श्रीमद्पेद्दापुरं लक्ष्मीयोगनारसिंहस्वामि सुप्रभातम्
ॐ गँ गणपतये नमः ॥
ॐ श्रीवागीश्वर्यै नमः ॥
ॐ श्रीलक्ष्मी समेत योगनारसिंहस्वामिने नमः ॥
श्री पेद्दापुरं लक्ष्मीयोगनारसिंहस्वामि सुप्रभातम्
कोरिडे विश्वनाथ शर्मा, संस्कृतोपन्यासकः ।
उत्तिष्ठोत्तिष्ठ लक्ष्मीश ! उत्तिष्ठ नरकेसरिन्! ।
उत्तिष्ठ जगतां नाथ ! उदयाद्रिं गतो रविः ॥ १॥
श्रीलक्ष्मि! माधवि ! रमे ! जगदेकमातः
क्षीराब्धिजे ! सुरनुते ! कमले ! मनोज्ञे ! ।
नारायणीन्दुसहजे ! परिरक्ष लोकान्
पेद्दापुरेशदयिते ! तव सुप्रभातम् ॥ २॥
हे वासुदेव ! पुरुषोत्तम ! नारसिंह !
लक्ष्मीश ! जगृहि परात्पर ! पद्मनाभ ! ।
रक्ष्या त्वया हि जगती न सदाऽन्यकैस्तु
पेद्दापुरेश ! नृहरे ! तव सुप्रभातम् ॥ ३॥
प्रह्लादरक्षक ! जनार्दन ! दैत्यनाश !
पेद्दापुराद्रिनिलयार्कसुधांशुनेत्र ! ।
त्वद्वीक्षणार्थमिहचेक्षति भक्तवृन्दं
पेद्दापुरेश ! नृहरे ! तव सुप्रभातम् ॥ ४॥
पेद्दापुरस्यनिकटे गिरिमाश्रितः सन्
भक्तान् सदा हि परिपालयसीश ! नित्यम् ।
त्वद्भक्तरक्षणकृते ननु ते हि निष्ठा
पेद्दापुरेश ! नृहरे ! तव सुप्रभातम् ॥ ५॥
भक्ताः प्रदक्षिणविधिं त्ववलम्भ्य निष्ठाः
कुर्वन्तिचात्र शकटैस्तु मुहुर् भ्रमन्ति
यत्त्वंह्यभीष्ट फलमाशु ददासि नूनम्
पेद्दापुरेश ! नृहरे ! तव सुप्रभातम् ॥ ६॥
ब्रह्मादयः सुरवरा वरयोगिवृन्दाः
स्नातानुलिप्तकृतनिष्ठवरिष्ठभक्ताः ।
ध्यानैकचित्तवशगा स्तव द्रष्टुकामाः
पेद्दापुरेश ! नृहरे ! तव सुप्रभातम् ॥ ७॥
श्रीचान्द्रमानगणने शुभचैत्रमासे
एकादशी शुभदिने वरशुक्लपक्षे ।
कल्याणमीक्षितजनास्तव लब्धभागाः
पेद्दापुरेश ! नृहरे ! तव सुप्रभातम् ॥ ८॥
यो मातृदास्यमपहर्तुमयं द्विजेन्द्रः
जित्वा महेन्द्रमपि देव! सुधां निनाय ।
स त्वीक्षतेऽत्र तव वाहनवैनतेयः
पेद्दापुरेश ! नृहरे ! तव सुप्रभातम् ॥ ९॥
वृक्षाग्रभगनिवसेषु विहङ्गमाश्च
ते चैव दर्शनफलं ननु बोधयन्ति ।
तत्त्वं प्रवक्तुमयि ते प्रकृतिर्वरिष्ठा
पेद्दापुरेश ! नृहरे ! तव सुप्रभातम् ॥ १०॥
मुग्धेषु पद्मनिकरेषु निबद्धभृङ्गाः
अद्यैवभानुकिरणैस्तु विमुक्तका ये ।
गायन्ति तेऽत्र हि सुतुल्यविमुक्तसङ्गाः
पेद्दापुरेश ! नृहरे ! तव सुप्रभातम् ॥ ११॥
इन्द्वर्कनेत्र ! भवतः खलु सेवनेषु
इन्दुस्तु ते स्वसहजामकरोद्धि पत्नीम् ।
भानुः करैः स्वप्रथमैर् यजते पदौ ते
पेद्दापुरेश ! नृहरे ! तव सुप्रभातम् ॥ १२॥
अथ स्तोत्रम्
हृतपापचयास्तव मन्दिरगा
गतविष्णुपदास्तव भक्तवराः ।
जिततापसिकास्तव दासवरा
विजयी भव देव! नृसिंह विभो! ॥ १॥
तव वैरिरहो ! ननु दैत्यवरस्
तव लब्धवरो ननु दैत्यशिशुः ।
तव दातृवरो ननु दैत्यबलिर्
विजयी भव देव! नृसिंह विभो! ॥ २॥
ननु दैत्यवधे तव सिंहमुखम् ।
नुतपालकृते नृतनुस्तव भोः ।
अवनीमवनेह्यवतारितवान्
विजयी भव देव! नृसिंह विभो! ॥ ३॥
मृगराजमुखाञ्चितपुण्यतनो !
खगराजविराजितयानविभो
फणिराजविभूषितपीठहरे
विजयी भव देव! नृसिंह विभो! ॥ ४॥
! नृसिंह विभो!!!! नृसिंह विभो!
