% Text title            : manasollAsa or abhilakShitArthachintAmaNi
% File name             : manasollasa.itx
% Category              : shiva, stotra
% Location              : doc\_shiva
% Author                : Sureshvaracharya
% Transliterated by     : Sunder Hattangadi
% Proofread by          : Sunder Hattangadi
% Translated by         : -
% Description-comments  : A commentary (vArtika) on Shankara@s Dakshinamurti Stotra
% Latest update         : August 28, 2021
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Manasollasa ..}##
\itxtitle{.. mAnasollAsa ..}##\endtitles ##

.. shrIdakShiNAmUrtistotram.h ..
vishva.n darpaNadR^ishyamAnanagarItulya.n nijAntargataM
pashyannAtmani mAyayA bahirivodbhUta.n yathA nidrayA .
yaH sAkShAtkurute prabodhasamaye svAtmAnamevAdvayaM
tasmai shrI gurumUrtaye nama ida.n shrIdakShiNAmUrtaye .. 1..
bIjasyAntarivA~Nkuro jagadidaM prA~NnirvikalpaM punaH
mAyAkalpitadeshakAlakalanAvaichitryachitrIkR^itam.h .
mAyAvIva vijR^imbhayatyapi mahAyogIva yaHsvechChayA
tasmai shrI gurumUrtaye nama ida.n shrIdakShiNAmUrtaye .. 2..
yasyaiva sphuraNa.n sadAtmakamasatkalpArthagaM bhAsate
sAkShAttattvamasIti vedavachasA yo bodhayatyAshritAn.h .
yatsAkShAtkaraNAdbhavennapunarAvR^ittirbhavAmbhonidhau
tasmai shrI gurumUrtaye nama ida.n shrIdakShiNAmUrtaye .. 3..
nAnAchChidraghaTodarasthitamahAdIpaprabhAbhAsvaraM
j~nAna.n yasya tu chakShurAdikaraNadvArA bahiHspandate .
jAnAmIti tameva bhAntamanubhAtyetatsamasta.n jagat.h
tasmai shrI gurumUrtaye nama ida.n shrIdakShiNAmUrtaye .. 4..
dehaM prANamapIndriyANyapi chalAM buddhi.n cha shUnya.n viduH
strIbAlAndhajaDopamAstvahamiti bhrAntA bhR^isha.n vAdinaH .
mAyAshaktivilAsakalpitamahAvyAmohasa.nhAriNe
tasmai shrI gurumUrtaye nama ida.n shrIdakShiNAmUrtaye .. 5..
rAhugrastadivAkarendusadR^isho mAyAsamAchChAdanAt.h
sanmAtraH karaNopasa.nharaNato yo.abhUtsuShuptaH pumAn.h .
prAgasvApsamiti prabodhasamaye yaH pratyabhij~nAyate
tasmai shrI gurumUrtaye nama ida.n shrIdakShiNAmUrtaye .. 6..
bAlyAdiShvapi jAgradAdiShu tathA sarvAsvavasthAsvapi
vyAvR^ittAsvanuvartamAnamahamityantaH sphuranta.n sadA .
svAtmAnaM prakaTIkaroti bhajatA.n yo mudrayA bhadrayA
tasmai shrI gurumUrtaye nama ida.n shrIdakShiNAmUrtaye .. 7..
vishvaM pashyati kAryakAraNatayA svasvAmisaMbandhataH
shiShyAchAryatayA tathaiva pitR^iputrAdyAtmanA bhedataH .
svapne jAgrati vA eSha puruSho mAyAparibhrAmitaH
tasmai shrI gurumUrtaye nama ida.n shrIdakShiNAmUrtaye .. 8..
bhUrambhA.nsyanalo.anilo.ambaramaharnAtho himA.nshuH pumAn.h
ityAbhAti charAcharAtmakamida.n yasyaiva mUrtyaShTakam.h .
nAnyatki~nchana vidyate vimR^ishatA.n yasmAtparasmAdvibhoH
tasmai shrI gurumUrtaye nama ida.n shrIdakShiNAmUrtaye .. 9..
sarvAtmatvamiti sphuTIkR^itamida.n yasmAdamuShmi.nstave
tenAsya shravaNAttadarthamananAddhyAnAchcha sa.nkIrtanAt.h .
sarvAtmatvamahAvibhUtisahita.n syAdIshvaratva.n svataH
siddhyettatpunaraShTadhA pariNata.n chaishvaryamavyAhatam.h .. 10..
.. mAnasollAsa ..
vishva.n darpaNadR^ishyamAnanagarItulya.n nijAntargataM
pashyannAtmani mAyayA bahirivodbhUta.n yathA nidrayA .
yaH sAkShAtkurute prabodhasamaye svAtmAnamevAdvayaM
tasmai shrI gurumUrtaye nama ida.n shrIdakShiNAmUrtaye .. 1..
ma~NgaLa.n dishatu me vinAyako
ma~NgaLa.n dishatu me sarasvatI .
ma~NgaLa.n dishatu me maheshvaro
ma~NgaLa.n dishatu me sadAshivaH .. 1..
AtmalAbhAtparo lAbho nAstIti munayo viduH .
tallAbhArtha.n kaviH stauti svAtmAnaM parameshvaram.h .. 2..
svechChayA sR^iShTamAvishya vishva.n yo manasi sthitaH .
stotreNa stUyate.anena sa eva parameshvaraH .. 3..
asti prakAshata iti vyavahAraH pravartate .
tachchAstitvaM prakAshatva.n kasminnarthe pratiShThitam.h .. 4..
ki.n teShu teShu vA.artheShu ki.n vA sarvAtmanIshvare .
Ishvaratva.n cha jIvatva.n sarvAtmatva.n cha kIdR^isham.h .. 5..
jAnIyAtkatha.n jIvaH ki.n tajj~nAnasya sAdhanam.h .
j~nAnAttasya phala.n ki.n syAdekatva.n cha kathaM bhavet.h .. 6..
sarvaj~naH sarvakartA cha kathamAtmA bhaviShyati .
shiShyaM pratItthaM pR^ichChanta.n vaktumArabhate guruH .. 7..
antarasminnime lokA antarvishvamida.n jagat.h .
bahirvanmAyayA.a.abhAti darpaNe svasharIravat.h .. 8..
svapne svAntargata.n vishva.n yathA pR^ithagivekShyate .
tathaiva jAgratkAle.api prapa~ncho.aya.n vivichyatAm.h .. 9..
svapne svasattaivArthAnA.n sattA nAnyeti nishchitA .
ko jAgrati visheSho.asti jaDAnAmAshu nAshinAm.h .. 10..
svapne prakAsho bhAvAnA.n svaprakAshAnna hItaraH .
jAgratyapi tathaiveti nishchinvanti vipashchitaH .. 11..
nidrayA darshitAnarthAnna pashyati yathotthitaH .
samyagj~nAnodayAdUrdhva.n tathA vishva.n na pashyati .. 12..
anAdimAyayA supto yadA jIvaH prabudhyate .
ajanmanidramasvapnamadvaitaM budhyate tadA .. 13..
shrutyA.a.achAryaprasAdena yogAbhyAsavashena cha .
IshvarAnugraheNApi svAtmabodho yadA bhavet.h .. 14..
bhukta.n yathA.anna.n kukShistha.n svAtmatvenaiva pashyati .
pUrNAhantAkabaLita.n vishva.n yogIshvarastathA .. 15..
yathA svapne nR^ipo bhUtvA bhuktvA bhogAnyathepsitAn.h .
chatura~NgabalopetaH shatru.n jitvA raNA~NgaNe .. 16..
parAtparAjito bhUtvA vanaM prApya tapashcharan.h .
muhUrtamAtramAtmAnaM manyate kalpajIvinam.h .. 17..
tathaiva jAgratkAle.api manorAjya.n karotyasau .
kAlanadyoghayogena kShINamAyurna pashyati .. 18..
meghachChanno.n.ashumAlIva mAyayA mohito.adhikam.h .
ki~nchitkartA cha ki~nchijj~no lakShyate parameshvaraH .. 19..
yadyatkaroti jAnAti tasmintasminpareshvaraH .
rAjA vidvAn svasAmarthyAdIshvaro.ayamitIryate .. 20..
j~nAnakriye shivenaikyAtsa~NkrAnte sarvajanuShu .
