%@@1
% File name             : giitagovindaM.itx
%--------------------------------------------
% Text title            : jayadevakR^ita gItagovindaM aShTapadI
% Author                : 
% Language              : Sanskrit
% Subject               : philosophy/hinduism/religion
% Description/comments  : 
% Transliterated by     : 
% Proofread by          : 
% Latest update         : 10/1/10
% Send corrections to   : sanskrit@cheerful.com
%
% Special Instructions:
% i1h.hdr,ijag.inc,itrans.sty,multicol.sty,iarticle.sty
% Transliteration scheme: ITRANS 5.2
% Site access  :         
% http://sanskritdocuments.org
% http://sanskrit.gde.to/
%-----------------------------------------------------
% The text is to be used for personal studies and research only.
% Any use for commercial purpose is prohibited as a 'gentleman's'
% agreement.
% @@2
%
% Commands upto engtitle are 
% needed for devanaagarii output and formatting.
%--------------------------------------------------------

\documentstyle[11pt,multicol,itrans]{article}
%\documentclass[11pt]{article}
%\usepackage{multicol}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}

\engtitle{.. jayadevakRita gItagovindaM (aShTapadI)   ..}##
\itxtitle{.. jayadevakR^ita gItagovindaM (aShTapadI) ..}##\endtitles ##
          gItagovindam.h
##Send corrections to P . P .  Narayanaswami at swami at math.mun.ca##
          .. gItagovindam.h ..
          .. shrI  gopAlaka dhyAnam.h ..
yadgopIvadanendumaNDanamabhUtkastUrikApatrakaM
yallakShmIkuchashAtakuMbha kalashe vyAgochamindIvaram.h .
yannirvANavidhAnasAdhanavidhau siddhA~njanaM yoginAM
tannashyAmaLamAvirastu hR^idaye kR^iShNAbhidhAnaM mahaH .. 1..
          .. shrI jayadeva dhyAnam.h ..
rAdhAmanoramaramAvararAsalIla\-
gAnAmR^itaikabhaNitaM kavirAjarAjam.h .
shrImAdhavArchchanavidhavanurAgasadma\-
padmAvatIpriyatamaM praNatosmi nityam.h .. 2..
shrIgopalavilAsinI valayasadratnAdimugdhAkR^iti
shrIrAdhApatipAdapadmabhajanAnandAbdhimagno.anisham.h ..
loke satkavirAjarAja iti yaH khyAto dayAmbhonidhiH
taM vande jayadevasadgurumahaM padmAvatIvallabham.h .. 3..
           .. prathamaH sargaH ..
          .. sAmodadAmodaraH ..
meghairmeduramambaraM vanabhuvaH shyAmAstamAladrumai\-
rnaktaM bhIrurayaM tvameva tadimaM rAdhe gR^ihaM prApaya .
itthaM nandanideshitashchalitayoH pratyadhvaku~njadrumaM
rAdhAmAdhavayorjayanti yamunAkUle rahaHkelayaH .. 1..
vAgdevatAcharitachitritachittasadmA
padmAvatIcharaNachAraNachakravartI .
shrIvAsudevaratikelikathAsametaM
etaM karoti jayadevakaviH prabandham.h .. 2..
vAchaH pallavayatyumApatidharaH sandarbhashuddhiM girAM
jAnIte jayadeva eva sharaNaH shlAghyo durUhadrute .
shR^iN^gArottarasatprameyarachanairAchAryagovardhana\-
spardhI ko.api na vishrutaH shrutidharo dhoyI kavikShmApatiH
.. 3..
yadi harismaraNe sarasaM mano
yadi vilAsakalAsu kutUhalam.h .
madhurakomalakAntapadAvalIM
shR^iNu tadA jayadevasarasvatIm.h .. 4..
          .. gItam.h 1 ..
pralayapayodhijale dhR^itavAnasi vedam.h .
vihitavahitracharitramakhedam.h ..
keshava dhR^itamInasharIra jaya jagadIsha hare .. 1..
kShitirativipulatare tava tiShThati pR^iShThe .
dharaNidharaNakiNachakragariShThe ..
keshava dhR^itakachChaparUpa jaya jagadIsha hare .. 2..
vasati dashanashikhare dharaNI tava lagnA .
shashini kalaN^kakaleva nimagnA ..
keshava dhR^itasUkararUpa jaya jagadIsha hare .. 3..
tava karakamalavare nakhamadbhutashR^iN^gam.h .
dalitahiraNyakashiputanubhR^iN^gam.h ..
keshava dhR^itanaraharirUpa jaya jagadIsha hare .. 4..
Chalayasi vikramaNe balimadbhutavAmana .
padanakhanIrajanitajanapAvana ..
keshava dhR^itavAmanarUpa jaya jagadIsha hare .. 5..
kShatriyarudhiramaye jagadapagatapApam.h .
snapayasi payasi shamitabhavatApam.h ..
keshava dhR^itabhR^ighupatirUpa jaya jagadIsha hare .. 6..
vitarasi dikShu raNe dikpatikamanIyam.h .
dashamukhamaulibaliM ramaNIyaM ..
keshava dhR^itarAmasharIra jaya jagadIsha hare .. 7..
vahasi vapuShi vishade vasanaM jaladAbham.h .
halahatibhItimilitayamunAbham.h ..
keshava dhR^itahaladhararUpa jaya jagadIsha hare .. 8..
nindati yaGYavidherahaha shrutijAtam.h .
sadayahR^idayadarshitapashughAtam.h ..
keshava dhR^itabuddhasharIra jaya jagadIsha hare .. 9..
mlechChanivahanidhane kalayasi karavAlam.h .
dhUmaketumiva kimapi karAlam.h ..
keshava dhR^itakalkisharIra jaya jagadIsha hare .. 10..
shrIjayadevakaveridamuditamudAram.h .
shR^iNu sukhadaM shubhadaM bhavasAram.h ..
keshava dhR^itadashavidharUpa jaya jagadIsha hare .. 11..
vedAnuddharate jagannivahate bhUgolamudbibhrate
daityaM dArayate baliM Chalayate kShatrakShayaM kurvate .
paulastyaM jayate halaM kalayate kAruNyamAtanvate
mlechChAnmUrchChayate dashAkR^itikR^ite kR^iShNAya tubhyaM namaH .. 5..
          .. gItam.h 2 ..
shritakamalAkuchamaNDala dhR^itakuNDala e .
kalitalalitavanamAla jaya jayadeva hare .. 1..
dinamaNImaNdalamaNDana bhavakhaNDana e .
munijanamAnasaha.nsa jaya jayadeva hare .. 2..
kAliyaviShadharaga~njana janara~njana e .
yadukulanalinadinesha jaya jayadeva hare .. 3..
madhumuranarakavinAshana garuDAsana e .
 surakulakelinidAna jaya jayadeva hare .. 4..
amalakamaladalalochana bhavamochan e .
tribhuvanabhavananidhAna jaya jayadeva hare .. 5..
janakasutAkR^itabhUShaNa jitadUShaNa e .
samarashamitadashakhaNTha jaya jayadeva hare .. 6..
abhinavajaladharasundara dhR^itamandara e .
shrImukhachandrachakora jaya jayadeva hare .. 7..
shrIjayadevakaveridaM kurute mudam.h e .
maN^galamujjvalagItaM jaya jayadeva hare .. 8..
padmApayodharataTIparirambhalagna\-
kAshmIramudritamuro madhusUdanasya .
vyaktAnurAgamiva kheladanaN^gakheda\-
svedAmbupUramanupUrayatu priyaM vaH .. 6..
vasante vAsantIkusumasukumArairavayavai\-
rbhramantIM kAntAre bahuvihitakR^iShNAnusaraNAm.h .
amandaM kandarpajvarajanitachintAkulatayA
valadbAdhAM rAdhAM sarasamidamuche sahacharI .. 7..
