shrI-rAdhikAShTakam

dishi dishi rachayantI sa~ncharan-netra-lakShmI-
vilasita-khuralIbhiH kha~njarITasya khelAm |
hR^idaya-madhupa-mallIM vallavAdhIsha-sUnor
akhila-guNa-gabhIrAM rAdhikAm archayAmi ||1||

pitur iha vR^iShabhAnor anvavAya-prashastiM
jagati kila samaste suShThu vistArayantIm |
vraja-pati-kumAraM khelayantIM sakhIbhiH
surabhiNi nija-kuNDe rAdhikAm archayAmi ||2||

sharad-upachita-rAkA-kaumudI-nAtha-kIrti-
prakara-damana-dIkShA-dakShiNa-smera-vaktrAm |
naTad-aghabhid-apA~Ngottu~NgitAna~Nga-ra~NgAM
kalita-ruchi-tara~NgAM rAdhikAm archayAmi ||3||

vividha-kusuma-vR^indotphulla-dhammilla-ghATI-
vighaTita-mada-ghUrNat-keki-pichCha-prashastim |
madhuripu-mukha-bimbodgIrNa-tAmbUla-rAga-
sphurad-amala-kapolAM rAdhikAm archayAmi ||4||

amalina-lalitAntaH-sneha-siktAntarA~NgAm
akhila-vidha-vishAkhA-sakhya-vikhyAta-shIlAm |
sphurad-aghabhid-anargha-prema-mANikya-peTIM
dhR^ita-madhura-vinodAM rAdhikAm archayAmi ||5||

atula-mahasi vR^indAraNya-rAjyebhiShiktAM
nikhila-samaya-bhartuH kArtikasyAdhidevIm |
aparimita-mukunda-preyasI-vR^inda-mukhyAM
jagad-aghahara-kIrtiM rAdhikAm archayAmi ||6||

hari-pada-nakha-koTI-pR^iShTha-paryanta-sImA-
taTam api kalayantIM prANa-koTer abhIShTAm |
pramudita-madirAkShI-vR^inda-vaidagdhya-dIkShA-
gurum ati-guru-kIrtiM rAdhikAm archayAmi ||7||

amala-kanaka-paTTodghR^iShTa-kAshmIra-gaurIM
madhurima-laharIbhiH samparItAM kishorIm |
hari-bhuja-parirabdhAM labdha-romA~ncha-pAliM
sphurad-aruNa-dukUlAM rAdhikAm archayAmi ||8||

tad-amala-madhurimNAM kAmam AdhAra-rUpaM
paripaThati variShThaM suShThu rAdhAShTakaM yaH |
ahima-kiraNa-putrI-kUla-kalyANa-chandraH
sphuTam akhilam abhIShTaM tasya tuShTas tanoti ||9||

iti shrImad-rUpa-gosvAmi-virachita-stava-mAlAyAM shrI-rAdhikAShTakaM sampUrNam |