Ishvaratva.n cha jIvAnA.n siddha.n tachChaktisa~NgamAt.h .. 21..
aya.n ghaTo.ayaM paTa ityeva.n nAnApratItiShu .
arkaprabheva svaj~nAna.n svayameva prakAshate .. 22..
j~nAna.n na chetsvaya.n siddha.n jagadandha.n tamo bhavet.h .
na chedasya kriyA kAchit vyavahAraH kathaM bhavet.h .. 23..
kriyA nAma parispandapariNAmasvarUpiNI .
spandamAne bahirj~nAne tada~Nkuravadudbhavet.h .. 24..
utpAdyaprApyasa.nskAryavikAryopAshrayA kriyA .
karoti gachChatyunmArShTi ChinattIti pratIyate .. 25..
shivo brahmAdideheShu sarvaj~na iti bhAsate .
devatirya~NmanuShyeShu ki~nchijj~nastAratamyataH .. 26..
jarAyujo.aNDajashchaiva svedajaH punarudbhidaH .
ete chaturvidhAH dehAH kramasho nyUnavR^ittayaH .. 27..
brahmAdistambaparyantA svapnakalpaiva kalpanA .
sAkShAtkR^ite.anavachChinnaprakAshe paramAtmani .. 28..
aNoraNIyAnmahato mahIyAniti vedavAk.h .
rudropaniShadapyeta.n stauti sarvAtmaka.n shivam.h .. 29..
Ishvaro gururAtmeti mUrtibhedavibhAgine .
vyomavadvyAptadehAya dakShiNAmUrtaye namaH .. 30..
iti shrIdakShiNAmUrtistotrArthapratipAdake  .
prabandhe mAnasollAse prathamollAsasa.ngrahaH .. 31..
bIjasyAntarivA~Nkuro jagadidaM prA~NnirvikalpaM punaH
mAyAkalpitadeshakAlakalanAvaichitryachitrIkR^itam.h .
mAyAvIva vijR^imbhayatyapi mahAyogIva yaHsvechChayA
tasmai shrI gurumUrtaye nama ida.n shrIdakShiNAmUrtaye .. 2..
upAdAnaM prapa~nchasya sa.nyuktAH paramANavaH .
mR^idanvito ghaTastasmAdbhAsate neshvarAnvitaH .. 1..
paramANugatA eva guNA rUparasAdayaH .
kArye samAnajAtIyamArabhante guNAntaram.h .. 2..
kArya.n yatra samanveti kAraNa.n samavAyi tat.h .
chakrAdya.n sAdhana.n yattu ghaTasyAsamavAyi tat.h .. 3..
samavAyini tiShThedyat.h samavAyyAshraye tathA .
kArye.avadhR^itasAmarthya.n kalpyate.asamavAyi tat.h .. 4..
nimitta.n kAraNa.n teShAmIshvarashcha kulAlavat.h .
yatkArya.n jAyate yasmAttasmin.h tatpratitiShThati .. 5..
mR^ittikAyA.n ghaTastantau paTaH svarNe.a~NgulIyakam.h .
iti vaisheShikAH prAhustathA naiyAyikA api .. 6..
rajaH sattva.n tamashcheti pradhAnasya guNAstrayaH .
rajo rakta.n chala.n teShu sattva.n shuklaM prakAshakam.h .. 7..
tamaH kR^iShNa.n chAvaraka.n sR^iShTisthityantahetavaH .
iti sA.nkhyAshcha bhAShante teShA.n dUShaNa uchyate .. 8..
a~NkurAdiphalAnteShu kAryeShvastitvamiShyate .
kuta Agatya sambaddhA vaTabIjeShu te kaNAH .. 9..
kAraNAnugata.n kAryamiti sarvaishcha sammatam.h .
tasmAtsattA sphurattA cha sarvatrApyanuvartate .. 10..
puShpe phalatvamApanne kShIre cha dadhitA.n gate .
vijAtIyAH pratIyante guNA rUparasAdayaH .. 11..
kAraNa.n kAryama.nsho.n.ashI jAtivyaktI guNI guNaH .
kriyA kriyAvAnityAdyAH prakAshasyaiva kalpanAH .. 12..
chaitanyaM paramANUnAM pradhAnasyApi neShyate .
j~nAnakriye jagatklR^iptau dR^ishyete chetanAshraye .. 13..
kAlarUpakriyAshaktyA kShIrAtpariNameddadhi .
j~nAtR^ij~nAnaj~neyarUpa.n j~nAnashaktyA bhavejjagat.h .. 14..
j~nAna.n dvidhA vastumAtradyotaka.n nirvikalpakam.h .
savikalpantu saMj~nAdidyotakatvAdanekadhA .. 15..
sa~Nkalpasa.nshayabhrAntismR^itisAdR^ishyanishchayAH .
Uho.anadhyavasAyashcha tathA.anyenubhavA api.. 16..
pratyakShameka.n chArvAkAH kaNAdasugatau punaH .
anumAna~n cha tachchApi sA.nkhyAH shabda.n cha te api .. 17..
nyAyaikadarshinopyavemupamAna.n cha ke chana .
arthApattyA sahaitAni chatvAryAha prabhAkaraH .. 18..
abhAvaShaShThAnyetAni bhATTA vedAntinastathA .
sambhavaitihyayuktAni tAni paurANikA jaguH .. 19..
dravya.n guNastathA karma sAmanya.n cha visheShakam.h .
samavAya.n cha kANAdAH padArthAnShaTprachakShate .. 20..
nava dravyANi bhUtAni dikkAlAtmamanA.nsi cha .
chaturvi.nshatireva syurguNAH shabdAdipa~nchakam.h .. 21..
parimANa.n cha sa~NkhyA cha dvau sa.nyogavibhAgakau .
svabhAvataH pR^ithaktva.n cha gurutva.n dravatA punaH .. 22..
paratva.n chAparatva.n cha snehaH sa.nskAra ityapi .
dhIrdveShasukhaduHkhechChAdharmAdharmaprayatnakAH .. 23..
sa.nskArastrividho vega iShvAdergatikAraNam.h .
dR^iShTashrutAnubhUtArthasmR^itihetushcha bhAvanA .. 24..
sthitasthApakatA nAma pUrvavatsthitikAraNam.h .
AkR^iShTashAkhAbhUrjAdau spaShTamevopalakShyate .. 25..
utkShepaNamavakShepo gamana.n cha prasAraNam.h .
Aku~nchanamiti prAhuH karma pa~nchavidhaM budhAH .. 26..
sAmAnya.n dvividhaM proktaM para.n chAparameva cha .
para.n sattaiva sarvatra tadanusyUtavartanam.h .. 27..
dravyatva.n cha guNatvAdya.n sAmAnyamapara.n tathA .
visheShAH syuranantAste vyAvR^ittij~nAnahetavaH .. 28..
rUpasyeva ghaTe nityaH sambandhaH samavAyakaH .
kAlAkAshadigAtmAno nityAshcha vibhavashcha te .. 29..
chaturvidhAH parichChinnA nityAshcha paramANavaH .
iti vaisheShikamate padArthAH ShaT.h prakIrtitAH .. 30..
mAyA pradhAnamavyaktamavidyA.aj~nAnamakSharam.h .
avyAkR^ita.n cha prakR^itiH tama ityabhidhIyate .. 31..
mAyAyAM brahmachaitanyapratibimbAnuSha~NgataH .
mahatkAlapumA.nsaH syuH mahattattvAdaha.nkR^itiH .. 32..
tAmasAtsyuraha~NkArAtkhAnilAgnyambubhUmayaH .
shabdaH sparshashcha rUpa.n cha raso gandhopyanukramAt.h .. 33..
indriyANA.n cha viShayA bhUtAnAmapi te guNAH .
devAH sadAshivashchesho rudro viShNushchaturmukhaH .. 34..
sAttvikAtsyAdaha~NkArAdantaHkaraNadhIndriyam.h .
mano buddhiraha~NkArashchitta.n karaNamAntaram.h .. 35..
sa.nshayo nishchayo garvaH smaraNa.n viShayA amI .
chandraH prajApatI rudraH kShetraj~na iti devatAH .. 36..
shrotra.n tvakchakShu jihvA ghrANa.n j~nAnendriya.n viduH .
digvAtasUryavaruNA nAsatyau devatAH smR^itAH .. 37..
rAjasAtsyuraha~NkArAtkarmendriyasamIraNAH .
karmendriyANi vAkpANiH pAdaH pAyurupasthakam.h .. 38..
vachanAdAnagamanavisargAnandasa.nj~nakAH .
viShayA devatAsteShA.n vahnIndropendramR^ityukAH .. 39..
prANopAnaH samAnashchodAnavyAnau cha vAyavaH .
bhUtaistu pa~nchabhiH prANaiH chaturdashabhirindriyaiH .. 40..
chaturvi.nshatitattvAni sA~NkhyashAstravido viduH .
mahAnkAlaH pradhAna.n cha mAyAvidye cha pUruShaH .. 41..
iti paurANikAH prAhustri.nshattattvAni taiH saha .
bindunAdau shaktishivau shAntAtItau tataH param.h .. 42..
