA~Ngo hR^idaya udayanmAM madayati || 5||
svakIyasya prANArbudasadR^ishagoShThasya virahA\-
     tpralApAnunmAdAtsatatamati kurvanvikaladhIH |
dadhadbhittau shashvadvadanavidhugharSheNa rudhiraM
     kShAtotthaM gaurA~Ngo hR^idaya udayanmAM madayati || 6||
kva me kAntaH kR^iShNastvaritamiha taM lokaya sakhe
     tvameveti dvArAdhipamabhivadannunmada iva |
drutaM gachCha draShTuM priyamiti taduktena dhR^itata\-
     dbhujAntargaurA~Ngo hR^idaya udayanmAM madayati || 7||
samIpe nIlAdreshchaTakagirirAjasya kalanA\-
     daye goShThe govardhanagiripatiM lokitumitaH |
vrajannasmItyuktvA pramada iva dhAvannavadhR^ito
     gaNaiH svairgaurA~Ngo hR^idaya udayanmAM madayati || 8||
alaM dolAkhelAmahasi varatanmaNDapatale
     svarUpeNa svenAparanijagaNenApi militaH |
svayaM kurvannAmnAmatimadhuragAnaM murabhidaH
     sara~Ngo gaurA~Ngo hR^idaya udayanmAM madayati || 9||
dayAM yo govinde garuDa iva lakShmIpatiralaM
     purIdeve bhaktiM ya iva guruvarye yaduvaraH |
svarUpe yaH snehaM giridhara iva shrIlasubale
     vidhatte gaurA~Ngo hR^idaya udayanmAM madayati || 10||
mahAsampaddAvAdapi patitamuddhR^itya kR^ipayA
     svarUpe yaH svIye kujanamapi mAM nyasya muditaH |
urogu~njAhAraM priyamapi cha govardhanashilAM
     dadau me gaurA~Ngo hR^idaya udayanmAM madayati || 11||
 iti shrIgaurA~NgodgatavividhasadbhAvakusuma
     prabhAbhrAjatpadyAvalilalitashAkhaM suratarum |
muhuryo.atishraddhauShadhivarabalatpAThasalilai\-
     ralaM si~nchedvindetsarasagurutallokanaphalam || 12||

iti shrIraghunAthadAsagosvAmivirachitastavAvalyAM
          shrIgaurA~NgastavakalpataruH samAptaH |

\chapter{##Manahshiksha ## .. manaHshikShA ..}
gurau goShThe goShThAlayiShu sujane bhUsuragaNe
     svamantre shrInAmni vrajanavayuvadvandvasmaraNe | (dvandvasharaNe)
sadA dambhaM hitvA kuru ratimapUrvAmatitarA\-
     maye svAntarbhrAtashchaTubhirabhiyAche dhR^itapadaH || 1||
na dharmaM nAdharmaM shrutigaNaniruktaM kila kuru
     vraje rAdhAkR^iShNaprachuraparicharyAmiha tanu |
shachIsUnuM nandIshvarapatisutatve guruvaraM
     mukundapreShThatve smara paramajasraM nanu manaH || 2||
yadIchCherAvAsaM vrajabhuvi sarAgaM pratijanu\-
     ryuvadvandvaM tachchetparicharitumArAdabhilaSheH |
svarUpaM shrIrUpaM sagaNamiha tasyAgrajamapi
     sphuTaM premNA nityaM smara nama tadA tvaM shR^iNu manaH || 3||
asadvArtAveshyA visR^ija matisarvasvaharaNIH
     kathAmuktivyAghryA na shR^iNu kila sarvAtmagilanIH |
api tyaktvA lakShmIpatiratimito vyomanayanIM
     vraje rAdhAkR^iShNau svaratimaNidau tvaM bhaja manaH || 4||
asachcheShTAkaShTapradavikaTapAshAlibhiriha
     prakAmaM kAmAdiprakaTapathapAtivyatikaraiH |
gale baddhvA hanye.ahamiti bakabhidvartmapagaNe
     kuru tvaM phutkArAnavati sa yathA tvAM mana itaH || 5||
are chetaH prodyatkapaTakuTinATIbharakhara\-
     kSharanmUtre snAtvA dahasi kathamAtmAnamapi mAm |
sadA tvaM gAndharvAgiridharapadapremavilasa\-
     tsudhAmbhodhau snAtvA tvamapi nitarAM mAM cha sukhaya || 6|| (svamapi)
pratiShThAshA dhR^iShTA shvapacharamaNI me hR^idi naTe\-
     tkathaM sAdhupremA spR^ishati shuchiretannanu manaH |
sadA tvaM sevasva prabhudayitasAmantamatulaM
     yathA tvAM niShkAshya tvaritamiha taM veshayati saH || 7||
yathA duShTatvaM me davayati shaThasyApi kR^ipayA
     yathA mahyaM premAmR^itamapi dadAtyujjvalamasau |
yathA shrIgAndharvAbhajanavidhaye prerayati mAM
     tathA goShThe kAkvA giridharamiha tvaM bhaja manaH || 8||
madIshAnAthatve vrajavipinachandraM vrajavane\-
     shvarIM tannAthatve tadatulasakhItve tu lalitAm | (mannAthatve)
vishAkhAM shikShAlIvitaraNagurutve priyasaro\-
     girIndrau tatprekShAlalitaratidatve smara manaH || 9||
ratiM gaurIlIle api tapati saundaryakiraNaiH
     shachIlakShmIsatyAH paribhavati saubhAgyavalanaiH |
vashIkAraishchandrAvalimukhanavInavrajasatIH
     kShipatyArAdyA tAM haridayitarAdhAM bhaja manaH || 10||
samaM shrIrUpeNa smaravivasharAdhAgiribhR^ito\-
     rvraje sAkShAtsevAlabhanavidhaye tadguNayujoH |
tadijyAkhyAdhyAnashravaNanatipa~nchAmR^itamidaM
     dhayannItyA govardhanamanudinaM tvaM bhaja manaH || 11||
manaHshikShAdaikAdashakavarametanmadhurayA
     girA gAyatyuchchaiH samadhigatasarvArthayati yaH |
sayUthaH shrIrUpAnuga iha bhavangokulavane
     jano rAdhAkR^iShNAtulabhajanaratnaM sa labhate || 12||

iti shrIraghunAthadAsagosvAmivirachitastavAvalyAM
          shrIprArthanAmR^itastotraM sampUrNam |

\chapter{##Shri Raghunathadasagosvaminah Prarthana ## .. shrIraghunAthadAsagosvAminaH prArthanA ..}
prAtaH pItapaTe kuchopariruShA ghUrNAbhare lochane
    bimbauShThe pR^ithu vIkShate jaTilayA sandR^ishyamAne muhuH |
vAchA yuktijuShA mR^iShA lalitayA tAM sa.npratArya krudhA
     dR^iShTvemaM hR^idi bhIShitA stutavatI rAdhA dhruvaM pAtu vaH || 1||
pIkapaTuravavAdyairbhR^i~Ngajha~NkAragAnaIH
     sphuradatulakuDu~NgakroDara~Nge sara~Ngam |
smarasadasi kR^itodyannR^ityataH shrAntagAtraM
     vrajanavayuvayugmaM nartakaM vIjayAni || 2||
kuhUkaNThIkaNThAdapi kamanakaNThI mayi puna\-
     rvishAkhA gAnasyApi cha ruchirashikShAM praNayatu |
yathAhaM tenaitadyuvayugalamullAsya sagaNA\-
     llabhe rAse tasmAnmaNipradakahArAniha muhuH || 3||
kAntyA nindantamudyajaladharanichayaM taptakArtasvabhAvaM
     vAso bibhrANamIShatsmitaruchiramukhAmbhojamAkalpitA~Ngam |
vAmA~Nke rAdhikAM tAM prathamarasakalAkelisaubhAgyamattaM
     Ali~NgyAlApabha~NgyA vrajapatitanayaM smerayantaM smarAmi || 4||

iti shrIraghunAthadAsagosvAmivirachitastavAvalyAM
          shrIraghunAthadAsagosvAminaH prArthanA samAptA |

\chapter{##Govardhanashrayadashakam ## .. govardhanAshrayadashakam ..}
saptAhaM murajitkarAmbujaparibhrAjatkaniShThA~Nguli
     prodyadvalguvarAtakoparimilanmugdhadvirepho.api yaH |
pAthaHkShepakashakranakramukhataH kroDe vrajaM drAg apA\-
     tkastaM gokulabandhavaM girivaraM govardhanaM nAshrayet || 1||
indratve nibhR^itaM gavAM suranadItoyena dInAtmanA
     shakreNAnugatA chakAra surabhiryenAbhiShekaM hareH |
yatkachChe.ajani tena nanditajanaM govindakuNDaM kR^itI
     kastaM gonikarendrapaTTashikharaM govardhanaM nAshrayet || 2||
svardhunyAdivareNyatIrthagaNato hR^idyAnyajasraM hareH
     sIribrahmaharApsaraHpriyakatatshrIdAnakuNDAnyapi |
premakShemaruchipradAni parito bhrAjanti yasya vratI
     kastaM manyamunIndravarNitaguNaM govardhanaM nAshrayet || 3||
jyotsnAmokShaNamAlyahArasumanogaurIbalAridhvajA
     gAndharvAdisarAMsi nirjharagiriH shR^i~NgArasiMhAsanam |
gopAlo.api haristhalaM harirapi sphUrjanti yatsarvataH
     kastaM gomR^igapakShivR^ikShalalitaM govardhanaM nAshrayet || 4||
ga~NgAkoTyadhikaM bakAripadajAriShTArikuNDaM vaha\-
     nbhaktyA yaH shirasA natena satataM preyAnshivAdapyabhUt |
rAdhAkuNDamaNiM tathaiva murajitprauDhaprasAdaM dadhA\-
     tpreyaHstavyamano.abhavatka iha taM govardhanaM nAshrayet || 5||
yasyAM mAdhavanAviko rasavatImAdhAya rAdhAM tarau
     madhye cha~nchalakelipAtavalanAttrAsaiH stuvatyAstataH |
svAbhiShThaM paNamAdadhe vahati sA yasminmanojAhnavI
     kastaM tannavadampatipratibhuvaM govardhanaM nAshrayet || 6||
rAse shrIshatavandyasundarasakhI vR^indA~nchitA saurabha
     bhrAjatkR^iShNarasAlabAhuvilasatkaNThI madhau mAdhavI |
rAdhA nR^ityati yatra chAru valate rAsasthalI sA parA
     yasminsa sukR^itI tamunnatamaye govardhanaM nAshrayet || 7||
yatra svIyagaNasya vikramabhR^itA vAchA muhuH phullatoH
     smerakrUradR^igantavibhramasharaiH shashvanmitho viddhayoH |
tadyUnornavadAnasR^iShTijakalirbha~NgyA hasanjR^imbhate
     kastaM tatpR^ithukelisUchanashilaM govardhanaM nAshrayet || 8||
shrIdAmAdivayasyasa~nchayavR^itaH sa~NkarShaNenollasa\-
     nyasmingochayachAruchAraNaparo rIrIti gAyatyasau |
ra~Nge gUDhaguhAsu cha prathayati smArakriyAM rAdhayA
     kastaM saubhagabhUShitA~nchitatanuM govardhanaM nAshrayet || 9||
kAlindIM tapanodbhavaM girigaNAnatyunnamAchekharA\-
     nshrIvR^indAvipinaM janepsitadharaM nandIshvaraM chAshrayam |
hitvA yaM pratipUjayanvrajakR^ite mAnaM mukundo dadau
     kastaM shR^i~NgikirITinaM girinR^ipaM govardhanaM nAshrayet || 10||
tasminvAsadamasya ramyadashakaM govardhanasyeha ya\-
     tprAdurbhUtamidaM yadIyakR^ipayA jIrNAndhavaktrAdapi |
tasyodyadguNavR^indabandhurakhaNerjIvAturUpasya tat\-
     toShAyApyalaM bhavatTiha phalaM pakvaM mayA mR^igyate || 11||

iti shrIraghunAthadAsagosvAmivirachitastavAvalyAM
          shrIgovardhanavAsaprArthanAdashakaM sampUrNam |

\chapter{##Govardhanavasaprarthanadashakam ## .. govardhanavAsaprArthanAdashakam ..}
nijapatibhujadaNDachChatrabhAvaM prapadya
     pratihatamadadhR^iShToddaNDadevendragarva |
atulapR^ithulashailashreNibhUpa priyaM me
     nijanikaTanivAsaM dehi govardhana tvam || 1||
pramadamadanalIlAH kandare kandare te
     rachayati navayUnordvandvamasminnamandam |
 iti kila kalanArthaM lagnakastaddvayorme
     nijanikaTanivAsaM dehi govardhana tvam || 2||
anupamamaNivedIratnasiMhAsanorvI\-
     ruhajharadarasAnudroNisa~NgheShu ra~NgaiH |
saha balasakhibhiH sa~NkhelayansvapriyaM me
     nijanikaTanivAsaM dehi govardhana tvam || 3||
rasanidhinavayUnoH sAkShiNIM dAnakele\-
     rdyutiparimalaviddhaM shyAmavediM prakarShya |
rasikavarakulAnAM modamAsphAlayanme
     nijanikaTanivAsaM dehi govardhana tvam || 4||
haridayitamapUrvaM rAdhikAkuNDamAtma\-
     priyasakhamiha kaNThe narmaNAli~Ngya guptaH |
navayuvayugakhelAstatra pashyanraho me
     nijanikaTanivAsaM dehi govardhana tvam || 5||
sthalajalatalashaShpairbhUruhaChAyayA cha
     pratipadamanukAlaM hanta saMvardhayangAH |
trijagati nijagotraM sArthakaM khyApayanme
     nijanikaTanivAsaM dehi govardhana tvam || 6||
surapatikR^itadIrghadrohato goShTharakShAM
     tava navagR^iharUpasyAntare kurvataiva |
aghabakaripuNochchairdattamAna drutaM me
     nijanikaTanivAsaM dehi govardhana tvam || 7||
girinR^ipaharidAsashreNivaryetinAmA\-
     mR^itamidamuditaM shrIrAdhikAvaktrachandrAt |
vrajanavatilakatve klptavedaiH sphuTaM me
     nijanikaTanivAsaM dehi govardhana tvam || 8||
nijajanayutarAdhAkR^iShNamaitrIrasAkta\-
     vrajanarapashupakShivrAtasaukhyaikadAtaH |
agaNitakaruNatvAnmaM urIkR^itya tAntaM
     nijanikaTanivAsaM dehi govardhana tvam || 9||
nirupadhikaruNena shrIshachInandanena
     tvayi kapaTishaTho.api tvatpriyenArpito.asmi |
 iti khalu mama yogyAyogyatAM mAmagR^ihNa\-
     nnijanikaTanivAsaM dehi govardhana tvam || 10||
rasadadashakamasya shrIlagovardhanasya
     kShitidharakulabharturyaH prayatnAdadhIte |
sa sapadi sukhade.asminvAsamAsAdya sAkShA\-
     chChubadayugalasevAratnamApnoti tUrNam || 11||

iti shrIraghunAthadAsagosvAmivirachitastavAvalyAM
          shrIgovardhanavAsaprArthanAdashakaM sampUrNam |

\chapter{##Radhakundashtakam ## .. rAdhAkuNDAShTakam ..}
vR^iShabhadanujanAshAnnarmadharmoktira~Ngai\-
     rnikhilanijasakhIbhiryatsvahastena pUrNam |
prakaTitamapi vR^indAraNyarAj~nA pramodai\-
     stadatisurabhi rAdhAkuNDamevAshrayo me || 1||
vrajabhuvi murashatroH preyasInAM nikAmai\-
     rasulabhamapi tUrNaM premakalpadrumaM tam |
janayati hR^idi bhUmau snAturuchchairpriyaM ya\-
     ttadatisurabhi rAdhAkuNDamevAshrayo me || 2||
agharipurapi yatnAdatra devyAH prasAda\-
     prasarakR^itakatAkShaprAptikAmaH prakAmam |
anusarati yaduchaaiH snAnasevAnubandhai\-
     stadatisurabhi rAdhAkuNDamevAshrayo me || 3||
vrajabhuvanasudhAMshoH premabhUmirnikAmaM
     vrajamadhurakishorImauliratnapriyeva |
parichitamapi nAmnA yA cha tenaiva tasyA\-
     stadatisurabhi rAdhAkuNDamevAshrayo me || 4||
api jana iha kashchidyasya sevAprasAdaiH
     praNayasuralatA syAttasya goShThendrasUnoH |
sapadi kila madIshAdAsyapuShpaprashasyA
     tadatisurabhi rAdhAkuNDamevAshrayo me || 5||
taTamadhuraniku~njaH kL^iptanAmAna uchchai\-
     rnijaparijanavargaiH saMvibhajyAshritastaiH |
madhukararutaramyA yasya rAjanti kAmyA\-
     stadatisurabhi rAdhAkuNDamevAshrayo me || 6||
taTabhuvi varavedyAM yasya narmAtihR^idyAM
     madhuramadhuravArtAM goShThachandrasya bha~NgyA |
praThayati mitha IshA prANasakhyAlibhiH sA
     tadatisurabhi rAdhAkuNDamevAshrayo me || 7||
anudinamatira~NgaiH premamattAlisa~Nghai\-
     rvarasarasijagandhairhArivAriprapUrNe |
viharata iha yasmindampatI tau pramattau
     tadatisurabhi rAdhAkuNDamevAshrayo me || 8||
avikalamati devyAshchAru kuNDAShTakaM yaH
     paripaThati tadIyollAsidAsyArpitAtmA |
achiramiha sharIre darshayatyeva tasmai
     madhuripuratimodaiH shliShyamANAM priyAM tAm || 9||

iti shrIraghunAthadAsagosvAmivirachitastavAvalyAM
          rAdhAkuNDAShTakaM shrIsampUrNam |