          .. gItam.h 3..
lalitalavaN^galatAparishIlanakomalamalayasamIre .
madhukaranikarakarambitakokilakUjitaku~njakuTIre ..
viharati haririha sarasavasante
nR^ityati yuvatijanena samaM sakhi virahijanasya durante .. 1..
unmadamadanamanorathapathikavadhUjanajanitavilApe  .
alikulasa.nkulakusumasamUhanirAkulabakulakalApe   .. 2..
mR^igamadasaurabharabhasavasha.nvadanavadalamAlatamAle .
yuvajanahR^idayavidAraNamanasijanakharuchiki.nshukajAle .. 3..
madanamahIpatikanakadaNDaruchikesharakusumavikAse .
militashilImukhapATalipaTalakR^itasmaratUNavilAse .. 4..
vigalitalajjitajagadavalokanataruNakaruNakR^itahAse  .
virahinikR^intanakuntamukhAkR^itiketakadanturitAshe .. 5..
mAdhavikAparimalalalite navamAlikajAtisugandhau .
munimanasAmapi mohanakAriNi taruNAkAraNabandhau .. 6..
sphuradatimuktalatAparirambhaNamukulitapulakitachUte .
bR^indAvanavipine parisaraparigatayamunAjalapUte .. 7..
shrIjayadevabhaNitamidamudayati haricharaNasmR^itisAram.h .
sarasavasantasamayavanavarNanamanugatamadanavikAram.h .. 8..
daravidalitamallIvallicha~nchatparAga\-
prakaTitapaTavAsairvAsayan.h kAnanAni .
iha hi dahati chetaH ketakIgandhabandhuH
prasaradasamabANaprANavadgandhavAhaH .. 8..
unmIlanmadhugandhalubdhamadhupavyAdhUtachUtAN^kura\-
krIDatkokilakAkalIkalakalairudgIrNakarNajvarAH .
nIyante pathikaiH katha.nkathamapi dhyAnAvadhAnakShaNa\-
prAptaprANasamAsamAgamarasollAsairamI vAsarAH .. 9..
anekanArIparirambhasambhrama\-
sphuranmanohArivilAsalAlasam.h .
murArimArAdupadarshayantyasau
sakhI samakShaM punarAha rAdhikAm.h .. 10..
          .. gItam.h 4..
chandanacharchitanIlakalevarapItavasanavanamAlI .
kelichalanmaNikuNDalamaNDitagaNDayugasmitashAlI ..
haririhamugdhavadhUnikare
vilAsini vilasati kelipare .. 1..
pInapayodharabhArabhareNa hariM pariramya sarAgam.h .
gopavadhUranugAyati kAchiduda~nchitapa~nchamarAgam.h .. 2..
kApi vilAsavilolavilochanakhelanajanitamanojam.h .
dhyAyati mugdhavadhUradhikaM madhusUdanavadanasarojam.h .. 3..
kApi kapolatale militA lapituM kimapi shrutimUle .
chAru chuchumba nitambavatI dayitaM pulakairanukUle .. 4..
kelikalAkutukena cha kAchidamuM yamunAjalakUle .
ma~njulava~njulaku~njagataM vichakarSha kareNa dkUle .. 5..
karatalatAlataralavalayAvalikalitakalasvanava.nshe .
rAsarase sahanR^ityaparA hariNA yuvatiH prashasha.nse .. 6..
shliShyati kAmapi chumbati kAmapi kAmapi ramayati
rAmAm.h .
pashyati sasmitacAruparAmaparAmanugachChati vAmAm.h .. 7..
shrIjayadevakaveridamadbhutakeshavakelirahasyam.h .
vR^indAvanavipine lalitaM vitanotu shubhAni yashasyam.h .. 8..
vishveShAmanura~njane janayannAnandamindIvara\-
shreNIshyAmalakomalairupanayannaN^gairanaN^gotsavam.h .
svachChandaM vrajasundarIbhirabhitaH pratyaN^gamAliN^kitaH
shR^iN^gAraH sakhi mUrtimAniva madahu mugdho hariH krIDati .. 11..
adyotsaN^gavasadbhujaN^gakavalakkeshAdiveshAchalaM
prAleyaplavanechChayAnusarati shrIkhaNDashailAnilaH .
kiM cha snigdharasAlamaulimukulAnyAlokya harShodayA\-
dunmIlanti kuhUH kuhUriti kalottalAH pikAnAM giraH .. 12..
rAsollAsabhareNavibhramabhR^itAmAbhIravAmabhruvA\-
mabhyarNaM pariramyanirbharamuraH premAndhayA rAdhayA .
sAdhu tvadvadanaM sudhAmayamiti vyAhR^itya gItastut\-
vyAjAdudbhaTachumbitasmitamanoharI hariH pAtu vaH .. 13..
.. iti shrIgItagovinde sAmodadAmodaro nAma prathamaH sargaH ..
            .. dvitIyaH sargaH ..
           .. akleshakeshavaH ..
viharati vane rAdhA sAdhAraNapraNaye harau
vigalitanijotkarShAdIrShyAvashena gatAnyataH .
kvachidapi latAku~nje gu~njanmadhuvratamaNDalI\-
mukharashikhare lInA dInApyuvAcha rahaH sakhIm.h .. 14..
           .. gItam.h 5..
sa.ncharadadharasudhAmadhuradhvanimukharitamohanava.nsham.h .
chalitadR^iga~nchalacha~nchalamaulikapolavilolavata.nsam.h ..
rAse harimiha vihitavilAsaM
smarati mano mama kR^itaparihAsam.h .. 1..
chandrakachArumayUrashikhaNDakamaNDalavalayitakesham.h .
prachurapurandaradhanuranura~njitameduramudirasuvesham.h .. 2..
gopakadambanitambavatImukhachumbanalambhitalobham.h .
bandhujIvamadhurAdharapallavamullasitasmitashobham.h .. 3..
vipulapulakabhujapallavavalayitavallavayuvatisahasram.h .
karacharaNorasi maNigaNabhUShaNakiraNavibhinnatamisram.h .. 4..
jaladapaTalavaladinduvinandakachandanatilakalalATam.h .
pInaghanasttanamaNDalamardananirdayahR^idayakapATam.h .. 5..
maNimayamakaramanoharakuNDalamaNDitagaNDamudAram.h .
pItavasanamanugatamunimanujasurAsuravaraparivAram.h .. 6..
vishadakadambatale militaM kalikaluShabhayaM shamayantam.h .
mAmapi kimapi taraN^gadanaN^gadR^ishA manasA ramayantam.h .. 7..
shrIjayadevabhaNitamatisundaramohanamadhuripurUpam.h .
haricharaNasmaraNaM prati saMprati puNyavatAmanurUpam.h .. 8..
gaNayati guNagrAmaM bhAmaM bhramAdapi nehate
vahati cha paritoShaM doShaM vimu~nchati dUrataH .
yuvatiShu valastR^iShNe kR^iShNe vihAriNI mAM vinA
punarapi mano vAmaM kAmaM karoti karomi kim.h .. 15..
