shrIkR^iShNAya namaH shrIkR^iShNasya kathAsUtraM yathAbhAgavatakramaM | likhyate.aShTottarashatapraNAmAnandasiddhaye || 1 || brahmabrahmannamAmi tvAmAtmannandIshvareshvara | nAnAvatArakR^it kR^iShNa madhurAnandapUrada || 2 || namaH 1 jaya kR^iShNa parabrahman jagattattva jaganmaya | advaita sachchidAnanda svaprakAshAkhilAshraya || 3 || nirvikArAparichChinna nirvisheSha nira~njana | avyakta satya sanmAtra parama jyotirakShara || 4 || namaH 2 paramAtman vAsudeva pradhAnapuruSheshvara | sarvaj~nAnakriyAshaktidAtre tubhyaM namo namaH || 5 || hR^itpadmakarNikAvAsa gopAla puruShottama | nArAyaNa hR^iShIkesha namo.antaryAmine.astu te || 6 || namaH 3 parameshvara lakShmIsha sachchidAnandavigraha | sarvasallakShaNopeta nityanUtanayauvana || 7 || sarvA~Ngasundara snigdhaghanashyAmAbjalochana | pItAmbara sadA smeramukhapadma namo.astu te || 8 || paramAshcharyasaundarya mAdhuryajitabhUShaNa | sadA kR^ipAsnigdhadR^iShTe jaya bhUShaNabhUShaNa || 9 || kandarpakoTilAvaNya sUryakoTi mahAdyote | koTIndujagadAnandin shrImadvaikuNThanAyaka || 10 || sha~NkhapadmagadAchakravilasachChrIchaturbhuja | sheShAdipArShadopAsya shrImadgaruDavAhana || 11 || svAnurUpaparIvAra sarvasadguNasevita | bhagavan hR^idvacho.atIta mahAmahimapUrita || 12 || dInanAthaikasharaNa hInArthAdhikasAdhaka | samastadurgatitrAtar vA~nChAtItaphalaprada || 13 || namaH 4 sarvAvatArabIjAya namaste triguNAtmane | brahmaNe sR^iShTikartre.atha saMhartre shivarUpiNe || 14 || bhakteChApUraNavyagra shuddhasattvaghana prabho | vande devAdhidevaM tvAM kR^ipAlo vishvapAlaka || 15 || sarvadharmasthApakAya sarvAdharmavinAshine | sarvAsuravinAshAya mahAviShNo namo.astute || 16 || nAnAmadhurarUpAya nAnAmadhuravAsine | nAnAmadhuralIlAya nAnAsaMj~nAya te namaH || 17 || namaH 5 shrIchatuHsanarUpAya tubhyaM shrInAradAtmane | shrIvarAHAya yaj~nAya kapilAya namo namaH || 18 || dattAtreya namastubhyaM naranArAyaNau bhaje | he hayagrIva he haMsa dhruvapriya namo.astu te || 19 || pR^ithuM tvAmR^iShabha~nchaiva vande svAyambhuve.antare | dvitIye vibhunAmAnaM tR^itIye satyasenakam || 20 || chaturthe shrIhariM vande vaikuNThaM pa~nchame tathA | ShaShThe.ajitaM mahAmInaM sheShaM cha dharaNIdharam || 21 || shrInR^isiMha~ncha kUrma~ncha sadhanvantarimohinIM | saptame vAmanaM vande namaH parashurAma te || 22 || shrIrAmachandra he vyAsa namaste shrIhalAyudha | he buddha kalkin mAM pAhi prapannAshanipa~njara || 23 || namaH 6 aShTame sArvabhaumastvamR^iShabho navame bhavAn | viShvaksenashcha dashame dharmasetustataHparam || 24 || sudhAmA dvAdashe bhAvI yogeshastu trayodashe | chaturdashe bR^ihadbhAnuH saptatriMshattano jaya || 25 || shuklaH satyayuge yaH syAdraktastretAyuge tathA | dvApare tu haridvarNaH kalau kR^iShNo mahAprabho || 26 || taM tvAM shrIkR^iShN vande.ahaM jagadekadayAnidhe | nijabhaktavinodArthalIlAnantAvatArakR^it || 27 || namaH 7 prahlAdasaMhlAdaka bhaktavatsala bhaktiprabhAva-prakaTinnR^isiMha | svadveShTR^ivakShaHsthalapATana prabho shiShTeShTamUrte jaya duShTabhIShaNa || 28 || antaHkR^ipAtimR^idula bahirATopasundara | prahlAdA~NgAvalehotka sphuTabrahmANDagarjita || 29 || namaH 8 sItApate dAsharathe raghUdvaha shrIrAma he koshalajAsutAbjadR^ik | shrI lakShmaNajyeShTha hanumadIshvara sugrIvabandho bharatAgraja prabho || 30 || he daNDakAraNyacharAryashIla he kodaNDapANe kharadUShaNAntaka | baddhAbdhiseto.ayi vibhIShaNAshrita la~NkeshaghAtin jaya koshalendra || 31 || namaH 9 shrIkR^iShNa jIyA mathurAvatIrNa svapremadAnaikanitAntakR^itya | nAnAsumAdhuryamahAnidhAna saMvya~njitaishvaryakR^ipAmahattva || 32 || parIkShitpR^iShTacharita