% Text title            : padmanAbhashatakam
% File name             : padmanAbhashatakam.itx
% Category              : shataka, vishhnu, vishnu
% Location              : doc\_vishhnu
% Author                : mahArAjA svAti tirunAL
% Transliterated by     : P. P. Narayanaswami swami at mun.ca
% Proofread by          : P. P. Narayanaswami swami at mun.ca, PSA Easwaran
% Latest update         : May 16, 2015
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Padmanabhashatakam ..}##
\itxtitle{.. shrIpadmanAbhashatakam ..}##\endtitles ##
mahArAjA svAti tirunAL virachitam
 || shrI gaNeshAya namaH ||
 || prathamaM dashakam ||
yA te pAdasarojadhUliranishaM brahmAdibhirnispR^ihaiH
bhaktyA sannatakandharaiH sakutukaM sandhAryamANA hare |
yA vishvaM prapunAti jAlamachirAt saMshoShayatyaMhasAM
sA mAM hInaguNaM punAtu nitarAM shrIpadmanAbhAnvaham || 1||
sattvaikapravaNAshayA munivarA vedaiH stuvantaH paraiH
tvanmAhAtmyapayonidherihaparaM nAdyApi pAra~NgatAH |
evaM satyahamalpabuddhiravashaH stotuM kathaM shaknuyAM
tvatkAruNyamR^ite hare! tarati kaH potaM vinA sAgaram || 2||
tasmAchChindhi madIyamohamakhilaM saMsArabandhAvahaM
bhaktiM tvatpadayordisha sthiratarAM sarvApadunmIlinIm |
vANIM tvatpadavarNane paTutamAM vidvajjanAhlAdinIM
dehi tvatpadasevakAya nanu me kAruNyavArAMnidhe || 3||
yenedaM bhuvanaM tataM svabalato yasyAj~nayodetyahar\-
nAtho vAtyanilo dahatyapi shikhiH sarve.api yannirmitAH |
yashchedaM sakalaM jagatsvajaThare dhatte cha kalpAvadhau
tattAdR^igvibhave tvayi pramudite kiM vA durApaM nR^iNAm || 4||
bhaktAnAmakhilepsitArthaghaTane baddhodyamastvaM hare!
nityaM khalviti boddhyamasti bahusho deva!  pramANaM mama |
no chedvyAsavachastavaiva vachanaM vedopagItaM vacho
hA rathyAjanavAdavadbata bhavenmithyA ramAvallabha! || 5||
indradyumnanR^ipaH karIndrajananaM prApto.atha shApena vai
nakrAkrAntapado vimochanapaTurnAbhUtsahasraM samAH |
bhUyastvAmayamarchayan sarasijaiH shuNDoddhR^itaiH sAdaraM
sArUpyaM samavApa deva bhavato nakro.api gandharvatAm || 6||
pApaH kashchidajAmilAkhyadharaNIdevo.avasatsantataM
svairiNyA saha kAmamohitamatistvAM vismaran muktidam |
ante chAhvayadIsha! bhItahR^idayo nArAyaNetyAtmajaM
nItaH so.api bhavadbhaTaistavapadaM saMrudhya yAmyAn bhaTAn || 7||
pA~nchAlIM nR^ipasannidhau khalamatirdushshAsanaH puShpiNIM
AkarShashchikureNa dInavadanAM vAsaH samAkShiptavAn |
yAvatsA bhuvanaikabandhumavashA sasmAra lajjAkulA
kroshantI vyatanoH paTaughamamalaM tasyAstvanantaM hare ! || 8||
yAmArdhena tu pi~NgalA tava padaM prAptA hi vArA~NganA
bAlaH pa~nchavayoyuto dhruvapadaM chauttAnapAdirgataH |
yAtashchApi mR^ikaNDumaunitanayaH shaure! chiraM jIvitaM
nAhaM vaktumiha kShamastava kR^ipAlabhyaM shubhaM prANinAm || 9||
evaM bhaktajanaughakalpakataruM taM tvAM bhajantaH kShaNaM
pApiShThA api muktimArgamamalaM ke ke na yAtA vibho! |