ShaTtri.nshattatvamityukta.n shaivAgamavishAradaiH .
sarve vikalpAH prAgAsan bIje.a~Nkura ivAtmani .. 43..
ichChAj~nAnakriyArUpamAyayA te vijR^imbhitAH .
ichChAj~nAnakriyApUrvA yasmAtsarvAH pravR^ittayaH .. 44..
sarve.api jantavastasmAdIshvarA iti nishchitAH .
bIjAdvR^ikShastarobIjaM pAramparyeNa jAyate .. 45..
itisha~NkAnivR^ittyartha.n yogidR^iShTAntakIrtanam.h .
vishvAmitrAdayaH pUrve paripakvasamAdhayaH .. 46..
upAdAnopakaraNaprayojanavivArjitAH .
svechChayA sasR^ijuH sarga.n sarvabhogopabR^i.nhitam.h .. 47..
Ishvaro.anantashaktitvAtsvatantro.anyAnapekShakaH .
svechChAmAtreNa sakala.n sR^ijatyavati hanti cha .. 48..
na kArakANA.n vyApArAtkartA syAnnitya IshvaraH .
nApi pramANavyAparAt.h j~nAtA.asau svaprakAshakaH .. 49..
j~nAtR^itvamapi kartR^itva.n svAtantryAttasya kevalam.h .
yA chechChAshaktivaichitrI sA.asya svachChandakAritA .. 50..
yayA kartu.n na vA kartumanyathA kartumarhati .
svatantrAmIshvarechChA.n ke parichChetumiheshate .. 51..
shrutishcha so.akAmayatetIchChayA sR^iShTimIshituH .
tasmAdAtmana AkAshaH sambhUta iti chAbravIt.h .. 52..
nimittamAtra.n chedasya jagataH parameshvaraH .
vikAritva.n vinAshitvaM bhavedasya kulAlavat.h .. 53..
buddhyAdayo nava guNAH nityA eveshvarasya chet.h .
nityechChAvAn.n jagatsR^iShTau pravatetaiva sarvadA .. 54..
pravR^ittyuparamAbhAvAtsa.nsAro naiva nashyati .
mokShopadesho vyarthaH syAdAgamo.api nirarthakaH .. 55..
tasmAnmAyAvilAso.aya.n jagatkartR^itvamIshituH .
bandhamokShopadeshAdivyavahAro.api mAyayA .. 56..
iti shrIdakShiNAmUrtistotrArthapratipAdake .
prabandhe mAnasollAse dvitIyollAsasa.ngrahaH .. 57..
yasyaiva sphuraNa.n sadAtmakamasatkalpArthagaM bhAsate
sAkShAttattvamasIti vedavachasA yo bodhayatyAshritAn.h .
yatsAkShAtkaraNAdbhavennapunarAvR^ittirbhavAmbhonidhau
tasmai shrI gurumUrtaye nama ida.n shrIdakShiNAmUrtaye .. 3..
sattAsphuratte bhAveShu kuta Agatya sa~Ngate .
bimbAdidarpaNanyAyAditthaM pR^ichChan.h prabodhyate .. 1..
asatkalpeShu bhAveShu jaDeShu kShaNanAshiShu .
astitva.n cha prakAshatva.n nityAtsa.nkrAmatIshvarAt.h .. 2..
Atmasattaiva sattaiShAM bhAvAnA.n na tato.adhikA .
tathaiva sphuraNa.n chaiShA.n nAtmasphuraNato.adhikam.h .. 3..
j~nAnAni bahurUpANi teSha.n cha viShayA api .
aha~NkAre.anuShajyante sUtre maNigaNA iva .. 4..
prakAshAbhinnamevaitadvishva.n sarvasya bhAsate .
laharIbudbudAdInA.n salilAnna pR^ithaksthitiH .. 5..
jAnAmityeva yajj~nAnaM bhAvAnAvishya vartate .
j~nAtaM mayeti tatpashchAdvishrAmyatyantarAtmani .. 6..
ghaTAdikAni kAryANi vishrAmyanti mR^idAdiShu .
vishvaM prakAshAbhinnatvAdvishrAmyetparameshvare .. 7..
svagatenaiva kALimnA darpaNaM malina.n yathA ..
aj~nAnenAvR^ita.n j~nAna.n tena muhyanti jantavaH .. 8..
ghaTAkAsho mahAkAsho ghaTopAdhikR^ito yathA .
dehopAdhikR^ito bhedo jIvAtparamAtmanoH .. 9..
tattvamasyAdivAkyaistu tayoraikyaM pradarshyate .
soyaM puruSha ityukte pumAneko hi dR^ishyate .. 10..
yajjagatkAraNa.n tattva.n tatpadArthaH sa uchyate .
dehAdibhiH parichChinno jIvastu tvaMpadAbhidhaH .. 11..
taddeshakAlAvasthAdau dR^iShTaH sa iti kathyate .
tathaitaddeshakAlAdau dR^iShTo.ayamiti kIrtyate .. 12..
mukhya.n tadetadvaishiShTya.n visR^ijya padayordvayoH .
pummAtra.n lakShayatyeka.n yathA soyaM pumAnvachaH .. 13..
pratyaktva.n cha parAktva.n cha tyaktvA tattvamasIti vAk.h .
tathaiva lakShayatyaika.n jIvAtmaparamAtmanoH .. 14..
sAmAnAdhikaraNAkhyaH sambandhaH padayoriha .
visheShaNavisheShyatva.n sambandhaH syAtpadArthayoH .. 15..
lakShyalakShaNasa.nyogAdvAkyamaikya.n cha bodhayet.h .
ga~NgAyA.n ghoSha itivanna jahallakShaNA bhavet.h .. 16..
nAjahallakShaNA.api syAchChvetodhAvativAkyavat.h .
tattvamasyAdivAkyAnA.n lakShaNA bhAgalakShaNA .. 17..
so.ayaM puruSha ityAdivAkyAnAmiva kIrtitA .
bhinnavR^ittinimittAnA.n shabdAnAmekavastuni .. 18..
pravR^ittistu samAnAdhikaraNatvamihochyate .
parasyA.nsho vikAro vA jIvo vAkyena nochyate .. 19..
jIvAtmanA praviShThatvAtsvamAyAsR^iShTamUrtiShu .
nira.nsho nirvikAro.asau shrutyA yuktyA cha gamyate .. 20..
ghaTAkAsho vikaro vA nA.nsho vA viyato yathA .
tvamindrosItivadvAkya.n na khalu stutitatparam.h .. 21..
na sAdR^ishyapara.n vAkyamagnirmANavakAdivat.h .
na kAryakAraNatvasya sAdhanaM mR^idghaTAdivat.h .. 22..
na jAti vyaktigamaka.n gauH khaNDa itivadvachaH .
guNaguNyAtmaka.n vAkya.n naitannIlotpalAdivat.h .. 23..
nopAsanApara.n vAkyaM pratimAsvIshabuddhivat.h .
na vaupachArika.n vAkya.n rAjavadrAjapUruShe .. 24..
jIvAtmanA praviShTo.asAvIshvaraH shrUyate yataH .
dehendriyamanobuddhiprANAha~NkArasa.nhatau .. 25..
Atmasa~NkalanAdaj~nairAtmatvaM pratipAdyate .
vahnidhIH kAShThalohAdau vahnisa~NkalanAdiva .. 26..
dehamannamaya.n koshamAvishyAtmA prakAshate .
sthUlo bAlaH kR^ishaH kR^iShNo varNAshramavikalpavAn.h .. 27..
prANakoshe.api jIvAmi kShudhito.asmi pipAsitaH .
sa.nshito nishchito manye iti koshe manomaye .. 28..
vij~nAnamayakoshastho vijAnAmIti tiShThati .
