% Text title            : Tripuratapini Ypanishad
% File name             : trip-tapi.itx
% Category              : upanishhat, svara
% Location              : doc\_upanishhat
% Author                : Vedic tradition
% Transliterated by     : Sunder Hattangadi
% Proofread by          : Sunder Hattangadi
% Description-comments  :  80 / 108; Atharva Veda - Shakta upanishad
% Latest update         : August 26, 2000
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Tripuratapini Upanishad ..}##
\itxtitle{.. tripurAtApinyupaniShat ..}##\endtitles ##

tripurAtApinIvidyAvedyachichChaktivigraham.h .
vastutashchinmAtrarUpaM para.n tattvaM bhajAmyaham.h ..
AUM bhadra.n karNebhiH shR^iNuyAma devAH .. bhadraM pashyemAkShabhiryajatrAH ..
sthiraira~NgaistuShTuvA{\m+}sastanUbhiH .. vyashema devahita.n yadAyuH ..
svasti na indro vR^iddhashravAH .. svasti naH pUShA vishvavedAH ..
svasti nastArkShyo ariShTanemiH .. svasti no bR^ihaspatirdadhAtu ..
AUM shAntiH shAntiH shAntiH ..
hariH AUM .. athaitasminnantare bhagavAnprAjApatya.n vaiShNava.n vilayakAraNa.n
rUpamAshritya tripurAbhidhA bhagavatItyevamAdishaktyA bhUrbhuvaH svastrINi
svargabhUpAtAlAni tripurANi haramAyAtmakena hI~NkAreNa hR^illekhAkhyA
bhagavatI trikUTAvasAne nilaye vilaye dhAmni mahasA ghoreNa prApnoti . saiveyaM
bhagavatI tripureti vyApaThyate . tatsaviturvareNyaM bhargo devasya dhImahi . dhiyo yo
naH prachodayAt paro rajase sAvadom.h . jAtavedase sunavAma somamarAtIyato
nidahAti veda . sa naH parShadati durgANi vishvA nAveva sindhu.n duritAtyagniH .
tryambaka.n yajAmahe sugandhiM puShTivardhanam.h . urvArukamiva bandhanA\-
nmR^ityormukShIya mAmR^itAt.h . shatAkSharI paramA vidyA trayImayI sAShTArNA
tripurA parameshvarI . AdyAni chatvAri padAni parabrahmavikAsIni . dvitIyAni
shaktyAkhyAni . tR^itIyAni shaivAni . tatra lokA vedAH shAstrANi purANAni
dharmANi vai chikitsitAni jyotI.nShi shivashaktiyogAdityeva.n ghaTanA vyApaThyate .
athaitasya para.n gahvara.n vyAkhyAsyAmo mahAmanusamudbhava.n taditi . brahma
shAshvatam.h . paro bhagavAnnirlakShaNo nira~njano nirupAdhirAdhirahito devaH .
unmIlate pashyati vikAsate chaitanyabhAva.n kAmayata iti . sa eko devaH shivarUpI
dR^ishyatvena vikAsate yatiShu yaj~neShu yogiShu kAmayate .
kAma.n jAyate sa eSha nira~njano.akAmatvenojjR^imbhate .
akachaTatapayashAnsR^ijate . tasmAdIshvaraH kAmo.abhidhIyate .
tatparibhAShayA kAmaH kakAra.n vyApnoti . kAma eveda.n
tattaditi kakAro gR^ihyate . bhasmAttatpadArtha iti ya eva.n veda .
saviturvareNyamiti ShU~N prANiprasave savitA prANinaH sUte
prasUte shaktim.h . sUte tripurA shaktirAdyeya.n tripurA
parameshvarI mahAkuNDalinI devI . jAtavedasamaNDala.n yo.adhIte
sarva.n vyApyate . trikoNashaktirekAreNa mahAbhAgena prasUte .
tasmAdekAra eva gR^ihyate . vareNya.n shreShThaM bhajanIyamakShara.n
namaskAryam.h . tasmAdvareNyamekArAkShara.n gR^ihyata iti
ya eva.n veda . bhargo devasya dhImahItyeva.n vyAkhyAsyAmaH .
dhakAro dhAraNA . dhiyaiva dhAryate bhagavAnparameshvaraH .
bhargo devo madhyavarti turIyamakShara.n sAkShAtturIya.n sarva.n
sarvAntarbhUtam.h . turIyAkSharamIkAraM padAnAM
madhyavartItyeva.n vyAkhyAtaM bhargorUpa.n vyAchakShate .
tasmAdbhargo devasya dhImahItyevamIkArAkShara.n gR^ihyate .
mahItyasya vyAkhyAnaM mahattva.n jaDatva.n kAThinya.n vidyate
yasminnakShateretanmahi lakAraH para.n dhAma . kAThinyADhya.n
sasAgara.n saparvata.n sa saptadvIpa.n sakAnanamujjvaladrUpaM
maNDalamevokta.n lakAreNa .