sa tvaM mAmapi tAvakInacharaNe bhaktaM vidhAyAnataM
syAnandUrapuresha! pAlaya mudA tApAnmamApAkuru || 10||
\medskip\hrule\medskip
 || dvitIyaM dashakam ||
pibanti ye tvachcharitAmR^itaughaM
smaranti rUpaM tava vishvaramyam |
haranti kAlaM cha saha tvadIyaiH
manye.atra tAn mAdhava dhanyadhanyAn || 1||
sadA prasaktAM viShayeShvashAntAM
matiM madIyAM jagadekabandho! |
tavaiva kAruNyavashAdidAnIM
sanmArgagAM preraya vAsudeva! || 2||
dR^ishau bhavanmUrtivilokalole
shrutI cha te chArukathAprasakte |
karau cha te pUjanabaddhatR^iShNau
vidhehi nityaM mama pa~NkajAkSha ! || 3||
nR^iNAM bhavatpAdaniShevaNaM tu
mahauShadhaM saMsR^itirogahArI |
tadeva me pa~NkajanAbha bhUyAt
tvanmAyayA mohitamAnasasya || 4||
yadIha bhaktistavapAdapadme
sthirA janAnAmakhilArtihantrI |
tadA bhavenmuktiraho karasthA
dharmArthakAmAH kimu varNanIyAH || 5||
vedoditAbhirvratasatkriyAbhir\-
nashyatyaghaugho na hi vAsanA tu |
tvatpAdasevA harati dvayaM yat
tasmAtsthirA saiva mamAshu bhUyAt || 6||
tvadIyanAmasmR^itirapyakasmAd
dhunoti pApaughamasaMshayaM tat |
yadvadgadAnauShadhamAshu hanti
yathA kR^ishAnurbhuvi dArukUTam || 7||
yadyatsmaran projjhati dehametat
prayANakAle vivasho.atra dehI |
tattatkilApnoti yadanyabhAve
tasmAttavaiva smR^itirastu nityam || 8||
anekadharmAn pracharanmanuShyaH
nAke nu bhu~Nkte sukhamavyalIkam |
tasyAvadhau sampatatIhabhUmau
tvatsevako jAtu na vichyutaH syAt || 9||
tasmAtsamastArtiharaM janAnAM
svapAdabhAjAM shrutisAramR^igyam |
tavAdya rUpaM paripUrNasatvaM
ramAmanohAri vibhAtu chitte || 10||
\medskip\hrule\medskip
 || tR^itIyaM dashakam ||
dinamanupadayugmaM bhAvayeyaM murAre
kulishashapharamukhyaishchihnite chAru chihnaiH |
nakhamaNividhudIptyA dhvastayogIndracheto \-
gatatimirasamUhaM pATalAmbhojashobham || 1||
yaduditajaladhArA pAvanI jahnukanyA
purabhidapi mahAtmA yAM bibharti svamUrdhnA |
bhujagashayana! tatte ma~njuma~njIrayuktaM
muhurapi hR^idi seve pAdapadmaM manoj~nam || 2||
murahara! tava ja~Nghe jAnuyugmaM cha seve
duritahara tathorU mAMsaLau chArushobhau |
kanakaruchirachelenAvR^itau deva! nityaM
bhuvanahR^idayamohaM samyagAsha~Nkya nUnam || 3||
maNigaNayutakA~nchIdAma satki~NkiNIbhiH
mukharatamamameyaM bhAvaye madhyadesham |
nikhilabhuvanavAsasthAnamapyadya kukShiM
muhurajita! niSheve sAdaraM padmanAbha! || 4||
bhavaharaNa! tathA shrIvatsayuktaM cha vakSho\-
vilasadaruNabhAsaM kaustubhenA~Nga kaNTham |
maNivalayayutaM te bAhuyugmaM cha seve
danujakulavinAshAyodyataM santataM yat || 5||
varada jaladhiputryA sAdhu pItAmR^itaM te
tvadharamiha bhaje.ahaM chArubimbAruNAbham |
vimaladashanapa~NktiM kundasadkuDmalAbhAM
makaranibhavirAjatkuNDalollAsi gaNDam || 6||
tilakusumasamAnAM nAsikAM chAdya seve
garuDagamana! chilyau darpakeShvAsatulyau |
mR^igamadakR^itapuNDraM tAvakaM bhAladeshaM
kuTilamaLakajAlaM nAtha nityaM niSheve || 7||
