atha utkalikA-vallarIH

shrI-vR^indAraNya-vihAriNe namaH |

prapadya vR^indAvana-madhyam ekaH
kroshann asAv utkalikAkulAtmA |
udghATayAmi jvalataH kaThorAM
bAShpasya mudrAM hR^idi mudritasya ||1||

aye vR^indAraNya tvaritam iha te sevana-parAH
parAm ApuH ke vA na kila paramAnanda-padavIm |
ato nIchair yAche svayam adhipayor IkShaNa-vidher
vareNyAM me chetasy upadisha dishaM hA kuru kR^ipAm ||2||

tavAraNye devi dhruvam iha murAripor viharate
sadA preyasyeti shrutir api virauti smR^itir api |
iti j~nAtvA vR^inde charaNam abhivande tava kR^ipAM
kuruShva kShipraM me phalatu nitarAM tarSha-viTapI ||3||

hR^idi chira-vasad-AshA-maNDalAlamba-pAdau
guNavati tava nAthau nAthituM jantur eShaH |
sapadi bhavad-anuj~nAM yAchate devi vR^inde
mayi kira karuNArdrAM dR^iShTim atra prasIda ||4||

dadhataM vapur aMshu-kandalIM
dalad-indIvara-vR^inda-bandhurAm |
kR^ita-kA~nchana-kAnti-va~nchanaiH
sphuritAM chAru-marIchi-sa~nchayaiH ||5||

nichitaM ghana-cha~nchalA-tater
anukUlena dukUla-rochiShA |
mR^iga-nAbhi-ruchaH sa-nAbhinA
mahitAM mohana-paTTa-vAsasA ||6||

mAdhurIM prakaTayantam ujjvalAM
shrIpater api variShTha-sauShThavAm |
indirA-madhura-goShTha-sundarI-
vR^inda-vismaya-kara-prabhonnatAm ||7||

itara-jana-durghaTodayasya
sthira-guNa-ratna-chayasya rohaNAdrim |
akhila-guNavatI-kadamba-chetaH
prachura-chamatkR^iti-kAri-sad-guNADhyam ||8||

nistula-vraja-kishora-maNDalI-
mauli-maNDana-harinmaNIshvaram |
vishva-visphUrita-gokulollasan-
navya-yauvata-vataMsa-mAlikAm ||9||

svAnta-sindhu-makarIkR^ita-rAdhaM
hR^in-nishAkara-kura~Ngita-kR^iShNAm |
preyasI-parimalonmada-chittaM
preShTha-saurabha-hR^itendriya-vargAm ||10||

prema-mUrti-vara-kArttika-devI
kIrti-gAna-mukharI-kR^ita-vaMsham |
vishva-nandana-mukunda-samaj~nA-
vR^inda-kIrtana-rasaj~na-rasaj~nAm ||11||

nayana-kamala-mAdhurI-niruddha-
vraja-nava-yauvata-mauli-hR^in-marAlam |
vrajapati-suta-chitta-mIna-rAja-
grahaNa-paTiShTha-vilochanAnta-jAlAm ||12||

gopendra-mitra-tanayA-dhruva-dhairya-sindhu-
pAna-kriyA-kalasa-sambhava-veNu-nAdam |
vidyA-mahiShTha-mahatI-mahanIya-gAna-
saMmohitAkhila-vimohana-hR^it-kura~NgAm ||13||

kvApy Anusa~Ngikatayodita-rAdhikAkhyA-
vismAritAkhila-vilAsa-kalA-kalApam |
kR^iShNeti-varNa-yugala-shravaNAnubandha-
prAdurbhavaj-jaDima-Dambara-saMvitA~NgIm ||14||

tvAM cha vallava-purandarAtmaja
tvAM cha gokula-vareNya-nandini |
eSha mUrdhni rachitA~njalir nayan
bhikShate kim api durbhago janaH ||15||