AnandamayakoshAkhye tvaha~NkAre purAkR^itaiH .. 29..
puNyairupAsanAbhishcha sukhito.asmIti modate .
eva.n ka.nchukitaH koshaiH ka.nchukairiva pa~nchabhiH .. 30..
parichChinna ivAbhAti vyApto.api parameshvaraH .
yathA salilamAvishya bahudhA bhAti bhaskaraH .. 31..
tathA sharIrANyAvishya bahudhA sphuratIshvaraH .
kAraNatva.n cha kAryatva.n taTastha.n lakShaNa.n tayoH .. 32..
shAkhAyA.n chandra itivannaiva mukhyamidaM matam.h .
mahAprakAsha ityukta.n svarUpa.n chandralakShaNam.h .. 33..
sachchidAnandarUpatva.n svarUpa.n lakShaNa.n tayoH .
ekalakShaNayoraikya.n vAkyena pratipAdyate .. 34..
tasmAdekaprakAshatva.n sarvAtmatvamiti sthitam.h .
devatirya~NmanuShyANAM prakAshAnna pR^ithaksthitiH .. 35..
jIvaH prakAshAbhinnatvAtsarvAtmetyabhidhIyate .
evaM prakAsharUpatvaparij~nAne dR^iDhIkR^ite .. 36..
punarAvR^ittirahita.n kaivalyaM padamashnute .
sakR^itprasaktamAtro.api sarvAtmatva yadR^ichChayA .. 37..
sarvapApavinirmuktaH shivaloke mahIyate .
sarvAtmabhAvanA yasya paripakvA mahAtmanaH .
sa.nsAratArakaH sAkShAtsa eva parameshvaraH .. 38..
iti shrIdakShiNAmUrtistotrArthapratipAdake .
prabandhe mAnasollAse tR^itIyollAsasa.ngrahaH .. 39..
nAnAchChidraghaTodarasthitamahAdIpaprabhAbhAsvaraM
j~nAna.n yasya tu chakShurAdikaraNadvArA bahiHspandate .
jAnAmIti tameva bhAntamanubhAtyetatsamasta.n jagat.h
tasmai shrI gurumUrtaye nama ida.n shrIdakShiNAmUrtaye .. 4..
svataH santaH prakAshante bhAvA ghaTapaTAdayaH .
neshvarasya samAveshAdityasyottaramuchyate .. 1..
ahamityanusandhAtA jAnAmIti na chetsphuret.h .
kasya ko vA prakAsheta jagachcha syAtsuShuptavat.h .. 2..
prAgUrdhva.n chAsatA.n sattva.n vartamAne.api na svataH .
tasmAdIshe sthita.n sattvaM prAgUrdhvatvavivarjite .. 3..
svayameva prakAsheran.h jaDA yadi vineshvaram.h .
sarva.n sarvasya bhAseta na vA bhAseta ki~nchana .. 4..
tasmAtsarvaj~namaj~na.n vA jagatsyAdekarUpakam.h .
tulye svayaMprakAshatve jaDachetanayormithaH .. 5..
tulyameva prasajyeran.h grAhyagrAhakatAdayaH .
indriyANAmaniyamAchchAkShuShA syU rasAdayaH .. 6..
malinAmalinAdarshapashchAtprAgbhAgatulyayoH .
kriyAshaktij~nAnashaktyerantaHkaraNabhAgayoH .. 7..
pratibimbe sphurannIshaH kartA j~nAteti kathyate .
buddhiH sattvaguNotkarShAnnirmalo darpaNo yathA .. 8..
gR^ihNAti viShayachChAyAmAtmachChAyAnubhAvataH .
antaHkaraNasambandhAnnikhilAnIndriyANyapi .. 9..
rathA~Nganemivalaye kIlitA iva kIlakAH .
nADyo.antaHkaraNe syUtA jalasa.nsyUtasUtravat.h .. 10..
tAbhistu goLakAntAbhiH prasarpanti sphuli~Ngavat.h .
karaNAni samastAni yathAsva.n viShayaM prati .. 11..
dehasya madhyama.n sthAna.n mUlAdhAra itIryate .
gudAttu dvya~NgulAdUrdhvaM meDhrAttu dvya~NgulAdadhaH .. 12..
trikoNo.adhomukhAgrashcha kanyakAyonisannibhaH .
yatra kuNDalinI nAma parAshaktiH pratiShThitA .. 13..
prANAgnibindunAdAnA.n savitrI sA sarasvatI .
mUlAdhArAgrakoNasthA suShumnA brahmarandhragA .. 14..
mUle.ardhachChinnava.nshAbhA ShaDAdhArasamanvitA .
tatpArshvakoNayorjAte dve iDApi~Ngale sthite .. 15..
nADIchakramiti prAhuH tasmAnnADyaH samudgatAH .
gAndhArI hastijihvA cha nayanAntaM pradhAvataH .. 16..
nADIchakreNa sa.nsyUte nAsikAntamubhe gate .
nAbhimaNDalamAshritya kukkuTANDamiva sthitam.h .. 17..
nADIchakramiti prAhustasmAnnADyaH samudgatAH .
pUShA chAlAmbuShA nADI karNadvayamupAshrite .
nADI shuklAhvayA tasmAd.h bhrUmadhyamupasarpati .. 18..
sarasvatyAhvayA nADI jihvAntA vAkprasAriNI .
nADI vishvodarI nAma bhu~Nkte.anna.n sA chaturvidham.h .. 19..
pItvA payasvinI toya.n kaNThasthA kurute kShutam.h .
nADIchakrAtsamudbhUtA nADyastisrastvadhomukhAH .. 20..
rAkA shukla.n sinIvAlI mUtraM mu~nchetkuhurmalam.h .
bhuktAnnarasamAdAya sha~NkhinI dhamanI punaH .. 21..
kapAlakuhara.n gatvA mUrdhni sa~nchinute sudhAm.h .
shata.n chaikA cha nADyaH syustAsAmekA shirogatA .. 22..
tayordhvamAyanmuktaH syAditi vedAntashAsanam.h .
yadA buddhigataiH puNyaiH preritendriyamArgataH .. 23..
shabdAdIn.h viShayAn.h bhu~Nkte tadA jAgaritaM bhavet.h .
sa.nhR^iteShvindriyeShveShu jAgratsa.nskArajAnpumAn.h .. 24..
mAnasAnviShayAnbhu~Nkte svapnAvasthA tadA bhavet.h .
manasopyupasa.nhAraH suShuptiriti kathyate .. 25..
tatra mAyAsamAchChannaH sanmAtro vartate pumAn.h .
mUDho jaDo.aj~na ityevaM mAyAveshAtprakAshate .. 26..
sukhamasvApsamityevaM prabodhasamaye pumAn.h .
sachchidAnandarUpaH san.h samyageva prakAshate .. 27..
ittha.n jagatsamAvishya bhAsamAne maheshvare .
sUryAdayo.api bhAsante kimutAnye ghaTAdayaH .. 28..
tasmAtsattA sphurattA cha bhAvAnAmIshvarAshrayAt.h .
satya.n j~nAnamananta.n cha shrutyA brahmopadishyate .. 29..
jAgratsvapnodbhava.n sarvamasatya.n jaDamandhavat.h .
IshvarashchAhamityevaM bhAsate sarvajantuShu .. 30..
nirvikalpashcha shuddhashcha malinashchetyaha.n tridhA .
nirvikalpaM paraM brahma nirdhUtAkhilakalpanam.h .. 31..
dhUlyandhakAradhUmAbhranirmuktagaganopamam.h .
vivekasamaye shuddha.n dehAdInA.n vyapohanAt.h .. 32..
yathA.antarikSha.n sa.nkShipta.n nakShatraiH ki~nchidIkShyate .
dehendriyAdisa.nsargAnmalina.n kaluShIkR^itam.h .. 33..
yathA.a.akAsha.n tamorUDha.n sphuratyanavakAshavat.h .
ahamityaishvaraM bhAva.n yadA jIvaH prabudhyate .. 34..
sarvaj~naH sarvakartA cha tadA jIvo bhaviShyati .
mAyayAdhikasammUDho vidyayeshaH prakAshate .. 35..
nirvikalpAnusandhAne samyagAtmA prakAshate .
avidyAkhyatirodhAnavyapAye parameshvaraH .
dakShiNAmUrtirUposau svayameva prakAshate .. 36..
iti shrIdakShiNAmUrtistotrArthapratipAdake .
prabandhe mAnasollAse chaturthollAsasa.ngrahaH .. 37..
dehaM prANamapIndriyANyapi chalAM buddhi.n cha shUnya.n viduH
strIbAlAndhajaDopamAstvahamiti bhrAntA bhR^isha.n vAdinaH .
mAyAshaktivilAsakalpitamahAvyAmohasa.nhAriNe
tasmai shrI gurumUrtaye nama ida.n shrIdakShiNAmUrtaye .. 5..
pramANamekaM pratyakSha.n tattvaM bhUtachatuShTayam.h .
mokShashcha maraNAnnAnyaH kAmArthau puruShArthakau .. 1..
na hi khalvIshvaraH kartA paralokakathA vR^ithA .
deha.n vinA.asti chedAtmA kumbhavaddR^ishyatAM puraH .. 2..
hrasvo dIrgho yuvA bAla iti deho hi dR^ishyate .
asti jAtaH pariNato vR^iddhaH kShINo jaranmR^itaH .. 3..
ityevamuktAH ShaDbhAvavikArA dehasa.nshrayAH .
