atha nAyikAbhedaprakaraNam yUthe.apyavAntaragaNAsteShu cha kashchidgaNastrichaturAbhiH | iha pa~nchaShAbhiranyaH saptAShTAbhistathetyAdyAH ||1|| nAsau nATye rase mukhye yat paroDhA nigadyate | tat tu syAt prAkR^itakShudranAyikAdyanusArataH ||2|| tathA choktam neShTA yada~Ngini rase kavibhirparoDhA tadgokulAmbujadR^ishAM kulam antarena | AshAMsayA rasavidheravatAritAnAM kaMsAriNA rasikamaNDalashekhareNa ||3|| vrajendranandanatvena suShThu niShThAm upeyayuH | yAsAM bhAvasya sA mudrA sadbhaktairapi durgamA ||4|| yathA lalitamAdhave 614 gopInAM pashupendranandanajuSho bhAvasya kastAM krtI vij~nAtuM kShamate durUhapadavIsa~nchAriNaH prakriyAm | AviShkurvati vaiShNavIm api tanuM tasminbhujairjiShNubhi ryAsAM hanta chaturbhiradbhutaruchiM rAgodayaH ku~nchati ||5|| bhujAchatuShTayaM kvApi narmaNA darshayannapi | vR^indAvaneshvarIpremNA dvibhujaH kriyate hariH ||6|| yathA rAsArambhavidhau nilIya vasatA ku~nje mR^igAkShIgaNai rdR^iShTaM gopayituM svam uddhuradhiyA yA suShThu sandarshitA | rAdhAyAH praNayasya hanta mahimA yasya shriyA rakShituM sA shakyA prabhaviShNunApi hariNA nAsIch chaturbAhutA ||7|| api cha sAmAnyAyA rasAbhAsaprasa~NgAt tAdR^ig apyasau | bhAvayogAt tu sairindhrI parakIyaiva sammatA ||8|| yathA cha prA~nchaH shR^i~NgAratilake 16264 sAmAnyA vanitA veshyA sA dravyaM param ichChatA | guNahIne cha na dveSho nAnurAgo guNinyapi | shR^i~NgArAbhAsa etAsu na shR^i~NgAraH kadAchana ||9|| iti | svakIyAsh cha paroDhAsh cha yA dvidhA parikIrtitAH | mugdhA madhyA pragalbheti pratyekaM tAstridhA matAH ||10|| bhedatrayam idaM kaishchit svIyAyA eva varNitam | tathApi satkavigranthe dR^iShTatvAt tadanAdR^itam ||11|| tathA prAchInaish choktam udAhR^itibhidAM kechit sarvAsAm eva tanvate | tAstu prAyeNa dR^ishyante sarvatra vyavahArataH ||12|| iti | tatra mugdhA mugdhA navavayaHkAmA ratau vAmA sakhIvashA | raticheShTAsu savrIDachArugUDhaprayatnabhAk ||13|| kR^itAparAdhe dayite bAShparuddhAvalokanA | priyApriyoktau chAshaktA mAne cha vimukhI sadA ||14|| tatra navavayAH viramati shaishavashishire pravishati yauvanamadhau vishAkhAyAH | dIvyati lochanakamalaM vadanasudhAMshush cha visphurati ||15|| yathA vA bAlyadhvAnta sakhe prayAhi tarasA rAdhAvapurdvIpata stAruNyadyumaNeryadeSha vijayArambhaH puro jR^imbhate | kR^iShNavyomni ruchirdarottaralatA tArAdyutau kApyuraH pUrvAdrau suShamonnatiH smitakalA pashyAdya vaktrAmbuje ||16|| navakAmA yathA bAle kaMsabhidaH smarotsavarase prastUyamAne ChalAt prauDhAbhIravadhUbhirAnatamukhI tvaM karNam adhyasyasi | savyAjaM vanamAlikAvirachane.apyullAsam Alambase ra~NgaH ko.ayam avAtaradvada sakhi svAnte navInastava ||17|| ratau vAmA yathA navabAlikAsmi kuru narma nedR^ishaM padavIM vimu~ncha shikhipi~nChashekhara | virachanti pashya paTavastaTIm imA maravindabandhuduhiturnatabhruvaH ||18|| yathA vA yamunApuline vilokanAnme chalitAM smerasakhIgR^ihItahastAm | ayi mu~ncha