sarvasevyakathAmR^ita | kR^itapANDavanistAraparIkShiddehagopana || 33 || bahirantaHsthitA.asAdhusAdhuduhkhaprada | shushrUShAkR^iShTarAjAntarnAnAsha~NkAnupR^iShTa he || 34 || tyaktodAnnanR^ipaprANa shukodgIrNakathAmR^ita | nR^ipavyAjAsurAnIkabhArArtakShitirodaka || 35 || dharArtanAdadugdhAbdhigatabrahmAdyupasthita | brahmadhyAnashrutAdeshakathApyAyitabhusura || 36 || namaH 10 shurasena mahArAjadhAnIshrImathurApriya | devakIvasudevaikavivAhotsavakAraNa || 37 || viyadvAgvardhitAttAshvapAshakaMsAtidurNaya | vasudevavachoyuktidevakIprANarakShaka || 38 || satyavAk shaurikaMsAgranItaputravimochana | devarShikathitodantakaMsaj~nAtehitAva mAM || 39 || kaMsashR^i~NkhalitAnekavasudevAdibAndhava | devakIjAtaShaDgarbhatAtakaMsArighAtana || 40 || namaH 11 iti dashamasakandhe prathamo.adhyAyaH || kaMsAsurabalodvignasvayAdavakulArtivit | devakIsaptamabhrUNadhAman mAyAniyojaka || 41 || devakIputratAvAptidvArotsAhitamAya he | rohiNIprApitasvAMsha rauhiNeyapriyAva mAm || 42 || vasudevollasachChakte devakyaShTamagarbhaga | svasavitrIlasajjyotiHkaMsatrAsaviShAdakR^it || 43 || sadA kaMsamanovartin brahmarudrAdyabhiShTuta | satyAtmaka jagannAtha shuddhasAttvikarUpabhR^it || 44 || bhaktaikalabhyasarvasva sarvasarvArthakR^idvapuH | rUpanAmAshritAviShTa janmamAtradharArtihR^it || 45 || svarbhUbhUShaNapAdAbja vinodaikArthajAta he | jaya bhUbhAraharaNa devAshvAsitamAtR^ika || 46 || namaH 12 iti dashamaskandhe dvitIyo.adhyAyaH || bhAdrakR^iShNAShTamIjAta prAjApatyarkShasambhavaH | mahIma~NgalavistArin sAdhuchittaprasAdaka || 47 || mahrShimAnasollAsa santoShitasuravraja | nishIthasamayodbhuta vasudevapriyAtmaja || 48 || devakIgarbhasadratna balabhadrapriyAnuja | gadAgraja prasIdAshu subhadrApUrvajA.ava mAm || 49 || AshcharyavAla mAM pAhi divyarUpapradarshaka | kArAgArAndhakAraghna sutikAgR^ihabhUShaNa || 50 || namaH 13 vasudevastutaM sAkShAdadR^ishyAtmapradarshakaM | satpraviShTApravShTaM tvAM kAraNakAraNam || 51 || siddhAkartR^itvakartR^itvaM jagatkShemakarodayaM | daityamuktidakAruNyaM svajanapremavardhanaM || 52 || devakInayanAnanda jaya bhItaprasUstuta | nirguNAdhyAtmadIpAtilayakArakakAlasR^ik || 53 || svapAdAshritamR^ityughna mAMsadR^igdR^iShTyayogya he | lokopahAsabhItAmbAvR^itadivyA~NgasaMvR^ite || 54 || namaH 14 pitR^iprAgjanmakathaka svadattavarayantrita | mahArAdhanasantoSha trijanmAtmajatAgata || 55 || mahAnandaprasUtAta lIlAmAnuShabAlaka | narAkR^iti parabrahman prakR^iShTAkAra sundara || 56 || janakopAyanirdeShTaryashodAjAtamAya he | shAyitadvAHsthapaurAdermohitAgArarakShaka || 57 || svashaktyudghATitAsheShakavATa pitR^ivAhaka | sheShoragaphaNAChatra yamunAdatta satpatha || 58 || vrajamUrtamahAbhAgya yashodAtalpashAyita | nidrAmohitanandAdi yashodA.aviditehita || 59 || namaH 15 iti dashamaskandhe tR^itIyo.adhyAyaH || kaMsaghAtitadurgaM tvAM vande durgoditodbhavaM | kaMsavismApakaM tAtamAtR^ibandhavimochakam || 60 || sabhayasmR^itisaMshuddhachittakaMsavivekadaM | kaMsAtmaj~nAnasaMshlAghipitR^imAtR^ikShamApradam || 61 || durmantrigaNavAgjAlakaMsadurmAnavarddhanaM | sadatikramadurmantrakShayitAsurajIvitaM || 62 || namaH 16 iti dashamaskandhe chaturtho.adhyAyaH || pradattapUrvasvapadAbjasauhR^ida- pradAna-dIkShochitadeshasa~Ngata | svasevakabrahmasukhAdhikotsava premAkara krIDanakR^innamo.astu te || 63 || nandanandana sa~njAtajAtakarmamahotsava | nAnAdAnaughakR^ittAta shrImadgokulama~Ngala || 64 || kR^itAla~NkAragopAlagopIgaNakR^itotsava | gopIpremamudAshIrbhAk vrajagorasakIrNa he || 65 || nandavrajajanAnandin nandasanmAnitavraja | dattavrajamahAbUte shrIyashodAstanandhaya || 66 || prAptaputramahAratnarakShAvyAkulatAta | karadAnArthamathurAgatanandagR^ihAvita || 67 || vasudevashubhaprashnasamAnanditananda me | prasIda nandasadvAkyavasudevAtinandaka || 68 || namaH 17 iti dashamaskandhe pa~nchamo.adhyAyaH || vasudevoditotpAtasha~NkAnandashubhAshrita | vrajamohanasadveShaviShastanabakIkShita || 69 || lajjAmIlitanetrAbja pUtanA~NkAdhiropita | bakIprANapayaHpAyin pUtanAstanapIDana || 70 || pUtanAkroshajanaka pUtanAprANashoShaNa | ShaTkroshIvyApibhIdAyipUtanA dehapAtana || 71 || nAnArakShAvidhAnaj~nagopastrIkR^itarakShaNa | vinyastarakShAgodhUle gomutrashakR^idApluta || 72 || gopikAvihitAjAdibIjanyAsAbhimantrita | dahyamAnabakIdehasaurabhyavyApitakShite || 73 || pUtanAmochana dveShTR^irAkShasIsadgatiprada | nandAghrAtashiromadhya jaya vismApitavraja || 74 || namaH 18 iti dashamaskandhe ShaShTho.adhyAyaH || autthAnikotsavAmbAbhiShikta sa~njAtanidradR^ik | mahochchashakaTAdhaHsthabAlaparya~NkashAyita || 75 || a~njanasnugdhanayana paryAyA~Nkuritasmita | lIlAkShataralAloka mukhArpitapadA~Ngule || 76 || jayotsavakriyAsaktadhAtrIstanyArtharodana | utkShiptacharaNAmbhoja he.anoviparivartaka || 77 || vrajAnirNeyacharita shakaTAsurabha~njana | dvijoditasvastyayana mantrapUtajalApluta || 78 || namaH 19 yashodotsa~Ngaparya~NkaM lIlAviShkR^itagauravaM | mAtR^ivismayakartAraM tR^iNAvartApavAhitam || 79 || jananImArgitagatiM tR^iNAvartAtidurvahaM | galagrahaNashcheShTatR^iNAvartanipAtanam || 80 || tR^iNIkR^itatR^iNAvartaM rudadgopA~NganekShitaM | gopIdhAtryarpitaM vande tvAM vrajAnandadAyakam || 81 || namaH 20 yashodAstanyamudita yashodAmukhavIkShaka | yashodAnandanAhaM te yashodAlAlitA.ava mAM || 82 || janaIchumbyamAnAsyamadhyadarshitavishva me | prasIda paramAshcharyadarshin vismitamAtR^ika || 83 || pUtanAdivadhAlokimAtR^isha~NkAshataprada | svabhAvavividhAshcharyamayatAtannnirAsaka || 84 || namaH 21 iti dashamaskandhe saptamo.adhyAyaH || gargavAkchAturIhR^iShTanandanItarahaHstalaM | prashastanAmakaraNaM gargasUchitavaibhavam || 85 || sAdhurakShAkaraM duShTamArakaM bhaktavatsalaM | mahAnArAyaNaM vande nandAnandavivarddhanaM || 86 || namaH 22 jaya ri~Nga.alIlADhya jAnuchaMkramaNotsuka | ghR^iShTajAnukaradvandva maugdhyalIlAmanohara || 87 || ki~NkinInAdasaMhR^iShTa vrajakardamavibhrama | vyAlambichUlikAratnagrIvAvyAghranakhojjvala || 88 || pa~NkAnuleparuchira mAMsalorukaTItaTa | svamukhapratibimbArthin pratibimbAnukAraka || 89 || avyaktavalguvAgvR^itte smitalakShyaradodgama | dhAtrIkarasamAlambin praskhalachchitrachaMkrama || 90 || namaH 23 jayA~NganAgaNaprekShyabAlyalIlAnukAraka | AviShkR^itAlpasAmarthya pAdavikShepasundara || 91 || vatsapuchChasamAkR^iShTa vatsapuchChavikarShaNa | vismAritAnyavyApAragopagopIpramodana || 92 || gR^ihakR^ityasamAsaktamAtR^ivaiyagryakAraka || brahmAdikAmyalAlitya jagadAshcharyashaishva ||93 || namaH 24 prasIda bAlagopAla gopIgaNamudAvaha || anurUpavayasyapta chArukaumArachApala || 94 || akAlavatsanimoktarvrajavyAkroshasusmita || navanItamahAchora vAnarAhAradAyaka || 95 || pITholUkhalasopAna kShIrabhANDavidhedaka || shikyabhaNDasamAkarShin dhvAntAgArapraveshakR^it || 96 || svA~NgaratnapradIpADhya gopIdhArShTyAtivAdaka || gopIvrAtokktibhIbhrAmyannetra mAtR^ipraharShaNa || 97 || namaH 25 bhaktopAlambhanAnanda vA~nChAbhakShitamR^ittika | rAmAdiproktamR^idvArtta hitaiShyambAtibhartsita || 98 || kR^itakatrAsalolAkSha mitrAntargUDhavigraha | balAdivachanAkSheptarjananIpratyayAvaha || 99 || vyAttasvalpAnanAbjAntarmAtR^idarshitavishva he | yashodAviditaishvarya jaya svAchChandyamohana || 100 || savitrIsnehasaMshliShTa