shrI-sa~Nkalpa-kalpa- drumaH

shrI-shrI-rAdhA-madana-gopAlo vijayate

vR^indAvaneshvari vayo-guNa-rUpa-lIlA-
saubhAgya-keli-karuNA-jaladhe.avadhehi |
dAsI bhAvAni sukhayAni sadA sakAntAM
tvAm AlIbhiH parivR^itAm idam eva yAche ||1||

shR^i~NgArayANi bhavatIm abhisArayANi
vIkShyaiva kAnta-vadanaM parivR^itya yAntIm |
dhR^itvA~nchalena hari-sannidhim AnayAni
samprApya tarjana-sudhAM hR^iShitA bhavAni ||2||

pAde nipatya shirasAnunayAni ruShTAM
tAM pratyapA~Nga-kalikAm api chAlayAni |
tad-dor-dvayena sahasA parirambhayAni
romA~ncha-ka~nchukavatIm avalokayAni ||3||

prANa-priye kusuma-talpam ala~Nkuru tva-
mity achyutokit-makaranda-rasaM dhayAni |
mAM mu~ncha mAdhava satIm iti gadgadArdha-
vAchas tavaitya nikaTaM harim AkShipAni ||4||

vAmAm udasya nija-vakShasi tena ruddhA-
mAnanda-bAShpa-timitAM muhur uchChalantIm |
vyastAlakAM skhalita-veNIm abaddha-nIvIM
tvAM vIkShya sAdhu janur eva kR^itArthayAni ||5||

talpe mayaiva rachite bahu-shilpa-bhAji
pauShpe niveshya bhavatIM nananeti vAcham |
kR^iShNaM sukhena ramayantam ananta-lIlaM
vAtAyanAt tanayanaiva nibhAlayAni ||6||

sthitvA bahir vyajana-yantra-nibaddha-DorI-
pANir vikarShaNa-vashAn mR^idu bIjayAni |
uttu~Nga-keli-kalita-shrama-bindu-jAla-
mAlopayAni maNitaiH smitam udgIrANi ||7||

shrI-rUpa-ma~njari-mukha-priya-ki~NkarINA-
mAdesham eva satataM shirasA vahAni |
tenaiva hanta tulasI paramAnukampA-
pAnnIbhavAni karavANi sukhena sevAm ||8||

mAlyAni hArakaTAdi-mR^ijA vichitra-
vartiH shitAMshu-ghusR^iNAguru-chandanAdi |
vITIr lava~Nga-khapurAdi-yutAH sakhIbhiH
sArdhaM mudA virachayAni kalAM prakAshya ||9||

tvAM srasta-veSha-vasanAbharaNAM sakAntAM
vIkShya prasAdhana-vidhau drutam udyatAbhiH |
shrI-rUpa-ra~Nga-tulasI-rati-ma~njarIbhi-
rdR^iShTAnayAni tava saMmukham eva tAni ||10||

tvAm AshikhA-charaNa-mUDha-vichitra-veShAM
spraShTuM punash cha dhR^ita-tR^iShNam avekShya kR^iShNam |
AyAntam eva vikaTa-bhrU-kuTI-vibha~Nga-
hu~NkR^ity-uda~nchita-mukhI vinivartayAni ||11||

tatraitya vismayavatIM lalitAM pratIha
sAdhvItva-kaNTaka-viniShkramanArtham asyAH |
prAptaM nyasiddhad ayi mAm iyam eva dhUrte-
ty uktiM hareH sva-hR^idayaM rasayAni nityam ||12||

niShkramya ku~nja-bhavanAd vipine vihartuM
kAntaika-bAhu-parirabdha-tanuM prayAntIm |
tvAm AlIbhiH saha kathopakathA-praphulla-
vaktrAm ahaM vyajana-pANir anuprayANi ||13||

gAyAni te guNa-gaNAMs tava vartma gamyaM
puShpAstarair mR^idulayAni sugandhayAni |
sAlI-tatiH pratipadaM sumano.ativR^iShTiM
svAminy ahaM pratidishaM tanavAni bADham ||14||