karaM mameti ka~njad vachanAM kha~njanalochanAM smarAmi ||19|| sakhIvashA vrajarAjakumAra karkashe sukumArIM tvayi nArpayAmyamum | kalabhendrakare navodayAM nalinIM kaH kurute janaH kR^itI ||20|| yathA vA na svIkR^itA sakhi mayA srag ihAsti kaundI kiM dIrgharoShavikaTAM bhrukuTIM tanoShi | kShipteyam atra mama maNDanapeTikAyAM chedvR^indayA chaTulayA kim ahaM kariShye ||21| savrIDarataprayatnA yathA dvitrANyetya padAni ku~njavasaterdvAre vilAsonmukhI sadyaH kampatara~Ngada~NgalatikA tiryagvivR^ittA hriyA | bhUyaH snigdhasakhIgirAM parimalaistalpAntam AseduShI svAntaM hanta jahAra hArihariNInetrA mama shyAmalA ||22|| roShakR^itabAShpamaunA yathA siddhAparAdham api shuddhamanAH sakhI me tvAM vakShyate katham adakShiNam akShameva | nemAM viDambaya kadambavanIbhuja~Nga vaktraM pidhAya kurutAm iyam ashrumokSham ||23|| atha mAne vimukhI mR^idvI tathAkShamA cheti sA mAne vimukhI dvidhA ||24|| tatra mR^idvI yathA rasasudhAkAre 144 vyAvR^ittikramaNodyame.api padayoH pratyudgatau vartanaM bhrUbhedo.api tadIkShaNavyasaninA vyasmAri me chakShuShA | chATUktAni karoti dagdharasanA rukShAkShre.apyudyatA sakhyaH kiM karavANi mAnasamaye sa~NghAtabhedo mama ||25|| akShamA yathA AbhIrapa~NkajadR^ishAM bata sAhasikyaM yA keshave kShaNam api praNayanti mAnam | mAneti varNayugale.api mama prayAte karNA~NganaM vahati vepathum antarAtmA ||26|| atha madhyA samAnalajjAmadanA prodyattAruNyashAlinI | ki~nchitpragalbhavachanA mohAntasuratakShamA | madhyA syAt komalA kvApi mAne kutrApi karkashA ||27|| tatra samAnalajjAmadanA yathA vikirati kila kR^iShNe netrapadmaM satR^iShNe namayati mukham antaHsmeram AvR^itya rAdhA | nidadhati dR^isham asminnanyataH prekShate.amuM tadapi sarasijAkShI tasya modaM vyatAnIt ||28|| prodyattAruNyashAlinI yathA bhruvorvikShepaste kavalayati mInadhvajadhanuH prabhArambhaM rambhAshriyam upahasatyuruyugalam | kuchadvandvaM dhatte rathacharaNayUnorvilasitaM varorUNAM rAdhe taruNimani chUrAmaNirasi ||29|| ki~nchitpragalbhoktiH yathoddhavasandeshe 54 madvaktrAmbhoruhaparimalonmattasevAnubandhe patyuH kR^iShNabhramara kuruShe kiMtarAm antarAyam | tR^iShNAbhistvam yadi kalarutavyagrachittastadAgre puShpaiH pANDuchChavim aviralairyAhi puMnAgaku~njam ||30|| mohAntasuratakShamA yathA shramajalaniviDAM nimIlitAkShIM shlathachikurAm anadhInabAhuvallIm | muditamanasam asmR^itAnyabhAvAM ratishayane nishi gopikAM smarAmi ||31|| mAne komalA yathA prANAstvam eva kim iva tvayi gopanIyaM mAnAya keshimathane sakhi nAsmi shaktA | ehi prayAva ravijAtaTaniShkuTAya kalyANi phullakusumAvachayachChalena ||32|| mAne karkashA yathA vidagdhamAdhave 530 mudhA mAnonnAhAdglapayasi kim a~NgAni kaThine ruShaM dhatse kiMvA priyaparijanAbhyarthanavidhau | prakAmaM te ku~njAlayagR^ihapatistAmyati puraH kR^ipAlakShmIvantaM chaTulaya dR^igantaM kShaNam iha ||33|| tridhAsau mAnavR^itteH syAddhIrAdhIrobhayAtmikA ||34|| tatra dhIramadhyA