sajalajaladanIlaM bhAvaye keshajAlaM
maNimakuTamuda~nchatkoTisUryaprakAsham |
punaranagha! matiM me deva! sa~Nkochya yu~nje
tava vadanasaroje mandahAse manoj~ne || 8||
giridhara tava rUpaM tvIdR^ishaM vishvaramyaM
mama viharatu nityaM mAnasAmbhojamadhye |
manasijashatakAntaM ma~njumAdhuryasAraM
satatamapi vichintyaM yogibhiH tyaktamohaiH || 9||
atha bhuvanapate.ahaM sargavR^iddhikramaM vai
kimapi kimapi vaktuM prArabhe dInabandho |
parapuruSha! tadarthaM tvatkR^ipA sampatenma\-
yyakR^itasukR^itajAlairdurlabhA pa~NkajAkSha ! || 10||
\medskip\hrule\medskip
 || chaturthaM dashakam ||
tAvakanAbhisarojAt
jAto dhAtA samastavedamayaH |
shaMsati sakalo loko
yaM kila hiraNyagarbha iti || 1||
tadanu sa vismitachetAH
chatasR^iShu dikShu sAdhu sampashyan |
samagAdachyuta tUrNaM
chaturAnanatAmihAShTanayanayutAm || 2||
dR^iShTvA kamalaM so.ayaM
tanmUlAM tava tanuM tvasampashyan |
ko.ahaM nishsharaNo.ajaM
kasmAdajanIti deva! chintitavAn || 3||
j~nAtuM tattvaM so.ayaM
sarasijanALAdhvanA tvadho gatvA |
yogabalena manoj~nAM
tava tanumakhilesha! nApyapashyadaho || 4||
tAvaddu.hkhitahR^idayaH
punarapi cha nivR^itya pUrvavajjalaje |
tAvaka karuNAmichChan
chakre samAdhimayi! bhagavan || 5||
vatsarashatakasyAnte
dR^iDhataratapasA parividhUtahR^idayamalaH |
sa vidhirapashyatsvAnte
sUkShmatayA tava tanuM tu subhagatamAm || 6||
punariha tena nutastvaM
shaktimadAstasya bhuvananirmANe |
pUrvaM tvasR^ijatso.ayaM
sthAvaraja~NgamamayaM tu sakalajagat || 7||
sanakamukhAn munivaryAn
manasAhyasR^ijattavA~NghriratahR^idayAn |
sR^iShTau tu te niyuktAH
jagR^ihurvANIM na vaidhasIM bhUman! || 8||
a~NgAdabhavaMstUrNaM
nAradamukhyA munIshvarAstasya |
manushatarUpAtmAsau
mAnuShasR^iShTiM chakAra kamalabhavaH || 9||
sargasthitilayamUlaM
suramunijAlairameyamahimAnam |
taM tvAmeva praNaman
mudamatulAM padmanAbha! kalayAmi || 10||
\medskip\hrule\medskip
|| pa~nchamaM dashakam ||
bhuvo bhAraM hartuM niyatamavatArAMstu bhavato
niyu~Nkte vaktuM mAmapi jaDadhiyaM bhaktiradhunA |
tadarthaM kR^itvA mAmanupamapaTuM pAlaya hare
bhavatpAdAmbhojapravaNahR^idayaM deva sadayam || 1||
hayagrIvAkhyena tridasharipuNA vedanivahe
hR^ite nidrANasyAmburuhajanuSho hanta vadanAt |
nihantuM duShTaM taM vinihitamatistvaM purudayA\-
payodhistUrNaM vai dadhita bata mAtsyaM kila vapuH || 2||
nadItoye santarpayati kila satyavratanR^ipe
bhavAn dR^iShTo haste paramatanuvaisAriNavapuH |
tato ninye kUpaM punarapi taTAkaM cha taTinIM
mahAbdhiM tenAho sapadi vavR^idhe tAvaka vapuH || 3||
tatastaM bhUpAlaM pralayasamayAlokanaparaM
munIndrAn saptApi kShititaraNimAropya cha bhavAn |
samAkarShan baddhAM nija vipulashR^i~Nge punarimAM
mudA tebhyaH sandarshitabhuvanabhAgaH samacharat || 4||
punassaMhR^itya tvaM nijaparuShashR^i~NgeNa ditijaM
kShaNAdvedAn prAdA muditamanase deva vidhaye |
tathAbhUtA.ameyapraNatajanasaubhyAgyada! hare!
