dashamavilAsaH shrIkR^iShNacharaNAmbhojamadhupebhyo namo namaH | katha~nchidAshrayAdyeShAM shvApi tadgandhabhAg bhavet ||1|| atha shrIkR^iShNabhaktAnAM sabhAM savinayaM shubhAm | gachChedvaiShNavachihnADhyaH pAtuM kR^iShNakathAsudhAm ||2|| tathA cha smR^itiH itihAsapurANAbhyAM ShaShThasaptamakau nayet ||3|| atha shrIbhagavadbhaktAnAM lakShaNAni sAmAnyataH lai~Nge viShNureva hi yasyaiSha devatA vaiShNavaH smR^itaH ||4|| atra visheShaH vratakarmaguNaj~nAnabhogajanmAdimatsvapi | shaiveShvapi cha kR^iShNasya bhaktAH santi tathA tathA ||5|| atra vratiShu madhye bhagavadbhaktihetuvrataparatA bhagavadbhaktalakShaNam tathA skAnde shrImArkaNDeyabhagIrathasaMvAde dashamIsheShasaMyuktaM dinaM vaiShNavavallabham | nopAsate mahIpAla te vai bhAgavatA narAH ||6|| prANAtyaye na chAshnanti dinaM prApya harernarAH | kurvanti jAgaraM rAtrau sadA bhAgavatA hi te ||7|| upoShya dvAdashIM shuddhAM rAtrau jAgaraNAnvitAm | alpAM tu sAdhayedyastu sa vai bhAgavato naraH ||8|| bhaktirna vichyutA yeShAM na chyutAni vratAni cha | supriyaH shrIpatiryeShAM te syurbhAgavatA narAH ||9|| karmiShu bhagavadarpaNAdinA tadAj~nAbuddhyA vA bhaktihetuH sadAchAraparatA | dharmArthaM jIvitaM yeShAM santAnArthaM cha maithunam | pachanaM vipramukhyArthaM j~neyAste vaiShNavA narAH ||10|| adhvagaM tu pathi shrAntaM kAle.atra gR^iham Agatam | yo.atithiM pUjayedbhaktyA vaiShNavaH sa na saMshayaH ||11|| sadAchAraratAH shiShTAH sarvabhUtAnukampakAH | shuchayastyaktarAgA ye sadA bhAgavatA hi te ||12|| pAdme vaishAkhamAhAtmye shrInAradAmbarIShasaMvAde 5948 jIvitaM yasya dharmArthaM dharmo haryartham eva cha | ahorAtrANi puNyArthaM taM manye vaiShNavaM bhuvi ||13|| lai~Nge cha viShNubhaktisamAyuktAn shrautasmArtapravartakAn | prIto bhavati yo dR^iShTvA vaiShNavo.asau prakIrtitaH ||14|| guNavatsu bhaktihetuH kR^ipAlutvAdisadguNashIlatA | skAnde tatraiva paraduHkhenAtmaduHkhaM manyante ye nR^ipottama | bhagavaddharmaniratAste narA vaiShNavA nR^ipa ||15|| tR^itIyaskandhe shrIkapiladevahUtisaMvAde 32521 titikShavaH kAruNikAH suhR^idaH sarvadehinAm | ajAtashatravaH shAntAH sAdhavaH sAdhubhUShaNAH ||16|| pa~nchamaskandhe R^iShabhadevasya putrAnushAsane 552 mahatsevAM dvAram Ahurvimuktes tamodvAraM yoShitAM sa~Ngisa~Ngam | mahAntaste samachittAH prashAntA vimanyavaH suhR^idaH sAdhavo ye || 17 || ekAdashaskandhe bhagavatpradattoddhavaprashnottare 111129-31 kR^ipAlurakR^itadrohastitikShuH sarvadehinAm | satyasAro .anavadyAtmA samaH sarvopakArakaH ||18|| kAmairahatadhIrdAnto mR^iduH shuchiraki~nchanaH | anIho mitabhuk shAntaH sthiro machCharaNo muniH ||19|| apramatto gabhIrAtmA dhR^itimA~n jitaShaDguNaH | amAnI mAnadaH kalyo maitraH kAruNikaH kaviH ||20|| viShNupurANe yamatadbhaTasaMvAde vip 3720 na chalati nijavarNadharmato yaH samamatirAtmasuhR^idvipakShapakShe | na harati na hanti ki~nchiduchchaiH sthitamanasaM tam avehi viShNubhaktam ||21|| j~nAniShu bhaktiheturj~nAnavattA | ekAdashe haviyogeshvarottare bhp 1124552 sarvabhUteShu yaH pashyedbhagavadbhAvam AtmanaH | bhUtAni bhagavatyAtmanyeSha bhAgavatottamaH ||22|| na yasya svaH para iti vitteShvAtmani vA bhidA | sarvabhUtasamaH shAntaH sa vai bhAgavatottamaH ||23|| ekAdashe shrIbhagavaduktau bhp 111133 j~nAtvAj~nAtvAtha ye vai mAM yAvAn yash chAsmi yAdR^ishaH | bhajantyananyabhAvena te me bhaktatamA matAH ||24|| tatraiva haviyogeshvarottare bhp 11246-47 Ishvare tadadhIneShu bAlisheShu dviShatsu cha | premamaitrIkR^ipopekShA yaH karoti sa madhyamaH ||25|| archAyAm eva haraye pUjAM yaH shraddhayehate | na tadbhakteShu chAnyeShu sa bhaktaH prAkR^itaH smR^itaH ||26|| bhogavatsu bhaktiheturbhogAnAsaktatA | haviyogeshvarottare bhp 11248 gR^ihItvApIndriyairarthAn yo na dveShTi na hR^iShyati | viShNormAyAm idaM pashyan sa vai bhAgavatottamaH ||27|| sajjanmavidyAdimatsu bhaktiheturnirabhimAnitA | tatraiva bhp 11251 na yasya janmakarmabhyAM na varNAshramajAtibhiH | sajjate .asminn ahambhAvo dehe vai sa hareH priyaH ||28|| bhAvAH katha~nchidbhaktaiva j~nAnAnAsaktyamAnitA | bhaktiniShThApakA jAtAstato hyuttamatoditA ||29|| shaiveShu shrIshivakR^iShNabhedakAH | bR^ihannAradIye nArp 1572 shive cha parameshAne viShNau cha paramAtmani | samabuddhyA pravarttante te vai bhAgavatottamAH ||30|| anyach cha teShAM bhagavachChAstrArthaparatAdikam | sAkShAdbhaktyAtmakaM mukhyaM lakShaNaM likhyate.adhunA ||31|| skAnde yeShAM bhAgavataM shAstraM sadA tiShThati sannidhau | pUjayanti cha ye nityaM te syurbhAgavatA narAH ||32|| yeShAM bhAgavataM shAstraM jIvitAdadhikaM bhavet | mahAbhAgavatAH shreShThA viShNunA kathitA narAH ||33|| vaiShNavasammAnaniShThA | lai~Nge viShNubhaktam athAyAtaM yo dR^iShTvA sumukhaH priyaH | praNAmAdi karotyeva vAsudeve yathA tathA | sa vai bhakta iti j~neyaH sa punAti jagat trayam ||34|| rukShAkSharA giraH shR^iNvan tathA bhAgavateritAH | praNAmapUrvakaM kShAntvA yo vadedvaiShNavo hi saH ||35|| bhojanAchChAdanaM sarvaM yathAshaktyA karoti yaH | viShNubhaktasya satataM sa vai bhAgavataH smR^itaH ||36|| gAruDe yena sarvAtmanA viShNubhaktyA bhAvo niveshitaH | vaiShNaveShu kR^itAtmatvAn mahAbhAgavato hi saH ||37|| shrItulasIsevAniShThA nArp 1565-66 tulasIkAnanaM dR^iShTvA ye namaskurvate narAH | tatkAShThA~NkitakarNA ye te vai bhAgavatottamAH ||38|| tulasIgandham AghrAya santoShaM kurvate tu ye | tanmUlam R^iddhUtA yaish cha te vai bhAgavatottamAH ||39|| shrIbhagavataH kathAparatA bR^ihannAradIye 1552 shrIbhagavanmArkaNDeyasaMvAde matkathAshravaNe yeShAM vartate sAttvikI matiH | tadbhaktaviShNubhaktAsh cha te vai bhAgavatottamAH ||40|| skAnde shrIbhagavadarjunasaMvAde matkathAM kurute yastu matkathAM cha shR^iNoti yaH | hR^iShyate matkathAyAM cha sa vai bhAgavatottamaH ||41|| tR^itIyaskandhe bhp 32523 tatraiva madAshrayAH kathA mR^iShTAH shR^iNvanti kathayanti cha | tapanti vividhAstApA naitAn madgatachetasaH ||42|| bR^ihannAradIye 1564 tatraiva manmAnasAsh cha madbhaktA madbhaktajanalolupAH | mannAmashravaNAsaktAste vai bhAgavatottamAH ||43|| ye.abhinandanti nAmAni hareH shrutvA.atiharShitAH | romA~nchitasharIrAshcha te vai bhAgavatottamAH ||44|| tatraivAnyatra 1561 anyeShAm udayaM dR^iShTvA ye.abhinandanti mAnavAH | harinAmaparA ye cha te vai bhAgavatottamAH ||45|| smaraNaparatA tatra svadharmaniShThayA rAgadveShanivR^ittyA smaraNam shrIviShNupurANe yamatadbhaTasaMvAde vip 3720-26 na chalati ya uchchaiH shrIbhagavatpadAravinde | sitamanAstam avehi viShNubhaktam ||46|| kalikaluShamalena yasya nAtmA vimalamatermalinIkR^itastam enam | manasi kR^itajanArdanaM manuShyaM satatam avehi hareratIvabhaktam ||47|| kanakam api rahasyavekShya buddhyA tR^iNam iva yaH samavaiti parasvam | bhavati cha bhagavatyananyachetAH puruShavaraM tam avehi viShNubhaktam ||48|| sphaTikagirishilAmalaH kva viShNur manasi nR^INAM kva cha matsarAdidoShaH | na hi tuhinamayUkharashmipu~nje bhavati hutAshanadIptijaH pratApaH ||49|| vimalamatiramatsaraH prashAntaH shuchicharito.akhilasattvamitrabhUtaH | priyahitavachano.astumAnamAyo vasati sadA hR^idi tasya vAsudevaH ||50|| vasati hR^idi sanAtane cha tasmin bhavati pumAn jagato.asya saukhyarUpaH | kShitirasam atiramyam Atmano.antaH kathayati chArutayaiva shAlapotaH ||51|| anyavijaye vairAgyAdinA cha smaraNam ekAdashaskandhe haviyogeshvarottare bhp 11249 53-54 dehendriyaprANamanodhiyAM yo janmApyayakShudbhayatarShakR^ichChraiH | saMsAradharmairavimuhyamAnaH smR^ityA harerbhAgavatapradhAnaH ||52|| tribhuvanavibhavahetave .apyakuNTha smR^itirajitAtmasurAdibhirvimR^igyAt | na chalati bhagavatpadAravindAl lavanimiShArdham api yaH sa vaiShNavAgryaH ||53|| bhagavata uruvikramA~NghrishAkhA nakhamaNichandrikayA nirastatApe | hR^idi katham upasIdatAM punaH sa prabhavati chandra ivodite .arkatApaH ||54|| skAnde tatraiva ye.archayanti sadA viShNuM yaj~neshaM varadaM harim | dehinaH puNyakarmANaH sadA bhAgavatA hi te ||55|| lai~Nge viShNukShetre shubhAnyeva karoti snehasaMyutaH | pratimAM cha harernityaM pUjayet pratayAmavAn ||56|| viShNubhaktaH sa vij~neyaH karmaNA manasA girA | nArAyaNaparo nityaM bhUpa bhAgavato hi saH ||57|| atha vaiShNavadharmaniShThAdi pAdmottarakhaNDe 625327 tApAdipa~nchasaMskArI navejyAkarmakArakaH | arthapa~nchakavidvipro mahAbhAgavataH smR^itaH ||58|| ekAntikatA gAruDe ekAntena sadA viShNau yasmAddeve parAyaNAH | tasmAdekAntinaH proktAstadbhAgavatachetasaH ||59|| tadvij~nAnenAnanyaparatA ekAdashe bhp 111133 uddhavaprashnottare j~nAtvAj~nAtvAtha ye vai mAm yAvAn yash chAsmi yAdR^ishaH | bhajantyananyabhAvena te vai bhAgavatA matAH ||60|| ekAdashaskandhe bhp 11250 na kAmakarmabIjAnAM yasya chetasi sambhavaH | vAsudevaikanilayaH sa vai bhAgavatottamaH ||61|| sA cha ekAntitA chaturdhA tatra dharmAnAdareNa shrImaduddhavaprashnottara eva bhp 111132 Aj~nAyaivaM guNAn doShAn mayAdiShTAn api svakAn | dharmAn santyajya yaH sarvAn mAM bhajeta sa tu sattamaH ||62|| shrIbhagavadgItAyAm gItA 1866 sarvadharmAn parityajya mAm ekaM sharaNaM vraja | ahaM tvA sarvapApebhyo mokShayiShyAmi mA shuchaH ||63|| chaturthaskandhe bhp 42947 yadA yasyAnugR^ihNAti bhagavAn atmabhAvitaH | na jahAti matiM loke vede cha pariniShThitAm ||64|| anyasarvanirapekShatA shrIbhagavaduddhavasaMvAde bhp 112627 ailopAkhyAne santo .anapekShA machchittAH prashAntAH samadarshinaH | nirmamA niraha~NkArA nirdvandvA niShparigrahAH ||65|| ataeva shrIkapiladevahUtisaMvAde 32524 ta ete sAdhavaH sAdhvi sarvasa~NgavivarjitAH | sa~NgasteShvatha te prArthyaH