dhIrA tu vakti vakroktyA sotprAsaM sAgasaM priyam ||35|| yathA svAminyuktam idaM tavA~njananavAlaktadravaiH sarvataH saMkrAntairdhR^itanIlalohitatanoryach chandralekhAdhR^itiH | ekaM kintvavalochayAmyanuchitaM haMho pashUnAM pate dehArdhe dayitAM vahanbahumatAm atrAsi yannAgataH ||36|| atha adhIramadhyA adhIrA paruShairvAkyairnirasyedvallabhaM ruShA ||37|| yathA uttu~NgastanamaNDalIsahacharaH kaNThe sphuranneSha te hAraH kaMsaripo kShapAvilasitaM niHsaMshayaM shaMsati | dhUrtAbhIravadhUpratAritamate mithyAkathAghargharI jha~NkAronmukhara prayAhi tarasA yuktAtra nAvasthitiH ||38|| atha dhIrAdhIramadhyA dhIrAdhIra tu vakroktyA sabAShpaM vadati priyam ||39|| yathA gopendranandana na rodaya yAhi yAhi sA te vidhAsyati ruShaM hR^idayAdhidevI | tvanmaulimAlyahR^itayAvakapa~Nkam asyAH pAdadvayaM punaranena vibhUShayAdya ||40|| yathA vA tAm eva pratipadya kAmavaradAM sevasva devIM sadA yasyAH prApya mahAprasAdam adhunA dAmodarAmodase | pAdAlaktachitaM shirastava mukhaM tAmbUlasheShojjvalaM kaNThash chAyam urojakuTmalasuhR^innirmAlyamAlyA~NkitaH ||41|| sarva eva rasotkarSho madhyAyAm eva yujyate | yadasyAM vartate vyaktA maugdhyaprAgalbhyayoryutiH ||42|| atha pragalbhA pragalbhA pUrNatAruNyA madAndhoruratotsukA | bhUribhAvodgamAbhij~nA rasenAkrAntavallabhA | atiprauDhokticheShTAsau mAne chAtyantakarkashA ||43|| tatra pUrNatAruNyA yathA muShNAti stanayugmam abhram upateH kumbhasthalIvibhramaM visphAraM cha nitambamaNDalam idaM rodhaHshriyaM luNThati | dvandvaM lochanayosh cha lolashapharIvisphUrjitaM spardhate tAruNyAmR^itasampadA tvam adhikaM chandrAvali kShAlitA ||44|| atha madAndhA niShkrAnte ratiku~njataH parijane shayyAm avApayya mAM svairaM gauri riraMsayA mayi dR^ishaM dIrghAM kShipatyachyute | sadyaHprodyadurupramodalaharIvismAritAtmasthiti rnAhaM tatra vidAmbabhUva kim abhUt kR^ityaM kilAtaHparam ||45|| ururatotsukA yathA uda~nchadvaiyAtyAM pR^ithunakhapadAkIrNamithunAM skhaladbarhAkalpAM daladamalagu~njAmaNisarAm | mamAna~NgakrIDAM sakhi valayariktIkR^itakarAM manastAm evochchairmaNitaramaNIyAM mR^igayate ||46|| bhUribhAvodgamAbhij~nA sAchipre~NkhadapA~NgashR^i~NkhalashikhA visphAritabhrUlatA sAkUtasmitakuDmalAvR^itamukhI protkShiptaromA~NkurA | ku~nje gu~njadalau virAjasi chirAt kUjadvipa~nchIsvarA baddhuM bandhuragAtri kR^iShNahariNaM sha~Nke tvam AkA~NkShasi ||47|| rasAkrAntavallabhA yathA avachinu kusumAni prekShya chAruNyaraNye virachaya punarebhirmaNDanAnyujjvalAni | madhumathana mada~Nge kalpayAkalpam etai ryuvatiShu mama bhImaM rautu saubhAgyabherI ||48|| atiprauDhoktiH yathA padyAvalyAM 280 kAkuM karoShi gR^ihakoNakarIShapu~nja gUDhA~Nga kiM nanu vR^ithA kitava prayAhi | kutrAdya jIrNataraNibhramaNAtibhIta gopA~NganAgaNaviDambanachAturI te ||49|| atiprauDhacheShTA yathA sakhyAstavAna~NgaraNotsave.adhunA nanarta muktAlatikA stanopari | utplutya yasyAH sakhi nAyakash chalo dhIraM muhurme