mudA pAhi tvaM mAM sarasiruhanAbhA.akhilaguro! || 5||
vahaMstvaM manthAnaM kamaThavapuShA mandaragiriM
dadhAnaH pANibhyAM svayamapi varatrAM phaNipatim |
surebhyaH sampradAstvamR^itamiha mathnan kila javAt
hare dugdhAmbhodheH sapadi kamalA.ajAyata tataH || 6||
tato nikShiptA vai sapadi varaNasrak khalu tayA
bhavatkaNThe mAtrA nikhilabhuvanAnAM sakutukam |
papau tvatprItyarthaM sapadi bata hAlAhalaviShaM
girIshaH prAdAstvaM suratarugajAdIni haraye || 7||
purA te dvAsthau dvau sanakamukhashApena tu gatau
hare! sarvairnindyaM khalu danujajanmAtikaThinam |
tayorbhrAtA duShTo murahara kanIyAn varabalAt
hiraNyAkSho nAma kShitimiha jale majjayadasau || 8||
mahIM magnAM dR^iShTvA tadanu manunA sevitapadAt
vidhernAsArandhrAtsamabhavadaho sUkarashishuH |
tato daityaM hatvA paramamahitaH pIvaratanuH
bhavAn ninye bhUmiM sakalavinuta prAktanadashAm || 9||
vadhena svabhrAtuH paramakupito dAnavavaro
hiraNyaprArambhaH kashipuriha mohAkulamatiH |
vijetuM tvAM so.ayaM nikhilajagadAdhAravapuShaM
pratij~nAM chAkArShIddanusutasabhAmadhyanilayaH || 10||
\medskip\hrule\medskip
 || ShaShThaM dashakam ||
putro.asya vai samajanIha tavA~NghribhaktaH
prahlAda ityabhimataH khalu sajjanAnAm |
taM tatpitA paramaduShTamatirnyarautsIt
tvatsevinaM kimiha duShkaramIsha pApaiH || 1||
bhUyo.api so.atha jagadIshvara! garbhavAse
shrInAradena muninoktabhavatprabhAvaH |
shushrAva no janakavAkyamasau tadAnIM
tatpreritairgurujanairapi shikShitashcha || 2||
dR^iShTvA pitA.asya nijaputramatiM tvakampAM
tvatpAdapadmayugaLAdatiruShTachetAH |
shUlaishcha diggajagaNairapi dantashUkaiH
enaM nihantumiha yatnashataM chakAra || 3||
so.ayaM dR^iDhaM tava kR^ipAkavachAvR^itA~NgaH
no ki~nchidApa kila deharujAmananta ! |
\ldq{}kaste balaM khala! vade\rdq{}tyatha deva ! pR^iShTo
\ldq{}lokatrayasya tu balaM hari\rdq{}rityavAdIt || 4||
stambhe vighaTTayati kutra haristaveti
rUpaM tataH samabhavattava ghoraghoram |
no vA mR^igAtma na narAtma cha siMhanAda\-
santrAsitAkhilajagannikarAntarALam || 5||
tUrNaM pragR^ihya danujaM praNipAtya chorau
vakSho vidArya nakharaiH rudhiraM nipIya |
pAdAmbujaikaniratasya tu bAlakasya
kAyAdhavasya shirasi svakaraM nyadhAstvam || 6||
evaM svabhaktajanakAmitadAnalola !
