shrI-mukundAShTakam

balabhid-upala-kAnti-drohiNi shrImad-a~Nge
ghusR^iNa-rasa-vilAsaiH suShThu gAndharvikAyAH |
sva-madana-nR^ipa-shobhAM vardhayan deha-rAjye
praNayatu mama netrAbhIShTa-siddhiM mukundaH ||1||

udita-vidhu-parArdha-jyotir ulla~Nghi-vaktro
nava-taruNima-rajyad-bAlya-sheShAtiramyaH |
pariShadi lalitAlIM dolayan kuNDalAbhyAM
praNayatu mama netrAbhIShTa-siddhiM mukundaH ||2||

kanaka-nivaha-shobhAnandi pItaM nitambe
tad-upari navaraktaM vastram itthaM dadhAnaH |
priyam iva kila varNaM rAga-yuktaM priyAyAH
praNayatu mama netrAbhIShTa-pUrtiM mukundaH ||3||

surabhi-kusuma-vR^indhair vAsitAmbhaH-samR^iddhe
priya-sarasi nidAghe sAyam AlI-parItAm |
madana-janaka-sekaiH khelayann eva rAdhAM
praNayatu mama netrAbhIShTa-siddhiM mukundaH ||4||

paramalam iha labdhvA hanta gAndharvikAyAH
pulakita-tanur uchchair unmadas tat-kShaNena |
nikhila-vipina-deshAn vAsitAn eva jighran
praNayatu mama netrAbhIShTa-siddhiM mukundaH ||5||

praNihita-bhuja-daNDaH skandha-deshe varA~NgyAH
smita-vikasita-gaNDe kIrtidA-kanyakAyAH |
manasija-jani-saukhyaM chumbanenaiva tanvan
praNayatu mama netrAbhIShTa-siddhiM mukundaH ||6||

pramada-danuja-goShThyAH kopi saMvarta-vahnir
vraja-bhuvi kila pitror mUrtimAn sneha-pu~njaH |
prathama-rasa-mahendraH shyAmalo rAdhikAyAH
praNayatu mama netrAbhIShTa-siddhiM mukundaH ||7||

svakadana-kathayA~NgIkR^itya mR^idvIM vishAkhAM
kR^ita-chaTu lalitAM tu prArthan prauDha-shIlAm |
praNaya-vidhura-rAdhA-mAna-vidhvaMsanAya
praNayatu mama netrAbhIShTa-siddhiM mukundaH ||8||

paripaThati mukundasyAShTakaM kAkubhir yaH
sakala-viShaya-sa~NgAt saMniyamyendriyANi |
vraja-nava-yuva-rAjo darshayan svaM sa-rAdhe
svajana-gaNana-madhye taM priyAyAs tanoti ||9||

iti shrI-rUpa-gosvAmi-virachita-stava-mAlAyAM shrI-mukundAShTakaM samAptam