श्रीलक्ष्मीनृसिंहप्रपत्तिः
श्री श्रीनिवासाह्वययोगिवर्यं नारायणं योगिवरं तथैव ।
श्रीयोगिवर्यं रघुवीरवेदकोटीरसंज्ञं गुरुमाश्रयामि ॥ १॥
अहोबिले गारुडशैलमध्ये कृपावशात्कल्पितसन्निधानम् ।
लक्ष्म्या समालिङ्गितवामभागं लक्ष्मीनृसिंहं शरणं प्रपद्ये ॥ २॥
श्रीवण्शठारातियतीन्द्रमाद्यं प्रेम्णा स्वयम्प्रेषमनुप्रदाय । (श्रीमच्छठाराति)
स्वाराधने प्रेरयति स्म यस्तं लक्ष्मीनृसिंहं शरणं प्रपद्ये ॥ ३॥
सर्वस्य लोकस्य समीहितानां प्रदानदीक्षावशतः सदैव ।
श्रिया समेतं श्रितदोषहन्त्र्या लक्ष्मीनृसिंहं शरणं प्रपद्ये ॥ ४॥
यस्याभवद्भक्तजनार्तिहन्तुः पितृत्वमन्वेष्वविचार्य तूर्णम् ।
स्तम्भेऽवतारस्तमनन्यलभ्यं लक्ष्मीनृसिंहं शरणं प्रपद्ये ॥ ५॥
यमीक्षितुं देवगणोऽतिरुष्टं शत्रौ न शक्नोति चतुर्मुखादिः ।
प्रसादितो भक्तजनेन यस्तं लक्ष्मीनृसिंहं शरणं प्रपद्ये ॥ ६॥
वामत्वमद्य त्यज संश्रितेषु नास्तीह कश्चित्किल नापराधी ।
लक्ष्म्येति वामाङ्कगयोच्यमानं लक्ष्मीनृसिंहं शरणं प्रपद्ये ॥ ७॥
श्रीवीरवद्राघववेदमौलिं योगीन्द्रक्लृप्तैश्शुभतापपुण्ड्रैः ।
नामादिभिर्मां युतमातनोद्यस्तं श्रीनृसिंहं शरणं प्रपद्ये ॥ ८॥
श्रीमद्रहस्यत्रयसारपाठप्रारम्भकाले तव सर्वसिद्धिः ।
स्यादित्युपश्रुत्यभिधायकं मे लक्ष्मीनृसिंहं शरणं प्रपद्ये ॥ ९॥
भास्यप्रदानावसरे तु वीररघूद्वहाम्नायशिखार्यरूपी ।
स्वप्नागतो भाष्यमदत्त यो मे लक्ष्मीनृसिंहं शरणं प्रपद्ये ॥ १०॥
यः श्रीनिवासाख्यमुनीन्द्रतो मां सम्प्राप्तवेदान्तयुगं व्यतानीत् ।
तदर्पितं स्वीकृतमद्भरं तं लक्ष्मीनृसिंहं शरणं प्रपद्ये ॥ ११॥
स्वप्ने रमावासमुनीन्द्ररूपी स्वयं समागत्य ममापि देवः ।
त्रिदण्डकाषायमदान्मुदा यस्तं लक्ष्मीनृसिंहं शरणं प्रपद्ये ॥ १२॥
आराधनं स्वस्य कथं मयेति भीतं सदा पद्मलतामुखेन ।
आश्वास्य मामप्यकरोत्कृतार्थं लक्ष्मीनृसिंहं शरणं प्रपद्ये ॥ १३॥
शठारिनारायणयोगिवर्यपराङ्कुशस्वामि पराङ्कुशाद्यैः ।
यः पूजितः श्रीनिधियोगिमुख्यैर्लक्ष्मीनृसिंहं शरणं प्रपद्ये ॥ १४॥
नारायणश्रीरघुवीरवेदकोटीरनारायणरमानिवासैः ।
योगीश्वरैरन्वहमर्चितो यस्तं लक्ष्मीनृसिंहं शरणं प्रपद्ये ॥ १५॥
त्वद्दत्तवाचा तव किङ्करेण त्वत्प्रीतिकामेन मया कृतेन ।
स्तोत्रेण लक्ष्मीनृहरेः स विष्णुः प्रीतो भव त्वं करुणार्द्रदृष्टिः ॥ १६॥
पराङ्कुशाख्येन तपोधनेन लक्ष्मीनृसिंहस्य कृता प्रपत्तिः ।
पापठ्यते येन भवेत्स तस्य पूर्णं कृपापूर्णकटाक्षपात्रम् ॥ १७॥
इति श्रीमद्भिः श्रीवण्शठकोप श्रीवेदान्तदेशिकयतीन्द्र
महादेशिकैरनुगृहिता श्रीलक्ष्मीनृसिंहप्रपत्तिः समाप्ता ॥
Composed by HH 44th paTTam MukkUr SrImad azhagiya singar
Proofread by PSA Easwaran