prathamA prabhA kAvyaphalAdinirNayaH

kalAbhirnirbhR^itaH shrImAn rAdhayA samala~NkR^itaH |
dIvyatkuvalayaH so.ayaM vidhurvijayatetarAm || 1 ||

prAripsitasyAsya shAstrasya kAvyA~NgatvAt kAvyaphalameva phalamiti tAvadAaha |

kIrtiH sArvaj~nyamAnando dhanAdIni cha kAvyataH |

sArvaj~nyaM devamAnavAdiprANicheShTAvagatirUpaH | Anando rasAnubhavasamudbhUtaH dhanaM nR^ipatiprasAdalabdhA hastyashvAdisampat AdinA dharmakAmamokShAH | tatra dharmo bhagavadvandanAdiH | kAmo dhanadvArakaH | mokSho j~nAnakANDe vyutpattividhAnAadityetat sarvaM kAvyAdeva bhavedatastatatra puMbhiH sayatnairbhAvyam | tasya hetumAha |
hetustasya bhavechChaktiH shikShA nipuNatA tathA || 2 ||

shaktiH pUrvasaMskAraH shikShA kAvyavidupadeshaH nipuNatA tu vyAkaraNAbhidhAnakoShachChandaHprAchInakAvyAdinibhAlanAd vyutpattiH tasya kAvasyodbhave kAraNam | tasya lakShaNamAha |

kavinA nirmitaM vAkyaM kAvyam |

chamatkArakaragadyapadyAtmanA rachitaM kavervAkyaM kAvyaM | udAharaNam ---

kokilakalakR^itakampAM tanujitashampAM priyAM pashyan |
vapuravanamitapayodaH samuditamodaH sa mAdhavo jayati ||

gadyapadyayoshchamatkArakaratvaM chAturyAdeva bhavati | chAturyaM tu yuktivisheShArtha niyojanam | tathA hi varNayanti --- shatrorgaditavIryAdernirjayAnnAyakastutiH | chAturyamiti pashchAttanaM sambadhyate | udA ---

ugraprAptadhanurvidyaM sarvaj~naM kShAtrakuNTakaM |
gaviShTaM kharvayAmAsa bhArgavaM rAghavAgraNI ||

dR^iShTAntenAlpavarNena mahato.arthasya kIrtanam || 3 ||

udA ---

nR^igavat sa gatiM yAti yo brahmasvApahArakaH |

atra nR^igavadityanena nR^igAkhyAyikAvyaktiH |

padyena laghunA vA syAdgambhIrArthaprakAshanam || 4 ||

yathA ---

nijabhaktasukhArthaM yaH kAlamapyativarttate |
puruShAya namastasmai kasmaichitpurutejase ||

rAvaNea nipIDitaH surairabhyarthito bhagavAn dvApara eva tadvinAshakAlaM tretAM prakalpya taM vijidhAna adityA toShotashcha tatsukhAya balivrddhikAlamanyathayan baliM dUShayAmAseti padyAdasmAtprakAshate ||

apArAnandavij~naptiryA syAnnyUnapadAdibhiH |

yathA ---

sasmitA mR^igashAvAkSho gADhamAli~NgitA mayA |
mA mA meti yadabrUta tanme kR^intati mAnasam ||

atra metyanantaraM pIDayeti padamUnaM sattasyAH sukhasindhumagnatAM bodhayati |

hetoratiprasiddhasya na kuryAdAdaraM kvachit || 5 ||

yathA ---

na yuddhena bhruvoH spandanaiva vIrA nibAritAH |

vikhyAtasahitoktishchettatsAdR^ishyAya kalpate |

yathA ---

yuvAmeva hi vikhyAtau tvaM balairjaladhirjalaiH ||

atrAmbudhisAhityenoktirnR^ipatestattulyatAyai syAt |

khyAtadoShanirAsashcha vIkShyate guNavarNanAt || 6 ||

yathA ---

mudhA nindati saMsAraM kaMsAriryatra pUjyate |

chAturyaM kavitAyAM syAdevamAdyarthayojanaM || sphuTaM idaM kAvyalakShaNaM kavivachanamAtreNAtivyAptaM nirmitamityukteH | vAkyaM rasAtmakaM kAvyamiti tu rAmaH sahasA tayA kroDatItyatrAtivyAptaM rasAtmakavAkyatvAt | adoShau saguNau sAla~NkArau shabdArthau kAvyamiti tu kura~NganayanetyatrAtivyAptam tAdR^ishashabdArtharUpatvAt | athAsya sharIrAdisvarUpamAha || shabdArthavigrahaM kAvyamiti sambadhyate | shabdArthasharIraM kAvyamiti |

tasyAtmA tu raso vya~NgyastadanyaH prANa uchyate || 7 ||

rasabhAvAdirvya~NgyaH kAvyasyAtmA | vastvAdistu prANaH |

rasabhAvatadAbhAsabhAvashAntyAdiko gaNaH |
sarvo.api rasyamAnatvAdrasashabdena kIrtitaH || 8 ||

sphuTam |

utkarShakAraNAni syurguNAla~NkArarItayaH ||

ojaHprabhR^itayo guNAH shauryAdivat kAvyasyotkarShakAH |

anuprAsopamAdayo.ala~NkArAH kuNDalaka~NkaNAdivat |
vaidarbhIpramukhA rItayastva~NgasaMsthAnavisheShavat |
doShAH shrutikaTutvAdyA bhaveyurapakarShakAH || 9 ||

kANatvAdivat shrutikaTutvAdayaH kAvyamapakarShayantastasya doShAH syuH | guNAdiShu ye yaddharmA yathA yadutkarShayantyapakarShaM yAnti cha tattUrddhvaM vakShyAmaH |

iti kAvyakaustubhe kAvyaphalAdinirNayaH prathamA prabhA ||