yashodAsnehavardhana | svabhaktabrahmasandattadharAdroNavarArthakR^it || 101 || namaH 26 iti dashamaskandhe.aShTamo.adhyAyaH || dadhirnirmanthanArambhisavitrIstanyalolupa | jananIgItacharita dadhimanthanadaNDadhR^ik || 102 || mAtR^istanyAmR^itAtR^ipta kShIrottAragatAmbika | mR^iShA kopaprakampauShTha dadhibhAjanabha~njana || 103 || shikyahaiya~Ngavastena navanItamahAshana | haiya~NgavInarasika navanItAavakIrNaka || 104 || navanItaviliptA~Nga ki~NkiNIkvaNasUchita | navanItamahAdAtarmR^iShAshro chauryasha~Nkita || 105 || mAtR^ibhIdhAvanapara goShThA~Nganavinodana | jananIshramavij~nAtardAmodara namo.astu te || 106 || dAmAkalpachalApA~Nga gADholUkhalabandhana | yashodAvatsalAnantadAmabandhaniyantrita || 107 || namaH 27 iti dashamaskandhe navamo.adhyAyaH || dR^iShTArjunatarudvandva kuverasutashApabhit | aparAdhisamuddhAradayAnAradagItavit || 108 || aki~nchanajanaprApya shrImadAndhAdyagochara | AkR^iShTolUkhalAlAna jaya shrInAradapriya || 109 || kR^itadevarShigItArthayamalArjunabha~njana | dhanadAtmajasatstotrastuta sarveshvareshvara || 110 || jIvadurj~neyamahiman sadA bhaktaikachittabhAk | asAdhAraNalIlohya vishvama~Ngalama~Ngala || 111 || svadAsadAsatAprIta bhaktabhaktAtivatsala | guhyakArthitasarvA~NgahR^iShIkabhajanAmR^ita || 112 || shivAmitrasutastotrasantoShAmR^itavarShivAk | svabhaktavIkShAmAhAtmyavAdin premavaraprada || 113 || namaH 28 iti dashamaskandhe dashamo.adhyAyaH || gopavismApanakrIDa bAlasa~Nkathitehita | sambhrAntanandasandR^iShTa smitabhinnauShThasampuTa || 114 || patitArjunamadhyastha maholUkhalakarShaka | gopAshAlilasanmadhya nandamochitabandhana || 115 || svabhaktavashyatAdarshin vallarIstobhanarttita | bAlakodgItinirata bAhukShepamanorama || 116 || gopyAj~nAdhR^itapIThAde navanItArthanApaTo | vrajamohakarakrIIDAsudhAsindho namo.astu te || 117 || namaH 29 upanandAhitaprIte vR^indAvanarasotsuka | prasthAnashakaTArUDha gopikAgItacheShTita || 118 || hR^idyavR^indAvanAvAsa shrIvR^indAvanachandra he | vR^indAvanapriya shrImadvR^indAvanavihUShaNa || 119 || vyAghrAdihiMsrasahajavairaharttaH prasIda me | shrIgovardhanakAlindIpulinAlokaharShita || 120 || namaH 30 vrajAnandAkarakrIDa manoj~nakalabhAShaNa | vatsapAlanasa~nchArin vrajAdUradharAchara || 121 || rAmAdibAlakArAma nAnAkrIDAparichChada | vaMshIvAdanasaMsakta veNuchitrasvanAkara || 122 || muralIvadana shrImattribha~NgImadhurAkR^ite | kShepaNIkShepaNaprIta kandukakrIDanotsuka || 123 || vR^iShavatsAnukaraNa vR^iShadhvAnaviDambana | jayAnyonyaraNaprIta sarvajanturutAnukT || 124 || namaH 31 jaya vatsAsuradhvaMsin kapitthavrAtapAtana | bAlaprashaMsAsaMhR^iShTa puShpavarShyamarArchita || 125 || govatsapAlanaikAgrya bAlavR^indAdbhutAvaha | vikAlAgAragAmin mAM pAhi godhUlidhUsara || 126 || sumano.ala~NkR^itashiro gu~njAprAlambanAvR^ita | puShpakuNDala barhasrak patravAdyavinodaka || 127 || manoj~napallavottaMsa vanamAlAvibhUShita | vanadhAtuvichitrA~NgavarhivarhAvataMsaka || 128 || namaH 32 prAtarbhojanasaMyukta vatsavrAtapuraHsara | girishR^i~NgamahAkAyabakAsuragetekShaNa || 129 || tIkShNatuNDabakagrastamUrchChAviShTasuhR^idgaNa | mahAbakamukhAkrIDa bakatAlupradAhaka || 130 || jaya duShTabakodgIrNa bakacha~nchuvidAraNa | balAdibAlakAshliShTa puShpavarShisureDita || 131 || namaH 33 iti dashamaskandhe ekAdasho.adhyAyaH || prAtarvanyAshanAkA~NkShin shR^i~NgAkAritavatsapa | asa~Nkhyavatsasa~nchArin asa~NkhyArbhakasa~Ngata || 132 || shikyachauryAdivividhabAlakrIDAtitoShita | svapAdasparshanakrIDApaTu bAlakaharShita || 133 11 vayasyAshakyasahanakShaNamAtrAvilokana | shukagItamahAbhAgyavrajabAlakaveShTita || 134 || namaH 34 durbuddhisuptapInAhItarathotprekShakAnuga | dushcheShTAghAsurAbhij~na mugdhArbhakarirakShiSho || 135 || kR^ityachintAmahAlIla sarpasyAntaHpraveshakR^it | aghadAnavasaMhartarvatsavatsapajIvana || 136 || amarAnandavistArin nindyadAnavamuktida | vismApitAgatabrahmannAshcharyAbdhe namo.astu te || 137 || namaH 35 iti dashamaskandhe dvAdasho.adhyAyaH || paugaNDAkhyAtakaumAra mahAshcharyacharita he | parIkShichChukadevAtivimohanakathAmR^ita || 138 || stutaramyasarastIrAdR^itashAdvalajemana | saraHsupulinAsIna bAlamaNDalamaNDita || 139 || sakhishreNyantarAsthAtarvrajArbhakasahAshana | pItavastrodaranyastaveNo vanyavibhUShaNa || 140 || vAmakakShAntaranyastashR^i~Ngavetra prasIda me | vAmapANisthadadhyanna kavalAshanasundara || 141 || a~NgulIsandhivinyastaphala bAlAlichittahR^it | svanarmahAsyamAnArbha svargyAshcharyakarAshana || 142 || namaH 36 adR^ishyatarNakAnveshin vallavArbhakabhItihan | adR^iShTavatsapavrAta vatsavatsapamArgaga || 143 || viditabrahmacharita vatsavatsaparUpadhR^ik | vatsapAlaharabrahmatattanmAtR^imudichChaka || 144 || yathAvrajArbhakAkAra yathAvatsapacheShTita | yathAvatsakriyArUpa yathAsthAnaniveshana || 145 || namaH 37 gogopIstanyapAhanta gogopIprItivarddhana | balarAmohitodanta pitAmahavimohana || 146 || shuddhasattvaghanasvIyabahurUpapradarshaka | atyAshcharyekShaNAshaktabrahmavyutthAnakAraka || 147 || svAntardR^iShTyatidInAjabahirdR^iShTisukhaprada | gopArbhavasha ruchira sapANikavalAva mAm || 148 || vyAlInasR^iShTavatsArbhagaNa brahmatrapAkara | brahmAnandAshrudhautA~Nghre dR^iShTatattvavidhistuta || 149 || namaH 38 iti dashamaskandhe trayodasho.adhyAyaH || vidhivAkyAmR^itAbdhIndu gopabAlakavesha he | brahmAvatAradivyA~NgAchintyamAhAtmyarUpa bhR^it || 150 || mR^iShAj~nAnashramAsparshibhaktyekasukhanirjita | shreyaHsArAtyudAsInadurbuddhikleshasheShaka || 151|| pUrvapUrvavimuktaughAshritabhaktisumArga he | nairguNyAdhikadurj~neyAshcharyAnantamahAguNa || 152 || kevalAtmakR^ipApA~NgavIkShApekShakamochaka | niveditAparAdhAtibhIta putrArthitakShama || 153 || romakUpabhramatkoTikoTibrahmANDamaNDala | prasUvadAgaHsahana jaganmAtarjagatpitaH || 154 || nAbhyabjajanitabrahmannArAyaNa nirAvR^ite | svarbhAnvAprapa~nchikShAtadasatyatvadarshaka || 155 || satyalIlAvatAraughAchintyalIlAtivaibhava | mithyAsatyatvasaMpAdin sadA paramasatya he || 156 || guruprasAdasaMdR^ishya prapa~nchajanakAsmR^ite | bandhamokShAdimithyAtvakR^id vichAraNamAtraka || 157 || asattyAgisvabhaktAntarbahirAtmAdhikasphuTa | svapAdamahimaj~nApisvapAdAbjaprasAda he || 158 || vidhAtR^ibhUribhAgyaikaprArthyadAsanudAsyaka | chaturmukhamuhurgItabhaktimAhAtyma pAhi mAm || 159 || namaH 39 dhanyadhanyavrajavadhUdhenutarpitamodita | nityapUrNamahAbhAgya vrajaukomitratAM gata || 160 || vrajavAsiprasa~NgAntardevatAbahusaukhyada | vrajajAtA~NghrireNuspR^iktR^iNajanmepsupadmaja || 161 || premArpitAsheSha ghoShavAsimahAR^iNin | sadveshamAtrasaMj~nAtapUtanAtma pradAyaka || 162 || viraktaprApyadAnAnuraktAparyAptiyantrita | putratvAdyanukArAtisuhR^idAnR^iNyalajjita || 163 || avidvanmAnisachchittavAgagocharavaibhava | atyAnandamuhurnAmakIrtanabrahma vandita || 164 || namaH 40 brahmaprasAdasumukha bhaktavatsala vAkpriya | smitekShAharShitabhrahmanbrahmAnuj~nApradAyaka || 165 || vatsavatsapamohaghna yathApUrvArbhatarNaka | pulinAnItavatsaugha namaste.adbhutakarmaNe || 166 || mugdhabAlAlivAgjAtahAsa vrajagR^ihotsava | vichitraveshacharita gopIhR^idayamodana || 167 || AtmAdhikapriyatama sarvabhUtasuhR^idvara | parikShichChukasaMvAdanishchitapremasAgara || 168 || vichitralIla