preShTha-svapAni kR^ita-kausuma-hAra kA~nchI
keyUra-kuNDala-kirITa-virAjitA~NgIm |
tvAM bhUShayANi punar Atma-kavitva-puShpai-
rAsvAdayAni rasikAli-tatIr imAni ||15||

chandrAMshu-rUpya-salilair avasikta-rodha-
sya~nchat-kadamba-surabhAv ali-gIta-kIrti |
Arabdha-rAsa-rabhasAM hariNA saha tvAM
tat-pAThitaiva viduShI kalayAni vINAm ||16||

rAsaM samApya dayitena samaM sakhIbhi-
rvishrAnti-bhAji nava-mAlatikA-niku~nje |
tvayy AnayAni rasavat karakAmra-rambhA-
drAkShAdikAni sarasaM pariveShayANi ||17||

talpe saroja-dala-kL^iptam ana~Nga-keli-
paryAptam Apta-kalayA rachitaM tulasyA |
tvAM preyasA saha rasAd adhishAyayAni
tAmbUlam AshAyitum ulbanam ullasAni ||18||

saMvAhayAni charaNAvalakaiH spR^ishAni
jighrANi saurabha-samUDha-chamatkriyAbdhiH |
akShNor dadhAny urasijau parirambhayAni
chumbAny alakShitam avekShita-saukumAryAH ||19||

ante nishas tanutara-prasR^itAlakAlyA
tADa~Nka-hAra-tati-gandhavahAgra-muktAH |
preShThasya te tava cha saMgrathitA nibhAlya
tatrAnayAni paramApta-sakhIH prabodhya ||20||

tA darshayAni sukha-sindhuShu majjayAni
tAbhyaH prasAdam atulaM sahasApnuvAni |
tan-nUpurAdi-raNitair gata-sAndra-nidrAM
shayyotthitAM sa-chakitAM bhavatIM bhajAni ||21||

he svAmini priya-sakhI-trapayAkulAyA
kAntA~Ngatas tava viyoktum apArayantyAH |
udgranthayAny alaka-kuNDala-mAlya-muktA-
granthiM vichakShaNatayA~Nguli-kaushalena ||22||

nAshAgrataH shruti-yugAch cha viyojayAni
tad-bhUShaNaM maNi-sarAMs tu visUtrayANi |
prANArbudAd adhikam eva sadA tavaikaM
romApi devi kalayAni kR^itAvadhAnA ||23||

tvAM sAlim Atma-sadanaM nibhR^itaM vrajantIM
tyaktvA harer anupathaM tad alakShitaitya |
taM khaNDitAm anunayantam avekShya chandrAM
tad-vR^ittam Ali-tati-saMsadi varNayAni ||24||

prakShAlayAni vadanaM salilaiH sugandhai-
rdantAn rasAlaja-dalais tava dhAvayAni |
nirNejayAni rasanAM tanu-hema-patryA
sandarshayAni mukuraM nipuNaM pramR^ijya ||25||

snAnAya sUkShma-vasanaM paridhApayAni
hArA~NgadAdy apy a~NgAd avatArayANi |
abhya~njayANy aruNa-saurabha-hR^idya-tailai-
rvartayAni nava-ku~Nkuma-chandra-chUrNaiH ||26||

nIrair mahAsuarabhibhiH snapayAni gAtrA-
dambhAMsi sUkShma-vasanair apasArayANi |
keshAn javAd aguru-dhUma-kulena yatnA-
dAshoShayANi rabhasena sugandhayAni ||27||

vAso manobhiruchitaM paridhApayAni
sauvarNa-ka~NkatikayA chikurAn vishodhya |
gumphAni veNIm amalaiH kusumair vichitrA-
magre lasach-chamarikA-maNi-jAta-bhAtAm ||28||

chUDAmaNiM shirasi mauktika-patrapAsyAM
bhAle vichitra-tilakaM cha mudArachayya |
a~NktvAkShiNI shruti-yugaM maNi-kuNDalADhyaM
nAsAm ala~NkR^itavatIM karavANi devi ||29||

gaNDa-dvaye makarike chibuke vilikhya
kasturikeShTa-pR^iShataM kuchayosh cha chitram |
bAhvos tavA~Ngada-yugaM  maNi-bandha-yugme
chUDA masAra-kalitAH kalayAni yatnAt ||30||