sa~NgadoShaharA hi te ||66|| vighnAkulatve.api manoratiparatA | skAnde tatraiva yasya kR^ichChragatasyApi keshave ramate manaH | na vichyutA cha bhaktirvai sa vai bhAgavato naraH ||67|| Apadgatasya yasyeha bhakiravyabhichAriNI | nAnyatra ramate chittaM sa vai bhAgavato naraH ||68|| premaikarasatA | shrIR^iShabhadevasya putrAnushAsane bhp 553 ye vA mayIshe kR^itasauhR^idArthA janeShu dehambharavArtikeShu | gR^iheShu jAyAtmajarAtimatsu na prItiyuktA yAvadarthAsh cha loke ||69|| tridhA premaikaparatA premNaH syAt tAratamyataH | uttamA madhyamA chAsau kaniShThA cheti bhedataH ||70|| tatrottamA | yathA ekAdashe haviyogeshvarottare bhp 11245-46 sarvabhUteShu yaH pashyedbhagavadbhAvam AtmanaH | bhUtAni bhagavatyAtmanyeSha bhAgavatottamaH ||71|| sveShTadevasya bhAvaM yaH sarvabhUteShu pashyati | bhAvayanti cha tAnyasminn ityarthaH sammataH satAm ||72|| shrIkapiladevahUtisaMvAde 32522 mayyananyena bhAvena bhaktiM kurvanti ye dR^iDhAm | matkR^ite tyaktakarmANastyaktasvajanabAndhavAH ||73|| shrIhaviyogeshvarottare bhp 11255 visR^ijati hR^idayaM na yasya sAkShAd dhariravashAbhihito .apyaghaughanAshaH | praNayarasanayA dhR^itA~NghripadmaH sa bhavati bhAgavatapradhAna uktaH ||74|| tatra madhyamA | shrIhaviyogeshvarottare bhp 11246 Ishvare tadadhIneShu bAlisheShu dviShatsu cha | premamaitrIkR^ipopekShA yaH karoti sa madhyamaH ||75|| tatra kaniShThA | tatraiva bhp 11247 archAyAm eva haraye pUjAM yaH shraddhayehate | na tadbhakteShu chAnyeShu sa bhaktaH prAkR^itaH smR^itaH ||76|| shraddhayA pUjanaM premabodhakaM bhakta ityapi | lakShaNAni cha yAnyagre bhakterlekhyAni tAnyapi ||77|| vandanAdIni vidyante yeShu bhAgavatA hi te | etAni lakShaNAnItthaM gauNamukhyAdibhedataH ||78|| UhyAni lakShaNAnyevaM vivechyAni parANyapi ||79|| IdR^iglakShaNavantaH syurdurlabhA bahavo janAH | divyA hi maNayo vyaktaM na varterann itastataH ||80|| ataevoktaM mokShadharme nArAyaNIye mbh 1233668 jAyamAnaM hi puruShaM yaM pashyen madhusUdanaH | sAttvikastu sa vij~neyo bhaven mokShe cha nishchitaH ||81|| evaM sa~NkShipya likhitAdvaiShNavAnAM tu lakShaNAt | mAhAtmyam api vij~neyaM likhyate.anyach cha tat kiyat ||82|| atha bhagavadbhaktAnAM mAhAtmyam | sauparNe shrIshakroktau kalau bhAgavataM nAma yasya puMsaH prajAyate | jananI putriNI tena pitR^INAM tu dhurandharaH ||83|| kalau bhAgavataM nAma durlabhaM naiva labhyate | brahmarudrapadotkR^iShTaM guruNA kathitaM mama ||84|| yasya bhAgavataM chihnaM dR^ishyate tu harirmune | gIyate cha kalau devA j~neyAste nAsti saMshayaH ||85|| shrImArkaNDeyoktau samIpe tiShThate yasya ha antakAle.api vaiShNavaH | gachChate paramaM sthAnaM yadyapi brahmahA bhavet ||86|| nAradIye shrIvAmadevarukmA~NgadasaMvAde nArp 21037 shvapacho.api mahIpAla viShNubhakto dvijAdhikaH | viShNubhaktivihInastu dvijo.api shvapachAdhikaH ||87|| skAnde revAkhaNDe shrIbrahmoktau indro maheshvaro brahmA paraM brahma tadaiva hi | shvapacho.api bhavatyeva yadA tuShTA.asi keshava ||88|| shvapachAdapi kaShTatvaM brahmeshAnAdayaH surAH | tadaivAchyuta yAntyete yadaiva tvaM parA~NmukhaH ||89|| sa kartA sarvadharmANAM bhakto yastava keshava | sa kartA sarvapApAnAM yo na bhaktastavAchyuta ||90|| dharmo bhavatyadharmo.api kR^ito bhaktaistavAchyuta | pApaM bhavati dharmo.api tavAbhaktaiH kR^ito hareH ||91|| niHsheShadharmakartA vApyabhakto narake hare | sadA tiShThati bhaktaste brahmahApi vishudhyati ||92|| nishchalA tvayi bhaktiryA saiva muktirjanArdana | muktA eva hi bhaktAste tava viShNo yato hare ||93|| tatraiva durvAsonAradasaMvAde nUnaM bhAgavatA loke lokarakShAvishAradAH | vrajanti viShNunAdiShTA hR^idisthena mahAmune ||94|| bhagavAn eva sarvatra bhUtAnAM kR^ipayA hariH | rakShaNAya charan lokAn bhaktarUpeNa nArada ||95|| tatraiva shrIbrahmanAradasaMvAde yastu viShNuparo nityaM dR^iDhabhaktirjitendriyaH | svagR^ihe.api vasan yAti tadviShNoH paramaM padam ||96|| ashvamedhasahasrANAM sahasraM yaH karoti vai | nAsau tatphalam Apnoti tadbhaktairyadavApyate ||97|| tatraivAmR^itasAroddhAre shrIyamatadbhaTasaMvAde sarvatra vaiShNavAH pUjyAH svarge martye rasAtale | devatAnAM manuShyANAM tathaivoragarakShasAm ||98|| yeShAM smaraNamAtreNa pApalakShashatAni cha | dahyante nAtra sandeho vaiShNavAnAM mahAtmanAm ||99|| yeShAM pAdarajenaiva prApyate jAhnavIjalam | nArmadaM yAmunaM chaiva kiM punaH pAdayorjalam ||100|| yeShAM vAkyajalaughena vinA ga~NgAjalairapi | vinA tIrthasahasreNa snAto bhavati mAnavaH ||101|| tatraiva chAturmAsyamAhAtmye tAvadbhramanti saMsAre pitaraH piNDatatparaH | yAvat kule bhaktiyuktaH suto naiva prajAyate ||102|| sa eva j~nAnavAn loke yoginAM prathamo hi saH | mahAkratUnAm AhartA haribhaktiyuto hi yaH ||103|| kAshIkhaNDe dhruvacharite na chyavante hi yadbhaktyA mahatyAM pralayApadi | ato.achyuto.akhile loke sa ekaH sarvago.avyayaH ||104|| na tasmAdbhagavadbhaktAdbhetavyaM kenachit kvachit | niyataM viShNubhaktA yena te syuH paratApinaH ||105|| tatraivAgre brAhmaNaH kShatriyaH vaishyaH shUdro vA yadi vetaraH | viShNubhaktisamAyukto j~neyaH sarvottamottamaH ||106|| sha~NkhachakrA~NkitatanuH shirasA ma~njarIdharaH | gopIchandanaliptA~Ngo dR^iShTash chedtadaghaM kutaH ||107|| mahAbhArate rAjadharme IshvaraM sarvabhUtAnAM jagataH prabhavApyayam | bhaktA nArAyaNaM devaM durgANyatitaranti te ||108|| viShNudharmottare shayanAdutthito yastu kIrtayen madhusUdanam | kIrtanAt tasya pApAni nAsham AyAntyasheShataH ||109|| tatraiva yasyApyanante jagatAm adhIshe bhaktiH parA yAdavadevadeve | tasmAt paraM nAparam asti ki~nchit pAtraM triloke puruShapravIra ||110|| dvArakAmAhAtmye shrIprahlAdabalisaMvAde nityaM ye prAtarutthAya vaiShNavAnAM tu kIrtanam | kurvanti te bhAgavatAH kR^iShNatulyAH kalau bale ||111|| haribhaktisudhodaye svadarshanasparshanapUjanaiH kR^itI tamAMsi viShNupratimeva vaiShNavaH | dhunvan vasatyatra janasya yan na tat svArthaM paraM lokahitAya dIpavat ||112|| itihAsasamuchchaye shrIlomashavAkye ye bhajanti jagadyoniM vAsudevaM sanAtanam | na tebhyo vidyate tIrtham adhikaM rAjasattama ||113|| yatra bhAgavatAH snAnaM kurvanti vimalAshrayAH | tattIrtham adhikaM viddhi sarvapApavishodhanam || 114 || yatra rAgAdirahitA vAsudevaparAyaNAH | tatra sannihito viShNurnR^ipate nAtra saMshayaH || 115 || na gandhairna tathA toyairna puShpaish cha manoharaiH | sAnnidhyaM kurute devo yatra santi na vaiShNavAH || 116 || balibhish chopavAsaish cha nR^ityagItAdibhistathA | nityam ArAdhyamAno.api tatra viShNurna tR^ipyati || 117 || tasmAdete mahAbhAgA vaiShNavA vItakalmaShAH | punanti sakalAn lokAMstat tIrtham adhikaM tataH || 118 || shUdraM vA bhagavadbhaktaM niShAdaM shvapachaM tathA | vIkShataM jAtisAmAnyAt sa yAti narakaM dhruvam || 119 || tasmAdviShNuprasAdAya vaiShNavAn paritoShayet | prasAdasumukho viShNustenaiva syAn na saMshayaH || 120 || tatraiva shrInAradapuNDarIkasaMvAde ye nR^ishaMsA durAtmAnaH pApAchAraratAH sadA | te.api yAnti paraM dhAma nArAyaNaparAshrayAH || 121 || lipyante na cha pApena vaiShNavA viShNutatparAH | punanti sakalAn lokAn sahasrAMshurivoditaH || 122 || janmAntarasahasreShu yasya syAdbuddhirIdR^ishI | dAso.ahaM vAsudevasya sarvAn lokAn samuddharet || 123 || sa yAti viShNusAlokyaM puruSho nAtra saMshayaH | kiM punastadgataprANAH puruShAH saMyatendriyAH || 124 || smR^itaH sambhAShito vApi pUjito vA dvijottamAH | punAti bhagavadbhaktash chANDAlo.api yadR^ichChayA || 125 || shrIvyAsavAkye janmAntarasahasreShu viShNubhakto na lipyate | yasya sandarshanAdeva bhasmIbhavati pAtakam || 126 || itihAsasamuchchaye shrIbhagavadvAkye na me priyash chaturvedI madbhaktaH shvapachaH priyaH | tasmai deyaM tato grAhyaM sa cha pUjyo yathA hyaham || 127 || tatraiva brahmavAkye sabhartR^ikA vA vidhavA viShNubhaktiM karoti yA | samuddharati chAtmAnaM kulam ekottaraM shatam || 128 || dvArakAmAhAtmye prahlAdabalisaMvAde sa~NkIrNayonayaH pUtA ye bhaktA madhusUdane | mlechChatulyAH kulInAste ye na bhaktA janArdane || 129 || AdipurANe shrIkR^iShNArjunasaMvAde vaiShNavAn bhaja kaunteya mA bhajasvAnyadevatAH | punanti vaiShNavAH sarve sarvadevam idaM jagat | madbhakto durlabho yasya sa eva mama durlabhaH || 130 || tatparo durlabho nAsti satyaM satyaM dhana~njaya | jagatAM guravo bhaktA bhaktAnAM guravo vayam || sarvatra guravo bhaktA vayaM cha guravo yathA | asmAkaM bAndhavA bhaktA bhaktAnAM bAndhavA vayam || 131 || asmAkaM guravo bhaktA bhaktAnAM guravo vayam | madbhaktA yatra gachChanti tatra gachChAmi pArthiva | bhaktAnAm anugachChanti muktayaH shrutibhiH saha ||132 || ye me bhaktajanAH pArtha na me bhaktAsh cha te janAH | madbhaktAnAM cha ye bhaktAste me bhaktatamA matAH || 133 || ye kechit prANino bhaktA madarthe tyaktabAndhavAH | teShAm ahaM parikrIto nAnyakrIto dhana~njaya || 134 || eShAM bhakShyaM sunirNItaM shrUyatAM nishchitaM mama | uchChiShTam avashiShTaM cha bhaktAnAM bhojanadvayam || 135 || nAmayuktajanAH kechij jAtyantarasamanvitAH | kurvanti me yathA prItiM na tathA vedapAragAH || 136 || bR^ihannAradIye mArkaNDeyaM prati shrIbhagavaduktau 149698 viShNurbhaktakuTumbIti vadanti vibudhAH sadA | tadeva pAlayiShyAmi majjano nAnR^itaM vadet ||137|| mama janma kule yasya tat kulaM mokShagAmi vai | mayi tuShTe munishreShTha kim asAdhyaM jagattraye ||138|| mayi bhaktiparo yastu madyAjI matkathAparaH | maddhyAnI svakulaM sarvaM nayatyachyutarUpatAm || 139 || madarthaM karma kurvANo matpraNAmaparo naraH | manmanAH svakulaM sarvaM nayatyachyutarUpatAm || 140 || aham eva