atha nAyakasahAyabhedaprakaraNam athaitasya sahAyAH syuH pa~nchadhA cheTako viTaH | vidUShakaH pIThamardaH priyanarmasakhastathA || 1 || narmaprayoge naipuNyaM sadA gADhAnugAgitA | deshakAlaj~natA dAkShyaM ruShTagopIprasAdanam | nigUDhamantratetyAdyAH sahAyAnAM guNAH smR^itAH || 2 || tatra cheTaH sandhAnachaturashcheTo gUDhakarmA pragalbhadhIH | sa tu bha~NgurabhR^i~NgArAdikaH prokto.atra gokule || 3 || yathA na punaridamapUrvaM devi kutrApi dR^iShTaM sharadi yadiyamArAnmAdhavI puShpitAbhUt | iti kila vR^iShabhAnorlambhitAsau kumArI vrajanavayuvarAja vyAjataH ku~njavIthim || 4 || atha viTaH veshopachArakushalo dhUrto goShThIvishAradaH | kAmatantrakalAvedI viTa ityabhidhIyate | kaDAro bhAratIbandhurityAdirviTa IritaH || 5 || yathA vraje sAra~NgAkShIvitatibhiranulla~NghyavachanaH sakhAhaM tadbandhoshchaTubhirabhiyAche muhuridam | kalakrIDadvaMshIsthagitajagatIyauvatadhR^itis tvayA yuktaH shyAme na khalu parihartuM sakhi hariH || 6 || atha vidUShakaH vasantAdyabhidho lolo bhojane kalahapriyaH | vikR^itA~NgavachoveShairhAsyakarI vidUShakaH | vidagdhamAdhave khyAto yathAsau madhuma~NgalaH || 7 || yathA tuShTena smitapuShpavR^iShTiradhunA sadyastvayA muchyatAm ArUDhaH kutukI vimAnamatulaM mAM gokulAkhaNDalaH | itthaM devi manorathena rabhasAdabhyarthyamAno.apyasau yatte mAnini nAdharaH prayatate tannAdbhutaM rAgiShu || 8 || yathA vA mamopaharati svayaM bhavadabhIShTadevo naman navaM kamalamujjvalaM kamalabandhurutkaNThayA | mayA tu tadavaj~nayA bhuvi nirasyate ruShyatA na mAnayasi madvachastadapi mAnini tvaM kutaH || 9 || atha pIThamardaH guNairnAyakakalpo yaH premnA tatrAnuvR^ittimAn | pIThamardaH sa kathitaH shrIdAmA syAdyathA hareH || 10 || yathA kAlindIpuline mukundacharitaM vishvasya vismApanaM draShTuM gachChati goShThameva nikhilaM naikAtra chandrAvalI | brUmastasya suhR^ittamAH svayamamI pathya~ncha tathya~ncha te mA govardhanamalla ghaTTaya mudhA govardhanoddhAriNam || 11 || yathA vA taveyaM shrIdAman bhaNitiriha vishrambhayati mAM prasAdo rudrANyAH kimiva chapalAsu prasaratu | vane yAntIM durgArchanaghusR^iNamAlyA~NkitakarAM vadhUM dR^iShTvA sha~Nke prathayati kala~NkaM khalajanaH || 12 || atha priyanarmasakhaH Atyantikarahasyaj~naH sakhIbhAvasamAshritaH | sarvebhyaH praNayibhyo.asau priyanarmasakho varaH | sa gokule tu subalastathA syAdarjunAdayaH || 13 || yathA pratyAvartayati prasAdya lalanAM krIDAkaliprasthitAM shayyAM ku~njagR^ihe karotyaghabhidaH kandarpalIlochitAm | svinnaM bIjayati priyAhR^idi parisrastA~NgamuchchairamuM kva shrImAnadhikAritAM na subalaH sevAvidhau vindati || 14 || yathA vA yAbhiH sAchidR^iga~nchalena chaTulaM kaMsArirAlihyate dordvandvena kuchopapIDamurasi svairaM pariShvajyate | etasyAdharasIdhuruddhuratayA sAmodamAsvAdyate kiM jAnAsi sakhe vyadhAyi kataradgopIbhirAbhistapaH || 15 || chaturdhAH sakhAyo.atra cheTaH ki~Nkara Iryate | pIThamardasya vIrAdAvapi sAhAyyakAritA || 16 || haripriyAprakaraNe vakShyante yAstu dUtikAH | atrApi tA yathAyogyaM vij~neyA rasavedibhiH || 17 || tatra svayaM yathA sakhi mAdhavadR^igdUtyAH karmaThatA kArmaNe vichitrAsti | upadhAshuddhApi yayA ruddhA tvaM chitritevAsi || 18|| vaMshI yathA shrIlalitamAdhave 124 hriyamavagR^ihya gR^ihebhyaH karShati rAdhAM vanAya yA nipuNA | sA jayati nisR^iShTArthA varavaMshajakAkalI dUtI || 19 || AptadUtI vIrAvR^indAdirapyAptadUtI kR^iShNasya kIrtitA | vIrA pragalbhavachanA vR^indA chATUktipeshalA || 20 || yathA vimukhI mA bhava garviNi madgiri giriNA dhR^itena kR^itarakSham | mUDhe samUDhavayasaM mAdhava mAdhAva rAgeNa || 21 || yathA vA vR^indA sundari vandanaM vidadhatI yatpR^ichChati tvAmasau cha~nchanma~njulakha~njarITanayane tatrottaraM vya~njaya | keyaM bhrUbhujagI tavAtiviShamA baMbhramyate yadbhiyA klAntaH kAliyamardano.api kurute nAdya praveshaM vraje || 22 || asyAsAdhAraNA dUtyo vIvAdyAH kathitA hareH | li~NginyantAstu vakShyante yAstAH sAdhAraNA dvayoH || 23 || iti shrIshrImadujjvalanIlamaNau nAyakasahAyabhedaprakaraNam || 2 ||