pANy-a~NgulIH kanaka-ratna-mayormikAbhi-
rabhyarchayAni hR^idayaM padakottamena |
muktota-ka~nchulikayorasijau vichitra-
mAlyena hAra-nichayena cha kaNTha-desham ||31||

kA~nchyA nitambam artha-haMsaka-nUpurAbhyAM
pAdAmbuje dala-tatiM kvaNad-a~NgurIyaiH |
lAkShA-rasair aruNam apy anura~njayAni
he devi tat-tala-yugaM kR^ita-puNya-pu~njA ||32||

a~NgAni sAhajika-saurabhayanty athAni
devy archayAni nava-ku~Nkuma-charchayaiva |
lIlAmbujaM kara-tale tava dhArayANi
tvAM darshayAni maNi-darpaNam arpayitvA ||33||

saundaryam adbhutam avekShya nijaM sva-kAnta-
netrAli-lobhanam avetya vilola-gAtrIm |
prANArbudena vidhu-vartika-dIpakaish cha
nirma~nChayAni nayanAmbu-nimajjitA~NgI ||34||

goShTheshvarI-prahitayA saha kunda-vallyA
prAbhAtika-priyatamAshana-sAdhanAya |
yAntIM samaM priya-sakhIbhir anuprayANi
tAmbUla-sampuTa-maNi-vyajanAdi-pANiH ||35||

goShTheshvarI-sadanam etya pade praNamya
tasyAs tad-Apta-bhavikAM trapayAvR^iTA~NgIm |
ghrAtM tayA shirasi tan-nayanAmbu-siktAM
tvAM vIkShya tAm aham api praNamAmi bhaktyA ||36||

mUrtaM tapo.asi vR^iShabhAnu-kulasya bhAgyaM
gehasya me.asi tanayasya cha me varA~Ngi |
nairujyadAsy amR^ita-pANir abhUr vareNa
durvAsaso yad iti tad-vachasA hasAni ||37||

snAtAnulipta-vapuSho dayitasya tasya
tAt-kAlike madhurimany atilolitAkShIm |
svAminy avetya bhavatIM kvachana pradeshe
tatraiva kena cha miSheNa samAnayAni ||38||

prakShAlayAni charaNau bhavad-a~NgataH sra~N-
mAlyAdi pAka-rachanAnupayogi yat tat |
uttArayANi tad idaM tu tavAstv iti tva-
dvAchollasAni vikasan-madhu-mAdhavIva ||39||

paktvAsthitAM madhura-pAyasa-shAka-sUpa-
bhAji-prabhR^ity-amR^ita-nindi-chaturvidhAnnam |
tvAM lokayAni nananeti muhur vadantIM
goShTheshayApi pariveShayituM nidiShTAm ||40||

tR^ipty-utthitAM priyatamA~Nga-ruchiM dhayantyA
vAtAyantArpita-dR^ishaH sahasollasantyAH |
Ananda-ja-dyuti-tara~Nga-bhare manoja-
ma~nju-kR^ite tava mano mama majjayAni ||41||

rAdhe tavaiva gR^iham etad ahaM cha jAte
sUnoH shubhe kim aparAM bhavatIm avaimi |
tad bhu~NkShva sammukham iti vrajapA-girA tva-
dvaktre smitaM sva-hR^idayaM rasayAni nityam ||42||

yAntaM vanAya sakhIbhiH samam Atma-kAntaM
pitrAdibhiH sa-ruditair anugamyamAnam |
vIkShyApta-gaurava-gehAM dina-nAtha-pUjA-
vyAjena labdha-gahanAM bhavatIM bhajAni ||43||

kAntaM vilokya kusumAvachaye pravR^ittA-
mAdAya patra-puTIkAm anuyAny ahaM tvAm |
kA taskarIyam iti tad-vachasA na kApI-
ty uktyA sahArpita-dR^ishaM bhavatIM smarANi ||44||

puShpANi darshaya kiyanti hR^itAni chaurI-
tyuktyaiva puShpa-puTikAm api gopayAni |
tad vIkShya hanta mama kakSha-tale kShipantaM
pANiM balAt tam abhimR^ishya bhavAni dUnA ||45||