           .. gItam.h 6..
nibhR^itaniku~njagR^ihaM gatayA nishi rahasi nilIya vasantam.h .
chakitavilokitasakaladishA ratirabhasarasena hasantam.h ..
sakhi he keshimathanamudAram.h
ramaya mayA saha madanamanorathabhAvitayA savikAram.h .. 1..
prathamasamAgamalajjitayA paTuchATushatairanukUlam.h .
mR^idumadhurasmitabhAShitayA shithilIkR^itajadhanadukUlam.h .. 2.
kisalayashayananiveshitayA chiramurasi mamaiva shayAnam.h .
kR^itaparirambhaNachumbanayA parirabhya kR^itAdharapAnam.h .. 3..
alasanimIlitalochanayA pulakAvalilalitakapolam.h .
shramajalasakalakalevarayA varamadanamadAdatilolam.h .. 4..
kokilakalaravakUjitayA jitamanasijatantravichAram.h .
shlathakusumAkulakuntalayA nakhalikhitaghanastanabhAram.h .. 5..
charaNaraNitamaninUpurayA paripUritasuratavitAnam.h .
mukharavishR^iN^khalamekhalayA sakachagrahachumbanadAnam.h .. 6..
ratisukhasamayarasAlasayA daramukulitanayanasarojam.h .
niHsahanipatitatanulatayA madhusUdanamuditamanojam.h .. 7..
shrIjayadevabhaNitamidamatishayamadhuripunidhuvanashIlam.h .
sukhamutkaNThitagopavadhUkathitaM vitanotu salIlam.h .. 8..
hastasrastavilAsava.nshamanR^ijubhrUvallImadballavI\-
vR^indotsAridR^igantavIkShitamatisvedArdragaNdasthalam.h .
mAmudvIkShya vilakShitaM smitasudhAmugdhAnanaM kAnane
govindaM vrajasundarIgaNavR^itaM pashyAmi hR^iShyAmi cha .. 16..
durAlokastokastabakanavakAshokalatikA\-
vikAsaH kAsAropavanapavano.api vyathayati .
api bhrAmyadbhR^iN^gIraNitaramaNIyA na mukula\-
prasUtishchUtAnAM sakhi shikhariNIyaM sukhayati .. 17..
          .. iti gItagovinde akleshakeshavo nAma dvitIyaH sargaH
..
           .. tR^itIyaH sargaH ..
          .. mugdhamadhusUdanaH ..
ka.nsArirapi sa.nsAravAsanAbandhashR^iN^khalAm.h .
rAdhAmAdhAya hR^idaye tatyAja vrajasundarIH .. 18..
itastatastAmanusR^itya rAdhikA\-
manaN^gabANavraNakhinnamAnasaH .
kR^itAnutApaH s kalindanandinI\-
taTAntaku~nje viShasAda mAdhavaH .. 19..
           .. gItam.h 7..
mAmiyaM chalitA vilokya vR^itaM vadhUnichayena .
sAparAdhatayA mayApi vAritAtibhayena ..
harihari hatAdaratayA gatA sA kupiteva .. 1..
kiM kariShyati kiM vadiShyati sA chiraM viraheNa .
kiM dhanena janena kiM mama jIvanena gR^iheNa .. 2..
chintayAmi tadAnanaM kuTilabhru kopabhareNa .
shoNapadmamivopari bhramatAkulaM bhramareNa .. 3..
tAmahaM hR^idi sa.ngatAmanishaM bhR^ishaM ramayAmi .
kiM vane.anusarAmi tAmiha kiM vR^ithA vilapAmi .. 4..
tanvi khinnamasUyayA hR^idayaM tavAkalayAmi .
tanna vedmi kuto gatAsi na tena te.anunayAmi .. 5..
dR^ishyate purato gatAgatameva me vidadhAsi .
kiM pureva samaMbhramaM parirambhaNaM na dadAsi .. 6..
kShamyatAmaparaM kadApi tavedR^ishaM na karomi .
dehi sundari darshanaM mama manmathena dunomi .. 7..
varNitaM jayadevakena hareridaM pravaNena .
kindubilvasamudrasambhavarohiNIramaNena .. 8..
hR^idi bisalatAhAro nAyaM bhujaN^gamanAyakaH
kuvalayadalashreNI kaNThe na sA garaladyutiH .
malayajarajo nedaM bhasma priyArahite mayi
prahara na harabhrAntyAnaN^ga krudhA kimu dhAvasi .. 20..
pANau mA kuru chUtasAyakamamuM mA chApamAropaya
krIDAnirjitavishva mUrChitajanAghAtena kiM pauruSham.h .
tasyA eva mR^igIdR^isho manasijapreN^khatkaTAkShAshuga\-
shreNIjarjaritaM manAgapi mano nAdyApi sa.ndhukShate .. 21..
bhrUchApe nihitaH kaTAkShavishikho nirmAtu marmavyathAM
shyAmAtmA kuTilaH karotu kabarIbhAro.api mArodyamam.h .
mohaM tAvadayaM cha tanvi tanutAM bimbAdaro rAgavan.h
sad.hvR^ittastanamaNdalastava kathaM prANairmama krIDati .. 22..
tAni sparshasukhAni te cha taralAH snigdha dR^ishorvibhrama\-
stadvaktrAmbujasaurabhaM sa cha sudhAsyantI girAM vakrimA .
sA bimbAdharamAdhurIti viShayAsaN^ge.api chenmAnasaM
tasyA lagnasamAdhi hanta virahavyAdhiH kathaM vardhate .. 23..
bhrUpallavaM dhanurapAN^gataraN^gitani
bANAH guNaH shravaNapAliriti smareNa .
tasyAmanaN^gajayajaN^gamadevatAyAm.h
astrANi nirjitajaganti kimarpitAni .. 24..
          .. iti shrIgitagovinde mugdhamadhusUdano nAma tR^itIyaH
sargaH ..
          . . chaturthaH sargaH ..
           .. snigdhamadhusUdanaH ..
yamunAtIravAnIraniku~nje mandamAsthitam.h .
prAha premabharodbhrAntaM mAdhavaM rAdhikAsakhI .. 25..
          .. gItam.h 8..
nindati chandanamindukiraNamanu vindati khedamadhIram.h .
vyAlanilayamilanena garalamiva kalayati malayasamIram.h ..
sA virahe tava dInA
mAdhava manasijavishikhabhayAdiva bhAvanayA tvayi lInA .. 1..
aviralanipatitamadanasharAdiva bhavadavanAya vishAlam.h .
svahR^idayarmaNI varma karoti sajalanalinIdalajAlam.h .. 2..
kusumavishikhasharatalpamanalpavilAsakalAkamanIyam.h .
vratamiva tava parirambhasukhAya karoti kusumashayanIyam.h .. 3..
vahati cha galitavilochanajalabharamAnanakamalamudAram.h .
vidhumiva vikaTavidhuntudadantadalanagalitAmR^itadhAram.h .. 4..
vilikhati rahasi kuraN^gamadena bhavantamasamasharabhUtam.h .
praNamati makaramadho vinidhAya kare cha sharaM navachUtam.h .. 5..
pratipadamidamapi nigatati mAdhava tava charaNe patitAham.h .
tvayi vimukhe mayi sapadi sudhAnidhirapi tanute tanudAham.h
.. 6..
dhyAnalayena puraH parikalpya bhavantamatIva durApam.h .
vilapati hasati viShIdati roditi cha~nchati mu~nchati tApam.h
.. 7..
shrIjayadevabhaNitamidamadhikaM yadi manasA naTanIyam.h .
harivirahAkulaballavayuvatisakhIvachanaM paThanIyam.h .. 8..
