shrI-gAndharvA-samprArthanAShTakam

vR^indAvane viharator iha kile-ku~nje
matta-dvipa-pravara-kautuka-vibhrameNa |
sandarshayasva yuvayor vadanAravinda-
dvandvaM vidhehi mayi devi kR^ipAM prasIda ||1||

hA devi kAku-bhara-gadgadayAdya vAchA
yAche nipatya bhuvi daNDavad udbhaTArtiH |
asya prasAdam abudhasya janasya kR^itvA
gAndharvike nija-gaNe gaNanAM vidhehi ||2||

shyAme ramA-ramaNa-sundaratA-variShTha-
saundarya-mohita-samasta-jagaj-janasya |
shyAmasya vAma-bhuja-baddha-tanuM kadAhaM
tvAm indirA-virala-rUpa-bharAM bhajAmi ||3||

tvAM prachChadena mudira-chChavinA pidhAya
ma~njIra-mukta-charaNAM cha vidhAya devi |
ku~nje vrajendra-tanayena virAjamAne
naktaM kadA pramuditAm abhisArayiShye ||4||

ku~nje prasUna-kula-kalpita-keli-talpe
saMviShTayor madhura-narma-vilAsa-bhAjoH |
loka-trayAbharaNayosh charaNAmbujAni
saMvAhayiShyati kadA yuvayor janoyam ||5||

tvat-kuNDa-rodhasi vilAsa-parishrameNa
svedAmbu-chumbi-vadanAmbu-ruha-shriyo vAm |
vR^indAvaneshvari kadA taru-mUla-bhAjo
saMvIjayAmi chamarI-chaya-chAmareNa ||6||

lInAM niku~nja-kuhare bhavatIM mukunde
chitraiva sUchitavatIM ruchirAkShi nAham |
bhugnAM bhruvaM na rachayeti mR^iShAruShAM tvAm
agre vrajendra-tanayasya kadA nu neShye ||7||

vAg-yuddha-keli-kutuke vraja-rAja-sUnuM
jitvonmadAm adhika-darpa-vikAsi-jalpAm |
phullAbhir Alibhir analpam udIryamANa-
stotrAM kadA nu bhavatIm avalokayiShye ||8||

yaH kopi suShThu vR^iShabhAnu-kumArikAyAH
samprArthanAShTakam idaM paThati prapannaH |
sA preyasA saha sametya dhR^ita-pramodA
tatra prasAda-laharIm urarIkaroti ||9||

iti shrI-rUpa-gosvAminA virachitAyAM stavamAlAyAM shrI-gAndharvA-samprArthanAShTakam sampUrNam |