शिवप्रोक्तं वैदिकशिवभक्तलक्षणानुवर्णनम्
- शिवपार्तवतीसंवादे -
श्री सदाशिव उवाच -
मदर्चनं च विविधं सद्यः सर्वाघनाशकम् ।
नित्याग्निहोत्रं दर्शश्च चातुर्मास्यं तथैव च ॥ ५२६॥
मदर्पणधिया कुर्युर्ज्येष्ठयज्ञं तथैव च ।
ते वैदिक इति प्रोक्ता मद्भक्ताश्च त एव हि ॥ ५२७॥
वेदान्तश्रवणं नित्यं मननं च विशेषतः ।
कुर्युस्ते सदा विप्र सद्भक्ता इति कीर्त्यते ॥ ५२८॥
मदर्चनाधिकारोऽपि मद्भक्तस्यैव वस्तुतः ।
मद्भक्ताश्रितएवेति विज्ञेयं सततं बुधैः ॥ ५२९॥
ये वेदमार्गनिरताः स्वप्नेऽप्यन्यपराङ्मुखाः ।
वेदैः सर्वैरहं वेद्यो वेदान्तैरपि शैलजे ॥ ५३०॥
मदन्यो वेदवेदान्तवेद्यो नास्त्येव सर्वदा ।
मम तत्त्वमविज्ञाय वेदबाह्या भवन्त्यतः ॥ ५३७॥
भजन्ति वेदबाह्यास्ते मदन्यममरभ्रमात् ।
मदन्यपूजासंसक्ता लब्ध्वा जन्मान्यनेकशः ॥ ५३२॥
प्राप्नुवन्त्यतिघोराणि नरकाणि पुनः पुनः ।
वैदिकास्तु सदाचारा वेदोक्ताचारतत्पराः ॥ ५३३॥
भजन्ति मां प्रयत्नेन वेदान्यविमुखाः सदा ।
ये मां विश्वाधिकं रुद्रं भजन्त्यन्यपराङ्मुखाः ॥ ५३४॥
ते वैदिका इति प्रोक्ता मद्भक्ताश्च त एवं हि ।
ये भस्मोद्धूतसर्वाङ्गास्त्रिपुण्ड्राङ्कितमस्तकाः ॥ ५३५॥
ते वैदिका इति प्रोक्ता मद्भक्ताश्च त एव हि ।
ये रुदाक्षलसत्कण्ठा रुद्राक्षकृतकङ्कणाः ॥ ५३६॥
ते वैदिका इति प्रोक्ता मद्भक्ताश्च त एव हि ।
ये मल्लिङ्गार्चनासक्ता बिल्वपत्रादिभिः सदा ॥ ५३७॥
ते वैदिका इति प्रोक्ता मद्भक्ताश्च त एव हि ।
ये मन्निरीक्षणासक्ताः सन्त्यक्तान्येक्षणाशयाः ॥ ५३८॥
ते वैदिका इति प्रोक्ता मद्भक्ताश्च त एव हि ।
ये मत्पादोदपा नित्यमन्यतीर्थम्पराङ्मुखाः ॥ ५३९॥
ये मन्नैवेद्यपुष्टाङ्गा मद्घ्राताऽऽघ्राणनप्रियाः ।
ते वैदिका इति प्रोक्ता मद्भक्ताश्च त एव हि ॥ ५४०॥
ये मद्भक्तार्चनसंसक्ता मद्भक्तान्यपराङ्मुखाः ।
ते वैदिका इति प्रोक्ता मद्भक्ताश्च त एव हि ॥ ५४१॥
ये मत्क्षेत्रकृतावासास्त्यक्तान्यक्षेत्रसंश्रयाः ।
ते वैदिका इति प्रोक्ता मद्भक्ताश्च त एव हि ॥ ५४२॥
ये नक्तभोजिनो नित्यं सर्वदा सोमवासरे ।
ते वैदिका इति प्रोक्ता मद्भक्ताश्च त एव हि ॥ ५४३॥
ये नित्य(कृष्णचतुर्दश्यां)कृष्णभूतायामुपोषणपराः सदा ।
ते वैदिका इति प्रोक्ता मद्भक्ताश्च त एव हि ॥ ५४४॥
ये महेश महादेव नीलकण्ठेति वादिनः ।
ते वैदिका इति प्रोक्ता मद्भक्ताश्च त एव हि ॥ ५४५॥
ये शूलपाणे खट्वाङ्गिन्कृत्तिवासेति वादिनः ।
ते वैदिका इति प्रोक्ता मद्भक्ताश्च त एव हि ॥ ५४६॥
ये देवोत्तम देवेश वेदवेद्येति वादिनः ।
ते वैदिका इति प्रोक्ता मद्भक्ताश्च त एव हि ॥ ५४७॥
ये विष्णुपूज्य विश्वात्मन्विधिपूज्येति वादिनः ।
ते वैदिका इति प्रोक्ता मद्भक्ताश्च त एव हि ॥ ५४८॥
ये मृत्युञ्जयेश कामारे त्रिपुरघ्नेति वादिनः ।
ते वैदिका इति प्रोक्ता मद्भक्ताश्च त एव हि ॥ ५४९॥
ये विष्णुविधिचन्द्रेन्द्रविद्यादातेति वादिनः ।
ते वैदिका इति प्रोक्ता मद्भक्ताश्च त एव हि ॥ ५५०॥
ये सर्वज्ञाऽखिलाधार हर धीरेति वादिनः ।
ते वैदिका इति प्रोक्ता मद्भक्ताश्च त एव हि ॥ ५५१॥
एतादृशा महाशैवा रुद्रैकपरदैवताः ।
मद्भक्ता इति विज्ञेया वेदमार्गरताः सदा ॥ ५५२॥
शिवे सुराणां मर्त्यानां मद्भक्तिर्मदनुग्रहात् ।
भवत्यनन्यया भक्त्या मामेवाभ्युपयन्ति ते ॥ ५५३॥
॥ इति शिवरहस्यान्तर्गते शिवप्रोक्तं वैदिकशिवभक्तलक्षणानुवर्णनं सम्पूर्णम् ॥
- ॥ श्रीशिवरहस्यम् उग्राख्यः सप्तमांशः । अध्यायः १३ । ५२६-५५३॥
- .. shrIshivarahasyam ugrAkhyaH saptamAMshaH . adhyAyaH 13 . 526-553 ..
Notes:
Śiva शिव details to Gaurī गौरी about the significations of His Devotees who are engaged in His Worship is several ways that constitute The Way of The Veda-s, viz. Vaidika-mārga वैदिकमार्ग.
Encoded and proofread by Ruma Dewan