ब्रह्मादिदेवैः कृतं शिवस्तोत्रम्
देवा ऊचुः -
प्रीतये यस्य न रतिर्न कामो यन्मनोभवः ।
न यस्य जन्मनो हेतुस्तस्मै तुभ्यं नमो नमः ॥ २९॥
यस्य लोकहितायैव जातो जायापरिग्रहः ।
त्र्यम्बकाय नमस्तस्मै स शिवो नः प्रसीदतु ॥ ३९॥
यन्मन्मथं विना देवं शृङ्गाराद्या विशन्ति च ।
स्वबलेनैव तं देवं त्वां वयं प्रणता हरम् ॥ ३१॥
हिरण्यरेताः स्वर्णाभो यो हिरण्यभुजाह्वयः ।
स त्वं सर्गहरो देवो नित्यं नोऽभिप्रसीदतु ॥ ३२॥
जगन्मयी योगनिद्रा विष्णुमाया बलीयसी ।
तस्याभवत्स्वयं जाया तस्मै तुभ्यं नमो नमः ॥ ३३॥
पञ्चभूतमयं यस्य पञ्चशीर्षं विराजते ।
तं पञ्चवदनं देवं भक्त्या त्वां प्रणमामहे ॥ ३४॥
सद्योजातमघोरं च वामदेवमुमापतिम् ।
ईशानं प्रणमामोऽद्य यं तत्पुरुषमाह वै ॥ ३५॥
योऽसतामशिवो नित्यं यो वा भक्तिमतां शिवः ।
शिवाशिवस्वरूपाय नमस्तस्मै शिवाय ते ॥ ३६॥
रूपैस्त्रिभिर्यः स्थितिसृष्टिनाशं
विष्ण्वात्मभिः शम्भुरिति प्रसिद्धैः ।
करोति शश्वज्जगतां नुमस्तं
शिवं विरूपाक्षममुं शिवेशम् ॥ ३७॥
अः शूलखट्वाङ्गमृगाङ्कधारी
यो गोध्वजः शक्तिमान् पञ्चरूपी ।
तस्मै तुभ्यं जातवेदः प्रभाय
भूयो भूयो नमो नमः शङ्कराय ॥ ३८॥
ब्रह्मार्चिष्मान् भोगभृद्दैत्यहन्ता
यन्ता योद्धा वीतगर्भो जगत्याः ।
स त्वं स्तुतो नः प्रसीदत्वनन्तो
नित्योद्रेकी उक्तरूपः प्रधानः ॥ ३९॥
परब्रह्मरूपी नियतैकमुक्तः
परञ्ज्योतिरूपी नियतस्त्वनन्तः ।
परः पाररूपी नियतात्मभागी
आ नो भर्गरूपी गिरिशोऽस्तु भूत्यै ॥ ४०॥
उमापतिं महामायं महादेवं जगत्पतिम् ।
शिवं शिवकरं शान्तं नमामः स प्रसीदतु ॥ ४१॥
इति कालिकापुराणे षट्चत्वारिंशाध्यायान्तर्गतं ब्रह्मादिदेवैः
कृतं शिवस्तोत्रं सम्पूर्णम् ।
Proofread by PSA Easwaran