pR^ithvI devI mahItyanena vyAchakShate . dhiyo yo naH prachodayAt.h .
paramAtmA sadAshiva AdibhUtaH paraH . sthANubhUtena lakAreNa
jyotirli~NgamAtmAna.n dhiyo buddhayaH pare vastuni dhyAnechChArahita.n
nirvikalpake prachodayAtprerayedityuchchAraNarahita.n chetasaiva
chintayitvA bhAvayediti . paro rajase sAvadomiti tadavasAne para.n
jyotiramala.n hR^idi daivata.n chaitanya.n chilli~Nga.n hR^idayAgAravAsinI
hR^illekhetyAdinA spaShTa.n vAgbhavakUTaM pa~nchAkSharaM
pa~nchabhUtajanakaM pa~nchakalAmaya.n vyApaThyata iti . ya eva.n veda .
atha tu para.n kAmakalAbhUta.n kAmakUTamAhuH . tatsaviturvareNya\-
mityAdidvAtri.nshadakSharIM paThitvA taditi paramAtmA sadAshivo.akashara.n
vimala.n nirupAdhitAdAtnyapratipAdanena hakArAkShara.n shivarUpa.n
nirakSharamakShara.n vyAlikhyata iti . tatparAgavyAvR^ittimAdAya shakti.n darshayati .
tatsavituriti pUrveNAdhvanA sUryAdhashchandrikA.n vyAlikhya
mUlAdibrahmarandhraga.n sAkSharamadvitIyamAchakShata ityAha bhagavanta.n
deva.n shivashaktyAtmakamevoditam.h .
shivo.ayaM parama.n deva.n shaktireShA tu jIvajjA .
sUryAchandramasoryogAddha.nsastatatpadamuchyate .. 1..
tasmAdujjR^imbhate kAmaH kAmAtkAmaH paraH shivaH .
kArNo.aya.n kAmadevo.aya.n vareNyaM bharga uchyate .. 2..
tatsaviturvareNyaM bhargo devaH kShIra.n sechanIyamakShara.n
samadhughnamakSharaM paramAtmajIvAtmanoryogAttaditi
spaShTamakShara.n tR^itIya.n ha iti tadeva sadAshiva eva
niShkalmaSha Adyo devo.antyamakShara.n vyAkriyate .
paramaM padaM dhIti dhAraNa.n vidyate jaDatvadhAraNaM
mahIti lakAraH shivAdhastAttu lakArArthaH spaShTamantyamakSharaM
paramaM chaitanya.n dhiyo yo naH prachodayAtparo rajase sAvadomityeva.n
kUTa.n kAmakalAlaya.n ShaDadhvaparivartako vaiShNavaM parama.n
dhAmaiti bhagavA.nshchaitasmAdya eva.n veda . athaitasmAdapara.n
tR^itIya.n shaktikUTaM pratipadyate . dvAtri.nshadakSharyA gAyatryA
tatsaviturvareNya.n tasmAdAtmana AkAsha AkAshAdvAyuH sphurati
tadadhIna.n vareNya.n samudIyamAna.n saviturvA yogyo jIvAtmaparamAtma\-
samudbhavastaM prakAshashaktirUpa.n jIvAkShara.n spaShTamApadyate .
bhargo devasya dhItyanenAdhArarUpashivAtmAkShara.n gaNyate .
mahItyAdinAsheSha.n kAmya.n ramaNIya.n dR^ishya.n shaktikUTa.n
spaShTIkR^itamiti . evaM pa~nchadashAkShara.n traipura.n yo.adhIte sa
sarvAnkAmAnavApnoti . sa sarvA.nllokA~njayati . sa sarvA vAcho vijR^imbhayati .
sa rudratvaM prApnoti . sa vaiShNava.n dhAma bhittvA paraM brahma prApnoti .
ya eva.n veda . ityAdyA.n vidyAmabhidhAyaitasyAH shaktikUTa.n
shaktishivAdya.n lopAmudreyam.h .
dvitIye dhAmani pUrveNaiva manunA binduhInA shaktibhUtahR^illekhA
krodhamuninAdhiShThitA . tR^itIye dhAmani pUrvasyA eva vidyAyA
yadvAgbhavakUTa.n tenaiva mAnavI.n chAndrI.n kauberI.n vidyAmAchakShate .
madanAdhaH shiva.n vAgbhavam.h . tadUrdhva.n kAmakalAmayam.h .
