upadeshAmR^itam

rUpagosvAmivirachitam

vAcho vegaM manasaH krodhavegaM
jihvAvegam udaropasthavegam |
etAn vegAn yo viShaheta dhIraH
sarvAm apImAM pR^ithivIM sa shiShyAt ||1||

atyAhAraH prayAsash cha
prajalpo niyamAgrahaH |
janasa~Ngash cha laulyaM cha
ShaDbhir bhaktir vinashyati ||2|

dadAti pratigR^ihNAti
guhyam AkhyAti pR^ichChati |
bhu~Nkte bhojayate chaiva
ShaDvidhaM prItilakShaNam  ||3|

utsAhAn nishchayAd dhairyAt
tat-tat-karma-pravartanAt |
sa~Nga-tyAgAt sato vR^itteH
ShaDbhir bhaktiH prasidhyati ||4||

kR^iShNeti yasya giri taM manasAdriyeta
dIkShAsti chet praNatibhish cha bhajantam Isham |
shushrUShayA bhajanavijam ananyam anya
nindAdishUnyahR^idam Ipsitasa~NgalabdhyA ||5||

dR^iShTaiH svabhAvajanitair vapuShash cha doShair
na prAkR^itatvam iha bhakta janasya pashyet |
ga~NgAmbhasAM na khalu budbudaphenapa~Nkair
brahmadravatvam apagachChati nIradharmaiH ||6||

syAt kR^iShNanAmacharitAdisitApy avidyA
pittopataptarasanasya na rochikA nu |
kintv AdarAd anudinaM khalu saiva juShTA
svAdvI kramAd bhavati tadgadamUlahantrI ||7||

tannAmarUpacharitAdisukIrtanAnu
smR^ityoH krameNa rasanAmanasI niyojya |
tiShThan vraje tadanurAgi janAnugAmI
kAlaM nayed akhilam ity upadeshasAram ||8||

vaikuNThAj janito varA madhupurI tatrApi rAsotsavAd
vR^indAraNyam udArapANiramaNAt tatrApi govardhanaH |
rAdhAkuNDam ihApi gokulapateH premAmR^itAplAvanAt
kuryAd asya virAjato giritaTe sevAM vivekI na kaH ||9||

karmibhyaH parito hareH priyatayA vyaktiM yayur jAninas
tebhyo jAnavimuktabhaktiparamAH premaikaniShThAs tataH |
tebhyas tAH pashupAlapa~NkajadR^ishas tAbhyo .api sA rAdhikA
preShThA tadvad iyaM tadIyasarasI tAM nAshrayet kaH kR^itI ||10||

kR^iShNasyochchaiH praNayavasatiH preyasIbhyo .api rAdhA
kuNDaM chAsyA munibhir abhitas tAdR^ig eva vyadhAyi |
yat preShThair apy alam asulabhaM kiM punar bhaktibhAjAM
tat premedaM sakR^id api saraH snAtur AviShkaroti ||11||