AvAso vipinAyate priyasakhImAlApi jAlAyate
tApo.api shvasitena dAvadahanajvAlAkalApAyate .
sApi tvadviraheNa hanta hariNIrUpAyate hA kathaM
kandarpo.api yamAyate virachaya~nshArdUlavikrIDitam.h .. 26..
          .. gItam.h 9..
stanavinihitamapi hAramudAram.h .
sA manute kR^ishatanuratibhAram.h ..
rAdhikA virahe tava keshava .. 1..
sarasamasR^iNamapi malayajapaN^kam.h .
pashyati viShamiva vapuShi sashaN^kam.h .. 2..
shvasitapavanamanupamapariNAham.h .
madanadahanamiva vahati sadAham.h .. 3..
dishi dishi kirati sajalakaNajAlam.h .
nayananalinamiva vigalitanAlam.h .. 4..
nayanaviShayamapi kisalayatalpam.h .
kalayati vihitahutAshavikalpam.h .. 5..
tyajati na pANitalena kapolam.h .
bAlashashinamiva sAyamalolam.h .. 6..
haririti haririti japati sakAmam.h .
virahavihitamaraNena nikAmam.h .. 7..
shrIjayadevabhaNitamiti gItam.h .
sukhayatu keshavapadamupunItam.h .. 8..
sA romA~nchati sItkaroti vilapatyutkmpate tAmyati
dhyAyatyudbhramati pramIlati patatyudyAti mUrchChatyapi .
etAvatyatanujvare varatanurjIvenna kiM te rasAt.h
svarvaidyapratima prasIdasi yadi tyakto.anyathA nAntakaH .. 27..
smarAturAM daivatavaidyahR^idya
tvadaN^gasaN^gAmR^itamAtrasAdhyAm.h .
vimuktabAdhAM kuruShe na rAdhA\-
mupendra vajrAdapi dAruNo.asi .. 28..
kandarpajvarasa.njvarasturatanorAshcharyamasyAshchiraM
chetashchandanachandramaHkamalinIchintAsu sa.ntAmyati .
ki.ntu klAntivashena shItalatanuM tvAmekameva priyaM
dhyAyantI rahasi sthitA kathamapi kShINA kShaNaM prANiti
.. 29..
kShaNamapi virahaH purA na sehe
nayananimIlanakhinnayA yayA te .
shvasiti kathamasau rasAlashAkhAM
chiraviraheNa vilokya puShpitAgrAm.h .. 30..
          .. iti gItagovinde snigdhamAdhavo nAma
           chaturthaH sargaH ..
           .. pa~nchamaH sargaH ..
           .. sAkA.nkShapuNDarIkAkShaH ..
ahamiha nivasAmi yAhi rAdhAM
anunaya madvachanena chAnayethAH .
iti madhuripuNA sakhI niyuktA
svayamidametya punarjagAda rAdhAm.h .. 31..
           .. gItam.h 10..
vahati malayasamIre madanamupanidhAya .
sphuTati kusumanikare virahihR^idayadalanAya ..
tava virahe vanamAlI sakhi sIdati .. 1..
dahato shishiramayUkhe maraNamanukaroti .
patati madanavishikhe vilapati vikalataro.ati .. 2..
dhvanati madhupasamUhe shravaNamapidadAti .
manasi valitavirahe  nishi nishi rujamupayati .. 3..
vasati vipinavitAne tyajati lalitadhAma .
luThati dharaNishayane bahu vilapati tava nAma .. 4..
bhaNati kavijayadeve virahivilasitena .
manasi rabhasavibhave harirudayatu sukR^itena .. 5..
pUrvaM yatra samaM tvayA ratipaterAsAditaH siddhaya\-
stasminneva niku~njamanmathamahAtIrthe punarmAdhavaH .
dhyAya.nstvAmanishaM japannapi tavaivAlApamAtrAvalIM
bhUyastvatkuchakumbhanirbharaparIrambhAmR^itaM vA~nChati .. 32..
          .. gItam.h 11 ..
ratisukhasAre gatamabhisAre madanamanoharavesham.h .
na kuru nitambini gamanavilambanamanusara taM hR^idayesham.h ..
dhIrasamIre yamunAtIre vasati vane vanamAlI .. 1..
nAma sametaM kR^itasa.nketaM vAdayate mR^iduveNum.h .
bahu manute nanu te tanusa.ngatapavanachalitamapi reNum.h .. 2..
patati patatre vichalati patre shaN^kitabhavadupayAnam.h .
 rachayati shayanaM sachakitanayanaM pashyati tava panthAnam.h .. 3..
mukharamadhIraM tyaja ma~njIraM ripumiva kelisulolam.h .
chala sakhi ku~njaM satimirapu~njaM shIlaya nIlanicholam.h .. 4..
urasi murArerupahitahAre ghana iva taralabalAke .
taDidiva pIte rativiparIte rAjasi sukR^itavipAke .. 5..
vigalitavasanaM parihR^itarasanaM ghaTaya jaghanamapidhAnam.h .
kisalayashayane paN^kajanayane nidhimiva harShanidAnam.h .. 6..
harirabhimAnI rajaniridAnImiyamapi yAti virAmam.h .
kuru mama vachanaM satvararachanaM pUraya madhuripukAmam.h .. 7..
shrIjayadeve kR^itahariseve bhaNati paramaramaNIyam.h .
pramuditahR^idayaM harimatisadayaM namata sukR^itakamanIyam.h .. 8..
vikirati muhuH shvAsAnAshAH puro muhurIkShate
pravishati muhuH ku~njaM gu~njanmuhurbahu tAmyati .
rachayati muhuH shayyAM paryAkulaM muhurIkShate
madanakadanaklAntaH kAnte priyastava vartate .. 33..
tvadvAmyena samaM samagramadhunA tigmA.nshurastaM gato
govindasya manorathena cha samaM prAptaM tamaH sAndratAm.h .
kokAnAM karuNasvanena sadR^ishI dIrghA madabhyarthanA
tanmugdhe viphalaM vilambanamasau ramyo.abhisArakShaNaH .. 34..
AshleShAdanu chumbanAdanu nakhollekhAdanu svAntaja\-
prodbodhAdanu saMbhramAdanu ratArambhAdanu prItayoH .
anyArthaM gatayorbhramAnmilitayoH sambhAShaNairjAnato\-
rdampatyoriha ko na ko na tamasi vrIDAvimishro rasaH .. 35..
sabhayachakitaM vinyasyantIM dR^ishaM timire pathi
pratitaru muhuH sthitvA mandaM padAni vitanvatIm.h .
kathamapi rahaH prAptAmaN^gairanaN^gataraN^gibhiH
sumukhi subhagaH pashyansa tvAmupaitu R^itArthatAm.h .. 36..