shaktyUrdhva.n shaktimiti mAnavI vidyA . chaturthe dhAmani
shivashaktyAkhyamanyattR^itIya.n cheya.n chAndrI vidyA . pa~nchame dhAmani
dhyeyeya.n chAndrI kAmAdhaH shivAdyakAmA . saiva kauberi ShaShThe
dhAmani vyAchakShata iti . ya eva.n veda . hitvekAra.n turIyasvara.n sarvAdau
sUryAchandramaskena kAmeshvaryevAgastyasa.nj~nA . saptame dhAmani
tR^itIyametasyA eva pUrvoktAyAH kAmAdya.n dvidhAdhaH kaM madanakalAdya.n
shaktibIja.n vAgbhavAdya.n tayorardhAvashiraska.n kR^itvA nandividyeyam.h .
aShTame dhAmani vAgbhavamAgastya.n vAgarthakalAmaya.n kAmakalAbhidha.n
sakalamAyAshaktiH prabhAkarI vidyeyam.h . navame dhAmani punarAgastya.n
vAgbhava.n shaktimanmathashivashaktimanmathorvImAyAkAmakalAlaya.n
chandrasUryAna~NgadhUrjaTimahimAlaya.n tR^itIya.n ShaNmukhIya.n vidyA .
dashame dhAmani vidyAprakAshitayA bhUya evAgastyavidyAM paThitvA bhUya
evemAmantyamAyAM paramashivavidyeyamekAdashe dhAmani bhUya evAgastyaM
paThitvA etasyA eva vAgbhava.n yaddhanaja.n kAmakalAlaya.n cha tatsahaja.n kR^itvA
lopAmudrAyAH shaktikUTarAjaM paThitvA vaiShNavI vidyA dvAdashe dhAmani
vyAchakShata iti . ya eva.n veda .
tAnhovAcha . bhagavAnsarve yUya.n shrutvA pUrvA.n kAmAkhyA.n
turIyarUpA.n turIyAtItA.n sarvotkaTA.n sarvamantrAsanagatA.n
pIThopapIThadevatAparivR^itA.n sakalakalAvyApinI.n devatA.n sAmodA.n
saparAgA.n sahR^idayA.n sAmR^itA.n sakalA.n sendriyA.n sadoditAM
parA.n vidyA.n spaShTIkR^itvA hR^idaye nidhAya vij~nAyAnilaya.n
gamayitvA trikUTA.n tripurAM paramAM mAyA.n shreShThAM parA.n
vaiShNavI.n sa.nnidhAya hR^idayakamalakarNikAyAM parAM bhagavatI.n
lakShmIM mAyA.n sadoditAM mahAvashyakarIM madanonmAdanakAriNI.n
dhanurbANadhAriNI.n vAgvijR^imbhiNI.n chandramaNDalamadhyavartinI.n
chandrakalA.n saptadashIM mahAnityopasthitAM pAshA~Nkushamanoj~na\-
pANipallavA.n samudyadarkanibhA.n trinetrA.n vichintya devIM mahAlakShmI.n
sarvalakShmImayI.n sarvalakShaNasampannA.n hR^idaye chaitanyarUpiNI.n
nira~njanA.n trikUTAkhyA.n smitamukhI.n sundarIM mahAmAyA.n
sarvasubhagAM mahAkuNDalinI.n tripIThamadhyavartinImakathAdishrIpIThe
parAM bhairavI.n chitkalAM mahAtripurA.n devI.n dhyAyenmahAdhyAna\-
yogeneyameva.n vedeti mahopaniShat.h .. iti prathamopaniShat.h .. 1..
athAto jAtavedase sunavAma somamityAdi paThitvA traipurI vyaktirlakShyate .
jAtavedasa ityekarchasUktasyAdyamadhyamAvasAneShu tatra sthAneShu
vilInaM bIjasAgararUpa.n vyAchakShvetyR^iShaya UchuH . tAnhovAcha
bhagavA~njAtavedase sunavAma soma.n tadatyamravANI.n vilomena paThitvA
prathamasyAdya.n tadeva.n dIrgha.n dvitIyasyAdya.n sunavAma somamityanena
kaula.n vAma.n shreShTha.n somaM mahAsaubhAgyamAchakShate . sa
sarvasampattibhUtaM prathama.n nivR^ittikAraNa.n dvitIya.n sthitikAraNa.n
tR^itIya.n sargakAraNamityanena karashuddhi.n kR^itvA tripurAvidyA.n
spaShTIkR^itvA jAtavedase sunavAma somamityAdi paThitvA mahAvidyeshvarI\-
vidyAmAchakShate tripureshvarI.n jAtavedasa iti . jAte AdyakShare mAtR^ikAyAH
shirasi baindavamamR^itarUpiNI.n kuNDalinI.n trikoNarUpiNI.n cheti vAkyArthaH .
evaM prathamasyAdya.n vAgbhavam.h . dvitIya.n kAmakalAlayam.h . jAta
ityanena paramAtmano jR^imbhaNam.h . jAta ityAdinA paramAtmA shiva uchyate .
jAtamAtreNa kAmI kAmayate kAmamityAdinA pUrNa.n vyAchakShate .