prajahAra kaustubham ||50|| mAne.atyantakarkashA yathA uddavasandeshe 53 medinyAM te luThati dayitA mAlatI mlAnapuShpA tiShThandvAre ramaNi vimanAH khidyate padmanAbhaH | tvaM chonnidrA kShapayasi nishAm rodayantI vayasyA mAne kaste navamadhurimA taM tu nAlokayAmi ||51|| mAnavR^itteH pragalbhApi tridhA dhIrAdibhedataH ||52|| tatra dhIrapragalbhA udAste surate dhIrA sAvahitthA cha sAdarA ||53|| yathA devI nAdya mayArchiteti na hare tAmbUlam AsvAditaM shilpaM te parichitya tapsyati gR^ihItya~NgI kR^itA na srajaH | AhUtAsmi gR^ihe vrajeshituriti kShipraM vrajantyA vacha stasyAshrAvi na bhadrayeti vinayairmAnaH pramANIkR^itaH ||54|| yathA vA kaNThe nAdya karomi durvratahatA ramyAm imAM te srajaM vaktuM suShThu na hi kShamAsmi kaThinairmaunaM dvijairgrAhitA | kA tvAM projjhya chalet khaleyam achiraM shvashrUrna chedAhvaye ditthaM pAlikayA harau vinayato manyurgabhIrIkR^itaH ||55|| yathA vA kuchAlambhe pANirna hi mama bhavatyA vighaTito muhush chumbArambhe mukham api na sAchIkR^itam abhUt | parIrambhe chandrAvali na cha vapuH ku~nchitam idaM kva labdhA mAnasya sthitiriyam anAlokitacharI ||56|| atha adhIrapragalbhA santarjya niShThuraM roShAdadhIrA tADayet priyam ||57|| yathA mugdhAH kaMsaripo vayaM rachayituM jAnImahe nochitaM tAM nItikramakovidAM priyasakhIM vandemahi shyAmalAm | mallIdAmabhiruchChalanmadhukaraiH saMyamya kaNThe yayA sAkShepaM chakitekShaNastvam asakR^it karNotpalaistADyase ||58|| atha dhIrAdhIrapragalbhA dhIrAdhIraguNopteA dhIrAdhIreti kathyate ||59|| yathA sphurati na mama jAtu krodhagandho.api chitte vratam anu gahanAbhUt kintu maune manIShA | aghahara laghu yAhi vyAja AstAM yadetAH kusumarasanayA tvAM bandhum ichChanti sakhyaH ||60|| yathA vA kR^itAgasi harau puraH sphurati taM bhramadbhrUlatA titADayiShuruddhurA shrutitaTAdvikR^iShyotpalam | na tena tam atADayat kim api yAhi yAhIti sA bruvatyajani ma~NgalA sakhi paraM parA~nchanmukhI ||61|| kishorikANAm apyAsAm AkR^iteH prakR^iterapi | prAgalbhyAdiva kAsAMchit pragalbhAtvam udIryate ||62|| madhyA tathA pragalbhA cha dvidhA sA paribhidyate | jyeShThA chApi kaniShThA cha nAyakapraNayaM prati ||63|| yathA supte prekShya pR^ithak puraH priyatame tatrArpayanpuShpajaM lIlAyA nayanA~nchale kila rajash chakre prabodhodyamam | kR^iShNaH shItalatAlavR^intarachanopAyena pashyAgrata stArAyAH praNayAdiva praNayate nidrAbhivR^iddhikramam ||64|| yathA vA dIvyantyau dayite samIkShya rabhasAdakShaistryahAtmaglahai rgaurIM ghUrNitayopadishya hitavaddAyaprayogaM bhruvA | tasyAstUrNam upArjayanniva jayaM shikShAvashenAchyutaH shyAmAm eva chakAra dhUrtanagarIsa~Nketavij jitvarAm ||65|| kAchit kA~nchidapekShya syAj jyeShThetyApekShikI bhidA | ato bhedadvayam idaM na kR^itaM gaNanAntare ||66|| kanyA mugdhaiva sA kintu svIyAnyoDhe ubhe budhaiH | mugdhAmadhyAdibhedena ShaDbhede parikIrtite ||67|| madhyAprauDhe dviShaDbhede prokte dhIrAdibhedataH | kanyA svIyA paroDheti mugdhA cha trividhA matA | iti tAH kIrtitA pa~nchadasha bhedA ihAkhilAH ||68|| athAvasthAShTakaM sarvanAyikAnAM nigadyate | tatrAbhisArikA vAsasajjA chotkaNThitA tathA ||69|| khaNDitA vipralabdhA cha kalahAntaritApi cha | proShitapreyasI chaiva tathA svAdhInabhartR^ikA ||70|| tatra abhisArikA yathA yAbhisArayate kAntaM svayaM vAbhisaratyapi | sA jyotsnI tAmasI yAnayogyaveShAbhisArikA ||71|| lajjayA svA~NgalIneva niHshabdAkhilamaNDanA | kR^itAvaguShThA snigdhaikasakhIyuktA priyaM vrajet ||72|| tatra abhisArayitrI yathA jAnIte na hariryathA mama manaHkandarpakaNDUm imAM mAM prItyAbhisaratyayaM sakhi yathA kR^itvA tvayi prArthanAm | chAturyaM tarasA prasAraya tathA sasneham AsAdya taM yAvat prANaharo na chandrahatakaH prAchImukhaM chumbati ||73|| atha jyotsnyAM svayam abhisArikA yathA industundilamaNDalaM praNayate vR^indAvane chandrikAM sAndrAM sundari nandano vrajapatestvadvIthim udvIkShate | tvaM chandrA~nchitachandanena khachitA kShaumeNa chAla~NkR^itA kiM vartmanyaravindachArucharaNadvandvaM na sandhitsasi ||74|| tAmasyAM yathA vidagdhamAdhave 422 timiramasibhiH saMvItA~NgyaH kadambavanAntare sakhi bakaripuM puNyAtmAnaH sarantyabhisArikAH | tava tu parito vidyudvarNAstanudyutisUchayo hari hari ghanadhvAntAnyetAH svavairiNi bhindate ||75|| atha vAsakasajjA svavAsakavashAt kAnte sameShyati nijaM vapuH | sajjIkaroti gehaM cha yA sA vAsakasajjikA ||76|| cheShTA chAsyAH smarakrIDAsa~Nkalpo vartmavIkShaNam | sakhIvinodavArttA cha muhurdUtikShaNAdayaH ||77|| yathA ratikrIDAku~njaM kusumashayanIyojjvalaruchiM vapuH sAla~NkAraM nijam api vilokya smitamukhI | muhurdhyAyaM dhyAyaM kim api hariNA sa~NgamavidhiM samR^iddhyantI rAdhA madanamadamAdyanmatirabhUt ||78|| atha utkaNThitA anAgasi priyatame chirayatyutsukA tu yA | virahotkaNThitA bhAvavedibhiH sA samIritA ||79|| asyAstu cheShTA hR^ittApo vepathurhetutarkaNam | aratirvAShpamokShaN cha svAvasthAkathanAdayaH ||80|| yathA sakhi kim abhavadbaddho rAdhAkaTAkShaguNairayaM samaram athavA kiM prArabdhaM surAribhiruddhuraiH | ahaha bahulAShTamyAM prAchImukhe.apyudite vidhau vidhumukhi na yanmAM sasmAra vrajeshvaranandanaH ||81|| vAsasajjAdashAsheShe mAnasya viratAvapi | pAratantrye tathA yUnorutkaNThA syAdasa~NgamAt ||82|| atha vipralabdhA kR^itvA sa~Nketam aprApte daivAj jIvitavallabhe | vyathamAnAntarA proktA vipralabdhA manIShibhiH | nirvedachintAkhedAshrumUrchChAniHshvasitAdibhAk ||83|| yathA vindati sma divam indurindirA nAyakena sakhi va~nchitA vayam | kurmahe kim iha shAdhi sAdaraM drAg iti klamam agAnmR^igekShaNA ||84|| ulla~Nghya samayaM yasyAH preyAnanyopabhogavAn | bhogalakShmA~NkitaH prAtarAgachChet sA hi khaNDitA | eShA tu roShaniHshvAsatUShNIMbhAvAdibhAg bhavet ||85|| yathA yAvairdhUmalitaM shiro bhujataTIM tATa~NkamudrA~NkitAM saMkrAntastanaku~Nkumojjvalam uro mAlAM parimlApitAm | ghUrNAkuDmalite dR^ishau vrajapaterdR^iShTvA