hanta sAndra-karuNA-sudhA-jharI-
pUrNa-mAnasa-hradau prasIdatam |
durjane.atra dishataM rate nija-
prekShaNa-pratibhuvash ChaTAm api ||16||

shyAmayor nava-vayaH-suShamAbhyAM
gaurayor amala-kAnti-yashobhyAm |
kvApi vAm akhila-valgu-vataMsau
mAdhurI hR^idi sadA sphuratAn me ||17||

sarva-vallava-vareNya-kumArau
prArthaye bata yuvAM praNipatya |
lIlayA vitarataM nija-dAsyaM
lIlayA vitarataM nija-dAsyam ||18||

praNipatya bhavantam arthaye
pashupAlendra-kumAra kAkubhiH |
vraja-yauvata-mauli-mAlikA-
karuNA-pAtram imaM janaM kuru ||19||

bhavatIm abhivAdya chATubhir
varam Urjeshvari varyam arthaye |
bhavadIyatayA kR^ipAM yathA
mayi kuryAd adhikAM bakAntakaH ||20||

dishi vidishi vihAram AcharantaH
saha pashupAla-vareNya-nandanAbhyAm |
praNayi-jana-gaNAs tayoH kurudhvaM
mayi karuNAM bata kAkum Akalayya ||21||

giri-ku~nja-kuTIra-nAgarau
lalite devi sadA tavAshravau |
iti te kila nAsti duShkaraM
kR^ipayA~NgIkuru mAm ataH svayam ||22||

bhAjanaM varam ihAsi vishAkhe
gaura-nIla-vapuShoH praNayAnAm |
tvaM nija-praNayinor mayi tena
prApayasva karuNArdra-kaTAkSham ||23||

subala vallava-varya-kumArayor
dayita-sakhas tvam asi vraje |
iti tayoH purato vidhuraM janaM
kShaNam amuM  kR^ipayAdya nivedaya ||24||

shR^iNuta kR^ipayA hanta prANeshayoH praNayoddhurAH
kim api yad ayaM dInaH prANI nivedayati kShaNam |
pravaNita-manAH kiM yuShmAbhiH samaM tilam apy asau
yugapad anayoH sevAM premNA kadApi vidhAsyati ||25||

kva jano.ayam atIva pAmaraH
kva durApaM ratibhAgbhir apy adaH |
iyam ullayaty ajarjarA gurur
uttarSha-dhurA tathApi mAm ||26||

dhvanta-brahma-marAla-kUjita-bharair UrjeshvarI-nUpura-
kvAnair Urjita-vaibhavas tava vibho vaMshI-prasUtaH kalaH |
labdhaH shasta-samasta-nAda-nagarI-sAmrAjya-lakShmIM parAm
ArAdhyaH praNayAt kadA shravaNayor dvandvena mandena me ||27||

stambhaM prapa~nchayati yaH shikhi-pi~nCha-mauli-
veNor api pravalayan svara-bha~Ngam uchchaiH |
nAdaH kadA kShaNam avApsyati te mahatyA
vR^indAvaneshvari sa me shravaNAtithitvam ||28||

kasya sambhavati hA tad ahar vA
yatra vAM prabhu-varau kala-gItiH |
unnaman madhurimormi-samR^iddhA
duShkR^itaM shravaNayor vidhunoti ||29||

parimala-saraNir vAM gaura-nIlA~Nga-rAjan-
mR^igamada-ghusR^iNAnugrAhiNI nAgareshau |
sva-mahima-paramANu-prAvR^itAsheSha-gandhA
kim iha mama bhavitrI ghrANa-bhR^i~NgotsavAya ||30||

pradeshinIM mukha-kuhare vinikShipan
jano muhur vana-bhuvi phutkaroty asau |
prasIdataM kShaNam adhipau prasIdataM
dR^ishoH puraH sphuratu taDid-ghana-chChaviH ||31||

vraja-madhura-jana-vrajAvataMsau
kim api yuvAm abhiyAchate jano.ayam |
mama nayana-chamatkR^itiM karotu
kShaNam api pAda-nakhendu-kaumudI vAm ||32||