tadeva sunavAma gotrArUDhaM madhyavartinAmR^itamadhyenArNena
mantrArNAnspaShTIkR^itvA . gotreti nAmagotrAyAmityAdinA spaShTa.n
kAmakalAlaya.n sheSha.n vAmamityAdinA . pUrveNAdhvanA vidyeya.n
sarvarakShAkarI vyAchakShate . evametena vidyA.n tripureshI.n spaShTIkR^itvA
jAtavedasa ityAdinA jAto deva eka IshvaraH paramo jyotirmantrato veti turIya.n
vara.n dattvA bindupUrNajyotiHsthAna.n kR^itvA prathamasyAdya.n dvitIya.n cha
tR^itIya.n cha sarvarakShAkarIsaMbandha.n kR^itvA vidyAmAtmAsanarUpiNI.n
spaShTIkR^itvA jAtavedase sunavAma somamityAdi paThitvA rakShAkarI.n
vidyA.n smR^itvAdyantayordhAmnoH shaktishivarUpiNI.n viniyojya sa iti
shaktyAtmaka.n varNa.n somamiti shaivAtmaka.n dhAma jAnIyAt.h . yo jAnIte
sa subhago bhavati . evametA.n chakrAsanagatA.n tripuravAsinI.n sadoditA.n
shivashaktyAtmikamaveditA.n jAtavedAH shiva iti seti
shaktyAtmAkSharamiti shivAdishaktyantarAlabhUtA.n trikUTAdichAriNI.n
sUryAchandranamaskAM mantrAsanagatA.n tripura.n mahAlakShmI.n
sadoditA.n spaShTIkR^itvA jAtavedase sunavAma somamityAdi
paThitvA pUrva.n sadAtmAsanarUpA.n vidyA.n smR^itvA veda ityAdinA
vishvAhasa.ntatodayabaindavamupari vinyasya siddhAsanasthA.n tripurAM
mAlinI.n vidyA.n spaShTIkR^itvA jAtavedase sunavAma somamityAdi
paThitvA tripurA.n sundarI.n shritvA kale akShare vichintya mUrtibhUtAM
mUrtirUpiNI.n sarvavidyeshvarI.n tripurA.n vidyA.n spaShTIkR^itvA
jAtavedasa ityAdi paThitvA tripurA.n lakShmI.n shritvAgni.n nidahAti
saiveyamagnyAnane jvalatIti vichintya trijyotiShamIshvarI.n tripurAmambA.n
vidyA.n spaShTIkuryAt.h . evametena sa naH parShadati durgANi
vishvetyAdiparaprakAshinI pratyagbhUtA kAryA . vidyeyamAhvAnakarmANi
sarvato dhIreti vyAchakShate . evametadvidyAShTakaM mahAmAyA\-
devya~NgabhUta.n vyAchakShate . devA ha vai bhagavantamabruvanmahAchakranAyaka.n
no brUhIti sArvakAmika.n sarvArAdhya.n sarvarUpa.n vishvatomukhaM
mokShadvAra.n yadyogina upavishya paraM brahma bhittvA nirvANamupavishanti .
tAnhovAcha bhagavA~nshrIchakra.n vyAkhyAsyAma iti . trikoNa.n tryasra.n kR^itvA
tadantarmadhyavR^ittamAnayaShTirekhAmAkR^iShya vishAla.n nItvAgrato
yoni.n kR^itvA pUrvayonyagrarUpiNIM mAnayaShTi.n kR^itvA tA.n sarvordhvA.n
nItvA yoni.n kR^itvAdya.n trikoNa.n chakraM bhavati . dvitIyamantarAlaM bhavati .
tR^itIyamaShTayonya~NkitaM bhavati . athAShTArachakrAdyantavidikkoNAgrato
rekhA.n nItvA sAdhyAdyAkarShaNabaddharekhA.n nItvetyevamathordhva\-
sampuTayonya~Nkita.n kR^itvA kakShAbhya UrdhvagarekhAchatuShTaya.n
kR^itvA yathAkrameNa mAnayaShTidvayena dashayonya~Nkita.n chakraM bhavati .
anenaiva prakAreNa punardashArachakraM bhavati . madhyatrikoNAgrachatuShTayA\-
drekhAcharAgrakoNeShu sa.nyojya taddashArA.nshatonItAM mAnayaShTirekhA.n
yojayitvA chaturdashAra.n chakraM bhavati . tato.aShTapatrasa.nvR^ita.n chakraM bhavati .