mAM pAhi nilAyanavihAravit | krIDAsetuvidhAnaj~na plava~Ngaplavanoddhata || 169 || namaH 41 iti dashamaskandhe chaturdasho.adhyAyaH || paugandhAgama gopAla vR^indAvipinama~Ngala | vR^indAvanAntaHsa~nchArinsammAnitanijAgraja || 170 || vR^indAvanaguNAkhyAnamiShadattamhAvara | ativR^indAvanaprIta nAnArativichakShaNa || 171 || bhR^i~NgAnukArin mAM pAhi kUjanirjitakokila | upAttahaMsagamana shikhinR^ityAnukAraka || 172 || pratidhvAnapramudita shAkhAkUrdanakovida | nAmAkAritagovR^inda rajjuyaj~nopavItabhR^it || 173 || niyuddhalIlAsaMhR^iShTa balabhadrashramApanut | gopaprashaMsAnipuNa vR^ikShachChAyAhR^itashrama || 174 || puShpapallavatalpADhya gopotsa~NgopabarhaNa | gopasaMvAhitapada gopavyajanabIjita || 175 || gopagAnasukhasvapna jitaishyagrAmyacheShTita | ramAlAlitapAdAbjA~NkitavR^indAvanasthala || 176 || namaH 42 jaya shrIdAmasubalastokakR^iShNaikabAndhava | vR^iShAlavR^iShabhaujasvidevaprasthavayasya he || 177 || varUthapArjunasakha bhadrasenAMshuvallabha | tAlIvanakR^itakrIDa balapAtitadhenuka || 178 || uttAlatAlarAjIbhidrAsabhAsuranAshana | gopavR^indastavAnandin puNyashravaNakIrtana || 179 || namaH 43 gopIsaubhAgyasaMbhAvyaM godhUlichChuritAlakaM | alakAbaddhasumanaHshikhaNDaM ruchirekShaNam || 180 || savrIDahAsavinayakaTAkShAkShepasundaraM | gopIlobhanaveshaM tvAM vande gopIratipradaM || 181 || jayAmbAkAritasnAna puNDarIkAvataMsaka | muktAhAralasatkaNTha karaka~NkaNasundara || 182 || ma~njushi~njitama~njIra svarNAla~NkArabhUShaNa | divyasraggandhavAsobhR^ijjananyupahR^itAnnabhuk || 183 || vilAsalalitasmera garvalIlAvalokana | sukhapalya~NkasaMviShTa rAdhAsaMlApanirvR^ita || 184 || namaH 44 yamunAtaTasa~nchArin kAliyahradatIraga | namaste.atisudhAdR^iShTe viShArtavrajajIvana || 185 || ativismitagopAlakulAnumitacheShTita | jaya svajanarakShArthanigUDhaishvaryadarshaka || 186 || namaH 45 iti dashamaskandhe pa~nchadasho.adhyAyaH || tu~NganIpasamArUDhaM sarpahradavihAriNaM | kAliyakrodhajanakaM kruddhAhikulaveShTitaM || 187 || mohamagnasuhR^idvargaM sAshrugokulavIkShitaM | mahotpAtasamudvignavrajAnviShTagatiM bhaje || 188 || padachihnAptamArgaM tvAM mR^itaprAyasvarAndhavaM | rAmarakShitanandAdimumUrShuvrajashochitaM || 189 || namaH 46 namaste svIyaduHkhaghna sarpakrIDAvishArada | kAliyAhiphaNAra~NganaTa kAliyamardana || 190 || kAliyaphaNamANikya ra~njitashrIpadAmbuja | nijagandharvasiddhAdigItavAdyAdinartita || 191 || pAdAmbujavimardAtinamitAhIndramastaka | raktodgArivibhinnA~NgadInakAliyasaMsmR^ita || 192 || namaH 47 nAgapatnIstutiprIta hitArthochitadaNDakR^it | kroDaprasAdagAmbhIrya mahApuNyaikatoShya he || 193 || nirupAdhikR^ipAkArin sarpastrIprArthyadAyaka | sarvArthatyAgibhaktArthyasvA~NghrirekhAchitoraga || 194 || achintyaishvaryamahimannAnAjIvasvabhAvasR^ik | nAnAkrIDanakakrIDin svaprajAgaHkShamochita || 195 || nAgastrIpatibhikShAda jaya kAliyabhAShita | agrAhyasR^iShTaduShTAgo.ayogyamohitanigraha || 196 || svA~NkamudrA~NkitAhIndramUrddhan kAliyashAsana | pUrvasthAnApitAhIndra suparNajabhayApahR^it || 197 || nAgopAyanahR^iShTAtman kAliyAtiprasAdita | yamunAhradasaMshodhin hradotsAritakAliya || 198 || namaH 48 iti dashamaskandhe ShoDasho.adhyAyaH || svabalyashanakAliyadarpamardanavAhana | saubharyuktisavkAgamyasarpAvAsahradoddhara || 199 || divyasraggandhavastrADhya divyAbharaNabhUShita | mahAmaNigaNAkIrNa vrajajIvanadarshana || 200 || sahAsashrIvalAshliShTa gopAli~NgananirvR^ita | prasIda pItadAvAgne svajanArtivinAshana || 201 || namaH 49 iti dashamaskandhe saptadasho.adhyAyaH || kAkapakShadhara shrImadvasantitanidAgha he | nayanAchChAdanakrIDa