यमप्रोक्तं महादेवार्चनमहिमवर्णनम्
श्रीयम उवाच -
महादेवार्चने प्रीतिर्यस्य तिष्ठत्यचञ्चला ।
तस्यापि मुक्तिः भालाक्षपूजकस्य तु किं पुनः ॥ १७५॥
प्राप्यते सर्वथा मुक्तिः शिवपूजकपूजकैः ।
मुक्तिर्न लभ्यते कि तैः साक्षाच्छङ्करपूजकैः ॥ १७६॥
शिवलिङ्गार्चनं कृत्वा शिवलिङ्गस्य सन्निधौ ।
येन त्यक्ता तनुस्तेन मुक्तिः प्राप्यैव सर्वथा ॥ १७७॥
भस्मधारणमात्रेण मुक्तिः सम्प्राप्यते नरैः ।
ततः कथं न सम्प्राप्या मुक्तिः शङ्करपूजया ॥ १७८॥
शिवपूजनरुद्राक्षभस्मधारणतत्परः ।
कीकटोऽपि तनुं त्यक्त्वा शिवरूपं प्रयान्ति हि ॥ १७९॥
शिवपूजनमाहात्म्यं शिवो वेत्त्येव नापरः ।
तदन्यैस्तत्कथं ज्ञेयं तत्त्वतोऽस्माभिरीदृशैः ॥ १८०॥
रत्नतत्त्वं विजान्ति सम्यग्रत्नपरीक्षकाः ।
तथा शिवार्चनस्यापि माहात्म्यं वेत्ति शङ्करः ॥ १८१॥
अतः परं हि तं वक्ष्ये शृण्वन्त्वत्यन्तयत्नतः ।
कर्तव्यमपि चक्ष्येऽहमप्रमादेन सादरम् ॥ १८२॥
त्रिपुण्ड्रमात्रं यद्भाले भासते भस्मना कृतम् ।
तान्दृष्ट्वा प्रियमेधा स प्रार्चतार्ध्यादिसाधनैः ॥ १८३ ॥
त्रिपुण्ड्ररुद्राक्षधरः शिवपूजापरायणः ।
शिव एवेति विज्ञयो भवद्भिः सर्वथा भटाः ॥ १८४॥
भासते भालमनिशं यस्य केवलभस्मना ।
तत्तु भालाक्षभालेऽपि लिख्यते नैव संशयः ॥ १८५॥
भस्मरेखात्रयं शुद्धं तद्भालाक्षाक्षरत्रयम् ।
भालपट्टे भस्मरेखास्वरूपैस्त्रिभिरक्षरैः ॥ १८६॥
भालाक्षता भाविनीति भालाक्षाक्षरलेखनम् ।
अतः केवलभस्माङ्गाः शिवपूजापरायणाः ॥ १८७॥
शिवाकारा इति ज्ञेयाः सत्यं सत्यं न संशयः ।
भस्मोद्धूलितसर्वाङ्गान्दृष्ट्वा सोत्साहमन्वहम् ॥ १८८॥
पूजयन्त्यतियत्नेन भ्रमालस्यविवर्जिताः ।
रुद्राक्षमालाभरणान्भस्मधारणपूर्वकम् ॥ १८९॥
पूजयन्त्यतियत्नेन भ्रमालस्यविवर्जिताः ।
शिवलिङ्गार्चनासक्तान् भस्मधारणपूर्वकम् ॥ १९०॥
पूजयन्त्यतियत्नेन भ्रमालस्यविवर्जिताः ।
शिवप्रदक्षिणासक्तान् भस्मधारणपूर्वकम् ॥ १९१॥
पूजयन्त्यतियत्नेन भ्रमालस्यविवर्जिताः ।
धूपदान् शङ्करस्थाने भस्मधारणपूर्वकम् ॥ १९२॥
पूजयन्त्यतियत्नेन भ्रमालस्यविवर्जिताः ।
दीपदान् शङ्करस्थाने भस्मधारणपूर्वकम् ॥ १९३॥
पूजयन्त्यतियत्नेन भ्रमालस्यविवर्जिताः ।
शिवाग्रे नर्तनासक्तान्भस्मधारणपूर्वकम् ॥ १९७॥
पूजयन्त्यतियत्नेन भ्रमालस्यविवर्जिताः ।
सोमवारव्रतपरान् भस्मधारणपूर्वकम् ॥ १९५॥
पूजयन्त्यतियत्नेन भ्रमालस्यविवर्जिताः ।
प्रदोषपूजनासक्तान्भस्मधारणपूर्वकम् ॥ १९६॥
पूजयन्त्यतियत्नेन भ्रमालस्यविवर्जिताः ।
रुद्राभिषेकसंसक्तान्भस्मधारणपूर्वकम् ॥ १९७॥
पूजयन्त्यतियत्नेन भ्रमालस्यविवर्जिताः ।
शिवभक्तार्चनपरान्भस्मोद्धूलनपूर्वकम् ॥ १९८॥
पूजयन्त्यतियत्नेन भ्रमालस्यविवर्जिताः ।
बिल्वपत्रार्चनपरान् भस्मोद्धूलनपूर्वकम् ॥ १९९॥
पूजयन्त्यतियत्नेन भ्रमालस्यविवर्जिताः ।
बिल्वरोपणसंसक्तान् भस्मोद्धूलनपूर्वकम् ॥ २००॥
॥ इति शिवरहस्यान्तर्गते यमप्रोक्तं महादेवार्चनमहिमवर्णनं सम्पूर्णम् ॥
- ॥ श्रीशिवरहस्यम् उग्राख्यः सप्तमांशः । अध्यायः १७ । १७५-२०१॥
- .. shrIshivarahasyam ugrAkhyaH saptamAMshaH . adhyAyaH 17 . 175-201 ..
Notes:
Yama यम outlines the merits of worshiping Mahādeva Śiva महादेव शिव by several ways; and highlights the importance of application of Bhasma भस्म in the process.
Encoded and proofread by Ruma Dewan