varNAshramavibhAgashcha deheShveva pratiShThitaH .. 4..
jAtakarmAdisa.nskAro dehasyaiva vidhIyate .
shata.n jIveti dehasya prayu~njantyAshiShaM shubhAm.h .. 5..
iti prapa~ncha.n chArvAko va.nchayatyalpachetanaH .
kechichChvasimi jIvAmi kShudhito.asmi pipAsitaH .. 6..
ityAdipratyayabalAtptANamAtmeti manvate .
kechichChR^iNomi pashyAmi jighrAmyA svAdayAmyaham.h .. 7..
itIndriyANAmAtmatvaM pratiyanti tatodhikam.h .
jAnAmipratyayabalAdbuddhirityapare jaguH .. 8..
mAyAvyAmUDhachittAnA.n teShA.n dUShaNamuchyate .
dehAdInA.n jaDArthAnAM pAShANavadanAtmanAm.h .. 9..
kathaM bhavedahambhAvaH samAvesha.n vineshituH .
dehastAvadaya.n nAtmA dR^ishyatvAchcha jaDatvataH .. 10..
rUpAdimattvAtsA.nshatvAdbhautikatvAchcha kumbhavat.h ..
mUrchChAsuShuptimaraNeshvapi dehaH pratIyate .. 11..
dehAdivyatiriktatvAttadA.a.atmA na prakAshate .
yathA jagatpravR^ittInAmAdikAraNama.nshumAn.h .. 12..
pumA.nstathaiva dehAdipravR^ittau kAraNaM param.h .
mama dehoyamityeva.n strIbAlAndhAshcha manvate .. 13..
dehohamiti nAvaiti kadAchidapi kashchana .
indriyANyapi nAtmAnaH karaNatvAtpradIpavat.h .. 14..
vINAdivAdyavachChrotra.n shabdagrahaNasAdhanam.h .
chakShustejastritayavadrUpagrahaNasAdhanam.h .. 15..
gandhasya grAhaka.n ghrANaM puShpasampuTakAdivat.h .
rasasya grAhikA jihvA dadhikShaudraghR^itAdivat.h .. 16..
indriyANi na me santi mUkondho badhirosmyaham.h .
ityAhurindriyairhInA janAH ki.n te nirAtmakAH .. 17..
prANopyAtmA na bhavati j~nAnAbhAvAtsuShuptiShu .
jAgratsvapnopabhogotthashramavichChittihetave .. 18..
suShuptiM puruShe prApte sharIramabhirakShitum.h .
sheShakarmobhogArthaM prANashcharati kevalam.h .. 19..
prANasya tatrAchaitanya.n karaNoparame yadi .
prANe vyApriyamANe tu karaNoparamaH katham.h .. 20..
samrAji hi raNodyukte viramanti na sainikAH .
tasmAnna karaNasvAmI prANo bhavitumarhati .. 21..
manasaH prerake pu.nsi virate viramantyataH .
karaNAni samastAni teShA.n svAmI tataH pumAn.h .. 22..
buddhistu kShaNikA vedyA gamAgamasamanvitA .
AtmanaH pratibimbena bhAsitA bhAsayejjagat.h .. 23..
Atmanyutpadyate buddhirAtmanyeva pralIyate .
prAgUrdhva.n chAsatI buddhiH svayameva na sidhyati .. 24..
j~nAnAchchetpUrvapUrvasmAduttarottarasambhavaH .
yugapadbahubuddhitvaM prasajyeta kShaNe kShaNe .. 25..
buddhyantara.n na janayennAshottramasattvataH .
eShA.n sa~NghAta AtmA chedekadeshe pR^ithakkR^ite .. 26..
na chaitanyaM prasajyeta sa~NghAtAbhAvatastadA .
bhinnadR^iggatyabhiprAye bahuchetanapu~njitam.h .. 27..
sadyo bhinnaM bhavedetanniShkriya.n vA bhaviShyati .
dehasyAntargatopyAtmA vyApta eveti budhyate .. 28..
aNupramANashchedeSha vyApnuyAnnAkhila.n vapuH .
dehapramANashchenna syAdbAlasya sthavirAditA .. 29..
dehavatpariNAmI chettadvadeva vina~NkShyati .
karmaNAM pariNAmena krimihastyAdimUrtiShu .. 30..
vyAptatvAtpravishatyAtmA ghaTAdiShvantarikShavat.h .
paramANupramANe.api manasi pratibhAsate .. 31..
svapne charAchara.n vishvamAtmanyeva pratiShThitam.h .
dehAdiShvahamityevaM bhramaH sa.nsArahetukaH .. 32..
antaH praviShTaH shAsteti mokShAyopAdishachChrutiH .
evameShA mahAmAyA vAdinAmapi mohinI .. 33..
yasmAtsAkShAtkR^ite sadyo lIyate cha sadAshive .
dehendriyAsuhInAya mAnadUrasvarUpiNe .
j~nAnAnandasvarUpAya dakShiNAmUrtaye namaH .. 34..
iti shrIdakShiNAmUrtistotrArtha pratipAdake .
prabandhe mAnasollAse pa~nchamollAsasa~NgrahaH .. 35..
rAhugrastadivAkarendusadR^isho mAyAsamAchChAdanAt.h
sanmAtraH karaNopasa.nharaNato yo.abhUtsuShuptaH pumAn.h .
prAgasvApsamiti prabodhasamaye yaH pratyabhij~nAyate
tasmai shrI gurumUrtaye nama ida.n shrIdakShiNAmUrtaye .. 6..
svapne vishva.n yathA.antastha.n jAgratyapi tatheti chet.h .
suShuptau kasya kiM bhAti kaH sthAyI tatra chetanaH .. 1..
sarva.n cha kShaNika.n shUnya.n sarvameva svalakShaNam.h .
sa~NghAtaH paramANUnAM mahyambvagnisamIraNAH .. 2..
manuShyAdisharIrANi skandhapa.nchakasa.nhatiH .
skandhAshcha rUpavij~nAnasa.nj~nAsa.nkAravedanAH .. 3..
rUpyanta iti rUpANi viShayAshchendriyANyapi .
viShayendriyayorj~nAna.n vij~nAnaskandha uchyate .. 4..
sa.nj~nAguNakriyAjAtivishiShTapratyayAtmikA .
pa~nchadhA kalpanA proktA sa.nj~nAskandhasya saugataiH .. 5..
gavA.n gauriti sa.nj~noktA jAtirgotva.n tu gogatam.h .
guNAH shuklAdayastasya gachChatyAdyAstathA .. 6..
shR^i~NgI chatuShpAllA~NgUlI vishiShTapratyayo hyasau .
evaM pa~nchavidhA klR^iptaH sa.nj~nAskandha itIryate .. 7..
rAgAdyAH puNyapApe cha sa.nskAraskandha uchyate .
sukha.n duHkha.n cha mokShashcha skandhaH syAdvedanAhvayaH .. 8..
pa~nchabhya eva skandhebhyo nAnya AtmAsti kashchana .
na kashchadIshvaraH kartA svagatAtishaya.n jagat.h .. 9..
skandhebhyaH paramANubhyaH kShaNikebhyo.abhijAyate .
pUrvapUrvakShaNAdeva kShaNaH syAduttarottaraH .. 10..
pUrvasmAdeva hi j~nAnAjjAyate j~nAnamuttaram.h .
sa evAyamiti j~nAna.n seya.n jvAleva vibhramaH .. 11..
asti bhAtItidhIbhrAntairAtmAnAtmasu kalpyate .
hAnopAdAnarAhityAdAkAshaH kiM prakAshate .. 12..
ityevaM bauddhasiddhAntI bhAShamANo niShiddhyate .
shUnya.n chejjagato hetuH jagadeva na siddhyati .. 13..
ghaTaH shUnyaH paTaH shUnyaH iti kaiH pratipAdyate .
naiva bhAseta shUnya.n chejjagannaraviShANavat.h .. 14..
vastvarthI kimupAdadyAdbhArArthaH kiM parityajet.h .
ko vidadhyAnniShiddhyedvA shUnyatvAtsvasya chAtmanaH .. 15..
avasIdennIrAkUta.n tasmAtsarvamida.n jagat.h .
skandhAnAM paramANUnA.n na sa~NghAtayitAsti chet.h .. 16..
sa~NghAto na vinA hetu.n jaDA ghaTapaTAdayaH .
mahAnubhAvo bhUyAsamiti bhrAntashcha manyate .. 17..