nirlepa! nirguNa! nirIha! samastamUla ! |
mAM pAhi tAvaka padAbjaniviShTachittaM
shrIpadmanAbha! parapUraSha! te namaste || 7||
dR^iShTo bhavAnaditijo vaTurUpadhArI
daityAdhipena balinA nija yaj~nagehe |
pR^iShTashcha tena \ldq{}kimu vA~nChasi bAlake\rdq{}ti
pAdatrayI pramitabhUmitalaM yayAche || 8||
yugmena deva! charaNasya tu sarvaloke
pUrNe tR^itIyacharaNaM tvavashaH pradAtum |
baddhashcha dehi mama mUrdhni tR^itIyapAdaM
ityabravIdgatamado.anugR^ihIta eShaH || 9||
jAto.asi deva! jamadagnisuto mahAtmA
tvaM reNukAjaThara Ishvara! bhArgavAkhyaH |
shambhuprasAda! sugR^ihItavarAstrajAlaH
kR^ittAkhilArinikarorukuThArapANiH || 10||
\medskip\hrule\medskip
 || saptamaM dashakam ||
yA~nchAbhistvaM khalu diviShadAM rAvaNopadrutAnAM
putrIyeShTyA phalavilasitaM mAnave deva! vaMshe |
jAto rAmo dasharathanR^ipAllakShmaNenAnujena
bhrAtrA yukto varada! bharatenAtha shatrughnanAmnA || 1||
dhR^itvA chApaM sahajasahitaH pAlayan kaushikIyaM
yaj~naM mArIchamukhasumahArAkShasebhyaH paraM tvam |
kR^itvA.ahalyAM charaNarajasA gautamasyesha! patnIM
bhitvA shaivaM dhanuratha tadA labdhavAMshchApi sItAm || 2||
madhyemArgAgata bhR^igupatiM deva! jitvA.atiruShTaM
bhUyo gatvA parama! nagarIM svAmayodhyAM vasaMstvam |
kaikeyIvAgbhramitamanaso hanta tAtasya vAchA
tyaktvA rAjyaM vipinamagamo duHkhitAsheShalokaH || 3||
gatvA.araNyaM saha dayitayA chAtha saumitriNA tvaM
ga~NgAM tIrtvA susukhamavasachchitrakUTAkhyashaile |
tatra shrutvA bharatavachanAttAtamR^ityuM viShaNNaH
tasmai prAdA varada! dharaNiM pAdukAM chAtmanastvam || 4||
bhUyo hatvA nishicharavarAn drAgvirAdhAdikAMstvaM
kumbhodbhUtena khalu muninA dattadivyAstrajAlaH |
bhrAtR^ichChinnashravaNavinadachChUrpaNakhyA vachobhiH
tvAyAtAMstAn kharamukhamahArAkShasAn prAvadhIshcha || 5||
mArIchaM taM kanakahariNaChadmanAyAtamArAt
jAyAvAkyAdalamanugataH prAvadhIH sAyakena |
tAvadbhUman! kapaTayativeSho.atha la~NkAdhinAthaH
sItAdevImaharata tadA duHkhitAtmA.abhavastvam || 6||
dR^iShTvA la~NkeshvaravinihataM tAtamitraM jaTAyuM
tasyA.atha tvaM varada kR^itavAn pretakAryaM viShaNNaH |
dR^iShTastatrA.anupama! bhavatA mArutirbhaktavaryaH
bhUyastuShTaH sarasamakaroH sAdhu sugrIvasakhyam || 7||
ChitvA sAlAn sarasamiShuNA saptasa~NkhyAn kShaNena
vyAjena tvaM bata nihatavAn bAlinaM shakrasUnum |
bhUyo.anveShTuM janakatanayAM dikShu sampreShya kIshAn
sugrIvoktAn pavanajakare dattavAMshchA~NgulIyam || 8||
dR^iShTvA sItAM nishicharagR^ihe tAvakaM deva! vR^ittaM
kR^itsnaM tUktvApyavidita bhavate mArutirmauliratnam |
tuShTastAvatkila jalanidhau bANavitrAsite tvaM
setuM baddhvA nishicharapuraM yAtavAn padmanAbha! || 9||
hatvA yuddhe kila dashamukhaM deva! sAmAtyabandhuM
sItAM gR^ihNan parihR^itamalAM puShpake rAjamAnaH |
prApyAyodhyAM harivaraniShAdendrayukto.abhiShiktaH
trAtAsheSho rahitadayitashchAgamo.ante svadhiShNyam || 10||
\medskip\hrule\medskip
 || aShTamaM dashakam ||
deva! duShTajanaughabhareNa
vyAkulA.atha vasudhAmbujayonim |
prApya devanikaraiH shritapAdaM
svIyatApamiha samyaguvAcha || 1||
padmabhUratha nishamya cha tApaM
chintayan sapadi deva! bhavantam |
yuShmadIya sakalAdhiharaH shrI
padmanAbha iti tAnavadatsaH || 2||
bhUya etya tava mandiramete
hInapuNyanikarairanavApyam |
tuShTuvuH savibudho druhiNastvAM
tApamAshvakathayadvasudhAyAH || 3||
\ldq{}saMbhavAmi tarasA yaduvaMshe
yAdavAH kila bhavantviha devAH\rdq{} |
evamIsha! kathite tava vAkye
vedhasA kila surA mudamApan || 4||
rohiNIjaTharataH kila jAtaH
preraNAttava paraM tvahirAjaH |
tvaM cha vishvagatakalmaShahArI
devakIjaTharamAshu niviShTaH || 5||
ardharAtrasamaye tu bhavantaM