\chapter{##Shri Vilapakusumanjalih ## .. shrIvilApakusumA~njaliH ..}
tvaM rUpama~njari sakhi prathitA pure.asmi\-
     npuMsaH parasya vadanaM na hi pashyasIti |
bimbAdhare kShatamanAgatabhartR^ikAyA
     yatte vyadhAyi kimu tachChukapu~Ngavena || 1|| (vasanta)
sthalakamalini yuktaM garvitA kAnane.asmi\-
     npraNayasi varahAsyaM puShpaguchChachChalena |
api nikhilalatAstAH saurabhAktAH sa mu~ncha\-
     nmR^igayati tava mArgaM kR^iShNabhR^i~Ngo yadadya || 2|| (mAlinI)
vrajendravasatisthale vividhavallavIsa~Nkule
     tvameva ratima~njari prachurapuNyapu~njodayA |
vilAsabharavismR^itapraNayimekhalAmArgaNe
     yadadya nijanAthayA vrajati nAthitA kandaram || 3|| (pR^ithvI)
prabhurapi yadunandano cha eSha
     priyayadunandana unnataprabhAvaH |
svayamatulakR^ipAmR^itAbhiShekaM
     mama kR^itavAMstamahaM guruM prapadye || 4|| (puShpitAgrA)
yo mAM dustaragehanirjalamahAkUpAdapAraklamA\-
     tsadyaH sAndradayAmbudhiH prakR^ititaH svairI kR^ipArajjubhiH |
uddhR^ityAtmasarojanindicharaNaprAntaM prapAdya svayaM
     shrIdAmodarasAchchakAra tamahaM chaitanyachandraM bhaje || 5|| (shArdUla)
vairAgyayugbhaktirasaprayatnai\-
     rapAyayanmAmanabhIpsumandham |
kR^ipAmbudhiryaH paraduHkhaduHkhI
     sanAtanaM taM prabhumAshrayAmi || 6|| (upajAti)
atyutkaTena nitarAM virahAnalena
     dandahyamAnahR^idayA kila kApi dAsI |
hA svAmini kShaNamiha praNayena gADhaM
     Akrandanena vidhurA vilapAmi padyaiH || 7|| (vasanta)
devi duHkhakulasAgarodare
     dUyamAnamatidurgataM janam |
tvaM kR^ipAprabalanaukayAdbhutaM
     prApaya svapadapa~NkajAlayam || 8|| (rathoddhatA)
tvadalokanakAlAhidaMshaireva mR^itaM janam |
tvatpAdAbjamilallAkShAbheShajairdevi jIvaya || 9|| (anuShTubh)
devi te charaNapadmadAsikAM
     viprayogabharadAvapAvakaiH |
dahyamAnatarakAyavallarIM
     jIvaya kShaNanirIkShaNAmR^itaiH || 10|| (rathoddhatA)
svapne.api kiM sumukhi te charaNAmbujAta
     rAjatparAgapaTavAsavibhUShaNena |
shobhAM parAmatitarAmahahottamA~NgaM
     bibhradbhaviShyati kadA mama sArthanAmA || 11|| (vasanta)
amR^itAbdhirasaprAyaistava nUpurasi~njitaiH |
hA kadA mama kalyANi vAdhiryamapaneShyate || 12|| (anuShTubh)
shashakabhR^idabhisAre netrabhR^i~NgA~nchalAbhyAM
     dishi vidishi bhayenodghurNitAbhyAM vanAni |
kuvalayadalakoShANyeva kL^iptAni yAbhyAM
     kimu kila kalanIyo devi tAbhyAM jano.ayam || 13|| (mAlinI)
yadavadhi mama kAchinma~njarI rUpapUrvA
     vrajabhuvi bata netradvandvadIptiM chakAra |
tadavadhi tava vR^indAraNyarAj~ni prakAmaM
     charaNakamalalAkShAsandidR^ikShA mamAbhUt || 14|| (mAlinI)
yadA tava sarovaraM sarasabhR^i~Ngasa~Nghollasa\-
     nsaroruhakulojjvalaM madhuravArisampUritam |
sphuTatsarasijAkShi he nayanayugmasAkShAdbabhau
     tadaiva mama lAlasAjani tavaiva dAsye rase || 15|| (pR^ithvI)
pAdAbjayostava vinA varadAsyameva
     nAnyatkadApi samaye kila devi yAche |
sakhyAya te mama namo.astu namo.astu nityaM
     dAsyAsya te mama raso.astu raso.astu satyam || 16|| (vasanta)
atisulalitalAkShAshliShTasaubhAgyamudrA
     tatibhiradhikatuShTyA chihnitIkR^itya bAhU |
nakhadalitaharidrAgarvagauri priyAM me
     charaNakamalasevAM hA kadA dAsyasi tvam || 17|| (mAlinI)
praNAlIM kIlAlairbahubhirabhi sa~NkShAlya madhurai\-
     rmudA sammArjya svairvivR^itakachavR^indaiH priyatayA |
kadA bAhyAgAraM varaparimalairdhUpanivahai\-
     rvidhAsye te devi pratidinamaho vAsitamaham || 18|| (shikhariNI)
prAtaH sudhAMshumilitAM mR^idamatra yatnA\-
     dAhR^itya vAsitapayashcha gR^ihAntare cha |
pAdAmbuje bata kadA jaladhArayA te
     prakShAlya bhAvini kachairiha mArjayAmi || 19|| (vasanta)
prakShAlya pAdakamalaM kR^itadAntakAShThAM
     snAnArthamanyasadane bhavatIM niviShTAm |
abhyajya gandhitatarairiha tailapUraiH
     prodvartayiShyati kadA kimu ki~NkarIyam || 20|| (vasanta)
ayi vimalajalAnAM gandhakarpUrapuShpai\-
     rjitavidhumukhapadme vAsitAnAM ghaToghaiH |
praNayalalitasakhyA dIyamAnaiH purastA\-
     ttava varamabhiShekaM hA kadAhaM kariShye || 21|| (mAlinI)
pAnIyaM chInavastraiH shashimukhi shanakai ramyamR^idva~NgayaShTe\-
     ryatnAdutsArya modAddishi dishi vichalannetramInA~nchalAyAH |
shroNau raktaM dukUlaM tadaparamatulaM chArunIlaM shiro.agrA\-
     tsarvA~NgeShu pramodAtpulakitavapuShA kiM mayA te prayojyam || 22|| (sragdharA)
prakShAlya pAdakamalaM tadanukrameNa
     goShThendrasUnudayite tava keshapAsham |
hA narmadAgrathitasundarasUkShmamAlyai\-
     rveNIM kariShyati kadA praNayairjano.ayam || 23|| (vasanta)
subhagamR^igamadenAkhaNDashubhrAMshuvatte
     tilakamiha lalATe devi modAdvidhAya |
masR^iNaghusR^iNacharchAmarpayitvA cha gAtre
     stanayugamapi gandhaishchitritaM kiM kariShye || 24|| (mAlinI)
sindUrarekhA sImante devi ratnashalAkayA |
mayA yA kalpitA kiM te sAlakA~nChobhayiShyati || 25|| (anuShTubh)
hanta devi tilakasya samantA\-
     dbindavo.aruNasugandhirasena |
kR^iShNamAdanamahauShadhimukhyA
     dhIrahastamiha kiM parikalpyAH || 26|| (svAgatA)
goShThendraputramadachittakarIndrarAja
     bandhAya puShpadhanuShaH kila baddharajjvoH |
kiM karNayostava varoru varAvataMsa
     yugmena bhUShaNamahaM sukhitA kariShye || 27|| (vasanta)
yA te ka~nchuliratra sundari mayA vakShojayorarpitA
     shyAmAchChAdanakAmyayA kila na sAsatyeti vij~nAyatAm |
kintu svAmini kR^iShNa eva sahasA tattAmavApya svayaM
     prANebhyo.apyadhikaM svakaM nidhiyugaM sa~Ngopayatyeva hi || 28|| (shArdUla)
nAnAmaNiprakaragumphitachArupuShTA
     muktAsrajastava suvakShasi hemagauri |
shrAntyAbhR^itAlasamukundasutUlikAyAM
     kiM kalpayiShyatitarAM tava dAsikeyam || 29|| (vasanta)
maNichayakhachitAbhirnIlachUDAvalIbhi\-
     rharidayitakalAviddvandvamindIvarAkShi |
api bata tava divyaira~NgulIra~NgulIyaiH
     kvachidapi kila kAle bhUShayiShyAmi kiM nu || 30|| (mAlinI)
pAdAmbhoje maNimayatulAkoTiyugmena yatnA\-
     dabhyarche taddalakulamapi preShTapAdA~NgulIyaiH |
kA~nchIdAmnA kaTitaTamidaM premapIThaM sunetre
     kaMsArAteratulamachirAdarchayiShyAmi kiM te || 31|| (mandAkrAntA)
lalitataramR^iNAlIkalpabAhudvayaM te
     murajayimatihaMsIdhairyavidhvaMsadakSham |
maNikularachitAbhyAma~NgadAbhyAM purastA\-
     tpramadabharavinamrA kalpayiShyAmi kiM vA || 32|| (mAlinI)
rAsotsave ya iha gokulachandrabAhu
     sparshena saubhagabharaM nitarAmavApa |
graiveyakeNa kiM taM tava kaNThadeshaM
     sampUjayiShyati punaH subhage jano.ayam || 33|| (vasanta)
dattaH pralambaripuNodbhaTasha~NkhachUDa
     nAshAtpratoShi hR^idayaM madhuma~Ngalasya |
hastena yaH sumukhi kaustubhamitrametaM
     kiM te syamantakamaNiM taralaM kariShye || 34|| (vasanta)
prAntadvaye parivirAjitaguchChayugma
     vibhrAjitena navakA~nchanaDorakeNa |
kShINaM truTatyatha kR^ishodari cheditIva
     badhnAmi bhostava kadAtibhayena madhyam || 35|| (vasanta)
kanakaguNitamuchchairmauktikaM matkarAtte
     tilakakusumavijetrI nAsikA sA suvR^ittam |
madhumathanamahAlikShobhakaM hemagauri
     prakaTataramarandaprAyamAdAsyate kim || 36|| (mAlinI)
a~Ngadena tava vAmadoHsthale
     svarNagauri navaratnamAlikAm |
paTTaguchChaparishobhitAmimAM
     Aj~nayA pariNayAmi te kadA || 37|| (rathoddhatA)
karNayorupari chakrashalAke
     cha~nchalAkShi nihite mayakA te |
kShobhakaM nikhilagopavadhUnAM
     chakravadbhramayatAM murashatrum || 38||
kadA te mR^igashAvAkShi
     chibuke mR^iganAbhinA |
bindumullAsayiShyAmi
     mukundAmodamandire || 39|| (anuShTubh)
dashanAMste kadA rakta
     rekhAbhirbhUShayAmyaham |
devi muktAphalAnIha
     padmarAgaguNairiha || 40|| (anuShTubh)
utkhAdireNa navachandravirAjitena
     rAgeNa te varasudhAdharabimbayugme |
gA~NgeyagAtri mayakA parira~njite.asmi\-
     ndaMshaM vidhAsyati haThAtkimu kR^iShNakIraH || 41|| (vasantatilaka)
yatprAntadeshalavaleshavighUrNitena
     baddhaH kShaNAdbhavati kR^iShNakarIndra uchchaiH |
tatkha~njarITajayinetrayugaM kadAyaM
     sampUjayiShyati janastava kajjalena || 42|| (vasanta)
yasyA~Nkara~njitashirAstava mAnabha~Nge
     goShThendrasUnuradhikAM suShamAmupaiti |
lAkShArasaM sa cha kadA padayoradhaste
     nyasto mayApyatitarAM ChavimApsyatIha || 43|| (vasanta)
kalAvati natAMsayoH prachurakAmapu~njojjvala\-
     tkalAnidhimuradviShaH prakaTarAsasambhAvayoH |
bhramadbhramarajha~NkR^itairmadhuramallimAlAM mudA
     kadA tava tayoH samarpayati devi dAsIjanaH || 44||
sUryAya sUryamaNinirmitavedimadhye
     mugdhA~Ngi bhAvata ihAlikulairvR^itAyAH |
arghaM samarpayitumutkadhiyastavArA\-
     tsajjAni kiM sumukhi dAsyati dAsikeyam || 45||
vrajapurapatirAj~nyA Aj~nayA miShThamannaM
     bahuvidhamatiyatnAtsvena pakvaM varoru |
sapadi nijasakhInAM madvidhAnAM cha hastai\-
     rmadhumathananimittaM kiM tvayA sannidhAsyam || 46||
nItAnnamadvidhalalATataTe lalATaM
     prItyA pradAya muditA vrajarAjarAj~nI |
premNA prasUriva bhavatkushalasya pR^ichChAM
     bhavye vidhAsyati kadA mayi tAvakatvAt || 47||
kR^iShNavaktrAmbujochChiShTaM
     prasAdaM paramAdarAt |
dattaM dhaniShThayA devi
     kimAneShyAmi te.agrataH || 48|| (anuShTubh)
nAnAvidhairamR^itasArarasAyanaistaiH
     kR^iShNaprasAdamilitairiha bhojyapeyaiH |
hA ku~NkumA~Ngi lalitAdisakhIvR^itA tvaM
     yatnAnmayA kimuttarAmupabhojanIyA || 49|| (vasanta)
pAnAya vAri madhuraM navapATalAdi
     karpUravAsitataraM taralAkShi dattvA |
kAle kadA tava mayAchamanIyadanta
     kAShThAdikaM praNayataH paramarpaNIyam || 50|| (vasanta)
(yugmakam)
bhojanasya samaye tava yatnA\-
tdevi dhUpanivahAnvaragandhAn|
bIjanAdyamapi tatkShaNayogyaM
hA kadA praNayataH praNayAmi || 51|| (svAgatA)
karpUrapUraparipUritanAgavallI
     parNAdipUgaparikalpitavITikAM te |
vaktrAmbuje madhuragAtri mudA kadAhaM
     protphullaromanikaraiH paramarpayAmi || 52|| (vasanta)
ArAtrikeNa bhavatIM kimu devi devIM
     nirma~nChayiShyatitarAM lalitA pramodAt |
anyAlayashcha navama~NgalagAnapuShpaiH
     prANArbudairapi kachairapi dAsikeyam || 53||
AlIkulena lalitApramukhena sArdhaM
     AtanvatI tvamiha nirbharamarmagoShThIm |
matpANikalpitamanoharakelitalpaM
     AbhUShayiShyasi kadA svapanena devi || 54||
saMvAhayiShyati padau tava ki~NkarIyaM
     hA rUpama~njarirasau cha karAmbuje dve |
yasminmanoj~nahR^idaye sadaye.anayoH kiM
     shrImAnbhaviShyatitarAM shubhavAsaraH saH || 55||
tavodgIrNaM bhojyaM sumukhi kila kallolasalilaM
     tathA pAdAmbhojAmR^itamiha mayA bhaktilatayA |
ayi premNA sArdhaM praNayijanavargairbahuvidhai\-
     raho labdhavyaM kiM prachuratarabhogyodayabalaiH || 56||
bhojanAvasare devi
     snehena svamukhAmbujAt |
mahyaM tvadgatachittAyai
     kiM sudhAstvaM pradAsyasi || 57|| (anuShTubh)
api bata rasavatyAH siddhaye mAdhavasya
     vrajapatipuramudyadromaromA vrajantI |
skhalitagatiruda~nchatsvAntasaukhyena kiM me
     kvachidapi nayanAbhyAM lapsyase svAmini tvam || 58|| (mAlinI)
pArshvadvaye lalitayAtha vishAkhayA cha
     tvAM sarvataH parijanaishcha paraiH parItAm |
pashchAnmayA vibhR^itabha~NguramadhyabhAgAM
     kiM rUpama~njaririyaM pathi neShyatIha || 59||
hambAravairiha gavAmapi ballavAnAM
     kolAhalairvividhavandikalAvatAM taiH |
sambhrAjate priyatayA vrajarAjasUno\-
     rgovardhanAdapi gururvrajavanditAdyaH || 60||
prAptAM nijapraNayinIprakaraiH parItAM
     nandIshvaraM vrajamahendramahAlayaM tam |
dUre nirIkShya muditA tvaritaM dhaniShThA
     tvAmAnayiShyati kadA praNayairmamAgre || 61||
(yugmakam)
prakShAlya pAdakamale kushale praviShTA
     natvA vrajeshamahiShIprabhR^itIrgurUstAH |
hA kurvatI rasavatIM rasabhAkkadA tvaM
     sammajjayiShyasitarAM sukhasAgare mAm || 62||
mAdhavAya natavaktramAdR^itA
     bhojyapeyarasasa~nchayaM kramAt |
tanvatI tvamiha rohiNIkare
     devi phullavadanaM kadekShyase || 63||
bhojane gurusabhAsu katha~nchi\-
     nmAdhavena natadR^iShTi mudotkam |
vIkShyamANamiha te mukhapadmaM
     modayiShyasi kadA madhure mAm || 64||
ayi vipinamaTantaM saurabheyIkulAnAM
     vrajanR^ipatikumAraM rakShaNe dIkShitaM tam |
vikalamatijananyA lAlyamAnaM kadA tvaM
     smitamadhurakapolaM vIkShyase vIkShyamANA || 65||
goShTheshayAtha kutukAchChapathAdipUrvaM
     susnigdhayA sumukhi mAtR^iparArdhato.api |
hA hrImati priyagaNaiH saha bhojyamAnAM
     kiM tvAM nirIkShya hR^idaye mudamadya lapsye || 66||
Ali~Nganena shirasaH parichumbanena
     snehAvalokanabhareNa cha kha~njanAkShi |
goShTheshayA navavadhUmiva lAlyamAnAM
     tvAM prekShya kiM hR^idi mahotsavamAtaniShye || 67||
hA rUpama~njari sakhi praNayena devIM
     tvadbAhudattabhujavallarimAyatAkShIm |
pashchAdahaM kalitakAmatara~Ngara~NgAM
     neShyAmi kiM harivibhUShitakeliku~njam || 68||
sAkaM tvayA sakhi niku~njagR^ihe sarasyAH
     svasyAstaTe kusumabhAvitabhUShaNena |
shR^i~NgAritaM vidadhatI priyamIshvarI sA
     hA hA bhaviShyati madIkShaNagocharaH kim || 69||
shrutvA vichakShaNamukhAdvrajarAjasUnoH
     shastAbhisArasamayaM subhage.atra hR^iShTA |
sUkShmAmbaraiH kusumasaMskR^itakarNapUra
     hArAdibhishcha bhavatIM kimala~NkariShye || 70||
nAnApuShpaiH kvaNitamadhupairdevi sambhAvitAbhi\-
     rmAlAbhistadghusR^iNavilasatkAmachitrAlibhishcha |
rAjaddvAre sapadi madanAnandadAbhikhyagehe
     mallIjAlaiH shashimukhi kadA talpamAkalpayiShye || 71||
shrIrUpama~njarikarArchitapAdapadma
     goShThendranandanabhujArpitamastakAyAH |
hA modataH kanakagauri padAravinda
     saMvAhanAni shanakaistava kiM kariShye || 72||
govardhanAdrinikaTe mukuTena narma
     lIlAvidagdhashirasAM madhusUdanena |
dAnachChalena bhavatImavarudhyamAnAM
     drakShyAmi kiM bhrUkuTidarpitanetrayugmAm || 73||
tava tanuvaragandhAsa~NgivAtena chandrA
     valikarakR^itamallIkelitalpAchChalena |
madhuramukhi mukundaM kuNDatIre milantaM
     madhupamiva kadAhaM vIkShya darpaM kariShye || 74||
samantAdunmattabhramarakulajha~NkAranikarai\-
     rlasatpadmastomairapi vihagarAvairapi param |
sakhIvR^indaiH svIyaiH sarasi madhure prANapatinA
     kadA drakShyAmaste shashimukhi navaM kelinivaham || 75||
sarovaralasattaTe madhupagu~njiku~njAntare
     sphuTatkusumasa~Nkule vividhapuShpasa~NghairmudA |
ariShTajayinA kadA tava varoru bhUShAvidhi\-
     rvidhAsyata iha priyaM mama sukhAbdhimAtanvatA || 76||
sphItasvAntaM kayAchitsarabhasamachireNArpyamANairdarodya\-
     nnAnApuShporugu~njAphalanikaralasatkekipi~nChaprapa~nchaiH |
sotkampaM rachyamAnaH kR^itaruchihariNotphullama~NgaM vahantyAH
     svAminyAH keshapAshaH kimu mama nayanAnandamuchchairvidhAtA || 77||
mAdhavaM madanakelivibhrame
     mattayA sarasijena bhavatyA |
tADitaM sumukhi vIkShya kintviyaM
     gUDhahAsyavadanA bhaviShyati || 78||
sulalitanijabAhvAshliShTagoShThendrasUnoH
     suvalitatarabAhvAshleShadIvyannatAMsA |
madhuramadanagAnaM tanvatI tena sArdhaM
     subhagamukhi mudaM me hA kadA dAsyasi tvam || 79||
jitvA pAshakakhelAyAM AchChidya muralIM hareH |
kShiptAM mayi tvayA devi gopayiShyAmi tAM kadA || 80||
api sumukhi kadAhaM mAlatIkelitalpe
     madhuramadhuragoShThIM vibhratIM vallabhena |
manasijasukhade.asminmandire smeragaNDAM
     sapulakatanureShA tvAM kadA bIjayAmi || 81||
AyAtodyatkamalavadane hanta lIlAbhisArA\-
     dgatyATopaiH shramavilulitaM devi pAdAbjayugmam |
snehAtsaMvAhayitumapi hrIpu~njamUrte.apyalajjaM
     nAmagrAhaM nijajanamimaM hA kadA notsyasi tvam || 82||
hA naptri rAdhe tava sUryabhakteH
     kAlaH samutpanna itaH kuto.asi |
itIva roShAnmukharA lapantI
     sudheva kiM mAM sukhayiShyatIha || 83||
devi bhAShitapIyUShaM smitakarpUravAsitam |
shrotrAbhyAM nayanAbhyAM te kiM nu seviShyate mayA || 84||
kusumachayanakhelAM kurvatI tvaM parItA
     rasakuTilasakhIbhiH prANanAthena sArdham |
kapaTakalahakelyA kvApi roSheNa bhinnA
     mama mudamatibelaM dhAsyase suvrate kim || 85||
nAnAvidhaiH pR^ithulakAkubharairasahyaiH
     sa.nprArthitaH priyatayA bata mAdhavena |
tvanmAnabha~Ngavidhaye sadaye jano.ayaM
     vyagraH patiShyati kadA lalitApadAnte || 86||
prItyA ma~NgalagItanR^ityavilasadvINAdivAdyotsavaiH
     shuddhAnAM payasAM ghaTairbahuvidhaiH saMvAsitAnAM bhR^isham |
vR^indAraNyamahAdhipatyavidhaye yaH paurNamAsyA svayaM
     dhIre saMvihitaH sa kiM tava mahAseko mayA drakShyate || 87||
bhrAtrA goyutamatra ma~njuvadane snehena dattvAlayaM
     shrIdAmnA kR^ipaNAM pratoShya jaTilAM rakShAkhyarAkAkShaNe |
nItAyAH sukhashokarodanabharaiste sandravantyAH paraM
     vAtsalyAjjanakau vidhAsyata itaH kiM lAlanAM me.agrataH || 88||
lajjayAlipurataH parato mAM
     gahvaraM giripaterbata nItvA |
divyagAnamapi tatsvarabhedaM
     shikShyayiShyasi kadA sadaye tvam || 89||
yAchitA lalitayA kila devyA
     lajjayA natamukhIM gaNato mAm |
devi divyarasakAvyakadambaM
     pAThayiShyasi kadA praNayena || 90||
nijakuNDataTiku~nje gu~njadbhramarasa~Nkule |
devi tvaM kachChapishikShAM kadA mAM kArayiShyasi || 91||
vihAraistruTitaM hAraM gumphituM dayitaM kadA |
sakhInAM lajjayA devi sa.nj~nayA mAM nidekShyasi || 92||
svamukhAnmanmukhe devi kadA tAmbUlacharvitam |
snehAtsarvadishe vIkShya samaye tvaM pradAsyasi || 93||
niviDamadanayuddhe prANanAthena sArdhaM
     dayitamadhurakA~nchI yA madAdvismR^itAsIt |
shashimukhi samaye tAM hanta sambhAlya bha~NgyA
     tvaritamiha tadarthaM kiM tvayAhaM praheyA || 94||
kenApi doShalavamAtralavena devi
     santADyamAna iha dhIramate tvayochchaiH |
roSheNa tallalitayA kila nIyamAnaH
     sandrakShyate kimu manAksadaraM jano.ayam || 95||
tavaivAsmi tavaivAsmi na jIvAmi tvayA vinA |
 iti vij~nAya devi tvaM naya mAM charaNAntike || 96||
svakuNDaM tava lolAkShi sapriyAyAH sadAspadam |
atraiva mama saMvAsa ihaiva mama saMsthitiH || 97||
he shrIsarovara sadA tvayi sA madIshA
     preShThena sArdhamiha khelati kAmara~NgaiH |
tvaM chetpriyAtpriyamatIva tayoritImAM
     hA darshayAdya kR^ipayA mama jIvitaM tAm || 98||
kShaNamapi tava sa~NgaM na tyajedeva devI
     tvamasi samavayastvAnnarmabhUmiryadasyAH |
 iti sumukhi vishAkhe darshayitvA madIshAM
     mama virahahatAyAH prANarakShAM kuruShva || 99||
hA nAtha gokulasudhAkara suprasanna
     vaktrAravinda madhurasmita he kR^ipArdra |
yatra tvayA viharate praNayaiH priyArA\-
     ttatraiva mAmapi naya priyasevanAya || 100||
lakShmIryada~Nghrikamalasya nakhA~nchalasya
     saundaryabindumapi nArhati labdhumIshe |
sA tvaM vidhAsyasi na chenmama netradAnaM
     kiM jIvitena mama duHkhadavAgnidena || 101||
AshAbharairamR^itasindhumayaiH katha~nchi\-
     tkAlo mayAtigamitaH kila sAmprataM hi |
tvaM chetkR^ipAM mayi vidhAsyasi naiva kiM me
     prANairvrajena cha varoru bakAriNApi || 102||
tvaM chetkR^ipAmayi kR^ipAM mayi duHkhitAyAM
     naivAtanoratitarAM kimiha pralApaiH |
tvatkuNDamadhyamapi tadbahukAlameva
     saMsevyamAnamapi kiM nu kariShyatIha || 103||
ayi praNayashAlini praNayapuShTadAsyAptaye
     prakAmamatirodanaiH prachuraduHkhadagdhAtmanA |
vilApakusumA~njalirhR^idi nidhAya pAdAmbuje
     mayA bata samarpitastava tanotu tuShTiM manAk || 104||

iti shrIraghunAthadAsagosvAmivirachitastavAvalyAM
          shrIshrIvilApakusumA~njaliH sampUrNA |