ShoDashapatrasa.nvR^ita.n chakra.n chaturdvAraM bhavati . tataH pArthiva.n chakra.n
chaturdvAraM bhavati . eva.n sR^iShTiyogena chakra.n vyAkhyAtam.h . navAtmaka.n
chakraM prAtilomyena vA vachmi . prathama.n chakra.n trailokyamohanaM bhavati .
sANimAdyaShTakaM bhavati . samAtraShTakaM bhavati . sasarvasa.nkShobhiNyAdidashakaM
bhavati . saprakaTaM bhavati . tripurayAdhiShThitaM bhavati . sasarvasa.nkShobhiNImudrayA
juShTaM bhavati . dvitIya.n sarvAshAparipUraka.n chakraM bhavati .
sakAmAdyAkarShiNIShoDashakaM bhavati . saguptaM bhavati . tripureshvaryAdhiShThitaM
bhavati . sarvavidrAviNImudrayA juShTaM bhavati . tR^itIya.n sarvasa.nkShobhaNa.n chakraM bhavati . sAna~NgakusumAdyaShTakaM bhavati . saguptataraM bhavati .
tripurasundaryAdhiShThitaM bhavati . sarvAkarShiNImudrayA juShTaM bhavati .
turIya.n sarvasaubhAgyadAyaka.n chakraM bhavati .
sasarvasa.nkShobhiNyAdidvisaptakaM bhavati . sasampradAyaM bhavati .
tripuravAsinyAdhiShThitaM bhavati . sasarvavasha.nkariNImudrayA
juShTaM bhavati . turIyAnta.n sarvArthasAdhaka.n chakraM bhavati .
sasarvasiddhipradAdidashakaM bhavati . sakalakaulaM bhavati .
tripurAmahAlakShmyAdhiShThitaM bhavati . mahonmAdinImudrayA
juShTaM bhavati . ShaShTha.n sarvarakShAkara.n chakraM bhavati .
sasarvaj~natvAdidashakaM bhavati . sanigarbhaM bhavati .
tripuramAlinyAdhiShThitaM bhavati . mahA~NkushamudrayA juShTaM
bhavati . saptama.n sarvarogahara.n chakraM bhavati . sarvavashinyAdyaShTakaM
bhavati . sarahasyaM bhavati . tripurasiddhyAdhiShThitaM bhavati .
sakhecharImudrayA juShTaM bhavati . aShTama.n sarvasiddhiprada.n
chakraM bhavati . sAyudhachatuShTayaM bhavati . saparApararahasyaM
bhavati . tripurAmbayAdhiShThitaM bhavati . bIjamudrayAdhiShThitaM
bhavati . navama.n chakranAyaka.n sarvAnandamaya.n chakraM bhavati .
sakAmeshvaryAditrikaM bhavati . sAtirahasyaM bhavati . mahAtripura\-
sundaryAdhiShThitaM bhavati . yonimudrayA juShTaM bhavati .
sa.nkrAmanti vai sarvANi chChandA.nsi chakArANi . tadeva chakra.n
shrIchakram.h . tasya nAbhyAmagnimaNDale sUryAchandramasau ..
tatro.nkArapIThaM pUjayitvA tatrAkSharaM bindurUpa.n tadantargata\-
vyomarUpiNI.n vidyAM paramA.n smR^itvA mahAtripurasundarImAvAhya .
kShIreNa snApite devi chandanena vilepite . bilvapatrArchite devi durge.aha.n
sharaNa.n gataH . ityekayarchA prArthya mAyAlakShmI tantreNa
pUjayediti bhagavAnabravIt.h . etairmantrairbhagavatI.n yajet.h . tato devI
prItA bhavati . svAtmAna.n darshayati . tasmAdya etairmantrairyajati sa
brahma pashyati . sa sarvaM pashyati . so.amR^itatva.n cha gachChati .
ya eva.n vedeti mahopaniShat.h ..
iti dvitIyopaniShat.h .. 2..
devA ha vai mudrAH sR^ijemeti bhagavantamabruvan.h .
tAnhovAcha bhagavAnavanikR^itajAnumaNDala.n vistIrya
padmAsana.n kR^itvA mudrAH sR^ijateti . sa sarvAnAkarShayati
yo yonimudrAmadhIte . sa sarva.n vetti . sa sarvaphalamashnute .
sa sarvAnbha~njayati . sa vidveShiNa.n stambhayati . madhyame
anAmikopari vinyasya kaniShThikA~NguShThato.adhIte
muktayostarjanyordaNDavadadhastAdeva.nvidhA prathamA sampadyate .
saiva militamadhyamA dvitIyA . tR^itIyA~NkushAkR^itiriti .
prAtilomyena pANI sa~NgharShayitvA~NguShThau sAgrimau
samAdhAya turIyA . paraspara.n kanIyasedaM madhyamAbaddhe
anAmike daNDinyau tarjanyAvAli~NgyAvaShTabhya madhyamAnakha\-
militA~NguShThau pa~nchamI . saivAgre.a~NkushAkR^itiH ShaShThI .
dakShiNashaye vAmabAhu.n kR^itvAnyonyAnAmike kanIyasImadhyagate
madhyame tarjanyAkrAnte saralAsva~NguShThau khecharI saptamI .