rakShAdya devi kR^ipayA nija-dAsikAM mA-
mity uchcha-kAtara-girA sharaNaM vrajAni |
kiM dhUrta duHkhayasi maj-janam ity amuShya
bAhuM kareNa tudatIM bhavatIM shrayANi ||46||

tyaktvaiva mAM bhavad-uraH-kavachaM vikhaNDya
prAptAM shrajaM tava galAt sva-gale nidhAya |
puShpANi chauri mama kiM tava kaNTha-heto-
stat-kaNTham eva subhR^ishaM paripIDayAni ||47||

rAjAsti kandara-tale chala tatra dhUrte
tasyAj~nayaiva sahasA cha vivastrayiShye |
tAM vIkShya hR^iShyati sa chen nija-divya-muktA-
mAlAM pradAsyati lalATa-taTe madIye ||48||

doSho na te vraja-pates tanayo.asi tasya
duShTasya yan narapateH khalu sevako.abhUH |
tad buddhir IdR^ig abhavan mama chAtra sAdhvyA
bhAle kim etad abhaval likhitaM vidhAtrA ||49||

ity-Adi-vA~N-maya-sudhAm ahaha shrutibhyAM
svAbhyAM dhayAny udara-pUram athekShaNAbhyAm |
rUpAmR^itaM tava sa-kAntatayA vilAsa-
sIdhuM cha devi vitarANy atha mAdayAni ||50||

preShThe sarasy abhinavAM kusumair vichitrAM
hindolikAM priyatamena sahAdhirUDhAm |
tvAM dolayAny atha kirANi parAga-rAji-
rgAyAni chAru-mahatIm api vAdayAni ||51||

vR^indAvane sura-mahI-ruha-yoga-pIThe
siMhAsane sva-ramaNena virAjamAnAm |
pAdyArghya-dhUpa-vidhu-dIpa-chaturvidhAnna-
srag-bhUShaNAdibhir ahaM paripUjayAni ||52||

govardhane madhuvaneShu madhUtsavena
vidrAvitAtrapa-sakhI-shatavAhinIkAm |
piShTAta yuddham anu kAnta-jayAya yAntIM
tvAM grAhayANi nava-jAtuSha-kUpikAlIH ||53||

agre sthito.asmi tava nishchaya eva vakSha
udghATya kanduka-chayaM kShipa ched baliShThA |
udghATya ka~nchukam uraH kila darshayantI
tvaM chApi tiShTha yadi te hR^idi vIratAsti ||54||

yat kathyase tad ayam eva tava svabhAvo
yat pUrva-janmani bhavAn ajitaH kilAsIt |
mithyaiva tat yad iha bhoH katisho jito.abhU-
rmat-ki~NkarIbhir api tad-vigata-trapo.asi ||55||

ity evam utpulakinI kalayAni vAchaH
si~njAna-ka~NkaNa-jhanat-kR^ita-dundubhIkam |
yuddhaM mukhAmukhi radAradi chAru-bAhu-
bAhavya-manda-nakharAnakhari stuvAni ||56||

kasyA~nchid adri-nR^ipa-dIvyad-upatyakAyAM
sa preyasi tvayi sakhI-shata-veShTitAyAm |
vishrAnti-bhAji vana-devatayopanItA-
nIShTAni sIdhu-chaShakANi purA dadhAni ||57||

hA kiM kiM kiM dha-dharaNI ghu-ghu-ghUrNatIyaM
dhA-dhA-dha-dhAvati bhayAd vi-vi-vR^ikSha-pu~njaH |
bhI-bhI-bhi-bhIrur aham atra kathaM ji-jIvA-
myevaM lagiShyasi sadA dayitasya kaNThe ||58||

tvat-svAminI pralapatIyam imAM gadena
hInAM karomi kalayAtra nirehi netaH |
ity ukti-sIdhu-rasa-tarpita-hR^it tadaiva
niShkramya jAla vitatau vidadhAni netre ||59||