dvijashreShTha nityaM prachChannavigrahaH | bhagavadbhaktarUpeNa lokAn rakShAmi sarvadA || 141 || tatraivAditimAhAtmye shrIsUtoktau viprAH shR^iNudhvaM mAhAtmyaM haribhaktiratAtmanAm | haridhyAnaparANAM tu kaH samarthaH prabAdhitum || 142 || haribhaktiparo yatra tatra brahmA hariH shivaH | tatra devAsh cha siddhAdyA nityaM tiShThanti sattamAH || 143 || nimiShaM nimShArdhaM vA yatra tiShThanti sattamAH | tatraiva sarvashreyAMsi tat tIrthaM tat tapovanam || 144 || tatraivAditiM prati shrIbhagavaduttare nArp 11157-58 rAgadveShavihInA ye madbhaktA matparAyaNAH | vadanti satataM te mAM gatAsUyA adAmbhikAH || 145 || paropatApavimukhAH shivabhaktiparAyaNAH | matkathAshravaNAsaktA vahanti satataM hi mAm || 146 || tatraiva dhvajAropaNamAhAtmye shrIviShNudUtoktau nArp 12073 yatInAM viShNubhaktAnAM paricharyAparAyaNAH | IkShitA api gachChanti pApino.api parAM gatim || 147 || tatraiva shrIbhagavattoShaprakAraprashnottare nArp 13456 ripavastaM na hiMsanti na bAdhante grahAsh cha tam | rAkShasAsh cha na chekShante naraM viShNuparAyaNam || 148 || bhaktirdR^iDhA bhavedyasya devadeve janArdane | shreyAMsi tasya sidhyanti bhaktimanto.adhikAstataH || 149 || tatraivAgre nArp 13463 adyApi cha munishreShTha brahmAdyA api devatAH | prabhAvaM na vijAnanti viShNubhaktiratAtmanAm || 150 || kiM cha nArp 130101 dharmArthakAmamokShAkhyAH puruShArthA dvijottamAH | haribhaktiparANAM vai sampadyante na saMshayaH || 151 || tatraiva lubdhakopAkhyAnasyAdau nArp 137912 ye viShNuniratAH shAntA lokAnugrahatatparAH | sarvabhUtadayAyuktA viShNurUpAH parikIrtitAH || 152 || viShNubhaktivihInA ye chaNDAlAH parikIrtitAH | chaNDAlA api vai shreShThA haribhaktiparAyaNAH || 153 || tatraiva yaj~nadhvajopAkhyAnasyAdau shrIsUtavAkyam nArp 139348 haribhaktirasAsvAdamuditA ye narottamAH | namaskaromyahaM tebhyo yatsa~NgAn muktibhAg naraH || 154 || haribhaktiparA ye tu harinAmaparAyaNAH | durvR^ittA vA suvR^ittA vA tebhyo nityaM namo namaH || 155 || aho bhAgyam aho bhAgyaM viShNubhaktiratAtmanAm | yasmAn muktiH karasthaiva yoginAm api durlabhA || 156 || tatraiva kaliprasa~Nge nArp 141 ghore kaliyuge prApte sarvadharmavivarjite | vAsudevaparA martyAH kR^itArthA nAtra saMshayaH || 157 || astyantardurlabhA proktA haribhaktiH kalau yuge | haribhaktiratAnAM vai pApabandho na jAyate || 158 || vedavAdaratAH sarve tathA tIrthaniSheviNaH | haribhaktirataiH sArdhaM kalAM nArhanti ShoDashIm || 159 || ataevoktaM devaistatraiva bhAratavarShaprasa~Nge nArp 1353 harikIrtanashIlo vA tadbhaktAnAM priyo.api vA | shushrUShurvApi mahatAM sa vandyo.asmAbhiruttamaH || 160 || pAdme shrIbhagavadbrahmasaMvAde darshanadhyAnasaMsparshairmartyakUrmaviha~NgamAH | puShNanti svAnyapatyAni tathAham api padmaja || 161 || muhUrtenApi saMhartuM shaktau yadyapi dAnavAt | madbhaktAnAM vinodArthaM karomi vividhAH kriyAH || 162 || tatraiva mAghamAhAtmye devadUtavikuNDalasaMvAde na vayaM yamaM yamalokaM na na dUtAn ghoradarshanAt | pashyanti vaiShNavA nUnaM satyaM satyaM mayoditam || 163 || shvapAkam iva nekSheta loke vipram avaiShNavam | vaiShNavo varNabAhyo.api punAti bhuvanatrayam || 164 || na shUdrA bhagavadbhaktAste tu bhAvanA matAH | sarvavarNeShu te shUdrA ye na bhaktA janArdana || 165 || viShNubhaktasya ye dAsA vaiShNavAnnabhujash cha ye | te.api kratubhujAM gvaishya gatiM yAnti nirAkulAH || 166 || tatraiva vaishAkhamAhAtmye pa~nchapuruShANAm uktau bhavyAni bhUtAni janArdanasya paropakArAya charanti vishvam || 167 || tathA santaH pratiShThA dInAnAM daivAdudbhUtapApmanAm | ArtAnAm ArtihantAro darshanAdeva sAdhavaH || 168 || tatraivottarakhaNDe shivapArvatIsaMvAde padmap 622958-59 na karmabandhanaM janma vaiShNavAnAM cha vidyate | viShNoranucharatvaM hi mokShayAhurmanIShiNaH || 169 || na dAsyam amareshasya bandhanaM parikIrtitam | sarvabandhananirmuktA haridAsA nirAmayAH || 170 || brahmANDapurANe janmAShTamIvratamAhAtmye shrIchitraguptoktau darshanasparshanAlApasahavAsAdibhiH kShaNAt | bhaktAH punanti kR^iShNasya sAkShAdapi cha pukkasham || 171 || tyaktasarvakulAchAro mahApAtakavAn api | viShNorbhaktaM samAshritya naro nArhati yAtanAm || 172 || vAshiShThe yasmin deshe marau tajj~no nAsti sajjanapAdapaH | saphalaH shItalachChAyo na tatra divasaM vaset || 173 || sadA santo.abhigantavyA yadyapyupadishanti na | yA hi svairakathAsteShAm upadeshA bhavanti te || 174 || gAruDe satrayAjisahasrebhyaH sarvavedAntapAragaH | sarvavedAntavitkoTyA viShNubhakto vishiShyate || 175 || vaiShNavAnAM sahasrebhya ekAntyeko vishiShyate | ekAntinastu puruShA gachChanti paramaM padam || 176 || shrIbhagavadgItAsu gItA 930-33 api chet sudurAchAro bhajate mAm ananyabhAk | sAdhureva sa mantavyaH samyag vyavasito hi saH || 177 || kShipraM bhavati dharmAtmA shashvachChAntiM nigachChati | kaunteya pratijAnIhi na me bhaktaH praNashyati || 178 || mAM hi pArtha vyapAshritya ye .api syuH pApayonayaH | striyo vaishyAstathA shUdrAste .api yAnti parAM gatim | kiM punarbrAhmaNAH puNyA bhaktA rAjarShayastathA || 179 || kiM cha tatraiva gItA 647 yoginAm api sarveShAM madgatenAntarAtmanA | shraddhAvAn bhajate yo mAM sa me yuktatamo mataH || 180 || shrIbhAgavatasya prathamaskandhe shrIparIkShitoktau bhp 11933 yeShAM saMsmaraNAt puMsAM sadyaH shuddhyanti vai gR^ihAH | kiM punardarshanasparsha pAdashauchAsanAdibhiH || 181 || tR^itIyaskandhe shrIvidurasya bhp 3134 shrutasya puMsAM suchirashramasya nanva~njasA sUribhirIDito .arthaH | tattadguNAnushravaNaM mukunda pAdAravindaM hR^idayeShu yeShAm || 182 || devahUtiM prati kapiladevasya bhp 32538 na karhichin matparAH shAntarUpe na~NkShyanti no me .animiSho leDhi hetiH | yeShAm ahaM priya AtmA sutash cha sakhA guruH suhR^ido daivam iShTam || 183 || chaturthe shrIdhruvasya bhp 4910 yA nirvR^itistanubhR^itAM tava pAdapadma dhyAnAdbhavajjanakathAshravaNena vA syAt | sA brahmaNi svamahimanyapi nAtha mA bhUt kiM tvantakAsilulitAt patatAM vimAnAt || 184 || shrIrudrasya bhp 42429 svadharmaniShThaH shatajanmabhiH pumAn viri~nchatAm eti tataH paraM hi mAm | avyAkR^itaM bhAgavato .atha vaiShNavaM padaM yathAhaM vibudhAH kalAtyaye || 185 || pa~nchame shrIjaDabharatasya bhp 51212 rahUgaNaitat tapasA na yAti na chejyayA nirvapaNAdgR^ihAdvA | na chChandasA naiva jalAgnisUryair vinA mahatpAdarajo.abhiShekam || 186 || ShaShThe shrIparIkShitaH bhp 61435 rajobhiH samasa~NkhyAtAH pArthivairiha jantavaH | teShAM ye kechanehante shreyo vai manujAdayaH || 187 || prAyo mumukShavasteShAM kechanaiva dvijottama | mumukShUNAM sahasreShu kashchin muchyeta sidhyati || 188 || muktAnAm api siddhAnAM nArAyaNaparAyaNaH | sudurlabhaH prashAntAtmA koTiShvapi mahAmune || 189 || shrIshivasya bhp 61728 nArAyaNaparAH sarve na kutashchana bibhyati | svargApavarganarakeShvapi tulyArthadarshinaH || 190 || saptame shrIprahlAdasya bhp 7532 naiShAM matistAvadurukramA~NghriM spR^ishatyanarthApagamo yadarthaH | mahIyasAM pAdarajo.abhiShekaM niShki~nchanAnAM na vR^iNIta yAvat || 191 || kiM cha bhp 7910 viprAddviShaDguNayutAdaravindanAbha pAdAravindavimukhAt shvapachaM variShTham | manye tadarpitamanovachanehitArtha prANaM punAti sa kulaM na tu bhUrimAnaH || 192 || aShTame shrIgajendrasya bhp 8320 ekAntino yasya na ka~nchanArthaM vA~nChanti ye vai bhagavatprapannAH | atyadbhutaM tachcharitaM suma~NgalaM gAyanta AnandasamudramagnAH || 193 || navame shrIbhagavataH bhp 9463-66 68 ahaM bhaktaparAdhIno hyasvatantra iva dvija | sAdhubhirgrastahR^idayo bhaktairbhaktajanapriyaH || 194 || nAham AtmAnam AshAse madbhaktaiH sAdhubhirvinA | shriyaM chAtyantikIM brahman yeShAM gatirahaM parA || 195 || ye dArAgAraputrApta prANAn vittam imaM param | hitvA mAM sharaNaM yAtAH kathaM tAMstyaktum utsahe || 196 || mayi nirbaddhahR^idayAH sAdhavaH samadarshanAH | vashe kurvanti mAM bhaktyA satstriyaH satpatiM yathA || 197 || sAdhavo hR^idayaM mahyaM sAdhUnAM hR^idayaM tvaham | madanyat te na jAnanti nAhaM tebhyo manAg api || 198 || tatraiva shrIdurvAsasaH bhp 9515 duShkaraH ko nu sAdhUnAM dustyajo vA mahAtmanAm | yaiH sa~NgR^ihIto bhagavAn sAtvatAm R^iShabho hariH || 199 || yannAmashrutimAtreNa pumAn bhavati nirmalaH | tasya tIrthapadaH kiM vA dAsAnAm avashiShyate || 200 || dashame devastutau bhp 10233 tathA na te mAdhava tAvakAH kvachid bhrashyanti mArgAt tvayi baddhasauhR^idAH | tvayAbhiguptA vicharanti nirbhayA vinAyakAnIkapamUrdhasu prabho || 201 || shrIbAdarAyaNeH bhp 10921 nAyaM sukhApo bhagavAn dehinAM gopikAsutaH | j~nAninAM chAtmabhUtAnAM yathA bhaktimatAm iha || 202 || tatraiva shrIbhagavataH bhp 101041 sAdhUnAM samachittAnAM mukundacharaNaiShiNAm | upekShyaiH kiM dhanastambhairasadbhirasadAshrayaiH || 203 || kiM cha bhp 108411 na hyammayAni tIrthAni na devA mR^ichChilAmayAH | te punantyurukAlena darshanAdeva sAdhavaH || 204 || api cha bhp 108412-13 nAgnirna sUryo na cha chandratArakA na bhUrjalaM khaM shvasano .atha vA~N manaH | upAsitA bhedakR^ito harantyaghaM vipashchito ghnanti muhUrtasevayA || 205 || yasyAtmabuddhiH kuNape tridhAtuke svadhIH kalatrAdiShu bhauma ijyadhIH | yattIrthabuddhiH salile na karhichij janeShvabhij~neShu sa eva gokharaH || 206 || shrutistutau bhp 108727 tava pari ye charantyakhilasattvaniketatayA ta uta padAkramantyavigaNayya shiro nirR^iteH | parivayase pashUn iva girA vibudhAn api tAMs tvayi kR^itasauhR^idAH khalu punanti na ye vimukhAH || 207 || ekAdashe shrIvasudevasya bhp 11256 bhUtAnAM devacharitaM duHkhAya cha sukhAya cha | sukhAyaiva