sarvordhve sarvasa.nhR^iti svamadhyamAnAmikAntare kanIyasi
pArshvayostarjanyAva~NkushADhye yuktA sA~NguShThayogato.anyonya.n
samama~njali.n kR^itvAShTamI . parasparamadhyamApR^iShThavartinyAvanAmike
tarjanyAkrAnte same madhyame AdAyA~NguShThau madhyavartinau
navamI pratipadyata iti .
saiveya.n kanIyase same antarite.a~NguShThau samAvantaritau
kR^itvA trikhaNDApadyata iti . pa~ncha bANAH pa~nchAdyA
mudrAH spaShTAH . kroma~NkushA . hasakhphreM khecharI .
ha.nsrau bIjAShTamI vAgbhavAdyA navamI dashamI cha
sampadyata iti . ya eva.n veda . athAtaH kAmakalAbhUta.n chakra.n
vyAkhyAsyAmo hrIM klImaiM blU.cM sraumete pa~ncha kAmAH
sarvachakra.n vyAvartante . madhyama.n kAma.n sarvAvasAne
sampuTIkR^itya blU~NkAreNa sampuTa.n vyApta.n kR^itvA dviraindavena
madhyavartinA sAdhyaM baddhvA bhUrjapatre yajati . tachchakra.n
yo vetti sa sarva.n vetti . sa sakalA.c.nllokAnAkarShayati . sa sarva.n
stambhayati . nIlIyukta.n chakra.n shatrUnmArayati . gati.n
stambhayati . lAkShAyukta.n kR^itvA sakalaloka.n vashIkaroti .
navalakShajapa.n kR^itvA rudratvaM prApnoti . mAtR^ikayA veShTita.n
kR^itvA vijayI bhavati . bhagA~NkakuNDa.n kR^itvAgnimAdhAya puruSho
haviShA hutvA yoShito vashIkaroti . vartule hutvA shriyamatulaM
prApnoti . chaturasre hutvA vR^iShTirbhavati . trikoNe hutvA
shatrUnmArayati . gati.n stambhayati . puShpANi hutvA vijayI bhavati .
mahArasairhutvA paramAnandanirbharo bhavati . gaNAnA.n tvA gaNapati.n
havAmahe kavi.n kavInAmupamashravastamam.h . jyeShTharAjaM
brahmaNAM brahmaNaspata A naH shruNvannUtibhiH sIda sAdanam.h .
ityevamAdyamakShara.n tadantyabindupUrNamityanenA~Nga.n spR^ishati .
gaM gaNeshAya nama iti gaNesha.n namaskurvIta . AUM namo bhagavate
bhasmA~NgarAgAyogratejase hanahana dahadaha pachapacha mathamatha
vidhva.nsayavidhva.nsaya halabha~njana shUlamUle vya~njanasiddhi.n kurukuru
samudraM pUrvapratiShThiata.n shoShayashoShaya stambhayastambhaya
paramantraparayantraparatantraparadUtaparakaTakaparachChedanakara
vidArayavidAraya chChindhichChindhi hrIM phaT svAhA . anena kShetrAdhyakShaM
pUjayediti . kulakumAri vidmahe mantrakoTisudhImahi . tannaH kauliH prachodayAt.h .
iti kumAryarchana.n kR^itvA yo vai sAdhako.abhilikhati so.amR^itatva.n gachChati .
sa yasha Apnoti . sa paramAyuShyamatha vA paraM brahma bhittvA tiShThati .
ya eva.n vedeti mahopaniShat.h .
iti tR^itIyopaniShat.h .. 3..
devA ha vai bhagavantamabruvandeva gAyatra.n hR^idaya.n no
vyAkhyAta.n traipura.n sarvottamam.h . jAtavedasasUktenAkhyAta.n
nastraipurAShTakam.h . yadiShTvA muchyate yogI janmasa.nsArabandhanAt.h .
atha mR^ityu.njaya.n no brUhItyevaM bruvatA.n sarveShA.n devAnA.n
shrutveda.n vAkyamathAtastryambakenAnuShTubhena mR^ityu.njaya.n darshayati .
kasmAttryambakamiti . trayANAM purANAmambaka.n svAmina.n tasmAduchyate
tryambakamiti . atha kasmAduchyate yajAmaha iti . yajAmahe sevAmahe vastu
mahetyakSharadvayena kUTatvenAkSharaikeNa mR^ityu.njayamityuchyate .
tasmAduchyate yajAmaha iti . atha kasmAduchyate sugandhimiti . sarvato yasha
Apnoti . tasmAduchyate sugandhimiti . atha kasmAduchyate puShTivardhanamiti .
yatsarvA.nllokAnsR^ijati yatsarvA.nllokA.nstArayati yatsarvA.nllokAnvyApnoti
tasmAduchyate puShTivardhanamiti . atha kasmAduchyate urvArukamiva
bandhanAnmR^ityormukShIyeti . sa.nlagnatvAdurvArukamiva mR^ityoH sa.nsArabandhanAtsa.nlagnatvAdbaddhatvAnmokShIbhavati mukto bhavati .