rAjalIlAnukAraka || 202 || mR^igAdicheShTAkrIDAkR^iddolAnaukAvinodaka | nAnAlaukikalIlAbhR^innAnAsthAnavihArakR^it || 203 || krIDAsamprAptabhANDIra jaya bhANDIramaNDana | goparUpipralambaj~na dvandvakrIDApravartaka || 204 || bAhyavAhakakelIman jaya shrIdAmavAhaka | balapAtitadurdharShapralamba balavatsala || 205 || namaH 50 iti dashamaskandhe.aShTAdasho.adhyAyaH || jaya mu~njATavIbhraShTamArgapashvArtinAshaka | dAvAgnibhItagopAladR^i~NnimIlanadeshaka || 206 || mu~njATavyagnishamana pItolvaNadavAnala | bhANDIrApitagogopa yogAdhIsha namo.astu te || 207 || namaH 51 iti dashamaskandhe ekonaviMsho.adhyAyaH || prAvR^iTshrIbhUShitAraNya vR^iShTikAlavinodakR^it | guhAvanaspatikroDasevin mUlaphalAshana || 208 || pAShANanyastadadhyannabhuk varShAharShitavraja | shAdvalAshanavarShAshrIsammAnaka namo.astu te || 209 || he sharannirmalavyomachArukAnte prasIda me | sharachchandralasadvaktrakR^itagopImahAsmara || 210 || namaH 52 iti dashamaskandhe viMsho.adhyAyaH || sharadvihAramadhura sharatpuShpavibhUShaNa | karNikArAvataMsaM tvAM naTaveshadharaM bhaje || 211 || vinyastavadanAmbhojalochanaprAntanartaka | bimbAdharArpitodAraveNo jaya sugAyana || 212 || namo vaktrAvalokAya tribha~NgalalitAya te | veNumohitavishvAya gopikodgItakIrtaye || 213 || namaH 53 chakShuHsAphalyasampAdishrImadvaktrAbjavIkShaNa | nAnAmAlAlasadvesha gopAlasabhashobhana || 214 || sadAtipuNyavadveNupIyamAnAdharAmR^ita | vR^indAvanAtikIrtishrIpradapadAbjalakShaNa || 215 || apUrvamuralIgItanAdanartitabarhiNa | shAkhotkIrNashakuntaugha sarvaprANimanohara || 216 || vismArita tR^iNagrAsamR^igIkulavilobhita | sushIlarUpasa~NgItadevIgaNavimohana || 217 || gADharoditagovR^inda premotkarNitatarNaka | nirvyApArIkR^itAsheShamunitulyaviha~Ngama || 218 || gItastabdhasaritpUra chChatrAyitabalAhaka | pulindIpremakR^idghAsalagnapAdAbjaku~Nkuma || 219 || harisevakavaryatvasampadgovardhanArchita | svapremaparamAnandachitrAyitacharAchara || 220 || rAgapallavitasthANo gItAnamitapAdapa | gopAlavilasadvesha gopImAravivardhana || 221 || asheShaja~NgamasthANusvabhAvaparivartaka | AdrIkR^itashilAkAShTha nirjIvojjIvanAva naH || 222 || namaH 54 iti dashamaskandha ekaviMsho.adhyAyaH || gopakanyAvrataprIta prasIda varadeshvara | jalakrIDAsamAshaktagopIvastrApahAraka || 223 || kadambArUDha vande tvAM chitranarmoktikovida | gopIstavavilubdhAtman gopikAyAchitAMshuka || 224 || srotovAsaHsphuradgopakanyAkarShaNalAlasa | shItArtayamunottIrNagopIbhAvaprasAdita || 225 || skandhAropitagopastrIvastra sasmitabhAShaNa | gopInamaskriyAdeShTargopyekakaravandita || 226 || gopya~njalivisheShArthin gopakanyAnamaskR^ita | gopIvastrada he gopIkAmitAkAmitaprada || 227 || gopIchittamahAchora gopakanyAbhuja~Ngama | dehi svagopikAdAsyaM gopIbhAvavimohita || 228 || namaH 55 shrIvR^indAvanadUrasthaviprAbhAvAbhikarShita | AtapatrAyitAsheShatarudarshanaharShita || 229 || paropakAraniratatarujanmAbhinandaka | yamunAmR^itasaMtR^ipta gogopagaNasevita || 230 || namaH 56 iti dashamaskandhe dvAviMsho.adhyAyaH || yaj~napatnIprasAdArthagopakShudativardhana | kShudArtagopavAgvyagra jaya yajvAnnayAchaka || 231 || duShpraj~nayajvAvaj~nAta bhaktaviprAdidR^ikShita | brAhaNyAakarShakodanta yaj~napatnImanohara || 232 || brAhmaNItApabhichchitraveshAvasthAnabhUShaNa | jaya dvijasatIshlAghin yaj~napatnIShTadAsyaka || 233 || brAhmaNIkAkusantuShTa brAhmaNIpremabhaktida | patiruddhasatIsadyovimuktida namo.astu te || 234 || yajamAnIvitIrNAnnatR^ipta viprAnutApada | svIyasa~Ngadvijaj~nAnaprada brahmaNyadeva he || 235 || namaH 57 iti dashamaskandhe trayoviMsho.adhyAyaH || jaya