          .. iti shrIgItagovinde.abhisArikavarNane
           sAkAN^kShapuNDarIkAkSho nAma
           pa~nchamaH sargaH ..
          .. ShaShThaH sargaH ..
          .. kuNThavaikuNThaH ..
atha tAM gantumashaktAM chiramanuraktAM latAgR^ihe dR^iShTvA .
tachcharitaM govinde manasijamande sakhI prAha .. 37..
pashyati dishi dishi rahasi bhavantam.h .
tadadharamadhuramadhUni pibantam.h ..
nAtha hare sIdati rAdhA vAsagR^ihe .. 1..
tvadabhisaraNarabhasena valantI .
patati padAni kiyanti chalantI .. 2..
vihitavishadabisakisalayavalayA .
jIvati paramiha tava ratikalayA .. 3..
muhuravalokitamaNDanalIlA .
madhuripurahamiti bhAvanashIlA .. 4..
tvaritamupaiti na kathamabhisAram.h .
haririti vadati sakhImanuvAram.h .. 5..
shliShyati chumbati jaladharakalpam.h .
harirupagata iti timiramanalpam.h .. 6..
bhavati vilambini vigalitalajjA .
vilapati roditi vAsakasajjA .. 7..
shrIjayadevakaveridamuditam.h .
rasikajanaM tanutAmatimuditam.h .. 8..
vipulapulakapAliH sphItasItkAramanta\-
rjanitajaDimakAkuvyAkulaM vyAharantI .
tava kitava vidhAyAmandakandarpachintAM
rasajaladhinimagnA dhyAnalagnA mR^igAkShI .. 38..
aN^geShvAbharaNaM karoti bahushaH pate.api sa.nchAriNi
prAptaM tvAM parishaN^kate vitanute shayyAM chiraM dhyAyati .
ityAkalpavikalpatalparachanAsa.nkalpalIlAshata\-
vyAsaktApi vinA tvayA varatanurnaiShA nishAM neShyati .. 39..
          .. iti gItagovinde vAsakasajjAvarNane
           kuNThavaikuNTho nAma
          ShaShTaH sargaH ..
           ..  saptamaH sargaH ..
          .. nAgaranArAyaNaH ..
atrAntare cha kulaTAkulavartmapAta\-
sa.njAtapAtaka iva sphuTalA~nChanashrIH .
vR^indAvanAntaramadIpayada.nshujAlai\-
rdiksundarIvadanachandanabindurinduH .. 40..
prasarati shashadharabimbe vihitavilambe cha mAdhave vidhurA .
virachitavividhavilApaM sA paritApaM chakArochchaiH .. 41..
          .. gItaM 13..
kathitasamaye.api harirahaha na yayau vanam.h .
mama viphalamidamamalarUpamapi yauvanam.h ..
yAmi he kamiha sharaNaM sakhIjanavachanava~nchitA .. 1..
yadanugamanAya nishi gahanamapi shIlitam.h .
tena mama hR^idayamidamasamasharakIlitam.h .. 2..
mama maraNameva varamativitathaketanA .
kimiha viShahAmi virahAnalachetanA .. 3..
mAmahaha vidhurayati madhuramadhuyAminI .
kApi harimanubhavati kR^itasukR^itakAminI .. 4..
ahaha kalayAmi valayAdimaNIbhUShaNam.h .
harivirahadahanavahanena bahudUShaNam.h .. 5..
kusumasukumAratanumatanusharalIlayA .
sragapi hR^idi hanti mAmativiShamashIlayA .. 6..
ahamiha nivasAmi nagaNitavanavetasA .
smarati madhusUdano mAmapi na chetasA .. 7..
haricharaNasharaNajayadevakavibhAratI .
vasatu hR^idi yuvatiriva komalakalAvatI .. 8..
tatkiM kAmapi kAminImabhisR^itaH kiM vA kalAkelibhi\-
rbaddho bandhubhirandhakAriNi vanopAnte kimu bhrAmyati .
kAntaH klAntamanA manAgapi pathi prasthAtumevAkShamaH
sa.nketIkR^itama~njuva~njulalatAku~nje.api yannAgataH .. 42..
athAgataM mAdhavamantareNa
sakhImiyaM vIkShya viShAdamUkAm.h .
vishaN^kmAnA ramitaM kayApi
janArdanaM dR^iShTavadetadAha .. 43..
          .. gItam 14..
smarasamarochitavirachitaveshA .
galitakusumadaravilulitakeshA ..
kApi madhuripuNA vilasati yuvatiradhikaguNA .. 1..
hariparirambhaNavalitavikArA .
kuchakalashopari taralitahArA .. 2..
vichaladalakalalitAnanachandrA .
tadadharapAnarabhasakR^itatantrA .. 3..
cha~nchalakuNDaladalitakapolA .
mukharitarasanajaghanagalitalolA .. 4..
dayitavilokitalajjitahasitA .
bahuvidhakUjitaratirasarasitA .. 5..
vipulapulakapR^ithuvepathubhaN^gA .
shvasitanimIlitavikasadanaN^gA .. 6..
shramajalakaNabharasubhagasharIrA .
paripatitorasi ratiraNadhIrA .. 7..
shrIjayadevabhaNitahariramitam.h .
kalikaluShaM janayatu parishamitam.h .. 8..
virahapANDumurArimukhAmbuja\-
dyutiriyaM tirayannapi chetanAm.h .
vidhuratIva tanoti manobhuvaH
sahR^idaye hR^idaye madanavyathAm.h .. 44..
          .. gItam.h 15..
samuditamadane ramaNIvadane chumbanavalitAdhare .
mR^igamadatilakaM likhati sapulakaM mR^igamiva rajanIkare ..
ramate yamunApulinavane vijayI murAriradhunA .. 1..
ghanachayaruchire rachayati chikure taralitataruNAnane .
kurabakakusumaM chapalAsuShamaM ratipatimR^igakAnane .. 2..
ghaTayati sughane kuchayugagagane mR^igamadaruchirUShite .
maNisaramamalaM tArakapaTalaM nakhapadashashibhUShite .. 3..
jitabisashakale mR^idubhujayugale karatalanalinIdale .
marakatavalayaM madhukaranichayaM vitarati himashItale .. 4..
ratigR^ihajaghane vipulApaghane manasijakanakAsane .
maNimayarasanaM toraNahasanaM vikarati kR^itavAsane .. 5..
charaNakisalaye kamalanilaye nakhamaNigaNapUjite .
bahirapavaraNaM yAvakabharaNaM janayati hR^idi yojite .. 6..
ramayati sadR^ishaM kAmapi subhR^ishaM khalahaladharasodare .
kimaphalamavasaM chiramiha virasaM vada sakhi viTapodare .. 7..
iha rasabhaNane kR^itahariguNane madhuripupadasevake .
kaliyugacharitaM na vasatu duritaM kavinR^ipajayadevake .. 8..
nAyAtaH sakhi nirdayo yadi shaThastvaM dUti kiM dUyase
svachChandaM bahuvallabhaH sa ramate kiM tatra te dUShaNam.h .
pashyAdya priyasamgamAya dayitasyAkR^iShyamANaM gaNai\-
rutkaNThArtibharAdiva sphuTadidaM chetaH svayaM yAsyati .. 45..
