श्रीपार्थसारथि सुप्रभातम्
कौसल्या-सुप्रजा राम पूर्वा सन्ध्या प्रवर्तते
उत्तिष्ठ नरशार्दूल कर्तव्यं दैवमाह्निकम् ॥
उत्तिष्ठोत्तिष्ठ गोविन्द उत्तिष्ठ गरुडध्वज ।
उत्तिष्ठ कमलाकान्त त्रैलोक्यं मङ्गलं कुरु ॥
वन्दे वृन्दावनान्ते मणिगणविलसत्सौधहर्म्ये गृहाढ्ये
सम्राजत्कैरविण्यास्तटभुवि घृणिमद्गोपुरे सालरम्ये ।
आनन्दाख्ये विमाने मुनिगणविनुतं पार्थसूतं च रामं
रङ्गेशं श्रीनृसिंहं गजवरवरदं श्रीक्षितिभ्यां समेतम् ॥ १॥
मातः श्रीर्जगतामशेषजगतां नाथस्य भर्त्तुः प्रिये
तद्वक्षस्थलनित्यवासिनि सदा श्रीवेदवल्याह्वये ।
वृन्दारण्यनिवासियोगिसदने सम्भूय वारान्निधे-
र्मन्नाथामरभूरुहेण सहिते नैशं प्रभातं शुभम् ॥ २॥
श्रीमद्वेदलतां श्रितामृतलतां वृन्दावने संस्थितां
सम्यग्दृष्टपरावरेण मुनिना संवर्धितां तद्धिताम् ।
लब्ध्वा तां समुपेत्य दुग्धजलधेस्तद्दत्तनामा वसन्
मन्नाथाश्रितकल्पभूरुहविभो ते सुप्रभातं हरे ॥ ३॥
समस्तकल्याणगुणैकधाम्नः स्वशक्तिलेशोद्धृतभूतलस्य ।
प्रह्लादभक्तेः परिवर्धकस्य मन्नाथनाम्नस्तव सुप्रभातम् ॥ ४॥
श्रीमत्कैरविणीसरोवरतटे नित्यं तपः कुर्वते
सम्यग्ज्ञानवतां वराय भृगवे दत्वा त्वभीष्टं वरम् ।
लब्ध्वा तस्य सुतां जगत्त्रयमुदे तस्मै प्रसन्नस्य ते
मन्नाथाद्य हि सुप्रभातमखिलांस्त्रातुं प्रसीद प्रभो ॥ ५॥
श्रीमन् धरापरविमोचनदीक्षितं त्वां
सम्बोधयन्ति विधिशङ्करशक्रमुख्याः ।
स्वामिन् जगत्त्रयविभो यदुवंशनाथ
श्रीपार्थसूत भगवंस्तव सुप्रभातम् ॥ ६॥
भास्वान् विकासयति पङ्कजकुड्मलानि
पद्माकरेषु परिकूजितसारेसेषु ।
कूजन्ति पञ्जरशुकाः सह सारिकाभिः
श्रीपार्थसूत भगवंस्तव सुप्रभातम् ॥ ७॥
वीणां प्रगृह्य मुनिवाहनयोगिवर्यो
गानं करोति सह तुम्बुरुनारदाद्यैः । var तुम्बुरुनारदाद्याः
सङ्गीतवाद्यनिपुणास्तव सुप्रभात-
गाथाः पठन्ति यदुनन्दन सुप्रभातम् ॥ ८॥
ब्रह्मादयस्सुरपतिप्रमुखा दिगीशाः
स्वस्वाधिकारनियतास्तव सैन्यनाथाः ।
संप्रार्थयन्ति तव सद्मपुरोविभागे
श्रीपार्थसूत भगवंस्तव सुप्रभातम् ॥ ९॥
गोपाङ्गनास्तव हि मङ्गलगीतकानि
गायन्ति कामशरपीडितगात्रयष्ट्यः ।
गोपालबालककुलानि विसृज्य वत्सान्
त्वां प्रार्थयन्ति यदुशेखर सुप्रभातम् ॥ १०॥
स्नेहप्रतिस्नुतपयोधरपारयुक्ताः
गावः स्ववत्ससहिताः परितोषयुक्ताः ।
वत्सान् विसृज्य च पयः परिदोहयन्ति
गोपालकास्तव यदूद्वह सुप्रभातम् ॥ ११॥
वृन्दावने विहरतां पशुपालकानां
रक्षार्थमात्तवरवेत्र सुशङ्खपाणे ।
भ्रात्रा समेत सुमनोहर भूषणार्ह
प्रोत्तिष्ठ पार्थरथपालक सुप्रभातम् ॥ १२॥
वृन्दावनान्तरमनोज्ञवनान्तरेषु
नानातरुप्रवरशोभिजलाशयेषु ।
कूजद्विहङ्गमगणेषु मधुव्रतानि
गायन्ति पार्थरथनायक सुप्रभातम् ॥ १३॥
मन्दारकुन्दवरकैतकमाधवीनां
आमोदनिर्भरवनान्तरनिस्सृतोऽसौ ।
मन्दानिलः प्रसरति प्रवरः प्रभाते
श्रीपार्थसूत भगवंस्तव सुप्रभातम् ॥ १४॥
सम्फुल्लकैरवसरोवरनीरसंस्थाः
हंसास्सचक्रमिथुनास्सह सारसैश्च ।
तीरे तु देशिकगणैस्सह संविवादान्
तन्वन्ति पार्थरथनायक सुप्रभातम् ॥ १५॥
तद्देशिकाः सकलशास्त्रविदां वरिष्ठाः