atarkita-samIkShaNollasitayA mudA shliShyator
niku~nja-bhavanA~Ngane sphurita-gaura-nIlA~NgayoH |
ruchaH prachurayantu vAM puraTa-yUthikA-ma~njarI-
virAjad-ali-ramyayor mama chamatkR^itiM chakShuShoH ||33||

sAkShAtkR^itiM bata yayor na mahattamo.api
kartuM manasy api manAk prabhutAm upaiti |
ichChann ayaM nayanayoH pathi tau bhavantau
jantur vijitya nijagAra bhiyaM hriyaM cha ||34||

athavA mama kiM nu dUShaNaM
bata vR^indAvana-chakravartinau |
yuvayor guNa-mAdhurI navA
janam unmAdayatIva kaM na vA ||35||

ahaha samayaH so.api kShemo ghaTeta narasya kiM
vraja-naTa-varau yatroddIptA kR^ipA-sudhayojjvalA |
kR^ita-parijana-shreNi-chetash-chakora-chamatkR^itir
vrajati yuvayoH sA vaktrendu-dvayI nayanAdhvani ||36||

priya-jana-kR^ita-pArShNi-grAha-charyonnatAbhiH
sugahana-ghaTanAbhir vakrimADambareNa |
praNaya-kalaha-keli-kShvelibhir vAm adhIshau
kim iha rachayitavyaH karNayor vismayo me ||37||

nibhR^itam apahR^itAyAm etayA vaMshikAyAM
dishi dishi dR^isham utkAM prerya sampR^ichChamAnaH |
smita-shavala-mukhIbhir vipralabdhaH sakhIbhis
tvam aghahara kadA me tuShTim akShNor vidhatse ||38||

kShatam adhara-dalasya svasya kR^itvA tvad-AlI-
kR^itam iti lalitayAM devi kR^iShNe bruvANe |
smita-shavala-dR^ig-antA ki~nchid uttambhita-bhrUr
mama mudam upadhAsyaty Asya-lakShmIH kadA te ||39||

katham idam api vA~nChituM nikR^iShTaH
sphuTam ayam arhati jantur uttamArham |
guru-laghu-gaNanojjhitArta-nAthau
jayatitarAm athavA kR^ipA-dyutir vAm ||40||

vR^itte daivAd vraja-pati-suhR^in-nandinI-vipralambhe
saMrambheNollalita lalitA-sha~NkayodbhrAnta-netraH |
tvaM shArIbhiH samaya-paTubhir drAg upAlabhyamAnaH
kAmaM dAmodara mama kadA modam akShNor vidhAtA ||41||

rAsArambhe vilasati parityajya goShThAmbujAkShI-
vR^indaM vR^indAvana-bhuvi rahaH keshavenopanIya |
tvAM svAdhIna-priyatama-pada-prApaNenArchitA~NgIM
dUre dR^iShTvA hR^idi kim achirAd arpayiShyAmi darpam ||42||

ramyA shoNa-dyutibhir alakair yAvakenorja-devyAH
sadyas tandrI-mukula-dala-sa-klAnta-netrA vrajesha |
prAtash chandrAvalI-parijanaiH sAchi dR^iShTA vivarNair
Asya-shrIs te praNayati kadA saMmadaM me mudaM cha ||43||

vyAtyukShI-rabhasotsave.adhara-sudhA-pAna-glahe prastute
jitvA pAtum athotsukena hariNA kaNThe dhR^itAyAH puraH |
IShach-ChoNima-mIlitAkSham anR^iju-bhrU-valli-helonnataM
prekShiShye tava sa-smitaM sa-ruditaM tad devi vaktraM kadA ||44||