\chapter{##Vrajavilasastava ## .. vrajavilAsastava ..}
shrIshrIrAdhAkR^iShNapAdAmbujebhyo namaH |
pratiShThA rajjUbhirbaddhaM
     kAmAdyairvartmapAtibhiH |
ChittvA tAH saMharantastA
     naghAreH pAntu mAM bhaTAH || 1||
dagdhaM vArdhakavanyavahnibhiralaM daShTaM durAndhyAhinA
     biddhaM mAmatipAravashyavishikhaiH krodhAdisiMhairvR^itam |
svAminpremasudhAdravaM karuNayA drAkpAyaya shrIhare
     yenaitAnavadhIrya santatamahaM dhIro bhavantaM bhaje || 2||
yanmAdhurI divyasudhArasAbdheH
     smR^iteH kaNenApyatilolitAtmA |
padmairvrajasthAnakhilAnvrajaM cha
     natvA svanAthau bata tau didR^ikShe || 3||
prAdurbhAvasudhAdraveNa nitarAma~NgitvamAptvA yayo\-
     rgoShThe.atIkShNamana~Nga eSha paritaH krIDAvinodaM rasaiH |
prItyollAsayatIha mugdhamithunashreNIvataMsAvimau
     gAndharvA giridhAriNau bata kadA drakShyAmi rAgeNa tau || 4||
vaikuNThAdapi sodarAtmajavR^itA dvAravatI sA priyA
     yatra shrIshatanindipaTTamahiShIvR^indaiH prabhuH khelati |
premakShetramasau tato.api mathurA shreShThA harerjanmato
     yatra shrIvraja eva rAjatitarAM tAmeva nityaM bhaje || 5||
yatra krIDati mAdhavaH priyatamaiH snigdhaH sakhInAM kulai\-
     rnityaM gADharasena rAmasahito.apyadyApi gochAraNaiH |
yasyApyadbhutamAdhurIrasavidAM hR^idyeva kApi sphure\-
     tpreShThaM tanmathurApurAdapi harergoShThaM tadevAshraye || 6||
vaidagdhyottaranarmakarmaThasakhIvR^indaiH parItaM rasaiH
     pratyekaM taruku~njavallarigiridroNIShu rAtrindivam | ?
nAnAkelibhareNa yatra ramate tannavyayUnoryugaM
     tatpAdAmbujagandhabandhurataraM vR^indAvanaM tadbhaje || 7||
yatra shrIH parito bhramatyavirataM tAstA mahAsiddhayaH
     sphItAH sR^iShTiralaM gavAmudayanI vAso.api goShThaukasAm |
vAtsalyAtparipAlito viharate kR^iShNaH pitR^ibhyAM sukhai
     stannAndIshvaramAlayaM vrajapatergoShThottamA~NgaM bhaje || 8||
putrasyAbhyudayArthamAdarabharairmiShTAnnapAnotkarai\-
     rdivyAnAM cha gavAM maNivrajayuShAM dAnairiha pratyaham |
yo viprAngaNashaH pratoShayati tadbhavyasya vArtAM muhuH
     snehAtpR^ichChati yashcha tadgatamanAstaM gokulendraM bhaje || 9||
putrasnehabharaiH sadAsnutakuchadvandvA tadIyochChala\-
     dgharmasyApi lavasya rakShaNavidhau svaprANadehArbudaiH |
AsaktA kShaNamAtramapyakalanAtsadyaH prasUteva gau\-
     rvyagrAyA vilapatyalaM bahubhayAtsA pAtu goShTheshvarI || 10||
putrAduchchairapi haladharAtsi~nchati snehapurai\-
     rgovindaM yAdbhutarasavatIprakriyAsu pravINA |
sakhyashrIbhirvrajapuramahArAjarAj~nIM nayaista\-
     dgopendraM yA sukhayati bhaje rohiNImIshvarIM tAm || 11||
udyachChubhrAMshukoTidyutinikaratiraskArakAryujjvalashrI\-
     rdurvAroddAmadhAmaprakararipughaTonmAdavidhvaMsidagdhaH |
snehAdapyunnimeShaM nijamanujamito.araNyabhUmau svavItaM
     tadvIryaj~no.api yo na kShaNamupanayate staumi taM dhenukArim || 12||
parjanyanAmAnijanaptR^igarvaiH
     parjanyalakShAnabhito vinindan|
yo narma tanvanramate.asya karNe
     namAmyaho kR^iShNapitAmahaM tam || 13||
priyasya naptuH sukhato.atigarvA\-
     tpAdau na yasyAH patataH pR^ithivyAm |
namAmi narmArchitanaptR^ichandrAM
     varIyasIM kR^iShNapitAmahIM tAm || 14||
shvetashmashrubhareNa sundaramukhaH shyAmaH kR^itI mantraNA
     bhij~naH saMsadi santataM vrajapateH kurvansthitiH yo.architaH |
svaprANArbudakhaNDanairmurabhidaM bhrAtuH sutaM toShaye\-
     tsAhAre nivasansagoShThamavatAnnAmnopanandaH sadA || 15||
gauraH komaladhIrudAracharitaH snigdho vrajendrAnujaH
     shyAmashmashruralaM tadIyacharaNe bhaktaH sunandApitA |
yaH prANaiH parima~nChya mAdhavasukhaM dadhnA mahiShyAH paraM
     sannandastanute sa pAtu nitarAM naH kAsarINAM patiH || 16||
shyAmaH sUkShmamatiryuvAtimadhuro jyotirvidAmagraNIH
     pANDityairjitagIShpatirvrajapateH savye kR^itAvasthitiH |
kR^iShNaM pAlayatIha yaH priyatamA prANArbudairapyalaM
     mantreNApyupanandasUnumiha taM prItyA subhadraM numaH || 17||
daityAdbhIterativikaladhIH komalA~Ngasya sUnoH
     kR^iShNasyochchaiH satatamavane vatsalA vyagrachittA |
kR^ichChrairambAM bahubhirabhito hanta santoShya shUraM
     daityaghnaM yA sutamajanayatsAmbikA pAtu dhAtrI || 18||
nAdairyasya sphuTati parito divyavidhyaNDakoTiH
     ke te tAvatkila ditisutAH kShudrakAtkShudrajIvAH |
snehAnmAtrA vijayamabhito rakShaNe sanniyuktaM
     kR^iShNasyArAtparamiha bhaje hanta dhAtrI sutaM tam || 19||
mantranyAsairiha muraripostatpurodhAH purastA\-
     tsarvA~NgAni prakaTanigamo bhAguriryo.abhirakShya |
AshIrbhishcha pratidinamaho tachChiro jighratIdaM
     vande tAvanmunisurapatestasya pAdAbjayugmam || 20||
kR^iShNasyochchaiH praNayavasatiH sa.npravINaH sakhInAM
     shyAmA~NgastatsamaguNaM vayoveshasaundaryadarpaH |
snehAdandhaH kShaNamakalanAjjAyate yo.avadhUtaH
     shrIdAmAnaM harisahacharaM sarvadA taM prapadye || 21||
gADhAnurAgabhavato virahasya bhItyA
     svapne.api gokulavidhorna jahAti hastam |
yo rAdhikApraNayanirjharasiktachetA
     staM premavihvalatanuM subalaM namAmi || 22||
kR^itvaikatra gavAM kulAni paritaH kR^iShNena sArdhaM mudA
     hastAhasti vinodanarmakathanaiH khelanti mitrotkarAH |
premAmbhodhividhautagauravamahApa~NkAstada~NkArchitA
     statpAdArpitachittajIvitakalA ye tAnprapadyAmahe || 23||
mUrto hAsyarasaH sadaiva sumanAH kAmaM bubhukShAturaH
     prANapreShThavayasyayoranudinaM vAgdehabha~NgyutkaraiH |
hAsyaM yo madhuma~NgalaH prakaTayansambhrAjate kautukI
     taM vR^indAvanachandranarmasachivaM prItyAshu vandAmahe || 24||
gUDhaM tatsuvidagdhatArchitasakhIdvAronnayantI tayoH
     premnA suShThu vidagdhayoranudinaM mAnAbhisArotsavaH |
rAdhAmAdhavayoH sukhAmR^itarasaM yaivopabhu~Nkte muhu\-
     rgoShThe bhavyavidhAyinIM bhagavatIM tAM paurNamAsIM bhaje || 25||
kharvashmashrumudAramujjvalakulaM gauraM samAnaM sphura\-
     tpa~nchAshattamavarShavanditavayaHkrAntiM pravINaM vraje |
goShTheshasya sakhAyamunnatatarashrIdAmato.api priya
     shrIrAdhaM vR^iShabhAnumudbhaTayashovrAtaM sadA taM bhaje || 26||
anudinamiha mAtrA rAdhikAbhavyavArtAH
     kalayitumatiyatnAtpreShyate dhAtrikAyAH |
duhitR^iyugalamuchchaiH premapUraprapa~nchai\-
     rvikalamati yayAsau kIrtidA sAvatAnnaH || 27||
prathamarasavilAse hanta roSheNa tAva\-
     tprakaTamiva virodhaM sandadhAnApi bha~NgyA |
pravalayati sukhaM yA navyayUnoH svanaptroH
     paramiha mukharAM tAM mUrdhni vR^iddhAM vahAmi || 28||
sAndrapremarasaiH plutA priyatayA prAgalbhyamAptA tayoH
     prANapreShThavayasyayoranudinaM lIlAbhisAraM kramaiH |
vaidagdhyena tathA sakhIM prati sadA mAnasya shikShAM rasai\-
     ryeyaM kArayatIha hanta lalitA gR^ihNAtu sA mAM gaNaiH || 29||
praNayalalitanarmasphArabhUmistayoryA
     vrajapuranavayUnoryA cha kaNThAnpikAnAm |
nayati paramadhastAddivyagAnena tuShTyA
     prathayatu mama dIkShAM hanta seyaM vishAkhA || 30||
pratinavanavaku~njaM premapUreNa pUrNA
     prachurasurabhipuShpairbhUShayitvA krameNa |
praNayati bata vR^indA tatra nIlotsavaM yA
     priyagaNavR^itarAdhAkR^iShNayostAM prapadye || 31||
sakhyenAlaM paramaruchirA narmabhavyena rAdhAM
     pAkArthaM yA vrajapatimahiShyAj~nayA sannayantI |
premNA shashvatpathi pathi harervArtayA tarpayantI
     tuShyatvetAM paramiha bhaje kundapUrvAM latAM tAm || 32||
vrajeshvaryAnItAM bata rasavatIkR^ityavidhaye
     mudA kAmaM nandIshvaragiriniku~nje praNayinI |
ChalaiH kR^iShNaH rAdhAM dayitamabhi tAM sArayati yA
     dhaniShThAM tatprANapriyatarasakhIM tAM kila bhaje || 33||
avantItaH kIrteH shravaNabhavato mugdhahR^idayA
     pragADhotkaNThAbhirvrajabhuvamurIkR^itya kila yA |
mudA rAdhAkR^iShNojjvalarasasukhaM vardhayati tAM
     mukhIM nAndIpUrvAM satatamabhivande praNayataH || 34||
mudA rAdhAkR^iShNaprachurajalakelI rasabhara
     skhalatkastUrItadghusR^iNaghanacharchArchitajalA |
pramodAttau phaNasmitamuditamUrmisphuTakara
     shriyA si~nchantIva prathayatu sukhaM nastaraNijA || 35||
sarvAnandakadambakena hariNA prAgyAchitA apyamUH
     svairaM chAru riraMsayA rahasi yAH krodhAdanAdR^itya tAm |
prANapreShThasakhIM nijAmanudinaM tenaiva sArdhaM mudA
     rAdhAM saMramayanti tAH priyasakhI mUrdhnA prapadyetarAm || 36||
premNA ye paribaNTanena kalitAH sevAsadaivotsukAH
     kurvANAH paramAdareNa satataM dAsA vayasyopamAH |
vaMshIdarpaNadUtyavArivilasattAmbUlavINAdibhiH
     prANeshaM paritoShayanti paritastAnpatrimukhyAnbhaje || 37||
tAmbUlArpaNapAdamardanapayodAnAbhisArAdibhi\-
     rvR^indAraNyamaheshvarIM priyatayA yAstoShayanti priyAH |
prANapreShThasakhIkulAdapi kilAsa~NkochitAbhUmikAH
     kelIbhUmiShu rUpama~njarImukhAstA dAsikAH saMshraye || 38||
tR^iNIkR^itya sphAraM sukhajaladhisAraM sphuTamapi
     svakIyaM premnAM ye bharanikaranamrA muraripoH |
sukhAbhAsaM shashvatprathayitumalaM prauDhakutukA\-
     dghatante tAndhanyAnparamiha bhaje mAdhavagaNAn|| 39||
tasyAH kShaNAdarshanato mriyante
     sukhena tasyAH sukhino bhavanti |
snigdhAH paraM ye kR^itapuNyapu~njAH
     prANeshvarIpreShThagaNAnbhaje tAn|| 40||
sApatnyochchayarajyadujjvalarasasyochchaiH samudvR^iddhaye
     saubhAgyodbhaTagarvavibhramabhR^itaH shrIrAdhikAyAH sphuTam |
govindaH smaraphullavallavavadhUvargeNa yena kShaNaM
     krIDatyeSha tamatra vistR^itamahApuNyaM cha vandAmahe || 41||
brahmANDAtparamuchChalatsukhabharaM tatkoTisa~NkhyAdapi
     premNA kR^iShNasurakShitAH pratimuhuH prAptAH paraM nirvR^itAH |
kAmaM tatpAdapadmasundaranakhaprAntaskhaladreNukA
     rakShAvyagradhiyaH sphuranti kila ye tAngopavaryAnbhaje || 42||
prANebhyo.apyadhikaiH priyairapi paraM putrairmukundasya yAH
     snehAtpAdasarojayugmavigaladgharmasya bindoH kaNam |
nirma~nChyorushikhaNDasundarashirashchumbanti gopyashchiraM
     tAsAM pAdarajAMsi santatamahaM nirma~nChayAmi sphuTam || 43||
indranIlakhurarAjitAH paraM
     svarNabaddhavarashR^i~Ngara~njitAH |
pANDugaNDagirigarvakharvikAH
     pAntu naH sapadi kR^iShNadhenavaH || 44||
yAsAM pAlanadohanotsavarataH sArdhaM vayasyotkaraiH
     kAmaM rAmavirAjitaH pratidinaM tatpAdareNUjjvalam |
prItyA sphItavanoruparvatanadIkachCheShu baddhaspR^iho
     goShThAkhaNDalanandano viharate tAH saurabheyIrbhaje || 45||
maNikhachitasuvarNashliShTashR^i~NgadvayashrI\-
     rasitamaNimanoj~najyotirudyatkhurADhyaH |
sphuradaruNimaguchChAndolavidyotikaNThaH
     sa jayati bakashatroH padmagandhaH kakudmI || 46||
mR^idunavatR^inamalpaM saspR^ihaM vaktramadhye
     kShipati paramayatnAdalpakaNDUM cha gAtre |
prathayati muravairI hanta yadvatsakAnAM
     sapadi kila didR^ikShe tattadATIkanAni || 47||
naktaM divaM murariporadharAmR^itaM yA
     sphItA pibatyalamabAdhamaho subhAgyA |
shrIrAdhikAprathitamAnamapIha divya
     nAdairadho nayati tAM muralIM namAmi || 48||
dUtIbhirbahuchATubhiH sakhikulenAlaM vachobha~NgibhiH
     pAdAnte patanairvrajendratanayenApi kruddhAlIgaNaiH |
rAdhAyAH sakhi shakyate davayituM yo naiva mAno yayA
     phutkR^ityaiva nirasyate sukR^itinIM vaMshIM sakhIM tAM numaH || 49||
sphItastANDaviko harermuralikAnAdena nR^ityotsavaM
     ghUrNachchArushikhaNDavalgusarasItIre niku~njAgrataH |
tanvanku~njavihAriNoH sukhabharaM sampAdayedyastayoH
     smR^itvA taM shikhirAjamutsukatayA bADhaM didR^ikShAmahe || 50||
saptAhaM muramardanaH praNayato goShThaikarakShotsuko
     bibhranmAnamudArapANiramaNairyasmai salilaM dadau |
gAndharvAmurabhidvilAsavigalatkAshmIrarajyadguha
     statkhaTTAyitaratnasundarashilo govardhanaH pAtu vaH || 51||
nIpaishchampakapAlibhirnavavarAshokai rasAlotkaraiH
     punnAgairbakulairlava~NgalatikA vAsantikAbhirvR^itaiH |
hR^idyaM tatpriyakuNDayostaTamilanmadhyapradeshaM paraM
     rAdhAmAdhavayoH priyasthalamidaM kelyAstadevAshraye || 52||
shrIvR^indAvipinaM suramyamapi tachChrImAnsa govardhanaH
     sA rasasthalikApyalaM rasamayI kiM tAvadanyasthalam |
yasyApyaMshalavena nArhati manAksAmyaM mukundasya tat\-
     prANebhyo.apyadhikapriyeva dayitaM tatkuNDamevAshraye || 53||
sphIte ratnasuvarNamauktikabharaiH sannirmite maNDape
     thUtkAraM vinidhAya yatra rabhasAttau dampatI nirbharam |
tanvAte ratinAthanarmasachivau tadrAjyacharchAM mudA
     taM rAdhAsarasItaTojjvalamahAku~njaM sadAhaM bhaje || 54||
kAntyA hanta mithaH sphuTaM hR^idi taTe sambimbitaM dyotate
     prItyA tanmithunaM mudA padakavad.hrAgeNa bibhradyayoH |
dhAtrA bhAgyabhareNa nirmitatare trailokyalakShmyAspade
     gaurashyAmatame ime priyatame rUpe kadAhaM bhaje || 55||
netropAntavighUrNanairalaghu taddormUlasa~nchAlanai\-
     rIShaddhAsyarasaiH sudhAdharadhayaishchumbairdR^iDhAli~NganaiH |
etairiShTamahopachAranichayaistannavyayUnoryugaM
     prItyA yaM bhajate tamujjvalamahArAjaM pravandAmahe || 56||
netre dairghyamapA~NgayoH kuTilatA vakShojavakShaHsthale
     sthaulyaM tanmR^iduvAchi vakrimadhurA shroNau pR^ithu sphAratA |
sarvA~Nge varamAdhurI sphuTamabhUdyeneha lokottarA
     rAdhAmAdhavayoralaM navavayaH sandhiM sadA taM bhaje || 57||
duShTAriShTavadhe svayaM samudabhUtkR^iShNA~NghripadmAdidaM
     sphItaM yanmakarandavistR^itirivAriShTAkhyamiShTaM saraH |
sopAnaiH parira~njitaM priyatayA shrIrAdhayA kAritaiH
     premNAli~Ngadiva priyA sara idaM tannItyanityaM bhaje || 58||
kadambAnAM vrAtairmadhupakulajha~NkAralalitaiH
     parIte yatraiva priyasalilalIlAhatimiShaiH |
muhurgopendrasyAtmajamabhisarantyambujadR^isho
     vinodena prItyA tadidamavatAtpAvanasaraH || 59||
parjaNyena pitAmahena nitarAmArAdhya nArAyaNaM
     tyaktvAhAramabhUta putraka iha svIyAtmaje goShThape |
yatrAvApi surArihA giridharaH pautro guNaikAkaraH
     kShuNNAhAratayA prasiddhamavanau tanme taDAgaM gatiH || 60||
sArdhaM mAnasajAhnavImupanadIvargaiH sara~NgotkaraiH
     sAvitryAdisurIkulaishcha nitarAmAkAshavANyA vidhoH |
vR^indAraNyavareNyarAjyaviShaye shrIpaurNamAsI mudA
     rAdhAM yatra siShecha si~nchatu sukhaM sonmattarAdhAsthalI || 61||
prItyA nandIshvaragiritaTe sphArapAShANavR^indai\-
     shchATuShkoNye.anukR^itigurubhirnirmitA yA vidagdhaiH |
reme kR^iShNaH sakhiparivR^ito yatra narmANi tanvan\-
     nAsthAnIM tAM haripadalasatsaurabhAktAM prapadye || 62||
vaidagdhyojjvalavalguvallavavadhUvargeNa nR^ityannasau
     hitvA taM murajidrasena rahasi shrIrAdhikAM maNDayan|
puShpAla~NkR^itisa~nchayena ramate yatra pramodotkarai\-
     strailokyAdbhutamAdhurI parivR^itA sA pAtu rAsasthalI || 63||
gAndharvikAmuravimardananauvihAra
     lIlAvinodarasanirbharabhoginIyam |
govardhanojjvalashilAkulamunnayantI
     vIchIbharairavatu mAnasajAhnavI mAm || 64||
yeShAM kvApi cha mAdhavo viharate snigdhairvayasyotkarai\-
     staddhAtudravapu~njachitritataraistaistaiH svayaM chitritaH |
khelAbhiH kilapAlanairapi gavAM kutrApi narmotsavaiH
     shrIrAdhAsahito guhAsu ramate tAnshailavaryAnbhaje || 65||
sphIte yatra saritsarovarakule gAH pAlayannirvR^ite
     grIShme vArivihArakelinivahairgopendravidyAtmajaH |
prItyA si~nchati mugdhamitranikarAnharSheNa mugdhaH svayaM
     kA~NkShansvIyajayaM jayArthina imAnnityaM tadetadbhaje || 66||
yeShAM kachChapikA lasanmuralikAnAdena harShotkaraiH
     srastArdhastR^iNaguchCha eSha nitarAM vaktreShu saMstambhate |
sakhyenApi tayoH paraM parivR^itA rAdhAbakadveShiNo
     ste hR^idyA mR^igayUthapAH pratidinaM mAM toShayantu sphuTam || 67||
gu~njadbhR^i~Ngakulena juShTakusumaiH saMlabdhama~njushriyAM
     ku~njAnAM nikareShu yeShu ramate saurabhyavistAriNAH |
udyatkAmatara~Ngara~NgitamanastannavyayUnoryugaM
     teShAM vistR^itakeshapAshanikaraiH kuryAmaho mArjanam || 68||
yeShAM chAru taleShu shItaniviDachChAyeShu rAtrindivaM
     puShpANAM vigalatparAgavilasattalpeShu kL^iptAshrayam |
prItyA snigdhamadhuvratairmadhukaNaiH saMsevitaM tannavaM
     yUnoryugmataraM mudA viharate te pAntu mAM bhUruhAm || 69||
gAndharvA muravairiNoH praNayiNoH puShpANi sa~nchinvatoH
     svairaM smerasakhIkulena vR^itayorIShatsmitena dvayoH |
dR^iShTvA kelikaliM tayornavanavaM hAsyena puShpachChalaiH
     kAmaM yA vilasanti tAH kila latAH sevyAH paraM premabhiH || 70||
parichayarasamagnAH kAmamArAttayorye
     madhuratararutenollAsamullAsayanti |
vrajabhuvi navayUnoH supriyAH pakShiNaste
     vidadhatu mama saukhyaM sphAramAlokanena || 71||
chUteShveShu kadambakeShu bakuleShvanyeShu vR^ikSheShvalaM
     prItyA mAdhavikAdivalliShu tathA bhA~NkAranAdairdvayoH |
ye bhR^i~NgAH paritastayoH sukhabharaM vistArayanti sphuTaM
     gu~njanto bata vibhrameNa nitarAM tAneva vandAmahe || 72||
puShpairyasya mudA svayaM giridharaM svairaM niku~njeshvarIM
     phullAM phullatarairamaNDayadalaM phullo niku~njeshvaraH |
IShannetravighUrNanena kalitasvAdhIna uchchaistayA
     shrImAnsa prathayatvaho mama dR^ishoH saukhyaM kadambeshvaraH || 73||
nIchaiH prauDhabhayAtsvayaM surapatiH pAdau vidhR^ityeha yaiH
     svarga~NgAsalilaishchakAra surabhidvArAbhiShekotsavam |
govindasya navaM gavAmadhipatA rAjye sphuTaM kautukA\-
     ttairyatprAdurabhUtsadA sphuratu tadgovindakuNDaM dR^ishoH || 74||
vrajendravaryArpitabhogamuchchai\-
     rdhR^itvA bR^ihatkAyamaghArirutkaH |
vareNa rAdhAM Chalayanvibhu~Nkte
     yatrAnnakUTaM tadahaM prapadye || 75||
girIndravaryoparihArarUpI
     hariH svayaM yatra vihArakArI |
sadA mudA rAjati rAjabhogai\-
     rharisthalaM tattu bhaje.anurAgaiH || 76||
ghaTTakrIDAkutukitamanA nAgarendronavIno
     dAnI bhUtvA madananR^ipatergavyadAnachChalena |
yatra prAtaH sakhibhirabhito  veShTitaH saMrurodha
     shrIgAndharvAM nijagaNavR^itAM naumi tAM kR^iShNavedIm || 77||
nibhR^itamajani yasmAddAnanirvR^itirasmi
     yatra idamabhidhAnaM prApayattatsabhAyAm |
rasavimukhanigUDhe tatra tajj~naikavedye
     sarasi bhavati vAso dAnanirvartanena || 78||
sIribrahmakadambakhaNDasumanorudrApsarogaurikA
     jyotsnAmokShaNamAlyahAravibudhArIndradhvajAdyAkhyayA |
yAni shreShThasarAMsi bhAnti parito govardhanAdreramU
     nIDe chakrakatIrthadaivatagiri shrIratnapIThAnyapi || 79||
aho dolAkrIDArasavarabharotphullavadanau
     muhuH shrIgAndharvAgirivaradharu tau prati madhu |
sakhIvR^indaM yatra prakaTitamudAndolayati tat\-
     prasiddhaM govindasthalamidamudAraM bata bhaje || 80||
priyA priyaprANavayasyavarge
     dhR^itAparAdhaM kila kAliyaM tam |
yatrArdayatpAdatalena nR^itya\-
     nharirbhaje taM kila kAliyaM hradam || 81||
sUryairdvAdashabhiH paraM muraripuH shItArta ugrAtapai\-
     rbhaktipremabharairudAracharitaH shrImAnmudA sevitaH |
yatra strIpuruShaiH kvaNatpashukulairAveShTito rAjate
     snehairdvAdashasUryanAma tadidaM tIrthaM sadA saMshraye || 82||
atyantAtapasevanena paritaH sa~njAtagharmotkarai\-
     rgovindasya sharIrato nipatitairyattIrthamuchchairabhUt |
tattatkomalasAndrasundaratarashrImatsada~NgochChala\-
     dgandhairhArisuvArisudyuti bhaje praskandanaM vandanaiH || 83||
kAtyAyanyatulArchanArthamamale kR^iShNAjale majjataH
     kanyAnAM prakarasya chIranikaraM saMrakShitaM tIrataH |
hR^itvAruhya kadambamujjvalaparIhAsena taM lajjaya\-
     nsmeraMstaM pradadau subha~NgimurajittaM chIraghaTTaM shraye || 84||
heShAbhirjagatItrayaM madabharairutkampayantaM paraiH
     phullannetravighUrNanena paritaH pUrNaM dahantaM jagat |
taM tAvattR^iNavadvidIrya bakabhidvidveShiNaM keshinaM
     yatra kShAlitavAnkarau sarudhirau tatkeshitIrthaM bhaje || 85||
annairyatra chaturvidhaiH pR^ithugaNaiH svairaM sudhAnindibhiH
     kAmaM rAmasametamachyutamaho snigdhairvayasyairvR^itam |
shrImAnyAj~nikavij~nasundaravadhUvargaH svayaM yo mudA
     bhaktyA bhojitavAnsthalaM cha tadidaM taM chApi vandAmahe || 86||
mudA gopendrasyAtmajabhujapariShva~Nganidhaye
     sphuradgopIvR^indairyamiha bhagavantaM praNayibhiH |
bhajadbhistairbhaktyA svamabhilaShitaM prAptamachirA\-
     dyamItIre gopIshvaramanudinaM taM kila bhaje || 87||
bhayAtkaMsasyArAtsadayamachirAchChantanupade
     vinikShiptA rAdhA rahasi kila pitrA prakR^ititaH |
sphurantaM taM dR^iShTvA kamapi ghanapu~njAkR^itivaraM
     tamevAptaM yatnAdyamabhajata sUryo.avatu sa naH || 88||
AvirbhAvamahotsave muraripoH svarNorumuktAphala
     shreNIvibhramamaNDite navagavIlakShe dadau dve mudA |
divyAla~NkR^itiratnaparvatatilaprasthAdikaM chAdarA\-
     dviprebhyaH kila yatra sa vrajapatirvande bR^ihatkAnanam || 89||
gAndharvAyA janimaNirabhUdyatra sa~NkIrtitAyAM
     AnandotkaiH suramuninaraiH kIrtidAgarbhakhanyAm |
gopIgopaiH surabhInikaraiH samparIte.atra mukhe
     rAvalyAkhye vR^iSharavipure prItipUro mamAstAm || 90||
yasya shrImachcharaNakamale komale komalApi
     shrIrAdhochchairnijasukhakR^ite sannayantI kuchAgre |
bhItApyArAdatha nahi dadhAtyasya kArkashyadoShA\-
     tsa shrIgoShThe prathayatu sadA sheShashAyI sthitiM naH || 91||
     yatra kAmasaraH sAkShAdgopikAramaNaM saraH |
     rAdhAmAdhavayoH preShThaM tadvanaM kAmyakaM bhaje || 92||
mallIkR^itya nijAH sakhIH priyatamA garveNa sambhAvitA
     mallIbhUya madIshvarI rasamayI mallatvamutkaNThayA |
yasminsamyagupeyUShA bakabhidA rAdhA niyuddhaM mudA
     kurvANA madanasya toShamatanodbhANDIrakaM taM bhaje || 93||
AkR^iShTA yA kupitahalinA lA~NgalAgreNa kR^iShNA
     dhIrA yAntI lavaNajaladhau kR^iShNasambandhahInA |
adyApItthaM sakalamanujairdR^ishyate saiva yasmi\-
     nbhaktyA vande.adbhutamidamaho rAmaghaTTaM pradesham || 94||
prANapreShThavayasyavargamudare pApIyaso.aghAsura
     syAraNyodbhaTapAvakotkaTaviShai`rduShTe praviShTaM puraH |
vyagraH prekShya ruShA pravishya sahasA hatvA khalaM taM balI
     yatrainaM nijamArarakSha murajitsA pAtu sarpasthalI || 95||
draShTuM sAkShAtsvapatimahimodrekamutkena dhAtrA
     vatsavrAte drutamapahR^ite vatsapAlotkare cha |
tattadrUpo hariratha bhavanyatra tattatprasUnAM
     modaM chakre.ashanamapi bhaje vatsahArasthalIM tAm || 96||
bADhaM vatsakavatsapAlahR^itito jAtAparAdhAdbhayai\-
     rbrahmA sAsramapUrvapadyanivahairyasminnipatyAvanau |
tuShTAvAdbhutavatsapaM vrajapateH putraM mukundaM manAk
     smeraM bhIruchaturmukhAkhyamanishaM seshaM pradeshaM numaH || 97||
gandhavyAkulabhR^i~Ngasa~nchayachamUsa~NghR^iShTapuShpotkarai\-
     rbhAjatkalpalatA palAshinikarairvibhrAjitAni sphuTam |
yAni sphArataDAgaparvatanadIvR^indena rAjantyaho
     kR^iShNapreShThavanAni tAni nitarAM vande muhurdvAdasha || 98||
pUrNaH premarasaiH sadA muraripordAsaH sakhA cha priyaM
     svaprANArbudato.api tatpadayugaM hitveha mAsAndasha |
prItyA yo nivasaMstadIyakathayA goShThaM muhurjIvaya\-
     tyAyAtaM kila pashya kR^iShNamiti taM mUrdhnA vahAmyuddhavam || 99||
mudA yatra brahmA tR^iNanikaragulmAdiShu paraM
     sadA kA~NkShanjanmArpitavividhakarmApyanudinam |
kramAdye tatraiva vrajabhuvi vasanti priyajanA
     mayA te te vandyAH paramavinayAtpuNyakhachitAH || 100||
purA premodrekaiH pratipadanavAnandamadhuraiH
     kR^itashrIgAndharvAchyutacharaNavaryArchanabalAt |
nikAmaM svAminyaH priyatarasarastIrabhuvane
     vasanti sphIta ye ta iha mama jIvAtava ime || 101||
yatki~nchittR^igulmakIkaTamukhaM goShThe samastaM hi tat\-
     sarvAnandamayaM mukundadayitaM lIlAnukUlaM param |
shAstraireva muhurmuhuH sphuTamidaM niShTa~NkitaM yAch~nayA
     brahmAderapi saspR^iheNa tadidaM sarvaM mayA vandyate || 102||
bhrama~nchachChe kachChe kShitidharapatervakrimagatai\-
     rlapanrAdhe kR^iShNetyanavaratamunmattavadaham |
patankvApi kvApyuchChalitanayanadvandvasalilaiH
     kadA kelisthAnaM sakalamapi si~nchAmi vikalaH || 103||
na brahmA na cha nArado nahi haro na premabhaktottamAH
     samyagj~nAtumihA~njasArhati tathA yasyochChalanmAdhurIm |
kintveko baladeva eva paritaH svArdhaM svamAtrA sphuTaM
     premnApyuddhava eSha vetti nitarAM kiM sa vrajo varNyate || 104||
anyatra kShaNamAtramachyutapure premAmR^iTAmbhonidhi
     snAto.apyachutyasajjanairapi samaM nAhaM vasAmi kvachit |
kintvatra vrajavAsinAmapi samaM yenApi kenApyalaM
     saMlApairmama nirbharaH prati muhurvAso.astu nityaM mama || 105||
rAgeNa rUpama~njaryAraktIkR^itamuradviShaH |
guNArAdhitarAdhAyAH pAdayugme ratirmama || 106||
idaM niyatamAdarAdvrajavilAsanAmastavaM
     sadA vrajajanollasanmadhuramAdhurIbandhuram |
muhuH kutukasambhR^itAH paripaThati ye valgu tat\-
     samaM parikarairdR^iDhaM mithunamatra pashyanti te || 107||