devakI prasuShuve.adhikadhanyA |
sha~NkhachakrakamalorugadAbhii \-
rAjitAtiruchibAhuchatuShkam || 6||
tAvadIsha! sakalo bata loko
tuShTimApa tamR^ite kila kaMsam |
aShTamaH kila suto.atha bhaginyA\-
stadvadhaM kalayatIti cha vAkyAt || 7||
bAShpapUrNanayano vasudavo
nItavAn vrajapade.atha bhavantam |
tatra nandasadane kila jAtA \-
mambikAmanayadAtmaniketam || 8||
kaMsa etya kila sUtigR^ihe te
kanyakAM tu shayitAM sa nishAmya |
nUnamevamajitasya tu mAyA
seyamityayamatuShTimayAsIt || 9||
tUrNameSha nidhane niratAMste
pUtanAshakaTadhenukamukhyAn |
prAhiNodajita! mandamatistAn
duShkaraM kimiha vismR^itapApaiH || 10||
\medskip\hrule\medskip
 || navamaM dashakam ||
evaM ghoShe virAjatyayi! bhavati jagannetrapIyUShamUrtau
duShTA kAchinnishAcharyatha samadhigatA chAruyoShitsvarUpA |
stanyaM dAtuM kuchAgraM tavamukhajalaje deva! chikShepa yAvat
tAvatkShIraM sajIvaM kapaTashishuraho pItavAMstvaM kShaNena || 1||
bhUyaH shaure! vraje vai shakaTadanusuta.h prAptavAn saMhR^ito.ayaM
vAtAtmA dAnavashcha pravitata dharaNIbhAranAshena kR^ittaH |
dR^iShTvaivaM te mahatvaM danujahR^itichaNaM tAdR^ishIM bAlalIlAM
tvanmAyAmohitatvAdayi! bata! pashupA vismayaM modamApan || 2||
nandaH pashyan kadAchinnijanilayagataM yAdavAchAryavaryaM
gargaM te kArayAmAsa cha vidhivadasau nAma kR^iShNeti tena |
rAmAkhyAM sodare te muniratha kalayan vaibhavaM cha tvadIyaM
nandAdibhyaH prashaMsan nijapadamiha samprAptavAn bhaktavaryaH || 3||
dR^iShTaM mAtrA samastaM jagadiha vadane mR^ittikAbhakShaNaM te
vyAkurvantyA shishUnAmatha vachanavashAtkiM tvito hanta chitram |
bhUyastUrNaM bhavAn ma~NgaLaguNa! gatavAndeva! vR^indAvanaM tat
yuShmadgAtrorushobhA pratulita yamunAtIrasaMsthaM manoj~nam || 4||
vanyAshaM tvayyadhIshe kalayati tarasA shrIdharAho viri~ncho
gopAn vatsAn tvadIyAnaharadayi! vibho! tAvadeva svarUpam |
sa~NkhyAhInaM paraM tvAmapi kabaLadharaM vIkShya sambhrAntachetAH
tvatpAdAbje patitvA muhurapi bhagavannastavIdachyutaM tvAm || 5||
sarpaM toye nimagnaM paramasukuTilaM kALiyaM vIkShya shaure!
nR^ityan nR^ityan phaNe tvaM tadanu gatamadaM chAkarostaM gataM cha |
bhUyastvadveNugAnAdajita! jagadalaM mohitaM sarvamAsIt
yoShichchittApahAre nipuNamidamiti shrIsha! kiM varNanIyam || 6||
dhR^itvA govardhanaM tvaM girimalamatanorvAsavaM vItagarvaM
yoShidbhistvaM salIlaM rajaniShu kR^itavAn rAsakeLiM manoj~nAm |
bhaktAgryaM gAndineyaM tava khalu nikaTe preShayAmAsa kaMsaH
hatvebhendraM cha mallAn yaduvara! sabalo mAtulaM chAvadhIstvam || 7||
gatvA sAndIpaniM tvaM katipayadivasaiH j~nAtavAn sarvavidyAH
kR^itvA rAjye narendraM vimalatamaguNaM chograsenaM javena |
rAjAnaM dharmasUnuM charaNaratamavan chaidyamukhyAdihantA
rugmiNyAdyaShTayoShAyutabahuvanitAshchAramo dvArakAyAm || 8||
vipraM nissvaM kuchelaM sadanamupagataM bAlyakAlaikamitraM
pashyan kAruNyalolaH pR^ithukamiha karAttasya sa~NgR^ihya tUrNam |
lakShmIsaMvArito.api svayamaparimitaM vittamasmai dadAnaH
kAruNyAmbhonidhistvaM jaya jaya bhagavan! sarvalokAdhinAtha! || 9||
yAvadvR^iddhiH kalervai bhavati bata tadA kalkirUpo.atihInAn
mlechChAn dharmaikashatrUn bharitapururuShA nAshayiShyatyashAntAn |
sa tvaM satvaikatAnAM mama matimanishaM dehi shaure! tadarthaM
tvatpAdAbje patitvA muhurahamavashaH prArthaye padmanAbha! || 10||
\medskip\hrule\medskip
 || dashamaM dashakam ||
bhUShaNeShu kila hemavajjagati mR^ittikAvadathavA ghaTe
tantujAlavadaho paTeShvapi rAjitAdvayarasAtmakam |
sarvasatvahR^idayaikasAkShiNamihAtimAya nijavaibhavaM
bhAvayAmi hR^idaye bhavantamiha padmanAbha! paripAhi mAm || 1||
chinmayAmbunidhivIchirUpa! sanakAdichintyavimalAkR^ite !