atha kasmAduchyate mAmR^itAditi amR^itatvaM prApnotyakSharaM
prApnoti svaya.n rudro bhavati .
devA ha vai bhagavantamUchuH sarva.n no vyAkhyAtam.h .
atha kairmantraiH stutA bhagavatI svAtmAna.n darshayati
tAnsarvA~nChaivAnvaiShNavAnsaurAngANeshAnno
brUhIti . sa hovAcha bhagavA.nstryambakenAnuShTubhena
mR^ityu.njayamupAsayet.h . pUrveNAdhvanA vyAptamekAkSharamiti
smR^itam.h . AUM namaH shivAyeti yAjuShamantropAsako
rudratvaM prApnoti . kalyANaM prApnoti . ya eva.n veda . tadviShNoH
paramaM pada.n sadA pashyanti sUrayaH . divIva chakShurAtatam.h .
viShNoH sarvatomukhasya sneho yathA palalapiNDamotaprotamanuvyApta.n
vyatirikta.n vyApnuta iti vyApnuvato viShNostatparamaM padaM para.n vyometi
paramaM padaM pashyanti vIkShante . sUrayo brahmAdayo devAsa iti
sadA hR^idaya adadhate . tasmAdviShNoH svarUpa.n vasati tiShThati
bhUteshviti vAsudeva iti . AUM nama iti trINyakSharANi . bhagavata iti
chatvAri . vAsudevAyeti pa~nchAkSharANi . etadvai vAsudevasya
dvAdashArNamabhyeti . sopaplava.n tarati . sa sarvamAyureti . vindate
prAjApatya.n rAyaspoSha.n gaupatya.n cha tamashnute pratyagAnandaM
brahmapuruShaM praNavasvarUpamakAra ukAro makAra iti . tAnekadhA
saMbhavati tadomiti . ha.nsaH shuchiShadvasurantarikShasaddhotA
vediShadatithirduroNasat.h . nR^iShadvarasadR^itasadvyomasadabjA gojA
R^itajA adrijA R^itaM bR^ihat.h . ha.nsa ityetanmanorakSharadvitIyena
prabhApu~njena saureNa dhR^itamabjA gojA R^itajA adrijA R^ita.n
satyA##-##prabhA##-##pu~nji##-##nyuShA##-##sandhyA##-##praj~nAbhiH
shaktibhiH pUrva.n sauramadhIyAnaH sarvaM phalamashnute .
sa vyomni parame dhAmani saure nivasate .
gaNAnA.n tvati traiShTubhena pUrveNAdhvanA manunaikArNena
gaNAdhipamabhyarchya gaNeshatvaM prApnoti . atha gAyatrI
sAvitrI sarasvatyajapA mAtR^ikA proktA tayA sarvamida.n vyAptam.h .
aiM vAgIshvari vidmahe klIM kAmeshvarI dhImahi . saustannaH shaktiH
prachodayAditi . gAyatrI prAtaH sAvitrI madhyandine sarasvatI sAyamiti
nirantaramajapA . ha.nsa ityeva mAtR^ikA . pa~nchAshadvarNavigraheNA\-
kArAdikShakArAntena vyAptAni bhuvanAni shAstrANi
chChandA.nsItyevaM bhagavatI.n sarva.n vyApnotItyeva tasyai vai namonama iti .
tAnbhagavAnabravIdetairmantrairnitya.n devI.n yaH stauti sa sarvaM pashyati .
so.amR^itatva.n cha gachChati . ya eva.n vedetyupaniShat.h ..
iti turIyopaniShat.h .. 4..
devA ha vai bhagavantamabruvansvAminnaH kathita.n sphuTa.n
kriyAkANDa.n saviShaya.n traipuramiti . atha paramanirvisheSha.n
kathayasveti . tAnhovAcha bhagavA.nsturIyayA mAyayAntyayA
nirdiShTaM paramaM brahmeti . paramapuruSha.n chidrUpa.n
paramAtmeti . shrotA mantA draShTAdeShTA spraShTAghoShTA
vij~nAtA praj~nAtA sarveShAM puruShANAmantaHpuruShaH
sa AtmA sa vij~neya iti . na tatra lokA alokA na tatra devA adevAH
pashavo.apashavastApaso na tApasaH paulkaso na paulkaso
viprA na viprAH . sa ityekameva paraM brahma vibhrAjate nirvANam.h .
na tatra devA R^iShayaH pitara Ishate pratibuddhaH sarvavidyeti .
tatraite shlokA bhavanti .
ato nirviShaya.n nityaM manaH kAryaM mumukShuNA .
yato nirviShayo nAma manaso muktiriShyate .. 1..
mano hi dvividhaM prokta.n shuddha.n chAshuddhameva cha .