अथ प्रपत्तिः
प्रह्लादकस्य हि वचः परिरक्षणार्थं
स्तम्भोद्भवन् प्रकटिताद्भुतदर्शनोऽसि ।
भक्तानुरागमयि ते विशदीकृतं हि
पेद्दापुरेश ! चरणौ शरणं प्रपद्ये ॥ १॥
त्वं लोकसृष्टिकरणे ननु ब्रह्मरूपः
तल्लोकपालनकृते ननु विष्णुरूपः
तज्जीर्णलोकविलयीकरणे च रुद्रः
पेद्दापुरेश ! चरणौ शरणं प्रपद्ये ॥ २॥
दासौ तवैव नितरां खलु भक्तिशून्यौ
भक्तावमानक्रियया गतदैत्यरूपौ ।
प्रह्लादकस्तु तव लब्धवरोऽर्भदैत्यः
पेद्दापुरेश ! चरणौ शरणं प्रपद्ये ॥ ३॥
शूरोऽस्म्यहन्त्विति सुगर्वितदुष्टदैत्यः
मृत्युं त्वया स्वनियतिं त्वनुलङ्घ्ययातः ।
दुष्टाय कल्पयसि भोः! स्ववचोऽनुनाशं
पेद्दापुरेश ! चरणौ शरणं प्रपद्ये ॥ ४॥
बालो धृवो ननु जितेन्द्रियतापसोऽसौ
यस्ते प्रसादमलभज्जगदुन्नतं हि ।
भक्तिस्त्वयीश! प्रमुखा न वयः प्रमाणं
पेद्दापुरेश ! चरणौ शरणं प्रपद्ये ॥ ५॥
अथ श्री मङ्गळाशासनम्
अकाराय ह्यनन्ताय अष्टैश्वर्यप्रदायिने ।
अदिमध्यान्तहीनाय नारसिंहाय मङ्गळम् ॥ १॥
इन्द्रादिभिः सुसेव्याय इन्दिरानन्ददायिने ।
ईप्सितार्थप्रदायास्मै नारसिंहाय मङ्गळम् ॥ २॥
उग्ररूपाय दैत्येभ्य उडूनाम्पतिचक्षुषे
ऊर्ध्वस्रोतस्वरूपाय नारसिंहाय मङ्गळम् ॥ ३॥
ऋग्वेदादिभिस्तुत्याय ऋद्धिबुद्धिप्रदायिने ।
ऋषिभिर् ध्यानगम्याय नारसिंहाय मङ्गळम् ॥ ४॥
एकरूपाय नित्याय एकस्मै विश्वचक्षुषे ।
एकान्तिजनरक्षाय नारसिंहाय मङ्गळम् ॥ ५॥
ऐहिकामुष्मिकं दात्रे ऐश्वर्यानन्ददायिने ।
ऐक्ष्वाकुकलरामाय नारसिंहाय मङ्गळम् ॥ ६॥
ओङ्कारनादरूपाय ओजसे सूर्यकोटिनाम् ।
ओषधीशसुनेत्राय नारसिंहाय मङ्गळम् ॥ ७॥
औग्र्यदैत्यविनाशाय औदुम्बरप्रियात्मने
औषधायामयानां च नारसिंहाय मङ्गळम् ॥ ८॥
सिद्धसाध्यनुतायास्मै देवकोटिस्तुताय च
पेद्दापुराद्रिवासायनारसिंहाय मङ्गळम् ॥ ९॥
ब्रह्मादिभिः सुवन्द्याय भक्तैश्वर्यप्रदायिने ।
पेद्दापुराद्रिवासायनारसिंहाय मङ्गळम् ॥ १०॥
फलशृति
यद् विश्वनाथकृतवाङ्मयसेवनं हि
पेद्दापुरेशनृहरेः शुभसुप्रभातम् ।
प्रातस्तु ये निलयमेत्य पठन्ति भक्त्या
ते नारसिंहसदनुग्रहपात्रतार्हाः ॥ १॥
मया हि कोरिडे कुलीन विश्वनाथशर्मणा
मुदा कृतं तु नारसिंहसुप्रभातसेवनम् ।
नरेन्द्रकण्ठराजितं सदा ह्यरिष्टनाशकं
भवेन्नृसिंहमोदकं प्रपाठकाय मोक्षदम् ॥ २॥
हरिः ॐ ।
स्वस्तिप्रजाभ्यः परिपालयन्तां
न्यायेन मार्गेण महीं महीशाः ।
गोब्राह्मणेभ्यः शुभमस्तु नित्यं
लोकाः समस्ताः सुखिनो भवन्तु ॥
काले वर्षन्तु पर्जन्याः पृथिवी सस्यशालिनी
देशोऽयं क्षोभरहितो ब्राह्मणाः सन्तुनिर्भयाः ।
अपुत्राः पुत्रिणः सन्तु पुत्रिणः सन्तु पौत्रिणः
अधनाः सधनाः सन्तु जीवन्तु शरदां शतम् ॥
कायेन वाचा मनसेन्द्रियैर्वा
बुध्यात्मना वा प्रकृतेः स्वभावात् ।
करोमि यद्य्तत् सकलं परस्मै
नारायणायेति समर्पयामि ॥
हरिः ओं तत्सत् परमेश्वरार्पणमस्तु ॥
Composed by Koride Vishwanatha Sharma, Dharmapuri, Telangana
Proofread by Koride Vishwanatha Sharma.