prage shyAmalA chitte rudraguNaM mukhe tu sumukhI bheje munInAM vratam ||86|| atha kalahAntaritA yA sakhInAM puraH pAdapatitaM vallabhaM ruShA | nirasya pashchAt tapati kalahAntaritA hi sA | asyAH pralApasantApaglAniniHshvasitAdayaH ||87|| yathA srajaH kShiptA dUre svayam upahR^itAH keshiripuNA priyavAchastasya shrutiparisarAnte.api na kR^itAH | namanneSha kShauNIviluThitashikhaM praikShi na mayA manastenedaM me sphuTati puTapAkArpitam iva ||88|| atha proShitabhartR^ikA dUradeshaM gate kAnte bhavet proShitabhartR^ikA | priyasaMkIrtanaM dainyam asyAstAnavajAgarau | mAlinyam anavasthAnaM jADyachintAdayo matAH ||89|| yathA vilAsI svachChandaM vasati mathurAyAM madhuripu rvasantaH santApaM prathayati samantAdanupadam | durAsheyaM vairiNyahaha madabhIShTodyamavidhau vidhatte pratyUhaM kim iha bhavitA hanta sharaNam ||90|| atha svAdhInabhartR^ikA svAyattAsannadayitA bhavet svAdhInabhartR^ikA | salilAraNyavikrIDAkusumAvachayAdikR^it ||91|| yathA mudA kurvanpatrA~Nkuram anupamaM pInakuchayoH shrutidvandve gandhAhR^itamadhupam indIvarayugmam | sakhelaM dhammillopari cha kamalaM komalam asau nirAbAdhAM rAdhAM ramayati chiraM keshidamanaH ||92|| yathA vA shrIgItagovinde 1225 rachaya kuchayosh chitraM patraM kuruShva kapolayo rghaTaya jaghane kA~nchIM mugdhasrajA kavaribharaM | kalaya valayashreNIM pANau pade maNinUpurA viti nigaditaH prItaH pitAmbaro.api tathAkarot ||93|| chediyaM preyasA hAtuM kShaNam apyatiduHshakA | paramapremavashyatvAnmAdhavIti tadochyate ||94|| hR^iShTAH svAdhInapatikAvAsasajjAbhisArikAH | maNDitAsh cha parAH pa~ncha khinnA maNDanavarjitAH | vAmagaNDAshritakarAsh chintAsantaptamAnasAH ||95|| uttamA madhyamA chAtra kaniShThA cheti tAstridhA | vrajendranandane prematAratamyena kIrtitAH ||96|| bhAvaH syAduttamAdInAM yasyA yAvAnpriye harau | tasyApi tasyAM tAvAnsyAditi sarvatra yujyate ||97|| tatra uttamA yathA kartuM sharma kShaNikam api me sAdhyam ujjhatyasheShaM chittotsa~Nge na bhajati mayA dattakhedApyasUyAm | shrutvA chAntarvidalati mR^iShApyArtivArtAlavaM me rAdhA mUrdhanyakhilasudR^ishAM rAjate sadguNena ||98|| madhyamA yathA durmAnam eva mananA bahu mAnayantI kiM j~nAtakR^iShNahR^idayArtirapi prayAsi | ra~Nge tara~Ngam akhilA~Ngi varA~NganAnAM nAsau priye sakhi bhavatyanurAgamudrA ||99|| kaniShThA yathA danujabhidabhisAraprastutau vR^iShTim ugrAM janagamanavirAmAduchchakaiH stauShi tuShTA | kathaya katham idAnIM jR^imbhite meghaDimbhe kutukini bata ku~nje prasthitau mantharAsi ||100|| pUrvaM yAH pa~nchadashadhA proktAstAsAM shataM tathA | viMshatish chAbhiratra syAdavasthAbhiH kilAShTabhiH ||101|| punash cha trividhairebhiH prabhedairuttamAdibhiH | trishatI spaShTam uktAtra ShaShTyA yuktA manIShibhiH ||102|| kiM cha yathA syurnAyakAvasthA nikhilA eva mAdhave | tathaitA nAyikAvasthA rAdhAyAM prAyasho matAH ||103|| iti shrIshrIujjvalanIlamaNau nAyikAbhedaprakaraNam ||5||