ashuddha.n kAmasa.nkalpa.n shuddha.n kAmavivarjitam.h .. 2..
mana eva manuShyANA.n kAraNaM bandhamokShayoH .
bandhana.n viShayAsaktaM muktyai nirviShayaM manaH .. 3..
nirastaviShayAsa~Nga.n sa.nnirudhya mano hR^idi .
yadA yAtyamanIbhAvastadA tatparamaM padam.h .. 4..
tAvadeva niroddhavya.n yAvadhR^idigata.n kShayam.h .
etajj~nAna.n cha dhyAna.n cha sheSho.anyo granthavistaraH .. 5..
naiva chintya.n na chAchintya.n na chintya.n chintyameva cha .
pakShapAtavinirmuktaM brahma sampadyate dhruvam.h .. 6..
svareNa sallayedyogI svara.n saMbhAvayetparam.h .
asvareNa tu bhAvena na bhAvo bhAva iShyate .. 7..
tadeva niShkalaM brahma nirvikalpa.n nira~njanam.h .
tadbrahmAhamiti j~nAtvA brahma sampadyate kramAt.h .. 8..
nirvikalpamananta.n cha hetudR^iShTAntavarjitam.h .
aprameyamanAdyanta.n yajj~nAtvA muchyate budhaH .. 9..
na nirodho na chotpattirna baddho na cha sAdhakaH .
na mumukShurna vai mukta ityeShA paramArthatA .. 10..
eka evAtmA mantavyo jAgratsvapnasuShuptiShu .
sthAnatrayavyatItasya punarjanma na vidyate .. 12..
eka eva hi bhUtAtmA bhUtebhUte vyavasthitaH .
ekadhA bahudhA chaiva dR^ishyate jalachandravat.h .. 12..
ghaTasa.nvR^itamAkAsha.n nIyamAne ghaTe yathA .
ghaTo nIyeta nAkAsha.n tathA jIvo nabhopamaH .. 13..
ghaTavadvividhAkAraM bhidyamAM punaH punaH .
tadbhede cha na jAnAti sa jAnAti cha nityashaH .. 14..
shabdamAyAvR^ito yAvattAvattiShThati puShkale .
bhinne tamasi chaikatvameka evAnupashyati .. 15..
shabdArNamaparaM brahma tasminkShINe yadakSharam.h .
tadvidvAnakShara.n dhyAyedyadIchChechChAntimAtmanaH .. 16..
dve brahmaNI hi mantavye shabdabrahma para.n cha yat.h .
shabdabrahmaNi niShNAtaH paraM brahmAdhigachChati .. 17..
granthamabhyasya medhAvI j~nAnavij~nAnatatparaH .
palAlamiva dhAnyArthI tyajedgranthamasheShataH .. 18..
gavAmanekavarNAnA.n kShIrasyApyekavarNatA .
kShIravatpashyati j~nAnI li~Nginastu gavA.n yathA .. 19..
j~nAnanetra.n samAdhAya sa mahatparamaM padam.h .
niShkala.n nishchala.n shAntaM brahmAhamiti sa.nsmaret.h .. 20..
ityekaM parabrahmarUpa.n sarvabhUtAdhivAsa.n turIya.n
jAnIte so.akShare parame vyomanyadhivasati . ya etA.n vidyA.n
turIyAM brahmayonisvarUpA.n tAmihAyuShe sharaNamahaM
prapadye . AkAshAdyanukrameNa sarveShA.n vA etadbhUtAnAmAkAshaH
parAyaNam.h . sarvANi ha vA imAni bhUtAnyAkAshAdeva jAyante .
AkAsha eva lIyante . tasmAdeva jAtAni jIvanti . tasmAdAkAshajaM
bIja.n vindyAt.h . tadevAkAshapITha.n spArshanaM pITha.n
tejaHpIThamamR^itapITha.n ratnapITha.n jAnIyAt.h . yo jAnIte
so.amR^itatva.n cha gachChati . tasmAdetA.n turIyA.n shrIkAmarAjIyAmekAdashadhA
bhinnamekAkSharaM brahmeti yo jAnIte sa turIyaM padaM prApnoti .
ya eva.n vedeti mahopaniShat.h ..
iti pa~nchamopaniShat.h .. 5..
AUM bhadra.n karNebhiH shR^iNuyAma devAH .. bhadraM pashyemAkShabhiryajatrAH ..
sthiraira~NgaistuShTuvA{\m+}sastanUbhiH .. vyashema devahita.n yadAyuH ..
svasti na indro vR^iddhashravAH .. svasti naH pUShA vishvavedAH ..
svasti nastArkShyo ariShTanemiH .. svasti no bR^ihaspatirdadhAtu ..
AUM shAntiH shAntiH shAntiH .. hariH AUM tatsat.h ..
.. iti shrItripurAtApinyupaniShatsamAptA ..
##
Encoded by Sunder Hattangadi

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}