AlIbhiH samam abhupetya shanakair gAndharvikAyAM mudA
goShThAdhIsha-kumAra hanta kusuma-shreNIM harantyAM tava |
prekShiShye purataH pravishya sahasA gUDha-smitAsyaM balAd
AchChindAnam ihottarIyam urasas tvAM bhAnumatyAH kadA ||45||

uda~nchati madhUtsave sahacharI-kulenAkule kadA
tvam avalokyase vraja-purandarasyAtmaja |
smitojjvala-mad-IshvarI-chala-dR^ig-a~nchala-preraNAn
nilIna-guNa-ma~njarI-vadanam atra chumban mayA ||46||

kalinda-tanayA-taTi-vana-vihArataH shrAntayoH
sphuran-madhura-mAdhavI-sadana-sImni vishrAmyatoH |
vimuchya rachayiShyate sva-kacha-vR^indam atrAmunA
janena yuvayoH kadA pada-saroja-san-mArjanam ||47||

parimilad-upabarhaM pallava-shreNibhir vAM
madana-samara-charyA-bhAra-paryAptam atra |
mR^idubhir amala-puShpaiH kalpayiShyAmi talpaM
bhramara-yuji niku~nje hA kadA ku~nja-rAjau ||48||

ali-dyutibhir AhR^itair mihira-nandinI-nirjharAt
puraH puraTa-jharjharI-paribhR^itaiH payobhir mayA |
nija-praNayibhir janaiH saha vidhAsyate vAM kadA
vilAsa-shayana-sthayor iha padAmbuja-kShAlana ||49||

lIlA-talpe kalita-vapuShor vyAvahAsIm analpAM
smitvA smitvA jaya-kalanayA kurvatoH kautukAya |
madhye ku~njaM kim iha yuvayoH kalpayiShyAmy adhIshau
sandhArambhe laghu laghu padAmbhoja-saMvAhanAni ||50||

pramada-madana-yuddhArambha-sambhAvukAbhyAM
pramudita-hR^idayAbhyAM hanta vR^indAvaneshau |
kim aham iha yuvAbhyAM pAna-lIlonmukhAbhyAM
chaShakam upahariShye sAdhu mAdhvIka-pUrNam ||51||

kadAhaM seviShye vratati-chamarI-chAmara-marud-
vinodena krIDA-kusuma-shayane nyasta-vapuShau |
daronmIlan-netrau shrama-jala-kaNa-klidyad-alakau
bruvANAv anyonyaM vraja-nava-yuvAnAv iha yuvAm ||52||

chyuta-shikhara-shikhaNDaM ki~nchid-utsraMsamAnAM
viluThad-amala-puShpa-shreNim unmuchya chUDAm |
danuja-damana devyAH shikShayA te kadAhaM
kamala-kalita-koTiM kalpayiShyAmi veNIm ||53||

kamala-mukhi vilAsair aMsayoH sraMsitAnAM
tulita-shikhi-kalApaM kuntalAnAM kalApam |
tava kavaratayAvirbhAvya modAt kadAhaM
vikacha-vichakilAnAM mAlayAla~NkariShye ||54||

mithaH-spardhAbaddhe balavati valaty akSha-kalahe
vrajesha tvAM jitvA vraja-yuvati-dhammilla-maNinA |
dR^igantena kShiptAH paNam iha kura~NgaM tava kadA
grahIShyAmo baddhA kalayati vayaM tat-priya-gaNe ||55||

kiM bhaviShyati shubhaH sa vAsaro
yatra devi nayanA~nchalena mAm |
garvitaM vihasituM niyokShyase
dyUta-saMsadi vijitya mAdhavam ||56||

kiM janasya bhavitAsya tad dinaM
yatra nAtha muhur enam AdR^itaH |
tvaM vrajeshvara-vayasya-nandinI-
mAna-bha~Nga-vidhim arthayiShyase ||57||

tvad-AdeshaM shArI-kathitam aham AkarNya mudito
vasAmi tvat-kuNDopari sakhi vilambas tava katham |
itIdaM shrIdAma-svasari mama sandesha-kusumaM
hareti tvaM dAmodara janam amuM notsyasi kadA ||58||