त्वत्प्रोक्तदिव्यचरमार्थनिविष्टभावाः ।
कासारयोगिमुखदेशिकसूक्तिनिष्ठाः
तिष्ठन्ति किङ्करकृतौ तव सुप्रभातम् ॥ १६॥
श्रीभट्टनाथकृतिभिस्तव मङ्गलानि
शंसन्ति देशिकवरास्त्वमितप्रभावाः ।
गोदासुसूक्तिभिरपि प्रविबोधयन्ति
श्रीपार्थसूत भगवंस्तव सुप्रभातम् ॥ १७॥
सूर्योदये ग्रहगणास्त्वितरे सुरेन्द्राः
आज्ञां तवैव निजवैभवसंप्रयुक्ताः ।
संप्रार्थ्य तोषितुमिहाद्य जगत्पतिं त्वां
तिष्ठन्ति पार्थरथनायक सुप्रभातम् ॥ १८॥
नित्यार्चनां रचयितुं विविधोपहारान्
वस्तूनि वस्त्रवरदिव्यविभूषणानि ।
सङ्गृह्य वैदिकशिखामणयः प्रभाते
तिष्ठन्ति पार्थरथभूषण सुप्रभातम् ॥ १९॥
काश्मीरकेसरयुतं हरिचन्दनञ्च
कस्तूरिकां च घनसारवरं गृहीत्वा ।
द्वारि स्थितास्तव हि दासगणास्समस्ताः
श्रीपार्थसूत भगवंस्तव सुप्रभातम् ॥ २०॥
सम्फुल्लपङ्कजनवोत्पलकैरवाणि
सच्चम्पकैर्मरुवकैः कृतमालिकानि ।
सङ्गृह्य तावकसमर्चनमादरेण
तिष्ठन्ति कर्तुमनघास्तव सुप्रभातम् ॥ २१॥
भाग्याधिकास्तव पदाब्जनिविष्टभावाः
पीताम्बराण्यपरिमेयविभूषणानि ।
रत्नानि काञ्चनयुतानि समर्पयन्ति
श्रीपार्थसूत भगवंस्तव सुप्रभातम् ॥ २२॥
प्रातःप्रयुक्तनवनीतपयःफलानि
मुद्गान्नलड्डुकमनोहरमिश्रितानि ।
सोपायनानि च समर्पयितुं यतन्ते
श्रीवैष्णवास्तव यदूद्वह सुप्रभातम् २३॥
भेरीमृदङ्गपटहानकगोमुखादि-
वाद्यानि घोषयति दासगणस्तवाग्रे ।
तिष्ठन्ति नर्तनपरा गणिकास्समस्ताः
श्रीपार्थसूत भगवंस्तव सुप्रभातम् २४॥
हस्तीन्द्रमूर्ध्नि धृतकाञ्चनकुम्भतीर्थं
छत्रावृतं विधृतचामरयुग्ममारात् ।
श्रीमन् प्रभो तव हि मङ्गलमज्जनाय
श्रीपार्थसूत भगवंस्तव सुप्रभातम् ॥ २५॥
एकान्तिनश्च विमलाशययोगिवर्याः
अध्यापकास्तव पदाब्जनिविष्टभावाः ।
तिष्ठन्ति सन्निधिमुपेत्य भवत्पदाब्जे
सेवार्थमर्जुनसखे तव सुप्रभातम् ॥ २६॥
त्वत्सेवनाय सकलद्रविडागमानां
वक्ता पराङ्कुशमुनिस्स्वपदप्रपन्नैः ।
रामानुजोऽपि कृतनित्यसमस्तकृत्यः
त्वद्द्वारि तिष्ठति विभो तव सुप्रभातम् ॥ २७॥
उत्तिष्ठ लक्ष्मणगुरो सह सीतयाऽद्य
धर्मं विवर्धय विभो जय पालयास्मान् ।
दासान् कुरुष्व सहसा तव किङ्करांश्च
ते सुप्रभातमधुना रघुवंशनाथ ॥ २८॥
श्रीमन् गजेन्द्रवरदाश्रितपारिजात
श्रीवैनतेयभुजमूलविभूषणाढ्य ।
इन्द्रादिदेवगणपूजितपादपद्म
श्रीमन् वरप्रद सुरेश्वर सुप्रभातम् ॥ २९॥
श्रीमन् नृसिंह जगतां जनिहेतुभूत
सम्पालनान्तकरणादिषु जागरूक ।
अन्तःप्रविश्य च नियन्तृतया भवास्मान्
श्रीमन् नृसिंह भगवंस्तव सुप्रभातम् ॥ ३०॥
श्रीमन् नृसिंह तव मङ्गलमस्तु नित्यं
सूर्येन्दुतारकसमानमहःप्ररोहैः ।
नैशं तमःप्रसरमान्तरमप्यपास्तं
स्वामिन् नृसिंह भगवंस्तव सुप्रभातम् ॥ ३१॥
काव्योऽपि पूर्वदिशि संस्थितपर्वतस्थो
वाचां पतिर्हिमकरोऽस्तमितो बभूव ।
पक्षी निनादमपि पञ्जरगः करोति
श्रीमन् नृसिंह भगवंस्तव सुप्रभातम् ॥ ३२॥
श्रीपार्थसारथि रघूत्तम वेदवल्ली-
मन्नाथ सौम्यनरसिंहवरप्रदानाम् ।
ये सुप्रभातमनिशं प्रपठन्ति तेषां
ब्रह्मेश्वराद्यसुलभं सुलभं पदं स्यात् ॥ ३३॥
इति श्रीपार्थसारथि सुप्रभातम् ।
Proofread by PSA Easwaran