iti shrIraghunAthadAsagosvAmivirachitastavAvalyAM
          shrIabhIShTasUchanaM shrIvrajavilAsastavaH samAptaH

\chapter{##Shri Radhikayah Premapurabhidhastotram ## .. shrIrAdhikAyAH premapUrAbhidhastotram ..}
madhumadhuranishAyAM jyotirudbhAsitAyAM
     sitakusumasuvAsAH kL^iptakarpUrabhUShA |
subalasakhamupetA dUtikAnyastahastA
     kShaNamapi mama rAdhe netramAnandaya tvam || 1||
smaragR^ihamavishantI vAmyato dhAma gantuM
     saraNimanusarantI tena saMrud.hdhya tUrNam |
balasavalitakAkvA lambhitAntaHsmitAkShI
     kShaNamapi mama rAdhe netramAnandaya tvam || 2||
mudiraruchiravakShasyunnate mAdhavasya
     sthiracharavaravidyudvallivanmallitalpe |
lalitakanakayUthImAlikAvachcha bhAntI
     kShaNamapi mama rAdhe netramAnandaya tvam || 3||
smaravilasitatalpe jalpalIlAmanalpAM
     kramakR^itiparihInAM bibhratI tena sArdham |
mitha iva parirambhArambhavR^ittyekavarShmA
     kShaNamapi mama rAdhe netramAnandaya tvam || 4||
pramadamadanayuddhashrAntitaH kAntakR^iShNa
     prachurasukhadavakShaHsphAratalpe svapantI |
rasamuditavishAkhAjIvitAbdhau samR^iddhA
     kShaNamapi mama rAdhe netramAnandaya tvam || 5||
api bata suratAnte prauDhisaubhAgyadR^ipya\-
     tpraNayadhR^itasusakhyonmAdamattorugarvaiH |
daragaditamukundAkalpitAkalpatalpA
     kShaNamapi mama rAdhe netramAnandaya tvam || 6||
smaradayitaniku~njaprA~NgaNe vyAvahAsyAM
     vrajanavayuvarAjaM vakrimADambareNa |
sadasi paribhavantI saMstutAlIkulena
     kShaNamapi mama rAdhe netramAnandaya tvam || 7||
kvachana cha daradoShAddaivataH kR^iShNajAtA\-
     tsapadi vihitamAnA mauninI tatra tena |
prakaTitapaTuchATuprArthyamAnaprasAdA
     kShaNamapi mama rAdhe netramAnandaya tvam || 8||
pituriha vR^isabhAnorbhAgyabha~NgI bakAreH
     praNayavipinabhR^i~NgI sa~NginI tasya devI |
nijagaNakumudAleH kaumudI hA kR^ipAbdhe
     kShaNamapi mama rAdhe netramAnandaya tvam || 9||
niravadhiguNasindho bhadrasenAdibandho
     nirupamaguNavR^indapreyasIvR^indamaule |
atikadanasamudre majjato hA kR^ipArdre
     kShaNamapi mama rAdhe netramAnandaya tvam || 10||
naTayati ruchinAndImunnayansUtradhAra
     pravara iva rasaj~nAnartakIM ra~NgarUpe |
rasavati dashake.asminpremapUrAbhidhe yaH
     sa sapadi labhate tatdvandvaratnaprasAdam || 11||

iti shrIraghunAthadAsagosvAmivirachitastavAvalyAM
          shrIrAdhikAyAH premapUrAbhidhastotraM sampUrNam |

\chapter{##Shri Shrigranthakartuh Prarthana ## .. shrIshrIgranthakartuH prArthanA ..}
subalasakhAdharapallava
     samuditamadhumugdhamadhurIlubdhAm |
ruchijitaka~nchanachitrAM
     kA~nchana chitrAM pikIM vande || 1||
vR^iSharavijAdharAbimbI
     phalarasapAnotkamadbhutaM bhramaram |
dhR^itashikhipi~nChakachUlaM
     pItadukUlaM chiraM naumi || 2||
jitaH sudhAMshuryashasA mameti
     garvaM mUDha mA bata goShThavIra |
tavArinarInayanAmbupAlI
     jigAya tAtaM prasabhaM yato.asya || 3||
ku~nje ku~nje pashupavanitAvAhinIbhiH samastA\-
     tsvairaM kR^iShNaH kusumadhanuSho rAjyacharchAM karotu |
etatprArthyaM sakhi mama yathA chittahArI sa dhUrto
     baddhaM chetastyajati kimu vA prANamoShAM karoti || 4||

iti shrIraghunAthadAsagosvAmivirachitastavAvalyAM
          shrIshrIgranthakartuH prArthanA samAptA |

\chapter{##Svaniyamadashakam ## .. svaniyamadashakam ..}
gurau mantre nAmni prabhuvarashachIgarbhajapade
     svarUpe shrIrUpe gaNayuji tadIyaprathamaje |
girIndre gAndharvAsarasi madhupuryAM vrajavane
     vraje bhakte goShThAlayiShu paramAstAM mama ratiH || 1||
na chAnyatra kShetre haritanusanAthe.api sujanA\-
     drasAsvAdaM premNA dadhadapi vasAmi kShaNamapi |
samaM tvetadgrAmyAvalibhirabhitanvannapi kathAM
     vidhAsye saMvAsaM vrajabhuvana eva pratibhavam || 2||
sadA rAdhAkR^iShNochChaladatulakhelAsthalayugaM
     vrajaM santyajyaitadyugavirahito.api truTimapi |
punardvArAvatyAM yadupatimapi prauDhavibhavaiH
     sphurantaM tadvAchApi cha na hi chalAmIkShitumapi || 3||
gatonmAdai rAdhA sphurati hariNA shliShTahR^idayA
     sphuTaM dvArAvatyAmiti yadi shR^iNomi shrutitaTe |
tadAhaM tatraivoddhatamati patAmi vrajapurA\-
     tsamuDDIya svAntAdhikagatikhagendrAdapi javAt || 4||
anAdiH sAdirvA paTuratimR^idurvA pratipada
     pramIlatkAruNyaH praguNakaruNAhIna iti vA |
mahAvaikuNTheshAdhika iha naro vA vrajapate\-
     rayaM sUnurgoShThe pratijani mamAstAM prabhuvaraH || 5||
anAdR^ityodgItAmapi munigaNairvaiNikamukhaiH
     pravINAM gAndharvAmapi cha nigamaistatpriyatamAm |
ya ekaM govindaM bhajati kapaTI dAmbhikatayA
     tadabhyarNe shIrNe kShaNamapi na yAmi vratamidam || 6||
ajANDe rAdhetisphuradabhidhayA siktajananyA\-
     nayA sAkaM kR^iShNaM bhajati ya iha premanamitaH |
paraM prakShAlyatachcharaNakamale tajjalamaho
     mudA pItvA shashvachChirasi cha vahAmi pratidinam || 7||
parityaktaH preyojanasamudayairbADhamasudhI\-
     rdurandho nIrandhraM kadanabharavArbdhau nipatitaH |
tR^iNaM dantairdR^iShTvA chaTubhirabhiyAche.adya kR^ipayA
     svayaM shrIgAndharvA svapadanalinAntaM nayatu mAm || 8||
vrajotpannakShIrAshanavasanapAtrAdibhirahaM
     padArthairnirvAhya vyavahR^itimadambhaM saniyamaH |
vasAmIshAkuNDe girikulavare chaiva samaye
     mariShye tu preShThe sarasi khalu jIvAdipurataH || 9||
sphurallakShmIvrajavijayilakShmIbharalasa\-
     dvapuHshrIgAndharvAsmaranikaradIvyadgiribhR^itoH |
vidhAsye ku~njAdau vividhavarivasyAH sarabhasaM
     rahaH shrIrUpAkhyapriyatamajanasyaiva charamaH || 10||
kR^itaM kenApyetannijaniyamashaMsistavamimaM
     paThedyo vishraddhaH priyayugalarUpe.arpitamanAH |
dR^iDhaM goShThe hR^iShTo vasativasatiM prApya samaye
     mudA rAdhAkR^iShNau bhajati sa hi tenaiva sahitaH || 11||

iti shrIraghunAthadAsagosvAmivirachitastavAvalyAM
          svaniyamadashakaM sampUrNam |

\chapter{##Shriradhikashtottarashatanamastotram ## .. shrIrAdhikAShTottarashatanAmastotram ..}
avIkShyAtmeshvarIM kAchidvR^indAvanamaheshvarIm |
tatpadAmbhojamAtraikagatirdAsyatikAtarA || 1||
patitA tatsarastIre rudatyartaravAkulam |
tAChrIvaktrekShaNAvAptyai nAmAnyetAni sa~njagau || 2||
rAdhA gAndharvikA goShThayuvarAjaikakAmitA |
gAndharvA rAdhikA chandrakAntirmAdhavasa~NginI || 3||
dAmodarAdvaitasakhI kArttikotkIrtideshvarI |
mukundadayitAvR^indadhammillamaNima~njarI || 4||
bhaskaropAsikA vArShabhAnavI vR^iShabhAnujA |
ana~Ngama~njarIjyeShThA shrIdAmAvarajottamA || 5||
kIrtidAkanyakA mAtR^isnehapIyUShaputrikA |
vishAkhAsavayaH preShThavishAkhAjIvitAdhikA || 6||
prANAdvitIyalalitA vR^indAvanavihAriNI |
lalitAprANalakShaikarakShA vR^indAvaneshvarI || 7||
vrajendragR^ihinIkR^iShNaprAyasnehaniketanam |
vrajagogopagopAlIjIvamAtraikajIvanam || 8||
snehalAbhIrarAjendravatsalAchyutapUrvajA |
govindapraNayAdhArasurabhisevanotsukA || 9||
dhR^itanandIshvarakShemagamanotkaNThimAnasA |
svadehAdvaitatAdR^iShTidhaniShThAdhyeyadarshanA || 10||
gopendramahiShIpAkashAlavediprakAshikA |
AyurvardhakaraddhAnnA rohiNIghrAtamastakA || 11||
subalanyastasArUpyA subalaprItitoShitA |
mukharAdR^iksudhAnaptrI jaTilAdR^iShTibhIShitA || 12||
madhuma~NgalanarmoktijanitasmitachandrikA |
paruNamAsIbahiHkhelatprANapa~njarashArikA || 13||
svagaNAdvaitajIvAtuH svIyAha~NkaravardhinI |
svagaNopendrapAdAbjasparshalambhanaharShiNI || 14||
svIyavR^indAvanodyAnapAlikIkR^itavR^indakA |
j~nAtavR^indATavIsarvalatAtarumR^igadvijA || 15||
IShAchandanasa~NghR^iShTanavakAshmIradehabhAH |
javApuShpaprabhAhAripaTTachInAruNAmbarA || 16||
charaNAbjatalajyotiraruNIkR^itabhUtalA |
harichittachamatkArI chArunUpuraniHsvanA || 17||
kR^iShNashrAntiharashroNIpIThavalgitaghaNTikA |
kR^iShNasarvasvapInodyatkuchA~nchanmaNimAlikA || 18||
nAnAratnollasACha~NkhachUDAchArubhujadvayA |
syamantakamaNibhrAjanmaNibandhAtibandhurA || 19||
suvarNadarpanajyotirulla~NghimukhamaNDalA |
pakvadADimabIjAbhadantAkR^iShTAghabhIChukA || 20||
abjarAgAdisR^iShTAbjakalikAkarNabhUShaNA |
saubhAgyakajjalA~NkAktAnetraninditakha~njanA || 21||
suvR^ittamauktikamuktAnAsikATilapuShpikA |
suchArunavakastUrItilakA~nchitabhAlakA || 22||
divyaveNIvinirdhUtakekipi~nChAvarastutiH |
netrAntasharavidhvaMsikR^itachANUrajiddhariH || 23||
sphuratkaishoratAruNyasandhibandhuravigrahA |
mAdhavollAsakonmattA pikorumadhurasvarA || 24||
prANAyutashatapreShThamAdhavotkIrtilampaTA |
kR^iShNApa~Ngatara~NgodyatsmitapIyUShabudbudA || 25||
pu~njIbhUtajagallajjAvaidagdhIdigdhavigrahA |
karuNavidravaddehA mUrtimanmAdhurIghaTA || 26||
jagadguNavatIvargagIyamAnaguNochchayA |
shachyAdisubhagavR^indavandyamAnorusaubhagA || 27||
vINAvAdanasa~NItarAsalAsyavishAradA |
nAradapramukhodgItajagadAnandasadyashaH || 28||
govardhanaguhAgehagR^ihiNI ku~njamaNDanA |
chaNDAMshunandinIbaddhabhAginIbhAvavibhramA || 29||
divyakundalatAnarmasakhyadAmavibhUShitA |
govardhanadharAhlAdishR^i~NgArarasapaNDitA || 30||
girIndradharavakShaHshrIsha~NkhachUDArijIvanam |
gokulendrasutapremakAmabhUpendrapaTTanam || 31||
vR^iShavidhvaMsanarmoktisvanirmitasarovarA |
nijakuNDajalakrIDAjitasa~NkarShaNAnujA || 32||
muramardanamattebhavihArAmR^itadIrghikA |
girIndradhArapArIndraratiyuddhorusiMhikA || 33||
svatanusaurabhonmattIkR^itamohanamAdhavA |
dormUlochchalanakrIDAvyAkulIkR^itakeshavA || 34||
nijakuNDataTIku~njakL^iptakelikalodyamA |
divyamallikulollAsishayyAkalpitavigrahA || 35||
kR^iShNavAmabhujAnyastachArudakShiNagaNDakA |
savyabAhulatAbaddhakR^iShNadakShiNasadbhujA || 36||
kR^iShNadakShiNachArUrushliShTavAmorurambhikA |
girIndradharadhR^igvakShomardisustanaparvatA || 37||
govindAdharapIyUShavAsitAdharapallavA |
sudhAsa~nchayachArUktishItalIkR^itamAdhavA || 38||
govindodgIrNatAmbUlarAgarAjyatkapolikA |
kR^iShNasambhogasaphalIkR^itamanmathasambhavA || 39||
govindamArjitoddAmaratiprasvinnasanmukhA |
vishAkhAvIjitakrIDAshrAntinidrAluvigrahA || 40||
govindacharaNanyastakAyamAnasajIvanA |
svaprAnArbudanirma~nChyaharipAdarajaHkaNA || 41||
aNumAtrAchyutAdarshashapyamAnAtmalochanA |
nityanUtanagovindavaktrashubhrAMshudarshanA || 42||
niHsImaharimAdhuryasaundaryAdyekabhoginI |
sApatnyadhAmamuralImAtrAbhAgyakaTAkShiNI || 43||
gADhabuddhibalakrIDAjitavaMshIvikarShiNI |
narmoktichandrikotphullakR^iShNakAmAbdhivardhinI || 44||
vrajachandrendriyagrAmavishrAmavidhushAlikA |
kR^iShNasarvendriyonmAdirAdhetyakSharayugmakA || 45||
idaM shrIrAdhikAnAmnAmaShTottarashatojjvalam |
shrIrAdhAlambhakaM nAma stotraM chAru rasAyanam || 46||
yo.adhIte paramaprItyA dInaH kataramAnasaH |
sa nAthamachireNaiva sanAthamIkShate dhruvam || 47||

iti shrIraghunAthadAsagosvAmivirachitastavAvalyAM
          shrIrAdhikAShTottarashatanAmastotraM sampUrNam |