shaTho.ayaM nAvekShya punar iha mayA mAna-dhanayA
vishantaM strI-veshaM subala-suhR^idaM vAraya girA |
idaM te sAkUtaM vachanam avadhAryochChalita-dhIsh
ChalATopair gopa-pravaram avarotsyAmi kim aham ||59||

aghahara balIvardaH preyAn navas tava yo vraje
vR^iShabha-vapuShA daityenAsau balAd abhiyujyate |
iti kila mR^iShA-gIrbhish chandrAvalI-nilaya-sthitaM
vanabhuvi kadA neShyAmi tvAM mukunda mad-IshvarIm ||60||

nigirati jagad uchchaiH sUchi-bhedye tamisre
bhramara-ruchi-nicholenA~Ngam AvR^itya dIptam |
parihR^ita-maNi-kA~nchI-nUpurAyAH kadAhaM
tava navam abhisAR^iaM kAR^iayiShyAmi devi ||61||

Asye devyAH katham api mudA nyastam AsyAt tvayesha
kShiptaM parNe praNaya-janitAd devi vAmyAt tvayAgre |
AkUtaj~nas tad atinibhR^itaM charvitaM kharvitA~Ngas
tAmbUlIyaM rasayati janaH phulla-romA kadAyam ||62||

parasparam apashyatoH praNaya-mAninor vAM kadA
dhR^itotkelikayor api svam abhirakShator Agraham |
dvayoH smitam uda~nchaye nudasi kiM mukundAmunA
dR^iganta-naTanena mAm uparamety alIkoktibhiH ||63||

kadApy avasaraH sa me kim u bhaviShyati svAminau
jano.ayam anurAgataH pR^ithuni yatra ku~njodare |
tvayA saha tavAlike vividha-varNa-gandha-dravyaish
chiraM virachayiShyati prakaTa-patra-vallI-shriyam ||64||

idaM sevA-bhAgyaM bhavati sulabhaM yena yuvayosh
ChaTApy asya premNaH sphurati nahi suptAv api mama |
padArthe.asmin yuShmad-vrajam anu nivAsena janitas
tathApy AshA-bandhaH parivR^iDha-varau mAM draDhayati ||65||

prapadya bhavadIyatAM kalita-nirmala-premabhir
mahadbhir api kAmyate kim api yatra tArNaM januH |
kR^itAtra kujaner api vraja-vane sthitir me yayA
kR^ipAM kR^ipaNa-gAminIM sadasi naumi tAm eva vAm ||66||

mAdhavyA madhurA~Nga kAnana-pada-prAptAdhirAjya-shriyA
vR^indAraNya-vikAsi-saurabha-tate tApi~nCha-kalpa-druma |
nottApaM jagad eva yasya bhajate kIrti-chChaTA-chChAyayA
chitrA tasya tavA~Nghri-saMnidhi-juShAM kiM vA phalAptir nR^INAm ||67||

tval-lIlA-madhu-kulyayollasitayA kR^iShNAmbudasyAmR^itaiH
shrI-vR^indAvana-kalpa-valli-paritaH saurabhya-visphArayA |
mAdhuryeNa samastam eva pR^ithunA brahmANDam apyAyitaM
nAshcharyaM bhuvi labdha-pAda-rajasAM parvonnatir vIrudhAm ||68||

pashupAla-vareNya-nandanau
varam etaM muhur arthaye yuvAm |
bhavatu praNayo bhave bhave
bhavator eva padAmbujeShu me ||69||

udgIrNAbhUd utkalikA-vallarir agre
vR^indATAvyAM nitya-vilAsa-vratayor vAm |
vA~N-mAtreNa vyAharato.apy ullalam etAm
AkarNyeshau kAmita-siddhiM kurutaM me ||70||

chandrAshva-bhuvane shAke pauShe gokula-vAsinA |
iyam utkalikA-pUrvA vallarI nirmitA mayA ||71||

1471 shakAbde 1550 khR^iShTAbde

ity utkalikA-vallarI samAptA ||