AtmApalApako bauddhaH kimartha.n charati vratam.h .
pratyabhij~nA yadi bhrAntiH bhojanAdi kathaM bhavet.h .. 18..
iShTasAdhanamevaitadanna.n gatadinAnnavat.h .
iti nishchitya bAlo.api bhojanAdau pravartate .. 19..
avakAshapradAtR^itvamAkAshArthakriyA yathA .
tathaivArthakriyA pu.nsaH kartR^itvaj~nAtR^itAdikA .. 20..
suShuptisamayepyAtmA satyaj~nAnasukhAtmakaH .
sukhamasvApsamityevaM pratyabhij~nAyate yataH .. 21..
pratyabhij~nAyata iti prayogaH karmakartari .
AtmA svayaMprakAshAtvAjjAnAtyAtmAnamAtmanA .. 22..
suShuptau mAyayA mUDhaH jaDondha iti lakShyate .
aprakAshatayA bhAti svaprakAshatayApi cha .. 23..
jaDAtmani cha dehAdau sAkShAdIsho vivichyate .
eShaiva mohinI nAma mAyAshaktirmaheshituH .. 24..
mohApohaH pramAtR^INAM mokSha ityabhidhIyate .
avasthAtrayanirmukto doShadibhiranAvilaH .. 25..
iShIka iva sanmAtro nyagrodhakaNikopamaH .
bAhyAbAhyadaLonmuktakadaLIkandasannibhaH .. 26..
nira.nsho nirvikArashcha nirAbhAso nira~njanaH .
puruShaH kevalaH pUrNaH prochyate parameshvaraH .. 27..
vAcho yatra nivartante mano yatra vilIyate .
ekIbhavanti yatraiva bhUtAni bhuvanAni cha .. 28..
samastAni cha tattvAni samudre sindhavo yathA .
kaH shokastatra ko moha ekatvamanupashyataH .. 29..
vAchyavAchakarUpatvAtsavikalpo.api sannayam.h .
dehAdInA.n vyapohena sambhavennirvikalpakam.h .. 30..
asanneva bhavedvidvAnasadbrahmeti veda chet .
asti brahmeti chedveda santemena.n tato viduH .. 31..
iti shrIdakShiNAmUrtistotrArthapratipAdake .
prabandhe mAnasollAse ShaShThollAsasya sa~NgrahaH .. 32..
bAlyAdiShvapi jAgradAdiShu tathA sarvAsvavasthAsvapi
vyAvR^ittAsvanuvartamAnamahamityantaH sphuranta.n sadA .
svAtmAnaM prakaTIkaroti bhajatA.n yo mudrayA bhadrayA
tasmai shrI gurumUrtaye nama ida.n shrIdakShiNAmUrtaye .. 7..
pratyabhij~nAbalAdAtmA sthAyI nirdhAryate yadi .
kA nAma pratyabhij~naiShA ki.n vA tasyAH prayojanam.h .. 1..
pratyakShAdipramANeShu pratyabhij~nA na paThyate .
katha.n tasyAH pramANatvamiti pR^ichChan.h prabodhyate .. 2..
bhAtasya kasya chitpUrvaM bhAsamAnasya sAmpratam.h .
so.ayamityanusandhAnaM pratyabhij~nAnamuchyate .. 3..
taddeshakAlAkArAdInavadhUyAnuSh~NgikAn.h .
yathaika.n vastvanusyUta.n so.ayamityabhidhIyate .. 4..
mAyAnuSh~Ngasa~njAtaki~nchijj~natvAdyapohanAt.h .
sarvaj~natvAdivij~nAnaM pratyabhij~nAnamAtmanaH .. 5..
pUrvajanmAnubhUtArthasmaraNAnmR^igashAbakaH .
jananIstanyapAnAya svayameva pravartate .. 6..
tasmAnnishchIyate sthAyItyAtmA dehAntareShvapi .
smR^iti.n vinA na ghaTate stanyapAna.n shishoryataH .. 7..
pUrvatrAnubhave kAle smR^itikAle paratra san.h .
AtmA sa.nskArarUpeNa smaratyartha.n svaniShThitam.h .. 8..
pratyabhij~neti bhAvAnA.n smR^itishchedabhidhIyate .
Atmasthairye pramANatva.n smR^itishcha prApnuyAtkatham.h .. 9..
smR^itau prakAsho nArthasya na chApyarthasya nishchayaH .
na chApyarthAnubhavayora~Ngulyoriva sambhavet.h .. 10..
nAnubhUtivishiShTasya padArthasya cha daNDivat.h .
sarvatrApyevamityevaM prasa~NgAditi chechChR^iNu .. 11..
prAktanAnubhave naShTe tadavaShTambhasambhavAt.h .
sa.nskArasa.nj~nAtsAmagryAt.h pauruShAjjAyate smR^itiH .. 12..
AvedyAnubhave naShTe tadIyaM viShayaM prati .
anubhAvakamAtmAnaM bodhayatyanapAyinam.h .. 13..
viShaye cha pramuShite naShTe vA.anubhave sati .
svavishrAnta.n smaratyartha.n devo.apramuShitaH sadA .. 14..
pramoShaNaM pramAtR^INAM mAyayA tamasA kR^itam.h .
mAyAvidye prabhoH shaktI bhAnoshChAyAprabhopame .. 15..
arthAnAchChadayenmAyA vidyA vyAkShipya darshayet.h .
pratyabhij~naiva sarveShAM pramANAnA.n cha sAdhanam.h .. 16..
Ishvaronyohamapyanya iti vichChedakAriNIm.h .
vyAkShipya vidyayA mAyAmIshvarohamiti smR^itiH .. 17..
IShatprakAshobhUdIsho mAyAyavanikAvR^itaH .
samyagAvaraNApAye sahasrA.nshuriva sphuret.h .. 18..
na kAraNAnA.n vyApAraH pramANAnA.n na vA punaH .
pratyabhij~nApana.n nAma mohApasaraNaM param.h .. 19..
yAvanti santi mAnAni vyavahArapravR^ittaye .
teShAM mohApasaraNAdvyapAronyo na vidyate .. 20..
jaDAnR^itaparichChinnadehadharmAshchidAtmani .
satyaj~nAnasukhAtmatvaM mohAddehe.api kalpyate .. 21..
shuktau rajatamityeva.n yathA vyAmuhyate.anyathA .
saeva rrUpya.n chedbhAti vilayaste na sidhyati .. 22
nAtyantAsatprakAsheta narashR^i~NgAdivatkvachit.h .
kAntAkarAdau rajatamiti syAtsmaraNaM bhrame .. 23..
teneda.n tulyamityeva.n syAtsAdR^ishyAdyadi bhramaH .
pItaH sha~Nkho guDastikta ityAdau nAsti tulyatA .. 24..
tAdAtmyena sphurati chedrajatatvena shuktikA .
vibhramo niradhiShThAno bAdho niravadhirbhavet.h .. 25..
buddhisthita.n chedrajataM bAhyatvena pratIyate .
gu~njAdau jvalanArope dehadAhaH prasajyate .. 26..
yuktihInaprakAshatvAd.h bhrAnterna hyasti lakShaNam.h .
yadi syAllakShaNa.n ki.nchid.h bhrAntireva na sidhyati .. 27..
jalachandravadekasminnirbhaye rajjusarpavat.h .
pratIyate yathA svarNe kAraNe kaTakAdivat.h .. 28..
upAtte rUpyavachChuktau vyApte yakShapurIva khe .
rashmyambuvatsphuradrUpe sthANau choravadakriye .. 29..
asatkalpamida.n vishvamAtmanyAropyate bhramAt.h .
svayaMprakAsha.n sadrUpaM bhrAntibAdhavivarjitam.h .. 30..
pratyabhij~nAyate vastu prAgvanmohe vyapohite .
dehAdyupAdhau nirdhUte syAdAtmaiva maheshvaraH .. 31..
smR^itiH pratyakShamaitihyamityAdInyaparANyapi .
pramANAnyAptavAgAha pratyabhij~nAprasiddhaye .. 32..
iti shrIdakShiNAmUrtistotrArthapratipAdake .
prabandhe mAnasollAse saptamollAsasa~NgrahaH .. 33..
vishvaM pashyati kAryakAraNatayA svasvAmisaMbandhataH
shiShyAchAryatayA tathaiva pitR^iputrAdyAtmanA bhedataH .
svapne jAgrati vA eSha puruSho mAyAparibhrAmitaH
tasmai shrI gurumUrtaye nama ida.n shrIdakShiNAmUrtaye .. 8..
prakAshavyatirekeNa padArthaH ko.api nAsti chet.h .
paramArthopadeshAnto vyavahAraH kathaM bhavet.h .. 1..
kasya bandhashcha mokShashcha badhyate kena hetunA .
mAyayA lakShaNa.n ki.n syAdityevaM paripR^ichChataH .. 2..