          .. gItam.h 16..
anilataralakuvalayanayanena .
tapati na sA kisalayashayanena ..
sakhi yA ramitA vanamAlinA .. 1..
vikasitasarasijalalitamukhena .
sphuTati na sA manasijavishikhena .. 2..
amR^itamadhuramR^idutaravachanena .
jvalati na sA malayajapavanena .. 3..
sthalajalaruharuchikaracharaNena .
luThati na sA himakarakiraNena .. 4..
sajalajaladasamudayaruchireNa .
dalati na sA hR^idi chiraviraheNa .. 5..
kanakanikaSharuchishuchivasanena .
shvasati na sA parijanahasanena .. 6..
sakalabhuvanajanavarataruNena .
vahati na sA rujamatikaruNena .. 7..
shrIjayadevabhaNitavachanena .
pravishatu harirapi hR^idayamanena .. 8..
manobhavAnandana chandanAnila
prasIda re dakShiNa mu~ncha vAmatAm.h .
kShaNaM jagatprANa vidhAya mAdhavaM
puro mama prANaharo bhaviShyasi .. 46..
ripuriva sakhIsa.nvAso.ayaM shikhIva himAnilo
viShamiva sudhArashmiryasmindunoti manogate .
hR^idayamadaye tasminnevaM punarvalate balAt.h
kuvalayadR^ishAM vAmaH kAmo nikAmaniraN^kushaH .. 47..
bAdhAM vidhehi malayAnila pa~nchabANa
prANAngR^ihANa na gR^ihaM punarAshrayiShye .
kiM te kR^itAntabhagini kShamayA taraN^gai\-
raN^gAni si~ncha mama shAmyatu dehadAhaH .. 48..
          .. iti gItagovinde vipralabdhAvarNane
           nAganArAyaNo nAma
           saptamaH sargaH ..
           .. aShTamaH sargaH ..
          .. vilakShyalakShmIpatiH ..
atha kathamapi yAminIM vinIya
smarasharajarjaritApi sA prabhAte .
anunayavachanaM vadantamagre
praNatamapi priyamAha sAbhyasUyam.h .. 49..
          .. gItam.h 17..
rajanijanitagurujAgararAgakaShAyitamalasanivesham.h .
vahati nayanamanurAgamiva sphuTamuditarasAbhinivesham.h ..
harihari yAhi mAdhava yAhi keshava mA vada kaitavavAdaM
tAmanusara sarasIruhalochana yA tava harati viShAdam.h .. 50..
kajjalamalinavilochanachumbanavirachitanIlimarUpam.h .
dashanavasanamaruNaM tava kR^iShNa tanoti tanoranurUpam.h .. 2..
vapuranuharati tava smarasaN^garakharanakharakShatarekham.h .
marakatashakalakalitakaladhautalipireva ratijayalekham.h .. 3..
charaNakamalagaladalaktakasiktamidaM tava hR^idayamudAram.h .
darshayatIva bahirmadanadrumanavakisalayaparivAram.h .. 4..
dashanapadaM bhavadadharagataM mama janayati chetasi khedam.h .
kathayati kathamadhunApi mayA saha tava vapuretadabhedam.h .. 5..
bahiriva malinataraM tava kR^iShNa mano.api bhaviShyati nUnam.h .
kathamatha va~nchayase janamanugatamasamasharajvaradUnam.h .. 6..
bhramati bhavAnabalAkavalAya vaneShu kimatra vichitram.h .
prathayati pUtanikaiva vadhUvadhanirdayabAlacharitram.h .. 7..
shrIjayadevabhaNitarativa~nchitakhaNDitayuvativilApam.h .
shR^iNuta sudhAmadhuraM vibudhA vibudhAlayato.api durApam.h .. 8..
tadevaM pashyantyAH prasaradanurAgaM bahiriva
priyApAdAlaktachChuritamaruNachChAyahR^idayam.h .
mamAdya prakhyAtapraNayabharabhaN^gena kitava
tvadAlokaH shokAdapi kimapi lajjAM janayati .. 50..
           iti gItagovinde khaNDitAvarNane
           vilakShyalakShmIpatirnAma
            aShThamaH sargaH ..
           .. navamaH sargaH ..
          .. mandamukundaH ..
tAmatha manmathakhinnAM
ratirasabhinnAM viShAdasampannAm.h .
anuchintitaharicharitAM
kalahAntaritamuvAcha sakhI .. 51..
          .. gItam.h 18..
harirabhisarati vahati madhupavane .
kimaparamadhikasukhaM sakhi bhuvane ..
mAdhave mA kuru mAnini mAnamaye  .. 1..
tAlaphalAdapi gurumatisarasam.h .
kiM viphalIkuruShe kuchakalasham.h .. 2..
kati na kathitamidamanupadamachiram.h .
mA parihara harimatishayaruchiram.h .. 3..
kimiti viShIdasi rodiShi vikalA .
vihasati yuvatisabhA tava sakalA .. 4..
sajalanalinIdalashItalashayane .
harimavalokya saphalay nayane .. 5..
janayasi manasi kimiti gurukhedam.h .
shR^iNu mama vachanamanIhitabhedam.h .. 6..
harirupayAtu vadatu bahumadhuram.h .
kimiti karoShi hR^idayamatividhuram.h .. 7..
shrIjayadevabhaNitamatilalitam.h .
sukhayatu rasikajanaM haricharitam.h .. 8..
snigdhe yatparuShAsi yatpraNamati stabdhAsi yadrAgiNi
dveShasthAsi yadunmukhe vimukhatAM yAtAsi tasminpriye .
yuktaM tadviparItakAriNi tava shrIkhaNDacharchA viShaM
shItA.nshustapano himaM hutavahaH krIDAmudo yAtanAH .. 52..
          .. iti gItagovinde kalahAntaritAvarNane
           mandamukundo nAma
           navamaH sargaH ..
           .. dashamaH sargaH ..
           .. chaturachaturbhujaH ..
atrAntare masR^iNaroShavashAmasIm\-
niHshvAsaniHsahamukhIM sumukhImupetya .
savrIDamIkShitasakhIvadanAM dinAnte
sAnandagadgadapadaM harirityuvAcha .. 53..