ghrANAkShi-karNa-vadane jala-seka-tatyA
kR^iShNas tvayA jita itaH sahasA nimajjya |
grAho bhavan sa khalu yat kurute sma tat tu
vedAny ahaM tava mukhAmbujam eva vIkShya ||60||

abhya~njayAni sa-sakhI-dayitAM sahAli-
stvAM snApayAni vasanAbharaNair vichitram |
shR^i~NgArayANi maNi-mandira puShpa-talpe
sambhojayAni karakAdy atha shAyayAni ||61||

vANIra-ku~nja iha tiShThati devI nihnu-
tya mR^igyasi kathaM tad itaH paratra |
satyAm imAM mama giraM tam avishvasantaM
yAntaM mayi pradarshya bhavatI harShayANi ||62||

svAminy amUtra-harir asti kadamba-ku~nje
nihnutya mR^igyasi kathaM tad itaH paratra |
satyAm imAM mama giraM khalu vishvasatyAH
pANau jayaM tava nayAni tam ApnuvatyAH ||63||

rAdhe jitA cha jayinI cha paNaM na dAtu-
mAdAtum apy ahaha chumbanam IshiShe tvam |
nAshleSha-chumba-madhurAdhara-pAnato.anyaM
dyUte glahaM rasa-vidaH pravaraM vadanti ||64||

govardhane.atra mama kApi sakhI pulinda-
kanyAsti bhR^i~Ngy atitarAM nipuNedR^ishe.arthe |
mad-grAhya-deya-paNa-vastuni man-niyuktA
sA te gR^ihIShyati cha dAsyati chopagUham ||65||

uktvettham Atma-dayitaM prati vakShyase mAM
yAhIty athotpulakinI druta-pAda-pAtA |
tAm AnayAny upa mukundam athAsayAni
taM lajjayAni sumukhIr ati hAsayAni ||66||

svIyA kila vraja-pure muralI tavaikA
prAbhUn na tAm api bhavAn avituM sva-bhAryAm |
sA lampaTApi bhavato.adhara-sIdhu-siktA-
py anyaM pumAMsam iha mR^igyati chitram etat ||67||

vaMshIM satIM guNavatIM subhagAM dviShantyo.a
sAdhvyo bhavatya iha tat samatAm alabdhAH |
tAM kvApi bandham anayaMs tad ahaM bhujAbhyAM
baddhvaiva vaH shikhari-gahvaragAH karomi ||68||

ity AgataM harim avekShya rahas tadIya-
kakShAd ahaM muralikAM sahasA gR^ihItvA |
tAM gopayAni tad-alakShitam Atta-chitra-
puShpeShu sa~Ngara-rasAM kalayAni cha tvAm ||69||

brahmann imAm anugR^ihANa bhavantam eva
bhAsvantam archayitum ichChati me snuSheyam |
ity AryayA praNamitAM dhR^ita-vipra-veshe
kR^iShNe.arpitAM cha bhavatIM smita-bhAg bhajAni ||70||

yAntIM gR^ihaM sva-guru-nighnatayAtilaulyAt
kAntAvalokana-kR^ite miSham AmR^ishantIm |
dUre.anuyAni yad ato.anuvivartitAsyA-
mehIti vakShyasi tad-Asya-rucho dhayantI ||71||

gehAgatAM virahiNIM nava-puShpa-talpe
tvAM shAyayAni parataH kila murmurAbhAt |
tasmAt paratra shayanaM visa-pu~nja-kL^ipta-
madhyAshayAni vidhu-chandana-pa~Nka-liptAm ||72||

AkarNya chandanakalA-kathitaM vrajeshA-
sandesham utsuka-mateH sarasA sahAlyAH |
sAyantanAshana-kR^ite dayitasya navya-
karpUra-keli-baTakAdi-vinirmitau te ||73||

limpAni chullim atha tatra kaTAham achCha-
mArohayANi dahanaM rachayAni dIptam |
nirAjya-khaNDa-kadalI-marichendusIri-
go-dhUma-chUrNa-mukha-vastu samAnayAni ||74||

atyadbhutaM malayaja-drava-seka-tatyA
vR^iddhiM jagAma yad idaM virahAnalaujaH |
karpUra kelI-baTakAvali-sAdhanAgni-
jvAlena shAntim anayat tad iti bruvANi ||75||