vAsavayAgaj~na pitR^ipR^iShTamakhArthaka | shrutatAtoktayaj~nArtha karmavAdAvatAraka || 236 || nAnApanyAyavAdaughashakrayAganibAraka | govardhanAdrigoyaj~napravartaka namo.astu te || 237 || proktAdrigomakhavidhe yaj~nadattopahArabhuk | gopavishvAsanArthAdrichChalasthulAnyarUpadhR^ik || 238 || govardhanashiroratna govardhanamahattvada | kR^itabhUShAshanAbhIrakAritAdriparikrama || 239 || namaH 58 iti dashamaskandhe chaturviMsho.adhyAyaH || janitendraruShaM shakramadavR^iShTishamonmukhaM | govardhanAchaloddhartastvAM vande.adbhutavikramam || 240 || lIlAgovardhanadhara vrajarakShAparAyaNa | bhujAnantoparivinyastakShmAnibhakShmAbhR^iduttama || 241 || govardhanachChatradaNDabhujArgala mahAbala | saptAhavidhR^itAdrIndra meghavAhanagarvabhit || 242 || saptAhaikapadasthAyin vrajakShuttR^iDnudIkShaNa | jaya bhagnendrasa~Nkalpa mahAvarShanibAraNa || 243 || svasthAnasthApitagire gopIdadhyakShatArchita | devatAsumanovR^iShTisikta vAsavabhIShaNa || 244 || namaH 59 iti dashamaskandhe pa~nchaviMsho.adhyAyaH || jayAdbhutamahAcheShTAvismitavrajasha~Nkita | gopAnupR^iShTajanaka gopodgItAkhilehita || 245 || nandoktagargasadvAkyagopAsha~NkAnirAsaka | goShTharakShaka mAM rakSha gopAlAnandavardhana || 246 || namaH 60 iti dashamaskandhe ShaDviMsho.adhyAyaH || bhItalajjitadeveshakirITaspR^iShTapAda he | vAsavastuta sarvaj~na jitamAyAstadUShaNa || 247 || dharmapAla khaladvaMsin duShTamanaghnacheShTita | svIyAparAdhakShamaNa sharaNAgatavatsala || 248 || shakrashikShaka shakratvaprada surabhIDita | surabhIprArthitendratva shrIgoinda namo.astu te || 249 || kAmadhenupayaHpUrAbhiShiktAmarapUjita | airAvatakarAnItaviyadga~NgAjalApluta || 250 || gogopagopikAnandin sarvalokashubhA~Nkara | harShapUritadevendra jagadAnandavardhana || 251 || namaH 61 iti dashamaskandhe saptaviMsho.adhyAyaH || prasIda me payomagnanandAnveShin pitR^ipriya | varuNAlaya saMprApta varuNAbhIShTadarshana || 252 || varuNArchitapAdAbja varuNAtiprasAdita | varuNAgaHkShamAkArinnandabandhavimochana || 253 || nandashrAvitamAhAtmya gopaj~nAnAtivaibhava | gopasa~Nkalpavij~nAtaH karuNAkulamAnasa || 254 || svalokAlokasaMhR^iShTagopavargArthavargada | brahmahradoddhR^itAbhIrAbhIShTabrahmapadaprada || 255 || namaH 62 iti dashamaskandhe.aShTaviMsho.adhyAyaH || jaya jaya nijapAdAmbhojasatpremadAyin rasikajanamanohR^id rAsalIlAvinodin | vivR^itamadhurakaishorAtilIlAprabhAva priyajanavashavartin vyaktasatyasvabhAva || 256 || tyaktAtmarAmatAmAya tuchChIkR^itanijAgama | bhaktaprArthyanijapremadhArAdAnArtharAsakR^it || 257 || sharannishAvihArotka chandrodayaratAshaya | gopIvimohanodgIta paramAkarShapaNDita || 258 || anAdR^itaniShedhaughIkR^itagopasatIgaNa | tyaktasarvakriyApekShagopastrIprAptasa~Ngama || 259 || namaH 63 prasIda bhartR^isaMruddhagopIpremAgnivardhana | svakAmonmattagopastrIdehabandhavimochana || 260 || shukakrodhoktinirNItamahAmahimasAgara | krodhAdibhajamAnArthapradasmaraNa mAM smara || 261 || namaH 64 gopikAnayanAsvAdya gopIva~nchanavAkpaTo | gopImiShToktishushrUShAsvadharmabhayadarshaka || 262 || gopImahAdhivistArin gopIrodanavardhana | gopyarthitA~NgasaMsarga gopIkAkubhinirvR^ita || 263 || avahitthAparityakta prodyanmAnasavikriya | dhUrtAgragaNya mAM pAhi kAmamugdha smitAnana || 264 || vyaktasvabhAvamadhura smaralolitalochana | gopImanoharApA~Nga gopikAshatayUthapa || 265 || vaijayantIsragAkalpa sharachchandranibhAnana | yamunApulinAsIna gopIramaNa pAhi mAM || 266 || jitamanmatha tantraj~na gopImAnavivardhana | gopikAtiprasAdArthakR^itAntardhAnavibhrama || 267 || namaH 65 iti dashamaskandhe UnatriMsho.adhyAyaH ||