\chapter{##Radhikashtakam ## .. rAdhikAShTakam raghunAthadAsagosvAmi ..}
rasavalitamR^igAkShImaulimANikyalakShmIH
     pramuditamuravairipremavApImarAlI |
vrajavaravR^iShabhAnoH puNyagIrvANavallI
     snapayati nijadAsye rAdhikA mAM kadA nu || 1||
sphuradaruNadukUladyoitodyannitamba
     sthalamabhi varakA~nchilAsyamullAsayantI |
kuchakalasavilAsasphItamuktAsarashrIH
     snapayati nijadAsye rAdhikA mAM kadA nu || 2||
sarasijavaragarbhAkharvakAntiH samudya\-
     ttaruNimaghanasArAshliShTakaishorasIdhuH |
daravikasitahAsyasyandibimbAdharAgrA
     snapayati nijadAsye rAdhikA mAM kadA nu || 3||
atichaTulataraM taM kAnanAntarmilantaM
     vrajanR^ipatikumAraM vIkShya sha~NkAkulAkShI |
madhuramR^iduvachobhiH saMstutA netrabha~NgyA
     snapayati nijadAsye rAdhikA mAM kadA nu || 4||
vrajakulamahilAnAM prANabhUtAkhilAnAM
     pashupapatigR^ihiNyAH kR^iShNavatpremapAtram |
sulalitalalitAntaHsnehaphullAntarAtmA
     snapayati nijadAsye rAdhikA mAM kadA nu || 5||
niravadhi savvishAkhA shAkhiyUthaprasUnaiH
     srajamiha rachayantI vaijayantIM vanAnte |
aghavijayavaroraHpreyasI shreyasI sA
     snapayati nijadAsye rAdhikA mAM kadA nu || 6||
prakaTitanijavAsaM snigdhaveNuprasAdai\-
     rdrutagatiharimArAtprApya ku~nje smitAkShI |
shravaNakuharakuNDaM tanvatI namravaktrA
     snapayati nijadAsye rAdhikA mAM kadA nu || 7||
amalakamalarAjisparshivAtaprashIte
     nijasarasi nidAghe sAyamullAsinIyam |
parijanagaNayuktA krIDayantI bakAriM
     snapayati nijadAsye rAdhikA mAM kadA nu || 8||
paThati vimalachetA mR^iShTarAdhAShTakaM yaH
     parihR^itanikhilAshAsantatiH kAtaraH san|
pashupapatikumAraH kAmamAmoditastaM
     nijajanagaNamadhye rAdhikAyAstanoti || 9||

iti shrIraghunAthadAsagosvAmivirachitastavAvalyAM
          shrIrAdhikAShTakaM sampUrNam |

\chapter{##Premambhojamarandastavarajah ## .. premAmbhojamarandastavarAjaH ..}
mahAbhAvojjvalachchintAratnodbhAvitavigrahAm |
sakhIpraNayasadgandhavarodvartanasuprabhAm || 1||
kAruNyAmR^itavIchibhistAruNyAmR^itadhArayA |
lAvaNyAmR^itavanyAbhiH snapitAM glaptendirAm || 2||
hrIpaTTavastraguptA~NgIM saundaryaghusR^iNA~nchitAm |
shyAmalojjvalakastUrIvichitritakalevarAm || 3||
kampAshrupulakastambhasvedagadgadaraktatAH |
unmAdo jADyamityetai rathanirnavabhiruttamaiH || 4||
klptAla~NkR^itisaMsliShTAM guNAlIpuShpamAlinIm |
dhIrAdhIrAtvasadvAsapaTavAsaiH pariShkR^itAm || 5||
prachChannamAnadhammillAM saubhAgyatilakojjvalAm |
kR^iShNanAmayashaHshrAvavataMsollAsikarNikAm || 6||
rAgatAmbUlaraktauShThIM premakauTilyakajjalAm |
narmabhAShitanisyandasmitakarpUravAsitAm || 7||
saurabhAntaHpure garvaparya~Nkopari lIlayA |
niviShTAM premavaichittyavichalattaralA~nchitAm || 8||
praNayakrodhasachcholIbandhguptIkR^itastanAm |
sapatnIvaktrahR^ichChoShiyashaHshrIkachChapIvarAm || 9||
madhyatAtmasakhIskandhalIlAnyastakarAmbujAm |
shyAmAM shyAmasmarAmodamadhulIpariveshikAm || 10||
tvAM natvA yAchate dhR^itvA tR^iNaM dantairayaM janaH |
svadAsyAmR^itasekena jIvayAmuM suduHkhitam || 11||
na mu~nchechCharaNAyAtamapi duShTaM dayAmayaH |
ato gAndharvike hA hA mu~nchainaM naiva tAdR^isham || 12||
premAmbhojamarandAkhyaM stavarAjamimaM janaH |
shrIrAdhikAkR^ipAhetuM paThaMstaddAsyamApnuyAt || 13||

iti shrIraghunAthadAsagosvAmivirachitastavAvalyAM
          premAmbhojamarandastavarAjaH sampUrNaH |

\chapter{##Svasankalpaprakashastotram ## .. svasa~NkalpaprakAshastotram ..}
anArAdhya rAdhApadAmbhojareNuM
     anAshritya vR^indATavIM tatpadA~NkAm |
asambhAShya tadbhAvagambhIrachittA\-
     nkutaH shyAmasindhau rasyasyAvagAhaH || 1||
navaM divyaM kAvyaM svakR^itamatulaM nATakakulaM
     prahelIrgUDhArthAH sakhi ruchiravINAdhvanigatIH |
kadA snehollAsairlalitalalitApreraNabalA\-
     tsalajjaM gAndharvA sarasamasakR^ichChikShayati mAm || 2||
alaM mAnagranthernibhR^itachaTumokShAya nibhR^itaM
     mukunde hA heti prathayati nitAntaM mayi jane |
tadarthaM gAndharvAcharaNapatitaM prekShya kuTilaM
     kadA premakrauryAtprakharalalitA bhartsayati mAm || 3||
mudA vaidagdhyAntarlalitanavakarpUramilana
     sphurannAnAnarmotkaramadhuramAdhvIkarachane |
sagarvaM gAndharvAgiridharakR^ite premavivashA
     vishAkhA me shikShAM vitaratu gurustadyutasakhI || 4||
kuhUkaNThIkaNThAdapi kamanakaNThI mayi puna\-
     rvishAkhA gAnasyApi cha ruchirashikShAM praNayatu |
yathAhaM tenaitadyuvayugalamullAsya sagaNA\-
     llebhe rAse tasmAnmaNipadakahArAniha muhuH || 5||
kvachitku~nje ku~nje ChalamilitgopAlamanu tAM
     madIshAM madhyAhne priyatarasakhIvR^indavalitAm |
sudhAjaitrairannaiH pachanarasavichchampakalatA
     kR^itodyachChikSho.ahaM jana iha kadA bhojayati bhoH || 6||
kvachitku~njakShetre smaraviShamasa~NgrAmagarima
     kSharachchitrashreNIM vrajayuvayugasyotkaTamadaiH |
vidhatte sollAsaM punarasamayaM parNakachayai\-
     rvichitraM chitrAtaH sakhi kalitashikSho.apyanu janaH || 7||
paraM tu~NgAdyA yauvatasadasi vidyAdbhutaguNaiH
     sphuTaM jitvA padmAprabhR^itinavanArIrbhramati yA |
jano.ayaM sampAdya sakhi vividhavidyAspadatayA
     tayA kiM shrInAthAchChalanihitanetre~NgitalavaiH || 8||
sphuranmuktAgu~njAmaNisumanasAM hArarachane
     mudendorlekhA me rachayatu tathA shikShaNavidhim |
yathA taiH sa~NkL^iptairdayitasarasImadhyasadane
     sphuTaM rAdhAkR^iShNAvayamapi jano bhUShayati tau || 9||
aye pUrvaM ra~NgetyamR^itamayavarNadvayarasa
     sphuraddevIprArthyaM naTanapaTalaM shikShayati chet |
tadA rAse dR^ishyaM rasavalitalAsyaM vidadhato\-
     stayorvaktre yu~nje naTanapaTuvITiM sakhi muhuH || 10||
sadakShakrIDAnAM vidhimiha tathA shikShayituM sA
     sudevI me divyaM sadasi sudR^ishAM gokulabhuvAm |
tayordvandve khelAmatha vidadhatoH sphUrjati tathA
     karomi shrInAthAM sakhi vijayinIM netrakathanaiH || 11||
rahaH kIradvArApyativiShamagUDArtharachanaM
     dale pAdme padyaM prahitamudayachchATuhariNA |
samagraM vij~nAyAchalapativalatkandarapade
     tadabhyarNe neShye drutamati madIshAM nishi kadA || 12||
adabhraM bibhrANau smararaNabharaM kandarakhale
     mitho jetuM viddhAvapi nishitanetrA~nchalasharaiH |
api klidyadgAtrau nakhadashanashastrairapi darA
     tyajantau draShTuM tau kimu tamasi vatsyAmi samaye || 13||
samAnaM nirvAhya smarasadasi sa~NgrAmamatulaM
     tadAj~nAtaH sthitvA militatanu nidrAM gatavatoH |
tayoryugmaM yuktyA tvaritamabhisa~Ngamya kutukA\-
     tkadAhaM seviShye sakhi kusumapu~njavyajanabhAk || 14||
mudA ku~nje gu~njadbhramaranikare puShpashayanaM
     vidhAyArAnmAlAghusR^iNamadhuvITIvirachanam |
punaH kartuM tasminsmaravilasitAnyutkamanaso\-
     stayostoShAyAlaM vidhumukhi vidhAsyAmi kimaham || 15||
jitonmIlannIlotpalaruchini kAntyorasi hare\-
     rniku~nje nidrANAM dyutivijitagA~NgeyagurutAm |
kadA dR^iShTvA rAdhAM nabhasi navameghe sthiratayA
     valadvidyullakShmyAM muhuriha dadhe thutkR^itimaham || 16||
vilAse vismR^itya skhalitamurura~NgairmaNisaraM
     drutaM bhItyAgatya priyatamasakhIsaMsadi hriyA |
tamAnetuM smitvA tadaviditanetrAntanaTanaiH
     kadA shrImannAthA svajanamachirAtprerayati mAm || 17||
kvachitpadmAshaivyAdikavalitachandrAvalimuru
     priyAlApollAsairatulamapi dhinvannaghaharaH |
kadA vA matprekShAlavakalitavailakShyabharataH
     kva rAdhetyAjalpanmalinayati sarvAH paramimAH || 18||
sagarvAH saMrud.hdhya prakharalalitAdyAH sahacharI\-
     stato dAnaM darpAtsakhi mR^igayatA svaM giribhR^itA |
vishAkhA mannAthAnayananaTanapreraNabalA\-
     dvidhR^ityArAnnItA ruShamiha dadhAnA kShipatu naH || 19||
stanau shailaprAyAvapi tava nitambo rathasamaH
     sphuTaM jIrNA naurme kalaya taTinIM vAtaviShamAm |
kathaM pAraM gachCheriha nivasa rAtrAviti hare\-
     rvachaH shrutvA rAdhA kapaTakupitA smerayatu mAm || 20||
idaM svAnte bhu~nje kadalamapi yadra~NgaNalatA
     bhidhaikasvarvallIpavanalabhanenaiva phalitam |
tadabhyAse sphUrjanmadanasubhagaM tadyuvayugaM
     bhajiShye sollAsaM priyajanagaNairitthamiha kim || 21||

iti shrIraghunAthadAsagosvAmivirachitastavAvalyAM
          svasa~NkalpaprakAshastotraM sampUrNam |

\chapter{##Shri Shriradhakrishnojjvalakusumakelih ## .. shrIshrIrAdhAkR^iShNojjvalakusumakeliH ..}
sakhIvR^indairvR^indArchitamuditavR^indAvanapadaM
     vinodenAsAdya priyakusumapAtrA~Nkuraphalam |
harantyAM rAdhAyAM dhvanibhirabhisa~Ngamya giribhR^i\-
     ddhR^itATopaM tAbhiH saha vivadamAno.avadadidam || 1||
rahaH pATacharyaH kuruta kimidaM yauvatamadA\-
     tsphuTaM yuShmAbhirme vipinamapaNaM nAshitamadaH |
ato vallaryarthe tanutaTimavashyaM phalakR^ite
     kuchAnvo luNThAmaH kisalayapade chAdharakulam || 2||
 iti nishamya bhrubha~NgamavalokantyAM lalitAyAmanyAH sasmitamUchuH
vadantyaH smo nUnaM tava kiTava satyaM hitamidaM
     vR^ithATopaM hitvA vraja jhaTaTi nandIshvarapuram |
na jAnIShe kiM taM prakharalalitAvikramataTiM
     yayA te vAnyAntaH kShapitamasakR^itpauruShayashaH || 3||
 iti vishAkhAkathitamAkarNya sadarpAbhinayaM kR^iShNaH punaH prAha
aho shiShyA evaM hi kuruta dhAR^iShtyaM mayi puna\-
     ryathA shrutvA krudhantyakhilalatikAmaNDanavaraH |
mayA kAmaM yatra praguNaguruNA yatkaruNayA
     vitIrNA vo dIkShA na kila katidhA jainarachitAH || 4||
etannishamya lajjayA kopamiva vivR^iNvatIShu sarvAsu
prasa~NgAntareNa taM vijetuM vishAkhA sanyAsamAha
svayaM yo nirbandhAddhanavitaraNairlokataTibhiH
     karotyArAmaM yaM sa hi bhavati tasyaiva niyatam |
idaM tu shrIvR^indAvanamakR^itamanyairanudinaM
     samAnaM sarveShAM kathamiva tavaivAdya bhavitA || 5||
 iti vishAkhAsanyAyakathitamAkarNya sadarpAbhinayaM shrIkR^iShNaH punaH prAha
akuNThaM vaikuNThe divi bhuvi cha rasAyAM shrutigaNaiH
     pragItaM mannAmnA vanamiti na yadvaH shrutimitam |
na yuShmaddoSho.asminprabalamadagarvottaruNatA
     tridoShi bAdhiryaM prachuramakarodyatsphuTamidam || 6||
etadAkarNya tiryagvilokayantI rAdhA sasmitamuvAcha
aye chedyannAmnA~Nkitamiti bhavettasya vipinaM
     tadAsmadvR^indAyA bhavati sutarAmeva kapaTin|
yato.asya nAmnaiva trijagati janairgIyata iha
     svayaM cha shrIsvAminbata tu na hi nAmnA kvachidapi || 7||
 iti rAdhAyAH sayuktikavAkpIyUShamattaH shrIkR^iShNaH sasmitamAha
iyaM lakShmIvR^indAdapi madhuravR^indA mama vadhU\-
     rbhavenno chedArAtsashapathamimaM pR^ichChata satIm |
shrutau yaddampatyorna hi bhavati bhedastruTirato
     dvayornau nAmnaiva trijagati jano gAyati vanam || 8||
 iti shrIkR^iShNasya vAgamR^itamApIya rAdhA vR^indAM prati nIchairAha
idaM vR^inde satyaM bhavati na hi kiM vA kathaya naH
     puro lajjAM hA hA kathamiva tanoShi priyagaNe |
R^itaM chettadroShachChalata iva gachCha kShaNamito
     yathA nAnAvAdairvayamiha jayAmaH shaThagurum || 9||
idaM karNe tasyA nigaditavatIShvAshu sahasaM
     mR^iShAroShAdeShA chalakuTilachillIkShaNataTaiH |
alaM shoNaireNIdR^igatikuTilAH prekShya sakhi tAH
     sagarve govinde pariShadi dadAvuttaramidam || 10||
aye padmAShaNDa vrajanagarabhaNDa vrajavanA\-
     ditastvaM chedichChe ruchiravanarAjatvamachirAt |
sakhIsthalyAH ShaShThIM bhaja nijavadhUM tAM kila tadA
     yathA sA tuShTyA te badaravanarAjyaM vitaratI || 11||
tata itthaM tatsaundaryAdistavanArabhaTyA shrIgAndharvAyA vR^indATavyAM
svatAmarpayantI tamupalabhya sollAsaM punarAha
yadetadbimbatvAllasati mukhamasyAH kamalato
     dR^ishordvandvaM cha~nchatkuvalayamR^igAnAmiva chayAt |
uda~nchannAsashrIH shukanavayuvatroTivalanA\-
     llasadbandhUkebhyo.api cha ruchighaTarAjyadadharaH || 12||
aye dantAH kundAvalIkarakabIjAdirachanA\-
     dapi sphItA gItAH kumudavanato.api smitalavaH |
shrutidvandvaM mu~njAlalitaguNapu~njAdapi puna\-
     rlalATodyallakShmIH subhagabakapuShpAdatitarAm || 13||
chalAchillIvallI bhramaravarapa~Nkterapi tataH
     sphura~njambUpakvaprachuraphalato.apyetadalakaH |
kachollAsaH sphurjanmadashikhishikhaNDAdapi madhau
     pikottAnadhvAnAdapi paramudAraM mR^iduvachaH || 14||
nitambaH shailAnAmapi vipulabhArAdatiguruH
     kuchau tu~Ngau bilvAdikaphalakulAdapyatighanau |
bhujayugmaM bhrAjadvratatitatito.apIha lalitAM
     lalAmashrIlomAvalIrapi bhujA~NgItatirucheH || 15||
varorU rambhAlikramarachanajR^imbhAdapi gati\-
     rmarAlIpAlInAmapi chalanara~NgAnmR^idutarA |
padadvandvaM phullasthalakamalavR^indAdapi sadA
     vadAnyatvaM kalpadrumanikarato.api vrajapure || 16||
dR^ishoH premNA shashvatkSharadamR^itaniHsyandavitati\-
     stathA svedastomaH kanakajayivarShmaprapatitaH |
manoga~NgAkR^iShNAvividhasarasIvR^indavichala\-
     tpravAhAdapyuchchaiH pulaka uta nIpastavakataH || 17||
alaM gandhasnigdhA kanakagirivandyA dyutirapi
     sphuTatphullachampAvalIkanakayUthInivahataH
api bhrAjadvakShaHsthalamatulasiMhAsanakulA\-
     dapi bhrAmyannetrakramaNanaTanaM kha~njanagaNA\-
paraM chAsyAdInAM vikasanabharAdeShu kila sa
     kvachinmAnAnmlAnerbata bhavati saivaiShviha yataH |
ato.asyAshChAyaiva sphuTamaTaviritthaM khalu bhave\-
     tkatha~NkAraM svAminbhavatu bhavataH sAmpratamiyam || 19||
api cha
mukhAdInAM padmAdikapurupadArthaH samaruchaH
     prapannAH sArUpyaM yadati vilasanti sphuTamataH |
ajANDe vikhyAtA prakR^itimadhureyaM samaguNA
     tataH shrIrAdhAyAH prakaTamaTavIyaM priyasakhI || 20||
virAjAChAyAtve prakaTatarasArUpyavalanA\-
     tsakhItve.api krIDAspadamaTavireShA rasamayI |
sadaitasyA eva vrajabhuvi bhavatyeva sutarAM
     yatashChAyAsakhyoH sphurati na hi bhedaH kvachidapi || 21||
ado vR^indAnAndIstavarasabharaiH poShitavapuH
     shriyA pUrNe ghUrNatsmaranaTanatR^iShNAtaralite |
aho rAdhonmIlanmanasijamahAnATakanaTI
     naTAchArye tasminnaTitumiva dR^iShTiM samatanot || 22||
vishAkhA tu snehasnapanakR^itaroma~nchavilasa\-
     dvapustAmAli~Ngya stavarachitahrIshrIsmitavR^itAm |
sahAsaM dR^igbha~NgyA giridharamupAlabhya sahasaM
     vinodairvR^indAyAH shirasi sumanovR^iShTimakarot || 23||
etanmadhuravarNanAkarNanena svAntastoShaM bahirvihasya sotprAsaM kR^iShNaH punarAha
tvadAlera~NgAlI mama kamanavR^indAvanatanoH
     sada~NgAnAM ku~njAdikaruchiranAmnAM ruchidhanam |
dhruvaM hR^itvA mlAnaM prakaTamakarottaM kathamimaM
     idAnIM sArUpyastavanamiShato rakShasi shaThe || 24||
tavAlyA evaM chedati guNagaNA matpriyavanA\-
     dapi shreShThaH suShThu dhruvamiha bhavanti sphuTamamI |
tadA tuchChaM puShpaM kathamapaharetseyamathavA
     svabhAvashchaurANAM paradhanajighR^ikShurna hi chalet || 25||
prakAraishChAyAto yadativarabimbAsya mahimA
      namuchchairvisphArya smarasi mayi rAdhAM vitaritum |
kathaM tatsyAdyasmAtpatiparavasheyaM tata imaM
     sa chedArAddadyAdbhavati mama tarhyeva mamatA || 26||
etadvichitrara~NgochChalitavAgbhaNivilAsasudhAsvardhunItara~NgenottaralIkR^ita\-
hR^idvR^ittidR^iDhanaukaM shrIrAdhAM sasmitamalokayantIShu
sarvAsu sasmitaM lalitA lalApa
pipAsArthaH kashchitkShuditavivasho vartmani chala\-
     nmarukShetre kShArodakamalabhamAno.api virasam |
svayambhUsaMstavyaM haripuravarasthAmapi sudhAM
     prapAtuM drAgichChanjagati kila hAsyAspadamabhUt || 27||
tato rasikashekharaM vrajarAjakumAraM sa dR^iga~nchalavibhrameNa pashyantI
sakhIH prati shrIrAdhA vyajahAra
sphuTaM kAlI shaibyA chamaravanitA madhyamavadhU\-
     rmahApadmA padmA paramaruchikR^itkAmadakuchA |
varA ShaShThI chandrAvalirapi lasedyasya mahiShI
     kathaM tasyApyanyA bhavatu bhuvi yogyA navavadhUH || 28||
tAChravaNato roSheNaiva sATopaM tAsAM vAsanahArAdikamAdAtumupasarpati
shrIvrajendranandane sphuTameva champakalatA solluNThamavadI\-
vane phulle chillAtakapatirayaM bADhamasakR^i\-
     tsatIrasmAnprItyA paricharati bhogAdikusumaiH |
 iti shrIvR^ittAntaM niShamayitumAryAM disha nR^ipe
     yathA shR^iNvannasmai srajamiha sukhaM preShayati saH || 29||
 iti champakalatAlapitamavadhArya smitvA sashirodhunAnamuvAcha kR^iShNaH
nR^ipendreNaivArAdapaNavipinasyAvanakR^ite
     niyujyAsmAnshashvadyaduta gaditaM tA ChR^iNuta bhoH |
nijo vA bAhyo vA harati ya ihAsyApi galitaM
     dalaM vA puShpaM vA harata kila tadvastrapadakam || 30||
ato.ahaM yuShmAkaM maNivasanahArAdikamidaM
     balenaivAlu~nchya pramadabharato yAmi sadanam |
na manyadhve puShpA~NkuradalahR^itiM chennanu tadA
     vichAraM nIvInAmapi kuchapaTAnAM vitarata || 31||
 iti solluNThamAbhAShya sodgrIvamudvIkShya aye dhruvametA guNavatyo nIvyaH
 paradravyaM na rakShayiShyanta eva kintu kaThiNeShveteShveva tallakShaNaM
 lakShyate | tathA hi
urojAnuchChUnAnyadabhikalayAmyadya divasA\-
     tparasmAttasmAnme kusumakulamAtraiva bhavitA |
ato jij~nAsorme svakaramilane doSha iha vo
     bhavechchenmatsparshAtsvayamakapaTaM prekShayata tAn|| 32||
tadanantaraM bha~NgyA shrIrAdhAnIvyAmeva sandehamivodbhavya tasyAM dR^iShTiM
nikShipya aho nyAyyamityuchchairAbhAShya rAdhAM pratyuvAcha
rAdhe tvannavanIvikA guNamayI sAdhvIti sAdhvIguNaiH
     sashlAghaM parigIyate yadiha tatsolluNThameva sphuTam |
yaddR^iShTeH kR^ipayA drutaM nividato bandhAdvimuktApyasau
     tAmevAdya dR^iDhaM sadAtmasavidhe nItvA babandha svayam || 33||
bhoH pashyata pashyata kR^itAghnyo.anayA nIvyA dambhavR^ittimAchArya
matsurabhipuShpANi svAdhastAdrakShitAni santi yato romAvalI nAma
bhramarapa~NktistatsaurabhyamanubhUya tadanusaranti vartate. etadAkarNanena
bhrUbha~NgyA tamAkShipya gR^ihAya gachChantyAM balAtkR^iShNena vyAghotitAyAM
rAdhAyAM tu~NgavidyAbravI\-
shaThendra tvaM shashvatpadakamapi hartuM vadasi ya\-
     ttadasmAbhiH soDhaM nR^ipasutatayA sa.nprati shrNu |
samastAH sambhUya hriyamiha vihAya priyatamAM
     grahiShyAmo.avashyaM vayamapi tavAchChidya muralIm || 34||
tataH shrIkR^iShNaH sadarpamupadishannivAha
ahaM sakhye dakShaschaturayuvarAjo vrajapure
     svakaM vR^indAraNyaM vikasadabhirakShAmyavivashaH
pradAyArAda~NkasrajamanugatA matkaruNayA
     samastA hitvaitAmapasarata chaurIM chalasakhIm || 35||
evamAkarNya lalitAntaH suShThu pramuditA sAkuTabha~NgyAha
punargarvaM kuryAnna hi viTa shaThAsmatpura iha
     vrajasyaitasyAlaM chaturayuvarAjo.ahamiti bhoH |
yadeShA tvatsevyasmaranutarasendrapriyasakhI
     mahAra~njI chaNDA tvadupari cha rAgAtpratapati || 36||
kuTiladR^iShTyA sahAsalajjayA tAmavalokayantIM shrIrAdhAM prati shrIkR^iShNo
vyajahAra
mudhAvAdaM rAdhe na sR^ija nijamattAlilapanA\-
     dvraje shuddhA sAdhvI yadasi tadidaM vAchNi vinayaiH |
tvametA hitvogrA vanakarakR^ite mahyamachirA\-
     tprasAdaM dattvA te ruchirashuchimAlAM vraja gR^iham || 37||
tA ChrutvA sabhrUbha~NgaM shrIrAdhA bha~NgyAha
tvamAsAM vaidagdhIghaTitavapuShAM saMsadi madA\-
     nna chemaM bha~NgyAkhyAM kunaTakunatiM nATaya vR^ithA |
vanAdasmAdgatvA svakamuchitabhaNDatvamachirA\-
     nnijasthAnImadhye rachaya nivasanbhaNDasakhibhiH || 38||
tataH kR^iShNaH smitvA sasauTIryamuvAcha
vraje.asma~njuShTAnnAshananiratakInAshavanitAH
     kurudhve me naShTAM prakaTamaTavIM kasya balataH |
idAnIM tAChAntiM bata jhaTiti labdhuM giripate\-
     rguhAkArAgAraM ghanataratamishraM pravishata || 39||
tadAkarNya sasmitagarvaM vishAkhAbravI\-
bhavAdR^iksampUjyojjvalakulavadetatpitR^ipadaiH
     svayaM dattA yasmai navakamalinIyaM guNavatI |
aho sarvashreShThaH sa cha tava vitasyApi kR^iShaka\-
     stathochChiShTaprAshI prathitajaTilAsUnurabhavat || 40||
sadA padmApuShTAdharagalitamAdhvIkadhayanA\-
     nnikAmaM shyAmAtmA bhavasi yadapi drAgapi tathA |
vichArya tvaM sAdhvInutaguNavidhuM mAtulavadhUM
     bhajemAmatra syAtkiTava shivalAbhastava yathA || 41||
tA ChrutvA sanarmabha~NgyoktyA davIyaHsambandhaM khyApayankR^iShNaH
sAdramAlalApa
asAvasmanmAturjanayatR^iprasUpautravanitety\-
     alaM j~nAtaM yasminkShaNa iha sadainaM tadavadhi |
namAmi dhyAyAmi drutamanusarAmi vrajapure
     grahItuM satkAmAshiShamatitarAM bhaktivinataH || 42||
uda~nchanma~njIradhvanisahacharIsa~nchayajuSha\-
     shchalantyA rAdhAyAH prakaTitaruShaH shrIgiridharaH |
girIndrAtpArIndrAdhikagatirupetyAshu nakharai\-
     rgajendrodyatkumbhadvayamiva dadAra stanayugam || 43||
idaM rAdhAkR^iShNojjvalakusumakelikalimadhu
     priyAlInarmAliparimalayutaM yasya bhajanAt |
mamAndhasyApyetadvachanamadhupenAlpagatinA
     manAgghrAtaM tanme gatiratularUpA~NghrijarajaH || 44||