          .. gItam.h 19..
vadasi yadi ki.nchidapi dantaruchikaumudI
harati daratimiramatighoram.h .
sphuradadharasIdhave tava vadanachandramA
rochayatu lochanachakoram.h ..
priye chArushIle mu~ncha mayi mAnamanidAnaM
sapadi madanAnalo dahati mama mAnasaM
dehi mukhakamalamadhupAnam.h .. 1..
satyamevAsi yadi sudati mayi kopinI
dehi kharanakhasharaghAtam.h .
ghaTaya bhujabandhanaM janaya radakhaNDanaM
yena vA bhavati sukhajAtam.h .. 2..
tvamasi mama bhUShaNaM tvamasi mama jIvanaM
tvamasi bhavajaladhiratnam.h .
bhavatu bhavatIha mayi satatamanorodhini
tatra mama hR^idayamatiratnam.h .. 3..
nIlanalinAbhamapi tanvi tava lochanaM
dhArayati kokanadarUpam.h .
kusumasharabANabhAvena yadi ra~njayasi
kR^iShNamidametadanurUpam.h .. 4..
sphuratu kuchakumbhayorupari maNima~njarI
ra~njayatu tava hR^idayadesham.h .
rasatu rashanApi tava ghanajaghanamaNDale
ghoShayatu manmathanidesham.h .. 5..
sthalakamalaga~njanaM mama hR^idayara~njanaM
janitaratiraN^gaparabhAgam.h .
bhaNa masR^iNavANi karavANi padapaN^kajaM
sarasalasadalaktakarAgam.h .. 6..
smaragaralakhaNDanaM mama shirasi maNDanaM
dehi padapallavamudAram.h .
jvalati mayi dAruNo madanakadanAruNo
haratu tadupAhitavikAram.h .. 7..
iti chaTulachATupaTuchAru muravairiNo
rAdhikAmadhi vachanajAtam.h .
jayati padmAvatIramaNajayadevakavi\-
bhAratIbhaNitamatishAtam.h .. 8..
parihara kR^itAtaN^ke shaN^kAM tvayA satataM ghana\-
stanajaghanayAkrAnte svAnte parAnavakAshini .
vishati vitanoranyo dhanyo na ko.api mamAntaraM
stanabharaparIrambhArambhe vidhehi vidheyatAm.h .. 54..
mugdhe vidhehi mayi nirdayadantada.nsha\-
dorvallibandhanibiDastanapIDanAni .
chaNDi tvameva mudama~ncha na pa~nchabANa\-
chaNDAlakANDadalanAdasavaH prayAntu .. 55..
vyathayati vR^ithA maunaM tanvi prapa~nchaya pa~nchamaM
taruNI madhurAlApaistApaM vinodaya dR^iShTibhiH .
sumukhi vimukhIbhAvaM tAvadvimu~ncha na mu~ncha mAM
svayamatishayasnigdho mugdhe priyi.ahamupasthitaH .. 56..
bandhUkadyutibAndhavo.ayamadharaH snigdho madhUkachchavi\-
rgaNDashchaNDi chakAsti nIlanalinashrImochanaM lochanam.h .
nAsAbhyeti tilaprasUnapadavIM kundAbhadAnti priye
prAyastvanmukhasevayA vijayate vishvaM sa puShpAyudhaH .. 57..
dR^ishau tava madAlase vadanamindusa.ndIpakaM
gatirjanamanoramA vidhutarambhamUrudvayam.h .
ratistava kalAvatI ruchirachitralekhe bhruvA\-
vaho vibudhayauvanaM vahasi tanvI pR^ithvIgatA .. 58..
          .. iti shrIgItagovinde mAninIvarNane
           chaturachaturbhujo nAma
          dashamaH sargaH ..
           .. ekAdashaH sargaH ..
          .. sAnandadAmodaraH ..
suchiramanunayane prINayitvA mR^igAkShIM
gatavati kR^itaveshe keshave ku~njashayyAm.h .
rachitaruchirabhUShAM dR^iShTimoShe pradoShe
sphurati niravasAdAM kApi rAdhAM jagAda .. 59..
          .. gItam 20..
virachitachATuvachanarachanaM charaNe rachitapraNipAtam.h .
saMprati ma~njulava~njulasImani kelishayanamanuyAtam.h ..
mugdhe madhumathanamanugatamanusara rAdhike .. 1..
ghanajaghanastanabhArabhare daramantharacharaNavihAram.h .
mukharitamaNIma~njIramupaihi vidhehi marAlavikAram.h .. 2..
shR^iNu ramaNIyataraM taruNIjanamohanamadhupavirAvam.h .
kusumasharAsanashAsanabandini pikanikare bhaja bhAvam.h .. 3..
anilataralakisalayanikareNa kareNa latAnikurambam.h .
preraNamiva karabhoru karoti gatiM pratimu~ncha vilambam.h .. 4..
sphuritamanaN^gataraN^gavashAdiva sUchitahariparirambham.h .
pR^ichCha manoharahAravimalajaladhAramamuM kuchakumbham.h .. 5..
adhigatamakhilasakhIbhiridaM tava vapurapi ratiraNasajjam.h .
chaNDi rasitarashanAravaDiNDimamabhisara sarasamalajjam.h .. 6..
smarasharasubhaganakhena kareNa sakhImavalambya salIlam.h .
chala valayakvaNItairavabodhaya haramapi nijagatishIlam.h .. 7..
shrIjayadevabhaNitamadharIkR^itahAramudAsitavAmam.h .
harivinihitamanasAmadhitiShThatu kaNThataTImavirAmam.h .. 8..
sA mAM drakShyati vakShyati smarakathAM pratyaN^gamAliN^ganaiH
prItiM yAsyati ramyate sakhi samAgatyeti chintAkulaH .
sa tvAM pashyati vepate pulakayatyAnandati svidyati
pratyudgachChati mUrchChati sthiratamaHpu~nje niku~nje priyaH .. 60..
akShNornikShipada~njanaM shravaNayostApichChaguchChAvalIM
mUrdhni shyAmasarojadAma kuchayoH kastUrikApAtrakam.h .
dhUrtAnAmabhisArasatvarahR^idAM viShvaN^.hniku~nje sakhi
dhvAntaM nIlanicholachAru sadR^ishAM pratyaN^gamAliN^gati .. 61..
kAshmIragauravapuShAmabhisArikANAm.h
Abaddharekhamabhito ruchima~njarIbhiH .
etattamAladalanIlatamaM tamishraM
tatpremahemanikaShopalatAM tanoti .. 62..
hArAvalItaralakA~nchanakA~nchidAma\-
keyUrakaN^kaNamaNidyutidIpitasya .
dvAre niku~njanilayasyahariM nirIkShya
vrIDAvatImatha sakhI nijagAha rAdhAm.h .. 63..
          .. gItam.h 21..
ma~njutaraku~njatalakelisadane .
vilasa ratirabhasahasitavadane ..
pravisha rAdhe mAdhavasamIpamiha .. 1..
navabhavadashokadalashayanasAre .
vilasa kuchakalashataralahAre .. 2..
kusumachayarachitashuchivAsagehe .
vilasa kusumasukumAradehe .. 3..
chalamalayavanapavanasurabhishIte .
vilasa rasavalitalalitagIte .. 4..
madhumuditamadhupakulakalitarAve .
vilasa madanarasasarasabhAve .. 5..
madhutaralapikanikaraninadamukhare .
vilasa dashanaruchiruchirashikhare .. 6..
vitata bahuvallinavapallavaghane .
vilasa chiramalasapInajaghane .. 7..
vihitapadmAvatIsukhasamAje .
bhaNati jayadevakavirAje .. 8..
tvAM chittena chiraM vahannayamatishrAnto bhR^ishaM tApitaH
kandarpeNa tu pAtumichChati sudhAsaMbAdhabimbAdharam.h .
asyAN^gaM tadala.nkuru kShaNamiha bhrUkShepalakShmIlava\-
krIte dAsa ivopasevitapadAmbhoje kutaH sambhramaH .. 64..
sA sasAdhvasasAnandaM govinde lolalochanA .
si~njAnama~njuma~njIraM pravivesha niveshanam.h .. 65..