jAtikarmaguNabhedahIna! sakalAdimUla! jagatAM guro ! |
brahmasha~NkaramukhairameyavipulAnubhAva! karuNAnidhe!
bhAvayAmi hR^idaye bhavantamiha padmanAbha! paripAhi mAm || 2||
mAyayAvR^itatanurbahiH sR^ijasi lokajAlamakhilaM bhavAn
svapnasannibhamidaM punassapadi saMharannijabalAdaho! |
hanta! kUrma iva pAdamAtmani tu dhArayatyatha yadA tadA
dAruNe tamasi vistR^ite vitimiro lasatyanishamAtmanA || 3||
devadeva! tanuvA~Nmanobhiriha yatkaromi satataM hare!
tvayyasAvahamarpayAmyakhilametadIsha! parituShyatAm |
tvatpadaikamatirantyajo.api khalu lokamIshvara! punAtyaho!
no ramesha! vimukhAshayo bhavati viprajAtirapi kevalam || 4||
pApa eSha kila gUhituM nija dushcharitramiha sarvadA
kR^iShNa! rAma! madhusUdanetyanishamAlapatyahaha! niShphalam |
evamIsha! tava sevako bhavati ninditaH khalajanaiH kalau
tAdR^ishaM tvanagha! mA kR^ithA varada! mAmasImatamavaibhava! || 5||
kastu loka iha nirbhayo bhavati tAvakaM kila vinA padaM
satyalokavasati sthito.api bata na sthiro vasati padmabhUH |
evamIsha sati kA kathA parama! pApinAM tu nirayAtmanAM
tanmadIya bhavabandhamohamayi! khaNDayA.anagha! namo.astu te || 6||
bhAvayanti hi pare bhavantamayi! chAru baddhavimalAsanAH
nAsikAgradhR^italochanA parama! pUrakAdijitamArutAH |
udgatAgramatha chittapadmamayi! bhAvayanta iha sAdaraM
bhAnusomashikhimaNDalopari tu nIlanIradasamaprabham || 7||
shlakShNanIlakuTilALakaM makarakuNDaladyutivirAjitaM
mandahAsahR^itasarvalokavipulAtibhAramatimohanam |
kaustubhena vanamAlayApi cha virAjitaM madanasundaraM
kA~nchanAbhavasanaM bhavantamayi! bhAvayanti hR^itakalmaShAH || 8||
j~nAnamIsha! bata! karma bhaktirapi tattrayaM bhavadavApakaM
j~nAnayogaviShaye.adhikAra iha vai viraktajanatAhitaH |
karmaNIha tu bhavennR^iNAmadhikasaktamAnasajuShAM hare!
ye tu nAdhikaviraktasaktahR^idayA hi bhaktirayi! taddhitA || 9||
deva! vaibhavamajAnatAdya tava yanmayA nigaditaM hare!
kShamyatAM khalu samastametadiha modamIsha! kuru tAvake |
dIrghamAyurayi! dehasaukhyamapi vardhatAM bhavadanugrahAt
pa~NkajAbhanayanApado dalaya padmanAbha! vijayI bhava! || 10||

|| iti mahArAjA svAti tirunAL virachitaM padmanAbhashatakam ||

##
Encoded and proofread by P. P. Narayanaswami swami at mun.ca
PSA Easwaran

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}