hi sAdhUnAM tvAdR^ishAm achyutAtmanAm || 208 || bhajanti ye yathA devAn devA api tathaiva tAn | ChAyeva karmasachivAH sAdhavo dInavatsalAH || 209 || tatraiva shrIbhagavataH bhp 112036 na mayyekAntabhaktAnAM guNadoShodbhavA guNAH | sAdhUnAM samachittAnAM buddheH param upeyuShAm || 210 || evam etAn mayA diShTAn anutiShThanti me pathaH | kShemaM vindanti matsthAnaM yadbrahma paramaM viduH || 211 || nimajjyonmajjatAM ghore bhavAbdhau paramAyaNam | santo brahmavidaH shAntA nordR^iDhevApsu majjatAm || 212 || annaM hi prANinAM prANA ArtAnAM sharaNaM tvaham | dharmA vittaM nR^INAM pretya santo.arvAgbibhyato.araNam || 213 || santo dishanti chakShUMShi bahirarkaH samutthitaH | devatA bAndhavAH santaH santa AtmAham eva cha || 214 || kiM cha bhp 112034 na ki~nchit sAdhavo dhIrA bhaktA hyekAntino mama | vA~nChantyapi mayA dattaM kaivalyam apunarbhavam || 215 || dvAdashe cha shrIparIkShitaH bhp 1263 nAtyadbhutam ahaM manye mahatAm achyutAtmanAm | aj~neShu tApatapteShu bhUteShu yadanugrahaH || 216 || shrIrudrasya cha mArkaNDeyam adhikR^itya bhp 121025 shravaNAddarshanAdvApi mahApAtakino .api vaH | shudhyerann antyajAsh chApi kim u sambhAShaNAdibhiH || 217 || ataeva shrIdharmarAjasya svadUtAnushAsane ShaShThaskandhe bhp 6327 te devasiddhaparigItapavitragAthA ye sAdhavaH samadR^isho bhagavatprapannAH | tAn nopasIdata harergadayAbhiguptAn naiShAM vayaM na cha vayaH prabhavAma daNDe || 218 || tathA shrIviShNupurANe vip 3726 32-34 yamaniyamavidhUtakalmaShANAm anudinam achyutasaktamAnasAnAm | apagatam adamAnamatsarANAM vraja bhaTa dUratareNa mAnavAnAm || 219 || sakalam idam ahaM cha vAsudevaH paramapumAn parameshvaraH sa ekaH | iti matirachalA bhavatyanante hR^idayagate vraja tAn vihAya dUrAt || 220 || kamalanayana vAsudeva viShNo dharaNidharAchyuta sha~NkhachakrapANe | bhava sharaNam itIrayanti ye vai tyaja bhaTa dUratareNa tAn apApAn || 221 || vasati manasi yasya so.avyayAtmA | puruShavarasya na tasya dR^iShTipAte | tava gatiratha vA mamAsti chakra pratihatavIryabalasya so.anyalokyaH || 222 || nArasiMhe viShNupurANe cha vip 3715 aham amarArchitena dhAtrA yama iti lokahitAhite niyuktaH | hariguruvashago.asmi na svatantraH prabhavati saMyamane mamApi viShNuH || 223 || sugatim abhilaShAmi vAsudevA vaham api bhAgavatasthitAntarAtmA | madhuvara vashago.asmi na svatantraH prabhavati saMyamane mamApi kR^iShNaH || 224 || na hi shashakaluShachChaviH kadAchit timiraparAbhavatAm upaiti chandraH | bhagavati cha harAvananyachetA bhR^ishamalino.api virAjate manuShyaH || 225 || pAdme devadyUtivikuNDalasaMvAde padmap 331100 102-3 prAhAsmAn yamunA bhrAtA sadaiva hi punaH punaH | bhavadbhirvaiShNavAstyAjyA na te syurmama gocharAH || 226 || durAchAro duShkR^ito.api sadAchArarato.api yaH | bhavadbhiH sa sadA tyAjyo viShNuM cha bhajate naraH || 227 || vaiShNavo yadgR^ihe bhu~Nkte yeShAM vaiShNavasa~NgatiH | te.api vaH parivAryAH syustatsa~NgahatakilbiShAH || 228 || skAnde amR^itasAroddhAre ekAdashyAm abhu~njAnA yuktAH pApashatairapi | bhavadbhiH parihartavyA hitA me yadi sarvadA || 229 || ye smaranti jagannAthaM mR^ityukAle janArdanam | pApakoTishatairyuktA na te grAhyA mamAj~nayA || 230 || na brahmA na shivAgnIndrA nAhaM nAnye divaukasaH | shaktA na nigrahaM kartuM vaiShNavAnAM mahAtmanAm || 231 || ato.ahaM sarvakAlaM cha vaiShNavAnAM bibhemi vai | bhavadbhiH parihartavyA vaiShNavA ye sadaiva hi || 232 || vaiShNavA viShNuvat pUjyA mama mAnyA visheShataH | teShAM kR^ite.apamAne.api vinAsho jAyate dhruvam || 233 || kiM cha yeShAM smaraNamAtreNa pApalakShashatAni cha | dahyante nAtra sandeho vaiShNavAnAM mahAtmanAm || 234 || yeShAM pAdarajenaiva prApyate jAhnavIjalam | nArmadaM yAmunaM chaiva kiM punaH pAdayorjalam || 235 || yeShAM vAkyajalaughena vinA ga~NgAjalairapi | vinA tIrthasahasreNa snAto bhavati mAnavaH || 236 || kiM cha brahmaloke na me vAso na me vAso harAlaye | nAlaye lokapAlAnAM vaiShNavAnAM parAbhave || 237 || na devA na cha gandharvA na yakShoragarAkShasAH | trAtuM samarthA R^iShayo vaiShNavAnAM parAbhave || 238 || karomi karmaNA vAchA manasApi na vipriyam | vaiShNavAnAM mahAbhAgAH sudarshanabhayAdapi || 239 || ekato dhAvate chakram ekato harivAhanam | ekato viShNudUtAsh cha vaiShNave chArdite mayA || 240 || bR^ihannAradIye chaikAdashImAhAtmye nArp 12375 77-79 ye viShNupUjanaratAH prayatAH kR^itaj~nAsh chaikAdashIvrataparA vijitendriyAsh cha | nArAyaNAchyuta hare sharaNaM bhaveti shAntA vadanti satataM tarasA tyajadhvam ||241|| nArAyaNArpitadhiyo haribhaktabhaktAn svAchAramArganiratAn gurusevakAMsh cha | satpAtradAnaniratAn harikIrtibhaktAn dUtAstyajadhvam anishaM harinAmasaktAn ||242|| pAShaNDasa~NgarahitAn haribhaktituShTAn satsa~NgalolupatarAMsh cha tathAtipuNyAn | shambhorharesh cha samabuddhimatastathaiva dUtAstyajadhvam upakAraparA~n narANAm ||243|| ye vIkShitA harikathAmR^itasevakaish cha nArAyaNasmR^itiparAyaNamAnasaish cha | viprendrapAdajalasevanasamprahR^iShTais tAn pApino.api cha bhaTA satataM tyajadhvam ||244|| ataevoktaM shrInAradena chaturthaskandhasheShe bhp 43122 shriyam anucharatIM tadarthinash cha dvipadapatIn vibudhAMsh cha yat svapUrNaH | na bhajati nijabhR^ityavargatantraH katham amum udvisR^ijet pumAn kR^itaj~naH ||245|| ataeva prArthanam | nArAyaNavyUhastave nAhaM brahmApi bhuyAsaM tvadbhaktirahito hare | tvayi bhaktastu kITo.api bhUyAsaM janmajanmasu ||246|| shrIbrahmastutau cha dashamaskandhe bhp 101430 tadastu me nAtha sa bhUribhAgo bhave.atra vAnyatra tu vA tirashchAm | yenAham eko.api bhavajjanAnAM bhUtvA niSheve tava pAdapallavam ||247|| ataevoktaM shrInArAyaNavyUhastave ye tyaktalokadharmArthA viShNubhaktivashaM gatAH | bhajanti paramAtmAnaM tebhyo nityaM namo namaH ||248|| evaM shrIbhagavadbhaktamAhAtmyAmR^itavAridheH | vichitrabha~NgalekhArho lobhalolaM vinAsti kaH ||249|| ataH shrIbhagavadbhaktajanAnAM sa~NgatiH sadA | kAryA sarvaprayatnena dvau lokau vijigIShubhiH ||250|| atha shrIbhagavadbhaktasa~NgamAhAtmyam bhagavadbhaktapAdAbjapAdukAbhyo namo.astu me | yatsa~NgamaH sAdhanaM cha sAdhyaM chAkhilam uttamam ||251|| tatra sarvapAtakamochakatA bR^ihannAradIye nArp 13660 yaj~namAlyupAkhyAnAnte | haribhaktiparANAM tu sa~NginAM sa~NgamAtrataH | muchyate sarvapApebhyo mahApAtakavAn api ||252|| sAmAnyato.anarthanivartakatAarthaprApakatA cha | pAdme vaishAkhamAhAtmye padmap 59474 shrImunisharmANaM prati pretAnAm uktau vinAshayatyapayasho buddhiM vishadayatyapi | pratiShThApayati prAyo nR^iNAM vaiShNavadarshanam ||253|| tatra shrIyamabrAhmaNasaMvAde mahArathanR^ipoktau yathA prapadyamAnasya bhagavantaM vibhAvasum | shItaM bhayaM tamo.apyeti sAdhUn saMsevataH sadA ||254|| tatraiva pretopAkhyAne pretoktau padmap 59857 apAkaroti duritaM shreyaH saMyojayatyapi | yasho vistArayatyAshu nR^INAM vaiShNavasa~NgamaH ||255|| atha sarvatIrthAdhikatA tatraiva padmap 59878 ga~NgAdipuNyatIrtheShu yo naraH snAtum ichChati | yaH karoti satAM sa~NgAM tayoH satsa~Ngamo varaH ||256|| tatraiva bhagIrathanR^ipoktau padmap 51005 yaH snAtaH shAntisitayA sAdhusa~Ngatiga~NgayA | kiM tasya dAnaiH kiM tIrthaiH kiM tapobhiH kim adhvaraiH ||257|| atha sarveShTasAdhakatA yAni yAni durApANi vA~nChitAni mahItale | prApyante tAni tAnyeva sAdhUnAm eva sa~NgamAt ||258|| atha anarthasyApyarthatvApAdakatA vAshiShThe shUnyam ApUrNatAm eti mR^itirapyamR^itAyate | Apat sampadiva bhAti vidvajjanasamAgame ||259|| tR^itIyaskandhe bhp 32355 sa~Ngo yaH saMsR^iterheturasatsu vihito .adhiyA | sa eva sAdhuShu kR^ito niHsa~NgatvAya kalpate ||260|| shrIkapiladevoktau bhp 32520 prasa~Ngam ajaraM pAsham AtmanaH kavayo viduH | sa eva sAdhuShu kR^ito mokShadvAram apAvR^itam ||261|| yataH arirmitraM viShaM pathyam adharmo dharmatAM vrajet | prasanne puNDarIkAkShe viparIte viparyayaH ||262|| kiM cha shrIbhagavadvAkyaM mannimittaM kR^itaM pApam api dharmAya kalpate | mAm anAdR^itya dharmo.api pApaM syAn matprabhAvataH || 263 || chaturthaskandhe shrIdhruvoktau bhp 4912 te na smarantyatitarAM priyam Isha martyaM ye chAnvadaH sutasuhR^idgR^ihavittadArAH | ye tvabjanAbha bhavadIyapadAravinda saugandhyalubdhahR^idayeShu kR^itaprasa~NgAH ||264|| pAdme tatraiva pretoktau padmap 59858 rasAyanamayI shItA paramAnandadAyinI | nAnandayati kaM nAma vaiShNavAshrayachandrikA ||265|| atha mokShadatvam | dashamaskandhe shrImuchukundastutau bhp 105153 bhavApavargo bhramato yadA bhavej janasya tarhyachuta satsamAgamaH | satsa~Ngamo yarhi tadaiva sadgatau parAvareshe tvayi jAyate matiH ||266|| ataevoktaM shrIprachetobhish chaturthaskandhe bhp 43035-37 yatreDyante kathA mR^iShTAstR^iShNAyAH prashamo yataH | nirvairaM yatra bhUteShu nodvego yatra kashchana ||267|| yatra nArAyaNaH sAkShAdbhagavAn nyAsinAM gatiH | saMstUyate satkathAsu muktasa~NgaiH punaH punaH ||268|| teShAM vicharatAM padbhyAM tIrthAnAM pAvanechChayA | bhItasya kiM na rocheta tAvakAnAM samAgamaH ||269|| atha sarvasAratA | bR^ihannAradIye shrInAradasanatkumArasaMvAde nArp 1413 asArabhUte saMsAre sAram etadajAtmaja | bhagavadbhaktasa~Ngash cha haribhaktistitikShutA ||270|| pAdme tatraiva mahArathanR^ipoktau asAgarotthaM pIyUSham adravyaM vyasanauShadham | harShash chAlokaparyantaH satAM kila samAgamaH ||271|| atha bhagavatkathAmR^itapAnaikahetutA | pAdme vaishAkhamAhAtmye shrInAradoktau padmap 58437 prasa~Ngena satAm AtmamanaH shrutirasAyanAH | bhavanti kIrtanIyasya kathAH kR^iShNasya nirmalAH ||272|| tR^itIyaskandhe bhp 32525 shrIkapiladevoktau