iti shrIrarghunAthadAsagosvAmivirachitastavAvalyAM
          shrIshrIrAdhAkR^iShNojjvalakusumakeliH sampUrNA |

\chapter{##Prarthanamritastotram ## .. prArthanAmR^itastotram ..}
shrIrUparatima~njaryo\-
     ra~NghrisevaikagR^idhnunA |
asa~NkhyenApi januShA
     vraje vAso.astu me.anisham || 1||
ayaM jIvo ra~Ngairnayanayugalasyandisalila
     pradhautA~Ngo ra~Ngo ghaTitapaTuromAlinaTanaH |
kadA rAse lAsyaiH premajalapariklinnapulaka\-
     shriyau rAdhAkR^iShNau madanasunaTau vijayati bhoH || 2||
premodrekairnayananipatadvAridhAro dharaNyAM
     vaivarNyAlIsavalitavapuH prauDhakampaH kadAham |
svedAmbhobhiH snapitapulakashreNimUlaH smitoktau
     rAdhAkR^iShNau madanasamarasphAradakShau smarAmi || 3||
masArakShmAsArodbhavanavatamAlodbhaTamada\-
     prahArishrIbhArojjvalavapuShamudyAChuchirasaiH |
kadA rAkAchandrastutavadananidrAlasadR^ishaM
     dR^ishA kR^iShNaM vakShaHsvapanapararAdhaM sakhi bhaje || 4||
sarAgaM kurvatyaH sakhi harikR^ite hArarachanaM
     kare shrIrAdhAyAH prakaTapulakodreki mayakA |
vichityAlaM cha~nchaddyutivividhavarNaM maNikulaM
     krameNArAddeyaM kimiti kR^ipayA tAcharaNayoH || 5||
mAnenAlaM kavalitadhiyA shyAmayA rAdhikArdrA
     drAgAhUtA vyasanakathanAyeti saMvidya kIrAt |
tasyA veshairgatamaghaharaM tasya doShaM lapantaM
     tuShTyAli~Ngya tvaritamatha sA j~nAtatattvA jaDAsIt || 6||
sanIramudiradyutiH puraTanindivastraM dadhA\-
     ChikhaNDakR^itashekharaH sphuritavAnyaveshaH sukhI |
samR^iddhavidhumaNDalIstavanala~Nghivaktre dhR^itaM
     ka eSha sakhi vAdayanmuralimadya buddhiM haret || 7||
ekaM svapnavaraM shR^iNuShva lalite hA hA sakhi shrAvaya
     svapne puShpahR^itau tvayA saha mayA prApte vane matpuraH |
tanvatyA daravIkShya cha~nchaladR^ishAna~NgaM sada~NgaM balA\-
     tsmeraH kashchana meghasundaravapustvAmAlili~NgonmadaH || 8||
dR^iShTvA gopatinandanasya kadanaM veNurgato mUkatAM
     sarve sthAvaraja~NgamA vrajavanIjAtA yayuH kShINatAm |
so.api vyAgrasuhR^idvR^ito bhuvi luThannAste vibhUShaH kR^isho
     rAdhe tvaM tu mudA sadAdhipayasA mAnoragaM poShaya || 9||
kva rAdhe tvaM sAkShAdita itavatI tvadvashamimaM
     janaM hA hAgatya snapaya kR^ipayA kautukarasaiH |
 iti vyAgraM shashvanmuralivivare gharghararavaM
     vitanvAne kR^iShNe smitavalitavAmeyamudabhUt || 10||
kR^itvA vAmakare.adya karmukamaye pauShpaM karasyApara\-
     syAbhugnA~Nguliyugmakena saralaM nyAsyeShumasminpuraH |
kaH shyAmo naTavesha eSha suhR^idAM sa~Ngena ra~NgaM sR^ija\-
     nsmeraH sundari bambhramIti madanasyonmAdidR^igvibhramaH || 11||
shyAmAshyAmanikAmakAmasamarojjR^imbhachyutAla~NkR^iti\-
     stomAmoditamAlyaku~NkumahimavyAkIrNaku~njaM mudA |
dR^iShTvAgatya sakhi shrameNa pavanaM dUre bhajattadyugaM
     draShTuM nyastadR^ishau kadApi mayi tatsmeraM dR^ishaM dhAsyati || 12||
subalasakhAdharapallava\-
     samuditamadhumAdhurIlubdhAm |
ruchijitakA~nchanachitrAM
     ka~nchanachitrAM pikIM vande || 13||
vR^iSharavijAdharabimbI\-
     phalarasapAnotkamadbhutaM bhramaram |
kR^itashikhipi~nChakachUlaM
     pItadukUlaM chiraM naumi || 14||
jitaH sudhAMshuryashasA mameti
     garvaM mUDha mA bata goShThavIra |
tavArinarInayanAmbupAlI
     jigAya tAtaM prasabhaM yato.asya || 15||
adR^iShTA dR^iShTeva sphurati sakhi keyaM vrajavadhUH
     kuto.asminnAyAtA bhajitumatulA tvAM madhupurAt |
apUrveNApurvAM ramaya hariNainAmiti sarA\-
     dhikodyadbha~NgyuktyA viditayuvatitvaH smitamadhAt || 16||
tvadbhAgyAdindukAntirvanamaNisadanaM maNDayantI samantA\-
     dbhrAjatyasminvasantI hatamapi timiraM madhyarAtraM cha vItam |
tUrNaM tasmAchchakora vraja nijagaganAtsevituM taM pipAso
     yAvatsUro.abhimanyurdrutamiha uditastvAM na dUrIkaroti || 17||
chakorIva jyotsnAyutamamR^itarashmiM sthirataDi\-
     dvR^itaM divyAmbhodaM navamiva ratAchAtakavadhUH |
tamAlaM bhR^i~NgIvodyataruchi kadA svarNalatikA\-
     shritaM rAdhAshliShTaM harimiha dR^igeShA bhajati me || 18||
dUtIbhishchaTuvAribhiH sakhigaNairbhedArdrashAkhAhati\-
     vrAtaiH pAdaluThAChiraHshritarajovR^iShTyA bakIvidviShA |
rAdhAyAH sakhi shakyate shamayituM yo mAnavahnirna yAtaM
     nirvApayatIha phutkR^itIkaNaistAM siddhavaMshIM numaH || 19||
prANakShvelibhuvaM vrajaM vrajajanaM tAtaM prasUM gAH sakhI\-
     ngopIH kAmapi tAM vinA viShamabhUddvArAvatI mitra me |
itthaM svapnikashIrNamAdhavavachaH shrutvaiva bhAmApi sA
     tadyuktA kila lokituM tadakhilaM taM chATunA yAchate || 20||
tamAlasya kroDe sthitakanakayUthIM pravilasa\-
     tprasUnAM lolAliM sakhi kalaya vandyaM chiramimam |
tiraskarturmeghadyutimaghabhido.a~Nke sthitachala\-
     ddR^ishaM smerAM rAdhAM taDidatiruchiM smArayati yA || 21||

iti shrIraghunAthadAsagosvAmivirachitastavAvalyAM
          prArthanAmR^itastotraM sampUrNam |

\chapter{##Navashtakam ## .. navAShTakam ..}
gaurIM goShThavaneshvarIM giridharaprAnAdhikapreyasIM
     svIyaprANaparArdhapuShpapaTalInirma~nChyatatpaddhatim |
premNA prAnavayasyayA lalitayA saMlAlitAM narmabhiH
     siktAM suShThu vishAkhayA bhaja mano rAdhAmagAdhAM rasaiH || 1||
svIyapreShThasarovarAntikavalatku~njAntare saurabho\-
     tphullatpuShpamarandalubdhamadhupashreNIdhvanibhrAjite |
mAdyanmanmatharAjyakAryamasakR^idsambhAlayantIM smarA\-
     mAtyashrIhariNA samaM bhaja mano rAdhAmagAdhAM rasaiH || 2||
kR^iShNApa~Ngatara~Ngatu~NgitatarAna~NgAsura~NgAM giraM
     bha~NgyA la~Ngimasa~Ngare vidadhatIM bha~NgaM nu tadra~NgiNaH |
phullatsmerasakhInikAyanihitasvAshIHsudhAsvAdana
     labdhonmAdadhuroddhurAM bhaja mano rAdhAmagAdhAM rasaiH || 3||
jitvA pAshakakelisa~Ngaratare nirvAdabimbAdharaM
     smitvA dviH paNitaM dhayatyaghahare sAnandagarvoddhure |
IShAChoNadR^igantakoNamudayadroma~nchakampasmitaM
     nighnantIM kamalena taM bhaja mano rAdhAmagAdhAM rasaiH || 4||
aMse nyasya karaM paraM bakariporbADhaM susakhyonmadAM
     pashyantIM navakAnanashriyamimAmudyadvasantodbhavAm |
prItyA tatra vishAkhayA kishalayaM navyaM vikIrNaM priya\-
     shrotre drAgdadhatIM mudA bhaja mano rAdhAmagAdhAM rasaiH || 5||
mithyAsvApamanalpapuShpashayane govardhanAdrerguhA\-
     madhye prAgdadhato harermuralikAM hR^itvA harantIM srajam |
smitvA tena gR^ihItakaNThanikaTAM bhItyApasArotsukAM
     hastAbhyAM damitastanIM bhaja mano rAdhAmagAdhAM rasaiH || 6||
tUrNaM gAH purato vidhAya sakhibhiH pUrNaM vishantaM vraje
     ghUrNadyauvatakA~NkShitAkShinaTanaiH pashyantamasyA mukham |
shyAmaM shyAmadR^igantavibhramabharairAndolayantItarAM
     padmAmlAnikarodayAM bhaja mano rAdhAmagAdhAM rasaiH || 7||
prodyatkAntibhareNa ballavavadhUtArAH parArdhAtparAH
     kurvANAM malinaH sadojjvalarase rAse lasantIrapi |
goShThAraNyavareNyadhanyagagane gatyAnurAdhAshritAM
     govindenduvirAjitAM bhaja mano rAdhAmagAdhAM rasaiH || 8||
prItyA suShThu navAShTakaM paTumatirbhUmau nipatya sphuTaM
     kAkvA gadgadanisvanena niyataM pUrNaM paThedyaH kR^itI |
ghUrNanmattamukundabhR^i~NgavilasadrAdhAsudhAvallarIM
     sevodrekaraseNa goShThavipine premNA sa tAM si~nchati || 9||

iti shrIraghunAthadAsagosvAmivirachitastavAvalyAM
          navAShTakaM sampUrNam |

\chapter{##Shri Gopalarajastotra ## .. shrIgopAlarAjastotram ..}
vapuratulatamAlasphItabAhUrushAkho
     paridhR^itagirivaryasvarNavarNaikaguchChaH |
kaTikR^itaparahastAraktashAkhAgrahR^idyaH
     pratapati giripaTTe suShThu gopAlarAjaH || 1||
ruchiradR^igabhidhAne pa~Nkaje phullayantaM
     subhagavadanagAtraM chitrachandraM dadhAnaH |
vilasadadharabimbaghrAyinAsAshukoShThaH
     pratapati giripaTTe suShThu gopAlarAjaH || 2||
chalakuTilatarabhrUkarmukAntardR^iganta
     kramaNanishitabANaM shIghrayAnaM dadhAnaH |
davayitumiva rAdhAdhairyapArIndravaryaM
     pratapati giripaTTe suShThu gopAlarAjaH || 3||
asulabhamiha rAdhAvaktrachumbaM vijAnan\-
     niva vilasitumetA ChAyayApi pradUrAt |
mukurayugalamachChaM gaNDadambhena bibhra\-
     tpratapati giripaTTe suShThu gopAlarAjaH || 4||
ruchinikaravirAjaddADimIpakvabIja
     prakaravijayidantashreNisaurabhyavAtaiH |
rachitayuvatichetaHkIrajihvAtilaulyaH
     pratapati giripaTTe suShThu gopAlarAjaH || 5||
vachanamadhurasAnAM pAyanairgoparAmA
     kulamurudhR^itadhAmApyunmadIkR^itya kAmam |
abhimataratiratnAnyAdadAnastato drAk
     pratapati giripaTTe suShThu gopAlarAjaH || 6||
kuvalayanibhabhAle kau~NkumadrAvapuNDraM
     dadhadiva ghanashaNDe nishchalAcha~nchalAgram |
rachayitumiva sAdhvIkIrtimugdhAlibhItiM
     pratapati giripaTTe suShThu gopAlarAjaH || 7||
shravaNamadanarajjU sajjayallajjirAdhA
     nayanachalachakorau bandhumutkaH kishorau |
kR^itamakaravataMsasnigdhachandrAMshuchAraH
     pratapati giripaTTe suShThu gopAlarAjaH || 8||
yuvatikaraNaratnavrAtamAchChidya netra
     bhramaNapaTubhaTaistaM nyasya hR^itsaudhamadhye |
garuDamaNikavATenorasAghuShya hR^iShTaH
     pratapati giripaTTe suShThu gopAlarAjaH || 9||
tribalilalitatuNDasyandinAbhihradodya\-
     ttanuruhatatisarpImatra bibhrANa ugrAm |
yuvatipatibhayAkhugrAsanAyeva sadyaH
     pratapati giripaTTe suShThu gopAlarAjaH || 10||
marakatakR^itarambhAgarvasarvA~Nkashoru
     dvayamururasadhAma preyasInAM dadhAnaH |
sphuradaviralapuShTashroNibhArAtiramyaH
     pratapati giripaTTe suShThu gopAlarAjaH || 11||
madanamaNivarAlIsampuTakShullajAnu
     dvayasulalitaja~NghAma~njupAdAbjayugmaH |
vividhavasanabhUShAbhUShitA~NgaH sukaNThaH
     pratapati giripaTTe suShThu gopAlarAjaH || 12||
kalitavapuriva shrIviTThalapremapu~njaH
     parijanaparicharyAvaryapIyUShapuShTaH |
dyutibharajitamadyanmanmathodyatsamAjaH
     pratapati giripaTTe suShThu gopAlarAjaH || 13||
vividhabhajanapuShpairiShTanAmAni gR^ihNa\-
     npulakitatanuriha shrIviTThalasyorusakhyaiH |
praNayamaNisaraM svaM hanta tasmai dadAnaH
     pratapati giripaTTe suShThu gopAlarAjaH || 14||
girikulapatipaTTollAsigopAlarAja
     stutivilasitapadyAnyudbhaTapremadAni |
naTayati rasanAgre shraddhayA nirbharaM yaH
     sa sapadi labhate tatpremaratnaM prasAdam || 15||

iti shrIraghunAthadAsagosvAmivirachitastavAvalyAM
          shrIgopAlarAjastotraM sampUrNam |

\chapter{##Shri Madanagopalastotram ## .. shrImadanagopAlastotram ..}
vanabhuvi ravikanyAsvachChakachChAlipAli
     dhvaniyutavaratIrthadvAdashAdityaku~nje |
sakanakamaNivedImadhyamadhyAdhirUDhaH
     sphurati madanapUrvaH ko.api gopAla eShaH || 1||
subhaganavashikhaNDabhrAjaduShNIShahArA\-
     ~NgadavalayasamudrAdhvAnama~njIraramyaH |
vasanaghusR^iNacharchAmallikollAsitA~NgaH
     sphurati madanapUrvaH ko.api gopAla eShaH || 2||
kaTikR^itavarabha~Nganyastaja~NghAnyaja~NghaH
     karayugadhR^itavaMshIM nyastabimbAdharAgre |
sumadhuramatitiryaggrIvayA vAdayaMstAM
     sphurati madanapUrvaH ko.api gopAla eShaH || 3||
vidhikR^itavidhusR^iShTivyarthatAkArivaktra
     dyutilavahR^itarAdhAsthUlamAnAndhakAraH |
smitalapitamadhUlyonmAditaitaddhR^iShIkaH
     sphurati madanapUrvaH ko.api gopAla eShaH || 4||
sharaduditasarojavrAtavitrAsinetra~\-
     nchalakuTilakaTAkShairmandaroDDaNDachAlaiH |
jhaTiti mathitarAdhAsvAntadugdhArNavAntaH
     sphurati madanapUrvaH ko.api gopAla eShaH || 5||
kuTilachaTulachillIvallilAsyena labdha
     prathitasakalasAdhvIdharmaratnaprasAdaH |
tilakavadalikena dhvastakAmeShuchApaH
     sphurati madanapUrvaH ko.api gopAla eShaH || 6||
shukayuvavaracha~nchuprAMshunAsAMshusindhau
     janitakulavadhUTIdR^iShTimatsyIvihAraH |
smitalavayutarAdhAjalpamantronmadAntaH
     sphurati madanapUrvaH ko.api gopAla eShaH || 7||
vikasadadharabandhUkAntaruDDIya gandhaiH
     patitamupa vidhartuM rAdhikAchittabhR^i~Ngam |
dashanaruchiguNAgre dattatatsIdhuchAraH
     sphurati madanapUrvaH ko.api gopAla eShaH || 8||
shravaNamadanakandaprekShaNoDDInarAdhA
     dhR^itivibhavaviha~Nge nyastanetrAntabANaH |
alakamadhupadattadyotamAdhvIkasatraH
     sphurati madanapUrvaH ko.api gopAla eShaH || 9||
parimalaruchipAlIshAligAndharvikodya\-
     nmukhakamalamadhUlIpAnamattadvirephaH |
mukurajayikapole mR^igyatAchumbabimbaH
     sphurati madanapUrvaH ko.api gopAla eShaH || 10||
makaramukhasadR^ikShasvarNavarNAvataMsa
     prachalanahR^itarAdhAsarvashArIradharmaH |
tadatichaladR^igantasvasthavaMshe dhR^itAkShaH
     sphurati madanapUrvaH ko.api gopAla eShaH || 11||
harimaNikR^itasha~NkhashlAghitolla~NghilekhA
     trayaruchivR^itakaNThasyopakaNThe maNIndram |
dadhadiha parirabdhuM rAdhikAM bimbitAM cha
     sphurati madanapUrvaH ko.api gopAla eShaH || 12||
kuvalayakR^itavakShastalpamuchchaM dadhAnaH
     shramavilulitarAdhAsvApanAyaiva navyam |
bhujayugamapi divyaM tatprakANDopadhAnaM
     sphurati madanapUrvaH ko.api gopAla eShaH || 13||
ruchirajaTharapatre chitranAbhItaTodya\-
     ttanuruhatatinAmnIM ballavIvR^indabhuktyai |
smaranR^ipatisamudrasvAkSharAlIM dadhAnaH
     sphurati madanapUrvaH ko.api gopAla eShaH || 14||
yuvatihR^idalasebhaprauDhabandhAya kAma
     sthapitachitarasorustambhajR^imbhAbhirAmaH |
marakatakaTajaitraphullajAnuprasannaH
     sphurati madanapUrvaH ko.api gopAla eShaH || 15||
praNayanavamadhUnAM pAnamAtraikagatyA
     sakalakaraNajIvyaM rAdhikAmattabhR^i~NgyAH |
aruNacharaNaka~njadvandvamullAsya pashya\-
     nsphurati madanapUrvaH ko.api gopAla eShaH || 16||
atulavilasada~NgashreNivinyAsabha~NgyA
     glapitamadanakoTisphArasaundaryakIrtiH |
balalavahatamattApArapArIndradarpaH
     sphurati madanapUrvaH ko.api gopAla eShaH || 17||
taraNiduhitR^ikachChe svachChapAthodadhAmA
     samuditanavakAmAbhirarAmAvalINAm |
taDidatiruchibAhusphurjadaMso.atijR^imbha\-
     nsphurati madanapUrvaH ko.api gopAla eShaH || 18||
navataruNimabhaTTAchAryavaryeNa shAstraM
     manasijamuni klptaM nyAyamadhyApitAbhiH |
navanavayuvatIbhirbibhradudgrAhamasmi\-
     nsphurati madanapUrvaH ko.api gopAla eShaH || 19||
ratimatirachayantyA rAdhikAnarmakAntyA
     sthagitavachanadarpaH sphAritAnyaprasa~NgaH |
kharamatilalitAsye ki~nchida~nchatsmitAkShaH
     sphurati madanapUrvaH ko.api gopAla eShaH || 20||
savidharamitarAdhaH sAgrajasnigdharUpa
     praNayaruchirachandraH ku~njakhelAvitandraH |
rachitajanachakorapremapIyUShavarShaH
     sphurati madanapUrvaH ko.api gopAla eShaH || 21||
madanavalitagopAlasya yaH stotrameta\-
     tpaThati sumatirudyaddainyavanyAbhiShiktaH |
sa khalu viShayarAgaM sauribhAgaM vihAya
     pratijani labhate tatpAdaka~njAnurAgam || 22||

iti shrIraghunAthadAsagosvAmivirachitastavAvalyAM
          shrImadanagopAlastotraM sampUrNam |