prashanaH syAduttara.n vaktuM pratipattu.n sukhena cha .
uktorthaH saptabhiH shlokaiH punaH sa.nkShipya kathyate .. 3..
paunaruktya.n na doSho.atra shabdenArthena vA bhavet.h .
abhyAsena garIyastvamarthasya pratipAdyate .. 4..
svayaMprakAshe sadrUpe.apyekasminparameshvare .
kAryakAraNasambandhAdyanekavidhakalpanA .. 5..
rAhoH shiraH suShiH khasya mamAtmA pratimAvapuH .
ityAdikalpanA tulyA na pR^ithagvastugocharA .. 6..
upAsyopAsakatvena gurushiShyakrameNa cha .
svAmibhR^itAdirUpeNa krIDati svechChayeshvaraH .. 7..
pitaraM prati putro yaH putraM prati pitaiva saH .
eka eva hi nAneva kalpyate shabdamAtrataH .. 8..
tasmAtprakAsha evAsti paramArthanirUpaNe .
bhedapratItirmithyaiva mAyayA.a.atmani kalpitA .. 9..
mithyAtva.n nAma bAdhyatva.n samyagj~nAnodaye sati .
shiShyAchAryopadeshAdi svapnavatpratibhAsate .. 10..
mithyAbhUto.api vedAntaH satyamarthaM prabodhayet.h .
devatApratimAvachcha chitravatpratibimbavat.h .. 11..
sarvo.api vyavahAro.ayaM mAyayA parijR^imbhaNam.h .
suShuptisadR^ishI mAyA svaprabodhena bAdhyate .. 12..
yuktihInaprakAshasya sa.nj~nA mAyeti kathyate .
nAsatI dR^ishyamAnA sA bAdhyamAnA na vA satI .. 13..
na prakAshAdiyaM bhinnA ChAyevArkasya tAmasI .
na chAbhinnA jaDatvena virodhAnnobhayAtmikA .. 14..
svahetvavayavAbhAvAnneya.n sAvayavochyate .
na chAvayavahInA sA kAryeShvavayavAnvitA .. 15..
avichAritasiddheyaM mAyAveshyAvilAsinI .
puruSha.n va~nchayatyeva mithyAbhUtaiH svavibhramaiH .. 16..
na tasyA mUlavichChedamabhivA~nChati kechana .
teShAM pakShe kathaM mokSho manasaH sambhaviShyati .. 17..
tisropyavasthA manaso jAgratsvapnasuShuptayaH .
chakravatparivartante bhedabhrAntyekahetavaH .. 18..
tAbhiH karoti karmANi punastairbadhyate manaH .
manasaH kevalaH sAkShI bhAnuvatpuruShaH paraH .. 19..
yathA prANikR^itairarkaH karmabhirnaiva badhyate .
tathA manaHkR^itairAtmA sAkShitvAnnaiva badhyate .. 20..
AtmA karoti karmANi badhyate muchyate cha taiH .
ityaupachArikI klR^iptirbhramamAtraiva kevalam.h .. 21..
dhUmAbhradhUlInIhArairaspR^iShTo.api divAkaraH .
yathA Channa ivAbhAti tathaivAtmA.api mAyayA .. 22..
yathA lIlAvashAtkashchidbhrAmyamANaH kumArakaH .
bhramattatpashyati jagat.h shatachandra.n nabhaHsthalam.h .. 23..
tathaiva mAyayA jIvo bhrAmito vAsanAvashAt.h .
nAnAkAramida.n vishvaM bhramamANa.n cha pashyati .. 24..
sa.nsR^ijya manasA devaH sa.nsaranniva lakShyate .
yathA.arko jalasa.nsargAcchalannAneva lakShyate .. 25..
yogAbhyAsavashAdyena mano nirviShaya.n kR^itam.h .
nivR^ittaH sa pumA.nsadyo jIvanmukto bhaviShyati .. 26..
dvA suparNau cha sayujAbhavanmAyayA shivaH .
ajAmekA.n juShanneko nAnevAsIditi shrutiH .. 27..
iti shrIdakShiNAmUrtistotrArthapratipAdake .
prabandhe mAnasollAse aShTamollAsasa~NgrahaH .. 28..
bhUrambhA.nsyanalo.anilo.ambaramaharnAtho himA.nshuH pumAn.h
ityAbhAti charAcharAtmakamida.n yasyaiva mUrtyaShTakam.h .
nAnyatki~nchana vidyate vimR^ishatA.n yasmAtparasmAdvibhoH
tasmai shrI gurumUrtaye nama ida.n shrIdakShiNAmUrtaye .. 9..
kathameva.nvidhA mAyA nivarteteti pR^ichChataH .
IshvaropAsanArUpastadupAyaH prakIrtyate .. 1..
ShaTtri.nshattattvarUpAsu parameshvaramUrtiShu .
pratyakSheNopalabhyante sarvairapyaShTamUrtayaH .. 2..
ameyAsu manaH kShipramAroDhu.n nArhatItyataH .
mUrtyaShTakamayIM brUta guruH sarvAtmabhAvanAm.h .. 3..
virATCharIre brahmANDe prANinAmapi vigrahe .
ShaTtri.nshattattvasa~NghAtaH sarvatrApyanuvartate .. 4..
vyAptirvyaShTisharIre.asminmanaso vyaShTirUpiNaH .
tasmAtsarvAtmakamida.n svasharIra.n vichintayet.h .. 5..
vyaShTyupAsanayA pu.nsaH samaShTivyAptimApnuyAt.h .
upasa.nkrAmatItyeva.n dashakR^itva upAdishat.h .. 6..
brahmANDasyodare lokAH saptabhUrAdayaH smR^itAH .
mUlAdibrahmarandhrAnteShvAdhAreShu vasanti te .. 7..
vINAdaNDo mahAmerusthIni kulaparvatAH .
ga~NgA tu pi~NgaLA nADI yamuneDA prakIrtitA .. 8..
sarasvatI suShumnoktA nADyonyAH puNyanimnagAH .
dvIpAH syurdhAtavaH sapta svedabAShpAdayobdhayaH .. 9..
mUle tiShThati kAlAgnirasthimadhye cha bADabaH .
vaidyutogniH suShumnAyAM pArthivo nAbhimaNDale .. 10..
hR^idi tiShThati sUryAgniH kapAle chandramaNDalam.h .
nakShatrANyaparANyAhurnetrAdInIndriyANyapi .. 11..
dhAryante vAyubhirlokAH yathA pravahaNAdibhiH .
prANAdibhirdashavidhairdhAryate vAyubhirvapuH .. 12..
prApyeDApi~NgaLe prANo mUlAtsUryasvarUpataH .
nAsikAbhyAM bahirgatvA lIyate dviShaDa~Ngule .. 13..
aShTA~NguLena somAtmA nADIbhyAmantarAvishat.h .
malamUtramaruchChukrANyapAno visR^ijedbahiH .. 14..
agnIShomamayo bhUtvA suShumnArandhramAshritaH .
AbrahmarandhramudgachChannudAno vardhate svayam.h .. 15..
vyApayedvapuShi vyAno bhuktAnnarasamanvaham.h .
sandhukShaNa.n samAnastu kAyAgneH kurute sadA .. 16..
nAgo hikkAkaraH kUrmo nimeShonmeShakArakaH .
kShuta.n karoti kR^ikaro devadatto vijR^imbhaNam.h .. 17..
sthaulya.n dhana~njayaH kuryAnmR^ita.n chApi na mu~nchati .
AkAsho bahirapyantaravakAshaM prayachChati .. 18..
chandrArkau kAlanetArau prANApAnau sharIriNAm.h .
sAkShI puruSha ityevaM mUrtyaShTakamida.n vapuH .. 19..
samanaskamida.n yogI sevamAna upAsanam.h .
aShTA~NgayogayuktaH sannamanaska.n sa gachChati . 20..
manaH prasAdaH santoSho maunamindriyanigrahaH .
dayA dAkShiNyamAstikyamArjavaM mArdava.n kShamA .. 21..
bhAvashuddhirahi.nsA cha brahmacharya.n smR^itirdhR^itiH .
ityevamAdayonye cha manaH sAdhyA yamAH smR^itAH .. 22..
snAna.n shaucha.n kratuH satya.n japo homashcha tarpaNam.h .
tapo dAna.n titikShA cha namaskAraH pradakShiNam.h .. 23..
vratopavAsAdyAshchAnye kAyikA niyamAH smR^itAH .
svastika.n gomukhaM padya.n ha.nsAkhyaM brAhmamAsanam.h .. 24..
nR^isi.nha.n garuDa.n kUrma.n nAgAkhya.n vaiShNavAsanam.h .
vIraM mayUra.n vajrAkhya.n siddhAkhya.n raudramAsanam.h .. 25..
yonyAsana.n viduH shAkta.n shaivaM pashchimatAnakam.h .
nirAlambanayogasya nirAlambanamAsanam.h .. 26..
nirAlambatayA dhyAna.n nirAlambaH sadAshivaH .
rechakaH pUrakashchaiva kumbhakaH prANasa.nyamaH .. 27..
indriyANA.n samastAnA.n viShayebhyo nivAraNam.h .
pratyAhAra iti proktaM pratyAhArArthavedibhiH .. 28..