satAM prasa~NgAn mama vIryasaMvido bhavanti hR^itkarNarasAyanAH kathAH | tajjoShaNAdAshvapavargavartmani shraddhA ratirbhaktiranukramiShyati ||273|| chaturthe shrInAradoktau bhp 42939-40 yatra bhAgavatA rAjan sAdhavo vishadAshayAH | bhagavadguNAnukathana shravaNavyagrachetasaH ||274|| tasmin mahanmukharitA madhubhich charitrapIyUShasheShasaritaH paritaH sravanti | tA ye pibantyavitR^iSho nR^ipa gADhakarNais tAn na spR^ishantyashanatR^iDbhayashokamohAH ||275|| pa~nchame bhp 51213 shrIbrAhmaNarahUgaNasaMvAde yatrottamashlokaguNAnuvAdaH prastUyate grAmyakathAvighAtaH | niShevyamANo .anudinaM mumukShor matiM satIM yachChati vAsudeve ||276|| ekAdashe shrIbhagavaduddhavasaMvAde shrIailopAkhyAnAnte bhp 112628-29 teShu nityaM mahAbhAga mahAbhAgeShu matkathAH | sambhavanti hi tA nNAM juShatAM prapunantyagham ||277|| tA ye shR^iNvanti gAyanti hyanumodanti chAdR^itAH | matparAH shraddadhAnAsh cha bhaktiM vindanti te mayi ||278|| bR^ihannAradIye tatraiva 1433 bhaktistu bhagavadbhaktasa~Ngena parijAyate | satsa~NgaH prApyate pumbhiH sukR^itaiH pUrvasa~nchitaiH ||279|| ekAdashe shrIbhagavaduddhavasaMvAde bhp 111149-51 athaitat paramaM guhyaM shR^iNvato yadunandana sugopyam api vakShyAmi tvaM me bhR^ityaH suhR^it sakhA || 280 || no rodhayati mAM yogo na sA~NkhyaM dharma eva cha | na svAdhyAyastapastyAgo neShTApUrtaM na dakShiNA || 281 || vratAni yaj~nash ChandAMsi tIrthAni niyamA yamAH | yathAvarundhe satsa~NgaH sarvasa~NgApaho hi mAm || 282 || ataevoktaM vidureNa tR^itIyaskandhe bhp 3719 yatsevayA bhagavataH kUTasthasya madhudviShaH | ratirAso bhavet tIvraH pAdayorvyasanArdanaH || 283 || prathamaskandhe shrIshaunakAdInAM bhp 11813 chaturthe cha shrIprachetasAm uktau bhp 43034 tulayAma lavenApi na svargaM nApunarbhavam | bhagavatsa~Ngisa~Ngasya martyAnAM kim utAshiShaH || 284 || chaturthe cha shrIprachetasaH prati shrIshivopadeshaH bhp 42457 kShaNArdhenApi tulaye na svargaM nApunarbhavam | bhagavatsa~Ngisa~Ngasya martyAnAM kim utAshiShaH || 285 || dvAdashe shrImArkaNDeyopAkhyAne shrIshivasya bhp 12107 athApi saMvadiShyAmo bhavAnyetena sAdhunA | ayaM hi paramo lAbho nR^iNAM sAdhusamAgamaH || 286 || ataeva shrIprahlAdaM prati shrIdharaNyoktaM haribhaktisudhodaye akShNoH phalaM tvAdR^ishadarshanaM hi tanvAH phalaM tvAdR^ishagAtrasa~NgaH | jihvAphalaM tvAdR^ishakIrtanaM hi sudurlabhA bhAgavatA hi loke ||287|| ataeva vidureNa tR^itIyaskandhe bhp 3720 durApA hyalpatapasaH sevA vaikuNThavartmasu | yatropagIyate nityaM devadevo janArdanaH || 288 || shrIvidehenApyekAdashaskandhe bhp 11229 durlabho mAnuSho deho dehinAM kShaNabha~NguraH | tatrApi durlabhaM manye vaikuNThapriyadarshanam || 289 || ataeva hi prArthitaM shrIdhruveNa chaturthaskandhe bhp 4911 bhaktiM muhuH pravahatAM tvayi me prasa~Ngo bhUyAdananta mahatAm amalAshayAnAm | yenA~njasolbaNam uruvyasanaM bhavAbdhiM neShye bhavadguNakathAmR^itapAnamattaH || 290 || prachetasaH pratyupadeshe shrIshivena cha bhp 42458 athAnaghA~Nghrestava kIrtitIrthayor antarbahiHsnAnavidhUtapApmanAm | bhUteShvanukroshasusattvashIlinAM syAt sa~Ngamo .anugraha eSha nastava || 291 || shrIprachetobhish cha bhp 43033 yAvat te mAyayA spR^iShTA bhramAma iha karmabhiH | tAvadbhavatprasa~NgAnAM sa~NgaH syAn no bhave bhave || 292 || shrIprahlAdenApi saptamaskandhe bhp 7924 tasmAdamUstanubhR^itAm aham AshiSho j~na AyuH shriyaM vibhavam aindriyam Aviri~nchyAt | nechChAmi te vilulitAn uruvikrameNa kAlAtmanopanaya mAM nijabhR^ityapArshvam ||293|| iti | athAsatsa~NgadoShAH | shrIkAtyAyanavAkye varaM hutavahajvAlApa~njarAntarvyavasthitiH | na shaurichintAvimukhajanasaMvAsavaishasam ||295|| pAdme uttarakhaNDe shrIumAmaheshvarasaMvAde avaiShNavAstu ye viprAsh chANDAlAdadhamAH smR^itAH | teShAM sambhAShaNaM sparshaM somapAnAdi varjayet ||296|| tR^itIyaskandhe shrIkapiladevahUtisaMvAde bhp 33133-35 satyaM shauchaM dayA maunaM buddhiH shrIrhrIryashaH kShamA | shamo damo bhagash cheti yatsa~NgAdyAti sa~NkShayam ||297|| teShvashAnteShu mUDheShu khaNDitAtmasvasAdhuShu | sa~NgaM na kuryAch ChochyeShu yoShitkrIDAmR^igeShu cha ||298|| na tathAsya bhaven moho bandhash chAnyaprasa~NgataH | yoShitsa~NgAdyathA puMso yathA tatsa~Ngisa~NgataH ||299|| ekAdashe cha shrIbhagavaduddhavasaMvAde bhp 11263 sa~NgaM na kuryAdasatAM shishnodaratR^ipAM kvachit | tasyAnugastamasyandhe patatyandhAnugAndhavat ||300|| bhagavadbhaktihInA ye mukhyA.asantasta eva hi | teShAM niShThA shubhA kvApi na syAt sachcharitairapi ||301|| bR^ihannAradIye prAyashchittaprakaraNAnte kiM vedaiH kim u vA shAstraiH kim u tIrthaniShevaNaiH | viShNubhaktivihInAnAM kiM tapobhiH kim adhvaraiH || 302 || shrIgAruDe antaM gato.api vedAnAM sarvashAstrArthavedyapi | yo na sarveshvare bhaktastaM vidyAt puruShAdhamam || 303 || tR^itIyaskandhe bhp 3910 ahnyApR^itArtakaraNA nishi niHshayAnA nAnAmanorathadhiyA kShaNabhagnanidrAH | daivAhatArtharachanA R^iShayo .api deva yuShmatprasa~NgavimukhA iha saMsaranti || 304 || ataevoktaM ShaShThe bhp 6118 prAyashchittAni chIrNAni nArAyaNaparA~Nmukham | na niShpunanti rAjendra surAkumbham ivApagAH || 305 || viShNudharmottare kutaH pApakShayasteShAM kutasteShAM cha ma~Ngalam | yeShAM naiva hR^idistho.ayaM ma~NgalAyatano hariH || 306 || ataeva bR^ihannAradIye lubdhakopAkhyAnArambhe haripUjAvihInAsh cha vedavidveShiNastathA | dvijagodveShiNash chApi rAkShasAH parikIrtitAH || 307 || ataeva nijadUtAn prati dharmarAjasyAnushAsanaM ShaShThaskandhe bhp 6328-9 tAn Anayadhvam asato vimukhAn mukunda pAdAravindamakarandarasAdajasram | niShki~nchanaiH paramahaMsakulairasa~Ngair juShTAdgR^ihe nirayavartmani baddhatR^iShNAn ||308|| jihvA na vakti bhagavadguNanAmadheyaM chetash cha na smarati tachcharaNAravindam | kR^iShNAya no namati yachChira ekadApi tAn Anayadhvam asato .akR^itaviShNukR^ityAn ||309|| skAnde mArkaNDeyabhagIrathasaMvAde yo hi bhAgavataM lokam upahAsaM nR^ipottama | karoti tasya nashyanti arthadharmayashaHsutA || 310 || nindAM kurvanti ye mUDhA vaiShNavAnAM mahAtmanAm | patanti pitR^ibhiH sArdhaM mahArauravasaMj~nite ||311|| hanti nindati vai dveShTi vaiShNavAn nAbhinandati | krudhyate yAti no harShaM darshane patanAni ShaT ||312|| tatraivAmR^itasAroddhAre shrIyamoktau janmaprabhR^iti yat ki~nchit sukR^itaM samupArjitam | nAsham AyAti tat sarvaM pIDayedyadi vaiShNavAn || 313 || dvArakAmAhAtmye prahlAdabalisaMvAde karapatraish cha phAlyante sutIvrairyamashAsanaiH | nindAM kurvanti ye pApA vaiShNavAnAM mahAtmanAm || 314 || pUjito bhagavAn viShNurjanmAntarashatairapi | prasIdati na vishvAtmA vaiShNave chApamAnite || 315 || dashamaskandhe cha bhp 107440 nindAM bhagavataH shR^iNvaMstatparasya janasya vA | tato nApaiti yaH so .api yAtyadhaH sukR^itAch chyutaH || 316 || ataevoktaM viShNudharmottare jIvitaM viShNubhaktasya varaM pa~nchadinAni cha | na tu kalpasahasrANi bhaktihInasya keshave || 317 || ataevoktaM shrIbhAgavate ailopAkhyAnAnte bhp 112626 tato duHsa~Ngam utsR^ijya satsu sajjeta buddhimAn | santa evAsya Chindanti manovyAsa~Ngam uktibhiH ||318|| atha shrIvaiShNavasamAgamavidhiH atha shrIbhagavadbhaktAn sallakShaNavibhUShitAn | gatvA tAn dUrato dR^iShTvA daNDavat praNamen mudA || 319 || tejodraviNapa~ncharAtre vaiShNavo vaiShNavaM dR^iShTvA daNDavat praNamedbhuvi | ubhayorantarA viShNuH sha~NkhachakragadAdharaH || 320 || tatra cha visheSho bR^ihannAradIye 12541 sabhAyAM yaj~nashAlAyAM devatAyataneShvapi | pratyekaM tu namaskAro hanti puNyaM purAkR^itam || 321 || puNyakShetre puNyatIrthe svAdhyAyasamaye tathA | pratyekaM tu namaskAro hanti puNyaM purAkR^itam || 322 || vaiShNavaM chAgataM vIkShyAbhigamyAli~Nga vaiShNavam | vaideshikaM prINayeyurdarshayantaH svavaiShNavAn || 323 || tathA choktaM shrIbrahmaNA tejodraviNapa~ncharAtre nArAyaNAshrayaM bhaktaM deshAntarasamAgatam | prINayeddarshayaMstasya bhaktyA nArAyaNAshrayAn || 324 || iti | tatash cha vaiShNavaH prAptaH santarpya vachanAmR^itaiH | sadbandhuriva sammAnyo.anyathA doSho mahAn smR^itaH || 325 || atha vaiShNavasammAnananityatA skAnde shrImArkaNDeyabhagIrathasaMvAde dR^iShTvA bhAgavataM daivAt sammukhe yo na yAti hi | na gR^ihNAti haristasya pUjAM dvAdashavArShikIm || 326 || yo na gR^ihNAti bhUpAla vaiShNavaM gR^iham Agatam | tadgR^ihaM pitR^ibhistyaktaM shmashAnam iva bhIShaNam || 327 || athavAbhyagataM dUrAdyo nArchayanti vaiShNavam | svashaktyA nR^ipashArdUla nAnyaH pAparatastataH || 328 || shrAntaM bhAgavataM dR^iShTvA kaThinaM yasya mAnasam | prasIdati na duShTAtmA shvapachAdadhiko hi saH || 329 || vipraM bhAgavataM dR^iShTvA dInam AturamAnasam | na karoti paritrANaM keshavo na prasIdati || 330 || dR^iShTvA bhAgavataM vipraM namaskAreNa nArchayet | dehinastasya pApasya na cha vai kShamate hariH || 331 || apUjito yadA gachChadvaiShNavo gR^ihamedhinaH | shatajanmArjitaM bhUpa puNyam AdAya gachChati || 332 || anabhyarchya pitR^In devAn bhu~njate harivAsare | tat pApaM jAyate bhUpa vaiShNavAnAm atikrame || 333 || pUrvaM kR^itvA tu sammAnam avaj~nAM kurute tu yaH | vaiShNavAnAM mahIpAla sAnvayo yAti sa~NkShayam || 334 || pAdme vaishAkhamAhAtmye yamabrAhmaNasaMvAde padmap 59669 vaiShNavaM janam Alokya nAbhyutthAnaM karoti yaH | praNayAdarato vipra sa naro narakAtithiH || 335 || chaturthaskandhe bhp 42211 cha vyAlAlayadrumA vai teShvariktAkhilasampadaH | yadgR^ihAstIrthapAdIya pAdatIrthavivarjitAH ||336|| atha vaiShNavastutiH skAnde dahnyo.ahaM kR^itakR^ityo.ahaM yadyUyaM gR^iham AgatAH | durlabhaM darshanaM nUnaM vaiShNavAnAM yathA hareH || 337 || merumandaratulyA vai puNyapu~njA mayA kR^itAH | samprAptaM darshanaM yadvai vaiShNavAnAM mahAtmanAm || 338 || dashamaskandhe shrIgargAchAryaM prati shrInandasya vAkyam bhp 1084 mahadvichalanaM nR^INAM gR^ihiNAM dInachetasAm | niHshreyasAya bhagavan kalpate nAnyathA kvachit || 339 || chaturthaskandhe bhp 422710 13-14 aho AcharitaM kiM me ma~NgalaM ma~NgalAyanAH | yasya vo darshanaM hyAsIddurdarshAnAM cha yogibhiH ||340|| adhanA api te dhanyAH sAdhavo gR^ihamedhinaH | yadgR^ihA hyarhavaryAmbu tR^iNabhUmIshvarAvarAH ||341|| kachchin naH kushalaM nAthA indriyArthArthavedinAm | vyasanAvApa etasmin patitAnAM svakarmabhiH ||342|| bhavatsu kushalaprashna AtmArAmeShu neShyate | kushalAkushalA yatra na santi mativR^ittayaH ||343|| atha vaiShNavAbhigamanamAhAtmyam skAnde shrImArkaNDeyabhagIrathasaMvAde sammukhaM vrajamAnasya vaiShNavAnAM narAdhipa | pade pade yaj~naphalaM prAhuH paurANikA dvijAH ||344|| atha vaiShNavastutimAhAtmyam | tatraiva pratyakShaM vA parokShaM vA yaH prashaMsati vaiShNavam | brahmahA madyapaH steyI gurugAmI sadA nR^INAm | muchyate pAtakAt sadyo viShNurAha nR^ipottama ||345|| kiM cha pratyakShaM vA parokShaM vA ye prashaMsanti vaiShNavam | prasAdAdvAsudevasya te taranti bhavArNavam ||346|| atha vaiShNavasammAnamAhAtmyam | tatraivAmR^itasAroddhAre shraddhayA dattam annaM cha vaiShNavAgniShu jIryati | tadannaM meruNA tulyaM bhavate cha dine dine ||347|| daive paitre cha yo dadyAdvArimAtraM tu vaiShNave | saptodadhisamaM bhUtvA pitR^INAm upatiShThati ||348|| viShNudharme kiM dAnaiH kiM tapobhirvA yaj~naish cha vividhaiH kR^itaiH | sarvaM sampadyate puMsAM viShNubhaktAbhipUjanAt ||349|| pUjayedvaiShNavAn etAn prayatnena vichakShaNaH | svashaktyA vaiShNavebhyo yaddattaM syAdakShayaM bhavet ||350|| bR^ihannAradIye yaj~namAlyupAkhyAne nArp 13659 haribhaktiratAn yastu haribuddhyA prapUjayet | tasya tuShyanti viprendra brahmaviShNumaheshvarAH ||351|| haripUjAparANAM cha harinAmaratAtmanAm | shushrUShAniratA yAnti pApino.api parAM gatim ||352|| tatraiva yaj~nadhvajopAkhyAnasyArambhe nArp 1395 saMsArasAgaraM tartuM ya ichChen munipu~Ngava | sa bhajeddharibhaktAnAM bhaktAn vai pApahAriNaH ||353|| tadante cha nArp 13961-3 65 yo viShNubhaktAn niShkAmAn bhojayet shraddhayAnvitaH | triHsaptakulasaMyuktAste yAnti harimandiram ||354|| viShNubhaktAya yo dadyAn niShkAmAya mahAtmane | pAnIyaM vA phalaM vApi sa eva bhagavatpriyaH ||355|| viShNubhaktiparANAM tu shushrUShAM kurvate tu ye | te yAnti viShNubhavanaM yAvadAbhUtasamplavam ||356|| devapUjAparo yasya gR^ihe vasati sarvadA | tatraiva sarvadevAsh cha tiShThanti shrIharistathA ||357|| lai~Nge nArAyaNaparo vidvAn yasyAnnaM prItamAnasaH | ashnAti taddharerAsyaM gatam annaM na saMshayaH ||358|| sarvArchanAdapi vishvAtmA prIto bhavati mAdhavaH | dR^iShTvA bhAgavatasyAnnaM sa bhu~Nkte bhaktavatsalaH ||359|| brAhme shrIbhagavadvAkyam naivedyaM purato nyastaM dR^iShTvaiva svIkR^itaM mayA | bhaktasya rasanAgreNa rasam ashnAmi padmaja ||360|| pAdmottarakhaNDe 253176-8 shrIshivomAsaMvAde ArAdhanAnAM sarveShAM viShNorArAdhanaM param | tasmAt parataraM devi tadIyAnAM samarchanam ||361|| archayitvApi govindaM tadIyAn nArchayet punaH | na sa bhAgavato j~neyaH kevalaM dAmbhikaH smR^itaH ||362|| pumAMstasmAt prayatnena vaiShNavAn pUjayet sadA | sarvaM tarati duHkhaughaM mahAbhAgavatArchanAt ||363|| ekAdashe shrIbhagavadvAkyam bhp 111144 111921 vaiShNave bandhusatkR^ityA ||364|| madbhaktapUjAbhyadhikA ||365|| kiM cha skAnde shrImArkaNDeyabhagIrathasaMvAde karmaNA manasA vAchA ye.archayanti sadA harim | teShAM vAkyaM naraiH kAryaM te hi viShNusamA narAH ||366|| ityAdR^ito.anushR^iNuyAdbhaktishAstrANi tatra cha | shrIbhAgavatam atrApi kR^iShNalIlAkathAM muhuH ||367|| atha vaiShNavashAstramAhAtmyam | skAnde shrIbrahmanAradasaMvAde vaiShNavAni tu shAstrANI ye shR^iNvanti paThanti cha | dhanyAste mAnavA loke tesAM kR^iShNaH prasIdati || 368 || vaiShNavAni tu shAstrANI ye rchayanti gR^ihe narAH | sarvapApavinirmuktA bhavanti suravanditAH || 369 || sarvasvenApi viprendra kartavyaH shAstrasa~NgrahaH | vaiShNavaistu mahAbhaktyA tuShTyarthaM chakrapANinaH || 370 || tiShThate vaiShNavaM shAstraM likhitaM yasya mandire | tatra nArAyaNo devaH svayaM vasati nArada || 371 || paurANaM vaiShNavaM shlokaM shlokArdham athavApi cha | shlokapAdaM paThedyastu gosahasraphalaM labhet || 372 || devatAnAm R^iShINAM cha yoginAm api durlabham | viprendra vaiShNavaM shAstraM manuShyANAM cha kA kathA || 373 || tatraiva shrIkR^iShNArjunasaMvAde mama shAstrANi ye nityaM pUjayanti paThanti cha | te narAH kurushArdUla mamAtithyaM gatAH sadA || 374 || mama shAkhyapravaktAraM mama shAstrAnuchintakam | chintayAmi na sandeho naraM taM chAtmavat sadA || 375 || atha shrImadbhAgavatamAhAtmyam tatraiva jIvitAdadhikaM yeShAM shAstraM bhAgavataM kalau | na teShAM bhavati klesho yAmyaH kalpashatairapi || 376 || dhArayanti gR^ihe nityaM shAstraM bhAgavataM hi ye | AsphoTayanti valganti teShAM prItAH pitAmahAH || 377 || yAvaddinAni viprarShe shAstraM bhAgavataM gR^ihe | tAvat pibanti pitaraH kShIraM sarpirmadhUdakam || 378 || ye.archayanti sadA gehe shAstraM bhAgavataM narAH | prINitAstaish cha vibudhA yAvadAhUtasamplavam || 379 || yachchanti vaiShNave bhaktyA shAstraM bhAgavataM hi ye | kalpakoTisahasrANi viShNuloke vasanti te || 380 || shlokArdhaM shlokapAdaM vA varaM bhAgavataM gR^ihe | shatasho.atha sahasraish cha kim anyaiH shAstrasa~NgrahaiH || 381 || na yasya tiShThate gehe shAstraM bhAgavataM kalau | na tasya punarAvR^ittiryAmyAt pAshAt kadAchana || 382 || kathaM sa vaiShNavo j~neyaH shAstraM bhAgavataM kalau | gR^ihe na tiShThate yasya sa vipraH shvapachAdhamaH || 383 || yatra yatra bhavedvipra shAstraM bhAgavataM kalau | tatra tatra hariryAti tridashaiH saha nArada || 384 || tatra sarvANi tIrthAni nadInadasarAMsi cha | yatra bhAgavataM shAstraM tiShThate munisattama || 385 || tatra sarvANi tIrthAni sarve yaj~nAH sudakShiNAH | yatra bhAgavataM shAstraM pUjitaM tiShThate gR^ihe || 386 || kiM cha nityaM bhAgavataM yastu purANaM paThate naraH | pratyakSharaM bhavet tasya kapilAdAnajaM phalam || 387 || shlokArdhaM shlokapAdaM vA nityaM bhAgavatodbhavam | paThet shR^iNoti vA bhaktyA gosahasraM phalaM labhet || 388 || yaH paThet prayato nityaM shlokaM bhAgavataM mune | aShTAdashapurANAnAM phalaM prApnoti mAnavaH || 389 || tatraiva mArkaNDeyabhagIrathasaMvAde yo hi bhAgavate shAstre vighnam Acharate pumAn | nAbhinandati duShTAtmA kulAnAM pAtayech Chatam || 390 || pAdme gautamAmbarIShasaMvAde ambarISha shukaproktaM nityaM bhAgavataM shR^iNu | paThasva svamukhenApi yadIchChasi bhavakShayam || 391 || shlokaM bhAgavataM vApi shlokardhapAdam eva vA | likhitaM tiShThate yasya gR^ihe tasya sadA hariH | vasate nAtra sandeho devadevo janArdanaH || 392 || dvArakAmAhAtmye shrImArkaNDeyendradyumnasaMvAde shrImadbhAgavataM shAstraM paThate kR^iShNasannidhau | kulakoTishatairyuktaH krIDate yogibhiH saha || 393 || gAruDe artho.ayaM brahmasUtrANAM bhAratArthavinirNayaH | gAyatrIbhAShyarUpo.asau vedArthaparibR^iMhitaH ||394|| purANAnAM sAmarUpaH sAkShAdbhagavatoditaH | dvAdashaskandhayukto.ayaM shatavichChedasaMyutaH | grantho.aShTAdashasAhasraH shrImadbhAgavatAbhidhaH ||395|| tasminn eva shrIbhAgavate prathamaskandhe bhp 112 1340-41 dharmaH projjhitakaitavo .atra paramo nirmatsarANAM satAM vedyaM vAstavam atra vastu shivadaM tApatrayonmUlanam | shrImadbhAgavate mahAmunikR^ite kiM vA parairIshvaraH sadyo hR^idyavarudhyate .atra kR^itibhiH shushrUShubhistatkShaNAt ||396|| idaM bhAgavataM nAma purANaM brahmasammitam | uttamashlokacharitaM chakAra bhagavAn R^iShiH ||397|| niHshreyasAya lokasya dhanyaM svastyayanaM mahat | tadidaM grAhayAm Asasutam AtmavatAM varam | sarvavedetihAsAnAM sAraM sAraM samuddhR^itam ||398|| kiM cha bhp 1343 kR^iShNe svadhAmopagate dharmaj~nAnAdibhiH saha | kalau naShTadR^ishAm eSha purANArko .adhunoditaH || 399 || kiM cha bhp 1767 anarthopashamaM sAkShAdbhaktiyogam adhokShaje | lokasyAjAnato vidvAMsh chakre sAtvatasaMhitAm || 400 || yasyAM vai shrUyamANAyAM kR^iShNe paramapUruShe | bhaktirutpadyate puMsaH shokamohabhayApahA || 401 || dvitIye shrIshukoktau bhp 219-10 pariniShThito .api nairguNya uttamashlokalIlayA | gR^ihItachetA rAjarShe AkhyAnaM yadadhItavAn || 402 || rAjante tAvadanyAni purANAni satAM gaNe | yAvadbhAgavataM naiva shrUyate .amR^itasAgaram || 403 || dvAdashe cha bhp 121314 16 18 rAjante tAvadanyAni purANAni satAM gaNe | yAvadbhAgavataM naiva shrUyate.amR^itasAgaraH || 404 || sarvavedAntasAraM hi shrIbhAgavatam iShyate | tadrasAmR^itatR^iptasya nAnyatra syAdratiH kvachit || 405 || nimnagAnAM yathA ga~NgA devAnAm achyuto yathA | vaiShNavAnAM yathA shambhuH purANAnAm idaM tathA || 406 || shrImadbhAgavataM purANam amalaM yadvaiShNavAnAM priyaM yasmin pAramahaMsyam ekam amalaM j~nAnaM paraM gIyate | tatra j~nAnavirAgabhaktisahitaM naiShkarmyam AviShkR^itaM tach ChR^iNvan supaThan vichAraNaparo bhaktyA vimuchyen naraH ||407|| ataevoktaM bhp 113 nigamakalpatarorgalitaM phalaM shukamukhAdamR^itadravasaMyutam | pibata bhAgavataM rasam AlayaM muhuraho rasikA bhuvi bhAvukAH || 408 || kiM cha bhp 123 yaH svAnubhAvam akhilashrutisAram ekam adhyAtmadIpam atititIrShatAM tamo .andham | saMsAriNAM karuNayAha purANaguhyaM taM vyAsasUnum upayAmi guruM munInAm || 409 || atha