dhUlir gavAM disham aruddha hareH sa-hAmbA-
rAvety udantam atulaM madhu pAyayAni |
tat-pAna-saMmada-nirasta-samasta-kR^ityAM
tvAm utthitAM saha-gaNAm abhisArayANi ||76||

tat-kR^iShNa-vartma-nikaTa-sthalam AnayAni
nirvApayANi virahAnalam unnataM te |
AyAta eSha iti valli-nigUDha-gAtrI-
mAkR^iShya mahyam ahaheshvari kopayAni ||77||

shrI-kR^iShNa-dR^i~N-madhulihau bhavad-Asya-padma-
mAghrApayANy atitR^iShan tava dR^ik-chakorIm |
tad-vaktra-chandra-vikasat-smita-dhArayaiva
saMjIvayAni madhurimNi nimajjayAni ||78||

vaivashyam asya tava chAdbhutam IkShayANi
tvAm AnayAni sadanaM lalitA-nideshAt |
karpUra-kely-amR^ita-keli-tatiM pradAtuM
goShTheshvarIm anu sarANi samaM sakhIbhiH ||79||

gatvA praNamya tava shaM kathayAni devi
pR^iShTA tayAtha baTakAvaliM bhokShayitvA |
tAM harShayANi bhavad-adbhuta-sad-guNAlI-
stat-kIrtitAH savayase shR^iNavAni hR^iShTA ||80||

vIkShyAgataM tanayam unnata-sambhramormi-
magnAM stanAkShi-payasAm abhiShichya pUraiH |
abhya~njanAdi-kR^itaye nija-dAsikAs tA
mAM chApi tAM nidishatIM manasA stavAni ||81||

snAnAnulepa-vasanAbharaNair vichitra-
shobhasya mitra-sahitasya tayA jananyA |
snehena sAdhu bahu-bhojita-pAyitasya
tasyAvasheShitam alakShitam AdadAni ||82||

tenaiva kAnta-viraha-jvara-bheShajena
tAtkAlikena tad-udanta-rasena chApi |
Agatya sAdhu shishirIkaravANi shIghraM
tvan-netra-karNa-rasanA-hR^idayANi devi ||83||

snAnAya pAvana-taDAga-jale nimagnAM
tIrthAntare tu nija-bandhu-vR^ito jalasthaH |
saMmajjya tatra jala-madhyata etya sa tvA-
mAli~Ngya tatra gata eva samutthitaH syAt ||84||

tan no vidur nikaTagA api te nanandR^i-
svasrAdayo na kila tasya sahodarAdyAH |
j~nAtvAham utpulakitaiva sahAlir eta-
chchAturyam etya lalitAM prati varNayAmi ||85||

udyAna-madhya-valabhIm adhiruhya tatra
vAtAyanArpita-dR^ishaM bhavatIM vidhAya |
sandarshya tat priyatamaM surabhIr duhAna-
mAnanda-vAridhi-mahormiShu majjayAni ||86||

gatvA mukundam atha bhojita-pAyitaM taM
goShTheshayA tava dashAM nibhR^itaM nivedya |
sa~Nketa-ku~njam adhigatya punaH sametya
tvAM j~nApayAny ayi tad-utkalikAkulAni ||87||

tvAM shukla-kR^iShNa-rajanI-sarasAbhisAra-
yogyair vichitra-vasanAbharaNair vibhUShya |
prApayya kalpa-taru-ku~njam ana~Nga-sindhau
kAntena tena saha te kalayAni kelIH ||88||

he shrI-tulasy uru-kR^ipAdy uta tara~NgiNI tvaM
yan-mUrdhni me charaNa-pa~Nkajam AdadhAH svam |
yach chAham apy apibam ambu manAk tadIyaM
tan me manasy udayam eti manoratho.ayam ||89||

kvAhaM para-shata-nikR^ity-anubiddha-chetAH
saMkalpa eSha sahasA kva sudurlabhArthe |
ekA kR^ipaiva tava mAm ajahaty-upAdhi-
shUnyaiva mantum adadhaty agater gatir me ||90||