AdhAre kvApi manasaH sthApana.n dhAraNochyate .
brahmaviShNushivAdInA.n chintA dhyAnaM prachakShate .. 29..
dhyAnAdaspandanaM buddheH samAdhirabhidhIyate .
amanaskasamAdhistu sarvachintAvivarjitam.h .. 30..
chitte nishchalatA.n yAte prANo bhavati nishchalaH .
chittasya nishchalatvAya yoga.n sadhyAnamabhyaset.h .. 31..
Aku~nchanamapAnasya prANasya cha nirodhanam.h .
lambikopari jihvAyAH sthApana.n yogasAdhanam.h .. 32..
chitte nishchalatA.n yAte prANe madhyapatha.n gate .
chihnAnyetAni jAyante pa~nchabhUtajayAtpR^ithak.h .. 33..
malamUtrakaphAlpatvamArogya.n laghutA tanoH .
sugandhaH svarNa##[##svara##]## varNatvaM prathama.n yogalakShaNam.h .. 34..
kaNTakAgreShvasa~Ngatva.n jalapa~NkeShvamajjanam.h .
kShuttR^iDAdisahiShNutva.n dvitIya.n yogalakShaNam.h .. 35..
bahvannapAnabhoktR^itvamAtapAgnisahiShNutA .
darshana.n shravaNa.n dUrAttR^itIya.n yogalakShaNam.h .. 36..
maNDUkaplavanaM bhUmau markaTaplavana.n drume .
AkAshagamana.n cheti chaturtha.n yogalakShaNam.h .. 37..
j~nAna.n trikAlaviShayamaishvaryamaNimAdikam.h .
anantashaktimatva.n cha pa~nchama.n yogalakShaNam.h .. 38..
prANe suShumnA.n samprApte nAdontaH shrUyateShTadhA .
ghaNTAdundubhisha~NkhAbdhivINAveNvAditAlavat.h .. 39..
tanUnapAttaTittArAtAreshatapanopamam.h .
brahmanADI.n gate prANe bimbarUpaM prakAshate .. 40..
shvAsAshcharanti yAvanto manuShyasya dinaM prati .
tAvanti yojanAnyarkaH shvAseshvAse pradhAvati .. 41..
ekavi.nshatisAhasra.n ShaTChata.n shvAsasa~NkhyayA .
so.ahamityuchcharatyAtmA mantraM pratyahamAyuShe .. 42..
sakAra.n cha hakAra.n cha lopayitvA prayojayet.h .
sandhi.n vai pUrvarUpAkhya.n tato.asau praNavo bhavet.h .. 43..
akArashchApyukArashcha makAro bindunAdakau .
pa~nchAkSharANyamUnyAhuH praNavasthAni paNDitAH ..
brahmA viShNushcha rudrashchApIshvarashcha sadAshivaH .
teShvakShareShu tiShThanti ShaTtri.nshattattvasa.nyutAH .. 45..
guruprasAdAllabhate yogamaShTA~NgalakShaNam.h .
shivaprasAdAllabhate yogasiddhi.n cha shAshvatIm.h .. 46..
sachchidAnandarUpAya bindunAdAntarAtmane .
AdimadhyAntashUnyAya gurUNA.n gurave namaH .. 47..
iti shrIdakShiNAmUrtistotrArthapratipAdake .
prabandhe mAnasollAse navamollAsasa~NgrahaH .. 48..
sarvAtmatvamiti sphuTIkR^itamida.n yasmAdamuShmi.nstave
tenAsya shravaNAttadarthamananAddhyAnAchcha sa.nkIrtanAt.h .
sarvAtmatvamahAvibhUtisahita.n syAdIshvaratva.n svataH
siddhyettatpunaraShTadhA pariNata.n chaishvaryamavyAhatam.h .. 10..
parichChinnamahambhAvaM parityajyAnuSha~Ngikam.h .
pUrNAhambhAvalAbhosya stotrasya phalamuchyate .. 1..
putrapautragR^ihakShetradhanadhAnyasamR^iddhayaH .
arvAchInAshcha sidhyanti svargapAtALabhUmiShu .. 2..
pAke pravartamAnasya shItAdiparihAravat.h .
prAsa~NgikAshcha sidhyanti stotreNAnena sarvadA .. 3..
aishvaryamIshvaratva.n hi tasya nAsti pR^ithaksthitiH .
puruShe dhAvamAne.api ChAyA tamanudhAvati .. 4..
anantashaktiraishvarya.n niShyandAshchANimAdayaH .
svasyeshvaratve sa.nsiddhe sidhyanti svayameva hi .. 5..
yadIyaishvaryavipruDbhirbrahmaviShNushivAdayaH .
aishvaryavanto shAsante sa evAtmA sadAshivaH .. 6..
puShpamAnayatA gandho vinechChAmanubhUyate .
pUrNAhambhAvayuktena parichChinnA vibhUtayaH .. 7..
aNimA mahimA chaiva garimA laghimA tathA .
prAptiH prAkAmyamIshitva.n vashitva.n chAShTasiddhayaH .. 8..
atyantamaNuShu prANiShvAtmatvena praveshanam.h .
aNimAsa.nj~namaishvarya.n vyAptasya paramAtmanaH .. 9..
brahmANDAdishivAntAyAH ShaTtri.nshattattvasa.nhateH .
bahishcha vyApyavR^ittitvamaishvaryaM mahimAhvayam.h .. 10..
mahAmerusamA~Ngasya samuddharaNakarmaNi .
lAghave tUlatulyatva.n laghimAna.n vidurbudhAH .. 11..
paramANusamA~Ngasya samuddharaNakarmaNi .
gurave merutulyatva.n garimANa.n vidurbudhAH .. 12..
pAtAlavAsinaH pu.nso brahmalokAvalokanam.h .
prAptirnAma mahaishvarya.n suduShprApamayoginAm.h .. 13..
AkAshagamanAdInAmanyAsa.n siddhisampadAm.h .
svechChAmAtreNa sa.nsiddhiH prAkAmyamabhidhIyate .. 14..
svasharIraprakAshena sarvArthAnAM prakAshanam.h .
prAkAshyamidamaishvaryamiti kechitprachakShate .. 15..
svechChAmAtreNa lokAnA.n sR^iShTisthityantakartR^itA .
sUryAdinA.n niyoktR^itvamIshitvamabhidhIyate .. 16..
salokapAlAH sarve.api lokAH svavashavartinaH .
tadaishvarya.n vashitvAkhya.n sulabha.n shivayoginAm.h .. 17..
yastvevaM brAhmaNo vetti tasya devA vashe sthitAH .
kiM punaH kShmApativyAghravyALastrIpuruShAdayaH .. 18..
sarvAtmabhAvasAmrAjyanirantaritachetasAm.h .
paripakvasamAdhInA.n ki.n ki.n nAma na sidhyati .. 19..
stotrametatpaTheddhImAnsarvAtmatva.n cha bhAvayet.h .
arvAchIne spR^ihAM muktvA phale svargAdisambhave .. 20..
svargAdirAjya.n sAmrAjyaM manute na hi paNDitaH .
tadeva tasya sAmrAjya.n yattu svArAjyamAtmani .. 21..
sarvAtmabhAvanAvanta.n sevante sarvasiddhayaH .
tasmAdAtmani sAmrAjya.n kuryAnniyatamAnasaH .. 22..
yasya deve parA bhaktiryathA deve tathA gurau .
tasyaite kathitA hyarthAH prakAshante mahAtmanaH .. 23..
prakAshAtmikayA shaktyA prakAshAnAM prabhAkaraH .
prakAshayati yo vishvaM prakAsho.ayaM prakAshatAm.h .. 24..
iti shrIdakShiNAmUrtistotrArthapratipAdake .
prabandhe mAnasollAse dashammollAsasa~NgrahaH .. 25..
iti shrImachCha~NkarabhagavatpAdAchAryakR^ita
dakShiNAmUrtistotrabhAvArthavArtika.n
sureshvarAchAryakR^ita.n samAptam.h ..
OM tat sat ..
##
\medskip\hrule\medskip
Encoded and proofread by Sunder Hattangadi

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}