shrIbhagavachChAstravaktR^imAhAtmyam bhagavaddharmavaktAraM bhagavachChAstravAchakam | vaiShNavaM guruvadbhaktyA pUjayej j~nAnadAyakam || 410 || nAradapa~ncharAtre R^iShIn prati shrIshANDilyoktau vaiShNavaM j~nAnavaktAraM yo vidyAdviShNuvadgurum | pUjayedvA~NmanaHkAyaiH sa shAstraj~naH sa vaiShNavaH ||411|| shlokapAdasya vaktApi yaH pUjyaH sa sadaiva hi | kiM punarbhagavadviShNoH svarUpaM vitanoti yaH ||412|| kiM cha nArAyaNaH paraM brahma tajj~nAnenAtha gamyate | j~nAnasya sAdhanaM shAstraM shAstraM cha guruvaktR^igam || 413 || brahma prAptirato hetorgurvadhInA sadaiva hi | hetunAnena vai viprA gururgurutaraH smR^itaH || 414 || yasmAddevo jagannAthaH kR^itvA maryamayIM tanum | magnAn uddharate lokAn kAruNyAch ChAstrapANinA || 415 || tasmAdbhaktirgurau kAryA saMsArabhayabhIruNA | shAstraj~nAnena yo.aj~nAnaM timiraM vinipAtayet || 416 || shAstraM pApaharaM puNyaM pavitraM bhogamokShadam | shAntidaM cha mahArthaM cha vakti yaH sa jagadguruH || 417 || atha shrIkR^iShNalIlAkathAshravaNamAhAtmyam tatra pApAdishodhakatvam skAnde brahmanAradasaMvAde teShAM kShINaM mahat pApaM varShakoTishatodbhavam | viprendra nAsti sandeho ye shR^iNvanti hareH kathAm || 418 || tatraivAnyatra sarvAshramAbhigamanaM sarvatIrthAvagAhanam | na tathA pAraNaM nR^INAM nArAyaNakathA yathA || 419 || bR^ihannAradIye 1392 yaj~nadhvajopAkhyAnAnte aho harikathA loke pApaghnI puNyadAyinI | shR^iNvatAM vadatAM chaiva tadbhaktAnAM visheShataH || 420 || prathamaskandhe bhp 1217 shR^iNvatAM svakathAH kR^iShNaH puNyashravaNakIrtanaH | hR^idyantaHstho hyabhadrANi vidhunoti suhR^itsatAm ||421|| ekAdashe cha devastutau bhp 1169 shuddhirnR^iNAM na tu tatheDya durAshayAnAM vidyAshrutAdhyayanadAnatapaHkriyAbhiH | sattvAtmanAm R^iShabha te yashasi pravR^iddha sachChraddhayA shravaNasambhR^itayA yathA syAt ||422|| dashame bhp 10113 shrIbAdarAyaNiM prati shrIparIkShiduktau naiShAtiduHsahA kShun mAM tyaktodam api bAdhate | pibantaM tvanmukhAmbhoja chyutaM harikathAmR^itam ||423|| skAnde cha tatraiva shrIpradaM viShNucharitaM sarvopadravanAshanam | sarvaduHkhopashamanaM duShTagrahanivAraNam || 424 || atha prakarSheNa sarvama~NgalakAritvam tatraiva shrotavyaM sAdhucharitaM yashodharmajayArthibhiH | pApakShayArthaM devarShe svargArthaM dharmabuddhibhiH || 425 || AyuShyAmArogyakaraM yashasyaM puNyavardhanam | charitaM vaiShNavaM nityaM shrotavyaM sAdhubuddhinA || 426 || kuTumbavR^iddhiM vijayaM shatrunAshaM balam | karoti viShNucharitaM sarvakAlaphalapradam || 427 || prathamaskandhe bhp 128 dharmaH svanuShThitaH puMsAM viShvaksenakathAsu yaH | notpAdayedyadi ratiM shrama eva hi kevalam ||428|| tR^itIye shrIviduramaitreyasaMvAde bhp 3637 ekAntalAbhaM vachaso nu puMsAM sushlokamaulerguNavAdam AhuH | shrutesh cha vidvadbhirupAkR^itAyAM kathAsudhAyAm upasamprayogam ||429|| dvitIye shrIshaunakoktau bhp 2317 Ayurharati vai puMsAm udyann astaM cha yann asau | tasyarte yatkShaNo nIta uttamashlokavArtayA ||430|| tR^itIye shrIviduroktau bhp 3513 sA shraddadhAnasya vivardhamAnA viraktim anyatra karoti puMsaH | hareH padAnusmR^itinirvR^itasya samastaduHkhApyayam Ashu dhatte ||431|| chaturthe shrIpR^ithucharitAnte shrImaitreyoktau bhp 42312 ChinnAnyadhIradhigatAtmagatirnirIhas tat tatyaje ~nchChinadidaM vayunena yena | tAvan na yogagatibhiryatirapramatto yAvadgadAgrajakathAsu ratiM na kuryAt ||432|| ekAdashe cha shrIbhagavantaM pratyuddhavavAkye bhp 11644 tava vikrIDitaM kR^iShNa nR^iNAM paramama~Ngalam | karNapIyUSham AsAdya tyajantyanyaspR^ihAM janAH ||433|| chaturthe prachetasaH prati shrIbhagavaduktau bhp 43019 gR^iheShvAvishatAM chApi puMsAM kushalakarmaNAm | madvArtAyAtayAmAnAM na bandhAya gR^ihA matAH ||434|| skAnde tatraiva dharmArthakAmamokShANAM yadiShTaM cha nR^INAm iha | tat sarvaM labhate vatsa kathAM shrutvA hareH sadA || 435 || dvAdashe cha shrIshukoktau bhp 12440 saMsArasindhum atidustaram uttitIrShor nAnyaH plavo bhagavato puruShottamasya | lIlAkathArasaniShevanam antareNa puMso bhavedvividhaduHkhadavArditasya || 436 || dvArakAmAhAtmye nityaM kR^iShNakathA yasya prANAdapi garIyasI | na tasya durlabhaM ki~nchidiha loke paratra cha || 437 || dvitIyaskandhe bhp 2312 j~nAnaM yadApratinivR^ittaguNormichakram AtmaprasAda uta yatra guNeShvasa~NgaH | kaivalyasammatapathastvatha bhaktiyogaH ko nirvR^ito harikathAsu ratiM na kuryAt || 438 || dashamaskandhe shrutistutau bhp 108721 duravagamAtmatattvanigamAya tavAttatanosh charitamahAmR^itAbdhiparivartaparishramaNAH | na parilaShanti kechidapavargam apIshvara te charaNasarojahaMsakulasa~NgavisR^iShTagR^ihAH ||439|| tR^itIyaskandhe shrIkapiladevahUtisaMvAde bhp 32534 naikAtmatAM me spR^ihayanti kechin matpAdasevAbhiratA madIhAH | ye .anyonyato bhAgavatAH prasajya sabhAjayante mama pauruShANi ||440|| dvitIye shrIsUtoktau bhp 2237 pibanti ye bhagavata AtmanaH satAM kathAmR^itaM shravaNapuTeShu sambhR^itam punanti te viShayavidUShitAshayaM vrajanti tachcharaNasaroruhAntikam ||441|| tR^itIye kapiladevastutau bhp 3545 pAnena te deva kathAsudhAyAH pravR^iddhabhaktyA vishadAshayA ye | vairAgyasAraM pratilabhya bodhaM yathA~njasAnvIyurakuNThadhiShNyam ||442|| skAnde amR^itasAroddhAre shrIyamasya dUtAnushAsane ye shR^iNvanti kathAM viShNorye paThanti hareH kathAm | kalAyutaM nAvalokyaM gatAste brahma shAshvatam || 443 || yasya viShNukathAlApairnityaM pramuditaM manaH | tasya na chyavate lakShmIstatpadaM cha kare sthitam || 444 || dvAdashe bhp 12315 yat tUttamaHshlokaguNAnuvAdaH sa~NgIyate .abhIkShNam ama~NgalaghnaH | tam eva nityaM shR^iNuyAdabhIkShNaM kR^iShNe .amalAM bhaktim abhIpsamAnaH ||445|| skAnde yatra yatra mahIpAla vaiShNavI vartate kathA | tatra tatra hariryAti gauryathA sutavatsalA || 446 || shrIviShNudharme shrIbhagavaduktau skAnde cha shrIbhagavadarjunasaMvAde matkathAvAchakaM nityaM matkathAshravaNe ratam | matkathAprItamanasaM nAham tyakShyAmi taM naram ||447|| dashamaskandhe brahmastutau bhp 10143 j~nAne prayAsam udapAsya namanta eva jIvanti sanmukharitAM bhavadIyavArtAm | sthAne sthitAH shrutigatAM tanuvA~Nmanobhir ye prAyasho ~njita jito .apyasi taistrilokyAm ||448|| tR^itIye shrIsanakAdistutau bhp 31548 nAtyantikaM vigaNayantyapi te prasAdaM kiM vAnyadarpitabhayaM bhruva unnayaiste | ye .a~Nga tvada~NghrisharaNA bhavataH kathAyAH kIrtanyatIrthayashasaH kushalA rasaj~nAH || 449 || chaturthe shrIbhagavantaM prati siddhAnAM stutau bhp 4735 ayaM tvatkathAmR^iShTapIyUShanadyAM manovAraNaH kleshadAvAgnidagdhaH | tR^iShArto .avagADho na sasmAra dAvaM na niShkrAmati brahmasampannavan naH || 450 || ataevoktaM prathamaskandhe shrIshaunakAdibhiH bhp 1119 vayaM tu na vitR^ipyAma uttamashlokavikrame | yachChR^iNvatAM rasaj~nAnAM svAdu svAdu pade pade || 451 || kiM cha bhp 11814 ko nAma tR^ipyedrasavit kathAyAM mahattamaikAntaparAyaNasya | nAntaM guNAnAm aguNasya jagmur yogeshvarA ye bhavapAdmamukhyAH || 452 || tR^itIye shrIvidureNa bhp 357 krIDan vidhatte dvijagosurANAM kShemAya karmANyavatArabhedaiH | mano na tR^ipyatyapi shR^iNvatAM naH sushlokamaulesh charitAmR^itAni || 453 || dashamaskandhe cha shrIparIkShitA bhp 105220 brahman kR^iShNakathAH puNyA mAdhvIrlokamalApahAH | ko nu tR^ipyeta shR^iNvAnaH shrutaj~no nityanUtanaH ||454|| ato hi shrIpR^ithurAjena prArthitaM bhp 42024 na kAmaye nAtha tadapyahaM kvachin na yatra yuShmachcharaNAmbujAsavaH | mahattamAntarhR^idayAn mukhachyuto vidhatsva karNAyutam eSha me varaH || 455 || ataeva nishchayoktaM pAdme vaishAkhamAhAtmye padmap 58541 ambarIShaM prati shrInAradena nAtaH paraM paramatoShavisheShapoShaM pashyAmi puNyam uchitaM cha paraspareNa | santaH prasahya yadanantaguNAn ananta shreyonidhIn adhikabhAvabhujo bhajanti ||456|| prathamaskandhe shrIsUtena bhp 11810 yA yAH kathA bhagavataH kathanIyorukarmaNaH | guNakarmAshrayAH pumbhiH saMsevyAstA bubhUShubhiH || 457 || dashamaskandhasheShe cha shrIbAdarAyaNinA bhp 109049 itthaM parasya nijavartmarirakShayAtta lIlAtanostadanurUpaviDambanAni | karmANi karmakaShaNAni yadUttamasya shrUyAdamuShya padayoranuvR^ittim ichChan ||458|| atha shrIbhagavatkathAtyAgAdidoShaH ataH kR^iShNakathAyAM tu satyAm anyakathAshrutim | tadashrutiM cha vaimukhyaM tasyAM tR^iptim api tyajet || 459 || tR^itIyaskandhe kapiladevahUtisaMvAde bhp 33219 nUnaM daivena vihatA ye chAchyutakathAsudhAm | hitvA shR^iNvantyasadgAthAH purISham iva viDbhujaH || 460 || tatraiva shrIvaikuNThavarNane bhp 31523 yan na vrajantyaghabhido rachanAnuvAdAch ChR^iNvanti ye .anyaviShayAH kukathA matighnIH | yAstu shrutA hatabhagairnR^ibhirAttasArAs tAMstAn kShipantyasharaNeShu tamaHsu hanta || 461 || kiM cha skAnde brahmanAradasaMvAde vAchyamAnaM tu ye shAstraM vaiShNavaM puruShAdhamAH | na shR^iNvanti munishreShTha teShAM svAmI sadA yamaH || 462 || na shR^iNvanti na hR^iShyanti vaiShNavIM prApya ye kathAm | dhama Ayuryasho dharmaH santAnash chaiva nashyati || 463 || na shR^iNoti hareryastu kathAM pApapraNAshinIm | achirAdeva devarShe samUlaM tu vinashyati || 464 || dvitIyaskandhe shrIshaunakoktau bhp 2320 bile batorukramavikramAn ye na shR^iNvataH karNapuTe narasya | jihvAsatI dArdurikeva sUta na chopagAyatyurugAyagAthAH || 465 || tR^itIye shrIbrahmastutau bhp 397 daivena te hatadhiyo bhavataH prasa~NgAt sarvAshubhopashamanAdvimukhendriyA ye | kurvanti kAmasukhaleshalavAya dInA lobhAbhibhUtamanaso .akushalAni shashvat || 466 || bhp 3514 tA~n ChochyashochyAn avido .anushoche hareH kathAyAM vimukhAn aghena | kShiNoti devo .animiShastu yeShAm AyurvR^ithAvAdagatismR^itInAm || 467 || shrImaitreyoktau cha bhp 31350 ko nAma loke puruShArthasAravit purAkathAnAM bhagavatkathAsudhAm | ApIya karNA~njalibhirbhavApahAm aho virajyeta vinA naretaram || 468 || chaturthe shrIpR^ithustutau bhp 42026 yashaH shivaM sushrava Aryasa~Ngame yadR^ichChayA chopashR^iNoti te sakR^it | kathaM guNaj~no viramedvinA pashuM shrIryat pravavre guNasa~NgrahechChayA || 469 || dashamArambhe shrIparIkShitprashne bhp 1014 nivR^ittatarShairupagIyamAnAd bhavauShadhAch Chrotramano.abhirAmAt | ka uttamashlokaguNAnuvAdAt pumAn virajyeta vinA pashughnAt ||470|| ataevoktaM devaiH pa~nchamaskandhe bhp 51923 na yatra vaikuNThakathAsudhApagA na sAdhavo bhAgavatAstadAshrayAH | na yatra yaj~neshamakhA mahotsavAH sureshaloko .api na vai sa sevyatAm || 471 || atha bhagavatkathAsaktiH ato niShevyamANAM cha sarvathA bhagavatkathAm | muhustadrasikAn pR^ichChen mitho modavivR^iddhaye || 471 || dashamaskandhe bhp 10132 satAm ayaM sArabhR^itAM nisargo yadarthavANIshrutichetasAm api | pratikShaNaM navyavadachyutasya yat striyA viTAnAm iva sAdhu vArtA ||473|| ataeva tatraiva bhp 108711 tulyashrutatapaHshIlAstulyasvIyArimadhyamAH | api chakruH pravachanam ekaM shushrUShavo .apare ||474|| iti | atha shrIbhagavaddharmapratipAdanamAhAtmyam tathA vaiShNavadharmAMsh cha kriyamAnAm api svayam | sampR^ichChet tadvidaH sAdhUn anyonyaprItivR^iddhaye ||475|| shraddhayA bhagavaddharmAn vaiShNavAyAnupR^ichChate | avashyaM kathayedvidvAn anyathA doShabhAg bhavet ||476|| taduktam nAkhyAti vaiShNavaM dharmaM viShNubhaktasya pR^ichChataH | kalau bhAgavato bhUtvA puNyaM yAti shatAbdikam ||477|| skAnde brahmanAradasaMvAde vaiShNave vaiShNavaM dharmaM yo dadAti dvijottamaH | sasAgaramahIdAne yat phalaM labhate.adhikam ||478|| kiM cha tatraiva aj~nAnAya cha yo j~nAnaM dadyAddharmopadeshanam | kR^itsnAM vA pR^ithivIM dadyAt tena tulyaM hi tat smR^itam || 479 || viShNudharmottare 334150 tat kathAM shrAvayedyastu tadbhaktAn mAnavottamaH | godAnaphalam Apnoti sa narastena karmaNA || 480 || pAdme devadUtavikuNDalasaMvAde padmap 33197 j~nAnam aj~nAya yo dadyAdvedashAstrasamudbhavam | api devAstam archanti bhavabandhavidArakam || 481 || bR^ihannAradIye nArp 1163 satsa~NgadevArchanasatkathAsu hitopadeshe nirato manuShyaH | prayAti viShNoH paramaM padaM yad dehAvasAne.achyutatulyatejAH ||482|| atha bhagavaddharmAH te cha shrIbhagavaddharmA bhagavadbhaktalakShaNaiH | vya~njitAH katichin mukhyA likhyante.atra pare.api te ||483|| te tu yadyapi vikhyAtAH shrImadbhAgavatAdiShu | tathApi yatnAdekatra sa~NgR^ihyante samAdhanAH ||484|| te choktAH kAshIkhaNDe dvArakAmAhAtmye chandrasharmaNA adya prabhR^iti kartavyaM yan mayA kR^iShNa tach ChR^iNu | ekAdashyAM na bhoktavyaM kartavyo jAgaraH sadA || 485 || mahotsavaH prakartavyaH pratyahapUjanaM tava | palArdhenApi biddhaM tu bhoktavyaM vAsarAntare || 486 || tvatprItyAShTau mayA kAryA dvAdashyo vratasaMyutA | bhaktirbhAgavatI kAryA prANairapi dhanairapi || 487 || nityaM nAmasahasraM tu paThanIyaM tava priyam | pUjA tu tulasIpatrairmayA kAryA sadaiva hi || 488 || tulasIkAShThAsambhUtA mAlA kAryA sadA mayA | nR^ityagItaM prakartavyaM samprApte jAgare tava ||489|| tulasIkAShThAsambhUtachandanena vilepanam | kariShyAmi tavAgre cha guNAnAM tava kIrtanam || 490 || mathurAyAM prakartavyaM pratyabdaM gamanaM mayA | tatkathAshravaNaM kAryaM tathA pustakavAchanam || 491 || nityaM pAdodakaM mUrdhnA mayA dhAryaM prayatnataH | naivedyabhakShaNaM chApi kariShyAmi yatavrataH || 492 || nirmAlyaM shirasA dhAryaM tvadIyaM sAdaraM mayA | tava dattvA yadiShTaM tu bhakShaNIyaM mudA mayA || 493 || tathA tathA prakartavyaM tava tuShTiH prajAyate | satyam etan mayA kR^iShNa tavAgre parikIrtanam || 494 || saptamaskandhe shrIprahlAdena bhp 7730-32 gurushushrUShayA bhaktyA sarvalabdhArpaNena cha || shraddhayA tatkathAyAM cha kIrtanairguNakarmaNAm | tatpAdAmburuhadhyAnAt talli~NgekShArhaNAdibhiH || 495 || hariH sarveShu bhUteShu bhagavAn Asta IshvaraH | iti bhUtAni manasA kAmaistaiH sAdhu mAnayet || 496 || ekAdashe cha shrIkaviyogeshvareNa bhp 11234 ye vai bhagavatA proktA upAyA hyAtmalabdhaye | a~njaH puMsAm aviduShAM viddhi bhAgavatAn hi tAn || 497 || tatraiva prabuddhayogeshvareNa bhp 11323-30 sarvato manaso .asa~Ngam Adau sa~NgaM cha sAdhuShu | dayAM maitrIM prashrayaM cha bhUteShvaddhA yathochitam ||498|| shauchaM tapastitikShAM cha maunaM svAdhyAyam Arjavam | brahmacharyam ahiMsAM cha samatvaM dvandvasaMj~nayoH || 499 || sarvatrAtmeshvarAnvIkShAM kaivalyam aniketatAm | viviktachIravasanaM santoShaM yena kenachit || 500 || shraddhAM bhAgavate shAstre .anindAm anyatra chApi hi | manovAkkarmadaNDaM cha satyaM shamadamAvapi || 501 || shravaNaM kIrtanaM dhyAnaM hareradbhutakarmaNaH | janmakarmaguNAnAM cha tadarthe .akhilacheShTitam || 502 || iShTaM dattaM tapo japtaM vR^ittaM yach chAtmanaH priyam | dArAn sutAn gR^ihAn prANAn yat parasmai nivedanam || 503 || evaM kR^iShNAtmanAtheShu manuShyeShu cha sauhR^idam | paricharyAM chobhayatra mahatsu nR^iShu sAdhuShu || 504 || parasparAnukathanaM pAvanaM bhagavadyashaH mitho ratirmithastuShTirnivR^ittirmitha AtmanaH ||505|| shrIbhagavatA cha bhp 111134-41 malli~Ngamadbhaktajana darshanasparshanArchanam | paricharyA stutiH prahva guNakarmAnukIrtanam || 506 || matkathAshravaNe shraddhA madanudhyAnam uddhava | sarvalAbhopaharaNaM dAsyenAtmanivedanam || 507 || majjanmakarmakathanaM mama parvAnumodanam | gItatANDavavAditra goShThIbhirmadgR^ihotsavaH || 508 || yAtrA balividhAnaM cha sarvavArShikaparvasu | vaidikI tAntrikI dIkShA madIyavratadhAraNam || 509 || mamArchAsthApane shraddhA svataH saMhatya chodyamaH | udyAnopavanAkrIDa puramandirakarmaNi || 510 || sammArjanopalepAbhyAM sekamaNDalavartanaiH | gR^ihashushrUShaNaM mahyaM dAsavadyadamAyayA || 511 || amAnitvam adambhitvaM kR^itasyAparikIrtanam | api dIpAvalokaM me nopayu~njyAn niveditam || 512 || yadyadiShTatamaM loke yach chAtipriyam AtmanaH | tat tan nivedayen mahyaM tadAnantyAya kalpate ||513|| kiM cha bhp 111920-23 shraddhAmR^itakathAyAM me shashvan madanukIrtanam | pariniShThA cha pUjAyAM stutibhiH stavanaM mama || 514 || AdaraH paricharyAyAM sarvA~Ngairabhivandanam | madbhaktapUjAbhyadhikA sarvabhUteShu manmatiH || 515 || madartheShva~NgacheShTA cha vachasA madguNeraNam | mayyarpaNaM cha manasaH sarvakAmavivarjanam || 516 || madarthe .arthaparityAgo bhogasya cha sukhasya cha | iShTaM dattaM hutaM japtaM madarthaM yadvrataM tapaH ||517|| api chAgre bhp 11299-12 kuryAt sarvANi karmANi madarthaM shanakaiH smaran | mayyarpitamanashchitto maddharmAtmamanoratiH || 518 || deshAn puNyAn Ashrayeta madbhaktaiH sAdhubhiH shritAn | devAsuramanuShyeShu madbhaktAcharitAni cha || 519 || pR^ithak satreNa vA mahyaM parvayAtrAmahotsavAn | kArayedgItanR^ityAdyairmahArAjavibhUtibhiH || 520 || mAm eva sarvabhUteShu bahirantarapAvR^itam | IkShetAtmani chAtmAnaM yathA kham amalAshayaH ||521|| atha shrIbhagavaddharmamAhAtmyam uktaM cha saptamaskandhe shrIprahlAdena bhp 7733 evaM nirjitaShaDvargaiH kriyate bhaktirIshvare | vAsudeve bhagavati yayA saMlabhyate ratiH || 522 || ekAdashe shrInAradena bhp 11212 shruto .anupaThito dhyAta AdR^ito vAnumoditaH sadyaH punAti saddharmo devavishvadruho .api hi ||523|| tatraiva shrIkaviyogeshvareNa bhp 11235 yAn AsthAya naro rAjan na pramAdyeta karhichit | dhAvan nimIlya vA netre na skhalen na patediha ||524|| shrIprabuddhayogeshvareNa bhp 11333 iti bhAgavatAn dharmAn shikShan bhaktyA tadutthayA | nArAyaNaparo mAyAm a~njastarati dustarAm ||525|| shrIbhagavatA cha bhp 111924 evaM dharmairmanuShyANAm uddhavAtmanivedinAm | mayi sa~njAyate bhaktiH ko .anyo .artho .asyAvashiShyate ||526|| kiM chAgre bhp 112920 na hya~Ngopakrame dhvaMso maddharmasyoddhavANvapi mayA vyavasitaH samya~N nirguNatvAdanAshiShaH ||527|| iti || alAbhe satsabhAyAstu shushrUShuM cha nijAlaye | devAlaye vA shAstraj~naH kIrtayedbhagavatkathAm ||528|| atha shrIbhagavallIlAkathAkIrtanamAhAtmyam | uktaM cha skAnde shrIbhagavatA arjunaM prati matkathA kurute yastu vaiShNavAnAM sadAgrataH | iha bhogAn avApnoti tathA mokShaM na saMshayaH || 529 || prathamaskandhe bhp 1522 shrInAradena idaM hi puMsastapasaH shrutasya vA sviShTasya sUktasya cha buddhidattayoH | avichyuto .arthaH kavibhirnirUpito yaduttamashlokaguNAnuvarNanam ||530|| kiM cha bhp 1335 etaddhyAturachittAnAM mAtrAsparshechChayA muhuH | bhavasindhuplavo dR^iShTo haricharyAnuvarNanam || 531 || ekAdashe shrIshukenApi bhp 113128 itthaM harerbhagavato ruchirAvatAra vIryANi bAlacharitAni cha shantamAni | anyatra cheha cha shrutAni gR^iNan manuShyo bhaktiM parAM paramahaMsagatau labheta ||532|| ataeva shrIprahlAdena nR^isiMhastutAvuktam bhp 7918 so .ahaM priyasya suhR^idaH paradevatAyA lIlAkathAstava nR^isiMha viri~nchagItAH | a~njastitarmyanugR^iNan guNavipramukto durgANi te padayugAlayahaMsasa~NgaH ||533|| gopikAbhirapi gItam bhp 10319 tava kathAmR^itaM taptajIvanaM kavibhirIDitaM kalmaShApaham | shravaNama~NgalaM shrImadAtataM bhuvi grNanti te bhuridA janAH ||534|| kirtane.apyatra taj j~neyaM mAhAtmyaM shravaNe.asya yat | sidhyati shravaNam nUnaM kIrtanAt svayam eva hi ||535|| shAstrAbhyAsasya chAbhAve pUrveShAM lokavishrutAm | satAm AdhunikAnAM cha kathAM bandhuShu kIrtayet ||536|| iti shrIgopAlabhaTTavilikhite shrIbhagavadbhaktivilAse satsa~Ngamo nAma dashamo vilAsaH ||10||