\chapter{##Shri Vishakhanandabhidhastotram ## .. shrIvishAkhAnandAbhidhastotram ..}
bhAvanAmaguNAdInAmaikyAtshrIrAdhikaiva yA |
kR^iShNendoH preyasI sA me shrIvishAkhA prasIdatu || 1||
jayati shrImatI kAchidvR^indAraNyavihAriNI |
vidhAtustaruNIsR^iShTikaushalashrIR^i ihojjvalA || 2||
ChinnasvarNasadR^ikShA~NgI raktavastrAvaguNThinI |
nirbandhabaddhaveNIkA  chArukAshmIracharchitA || 3||
dvikAlendulalATodyatkastUrItilakojjvalA |
sphuTakokanadadvandva bandhurIkR^itakarNikA || 4||
vichitravarNavinyAsa chitritIkR^itavigrahA
kR^iShNachorabhayAchcholI gumphIkR^itamaNistanI || 5||
hArama~njIrakeyUra chUDAnAsAgramauktikaiH |
mudrikAdibhiranyaishcha  bhUShitA bhUShaNottamaiH || 6||
sudIptakajjaloddIpta nayanendIvaradvaya |
saurabhojjvalatAmbUla ma~njulA shrImukhAmbujA || 7||
smitaleshalasatpakva chArubimbaphalAdharA |
madhurAlApapIyUSha sa~njIvitasakhIkulA || 8||
vR^iShabhAnukulotkIrti vardhikA bhAnusevikA |
kIrtidAkhaNiratnashrIH  shrIjitashrIH shriyojjvalA || 9||
ana~Ngama~njarIjyeShThA  shrIdAmAnandadAnujA |
mukharAdR^iShTipIyUSha vartinaptrI tadAshritA || 10||
paurNamAsIbahiHkhelatprANapa~njarasArikA |
subalapraNayollAsA  tatra vinyastabhArakA || 11||
vrajeshyAH kR^iShNavatprema pAtrI tatrAti bhaktikA |
ambAvAtsalyasaMsiktA  rohiNIghrAtamastakA || 12||
vrajendracharaNAmbhoje .arpitabhaktiparamparA |
tasyApi premapAtrIyaM  piturbhAnoriva sphuTam || 13||
gurubud.hdhyA pralambArau  natiM dUre vitanvatI |
vadhUbud.hdhyaiva tasyApi  premabhUmIha hrIyutA || 14||
lalitAlalitA svIya prANorulalitAvR^itA |
lalitAprANarakShaikarakShitA tadvashAtmikA || 15||
vR^indAprasAdhitottu~Nga kuDu~NgAna~Ngaveshmani |
kR^iShNakhaNDitamAnatvAl lalitAbhItikampinI || 16||
vishAkhanarmasakhyena  sukhitA tadgatAtmikA |
vishAkhAprANadIpAli nirma~nChyanakhachandrikA || 17||
sakhIvargaikajIvAtusmitakairavakorakA |
snehaphullIkR^itasvIyagaNA govindavallabhA || 18||
vR^indAraNyamahArAjyamahAsekamahojjvalA |
goShThasarvajanAjIvyavadanA radanottamA || 19||
j~nAtavR^indATavIsarvalatAtarumR^igadvijA |
tadIyasakhyasaurabhyasurabhIkR^itamAnasA || 20||
sarvatra kurvati snehaM snigdhaprakR^itirAbhavam |
nAmamAtrajagAchittadrAvikA dInapAlikA || 21||
gokule kR^iShNachandrasya sarvApachChAntipUrvakam |
dhIralAlityavR^id.hdhyarthaM kriyamANavratAdhikA || 22||
gurugoviprasatkAraratA vinayasannatA |
tadAshIHshatavardhiShNusaubhAgyAdiguNA~nchitA || 23||
AyurgoshrIyashodAyipAko durvAsaso varAt |
ataH kundalatAnIyamAnA rAj~nyAH samAj~nayA || 24||
goShThajIvAtugovindajIvAtulapitAmR^itA |
nijaprAnArbudashreNirakShyatatpAdareNukA || 25||
kR^iShNapadAravindodyanmakarandamaye mudA |
ariShTamardi kAsAre snAtrI nirbandhato.anvaham || 26||
nijakundapurastIre ratnasthalyAmaharnisham |
preShThanarmAlibhirbha~NgyA samaM narma vitanvatI || 27||
govardhanaguhAlakShmIrgovardhanavihAriNI |
dhR^itagovardhanapremA dhR^itagovardhanapriyA || 28||
gAndharvAdbhutagAndharvA rAdhA bAdhApahAriNI |
chandrakAntishchalApa~NgI rAdhikA bhAnurAdhikA || 29||
gAndharvikA svagandhAtisugandhIkR^itagokulA |
 iti pa~nchabhirAhUtA nAmabhirgokule janaiH || 30||
hariNI hariNInetrA ra~NgiNI ra~NgiNIpriyA |
ra~NgiNIdhvaninAgachChatsura~NgadhvanihAsinI || 31||
baddhanandIshvarotkaNThA kAntakR^iShNaikaka~NkShayA |
navAnurAgasambandhamadironmattamAnasA || 32||
madanonmAdigovindamakasmAtprekShya hAsinI |
lapantI rudatI kamprA ruShTA daShTAdharAturA || 33||
vilokayati govinde smitvA chArumukhAmbujam |
puShpAkR^iShTimiShAdUrdhve dhR^itadormulachAlanA || 34||
samakShamapi govindamavilokyeva bhAvataH |
dale vilikhya tanmUrtiM pashyantI tadvilokitAm || 35||
lIlayA yAchakaM kR^iShNamavadhIryeva bhAminI |
girIndragAhvaraM bha~NgyA pashyantI vikasaddR^ishA || 36||
subalaskandhavinyastabAhau pashyati mAdhave |
smerA smerAravindena tamAlaM taDayantyatha || 37||
lIlayA kelipAthojaM smitvA chumbitamAdhave |
smitvA bhAlAttakastUrIrasaM ghR^itavatI kvachit || 38||
mahAbhAvojjvalAchintAratnodbhavitavigrahAm |
sakhIpraNayasadgandhavarodvartanasuprabhAm || 39||
kAruNyAmR^itavIchibhistAruNyAmR^itadhArayA |
lAvaNyAmR^itavanyAbhiH snapitAM glapitendirAm || 40||
hrIpaTTavastraguptA~NgIM saundaryaghusR^iNA~nchitAm |
shyAmalojjvalakastUrIvichitritakalevarAm || 41||
kampAshrupulakastambhasvedagadgadaraktatA |
unmado jADyamityetai ratnairnavabhiruttamaiH || 42||
klptAla~NkR^itisaMshliShTAM guNAlipuShpamAlinIm |
dhIrAdhiratvasadvaShapaTavAsaiH pariShkR^itAm || 43||
prachChannamAnadhammillAM saubhAgyatilakojjvalAm |
kR^iShNanAmayashaHshrAvAvataMsollAsikarNikAm || 44||
rAgatambUlaraktoShThIM premakauTilyakajjalAm |
narmabhAShitaniHsyandasmitakarpUravAsitAm || 45||
saurabhAntaHpure garvaparya~Nkopari lIlayA |
niviShTAM premavaichittyavichalattaralA~nchitAm || 46||
praNayakrodhasAcholIbandhaguptikR^itastanAm |
sapatnIvaktrahR^ichChoshiyashaHshrIkachChapIravAm || 47||
madhyatAtmasakhIskandhalIlAnyastakarAmbujAm |
shyAmAM shyAmasmarAmodamadhulIpariveshikAm || 48||
subhagavalguvi~nCholImaulIbhUShaNama~njarI |
AvaikuNThamajANDAlivataMsIkR^itasadyashaH || 49||
vaidagdhyaikasudhAsindhushchATuryaikasudhApurI |
mAdhuryaikasudhAvallI guNaratnaikapeTikA || 50||
govindAna~NgarAjIve bhAnushrIrvArShabhAnavI |
kR^iShNahR^itkumudollAse sudhAkArakarasthitiH || 51||
kR^iShNamAnasahaMsasya mAnasI sarasI varA |
kR^iShNachAtakajIvAtunavAmbhodapayaHshrutiH || 52||
siddhA~njanasudhAvArtiH kR^iShNalochanayordvayoH |
vilAsashrAntakR^iShNA~Nge vAtalI mAdhavI matA || 53||
mukundamattamAta~NgavihArAparadIrghikA |
kR^iShNaprANamahAmInakhelanAnandavAridhiH || 54||
girIndradhArirolambarasAlanavama~njarI |
kR^iShNakokilasammodimandarodyAnavistR^itiH || 55||
kR^iShNakelivarArAmavihArAdbhutakokilA |
nAdAkR^iShTabakadveShivIradhIramanomR^igA || 56||
praNayodrekasid.hdhyekavashikR^itadhR^itAchalA |
mAdhavAtivashA loke mAdhavI mAdhavapriyA || 57||
kR^iShNama~njulatApi~nChe vilasatsvarNayUthikA |
govindanavyapAthode sthiravidyullatAdbhutA || 58||
grIShme govindasarvA~Nge chandrachandanachandrikA |
shIte shyAmashubhA~NgeShu pItapaTTalasatpaTI || 59||
madhau kR^iShNatarUllAse madhushrIrmadhurAkR^itiH |
ma~njumallArarAgashrIH prAvR^iShI shyAmaharShiNI || 60||
R^itau sharadi rAsaikarasikendramiha sphuTam |
varituM hanta rAsashrIrviharantI sakhIshritA || 61||
hemAnte smarayuddhArthamaTantaM rAjanandanam |
pauruSheNa parAjetuM jayashrIrmUrtidhAriNI || 62||
sarvataH sakalastavyavastuto yatnatashchirAt |
sAraNAkR^iShya tairyuktyA nirmAyAdbhutashobhayA || 63||
svashlAghaM kurvatA phullavidhinA shlAghitA muhuH |
gaurIshrImR^igyasaundaryavanditashrInakhaprabhA || 64||
sharatsarojashubhrAMshumaNidarpanamAlayA |
nirma~nChitamukhAmbhojavilasatsuShamakaNA || 65||
sthAyIsa~nchArisUddIptasattvikairanubhAvakaiH |
vibhAvAdyairvibhAvo.api svayaM shrIrasatAM gatA || 66||
saubhAgyadundubhiprodyad.hdhvanikolAhalaiH sadA |
vitrastIkR^itagarviShThavipakShAkhilagopikA || 67||
vipakShalakShAhR^itkampAsampAdakamukhashriyA |
vashIkR^itabakArAtimAnasA madanAlasA || 68||
kandarpakoTiramyashrIjayishrIgiridhAriNA |
cha~nchalApa~Ngabha~Ngena vismAritasatIvratA || 69||
kR^iShNetivarNayugmorumohamantreNa mohitA |
kR^iShNadehavarAmodahR^idyamAdanamAditA || 70||
kuTilabhrUchalAchaNDakandarpoddaNDakarmukA |
nyastApa~NgasharakShepairvihvalIkR^itamAdhavA || 71||
nijA~NgasaurabhodgAramadakauShadhivAtyayA |
unmadIkR^itasarvaikamadakapravarAchyutA || 72||
daivAchChrutipathAyAtanAmanIhAravAyunA |
prodyadromA~nchashItkArakampikR^iShNamanoharA || 73||
kR^iShNanetralasa~njihvAlehyavaktraprabhAmR^itA |
kR^iShNAnyatR^iShNAsaMhArI sudhAsAraikajharjharI || 74||
rAsalAsyarasollAsavashIkR^itabalAnujA |
gAnaphullIkR^itopendrA pikorumadhurasvarA || 75||
kR^iShNakelisudhAsindhumakarI makaradhvajam |
vardhayantI sphuTaM tasya narmAsphalanakhelayA || 76||
gatirmattagajaH kumbhau kuchau gandhamadoddhurau |
madhyamuddAmasiMho.ayaM tribalyo durgabhittayaH || 77||
romAlI nAgapAshashrIrnitambo ratha ulbanaH |
dAntA durdantasAmAntAH pAdA~NgulyaH padAtayaH || 78||
pAdau padatikAdhyakShau pulakaH pR^ithuka~NkataH |
UrU jayamaNistambhau bAhU pAshavarau dR^iDhau || 79||
bhrUdvandvaM karmukaM krUraM kaTAkShAH shanitAH sharAH |
bhAlamardhendudivyAstrama~NkushANi nakhA~NkurAH || 80||
svarNenduphalakaM vaktraM kR^ipaNI karayordyutiH |
bhallabhAraH karA~Ngulyo gaNDau kanakadarpanau || 81||
keshapAshaH kaTukrodhaH karNau maurvaguNottamau |
bandhukAdhararAgo.atipratApaH karakampakaH || 82||
dundubhyAdiravashchUDAki~NkinInUpurasvanaH |
chibukaM svastikaM shAstaM kaNThaH sha~Nkho jayapradaH || 83||
pariShva~Ngo hi vid.hdhyastraM saurabhaM madakauShadam |
vANI mohanamantrashrIrdehabuddhivimohinI || 84||
nAbhI ratnAdibhANDAraM nAsAshrIH sakalonnatA |
smitalesho.apyachintyAdi vashIkaraNatantrakaH || 85||
alakAnAM kulaM bhIShmaM bhR^i~NgAstraM bha~NgadAyakam |
mUrtiH kandarpayuddhashrIrveNI sa~njayinI dhvajA || 86||
 iti te kAmasa~NgrAmasAmagyo durghaTAH paraiH |
IdR^ishyo lalitAdInAM senAnInAM cha rAdhike || 87||
ato darpamadAdyUtaM dAnIndramavadhIrya mAm |
mahAmAramahArAjaniyuktaM prathitaM vraje || 88||
suShThu sImAntasindUra tilakAnAM varatviShAm |
hArA~NgadAdicholInAM nAsAmauktikavAsasAm || 89||
keyUramudrikAdInAM kajjalodyadvataMsayoH |
etAvadyuddhavastUnAM parArdhyAnAM parardhyataH || 90||
tathA dadhyAdigavyAnAmamUlyAnAnAM vrajodbhavAt |
adattvA me karaM nyAyyaM khelantyo bhramateha yat || 91||
tato mayA samaM yuddhaM kartumichChata budhyate |
kiM chaiko.ahaM shataM yUyaM kurudhvaM kramashastataH || 92||
prathamaM lalitochchaNDA charatAchchaNDasa~Ngaram |
tatastvaM tadanu preShThasa~NgarAH sakalAH kramAt || 93||
atha chenmilitAH kartuM kAmayadhve raNaM madAt |
agre sarata taddorbhyAM pinaShmi sakalAH kShaNAt  || 94||
 iti kR^iShNavachaH shrutvA sATopaM narmanirmitam |
sAnandaM madanAkrAntamAnasAlikulAnvitA || 95||
smitvA netrAntabANaistaM stabdhIkR^itya madoddhatam |
gachChantI haMsavadbha~NgyA smitvA tena dhR^itA~nchalA || 96||
lIlayA~nchalamAkR^iShya chalantI chAruhelayA |
puro ruddhapathaM taM tu pashyantI ruShTayA dR^ishA || 97||
mAnasasvardhunIM tUrNamuttarItuM tarIM shritA |
kampitAyAM tarau bhItyA stuvantI kR^iShNanAvikam || 98||
nijakuNDapayaHkelilIlAnirjitamachyutam |
hasituM yu~njatI bha~NgyA smerA smeramukhIH sakhIH || 99||
makandamakulasyandimarandasyandimandire |
kelitalpe mukundena kundavR^indena maNDitA || 100||
nAnApuShpamaNivrAtapi~nChAgu~njAphalAdibhiH |
kR^iShNagumphitadhammillotphullaromasmara~NkurA || 101||
ma~njuku~nje mukundasya kuchau chitrayataH karam |
kShapayantI kuchakShepaiH susakhyamadhunonmadA || 102||
vilAse yatnataH kR^iShNadattaM tAmbUlacharvitam |
smitvA vAmyAdagR^ihNAnA tatrAropitadUShaNam || 103||
dyUte pANikR^itAM vaMshIM jitvA kR^iShNasugopitAm |
hasitvAchChidya gR^ihNAnA stutA smerAlisa~nchayaiH || 104||
vishAkhAgUDhanarmoktijitakR^iShNArpitasmitA |
narmAdhyAyavarAchAryA bhAratIjayavAgmitA || 105||
vishAkhAgre rahaHkelikathodghATakamAdhavam |
tADayantI dvirabjena sabhrUbha~Ngena lIlayA || 106||
lalitAdipuraH sAkShAtkR^iShNasambhogala~nChane |
sUchyamAne dR^ishA dUtyA smitvA hu~NkurvatI ruShA || 107||
kvachitpraNayamAnena smitamAvR^itya mauninI |
bhItyA smarasharairbha~Ngyali~NgantI sasmitaM harim  || 108||
kupitaM kautukaiH krShNaM vihAre bADhamauninam |
katarA parirabhyAshu mAnayantI smitAnanam || 109||
mithaH praNayamAnena mauninI mauninaM harim |
nirmaunA smaramitreNa nirmaunaM vIkShya sasmitA || 110||
kvachitpathi milAchandrAvalIsambhogadUShaNam |
shrutvA krUrasakhIvaktrAnmukunde mAninI ruShA || 111||
pAdalakShArasollAsishiraskaM kaMsavidviSham |
kR^itakAkushataM sAsrA pashyantIShAchaladdR^ishA || 112||
kvachitkalindajAtIre puShpatroTanakhelayA |
viharantI mukundena sArdhamAlIkulAvR^itA || 113||
tatra puShpakR^ite kopAdvrajantI premakAritAt |
vyAghotitA mukundena smitvA dhR^itvA paTA~nchalam || 114||
vihArashrAntitaH kAntaM lalitAnyastamastakam |
vIjayantI svayaM premNA kR^iShNaM raktapaTA~nchalaiH || 115||
puShpakalpitadolAyAM kalagAnakutUhalaiH |
premNA preShThasakhIvargairdolitA haribhUShitA || 116||
kuNDaku~njA~Ngane valgu gAyadAlIgaNAnvitA |
vINAnanditagovindadattachumbena lajjitA || 117||
govindavadanAmbhoje smitvA tAmbUlavITikAm |
yu~njatIha mitho narmakelikarpUravAsitAm || 118||
girIndragAhvare talpe govindorasi sAlasam |
shayanA lalitAvIjyamAnA svIyapaTA~nchalaiH || 119||
apUrvabandhagAndharvAkalayonmadya mAdhavam |
smitvA haritatadveNuhArA smeravishAkhayA || 120||
vINAdhvanidhutopendrahastAchchyotitavaMshikA |
chUDAsvanahR^itashyAmadehagehapathasmR^itiH  || 121||
muralIgilitottu~NgagR^ihadharmakulasthitiH |
shR^i~Ngato dattatatsarvasatilApo.a~njalitrayA || 122||
kR^iShNapuShTikarAmodisudhAsArAdhikAdharA |
svamadhuritvasampAdikR^iShNapAdAmbujAmR^itA  || 123||
rAdheti nijanAmnaiva jagatkhyApitamAdhavA |
mAdhavasyaiva rAdheti j~nApitAtmA jagattraye || 124||
mR^iganAbheH sugandhashrIrivendoriva chandrikA |
taroH suma~njarIveha kR^iShNasyAbhinnatAM gatA || 125||
ra~NginA sa~Ngara~Ngena sAna~Ngara~NinIkR^itA |
sAna~Ngara~Ngabha~Ngena sura~NgIkR^itara~NgadA || 126||
ityetannAmalIlAktapadyaiH pIyUShavarShakaiH |
tadrasAsvAdaniShNAtavasanAvAsitAntaraiH || 127||
gIyamAnaM janairdhanyaiH snehaviklinnamAnasaiH |
natvA tAM kR^ipayAviShTAM duShTo.api niShThuraH shaThaH || 128||
jano.ayaM yAchate duHkhI rudannuchchairidaM muhuH |
tatpadAmbhojayugmaikagatiH kAtaratAM gataH || 129||
kR^itvA nijagaNasyAntaH kAruNyAnnijasevane |
niyijayatu mAM sAkShAtseyaM vR^indAvaneshvarI || 130||
bhajAmi rAdhAmaravindanetrAM
     smarAmi rAdhAM madhurasmitAsyAm |
vadAmi rAdhAM karuNabharArdrAM
     tato mamAnyAsti gatirna kApi || 131||
lIlAnAmA~NkitastotraM vishAkhAnandadAbhidham |
yaH paThenniyataM goShThe vasennirbharadInadhIH || 132||
AtmAla~NkR^itirAdhAyAM prItimutpadya modabhAk
niyojayati tAM kR^iShNaH sAkShAttatpriyasevane || 133||
shrImadrUpapadAmbhojadhUlImAtraikasevinA
kenachidgrathitA padyairmAlAghreyA tadAshrayaiH || 134||

iti shrIraghunAthadAsagosvAmivirachitastavAvalyAM
          shrIvishAkhAnandAbhidhastotraM sampUrNam |