          .. gItam 22..
rAdhAvadanavilokanavikasitavividhavikAravibhaN^gam.h .
jalanidhimiva vidhumaNDaladarshanataralitatuN^gataraN^gam.h ..
harimekarasaM chiramabhilaShitavilAsaM
sA dadArsha guruharShavasha.nvadavadanamanaN^ganivAsam.h .. 1..
hAramamalataratAramurasi dadhataM parirabhya vidUram.h .
sphuTataraphenakadambakarambitamiva yamunAjalapUram.h .. 2..
shyAmalamR^idulakalevaramaNDalamadhigatagauradukUlam.h .
nIlanalinamiva pItaparAgapatalabharavalayitamUlam.h .. 3..
taraladR^iga~nchalachalanamanoharavadanajanitaratirAgam.h .
sphuTakamalodarakhelitakha~njanayugamiva sharadi taDAgam.h .. 4..
vadanakamalaparishIlanamilitamihirasamakuNDalashobham.h .
smitaruchiruchirasamullasitAdharapallavakR^itaratilobham.h .. 5..
shashikiraNachChuritodarajaladharasundarasakusumakesham.h .
timiroditavidhumaNdalanirmalamalayajatilakanivesham.h .. 6..
vipulapulakabharadanturitaM ratikelikalAbhiradhIram.h .
maNigaNakiraNasamUhasamujjvalabhUShaNasubhagasharIram.h .. 7..
shrIjayadevabhaNitavibhavadviguNIkR^itabhUShaNabhAram.h .
praNamata hR^idi suchiraM vinidhAya hariM sukR^itodayasAram.h .. 8..
atikramyApAN^gaM shravaNapathaparyantagamana\-
prayAsenevAkShNostaralataratAraM patitayoH .
idAnIM rAdhAyAH priyatamasamAlokasamaye
papAta svedAmbuprasara iva harShAshrunikaraH .. 66..
bhavantyAstalpAntaM kR^itakapaTakaNDUtipihita\-
smitaM yAte gehAdbahiravahitAlIparijane .
priyAsyaM pashyantyAH smarasharasamAkUlasubhagaM
salajjA lajjApi vyagamadiva dUraM mR^igadR^ishaH .. 67..
          .. iti shrIgItagovinde rAdhikAmilane
           sAnandadAmodaro nAmaikAdashaH sargaH ..
           .. dvAdashaH sargaH ..
          .. suprItapItAmbaraH ..
gatavati sakhIvR^inde.amandatrapAbharanirbhara\-
smaraparavashAkUtasphItasmitasnapitAdharam.h .
sarasamanasaM dR^iShTvA rAdhAM muhurnavapallava\-
prasavashayane nikShiptAkShImuvAcha haraH .. 68..
          .. gItam 23..
kisalayashayanatale kuru kAmini charaNanalinavinivesham.h .
tava padapallavavairiparAbhavamidamanubhavatu suvesham.h ..
kShaNamadhunA nArAyaNamanugatamanusara rAdhike .. 1..
karakamalena karomi charaNamahamAgamitAsi vidUram.h .
kShaNamupakuru shayanopari mAmiva nUpuramanugatishUram.h .. 2..
vadanasudhAnidhigalitamamR^itamiva rachaya vachanamanukUlam.h .
virahamivApanayAmi payodhararodhakamurasi dukUlam.h .. 3..
priyaparirambhaNarabhasavalitamiva pulakitamatiduravApam.h .
madurasi kuchakalashaM viniveshaya shoShaya manasijatApam.h .. 4..
adharasudhArasamupanaya bhAvini jIvaya mR^itamiva dAsam.h .
tvayi vinihitamanasaM virahAnaladagdhavapuShamavilAsam.h .. 5..
shashimukhi mukharaya maNirashanAguNamanuguNakaNThanidAnam.h .
shrutiyugale pikarutavikale mama shamaya chirAdavasAdam.h .. 6..
mAmativiphalaruShA vikalIkR^itamavalokitamadhunedam.h .
mIlitalajjitamiva nayanaM tava virama visR^ija ratikhedam.h
.. 7..
shrIjayadevabhaNitamidamanupadanigaditamadhuripumodam.h .
janayatu rasikajaneShu manoramatirasabhAvavinodam.h .. 8..
mAraN^ke ratikelisa.nkularaNArambhe tayA sAhasa\-
prAyaM kAntajayAya ki~nchidupari prArambhi yatsambhramAt.h .
niShpandA jaghanasthalI shithilatA dorvallirutkampitaM
vakSho mIlitamakShi pauruSharasaH strINAM kutaH sidhyati .. 69..
atha kAntaM ratiklAntamapi maNDanavA~nChayA .
nijagAda nirAbAdhA rAdhA svAdhInabhartR^ikA .. 70..
          .. gItam 24..
kuru yadunandana chandanashishiratareNa kareNa payodhare .
mR^igamadapatrakamatra manobhavamaN^galakalashasahodare .
nijagAda sA yadunandane krIDati hR^idayAnandane .. 1..
alikulaga~njanama~njanakaM ratinAyakasAyakamochane .
tvadadharachumbanalambitakajjalamujjvalaya priya lochane .. 2..
nayanakuraN^gataraN^gavikAsanirAsakare shrutimaNDale .
manasijapAshavilAsadhare shubhavesha niveshaya kuNDale .. 3..
bhramarachayaM racahayantamupari ruchiraM suchiraM mama saMmukhe .
jitakamale vimale parikarmaya narmajanakamalakaM mukhe .. 4..
mR^igamadarasavalitaM lalitaM kuru tilakamalikarajanIkare .
vihitakalaN^kakalaM kamalAnana vishramitashramashIkare .. 5..
mama ruchire chikure kuru mAnada mAnasajadhvajachAmare .
ratigalite lalite kusumAni shikhaNDishikhaNDakaDAmare .. 6..
sarasaghane jaghane mama shambaradAraNavAraNakandare .
maNirashanAvasanAbharaNAni shubhAshaya vAsaya sundare .. 7..
shrIjayadevavachasi ruchire hR^idayaM sadayaM kuru maNDane .
haricharaNasmaraNAmR^itakR^itakalikaluShabhavajvarakhaNDane .. 8..
rachaya kuchayoH patraM chitraM kuruShva kapolayo\-
rghaTaya jaghane kA~nchIma~ncha srajA kabarIbharam.h .
kalaya valayashreNIM pANau pade kuru nUpurA\-
viti nigatitaH prItaH pItAmbaro.api tathAkarot.h .. 71..
yadgAndhgarvakalAsu kaushalamanudhyAnaM cha yadvaiShNavaM
yachChR^iN^gAravivekatatvamapi yatkAvyeShu lIlAyitam.h .
tatsarvaM jayadevapaNDitakaveH kR^iShNaikatAnAtmanaH
sAnandAH parishodhayantu sudhiyaH shrIgItagovindataH .. 72..
shrIbhojadevaprabhavasya rAmAdevIsutashrIjayadevakasya .
parAsharAdipriyavargakaNThe shrIgItagovindakavitvamastu .. 73..
          .. iti shrIjayadevakR^itau gItagovinde
          suprItapItAmbaro nAma
          dvAdashaH sargaH ..
          .. iti gItagovindaM samAptam.h ..
#endsanskrit
\medskip\hrule\obeylines
\medskip
{\rm Please send corrections to sanskrit@cheerful.com}
{\rm Last updated \today}
{\rm http://sanskritdocuments.org}
\end{document}