shrI-kR^iShNa-nAmAShTakam

nikhila-shruti-mauli-ratna-mAlA-
dyuti-nIrAjita-pAda-pa~NkajAnta |
ayi mukta-kulair upAsyamAnaM
paritas tvAM harinAma saMshrayAmi ||1||

jaya nAma-dheya muni-vR^inda-geya he
jana-ra~njanAya paramAkSharAkR^ite |
tvam anAdarAd api manAg udIritaM
nikhilogra-tApa-paTalIM vilumpasi ||2||

yad-AbhAsopy udyan kavalita-bhava-dhvAnta-vibhavo
dR^ishaM tattvAndhAnAm api dishati bhakti-praNayinIm |
janas tasyodAttaM jagati bhagavan-nAma-taraNe
kR^itI te nirvaktuM ka iha mahimAnaM prabhavati ||3||

yad brahma-sAkShAt-kR^iti-niShThayApi
vinAsham AyAti vinA na bhogaiH |
apaiti nAma sphuraNena tat te
prArabdha-karmeti virauti vedaH ||4||

aghadamana-yashodAnandanau nandasUno
kamalanayana-gopIchandra-vR^indAvanendrAH |
praNatakaruNa-kR^iShNAv ity aneka-svarUpe
tvayi mama ratir uchchair vardhatAM nAma-dheya ||5||

vAchyo vAchakam ity udeti bhavato nAma svarUpa-dvayaM
pUrvasmAt param eva hanta karuNA tatrApi jAnImahe
yas tasmin vihitAparAdha-nivahaH prANI samantAd bhaved
Asyenedam upAsya sopi hi sadAnandAmbudhau majjati ||6||

sUditAshrita-janArti-rAshaye
ramya-chid-ghana-sukha-svarUpiNe |
nAma gokula-mahotsavAya te
kR^iShNa-pUrNa-vapuShe namo namaH ||7||

nArada-vINojjIvana-sudhormi-niryAsa-mAdhurI-pUra |
tvaM kR^iShNa-nAma kAmaM sphura me rasane rasena sadA ||8||

iti shrI-rUpa-gosvAmi-kR^ita-stava-mAlAyAM shrI-nAmAShTakaM sampUrNam