\chapter{##Shri Mukundashtakam ## .. shrImukundAShTakam ..}
balabhidupalakAntidrohiNi shrImada~Nge
     ghusR^iNarasavilAsaiH suShThu gAndharvikAyAH |
svamadananR^ipashobhAM vardhayandeharAjye
     praNayatu mama netrAbhIShTasiddhiM mukundaH || 1||
uditavidhuparArdhajyotirulla~Nghivaktro
     navataruNimarajyadbAlyasheShAtiramyaH |
pariShadi lalitAlIM dolayankuNDalAbhyAM
     praNayatu mama netrAbhIShTasiddhiM mukundaH || 2||
kanakanivahashobhAnindi pItaM nitambe
     tadupari navaraktaM vastramitthaM dadhAnaH |
priyamiva kila varNaM rAgayuktaM priyAyAH
     praNayatu mama netrAbhIShTasiddhiM mukundaH || 3||
surabhikusumavR^indairvAsitAmbhaHsamR^iddhe
     priyasarasi nidAghe sAyamAlIparItA |
madanajanakashekaiH khelayanneva rAdhAM
     praNayatu mama netrAbhIShTasiddhiM mukundaH || 4||
parimalamiha labdhvA hanta gAndharvikAyAH
     pulakitatanuruchchairunmadastatkShaNena |
nikhilavipinadeshAnvAsitAneva jighra\-
     npraNayatu mama netrAbhIShTasiddhiM mukundaH || 5||
praNihitabhujadaNDaH skandhadeshe varA~NgyAH
     smitavikasitagaNDe kIrtidAkanyakAyAH |
manasijajanisaukhyaM chumbanenaiva tanva\-
     npraNayatu mama netrAbhIShTasiddhiM mukundaH || 6||
pramadadanujagoShThyAH ko.api saMvartavahni\-
     rvrajabhuvi kila pitrormUrtimAnsnehapu~njaH |
prathamarasamahendraH shyAmalo rAdhikAyAH
     praNayatu mama netrAbhIShTasiddhiM mukundaH || 7||
svakadanakathayA~NgIkR^itya mR^idvIM vishAkhAM
     kR^itachaTu lalitAM tu prArthayanprauDhashIlAm |
praNayavidhurarAdhAmAnavidhvaMsanAya
     praNayatu mama netrAbhIShTasiddhiM mukundaH || 8||
paripaThati mukundasyAShTakaM kAkubhiryaH
     sakalaviShayasa~NgAtsanniyamyendriyANi |
vrajanavayuvarAjo dArshayansvaM sarAdhe
     svajanagaNanamadhye taM priyAyAstanoti || 9||

iti shrIraghunAthadAsagosvAmivirachitastavAvalyAM
          shrImadanagopAlastotraM sampUrNam |

\chapter{##Utkanthadashakam ## .. utkaNThAdashakam ..}
ChinnasvarNavinindichikkaNaruchiM smerAM vayaHsandhito
     ramyAM raktasuchInapaTTavasanAM veshena vibhrAjitAm |
ud.hghUrNAchChitikaNThapi~nChavilasadveNIM mukundaM manAk
     pashyantIM nayanA~nchalena muditAM rAdhAM kadAhaM bhaje || 1||
yasyAH kAntatanUllasatparimalenAkR^iShTa uchchaiH sphura\-
     dgopIvR^indamukhAravindamadhutatprItyA dhayannapyadaH |
mu~nchanvartmani bambhramIti madato govindabhR^i~NgaH satAM
     vR^indAraNyavareNyakalpalatikAM rAdhAM kadAhaM bhaje || 2||
shrImatkuNDataTIkuDu~Ngabhavane krIDAkalAnAM guruM
     talpe ma~njulamallikomaladalaiH kL^ipte muhurmAdhavam |
jitvA mAninamakShasa~Ngaravidhau smitvA dR^igantotsavai\-
     ryu~njAnAM hasituM sakhIM paramaho rAdhAM kadAhaM bhaje || 3||
rAse premarasena kR^iShNavidhunA sArdhaM sakhIbhirvR^itAM
     bhAvairaShTabhireva sAttvikatarairlAsyaM rasaistanvatIm |
vINAveNumR^ida~Ngaki~NkiNichalanma~njIrachUDochChala\-
     ddhvAnaiH sphItasugItama~njunitarAM rAdhAM kadAhaM bhaje || 4||
uddAmasmarakelisa~Ngarabhare kAmaM vanAntaHkhale
     kR^iShNenA~NkitapInaparvatakuchadvandvAM nakhairastrakaiH |
taddarpeNa tathA madoddhuramaho taM viddhamAkurvatIM
     dUre svAlikulaiH kR^itAshiShamaho rAdhAM kadAhaM bhaje || 5||
mitrANAM nikarairvR^itena hariNA svairaM girIndrAntike
     shulkAdAnamiSheNa vartmani haThAddambhena ruddhA~nchalAm |
sArdhaM smerasakhIbhiruddhuragirAM bha~NgyA kShipantIM ruShA
     bhrUdarpairvilasachchakoranayanAM rAdhAM kadAhaM bhaje || 6||
pArAvAravihArakautukamanaHpUreNa kaMsAriNA
     sphAre mAnasajAhnavIjalabhare taryAM saumutthApitAm |
jIrNA naurmama chetskhalediti miShAchChAyAdvitIyAM mudA
     pAre khaNDitaka~nchulIM dhR^itakuchAM rAdhAM kadAhaM bhaje || 7||
ullAsairjalakelilolupamanaHpUre nidAghodgame
     kShvelIlampaTamAnasAbhiramitaH sAyaM sakhIbhirvR^itAm |
govindaM sarasi priye.atra salilakrIDAvidagdhaM kaNaiH
     si~nchantIM jalayantrakeNa payasAM rAdhAM kadAhaM bhaje || 8||
vAsantIkusumotkareNa paritaH saurabhyavistAriNA
     svenAla~NkR^itisa~nchayena bahudhAvirbhAvitena sphuTan|
sotkampaM pulakodgamairmurabhidA drAgbhUShitA~NgIM kramai\-
     rmodenAshrubharaiH plutAM pulakitAM rAdhAM kadAhaM bhaje || 9||
prANebhyo.apyadhikapriyA murariporyA hanta yasyA api
     svIyaprANaparArdhato.api dayitAstatpAdareNoH kaNAH |
dhanyAM tAM jagatItraye parilasajja~NghAlakIrtiM hareH
     preShThAvargashiro.agrabhUShaNamaNiM rAdhAM kadAhaM bhaje || 10||
utkaNThAdashakastavena nitarAM navyena divyaiH svarai\-
     rvR^indAraNayamahendrapaTTamahiShIM yaH stauti samyaksudhIH |
tasmai prANasamAguNAnurasanAtsa~njtaharShotsavaiH
     kR^iShNo.anarghamabhIShTaratnamachirAdetatsphuTaM yachChati || 11||

iti shrIraghunAthadAsagosvAmivirachitastavAvalyAmutkaNThAdashakaM sampUrNam |

\chapter{##Shri Navayuvadvandvadidrikshashtakam ## .. shrInavayuvadvandvadidR^ikShAShTakam ..}
sphuradamalamadhUlIpUrNarAjIvarAja\-
     nnavamR^igamadagandhadrohidivyA~NgagandhaM
mitha iha uditairunmAditAntarvighUrNa\-
     dvrajabhuvi navayUnordvandvaratnaM didR^ikShe || 1||
kanakagirikhalodyatketakIpuShpadIvya\-
     nnavajaladharamAlAdveShidivyorukAntyA |
sabalamiva vinodairIkShayAtsvaM mithasta\-
     dvrajabhuvi navayUnordvandvaratnaM didR^ikShe || 2||
nirupamanavagaurInavyakandarpakoTi
     praThitamadhurimormikShAlitashrInakhAntam |
navanavaruchirAgairhR^iShTamiShTairmithasta\-
     dvrajabhuvi navayUnordvandvaratnaM didR^ikShe || 3||
madanarasavighUrNannetrapadmAntanR^ityaiH
     parikalitamukhenduhrIvinAmraM mitho.alpaiH |
api cha madhuravAchaM shrotumAvardhitAshaM
     vrajabhuvi navayUnordvandvaratnaM didR^ikShe || 4||
smarasamaravilAsodgArama~NgeShu ra~Ngai\-
     stimitanavasakhIShu prekShamAnAsu bha~NgyA |
smitamadhuradR^igantairhrINasamphullavaktraM
     vrajabhuvi navayUnordvandvaratnaM didR^ikShe || 5||
madanasamaracharyAchAryamApUrNapuNya
     prasaranavavadhUbhiH prArthyapAdAnucharyam |
smararasikamekaprANamanyonyabhUShaM
     vrajabhuvi navayUnordvandvaratnaM didR^ikShe || 6||
taTamadhuraniku~nje shrAntayoH shrIsarasyaH
     prachurajalavihAraiH snigdhavR^indaiH sakhInAm |
upahR^itamadhura~NgaiH pAyayAttanmithastai\-
     rvrajabhuvi navayUnordvandvaratnaM didR^ikShe || 7||
kusumashararasaughagranthibhiH premadAmnA
     mitha iha vashavR^ittyA prauDhayAddhA nibaddham |
akhilajagati rAdhAmAdhavAkhyaprasiddhaM
     vrajabhuvi navayUnordvandvaratnaM didR^ikShe || 8||
praNayamadhuramuchchairnavyayUnordidR^ikShA
     ShTakamidamatiyatnAdyaH paThetsphAradainyaiH |
sa khalu paramashobhApu~njama~nju prakAmaM
     yugalamatulamakShNoH sevyamArAtkaroti || 9||

iti shrIraghunAthadAsagosvAmivirachitastavAvalyAM
          shrInavayuvadvandvadidR^ikShAShTakaM sampUrNam |

\chapter{##Abhishtaprarthanashtakam ## .. abhIShTaprArthanAShTakam ..}
kadA goShThe goShThakShitipagR^ihadevyA kila tayA
     sabAShpaM kurvatyA vilasati sute lAlanavidhim |
muhurdR^iShTaM rohiNyapIhitaniveshAmavanataM
     niSheve tAmbUlairahamapi vishAkhApriyasakhIm || 1||
kadA gAndharvAyAM shuchi virachayantyAM harikR^ite
     mudA hArAnvR^indaiH saha savayasAmAtmasadane |
vichitya shrIhaste maNimiha muhuH sampuTachayA\-
     daho vinyasyantI saphalayati seyaM bhujalatAm || 2||
kadA lIlArAjye vrajavipinarUpe vijayinI
     nijaM bhAgyaM sAkShAdiha vidadhatI vallabhatayA |
samantAdkrIDantI pikamadhupamukhyAbhirabhitaH
     prajAbhiH sa~njuShTA pramadayati sA mAM madadhipA || 3||
kadA kR^iShNAtIre trichaturasakhIbhiH samamaho
     prasUnAM gumphantIM ravisakhasutAmAnatatayA |
sametya prachChannaM sapadi pariripsorbakaripo\-
     rniShedhe bhrUbha~NgaM bhR^ishamanubhaje.aham vyajaninI || 4||
kadA shubhre tasminpulinavalaye rAsamahasA
     suvarNAggIsa~NgheShTahamahamikAmattamatiShu |
harau yAte nIlotpalanikasatAM jitvaraguNA\-
     dguNAdasmAndivyadraviNamiva rAdhA madayati || 5||
kadA bhANDIrasya prathitaruchirotsa~Nganilaye
     varAmadhyAsInaM kusumamayatUlImatulitam |
priye chitraM patraM likhati nihitasva~NgalatikAM
     vishAkhAprANAlIM bhajati dishatI varNakamasau || 6||
kadA tu~Nge tu~Nge rahasi girishR^i~Nge vratatijA\-
     npriye pUrvA lIlA nigamayati saMstavya nilayAn|
madenAviShpaShTaM sakalitapadaM vrIDitatayA
     drutamautkyenaiShA virachayati pR^ichChAM mama puraH || 7||
gatiryanme nityA yadakhilamapi svaM savayasAm
     madIshvaryAH preShThapraNayakR^itasaubhAgyavarimA |
hareryatpremashrIrnivasatiramuShyastulanayA
     sadA tasminkuNDe lasatu lalitAlI mama dR^ishI || 8||

iti shrIraghunAthadAsagosvAmivirachitastavAvalyAM
          abhIShTaprArthanAShTakaM sampUrNam |

\chapter{##Shri Dananirvartanakundashtakam ## .. shrIdAnanirvartanakuNDAShTakam ..}
svadayitagirikachChe gavyadAnArthamuchchaiH
     kapaTakalahakeliM kurvatornavyayUnoH |
nijajanakR^itadarpaiH phullatorIkShake.asmi\-
     nsarasi bhavatu vAso dAnanirvartane naH || 1||
nibhR^itamajani yasmAddAnanirvR^ittirasmi\-
     nata idamabhidhAnaM prApa yattatsabhAyAm |
rasavimukhanigUDhe tatra taj~naikavedye
     sarasi bhavatu vAso dAnanirvartane naH || 2||
abhinavamadhugandhonmattarolambasa~Ngha
     dhvanilalitasarojavrAtasaurabhyashIte |
navamadhurakhagAlIkShvelisa~nchArakAmre
     sarasi bhavatu vAso dAnanirvartane naH || 3||
himakusumasuvAsasphArapAnIyapUre
     rasaparilasadAlIshAlinornavyayUnoH |
atulasalilakhelAlabdhasaubhAgyaphulle
     sarasi bhavatu vAso dAnanirvartane naH || 4||
daravikasitapuShpairvAsitAntardigantaH
     khagamadhupaninAdairmoditaprANijAtaH |
paritaupari yasya kShmAruhA bhAnti tasmi\-
     nsarasi bhavatu vAso dAnanirvartane naH || 5||
nijanijanavaku~nje gu~njirolambapu~nje
     praNayinavasakhIbhiH sa.npraveshya priyau tau |
nirupamanavara~Ngastanyate yatra tasmi\-
     nsarasi bhavatu vAso dAnanirvartane naH || 6||
sphaTikasamamatuchChaM yasya pAnIyamachChaM
     khaganarapashugobhiH sampibantIbhiruchchaiH |
nijanijaguNavR^iddhirlabhyate drAgamusmi\-
     nsarasi bhavatu vAso dAnanirvartane naH || 7||
surabhimadhurashItaM yatpayaH pratyahaM tAH
     sakhigaNaparivIto vyAharanpAyayangAH |
svayamatha pibati shrIgopachandro.api tasmi\-
     nsarasi bhavatu vAso dAnanirvartane naH || 8||
paThati sumatiretaddAnanirvartanAkhyaM
     prathitamahimakuNDasyAShTakaM yo yatAtmA |
sa cha niyatanivAsaM suShThu saMlabhya kAle
     kalayati kila rAdhAkR^iShNayordAnalIlAm || 9||

iti  shrIraghunAthadAsagosvAmivirachitastavAvalyAM
          shrIdAnanirvartanakuNDAShTakaM sampUrNam |

\chapter{##Shri Prarthanashrayachaturdashakam ## .. shrIprArthanAshrayachaturdashakam ..}
alaM dIpAvalyAM vipularati govardhanagiriM
     jananyA sampUjyojjvalitamahilodgItakutukaiH |
nishAdrAvaiH pR^iShThe rachitakaralakShmAshriyamasau
     vahanmeghadhvAnaiH kalaya giribhR^itkhelayati gAH || 1||
puro gobhiH sArdhaM vrajanR^ipatimukhyA vrajajanA
     vrajantyeShAM pashchAnnikhilamahilAbhirvrajanR^ipA |
tato mitravrAtaiH kR^itavividhanarmA vrajashashI
     ChalaiH pshyanrAdhAM sahachari parikrAmati girim || 2||
uda~nchatkAruNyAmR^itavitaraNairjIvitajaga\-
     dyuvadvandvaM gandhairguNasumanasaM vAsitajanam |
kR^ipAM chenmayyevaM kirati na tadA tvaM kuru tathA
     yathA me shrIkuNDe sakhi sakalama~NgaM nivasati || 3||
uddAmanarmarasakelivinirmitA~NgaM
     rAdhAmukundayugalaM lalitAvishAkhe |
gaurA~Ngachandramiha rUpayugaM na pashya\-
     nhA vedanAH kati sahe sphuTa re lalATa || 4||
vrajapatikR^itaparvAnandinandIshvarodya\-
     tpariShadi vadanAntaHsmeratAM rAdhikAyAH |
rachayati harirAdAddR^igvibha~Ngena nadyAM
     raviriva kamalinyaH puShpakAntiM kareNa || 5||
upagiri giridhartuH susmite vaktrabimbe
     bhramati nibhR^itarAdhA netrabha~NgIchChalena |
atitR^iShitachakorI lAlasevAmbudasyo
     pari shashini sudhADhye madhya AkAshadesham || 6||
dyutijitaratigaurIkShmAramAsatyabhAmA
     vrajapuravaranArIvR^indachandrAvalIkAm |
giribhR^ita iha rAdhAM tanvato maNDitaM tat\-
     tadupakaraNamagre kiM nidhAsye krameNa || 7||
kanakarachitakumbhadvandvavinyAsabha~NgI
     ruchiharakuchayugmaM saurabhochChUnamasyAH |
sapulakamatha gandhaishchitritaM kartumichCho\-
     rgiribhR^ita iha haste hanta dAsye kadA tAn|| 8||
kR^iShNasyAMse vinihitabhujavallirutphullaromA
     rAmA keyaM kalayatitaraM bhUdharAraNyalakShmIm |
j~nAtaM j~nAtaM praNayachatulA vyAkulA rAgapUrai\-
     ranyA kAnte sahachari vinA rAdhikAmIdR^ishI vA || 9||
apUrvapremAbdheH parimalapayaHphenanivahaiH
     sadA yo jIvAturyamiha kR^ipayAsi~nchadatulam |
idAnIM durdaivAtpratipadavipaddAvavalito
     nirAlambaH so.ayaM kamiha taM R^ite yAtu sharaNam || 10||
shUnyAyate mahAgoShThaM girIndro.ajagarAyate |
vyAghratuNDAyate kuNDaM jIvAturahitasya me || 11||
na patati yadi dehastena kiM tasya doShaH
     sa kila kulishasArairyadvidhAtrA vyadhAyI |
ayamapi paraheturgADhatarkeNa dR^iShTaH
     prakaTakadanabhAraM ko vahatvanyathA vA || 12||
girivarataTaku~nje ma~njuvR^indAvanesha
     sarasi cha rachayanshrIrAdhikAkR^iShNakIrtim |
dhR^itarati ramaNIyaM saMsmaraMstatpadAbjaM
     vrajadadhiphalamashnansarvakAlaM vasAmi || 13||
vasato girivarataTaku~nje
     lapataH shrIrAdhike.anu kR^iShNeti |
dhAyato vrajadadhitakraM
     nAtha sadA me dinAni gachChantu || 14||

iti shrIraghunAthadAsagosvAmivirachitastavAvalyAM
          shrIprArthanAshrayachaturdashakaM sampUrNam |

\chapter{##Abhishtasuchanam ## .. abhIShTasUchanam ..}
AbhIrapallIpatiputrakAntA\-
     dAsyAbhilAsAtibalAshvavAraH |
shrIrUpachintAmaNisaptisaMstho
     matsvAntadurdAnthayechChurAstAm || 1||
yadyatnataH shamadamAtmavivekayogai\-
     radhyAtmalagnamavikAramabhUnmano me |
rUpasya tatsmitasudhaM sadayAvalokaM
     AsAdya mAdyati hareshchartairidAnIm || 2||
nibhR^itavipinalIlAH kR^iShNavaktraM sadAkShNA
     prapibatha mR^igakanyA yUyamevAtidhanyAH |
kShaNamapi na viloke sArameyI vrasthApy\-
     udarabharaNavR^ittyA bambhramantI hatAham || 3||
manmAnasonmIladanekasa~Ngama
     prayAsaku~njodaralabdhasa~NgyoH |
nivedya sakhyarpaya mAM svasevane
     vITIpradAnAvasare vrajeshayoH || 4||
niviDarativilAsAyAsagADhAlasA~NgIM
     shramajalakaNikAbhiH klinnagaNDAM nu rAdhAm |
vrajapatisutavakShaHpIThavinyastadehAM
     api sakhi bhavatIbhiH sevyamAnAM viloke || 5||
ditijakulanitAntadhvAntamashrAntamasya\-
     nsvajanajanachakorapremapIyUShavarShI
karashishiritarAdhAkairavotphullavallI
     kuchakusumaguluchChaH pAtu kR^iShNauShadhIshaH || 6||
rAse lAsyaM rasavati samaM rAdhayA mAdhavasya
     kShmAbhR^itkachChe dadhikarakR^ite sphArakelIvivAdam |
AlImadhye smarapavanajaM narmabha~NgItara~NgaM
     kAle kasminkushalabharite hanta sAkShAtkaromi || 7||
rohiNyAgre kR^itAshIHshatamatha sabhayAnandamAbhIrabhartA
     bhItyA shashvannR^isiMhe halini sakhikule nyasya sAsraM vrajeshyA |
sATopasnehamudyadvrajajananivahai rAdhikAdipriyAbhiH
     sashlAghaM vIkShyamANaH shritasurabhiraTannavyagopaH sa pAyAt || 8||
adR^iShTA dR^iShTeva sphurati sakhi keyaM vrajavadhUH
     kuto.asminnAyAtA bhajitumatulA tvAM madhupurAt |
apUrveNApUrvAM ramaya hariNainAmiti sa rA\-
     dhikodyadbha~NgyuktyA viditayuvatibhyaH smitamadhAt || 9||
rAdheti nAma navasundaradIdhumugdhaM
     kR^iShNeti nAma madhurAdbhutagADhadugdham |
sarvakShaNaM surabhirAgahimena ramyaM
     kR^itvA tadeva piba me rasane kShudhArte || 10||
chaitanyachandra mama hR^itkumudaM vikAshya
     hR^idyaM vidhehi nijachintanabhR^i~Ngara~NgaiH |
kiM chAparAdhatimiraM niviDaM vidhUya
     pAdAmR^itaM sadaya pAyaya durgataM mAm || 11||
pikapaTuravavAdyairbhR^i~Ngajha~NkAragAnaiH
     sphuradatulakuDu~NgakroDara~Nge sara~Ngam |
smarasadasi kR^itodyannR^ityataH shrAntagAtraM
     vrajanavayuvayugmaM nartakaM vIjayAmi || 12||
yatpAdAmbujayugmavichyutarajaHsevAprabhAvAdahaM
     gAndharvAsarasIgirIndranikaTe kaShTo.api nityaM vasan|
tatpreyogaNapAlito jitasudhA rAdhAmukundAbhidhA
     udgAyAmi shR^iNomi mAM punaraho shrImAnsa rUpo.avatu || 13||

iti shrIraghunAthadAsagosvAmivirachitastavAvalyAM
          shrIabhIShTasUchanaM sampUrNam |
##

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}