he ra~Nga-ma~njari kuruShva mayi prasAdaM
he prema-ma~njari kirAtra kR^ipA-dR^ishaM svAm |
mAm Anaya sva-padam eva vilAsa-ma~nja-
ryAlI-janaiH samam urIkuru dAsya-dAne ||91||

he ma~njulAli nija-nAtha-padAbja-sevAM
sAtatya-sampada-tulAsi mayi prasIda |
tubhyaM namo.astu guNa-ma~njari mAM dayasva
mAm uddharasva rasike rasa-ma~njari tvam ||92||

he bhAnumaty anupama-praNayAbdhi-magnA
sva-svAminos tvam asi mAM padavIM naya svAm |
prema-pravAha-patitAsi lava~Nga-ma~nja-
ryAtmIyatAmR^ita-mayIM mayi dheyi dR^iShTim ||93||

he rUpa-ma~njari sadAsi niku~nja-yUnoH
keli-kalA-rasa-vichitrita-chitta-vR^ittiH |
tvad-datta-dR^iShTir api yat samakalpayaM tat-
siddhau tavaiva karuNA prabhutAm upaitu ||94||

rAdhA~Nga shashvad-upagUhanatas tadApta-
dharma-dvayena tanu-chitta-dhR^itena deva |
gauro dayA-nidhir abhUr api nanda-sUno
tan me manoratha-latAM saphalIkuru tvam ||95||

shrI-rAdhikA-giribhR^itau lalitA-prasAda-
labhyAv iti vrajavane mahatIM prasiddhim |
shrutvAshrayANi lalite tava pAda-padmaM
kAruNya-ra~njita-dR^ishaM mayi hA nidhehi ||96||

tvaM nAma-rUpa-guNa-shIla-vayobhir aikyA-
drAdheva bhAsi sudR^ishAM sadasi prasiddhA |
AgaH-shatAn na gaNayanty urarIkuruShva
tan mAM varA~Ngi nirupAdhi-kR^ipe vishAkhe ||97||

he prema-sampada-tulA vraja-navya-yUnoH
prANAdhikAH priya-sakhAH priya-narma-sakhyaH |
yuShmAkam eva charaNAbja-rajo.abhiShekaM
sAkShAd avApya saphalo.astu mamaiva mUrdhA ||98||

vR^indAvanIya-mukuTa vraja-loka-sevya
govardhanAchala-guro hari-dAsa-varya |
tat-sannidhi-sthiti-yuSho mama hR^it-shilAsva-
pyetA manoratha-latAH sahasodbhavantu ||99||

shrI-rAdhayA samaM tadIya-sarovara tvat-
tIre vasAni samaye cha bhajAni saMsthAm |
tvan-nIra-pAna-janitA mama tarSha-vallyaH
pAlyAs tvayA kusumitAH phalitAsh cha kAryAH ||100||

vR^indAvanIya-sura-pAdapa yoga-pITha
svasmin balAd iha nivAsayasi svayaM yat |
tan me tvadIya-tala-stasthuSha eva sarva-
sa~Nkalpa-siddhim api sAdhu kuruShva shIghram ||101||

vR^indAvana-sthira-charAn paripAlayitri
vR^inde tayo rasikayor atisaubhagena |
ADhyAsi tat kuru-kR^ipAM gaNanA yathaiva
shrI-rAdhikA-parijaneShu mamApi siddhet ||102||

vR^indAvanAvani-pate jaya soma soma-
maule sanandana-sanAtana-nAradeDya |
gopIshvara vraja-vilAsi yugA~Nghri-padme
prItiM prayachCha nirupAdhi namo namas te ||103||

hitvAnyAH kila vAsanA bhajata re vR^indAvanaM premadaM
rAdhA-kR^iShNa-vilAsa-vAridhi-rasAsvAdaM chet vindatha |
tyaktuM shaknutha na spR^ihAm api punas tatraiva hR^id-vR^ittayo
vishraddhAH shrayata mamaiva satataM sa~Nkalpa-kalpa-drumam ||104||

iti shrI-vishvanAtha-chakravartI-Thakkura-virachitaH shrI-sa~Nkalpa-kalpa-drumaH sampUrNaH |